Reader
Reader | Metamorphoses, Book 15
Metamorphoses
Ovid
Text
Position
Line 1 of 880
Waypoints
| Line Ref | Hugo Magnus | Latin |
|---|---|
| 1 | Primary Quaeritur interea quis tantae pondera molis |
| 2 | Primary sustineat tantoque queat succedere regi: |
| 3 | Primary destinat imperio clarum praenuntia veri |
| 4 | Primary fama Numam; non ille satis cognosse Sabinae |
| 5 | Primary gentis habet ritus: animo maiora capaci |
| 6 | Primary concipit et, quae sit rerum natura, requirit. |
| 7 | Primary Huius amor curae, patria Curibusque relictis, |
| 8 | Primary fecit ut Herculei penetraret ad hospitis urbem. |
| 9 | Primary Graia quis Italicis auctor posuisset in oris |
| 10 | Primary moenia, quaerenti sic e senioribus unus |
| 11 | Primary rettulit indigenis, veteris non inscius aevi: |
| 12 | Primary “Dives ab Oceano bubus Iove natus Hiberis |
| 13 | Primary litora felici tenuisse Lacinia cursu |
| 14 | Primary fertur et, armento teneras errante per herbas, |
| 15 | Primary ipse domum magni nec inhospita tecta Crotonis |
| 16 | Primary intrasse et requie longum relevasse laborem |
| 17 | Primary atque ita discedens “aevo” dixisse “nepotum |
| 18 | Primary hic locus urbis erit”; promissaque vera fuerunt. |
| 19 | Primary Nam fuit Argolico generatus Alemone quidam |
| 20 | Primary Myscelos, illius dis acceptissimus aevi. |
| 21 | Primary Hunc super incumbens pressum gravitate soporis |
| 22 | Primary claviger adloquitur: “Lapidosas Aesaris undas |
| 23 | Primary i, pete diversi! Patrias, age, desere sedes!” |
| 24 | Primary et, nisi paruerit multa ac metuenda minatur; |
| 25 | Primary post ea discedunt pariter somnusque deusque. |
| 26 | Primary Surgit Alemonides tacitaque recentia mente |
| 27 | Primary visa refert, pugnatque diu sententia secum: |
| 28 | Primary numen abire iubet, prohibent discedere leges, |
| 29 | Primary poenaque mors posita est patriam mutare volenti. |
| 30 | Primary Candidus Oceano nitidum caput abdiderat Sol, |
| 31 | Primary et caput extulerat densissima sidereum Nox: |
| 32 | Primary visus adesse idem deus est eademque monere |
| 33 | Primary et, nisi paruerit, plura et graviora minari. |
| 34 | Primary Pertimuit patriumque simul transferre parabat |
| 35 | Primary in sedes penetrale novas: fit murmur in urbe, |
| 36 | Primary spretarumque agitur legum reus; utque peracta est |
| 37 | Primary causa prior crimenque patens sine teste probatum, |
| 38 | Primary squalidus ad superos tollens reus ora manusque |
| 39 | Primary “o cui ius caeli bis sex fecere labores, |
| 40 | Primary fer, precor” inquit, “opem! nam tu mihi criminis auctor.” |
| 41 | Primary Mos erat antiquus niveis atrisque lapillis, |
| 42 | Primary his damnare reos, illis absolvere culpa; |
| 43 | Primary tunc quoque sic lata est sententia tristis, et omnis |
| 44 | Primary calculus inmitem demittitur ater in urnam. |
| 45 | Primary Quae simul effudit numerandos versa lapillos, |
| 46 | Primary omnibus e nigro color est mutatus in album, |
| 47 | Primary candidaque Herculeo sententia numine facta |
| 48 | Primary solvit Alemoniden. Grates agit ille parenti |
| 49 | Primary Amphitryoniadae, ventisque faventibus aequor |
| 50 | Primary navigat Ionium, Sallentinumque Neretum |
| 51 | Primary praeterit et Sybarin Crimisenque et Iapygis arva; |
| 51 | Primary praeterit et Sybarin Lacedaemoniumque Tarentum |
| 52 | Primary Thurinosque sinus Crimisenque et Iapygis arva |
| 53 | Primary vixque pererratis, quae spectant litora, terris, |
| 54 | Primary invenit Aesarei fatalia fluminis ora |
| 55 | Primary nec procul hinc tumulum, sub quo sacrata Crotonis |
| 56 | Primary ossa tegebat humus, iussaque ibi moenia terra |
| 57 | Primary condidit et nomen tumulati traxit in urbem.” |
| 58 | Primary Talia constabat certa primordia fama |
| 59 | Primary esse loci positaeque Italis in finibus urbis. |
| 60 | Primary Vir fuit hic, ortu Samius, sed fugerat una |
| 61 | Primary et Samon et dominos odioque tyrannidis exsul |
| 62 | Primary sponte erat, isque, licet caeli regione remotos, |
| 63 | Primary mente deos adiit et quae natura negabat |
| 64 | Primary visibus humanis, oculis ea pectoris hausit, |
| 65 | Primary cumque animo et vigili perspexerat omnia cura, |
| 66 | Primary in medium discenda dabat coetusque silentum |
| 67 | Primary dictaque mirantum magni primordia mundi |
| 68 | Primary et rerum causas et, quid natura, docebat, |
| 69 | Primary quid deus, unde nives, quae fulminis esset origo, |
| 70 | Primary Iuppiter an venti discussa nube tonarent, |
| 71 | Primary quid quateret terras, qua sidera lege mearent — |
| 72 | Primary et quodcumque latet; primusque animalia mensis |
| 73 | Primary arguit imponi, primus quoque talibus ora |
| 74 | Primary docta quidem solvit, sed non et credita, verbis: |
| 75 | Primary “Parcite, mortales, dapibus temerare nefandis |
| 76 | Primary corpora! Sunt fruges, sunt deducentia ramos |
| 77 | Primary pondere poma suo tumidaeque in vitibus uvae, |
| 78 | Primary sunt herbae dulces, sunt quae mitescere flamma |
| 79 | Primary mollirique queant; nec vobis lacteus umor |
| 80 | Primary eripitur, nec mella thymi redolentia flore: |
| 81 | Primary prodiga divitias alimentaque mitia tellus |
| 82 | Primary suggerit atque epulas sine caede et sanguine praebet. |
| 83 | Primary Carne ferae sedant ieiunia, nec tamen omnes: |
| 84 | Primary quippe equus et pecudes armentaque gramine vivunt. |
| 85 | Primary At quibus ingenium est inmansuetumque ferumque, |
| 86 | Primary Armeniae tigres iracundique leones |
| 87 | Primary cumque lupis ursi, dapibus cum sanguine gaudent. |
| 88 | Primary Heu quantum scelus est in viscera viscera condi |
| 89 | Primary congestoque avidum pinguescere corpore corpus |
| 90 | Primary alteriusque animantem animantis vivere leto! |
| 91 | Primary Scilicet in tantis opibus, quas optima matrum |
| 92 | Primary terra parit, nil te nisi tristia mandere saevo |
| 93 | Primary vulnera dente iuvat ritusque referre Cyclopum, |
| 94 | Primary nec, nisi perdideris alium, placare voracis |
| 95 | Primary et male morati poteris ieiunia ventris? |
| 96 | Primary At vetus illa aetas, cui fecimus aurea nomen, |
| 97 | Primary fetibus arboreis et, quas humus educat, herbis |
| 98 | Primary fortunata fuit nec polluit ora cruore. |
| 99 | Primary Tunc et aves tutae movere per aera pennas, |
| 100 | Primary et lepus impavidus mediis erravit in arvis, |
| 101 | Primary nec sua credulitas piscem suspenderat hamo: |
| 102 | Primary cuncta sine insidiis nullamque timentia fraudem |
| 103 | Primary plenaque pacis erant. Postquam non utilis auctor |
| 104 | Primary victibus invidit, quisquis fuit ille, deorum |
| 105 | Primary corporeasque dapes avidam demersit in alvum, |
| 106 | Primary fecit iter sceleri, primoque e caede ferarum |
| 107 | Primary incaluisse potest maculatum sanguine ferrum |
| 108 | Primary (idque satis fuerat), nostrumque petentia letum |
| 109 | Primary corpora missa neci salva pietate fatemur: |
