Reader
Reader | Odyssey, Book 1
Odyssey
Homer
Text
Position
Line 1 of 444
Waypoints
| Line Ref | A. T. Murray | Ancient Greek |
|---|---|
| 1 | Primary ἄνδρα μοι ἔννεπε, μοῦσα, πολύτροπον, ὃς μάλα πολλὰ |
| 2 | Primary πλάγχθη, ἐπεὶ Τροίης ἱερὸν πτολίεθρον ἔπερσεν· |
| 3 | Primary πολλῶν δʼ ἀνθρώπων ἴδεν ἄστεα καὶ νόον ἔγνω, |
| 4 | Primary πολλὰ δʼ ὅ γʼ ἐν πόντῳ πάθεν ἄλγεα ὃν κατὰ θυμόν, |
| 5 | Primary ἀρνύμενος ἥν τε ψυχὴν καὶ νόστον ἑταίρων. |
| 6 | Primary ἀλλʼ οὐδʼ ὣς ἑτάρους ἐρρύσατο, ἱέμενός περ· |
| 7 | Primary αὐτῶν γὰρ σφετέρῃσιν ἀτασθαλίῃσιν ὄλοντο, |
| 8 | Primary νήπιοι, οἳ κατὰ βοῦς Ὑπερίονος Ἠελίοιο |
| 9 | Primary ἤσθιον· αὐτὰρ ὁ τοῖσιν ἀφείλετο νόστιμον ἦμαρ. |
| 10 | Primary τῶν ἁμόθεν γε, θεά, θύγατερ Διός, εἰπὲ καὶ ἡμῖν. |
| 11 | Primary ἔνθʼ ἄλλοι μὲν πάντες, ὅσοι φύγον αἰπὺν ὄλεθρον, |
| 12 | Primary οἴκοι ἔσαν, πόλεμόν τε πεφευγότες ἠδὲ θάλασσαν· |
| 13 | Primary τὸν δʼ οἶον νόστου κεχρημένον ἠδὲ γυναικὸς |
| 14 | Primary νύμφη πότνιʼ ἔρυκε Καλυψὼ δῖα θεάων |
| 15 | Primary ἐν σπέσσι γλαφυροῖσι, λιλαιομένη πόσιν εἶναι. |
| 16 | Primary ἀλλʼ ὅτε δὴ ἔτος ἦλθε περιπλομένων ἐνιαυτῶν, |
| 17 | Primary τῷ οἱ ἐπεκλώσαντο θεοὶ οἶκόνδε νέεσθαι |
| 18 | Primary εἰς Ἰθάκην, οὐδʼ ἔνθα πεφυγμένος ἦεν ἀέθλων |
| 19 | Primary καὶ μετὰ οἷσι φίλοισι. θεοὶ δʼ ἐλέαιρον ἅπαντες |
| 20 | Primary νόσφι Ποσειδάωνος· ὁ δʼ ἀσπερχὲς μενέαινεν |
| 21 | Primary ἀντιθέῳ Ὀδυσῆι πάρος ἣν γαῖαν ἱκέσθαι. |
| 22 | Primary ἀλλʼ ὁ μὲν Αἰθίοπας μετεκίαθε τηλόθʼ ἐόντας, |
| 23 | Primary Αἰθίοπας τοὶ διχθὰ δεδαίαται, ἔσχατοι ἀνδρῶν, |
| 24 | Primary οἱ μὲν δυσομένου Ὑπερίονος οἱ δʼ ἀνιόντος, |
| 25 | Primary ἀντιόων ταύρων τε καὶ ἀρνειῶν ἑκατόμβης. |
| 26 | Primary ἔνθʼ ὅ γʼ ἐτέρπετο δαιτὶ παρήμενος· οἱ δὲ δὴ ἄλλοι |
| 27 | Primary Ζηνὸς ἐνὶ μεγάροισιν Ὀλυμπίου ἁθρόοι ἦσαν. |
| 28 | Primary τοῖσι δὲ μύθων ἦρχε πατὴρ ἀνδρῶν τε θεῶν τε· |
| 29 | Primary μνήσατο γὰρ κατὰ θυμὸν ἀμύμονος Αἰγίσθοιο, |
| 30 | Primary τόν ῥʼ Ἀγαμεμνονίδης τηλεκλυτὸς ἔκτανʼ Ὀρέστης· |
| 31 | Primary τοῦ ὅ γʼ ἐπιμνησθεὶς ἔπεʼ ἀθανάτοισι μετηύδα· |
| 32 | Primary ὢ πόποι, οἷον δή νυ θεοὺς βροτοὶ αἰτιόωνται· |
| 33 | Primary ἐξ ἡμέων γάρ φασι κάκʼ ἔμμεναι, οἱ δὲ καὶ αὐτοὶ |
| 34 | Primary σφῇσιν ἀτασθαλίῃσιν ὑπὲρ μόρον ἄλγεʼ ἔχουσιν, |
| 35 | Primary ὡς καὶ νῦν Αἴγισθος ὑπὲρ μόρον Ἀτρεΐδαο |
| 36 | Primary γῆμʼ ἄλοχον μνηστήν, τὸν δʼ ἔκτανε νοστήσαντα, |
| 37 | Primary εἰδὼς αἰπὺν ὄλεθρον, ἐπεὶ πρό οἱ εἴπομεν ἡμεῖς, |
| 38 | Primary Ἑρμείαν πέμψαντες, ἐύσκοπον ἀργεϊφόντην, |
| 39 | Primary μήτʼ αὐτὸν κτείνειν μήτε μνάασθαι ἄκοιτιν· |
| 40 | Primary ἐκ γὰρ Ὀρέσταο τίσις ἔσσεται Ἀτρεΐδαο, |
| 41 | Primary ὁππότʼ ἂν ἡβήσῃ τε καὶ ἧς ἱμείρεται αἴης. |
| 42 | Primary ὣς ἔφαθʼ Ἑρμείας, ἀλλʼ οὐ φρένας Αἰγίσθοιο |