| 110 | Primary sed quam danda neci, tam non epulanda fuerunt. |
| 111 | Primary Longius inde nefas abiit, et prima putatur |
| 112 | Primary hostia sus meruisse mori, quia semina pando |
| 113 | Primary eruerit rostro spemque interceperit anni. |
| 114 | Primary Vite caper morsa Bacchi mactatus ad aras |
| 115 | Primary dicitur ultoris; nocuit sua culpa duobus! |
| 116 | Primary Quid meruistis oves, placidum pecus, inque tuendos |
| 117 | Primary natum homines, pleno quae fertis in ubere nectar, |
| 118 | Primary mollia quae nobis vestras velamina lanas |
| 119 | Primary praebetis vitaque magis quam morte iuvatis? |
| 120 | Primary Quid meruere boves, animal sine fraude dolisque, |
| 121 | Primary innocuum, simplex, natum tolerare labores? |
| 122 | Primary Inmemor est demum nec frugum munere dignus, |
| 123 | Primary qui potuit curvi dempto modo pondere aratri |
| 124 | Primary ruricolam mactare suum, qui trita labore |
| 125 | Primary illa, quibus totiens durum renovaverat arvum, |
| 126 | Primary tot dederat messes, percussit colla securi. |
| 127 | Primary Nec satis est, quod tale nefas committitur: ipsos |
| 128 | Primary inscripsere deos sceleri, numenque supernum |
| 129 | Primary caede laboriferi credunt gaudere iuvenci. |
| 130 | Primary Victima labe carens et praestantissima forma |
| 131 | Primary (nam placuisse nocet) vittis insignis et auro |
| 132 | Primary sistitur ante aras auditque ignara precantem |
| 133 | Primary imponique suae videt inter cornua fronti, |
| 134 | Primary quas coluit, fruges percussaque sanguine cultros |
| 135 | Primary inficit in liquida praevisos forsitan unda. |
| 136 | Primary Protinus ereptas viventi pectore fibras |
| 137 | Primary inspiciunt mentesque deum scrutantur in illis: |
| 138 | Primary unde (fames homini vetitorum tanta ciborum!) |
| 139 | Primary audetis vesci, genus o mortale? Quod, oro, |
| 140 | Primary ne facite, et monitis animos advertite nostris! |
| 141 | Primary Cumque boum dabitis caesorum membra palato, |
| 142 | Primary mandere vos vestros scite et sentite colonos. |
| 143 | Primary Et quoniam deus ora movet, sequar ora moventem |
| 144 | Primary rite deum Delphosque meos ipsumque recludam |
| 145 | Primary aethera et augustae reserabo oracula mentis. |
| 146 | Primary Magna nec ingeniis investigata priorum |
| 147 | Primary quaeque diu latuere, canam; iuvat ire per alta |
| 148 | Primary astra, iuvat terris et inerti sede relicta |
| 149 | Primary nube vehi validique umeris insistere Atlantis |
| 150 | Primary palantesque homines passim ac rationis egentes |
| 151 | Primary despectare procul trepidosque obitumque timentes |
| 152 | Primary sic exhortari seriemque evolvere fati: |
| 153 | Primary O genus attonitum gelidae formidine mortis, |
| 154 | Primary quid Styga, quid manes et nomina vana timetis, |
| 155 | Primary materiem vatum, falsique pericula mundi? |
| 156 | Primary Corpora, sive rogus flamma, seu tabe vetustas |
| 157 | Primary abstulerit, mala posse pati non ulla putetis! |
| 158 | Primary Morte carent animae, semperque priore relicta |
| 159 | Primary sede novis domibus vivunt habitantque receptae. |
| 160 | Primary Ipse ego (nam memini) Troiani tempore belli |
| 161 | Primary Panthoides Euphorbus eram, cui pectore quondam |
| 162 | Primary haesit in adverso gravis hasta minoris Atridae: |
| 163 | Primary cognovi clipeum, laevae gestamina nostrae, |
| 164 | Primary nuper Abanteis templo Iunonis in Argis. |
| 165 | Primary Omnia mutantur, nihil interit: errat et illinc |
| 166 | Primary huc venit, hinc illuc, et quoslibet occupat artus |
| 167 | Primary spiritus eque feris humana in corpora transit |
| 168 | Primary inque feras noster nec tempore deperit ullo; |
| 169 | Primary utque novis facilis signatur cera figuris |
| 170 | Primary nec manet ut fuerat nec formas servat easdem, |
| 171 | Primary sed tamen ipsa eadem est: animam sic semper eandem |
| 172 | Primary esse, sed in varias doceo migrare figuras. |
| 173 | Primary Ergo, ne pietas sit victa cupidine ventris, |
| 174 | Primary parcite, vaticinor, cognatas caede nefanda |
| 175 | Primary exturbare animas, nec sanguine sanguis alatur! |
| 176 | Primary Et quoniam magno feror aequore plenaque ventis |
| 177 | Primary vela dedi: nihil est toto, quod perstet, in orbe. |
| 178 | Primary Cuncta fluunt, omnisque vagans formatur imago; |
| 179 | Primary ipsa quoque adsiduo labuntur tempora motu, |
| 180 | Primary non secus ac flumen, neque enim consistere flumen |
| 181 | Primary nec levis hora potest, sed ut unda impellitur unda |
| 182 | Primary urgeturque eadem veniente urgetque priorem, |
| 183 | Primary tempora sic fugiunt pariter pariterque sequuntur |
| 184 | Primary et nova sunt semper; nam quod fuit ante, relictum est, |
| 185 | Primary fitque quod haud fuerat, momentaque cuncta novantur. |
| 186 | Primary Cernis et emensas in lucem tendere noctes, |
| 187 | Primary et iubar hoc nitidum nigrae succedere nocti. |
| 188 | Primary Nec color est idem caelo, cum lassa quiete |
| 189 | Primary cuncta iacent media, cumque albo Lucifer exit |
| 190 | Primary clarus equo rursusque alius, cum praevia lucis |
| 191 | Primary tradendum Phoebo Pallantias inficit orbem. |
| 192 | Primary Ipse dei clipeus, terra cum tollitur ima, |
| 193 | Primary mane rubet, terraque, rubet cum conditur ima, |
| 194 | Primary candidus in summo est, melior natura quod illic |
| 195 | Primary aetheris est terraeque procul contagia fugit. |
| 196 | Primary Nec par aut eadem nocturnae forma Dianae |
| 197 | Primary esse potest umquam, semperque hodierna sequente, |
| 198 | Primary si crescit, minor est, maior, si contrahit orbem. |
| 199 | Primary Quid? non in species succedere quattuor annum |
| 200 | Primary adspicis, aetatis peragentem imitamina nostrae? |
| 201 | Primary Nam tener ac lactens puerique simillimus aevo |
| 202 | Primary vere novo est: tunc herba nitens et roboris expers |
| 203 | Primary turget et insolida est et spe delectat agrestes. |
| 204 | Primary Omnia tunc florent, florumque coloribus almus |
| 205 | Primary ludit ager, neque adhuc virtus in frondibus ulla est. |
| 206 | Primary Transit in aestatem post ver robustior annus |
| 207 | Primary fitque valens iuvenis: neque enim robustior aetas |
| 208 | Primary ulla nec uberior, nec quae magis ardeat, ulla est. |
| 209 | Primary Excipit autumnus, posito fervore iuventae |
| 210 | Primary maturus mitisque, inter iuvenemque senemque |
| 211 | Primary temperie medius, sparsus quoque tempora canis. |
| 212 | Primary Inde senilis hiems tremulo venit horrida passu, |
| 213 | Primary aut spoliata suos, aut quos habet, alba capillos. |
| 214 | Primary Nostra quoque ipsorum semper requieque sine ulla |
| 215 | Primary corpora vertuntur, nec, quod fuimusve sumusve, |
| 216 | Primary cras erimus; fuit illa dies, qua semina tantum |
| 217 | Primary spesque hominum primae matrisque habitavimus alvo. |
| 218 | Primary Artifices natura manus admovit et angi |
| 219 | Primary corpora visceribus distentae condita matris |
| 220 | Primary noluit eque domo vacuas emisit in auras. |
| 221 | Primary Editus in lucem iacuit sine viribus infans; |
| 222 | Primary mox quadrupes rituque tulit sua membra ferarum, |
| 223 | Primary paulatimque tremens et nondum poplite firmo |
| 224 | Primary constitit adiutis aliquo conamine nervis. |
| 225 | Primary Inde valens veloxque fuit spatiumque iuventae |
| 226 | Primary transit et emeritis medii quoque temporis annis |
| 227 | Primary labitur occiduae per iter declive senectae. |
| 228 | Primary Subruit haec aevi demoliturque prioris |
| 229 | Primary robora, fletque Milon senior, cum spectat inanes |
| 230 | Primary (illos, qui fuerant solidorum mole tororum |
| 231 | Primary Herculeis similes!) fluidos pendere lacertos; |
| 232 | Primary Flet quoque, ut in speculo rugas adspexit aniles, |
| 233 | Primary Tyndaris et secum, cur sit bis rapta, requirit. |
| 234 | Primary Tempus edax rerum, tuque, invidiosa vetustas, |
| 235 | Primary omnia destruitis, vitiataque dentibus aevi |
| 236 | Primary paulatim lenta consumitis omnia morte. |
| 237 | Primary Haec quoque non perstant, quae nos elementa vocamus, |
| 238 | Primary quasque vices peragant, (animos adhibete!) docebo. |
| 239 | Primary Quattuor aeternus genitalia corpora mundus |
| 240 | Primary continet; ex illis duo sunt onerosa suoque |
| 241 | Primary pondere in inferius, tellus atque unda, feruntur, |
| 242 | Primary et totidem gravitate carent nulloque premente |
| 243 | Primary alta petunt, aer atque aere purior ignis. |
| 244 | Primary Quae quamquam spatio distant, tamen omnia fiunt |
| 245 | Primary ex ipsis et in ipsa cadunt, resolutaque tellus |
| 246 | Primary in liquidas rarescit aquas, tenuatus in auras |
| 247 | Primary aeraque umor abit, dempto quoque pondere rursus |
| 248 | Primary in superos aer tenuissimus emicat ignes. |
| 249 | Primary Inde retro redeunt, idemque retexitur ordo; |
| 250 | Primary ignis enim densum spissatus in aera transit, |
| 251 | Primary hic in aquas, tellus glomerata cogitur unda. |
| 252 | Primary Nec species sua cuique manet, rerumque novatrix |
| 253 | Primary ex aliis alias reddit natura figuras: |
| 254 | Primary nec perit in toto quicquam, mihi credite, mundo, |
| 255 | Primary sed variat faciemque novat, nascique vocatur |
| 256 | Primary incipere esse aliud, quam quod fuit ante, morique |
| 257 | Primary desinere illud idem. Cum sint huc forsitan illa, |
| 258 | Primary haec translata illuc, summa tamen omnia constant. |
| 259 | Primary Nil equidem durare diu sub imagine eadem |
| 260 | Primary crediderim: sic ad ferrum venistis ab auro, |
| 261 | Primary saecula, sic totiens versa est fortuna locorum. |
| 262 | Primary Vidi ego, quod fuerat quondam solidissima tellus, |
| 263 | Primary esse fretum, vidi factas ex aequore terras: |
| 264 | Primary et procul a pelago conchae iacuere marinae, |
| 265 | Primary et vetus inventa est in montibus ancora summis. |
| 266 | Primary Quodque fuit campus, vallem decursus aquarum |
| 267 | Primary fecit, et eluvie mons est deductus in aequor, |
| 268 | Primary eque paludosa siccis humus aret harenis, |
| 269 | Primary quaeque sitim tulerant, stagnata paludibus ument. |
| 270 | Primary Hic fontes natura novos emisit, at illic |
| 271 | Primary clausit, et antiquis tam multa tremoribus orbis |
| 272 | Primary flumina prosiliunt aut excaecata residunt. |
| 273 | Primary Sic ubi terreno Lycus est epotus hiatu, |
| 274 | Primary exsistit procul hinc alioque renascitur ore: |
| 275 | Primary Sic modo combibitur, tecto modo gurgite lapsus |
| 276 | Primary redditur Argolicis ingens Erasinus in arvis, |
| 277 | Primary et Mysum, capitisque sui ripaeque prioris |
| 278 | Primary paenituisse ferunt, alia nunc ire Caicum; |
| 279 | Primary nec non Sicanias volvens Amenanus harenas |
| 280 | Primary nunc fluit, interdum suppressis fontibus aret. |
| 281 | Primary Ante bibebatur, nunc, quas contingere nolis, |
| 282 | Primary fundit Anigros aquas, postquam, nisi vatibus omnis |
| 283 | Primary eripienda fides, illic lavere bimembres |
| 284 | Primary vulnera, clavigeri quae fecerat Herculis arcus. |
| 285 | Primary Quid? non et Scythicis Hypanis de montibus ortus, |
| 286 | Primary qui fuerat dulcis, salibus vitiatur amaris? |
| 287 | Primary Fluctibus ambitae fuerant Antissa Pharosque |
| 288 | Primary et Phoenissa Tyros, quarum nunc insula nulla est. |
| 289 | Primary Leucada continuam veteres habuere coloni: |
| 290 | Primary nunc freta circueunt. Zancle quoque iuncta fuisse |
| 291 | Primary dicitur Italiae, donec confinia pontus |
| 292 | Primary abstulit et media tellurem reppulit unda. |
| 293 | Primary Si quaeras Helicen et Burin, Achaidas urbes, |
| 294 | Primary invenies sub aquis, et adhuc ostendere nautae |
| 295 | Primary inclinata solent cum moenibus oppida mersis. |
| 296 | Primary Est prope Pittheam tumulus Troezena, sine ullis |
| 297 | Primary arduus arboribus, quondam planissima campi |
| 298 | Primary area, nunc tumulus; nam (res horrenda relatu!) |
| 299 | Primary vis fera ventorum, caecis inclusa cavernis, |
| 300 | Primary exspirare aliqua cupiens luctataque frustra |
| 301 | Primary liberiore frui caelo, cum carcere rima |
| 302 | Primary nulla foret toto nec pervia flatibus esset, |
| 303 | Primary extentam tumefecit humum, ceu spiritus oris |
| 304 | Primary tendere vesicam solet aut derepta bicorni |
| 305 | Primary terga capro; tumor ille loci permansit et alti |
| 306 | Primary collis habet speciem longoque induruit aevo. |
| 307 | Primary Plurima cum subeant audita et cognita nobis, |
| 308 | Primary pauca super referam. Quid? non et lympha figuras |
| 309 | Primary datque capitque novas? Medio tua, corniger Ammon, |
| 310 | Primary unda die gelida est, ortuque obituque calescit. |
| 311 | Primary Admotis Athamanas aquis accendere lignum |
| 312 | Primary narratur, minimos cum luna recessit in orbes. |
| 313 | Primary Flumen habent Cicones, quod potum saxea reddit |
| 314 | Primary viscera, quod tactis inducit marmora rebus. |
| 315 | Primary Crathis et huic Sybaris, nostris conterminus oris |
| 316 | Primary electro similes faciunt auroque capillos. |
| 317 | Primary Quodque magis mirum est, sunt qui non corpora tantum, |
| 318 | Primary verum animos etiam valeant mutare liquores. |
| 319 | Primary Cui non audita est obscenae Salmacis undae |
| 320 | Primary Aethiopesque lacus? Quos siquis faucibus hausit, |
| 321 | Primary aut furit, aut patitur mirum gravitate soporem. |
| 322 | Primary Clitorio quicumque sitim de fonte levavit, |
| 323 | Primary vina fugit gaudetque meris abstemius undis, |
| 324 | Primary seu vis est in aqua calido contraria vino, |
| 325 | Primary sive, quod indigenae memorant, Amythaone natus, |
| 326 | Primary Proetidas attonitas postquam per carmen et herbas |
| 327 | Primary eripuit furiis, purgamina mentis in illas |