| 43 | Primary πεῖθʼ ἀγαθὰ φρονέων· νῦν δʼ ἁθρόα πάντʼ ἀπέτισεν. |
| 44 | Primary τὸν δʼ ἠμείβετʼ ἔπειτα θεά, γλαυκῶπις Ἀθήνη· |
| 45 | Primary ὦ πάτερ ἡμέτερε Κρονίδη, ὕπατε κρειόντων, |
| 46 | Primary καὶ λίην κεῖνός γε ἐοικότι κεῖται ὀλέθρῳ· |
| 47 | Primary ὡς ἀπόλοιτο καὶ ἄλλος, ὅτις τοιαῦτά γε ῥέζοι· |
| 48 | Primary ἀλλά μοι ἀμφʼ Ὀδυσῆι δαΐφρονι δαίεται ἦτορ, |
| 49 | Primary δυσμόρῳ, ὃς δὴ δηθὰ φίλων ἄπο πήματα πάσχει |
| 50 | Primary νήσῳ ἐν ἀμφιρύτῃ, ὅθι τʼ ὀμφαλός ἐστι θαλάσσης. |
| 51 | Primary νῆσος δενδρήεσσα, θεὰ δʼ ἐν δώματα ναίει, |
| 52 | Primary Ἄτλαντος θυγάτηρ ὀλοόφρονος, ὅς τε θαλάσσης |
| 53 | Primary πάσης βένθεα οἶδεν, ἔχει δέ τε κίονας αὐτὸς |
| 54 | Primary μακράς, αἳ γαῖάν τε καὶ οὐρανὸν ἀμφὶς ἔχουσιν. |
| 55 | Primary τοῦ θυγάτηρ δύστηνον ὀδυρόμενον κατερύκει, |
| 56 | Primary αἰεὶ δὲ μαλακοῖσι καὶ αἱμυλίοισι λόγοισιν |
| 57 | Primary θέλγει, ὅπως Ἰθάκης ἐπιλήσεται· αὐτὰρ Ὀδυσσεύς, |
| 58 | Primary ἱέμενος καὶ καπνὸν ἀποθρῴσκοντα νοῆσαι |
| 59 | Primary ἧς γαίης, θανέειν ἱμείρεται. οὐδέ νυ σοί περ |
| 60 | Primary ἐντρέπεται φίλον ἦτορ, Ὀλύμπιε. οὔ νύ τʼ Ὀδυσσεὺς |
| 61 | Primary Ἀργείων παρὰ νηυσὶ χαρίζετο ἱερὰ ῥέζων |
| 62 | Primary Τροίῃ ἐν εὐρείῃ; τί νύ οἱ τόσον ὠδύσαο, Ζεῦ; |
| 63 | Primary τὴν δʼ ἀπαμειβόμενος προσέφη νεφεληγερέτα Ζεύς· |
| 64 | Primary τέκνον ἐμόν, ποῖόν σε ἔπος φύγεν ἕρκος ὀδόντων. |
| 65 | Primary πῶς ἂν ἔπειτʼ Ὀδυσῆος ἐγὼ θείοιο λαθοίμην, |
| 66 | Primary ὃς περὶ μὲν νόον ἐστὶ βροτῶν, περὶ δʼ ἱρὰ θεοῖσιν |
| 67 | Primary ἀθανάτοισιν ἔδωκε, τοὶ οὐρανὸν εὐρὺν ἔχουσιν; |
| 68 | Primary ἀλλὰ Ποσειδάων γαιήοχος ἀσκελὲς αἰεὶ |
| 69 | Primary Κύκλωπος κεχόλωται, ὃν ὀφθαλμοῦ ἀλάωσεν, |
| 70 | Primary ἀντίθεον Πολύφημον, ὅου κράτος ἐστὶ μέγιστον |
| 71 | Primary πᾶσιν Κυκλώπεσσι· Θόωσα δέ μιν τέκε νύμφη, |
| 72 | Primary Φόρκυνος θυγάτηρ ἁλὸς ἀτρυγέτοιο μέδοντος, |
| 73 | Primary ἐν σπέσσι γλαφυροῖσι Ποσειδάωνι μιγεῖσα. |
| 74 | Primary ἐκ τοῦ δὴ Ὀδυσῆα Ποσειδάων ἐνοσίχθων |
| 75 | Primary οὔ τι κατακτείνει, πλάζει δʼ ἀπὸ πατρίδος αἴης. |
| 76 | Primary ἀλλʼ ἄγεθʼ, ἡμεῖς οἵδε περιφραζώμεθα πάντες |
| 77 | Primary νόστον, ὅπως ἔλθῃσι· Ποσειδάων δὲ μεθήσει |
| 78 | Primary ὃν χόλον· οὐ μὲν γάρ τι δυνήσεται ἀντία πάντων |
| 79 | Primary ἀθανάτων ἀέκητι θεῶν ἐριδαινέμεν οἶος. |
| 80 | Primary τὸν δʼ ἠμείβετʼ ἔπειτα θεά, γλαυκῶπις Ἀθήνη· |
| 81 | Primary ὦ πάτερ ἡμέτερε Κρονίδη, ὕπατε κρειόντων, |
| 82 | Primary εἰ μὲν δὴ νῦν τοῦτο φίλον μακάρεσσι θεοῖσιν, |
| 83 | Primary νοστῆσαι Ὀδυσῆα πολύφρονα ὅνδε δόμονδε, |
| 84 | Primary Ἑρμείαν μὲν ἔπειτα διάκτορον ἀργεϊφόντην |
| 85 | Primary νῆσον ἐς Ὠγυγίην ὀτρύνομεν, ὄφρα τάχιστα |
| 86 | Primary νύμφῃ ἐυπλοκάμῳ εἴπῃ νημερτέα βουλήν, |
| 87 | Primary νόστον Ὀδυσσῆος ταλασίφρονος, ὥς κε νέηται· |
| 88 | Primary αὐτὰρ ἐγὼν Ἰθάκηνδʼ ἐσελεύσομαι, ὄφρα οἱ υἱὸν |
| 89 | Primary μᾶλλον ἐποτρύνω καί οἱ μένος ἐν φρεσὶ θείω, |
| 90 | Primary εἰς ἀγορὴν καλέσαντα κάρη κομόωντας Ἀχαιοὺς |
| 91 | Primary πᾶσι μνηστήρεσσιν ἀπειπέμεν, οἵ τέ οἱ αἰεὶ |
| 92 | Primary μῆλʼ ἁδινὰ σφάζουσι καὶ εἰλίποδας ἕλικας βοῦς. |
| 93 | Primary πέμψω δʼ ἐς Σπάρτην τε καὶ ἐς Πύλον ἠμαθόεντα |
| 94 | Primary νόστον πευσόμενον πατρὸς φίλου, ἤν που ἀκούσῃ, |
| 95 | Primary ἠδʼ ἵνα μιν κλέος ἐσθλὸν ἐν ἀνθρώποισιν ἔχῃσιν. |
| 96 | Primary ὣς εἰποῦσʼ ὑπὸ ποσσὶν ἐδήσατο καλὰ πέδιλα, |
| 97 | Primary ἀμβρόσια χρύσεια, τά μιν φέρον ἠμὲν ἐφʼ ὑγρὴν |
| 98 | Primary ἠδʼ ἐπʼ ἀπείρονα γαῖαν ἅμα πνοιῇς ἀνέμοιο· |
| 99 | Primary εἵλετο δʼ ἄλκιμον ἔγχος, ἀκαχμένον ὀξέι χαλκῷ, |
| 100 | Primary βριθὺ μέγα στιβαρόν, τῷ δάμνησι στίχας ἀνδρῶν |
| 101 | Primary ἡρώων, τοῖσίν τε κοτέσσεται ὀβριμοπάτρη. |
| 102 | Primary βῆ δὲ κατʼ Οὐλύμποιο καρήνων ἀίξασα, |
| 103 | Primary στῆ δʼ Ἰθάκης ἐνὶ δήμῳ ἐπὶ προθύροις Ὀδυσῆος, |
| 104 | Primary οὐδοῦ ἐπʼ αὐλείου· παλάμῃ δʼ ἔχε χάλκεον ἔγχος, |
| 105 | Primary εἰδομένη ξείνῳ, Ταφίων ἡγήτορι Μέντῃ. |
| 106 | Primary εὗρε δʼ ἄρα μνηστῆρας ἀγήνορας. οἱ μὲν ἔπειτα |
| 107 | Primary πεσσοῖσι προπάροιθε θυράων θυμὸν ἔτερπον |
| 108 | Primary ἥμενοι ἐν ῥινοῖσι βοῶν, οὓς ἔκτανον αὐτοί· |
| 109 | Primary κήρυκες δʼ αὐτοῖσι καὶ ὀτρηροὶ θεράποντες |
| 110 | Primary οἱ μὲν οἶνον ἔμισγον ἐνὶ κρητῆρσι καὶ ὕδωρ, |
| 111 | Primary οἱ δʼ αὖτε σπόγγοισι πολυτρήτοισι τραπέζας |
| 112 | Primary νίζον καὶ πρότιθεν, τοὶ δὲ κρέα πολλὰ δατεῦντο. |
| 113 | Primary τὴν δὲ πολὺ πρῶτος ἴδε Τηλέμαχος θεοειδής, |
| 114 | Primary ἧστο γὰρ ἐν μνηστῆρσι φίλον τετιημένος ἦτορ, |
| 115 | Primary ὀσσόμενος πατέρʼ ἐσθλὸν ἐνὶ φρεσίν, εἴ ποθεν ἐλθὼν |
| 116 | Primary μνηστήρων τῶν μὲν σκέδασιν κατὰ δώματα θείη, |
| 117 | Primary τιμὴν δʼ αὐτὸς ἔχοι καὶ δώμασιν οἷσιν ἀνάσσοι. |
| 118 | Primary τὰ φρονέων, μνηστῆρσι μεθήμενος, εἴσιδʼ Ἀθήνην. |
| 119 | Primary βῆ δʼ ἰθὺς προθύροιο, νεμεσσήθη δʼ ἐνὶ θυμῷ |
| 120 | Primary ξεῖνον δηθὰ θύρῃσιν ἐφεστάμεν· ἐγγύθι δὲ στὰς |
| 121 | Primary χεῖρʼ ἕλε δεξιτερὴν καὶ ἐδέξατο χάλκεον ἔγχος, |
| 122 | Primary καί μιν φωνήσας ἔπεα πτερόεντα προσηύδα· |
| 123 | Primary χαῖρε, ξεῖνε, παρʼ ἄμμι φιλήσεαι· αὐτὰρ ἔπειτα |
| 124 | Primary δείπνου πασσάμενος μυθήσεαι ὅττεό σε χρή. |
| 125 | Primary ὣς εἰπὼν ἡγεῖθʼ, ἡ δʼ ἕσπετο Παλλὰς Ἀθήνη. |
| 126 | Primary οἱ δʼ ὅτε δή ῥʼ ἔντοσθεν ἔσαν δόμου ὑψηλοῖο, |
| 127 | Primary ἔγχος μέν ῥʼ ἔστησε φέρων πρὸς κίονα μακρὴν |
| 128 | Primary δουροδόκης ἔντοσθεν ἐυξόου, ἔνθα περ ἄλλα |
| 129 | Primary ἔγχεʼ Ὀδυσσῆος ταλασίφρονος ἵστατο πολλά, |
| 130 | Primary αὐτὴν δʼ ἐς θρόνον εἷσεν ἄγων, ὑπὸ λῖτα πετάσσας, |