| 328 | Primary misit aquas odiumque meri permansit in undis. |
| 329 | Primary Huic fluit effectu dispar Lyncestius amnis; |
| 330 | Primary quem quicumque parum moderato gutture traxit, |
| 331 | Primary haud aliter titubat, quam si mera vina bibisset. |
| 332 | Primary Est locus Arcadiae (Pheneum dixere priores), |
| 333 | Primary ambiguis suspectus aquis, quas nocte timeto: |
| 334 | Primary nocte nocent potae, sine noxa luce bibuntur. |
| 335 | Primary Sic alias aliasque lacus et flumina vires |
| 336 | Primary concipiunt, tempusque fuit, quo navit in undis, |
| 337 | Primary nunc sedet Ortygie. Timuit concursibus Argo |
| 338 | Primary undarum sparsas Symplegadas elisarum, |
| 339 | Primary quae nunc inmotae perstant ventisque resistunt. |
| 340 | Primary Nec, quae sulphureis ardet fornacibus, Aetne |
| 341 | Primary ignea semper erit, neque enim fuit ignea semper. |
| 342 | Primary Nam sive est animal tellus et vivit habetque |
| 343 | Primary spiramenta locis flammam exhalantia multis, |
| 344 | Primary spirandi mutare vias, quotiensque movetur, |
| 345 | Primary has finire potest, illas aperire cavernas; |
| 346 | Primary sive leves imis venti cohibentur in antris |
| 347 | Primary saxaque cum saxis et habentem semina flammae |
| 348 | Primary materiam iactant, ea concipit ictibus ignem, |
| 349 | Primary antra relinquentur sedatis frigida ventis; |
| 350 | Primary sive bitumineae rapiunt incendia vires |
| 351 | Primary luteave exiguis ardescunt sulphura fumis: |
| 352 | Primary nempe ubi terra cibos alimentaque pinguia flammae |
| 353 | Primary non dabit absumptis per longum viribus aevum |
| 354 | Primary naturaeque suum nutrimen deerit edaci, |
| 355 | Primary non feret illa famem desertaque deseret ignis. |
| 356 | Primary Esse viros fama est in Hyperborea Pallene, |
| 357 | Primary qui soleant levibus velari corpora plumis, |
| 358 | Primary olim Tritoniacam noviens subiere paludem. |
| 359 | Primary Haud equidem credo: sparsae quoque membra venenis |
| 360 | Primary exercere artes Scythides memorantur easdem. |
| 361 | Primary Siqua fides rebus tamen est addenda probatis, |
| 362 | Primary nonne vides, quaecumque mora fluidoque calore |
| 363 | Primary corpora tabescunt, in parva animalia verti? |
| 364 | Primary I quoque, delectos mactatos obrue tauros |
| 365 | Primary (cognita res usu) de putri viscere passim |
| 366 | Primary florilegae nascuntur apes, quae more parentum |
| 367 | Primary rura colunt operique favent in spemque laborant; |
| 368 | Primary pressus humo bellator equus crabronis origo est; |
| 369 | Primary concava litoreo si demas bracchia cancro, |
| 370 | Primary cetera supponas terrae, de parte sepulta |
| 371 | Primary scorpius exibit caudaque minabitur unca; |
| 372 | Primary quaeque solent canis frondes intexere filis |
| 373 | Primary agrestes tineae (res observata colonis) |
| 374 | Primary ferali mutant cum papilione figuram. |
| 375 | Primary Semina limus habet virides generantia ranas, |
| 376 | Primary et generat truncas pedibus, mox apta natando |
| 377 | Primary cura dat, utque eadem sint longis saltibus apta, |
| 378 | Primary posterior superat partes mensura priores. |
| 379 | Primary Nec catulus, partu quem reddidit ursa recenti, |
| 380 | Primary sed male viva caro est: lambendo mater in artus |
| 381 | Primary fingit et in formam, quantam capit ipsa, reducit. |
| 382 | Primary Nonne vides, quos cera tegit sexangula, fetus |
| 383 | Primary melliferarum apium sine membris corpora nasci |
| 384 | Primary et serosque pedes serasque adsumere pennas? |
| 385 | Primary Iunonis volucrem, quae cauda sidera portat, |
| 386 | Primary armigerumque Iovis Cythereiadasque columbas |
| 387 | Primary et genus omne avium mediis e partibus ovi, |
| 388 | Primary ni sciret fieri, quis nasci posse putaret? |
| 389 | Primary Sunt qui, cum clauso putrefacta est spina sepulcro, |
| 390 | Primary mutari credant humanas angue medullas. |
| 391 | Primary Haec tamen ex aliis generis primordia ducunt: |
| 392 | Primary una est, quae reparet seque ipsa reseminet, ales. |
| 393 | Primary Assyrii phoenica vocant; non fruge neque herbis, |
| 394 | Primary sed turis lacrimis et suco vivit amomi. |
| 395 | Primary Haec ubi quinque suae complevit saecula vitae, |
| 396 | Primary ilicis in ramis tremulaeque cacumine palmae |
| 397 | Primary unguibus et puro nidum sibi construit ore. |
| 398 | Primary Quo simul ac casias et nardi lenis aristas |
| 399 | Primary quassaque cum fulva substravit cinnama murra, |
| 400 | Primary se super imponit finitque in odoribus aevum. |
| 401 | Primary Inde ferunt, totidem qui vivere debeat annos, |
| 402 | Primary corpore de patrio parvum phoenica renasci. |
| 403 | Primary Cum dedit huic aetas vires, onerique ferendo est, |
| 404 | Primary ponderibus nidi ramos levat arboris altae |
| 405 | Primary fertque pius cunasque suas patriumque sepulcrum, |
| 406 | Primary perque leves auras Hyperionis urbe potitus |
| 407 | Primary ante fores sacras Hyperionis aede reponit. |
| 408 | Primary Si tamen est aliquid mirae novitatis in istis, |
| 409 | Primary alternare vices et quae modo femina tergo |
| 410 | Primary passa marem est, nunc esse marem miremur hyaenam; |
| 411 | Primary id quoque, quod ventis animal nutritur et aura, |
| 412 | Primary protinus adsimulat, tetigit quoscumque colores. |
| 413 | Primary Victa racemifero lyncas dedit India Baccho: |
| 414 | Primary e quibus, ut memorant, quidquid vesica remisit, |
| 415 | Primary vertitur in lapides et congelat aere tacto. |
| 416 | Primary Sic et curalium quo primum contigit auras |
| 417 | Primary tempore, durescit: mollis fuit herba sub undis. |
| 418 | Primary Desinet ante dies et in alto Phoebus anhelos |
| 419 | Primary aequore tinget equos, quam consequar omnia verbis |
| 420 | Primary in species translata novas: sic tempora verti |
| 421 | Primary cernimus atque illas adsumere robora gentes, |
| 422 | Primary concidere has. Sic magna fuit censuque virisque |
| 423 | Primary perque decem potuit tantum dare sanguinis annos, |
| 424 | Primary nunc humilis veteres tantummodo Troia ruinas |
| 425 | Primary et pro divitiis tumulos ostendit avorum. |
| 426 | Primary Clara fuit Sparte, magnae viguere Mycenae, |
| 427 | Primary nec non et Cecropis nec non Amphionis arces. |
| 428 | Primary Vile solum Sparte est, altae cecidere Mycenae, |
| 429 | Primary Oedipodioniae quid sunt, nisi nomina, Thebae? |
| 430 | Primary Quid Pandioniae restant, nisi nomen, Athenae? |
| 431 | Primary Nunc quoque Dardaniam fama est consurgere Romam, |
| 432 | Primary Appenninigenae quae proxima Thybridis undis |
| 433 | Primary mole sub ingenti rerum fundamina ponit: |
| 434 | Primary haec igitur formam crescendo mutat et olim |
| 435 | Primary immensi caput orbis erit. Sic dicere vates |
| 436 | Primary faticinasque ferunt sortes quantumque recordor, |
| 437 | Primary dixerat Aeneae, cum res Troiana labaret, |
| 438 | Primary Priamides Helenus flenti dubioque salutis: |
| 439 | Primary “Nate dea, si nota satis praesagia nostrae |
| 440 | Primary mentis habes, non tota cadet te sospite Troia! |
| 441 | Primary Flamma tibi ferrumque dabunt iter: ibis et una |
| 442 | Primary Pergama rapta feres, donec Troiaeque tibique |
| 443 | Primary externum patrio contingat amicius arvum. |
| 444 | Primary Urbem etiam cerno Phrygios debere nepotes, |
| 445 | Primary quanta nec est nec erit nec visa prioribus annis. |
| 446 | Primary Hanc alii proceres per saecula longa potentem, |
| 447 | Primary sed dominam rerum de sanguine natus Iuli |
| 448 | Primary efficiet; quo cum tellus erit usa, fruentur |
| 449 | Primary aetheriae sedes, caelumque erit exitus illi.” |
| 450 | Primary Haec Helenum cecinisse penatigero Aeneae |
| 451 | Primary mente memor refero, cognataque moenia laetor |
| 452 | Primary crescere et utiliter Phrygibus vicisse Pelasgos. |
| 453 | Primary Ne tamen oblitis ad metam tendere longe |
| 454 | Primary exspatiemur equis, caelum et quodcumque sub illo est, |
| 455 | Primary inmutat formas tellusque et quidquid in illa est: |
| 456 | Primary nos quoque, pars mundi, quoniam non corpora solum, |
| 457 | Primary verum etiam volucres animae sumus inque ferinas |
| 458 | Primary possumus ire domos pecudumque in corpora condi, |
| 459 | Primary corpora, quae possunt animas habuisse parentum |
| 460 | Primary aut fratrum aut aliquo iunctorum foedere nobis |
| 461 | Primary aut hominum certe, tuta esse et honesta sinamus |
| 462 | Primary neve Thyesteis cumulemus viscera mensis! |
| 463 | Primary Quam male consuescit, quam se parat ille cruori |
| 464 | Primary impius humano, vituli qui guttura cultro |
| 465 | Primary rumpit et inmotas praebet mugitibus aures, |
| 466 | Primary aut qui vagitus similes puerilibus haedum |
| 467 | Primary edentem iugulare potest, aut alite vesci, |
| 468 | Primary cui dedit ipse cibos! Quantum est, quod desit in istis |
| 469 | Primary ad plenum facinus? Quo transitus inde paratur? |
| 470 | Primary Bos aret aut mortem senioribus imputet annis, |
| 471 | Primary horriferum contra borean ovis arma ministret, |
| 472 | Primary ubera dent saturae manibus pressanda capellae! |
| 473 | Primary Retia cum pedicis laqueosque artesque dolosas |
| 474 | Primary tollite nec volucrem viscata fallite virga, |
| 475 | Primary nec formidatis cervos includite pennis, |
| 476 | Primary nec celate cibis uncos fallacibus hamos! |
| 477 | Primary Perdite, siqua nocent, verum haec quoque perdite tantum: |
| 478 | Primary ora vacent epulis alimentaque mitia carpant!” |
| 479 | Primary Talibus atque aliis instructum pectora dictis |
| 480 | Primary in patriam remeasse ferunt ultroque petitum |
| 481 | Primary accepisse Numam populi Latiaris habenas. |
| 482 | Primary Coniuge qui felix nympha ducibusque Camenis |
| 483 | Primary sacrificos docuit ritus gentemque feroci |
| 484 | Primary adsuetam bello pacis traduxit ad artes. |
| 485 | Primary Qui postquam senior regnumque aevumque peregit, |
| 486 | Primary exstinctum Latiaeque nurus populusque patresque |
| 487 | Primary deflevere Numam; nam coniunx urbe relicta |
| 488 | Primary vallis Aricinae densis latet abdita silvis |
| 489 | Primary sacraque Oresteae gemitu questuque Dianae |
| 490 | Primary impedit: a! quotiens nymphae nemorisque lacusque, |
| 491 | Primary ne faceret, monuere et consolantia verba |
| 492 | Primary dixerunt. Quotiens flenti Theseius heros |
| 493 | Primary “siste modum!” dixit, “ne que enim fortuna querenda |
| 494 | Primary sola tua est; similes aliorum respice casus: |
| 495 | Primary mitius ista feres, utinamque exempla dolentem |
| 496 | Primary non mea te possent relevare! Sed et mea possunt. |
| 497 | Primary Fando aliquem Hippolytum vestras puto, contigit aures |
| 498 | Primary credulitate patris, sceleratae fraude novercae |
| 499 | Primary occubuisse neci: mirabere, vixque probabo, |
| 500 | Primary sed tamen ille ego sum. Me Pasiphaeia quondam |
| 501 | Primary temptatum frustra patrium temerare cubile, |
| 502 | Primary quod voluit, voluisse, infelix crimine verso |
| 503 | Primary (indiciine metu magis offensane repulsae?) |
| 504 | Primary damnavit, meritumque nihil pater eicit urbe |
| 505 | Primary hostilique caput prece detestatur euntis. |
| 506 | Primary Pittheam profugo curru Troezena petebam, |
| 507 | Primary iamque Corinthiaci carpebam litora ponti, |
| 508 | Primary cum mare surrexit, cumulusque inmanis aquarum |
| 509 | Primary in montis speciem curvari et crescere visus |
| 510 | Primary et dare mugitus summoque cacumine findi. |
| 511 | Primary Corniger hinc taurus ruptis expellitur undis, |
| 512 | Primary pectoribusque tenus molles erectus in auras |
| 513 | Primary naribus et patulo partem maris evomit ore. |
| 514 | Primary Corda pavent comitum. Mihi mens interrita mansit |
| 515 | Primary exsiliis contenta suis: cum colla feroces |
| 516 | Primary ad freta convertunt adrectisque auribus horrent |
| 517 | Primary quadrupedes monstrique metu turbantur et altis |
| 518 | Primary praecipitant currum scopulis; ego ducere vana |
| 519 | Primary frena manu spumis albentibus oblita luctor |
| 520 | Primary et retro lentas tendo resupinus habenas. |
| 521 | Primary Nec vires tamen has rabies superasset equorum. |
| 522 | Primary ni rota, perpetuum qua circumvertitur axem, |
| 523 | Primary stipitis occursu fracta ac disiecta fuisset. |
| 524 | Primary Excutior curru, lorisque tenentibus artus |
| 525 | Primary viscera viva trahi nervosque in stipe teneri, |
| 526 | Primary membra rapi partim, partim reprensa relinqui, |
| 527 | Primary ossa gravem dare fracta sonum fessamque videres |
| 528 | Primary exhalari animam nullasque in corpore partes, |
| 529 | Primary noscere quas posses; unumque erat omnia vulnus. |
| 530 | Primary Num potes aut audes cladi componere nostrae, |
| 531 | Primary nympha, tuam? Vidi quoque luce carentia regna |
| 532 | Primary et lacerum fovi Phlegethontide corpus in unda, |
| 533 | Primary nec nisi Apollineae valido medicamine prolis |
| 534 | Primary reddita vita foret; quam postquam fortibus herbis |
| 535 | Primary atque ope Paeonia Dite indignante recepi, |
| 536 | Primary tum mihi, ne praesens augerem muneris huius |
| 537 | Primary invidiam, densas obiecit Cynthia nubes, |
| 538 | Primary utque forem tutus possemque impune videri, |
| 539 | Primary addidit aetatem nec cognoscenda reliquit |
| 540 | Primary ora mihi Cretenque diu dubitavit habendam |
| 541 | Primary traderet an Delon: Delo Creteque relictis |
| 542 | Primary hic posuit nomenque simul, quod possit equorum |
| 543 | Primary admonuisse, iubet deponere, “qui” que “fuisti |
| 544 | Primary Hippolytus” dixit, “nunc idem Virbius esto!” |
| 545 | Primary Hoc nemus inde colo, de disque minoribus unus |
| 546 | Primary numine sub dominae lateo atque accenseor illi.” |
| 547 | Primary Non tamen Egeriae luctus aliena levare |