| 131 | Primary καλὸν δαιδάλεον· ὑπὸ δὲ θρῆνυς ποσὶν ἦεν. |
| 132 | Primary πὰρ δʼ αὐτὸς κλισμὸν θέτο ποικίλον, ἔκτοθεν ἄλλων |
| 133 | Primary μνηστήρων, μὴ ξεῖνος ἀνιηθεὶς ὀρυμαγδῷ |
| 134 | Primary δείπνῳ ἁδήσειεν, ὑπερφιάλοισι μετελθών, |
| 135 | Primary ἠδʼ ἵνα μιν περὶ πατρὸς ἀποιχομένοιο ἔροιτο. |
| 136 | Primary χέρνιβα δʼ ἀμφίπολος προχόῳ ἐπέχευε φέρουσα |
| 137 | Primary καλῇ χρυσείῃ, ὑπὲρ ἀργυρέοιο λέβητος, |
| 138 | Primary νίψασθαι· παρὰ δὲ ξεστὴν ἐτάνυσσε τράπεζαν. |
| 139 | Primary σῖτον δʼ αἰδοίη ταμίη παρέθηκε φέρουσα, |
| 140 | Primary εἴδατα πόλλʼ ἐπιθεῖσα, χαριζομένη παρεόντων· |
| 141 | Primary δαιτρὸς δὲ κρειῶν πίνακας παρέθηκεν ἀείρας |
| 142 | Primary παντοίων, παρὰ δέ σφι τίθει χρύσεια κύπελλα· |
| 143 | Primary κῆρυξ δʼ αὐτοῖσιν θάμʼ ἐπῴχετο οἰνοχοεύων. |
| 144 | Primary ἐς δʼ ἦλθον μνηστῆρες ἀγήνορες. οἱ μὲν ἔπειτα |
| 145 | Primary ἑξείης ἕζοντο κατὰ κλισμούς τε θρόνους τε, |
| 146 | Primary τοῖσι δὲ κήρυκες μὲν ὕδωρ ἐπὶ χεῖρας ἔχευαν, |
| 147 | Primary σῖτον δὲ δμῳαὶ παρενήνεον ἐν κανέοισιν, |
| 148 | Primary κοῦροι δὲ κρητῆρας ἐπεστέψαντο ποτοῖο. |
| 149 | Primary οἱ δʼ ἐπʼ ὀνείαθʼ ἑτοῖμα προκείμενα χεῖρας ἴαλλον. |
| 150 | Primary αὐτὰρ ἐπεὶ πόσιος καὶ ἐδητύος ἐξ ἔρον ἕντο |
| 151 | Primary μνηστῆρες, τοῖσιν μὲν ἐνὶ φρεσὶν ἄλλα μεμήλει, |
| 152 | Primary μολπή τʼ ὀρχηστύς τε· τὰ γάρ τʼ ἀναθήματα δαιτός· |
| 153 | Primary κῆρυξ δʼ ἐν χερσὶν κίθαριν περικαλλέα θῆκεν |
| 154 | Primary Φημίῳ, ὅς ῥʼ ἤειδε παρὰ μνηστῆρσιν ἀνάγκῃ. |
| 155 | Primary ἦ τοι ὁ φορμίζων ἀνεβάλλετο καλὸν ἀείδειν. |
| 156 | Primary αὐτὰρ Τηλέμαχος προσέφη γλαυκῶπιν Ἀθήνην, |
| 157 | Primary ἄγχι σχὼν κεφαλήν, ἵνα μὴ πευθοίαθʼ οἱ ἄλλοι· |
| 158 | Primary ξεῖνε φίλʼ, ἦ καί μοι νεμεσήσεαι ὅττι κεν εἴπω; |
| 159 | Primary τούτοισιν μὲν ταῦτα μέλει, κίθαρις καὶ ἀοιδή, |
| 160 | Primary ῥεῖʼ, ἐπεὶ ἀλλότριον βίοτον νήποινον ἔδουσιν, |
| 161 | Primary ἀνέρος, οὗ δή που λεύκʼ ὀστέα πύθεται ὄμβρῳ |
| 162 | Primary κείμενʼ ἐπʼ ἠπείρου, ἢ εἰν ἁλὶ κῦμα κυλίνδει. |
| 163 | Primary εἰ κεῖνόν γʼ Ἰθάκηνδε ἰδοίατο νοστήσαντα, |
| 164 | Primary πάντες κʼ ἀρησαίατʼ ἐλαφρότεροι πόδας εἶναι |
| 165 | Primary ἢ ἀφνειότεροι χρυσοῖό τε ἐσθῆτός τε. |
| 166 | Primary νῦν δʼ ὁ μὲν ὣς ἀπόλωλε κακὸν μόρον, οὐδέ τις ἡμῖν |
| 167 | Primary θαλπωρή, εἴ πέρ τις ἐπιχθονίων ἀνθρώπων |
| 168 | Primary φῇσιν ἐλεύσεσθαι· τοῦ δʼ ὤλετο νόστιμον ἦμαρ. |
| 169 | Primary ἀλλʼ ἄγε μοι τόδε εἰπὲ καὶ ἀτρεκέως κατάλεξον· |
| 170 | Primary τίς πόθεν εἰς ἀνδρῶν; πόθι τοι πόλις ἠδὲ τοκῆες; |
| 171 | Primary ὁπποίης τʼ ἐπὶ νηὸς ἀφίκεο· πῶς δέ σε ναῦται |
| 172 | Primary ἤγαγον εἰς Ἰθάκην; τίνες ἔμμεναι εὐχετόωντο; |
| 173 | Primary οὐ μὲν γάρ τί σε πεζὸν ὀίομαι ἐνθάδʼ ἱκέσθαι. |