| 548 | Primary damna valent, montisque iacens radicibus imis |
| 549 | Primary liquitur in lacrimas, donec pietate dolentis |
| 550 | Primary mota soror Phoebi gelidum de corpore fontem |
| 551 | Primary fecit et aeternas artus tenuavit in undas. |
| 552 | Primary Et nymphas tetigit nova res, et Amazone natus |
| 553 | Primary haud aliter stupuit, quam cum Tyrrhenus arator |
| 554 | Primary fatalem glaebam mediis adspexit in arvis |
| 555 | Primary sponte sua primum nulloque agitante moveri, |
| 556 | Primary sumere mox hominis terraeque amittere formam |
| 557 | Primary oraque venturis aperire recentia fatis |
| 558 | Primary (indigenae dixere Tagen, qui primus Etruscam |
| 559 | Primary edocuit gentem casus aperire futuros); |
| 560 | Primary utve Palatinis haerentem collibus olim |
| 561 | Primary cum subito vidit frondescere Romulus hastam, |
| 562 | Primary quae radice nova, non ferro stabat adacto |
| 563 | Primary et iam non telum, sed lenti viminis arbor |
| 564 | Primary non exspectatas dabat admirantibus umbras; |
| 565 | Primary aut sua fluminea cum vidit Cipus in unda |
| 566 | Primary cornua (vidit enim) falsamque in imagine credens |
| 567 | Primary esse fidem, digitis ad frontem saepe relatis, |
| 568 | Primary quae vidit, tetigit, nec iam sua lumina damnans |
| 569 | Primary restitit, ut victor domito veniebat ab hoste, |
| 570 | Primary ad caelumque manus et eodem lumina tollens |
| 571 | Primary “quiquid” ait, “superi, monstro portenditur isto, |
| 572 | Primary seu laetum est, patriae laetum populoque Quirini, |
| 573 | Primary sive minax, mihi sit!” viridique e caespite factas |
| 574 | Primary placat odoratis herbosas ignibus aras |
| 575 | Primary vinaque dat pateris mactatarumque bidentum, |
| 576 | Primary quid sibi significent, trepidantia consulit exta. |
| 577 | Primary Quae simul adspexit Tyrrhenae gentis haruspex, |
| 578 | Primary magna quidem rerum molimina vidit in illis, |
| 579 | Primary non manifesta tamen. Cum vero sustulit acre |
| 580 | Primary a pecudis fibris ad Cipi cornua lumen, |
| 581 | Primary “rex” ait, “o salve! Tibi enim, tibi, Cipe, tuisque |
| 582 | Primary hic locus et Latiae parebunt cornibus arces. |
| 583 | Primary Tu modo rumpe moras portasque intrare patentes |
| 584 | Primary adpropera! sic fata iubent; namque urbe receptus |
| 585 | Primary rex eris et sceptro tutus potiere perenni.” |
| 586 | Primary Rettulit ille pedem torvamque a moenibus urbis |
| 587 | Primary avertens faciem “procul a! procul omina” dixit |
| 588 | Primary “talia di pellant! Multoque ego iustius aevum |
| 589 | Primary exsul agam, quam me videant Capitolia regem!” |
| 590 | Primary Dixit et extemplo populumque gravemque senatum |
| 591 | Primary convocat, ante tamen pacali cornua lauro |
| 592 | Primary velat; et aggeribus factis a milite forti |
| 593 | Primary insistit priscosque deos e more precatus |
| 594 | Primary “est” ait “hic unus, quem vos nisi pellitis urbe, |
| 595 | Primary rex erit. Is qui sit, signo, non nomine dicam: |
| 596 | Primary cornua fronte gerit. Quem vobis indicat augur, |
| 597 | Primary si Romam intrarit, famularia iura daturum. |
| 598 | Primary Ille quidem potuit portas inrumpere apertas, |
| 599 | Primary sed nos obstitimus, quamvis coniunctior illo |
| 600 | Primary nemo mihi est. Vos urbe virum prohibete, Quirites, |
| 601 | Primary vel, si dignus erit, gravibus vincite catenis, |
| 602 | Primary aut finite metum fatalis morte tyranni!” |
| 603 | Primary Qualia succinctis, ubi trux insibilat eurus, |
| 604 | Primary murmura pinetis fiunt, aut qualia fluctus |
| 605 | Primary aequorei faciunt, siquis procul audiat illos, |
| 606 | Primary tale sonat populus; sed per confusa frementis |
| 607 | Primary verba tamen vulgi vox eminet una “quis ille est?”, |
| 608 | Primary et spectant frontes praedictaque cornua quaerunt. |
| 609 | Primary Rursus ad hos Cipus “quem poscitis” inquit, “habetis” |
| 610 | Primary et dempta capiti, populo prohibente, corona |
| 611 | Primary exhibuit gemino praesignia tempora cornu. |
| 612 | Primary Demisere oculos omnes gemitumque dedere |
| 613 | Primary atque illud meritis clarum (quis credere possit?) |
| 614 | Primary inviti videre caput; nec honore carere |
| 615 | Primary ulterius passi, festam imposuere coronam. |
| 616 | Primary At proceres, quoniam muros intrare vetaris, |
| 617 | Primary ruris honorati tantum tibi, Cipe, dedere, |
| 618 | Primary quantum depresso subiectis bubus aratro |
| 619 | Primary complecti posses ad finem lucis ab ortu, |
| 620 | Primary cornuaque aeratis miram referentia formam |
| 621 | Primary postibus insculpunt, longum mansura per aevum. |
| 622 | Primary Pandite nunc, Musae, praesentia numina vatum |
| 623 | Primary (scitis enim, nec vos fallit spatiosa vetustas,) |
| 624 | Primary unde Coroniden circumflua Thybridis alti |
| 625 | Primary insula Romuleae sacris adiecerit urbis. |
| 626 | Primary Dira lues quondam Latias vitiaverat auras, |
| 627 | Primary pallidaque exsangui squalebant corpora morbo. |
| 628 | Primary Funeribus fessi postquam mortalia cernunt |
| 629 | Primary temptamenta nihil, nihil artes posse medentum, |
| 630 | Primary auxilium caeleste petunt mediamque tenentes |
| 631 | Primary orbis humum Delphos adeunt, oracula Phoebi, |
| 632 | Primary utque salutifera miseris succurrere rebus |
| 633 | Primary sorte velit tantaeque urbis mala finiat, orant: |
| 634 | Primary et locus et laurus et, quas habet ipse, pharetras |
| 635 | Primary intremuere simul, cortinaque reddidit imo |
| 636 | Primary hanc adyto vocem pavefactaque pectora movit: |
| 637 | Primary “Quod petis hinc, propiore loco, Romane, petisses, |
| 638 | Primary et pete nunc propiore loco! nec Apolline vobis, |
| 639 | Primary qui minuat luctus, opus est, sed Apolline nato. |
| 640 | Primary Ite bonis avibus prolemque accersite nostram!” |
| 641 | Primary Iussa dei prudens postquam accepere senatus, |
| 642 | Primary quam colat, explorant, iuvenis Phoebeius urbem, |
| 643 | Primary quique petant ventis Epidauria litora mittunt. |
| 644 | Primary Quae simul incurva missi tetigere carina, |
| 645 | Primary concilium Graiosque patres adiere, darentque, |
| 646 | Primary oravere, deum, qui praesens funera gentis |
| 647 | Primary finiat Ausoniae: certas ita dicere sortes. |
| 648 | Primary Dissidet et variat sententia, parsque negandum |
| 649 | Primary non putat auxilium, multi retinere suamque |
| 650 | Primary non emittere opem nec numina tradere suadent: |
| 651 | Primary dum dubitant, seram pepulere crepuscula lucem, |
| 652 | Primary umbraque telluris tenebras induxerat orbi, |
| 653 | Primary cum deus in somnis opifer consistere visus |
| 654 | Primary ante tuum, Romane, torum, sed qualis in aede |
| 655 | Primary esse solet, baculumque tenens agreste sinistra |
| 656 | Primary caesariem longae dextra deducere barbae |
| 657 | Primary et placido tales emittere pectore voces: |
| 658 | Primary “Pone metus! Veniam simulacraque nostra relinquam. |