| 174 | Primary καί μοι τοῦτʼ ἀγόρευσον ἐτήτυμον, ὄφρʼ ἐὺ εἰδῶ, |
| 175 | Primary ἠὲ νέον μεθέπεις ἦ καὶ πατρώιός ἐσσι |
| 176 | Primary ξεῖνος, ἐπεὶ πολλοὶ ἴσαν ἀνέρες ἡμέτερον δῶ |
| 177 | Primary ἄλλοι, ἐπεὶ καὶ κεῖνος ἐπίστροφος ἦν ἀνθρώπων. |
| 178 | Primary τὸν δʼ αὖτε προσέειπε θεά, γλαυκῶπις Ἀθήνη· |
| 179 | Primary τοιγὰρ ἐγώ τοι ταῦτα μάλʼ ἀτρεκέως ἀγορεύσω. |
| 180 | Primary Μέντης Ἀγχιάλοιο δαΐφρονος εὔχομαι εἶναι |
| 181 | Primary υἱός, ἀτὰρ Ταφίοισι φιληρέτμοισιν ἀνάσσω. |
| 182 | Primary νῦν δʼ ὧδε ξὺν νηὶ κατήλυθον ἠδʼ ἑτάροισιν |
| 183 | Primary πλέων ἐπὶ οἴνοπα πόντον ἐπʼ ἀλλοθρόους ἀνθρώπους, |
| 184 | Primary ἐς Τεμέσην μετὰ χαλκόν, ἄγω δʼ αἴθωνα σίδηρον. |
| 185 | Primary νηῦς δέ μοι ἥδʼ ἕστηκεν ἐπʼ ἀγροῦ νόσφι πόληος, |
| 186 | Primary ἐν λιμένι Ῥείθρῳ ὑπὸ Νηίῳ ὑλήεντι. |
| 187 | Primary ξεῖνοι δʼ ἀλλήλων πατρώιοι εὐχόμεθʼ εἶναι |
| 188 | Primary ἐξ ἀρχῆς, εἴ πέρ τε γέροντʼ εἴρηαι ἐπελθὼν |
| 189 | Primary Λαέρτην ἥρωα, τὸν οὐκέτι φασὶ πόλινδε |
| 190 | Primary ἔρχεσθʼ, ἀλλʼ ἀπάνευθεν ἐπʼ ἀγροῦ πήματα πάσχειν |
| 191 | Primary γρηὶ σὺν ἀμφιπόλῳ, ἥ οἱ βρῶσίν τε πόσιν τε |
| 192 | Primary παρτιθεῖ, εὖτʼ ἄν μιν κάματος κατὰ γυῖα λάβῃσιν |
| 193 | Primary ἑρπύζοντʼ ἀνὰ γουνὸν ἀλωῆς οἰνοπέδοιο. |
| 194 | Primary νῦν δʼ ἦλθον· δὴ γάρ μιν ἔφαντʼ ἐπιδήμιον εἶναι, |
| 195 | Primary σὸν πατέρʼ· ἀλλά νυ τόν γε θεοὶ βλάπτουσι κελεύθου. |
| 196 | Primary οὐ γάρ πω τέθνηκεν ἐπὶ χθονὶ δῖος Ὀδυσσεύς, |
| 197 | Primary ἀλλʼ ἔτι που ζωὸς κατερύκεται εὐρέι πόντῳ |
| 198 | Primary νήσῳ ἐν ἀμφιρύτῃ, χαλεποὶ δέ μιν ἄνδρες ἔχουσιν |
| 199 | Primary ἄγριοι, οἵ που κεῖνον ἐρυκανόωσʼ ἀέκοντα. |
| 200 | Primary αὐτὰρ νῦν τοι ἐγὼ μαντεύσομαι, ὡς ἐνὶ θυμῷ |
| 201 | Primary ἀθάνατοι βάλλουσι καὶ ὡς τελέεσθαι ὀίω, |
| 202 | Primary οὔτε τι μάντις ἐὼν οὔτʼ οἰωνῶν σάφα εἰδώς. |
| 203 | Primary οὔ τοι ἔτι δηρόν γε φίλης ἀπὸ πατρίδος αἴης |
| 204 | Primary ἔσσεται, οὐδʼ εἴ πέρ τε σιδήρεα δέσματʼ ἔχῃσιν· |
| 205 | Primary φράσσεται ὥς κε νέηται, ἐπεὶ πολυμήχανός ἐστιν. |
| 206 | Primary ἀλλʼ ἄγε μοι τόδε εἰπὲ καὶ ἀτρεκέως κατάλεξον, |
| 207 | Primary εἰ δὴ ἐξ αὐτοῖο τόσος πάϊς εἰς Ὀδυσῆος. |
| 208 | Primary αἰνῶς μὲν κεφαλήν τε καὶ ὄμματα καλὰ ἔοικας |
| 209 | Primary κείνῳ, ἐπεὶ θαμὰ τοῖον ἐμισγόμεθʼ ἀλλήλοισιν, |
| 210 | Primary πρίν γε τὸν ἐς Τροίην ἀναβήμεναι, ἔνθα περ ἄλλοι |
| 211 | Primary Ἀργείων οἱ ἄριστοι ἔβαν κοίλῃς ἐνὶ νηυσίν· |
| 212 | Primary ἐκ τοῦ δʼ οὔτʼ Ὀδυσῆα ἐγὼν ἴδον οὔτʼ ἔμʼ ἐκεῖνος. |
| 213 | Primary τὴν δʼ αὖ Τηλέμαχος πεπνυμένος ἀντίον ηὔδα· |
| 214 | Primary τοιγὰρ ἐγώ τοι, ξεῖνε, μάλʼ ἀτρεκέως ἀγορεύσω. |
| 215 | Primary μήτηρ μέν τέ μέ φησι τοῦ ἔμμεναι, αὐτὰρ ἐγώ γε |
| 216 | Primary οὐκ οἶδʼ· οὐ γάρ πώ τις ἑὸν γόνον αὐτὸς ἀνέγνω. |
| 217 | Primary ὡς δὴ ἐγώ γʼ ὄφελον μάκαρός νύ τευ ἔμμεναι υἱὸς |
| 218 | Primary ἀνέρος, ὃν κτεάτεσσιν ἑοῖς ἔπι γῆρας ἔτετμε. |
| 219 | Primary νῦν δʼ ὃς ἀποτμότατος γένετο θνητῶν ἀνθρώπων, |
| 220 | Primary τοῦ μʼ ἔκ φασι γενέσθαι, ἐπεὶ σύ με τοῦτʼ ἐρεείνεις. |
| 221 | Primary τὸν δʼ αὖτε προσέειπε θεά, γλαυκῶπις Ἀθήνη· |
| 222 | Primary οὐ μέν τοι γενεήν γε θεοὶ νώνυμνον ὀπίσσω |
| 223 | Primary θῆκαν, ἐπεὶ σέ γε τοῖον ἐγείνατο Πηνελόπεια. |
| 224 | Primary ἀλλʼ ἄγε μοι τόδε εἰπὲ καὶ ἀτρεκέως κατάλεξον· |
| 225 | Primary τίς δαίς, τίς δὲ ὅμιλος ὅδʼ ἔπλετο; τίπτε δέ σε χρεώ; |
| 226 | Primary εἰλαπίνη ἠὲ γάμος; ἐπεὶ οὐκ ἔρανος τάδε γʼ ἐστίν· |
| 227 | Primary ὥς τέ μοι ὑβρίζοντες ὑπερφιάλως δοκέουσι |
| 228 | Primary δαίνυσθαι κατὰ δῶμα. νεμεσσήσαιτό κεν ἀνὴρ |
| 229 | Primary αἴσχεα πόλλʼ ὁρόων, ὅς τις πινυτός γε μετέλθοι. |
| 230 | Primary τὴν δʼ αὖ Τηλέμαχος πεπνυμένος ἀντίον ηὔδα· |
| 231 | Primary ξεῖνʼ, ἐπεὶ ἂρ δὴ ταῦτά μʼ ἀνείρεαι ἠδὲ μεταλλᾷς, |
| 232 | Primary μέλλεν μέν ποτε οἶκος ὅδʼ ἀφνειὸς καὶ ἀμύμων |
| 233 | Primary ἔμμεναι, ὄφρʼ ἔτι κεῖνος ἀνὴρ ἐπιδήμιος ἦεν· |
| 234 | Primary νῦν δʼ ἑτέρως ἐβόλοντο θεοὶ κακὰ μητιόωντες, |
| 235 | Primary οἳ κεῖνον μὲν ἄιστον ἐποίησαν περὶ πάντων |
| 236 | Primary ἀνθρώπων, ἐπεὶ οὔ κε θανόντι περ ὧδʼ ἀκαχοίμην, |
| 237 | Primary εἰ μετὰ οἷς ἑτάροισι δάμη Τρώων ἐνὶ δήμῳ, |
| 238 | Primary ἠὲ φίλων ἐν χερσίν, ἐπεὶ πόλεμον τολύπευσεν. |
| 239 | Primary τῷ κέν οἱ τύμβον μὲν ἐποίησαν Παναχαιοί, |
| 240 | Primary ἠδέ κε καὶ ᾧ παιδὶ μέγα κλέος ἤρατʼ ὀπίσσω. |
| 241 | Primary νῦν δέ μιν ἀκλειῶς ἅρπυιαι ἀνηρείψαντο· |
| 242 | Primary οἴχετʼ ἄιστος ἄπυστος, ἐμοὶ δʼ ὀδύνας τε γόους τε |
| 243 | Primary κάλλιπεν. οὐδέ τι κεῖνον ὀδυρόμενος στεναχίζω |
| 244 | Primary οἶον, ἐπεί νύ μοι ἄλλα θεοὶ κακὰ κήδεʼ ἔτευξαν. |
| 245 | Primary ὅσσοι γὰρ νήσοισιν ἐπικρατέουσιν ἄριστοι, |
| 246 | Primary Δουλιχίῳ τε Σάμῃ τε καὶ ὑλήεντι Ζακύνθῳ, |
| 247 | Primary ἠδʼ ὅσσοι κραναὴν Ἰθάκην κάτα κοιρανέουσιν, |
| 248 | Primary τόσσοι μητέρʼ ἐμὴν μνῶνται, τρύχουσι δὲ οἶκον. |
| 249 | Primary ἡ δʼ οὔτʼ ἀρνεῖται στυγερὸν γάμον οὔτε τελευτὴν |
| 250 | Primary ποιῆσαι δύναται· τοὶ δὲ φθινύθουσιν ἔδοντες |
| 251 | Primary οἶκον ἐμόν· τάχα δή με διαρραίσουσι καὶ αὐτόν. |
| 252 | Primary τὸν δʼ ἐπαλαστήσασα προσηύδα Παλλὰς Ἀθήνη· |
| 253 | Primary ὢ πόποι, ἦ δὴ πολλὸν ἀποιχομένου Ὀδυσῆος |
| 254 | Primary δεύῃ, ὅ κε μνηστῆρσιν ἀναιδέσι χεῖρας ἐφείη. |
| 255 | Primary εἰ γὰρ νῦν ἐλθὼν δόμου ἐν πρώτῃσι θύρῃσι |
| 256 | Primary σταίη, ἔχων πήληκα καὶ ἀσπίδα καὶ δύο δοῦρε, |
| 257 | Primary τοῖος ἐὼν οἷόν μιν ἐγὼ τὰ πρῶτʼ ἐνόησα |
| 258 | Primary οἴκῳ ἐν ἡμετέρῳ πίνοντά τε τερπόμενόν τε, |
| 259 | Primary ἐξ Ἐφύρης ἀνιόντα παρʼ Ἴλου Μερμερίδαο— |