| 659 | Primary Hunc modo serpentem, baculum qui nexibus ambit, |
| 660 | Primary perspice et usque nota visu, ut cognoscere possis! |
| 661 | Primary Vertar in hunc, sed maior ero tantusque videbor, |
| 662 | Primary in quantum verti caelestia corpora debent.” |
| 663 | Primary Extemplo cum voce deus, cum voce deoque |
| 664 | Primary somnus abit, somnique fugam lux alma secuta est. |
| 665 | Primary Postera sidereos aurora fugaverat ignes: |
| 666 | Primary incerti, quid agant, proceres ad templa petiti |
| 667 | Primary perveniunt operosa dei, quaque ipse morari |
| 668 | Primary sede velit, signis caelestibus indicet, orant. |
| 669 | Primary Vix bene desierant, cum cristis aureus altis |
| 670 | Primary in serpente deus praenuntia sibila misit |
| 671 | Primary adventuque suo signumque arasque foresque |
| 672 | Primary marmoreumque solum fastigiaque aurea movit |
| 673 | Primary pectoribusque tenus media sublimis in aede |
| 674 | Primary constitit atque oculos circumtulit igne micantes. |
| 675 | Primary Territa turba pavet. Cognovit numina castos |
| 676 | Primary evinctus vitta crines albente sacerdos: |
| 677 | Primary “En deus est deus est! Animis linguisque favete, |
| 678 | Primary quisquis ades!” dixit. “Sis, o pulcherrime, visus |
| 679 | Primary utiliter populosque iuves tua sacra colentes !” |
| 680 | Primary Quisquis adest, visum venerantur numen, et omnes |
| 681 | Primary verba sacerdotis referunt geminata piumque |
| 682 | Primary Aeneadae praestant et mente et voce favorem. |
| 683 | Primary Adnuit his motisque deus rata pignora cristis |
| 684 | Primary et repetita dedit vibrata sibila lingua. |
| 685 | Primary Tum gradibus nitidis delabitur oraque retro |
| 686 | Primary flectit et antiquas abiturus respicit aras |
| 687 | Primary adsuetasque domos habitataque templa salutat. |
| 688 | Primary Inde per iniectis adopertam floribus ingens |
| 689 | Primary serpit humum flectitque sinus mediamque per urbem |
| 690 | Primary tendit ad incurvo munitos aggere portus. |
| 691 | Primary Restitit hic agmenque suum turbaeque sequentis |
| 692 | Primary officium placido visus dimittere vultu |
| 693 | Primary corpus in Ausonia posuit rate: numinis illa |
| 694 | Primary sensit onus, pressa estque dei gravitate carina; |
| 695 | Primary Aeneadae gaudent caesoque in litore tauro |
| 696 | Primary torta coronatae solvunt retinacula navis. |
| 697 | Primary Impulerat levis aura ratem: deus eminet alte, |
| 698 | Primary impositaque premens puppim cervice recurvam |
| 699 | Primary caeruleas despectat aquas modicisque per aequor |
| 700 | Primary Ionium zephyris sextae Pallantidos ortu |
| 701 | Primary Italiam tenuit praeterque Lacinia templo |
| 702 | Primary nobilitata deae Scylaceaque litora fertur; |
| 703 | Primary linquit Iapygiam laevisque Amphrisia remis |
| 704 | Primary saxa fugit, dextra praerupta Celennia parte, |
| 705 | Primary Romethiumque legit Caulonaque Naryciamque, |
| 706 | Primary evincitque fretum Siculique angusta Pelori |
| 707 | Primary Hippotadaeque domos regis Temesesque metalla, |
| 708 | Primary Leucosiamque petit tepidique rosaria Paesti. |
| 709 | Primary Inde legit Capreas promunturiumque Minervae |
| 710 | Primary et Surrentino generosos palmite colles |
| 711 | Primary Herculeamque urbem Stabiasque et in otia natam |
| 712 | Primary Parthenopen et ab hac Cumaeae templa Sibyllae. |
| 713 | Primary Hinc calidi fontes lentisciferumque tenetur |
| 714 | Primary Liternum multamque trahens sub gurgite harenam |
| 715 | Primary Volturnus niveisque frequens Sinuessa columbis |
| 716 | Primary Minturnaeque graves et quam tumulavit alumnus |
| 717 | Primary Antiphataeque domus Trachasque obsessa palude |
| 718 | Primary et tellus Circaea et spissi litoris Antium. |
| 719 | Primary Huc ubi veliferam nautae advertere carinam |
| 720 | Primary (asper enim iam pontus erat), deus explicat orbes |
| 721 | Primary perque sinus crebros et magna volumina labens |
| 722 | Primary templa parentis init flavum tangentia litus. |
| 723 | Primary Aequore placato patrias Epidaurius aras |
| 724 | Primary linquit et hospitio iuncti sibi numinis usus |
| 725 | Primary litoream tractu squamae crepitantis harenam |
| 726 | Primary sulcat et innixus moderamine navis in alta |
| 727 | Primary puppe caput posuit, donec Castrumque sacrasque |
| 728 | Primary Lavini sedes Tiberinaque ad ostia venit. |
| 729 | Primary Huc omnis populi passim matrumque patrumque |
| 730 | Primary obvia turba ruit, quaeque ignes, Troica, servant, |
| 731 | Primary Vesta, tuos, laetoque deum clamore salutant. |
| 732 | Primary Quaque per adversas navis cita ducitur undas, |
| 733 | Primary tura super ripas aris ex ordine factis |
| 734 | Primary parte ab utraque sonant et odorant aera fumis, |
| 735 | Primary ictaque coniectos incalfacit hostia cultros. |
| 736 | Primary Iamque caput rerum, Romanam intraverat urbem: |
| 737 | Primary erigitur serpens summoque acclinia malo |
| 738 | Primary colla movet sedesque sibi circumspicit aptas. |
| 739 | Primary Scinditur in geminas partes circumfluus amnis |
| 740 | Primary (Insula nomen habet), laterumque a parte duorum |
| 741 | Primary porrigit aequales media tellure lacertos. |
| 742 | Primary Huc se de Latia pinu Phoebeius anguis |
| 743 | Primary contulit et finem, specie caeleste resumpta, |
| 744 | Primary luctibus imposuit venitque salutifer urbi. |
| 745 | Primary Hic tamen accessit delubris advena nostris: |
| 746 | Primary Caesar in urbe sua deus est; quem Marte togaque |
| 747 | Primary praecipuum non bella magis finita triumphis |
| 748 | Primary resque domi gestae properataque gloria rerum |
| 749 | Primary in sidus vertere novum stellamque comantem, |
| 750 | Primary quam sua progenies; neque enim de Caesaris actis |
| 751 | Primary ullum maius opus, quam quod pater exstitit huius: |
| 752 | Primary scilicet aequoreos plus est domuisse Britannos |
| 753 | Primary perque papyriferi septemflua flumina Nili |
| 754 | Primary victrices egisse rates Numidasque rebelles |
| 755 | Primary Cinyphiumque Iubam Mithridateisque tumentem |
| 756 | Primary nominibus Pontum populo adiecisse Quirini |
| 757 | Primary et multos meruisse, aliquos egisse triumphos, |
| 758 | Primary quam tantum genuisse virum? Quo praeside rerum |
| 759 | Primary humano generi, superi, favistis abunde! |
| 760 | Primary Ne foret hic igitur mortali semine cretus, |
| 761 | Primary ille deus faciendus erat. Quod ut aurea vidit |
| 762 | Primary Aeneae genetrix, vidit quoque triste parari |
| 763 | Primary pontifici letum et coniurata arma moveri, |
| 764 | Primary palluit et cunctis, ut cuique erat obvia, divis |
| 765 | Primary “adspice” dicebat, “quanta mihi mole parentur |
| 766 | Primary insidiae quantaque caput cum fraude petatur, |
| 767 | Primary quod de Dardanio solum mihi restat Iulo. |
| 768 | Primary Solane semper ero iustis exercita curis, |