| 260 | Primary ᾤχετο γὰρ καὶ κεῖσε θοῆς ἐπὶ νηὸς Ὀδυσσεὺς |
| 261 | Primary φάρμακον ἀνδροφόνον διζήμενος, ὄφρα οἱ εἴη |
| 262 | Primary ἰοὺς χρίεσθαι χαλκήρεας· ἀλλʼ ὁ μὲν οὔ οἱ |
| 263 | Primary δῶκεν, ἐπεί ῥα θεοὺς νεμεσίζετο αἰὲν ἐόντας, |
| 264 | Primary ἀλλὰ πατήρ οἱ δῶκεν ἐμός· φιλέεσκε γὰρ αἰνῶς— |
| 265 | Primary τοῖος ἐὼν μνηστῆρσιν ὁμιλήσειεν Ὀδυσσεύς· |
| 266 | Primary πάντες κʼ ὠκύμοροί τε γενοίατο πικρόγαμοί τε. |
| 267 | Primary ἀλλʼ ἦ τοι μὲν ταῦτα θεῶν ἐν γούνασι κεῖται, |
| 268 | Primary ἤ κεν νοστήσας ἀποτίσεται, ἦε καὶ οὐκί, |
| 269 | Primary οἷσιν ἐνὶ μεγάροισι· σὲ δὲ φράζεσθαι ἄνωγα, |
| 270 | Primary ὅππως κε μνηστῆρας ἀπώσεαι ἐκ μεγάροιο. |
| 271 | Primary εἰ δʼ ἄγε νῦν ξυνίει καὶ ἐμῶν ἐμπάζεο μύθων· |
| 272 | Primary αὔριον εἰς ἀγορὴν καλέσας ἥρωας Ἀχαιοὺς |
| 273 | Primary μῦθον πέφραδε πᾶσι, θεοὶ δʼ ἐπὶ μάρτυροι ἔστων. |
| 274 | Primary μνηστῆρας μὲν ἐπὶ σφέτερα σκίδνασθαι ἄνωχθι, |
| 275 | Primary μητέρα δʼ, εἴ οἱ θυμὸς ἐφορμᾶται γαμέεσθαι, |
| 276 | Primary ἂψ ἴτω ἐς μέγαρον πατρὸς μέγα δυναμένοιο· |
| 277 | Primary οἱ δὲ γάμον τεύξουσι καὶ ἀρτυνέουσιν ἔεδνα |
| 278 | Primary πολλὰ μάλʼ, ὅσσα ἔοικε φίλης ἐπὶ παιδὸς ἕπεσθαι. |
| 279 | Primary σοὶ δʼ αὐτῷ πυκινῶς ὑποθήσομαι, αἴ κε πίθηαι· |
| 280 | Primary νῆʼ ἄρσας ἐρέτῃσιν ἐείκοσιν, ἥ τις ἀρίστη, |
| 281 | Primary ἔρχεο πευσόμενος πατρὸς δὴν οἰχομένοιο, |
| 282 | Primary ἤν τίς τοι εἴπῃσι βροτῶν, ἢ ὄσσαν ἀκούσῃς |
| 283 | Primary ἐκ Διός, ἥ τε μάλιστα φέρει κλέος ἀνθρώποισι. |
| 284 | Primary πρῶτα μὲν ἐς Πύλον ἐλθὲ καὶ εἴρεο Νέστορα δῖον, |
| 285 | Primary κεῖθεν δὲ Σπάρτηνδε παρὰ ξανθὸν Μενέλαον· |
| 286 | Primary ὃς γὰρ δεύτατος ἦλθεν Ἀχαιῶν χαλκοχιτώνων. |
| 287 | Primary εἰ μέν κεν πατρὸς βίοτον καὶ νόστον ἀκούσῃς, |
| 288 | Primary ἦ τʼ ἂν τρυχόμενός περ ἔτι τλαίης ἐνιαυτόν· |
| 289 | Primary εἰ δέ κε τεθνηῶτος ἀκούσῃς μηδʼ ἔτʼ ἐόντος, |
| 290 | Primary νοστήσας δὴ ἔπειτα φίλην ἐς πατρίδα γαῖαν |
| 291 | Primary σῆμά τέ οἱ χεῦαι καὶ ἐπὶ κτέρεα κτερεΐξαι |
| 292 | Primary πολλὰ μάλʼ, ὅσσα ἔοικε, καὶ ἀνέρι μητέρα δοῦναι. |
| 293 | Primary αὐτὰρ ἐπὴν δὴ ταῦτα τελευτήσῃς τε καὶ ἔρξῃς, |
| 294 | Primary φράζεσθαι δὴ ἔπειτα κατὰ φρένα καὶ κατὰ θυμὸν |
| 295 | Primary ὅππως κε μνηστῆρας ἐνὶ μεγάροισι τεοῖσι |
| 296 | Primary κτείνῃς ἠὲ δόλῳ ἢ ἀμφαδόν· οὐδέ τί σε χρὴ |
| 297 | Primary νηπιάας ὀχέειν, ἐπεὶ οὐκέτι τηλίκος ἐσσι. |
| 298 | Primary ἢ οὐκ ἀίεις οἷον κλέος ἔλλαβε δῖος Ὀρέστης |
| 299 | Primary πάντας ἐπʼ ἀνθρώπους, ἐπεὶ ἔκτανε πατροφονῆα, |
| 300 | Primary Αἴγισθον δολόμητιν, ὅ οἱ πατέρα κλυτὸν ἔκτα; |
| 301 | Primary καὶ σύ, φίλος, μάλα γάρ σʼ ὁρόω καλόν τε μέγαν τε, |
| 302 | Primary ἄλκιμος ἔσσʼ, ἵνα τίς σε καὶ ὀψιγόνων ἐὺ εἴπῃ. |
| 303 | Primary αὐτὰρ ἐγὼν ἐπὶ νῆα θοὴν κατελεύσομαι ἤδη |