| 769 | Primary quam modo Tydidae Calydonia vulneret hasta, |
| 770 | Primary nunc male defensae confundant moenia Troiae, |
| 771 | Primary quae videam natum longis erroribus actum |
| 772 | Primary iactarique freto sedesque intrare silentum |
| 773 | Primary bellaque cum Turno gerere, aut, si vera fatemur, |
| 774 | Primary cum Iunone magis? Quid nunc antiqua recordor |
| 775 | Primary damna mei generis? Timor hic meminisse priorum |
| 776 | Primary non sinit: en acui sceleratos cernitis enses? |
| 777 | Primary Quos prohibete, precor, facinusque repellite, neve |
| 778 | Primary caede sacerdotis flammas exstinguite Vestae!” |
| 779 | Primary Talia nequiquam toto Venus anxia caelo |
| 780 | Primary verba iacit superosque movet, qui rumpere quamquam |
| 781 | Primary ferrea non possunt veterum decreta sororum, |
| 782 | Primary signa tamen luctus dant haud incerta futuri. |
| 783 | Primary Arma ferunt inter nigras crepitantia nubes |
| 784 | Primary terribilesque tubas auditaque cornua caelo |
| 785 | Primary praemonuisse nefas; solis quoque tristis imago |
| 786 | Primary lurida sollicitis praebebat lumina terris. |
| 787 | Primary Saepe faces visae mediis ardere sub astris, |
| 788 | Primary saepe inter nimbos guttae cecidere cruentae. |
| 789 | Primary Caerulus et vultum ferrugine Lucifer atra |
| 790 | Primary sparsus erat, sparsi Lunares sanguine currus. |
| 791 | Primary Tristia mille locis Stygius dedit omina bubo, |
| 792 | Primary mille locis lacrimavit ebur, cantusque feruntur |
| 793 | Primary auditi sanctis et verba minantia lucis. |
| 794 | Primary Victima nulla litat magnosque instare tumultus |
| 795 | Primary fibra monet, caesumque caput reperitur in extis. |
| 796 | Primary Inque foro circumque domos et templa deorum |
| 797 | Primary nocturnos ululasse canes umbrasque silentum |
| 798 | Primary erravisse ferunt motamque tremoribus urbem. |
| 799 | Primary Non tamen insidias venturaque vincere fata |
| 800 | Primary praemonitus potuere deum, strictique feruntur |
| 801 | Primary in templum gladii; neque enim locus ullus in urbe |
| 802 | Primary ad facinus diramque placet nisi curia, caedem. |
| 803 | Primary Tum vero Cytherea manu percussit utraque |
| 804 | Primary pectus et Aeneaden molitur condere nube, |
| 805 | Primary qua prius infesto Paris est ereptus Atridae |
| 806 | Primary et Diomedeos Aeneas fugerat enses. |
| 807 | Primary Talibus hanc genitor: “Sola insuperabile fatum, |
| 808 | Primary nata, movere paras? Intres licet ipsa sororum |
| 809 | Primary tecta trium: cernes illic molimine vasto |
| 810 | Primary ex aere et solido rerum tabularia ferro, |
| 811 | Primary quae neque concussum caeli neque fulminis iram |
| 812 | Primary nec metuunt ullas tuta atque aeterna ruinas. |
| 813 | Primary Invenies illic incisa adamante perenni |
| 814 | Primary fata tui generis: legi ipse animoque notavi |
| 815 | Primary et referam, ne sis etiamnum ignara futuri. |
| 816 | Primary Hic sua complevit, pro quo, Cytherea, laboras, |
| 817 | Primary tempora, perfectis, quos terrae debuit, annis. |
| 818 | Primary Ut deus accedat caelo templisque colatur, |
| 819 | Primary tu facies natusque suus, qui nominis heres |
| 820 | Primary impositum feret unus onus caesique parentis |
| 821 | Primary nos in bella suos fortissimus ultor habebit. |
| 822 | Primary Illius auspiciis obsessae moenia pacem |
| 823 | Primary victa petent Mutinae, Pharsalia sentiet illum. |
| 824 | Primary Emathiique iterum madefient caede Philippi, |
| 825 | Primary et magnum Siculis nomen superabitur undis, |
| 826 | Primary Romanique ducis coniunx Aegyptia taedae |
| 827 | Primary non bene fisa cadet, frustraque erit illa minata, |
| 828 | Primary servitura suo Capitolia nostra Canopo. |
| 829 | Primary Quid tibi barbariem, gentesque ab utroque iacentes |
| 830 | Primary oceano numerem? Quodcumque habitabile tellus |
| 831 | Primary sustinet, huius erit: pontus quoque serviet illi! |
| 832 | Primary Pace data terris animum ad civilia vertet |
| 833 | Primary iura suum legesque feret iustissimus auctor |
| 834 | Primary exemploque suo mores reget inque futuri |
| 835 | Primary temporis aetatem venturorumque nepotum |
| 836 | Primary prospiciens prolem sancta de coniuge natam |
| 837 | Primary ferre simul nomenque suum curasque iubebit, |
| 838 | Primary nec nisi cum senior Pylios aequaverit annos, |
| 839 | Primary aetherias sedes cognataque sidera tanget. |
| 840 | Primary Hanc animam interea caeso de corpore raptam |
| 841 | Primary fac iubar, ut semper Capitolia nostra forumque |
| 842 | Primary divus ab excelsa prospectet Iulius aede.” |
| 843 | Primary Vix ea fatus erat, media cum sede senatus |
| 844 | Primary constitit alma Venus, nulli cernenda, suique |
| 845 | Primary Caesaris eripuit membris neque in aera solvi |
| 846 | Primary passa recentem animam caelestibus intulit astris. |
| 847 | Primary Dumque tulit, lumen capere atque ignescere sensit |
| 848 | Primary emisitque sinu: luna volat altius illa, |
| 849 | Primary flammiferumque trahens spatioso limite crinem |
| 850 | Primary stella micat natique videns bene facta fatetur |
| 851 | Primary esse suis maiora et vinci gaudet ab illo. |
| 852 | Primary Hic sua praeferri quamquam vetat acta paternis, |
| 853 | Primary libera fama tamen nullisque obnoxia iussis |
| 854 | Primary invitum praefert unaque in parte repugnat: |
| 855 | Primary sic magni cedit titulis Agamemnonis Atreus, |
| 856 | Primary Aegea sic Theseus, sic Pelea vicit Achilles; |
| 857 | Primary denique, ut exemplis ipsos aequantibus utar, |
| 858 | Primary sic et Saturnus minor est Iove: Iuppiter arces |
| 859 | Primary temperat aetherias et mundi regna triformis, |
| 860 | Primary terra sub Augusto est; pater est et rector uterque. |
| 861 | Primary Di, precor, Aeneae comites, quibus ensis et ignis |
| 862 | Primary cesserunt, dique Indigetes genitorque Quirine |
| 863 | Primary urbis et invicti genitor Gradive Quirini, |
| 864 | Primary Vestaque Caesareos inter sacrata penates, |
| 865 | Primary et cum Caesarea tu, Phoebe domestice, Vesta, |
| 866 | Primary quique tenes altus Tarpeias Iuppiter arces, |
| 867 | Primary quosque alios vati fas appellare piumque est: |
| 868 | Primary tarda sit illa dies et nostro serior aevo, |
| 869 | Primary qua caput Augustum, quem temperat, orbe relicto |
| 870 | Primary accedat caelo faveatque precantibus absens! |
| 871 | Primary Iamque opus exegi, quod nec Iovis ira nec ignis |
| 872 | Primary nec poterit ferrum nec edax abolere vetustas. |
| 873 | Primary Cum volet, illa dies, quae nil nisi corporis huius |
| 874 | Primary ius habet, incerti spatium mihi finiat aevi: |
| 875 | Primary parte tamen meliore mei super alta perennis |
| 876 | Primary astra ferar, nomenque erit indelebile nostrum, |
| 877 | Primary quaque patet domitis Romana potentia terris, |
| 878 | Primary ore legar populi, perque omnia saecula fama, |
| 879 | Primary siquid habent veri vatum praesagia, vivam. |