| 304 | Primary ἠδʼ ἑτάρους, οἵ πού με μάλʼ ἀσχαλόωσι μένοντες· |
| 305 | Primary σοὶ δʼ αὐτῷ μελέτω, καὶ ἐμῶν ἐμπάζεο μύθων. |
| 306 | Primary τὴν δʼ αὖ Τηλέμαχος πεπνυμένος ἀντίον ηὔδα· |
| 307 | Primary ξεῖνʼ, ἦ τοι μὲν ταῦτα φίλα φρονέων ἀγορεύεις, |
| 308 | Primary ὥς τε πατὴρ ᾧ παιδί, καὶ οὔ ποτε λήσομαι αὐτῶν. |
| 309 | Primary ἀλλʼ ἄγε νῦν ἐπίμεινον, ἐπειγόμενός περ ὁδοῖο, |
| 310 | Primary ὄφρα λοεσσάμενός τε τεταρπόμενός τε φίλον κῆρ, |
| 311 | Primary δῶρον ἔχων ἐπὶ νῆα κίῃς, χαίρων ἐνὶ θυμῷ, |
| 312 | Primary τιμῆεν, μάλα καλόν, ὅ τοι κειμήλιον ἔσται |
| 313 | Primary ἐξ ἐμεῦ, οἷα φίλοι ξεῖνοι ξείνοισι διδοῦσι. |
| 314 | Primary τὸν δʼ ἠμείβετʼ ἔπειτα θεά, γλαυκῶπις Ἀθήνη· |
| 315 | Primary μή μʼ ἔτι νῦν κατέρυκε, λιλαιόμενόν περ ὁδοῖο. |
| 316 | Primary δῶρον δʼ ὅττι κέ μοι δοῦναι φίλον ἦτορ ἀνώγῃ, |
| 317 | Primary αὖτις ἀνερχομένῳ δόμεναι οἶκόνδε φέρεσθαι, |
| 318 | Primary καὶ μάλα καλὸν ἑλών· σοὶ δʼ ἄξιον ἔσται ἀμοιβῆς. |
| 319 | Primary ἡ μὲν ἄρʼ ὣς εἰποῦσʼ ἀπέβη γλαυκῶπις Ἀθήνη, |
| 320 | Primary ὄρνις δʼ ὣς ἀνόπαια διέπτατο· τῷ δʼ ἐνὶ θυμῷ |
| 321 | Primary θῆκε μένος καὶ θάρσος, ὑπέμνησέν τέ ἑ πατρὸς |
| 322 | Primary μᾶλλον ἔτʼ ἢ τὸ πάροιθεν. ὁ δὲ φρεσὶν ᾗσι νοήσας |
| 323 | Primary θάμβησεν κατὰ θυμόν· ὀίσατο γὰρ θεὸν εἶναι. |
| 324 | Primary αὐτίκα δὲ μνηστῆρας ἐπῴχετο ἰσόθεος φώς. |
| 325 | Primary τοῖσι δʼ ἀοιδὸς ἄειδε περικλυτός, οἱ δὲ σιωπῇ |
| 326 | Primary ἥατʼ ἀκούοντες· ὁ δʼ Ἀχαιῶν νόστον ἄειδε |
| 327 | Primary λυγρόν, ὃν ἐκ Τροίης ἐπετείλατο Παλλὰς Ἀθήνη. |
| 328 | Primary τοῦ δʼ ὑπερωιόθεν φρεσὶ σύνθετο θέσπιν ἀοιδὴν |
| 329 | Primary κούρη Ἰκαρίοιο, περίφρων Πηνελόπεια· |
| 330 | Primary κλίμακα δʼ ὑψηλὴν κατεβήσετο οἷο δόμοιο, |
| 331 | Primary οὐκ οἴη, ἅμα τῇ γε καὶ ἀμφίπολοι δύʼ ἕποντο. |
| 332 | Primary ἡ δʼ ὅτε δὴ μνηστῆρας ἀφίκετο δῖα γυναικῶν, |
| 333 | Primary στῆ ῥα παρὰ σταθμὸν τέγεος πύκα ποιητοῖο, |
| 334 | Primary ἄντα παρειάων σχομένη λιπαρὰ κρήδεμνα· |
| 335 | Primary ἀμφίπολος δʼ ἄρα οἱ κεδνὴ ἑκάτερθε παρέστη. |
| 336 | Primary δακρύσασα δʼ ἔπειτα προσηύδα θεῖον ἀοιδόν· |
| 337 | Primary Φήμιε, πολλὰ γὰρ ἄλλα βροτῶν θελκτήρια οἶδας, |
| 338 | Primary ἔργʼ ἀνδρῶν τε θεῶν τε, τά τε κλείουσιν ἀοιδοί· |
| 339 | Primary τῶν ἕν γέ σφιν ἄειδε παρήμενος, οἱ δὲ σιωπῇ |
| 340 | Primary οἶνον πινόντων· ταύτης δʼ ἀποπαύεʼ ἀοιδῆς |
| 341 | Primary λυγρῆς, ἥ τέ μοι αἰεὶ ἐνὶ στήθεσσι φίλον κῆρ |
| 342 | Primary τείρει, ἐπεί με μάλιστα καθίκετο πένθος ἄλαστον. |
| 343 | Primary τοίην γὰρ κεφαλὴν ποθέω μεμνημένη αἰεί, |
| 344 | Primary ἀνδρός, τοῦ κλέος εὐρὺ καθʼ Ἑλλάδα καὶ μέσον Ἄργος. |
| 345 | Primary τὴν δʼ αὖ Τηλέμαχος πεπνυμένος ἀντίον ηὔδα· |
| 346 | Primary μῆτερ ἐμή, τί τʼ ἄρα φθονέεις ἐρίηρον ἀοιδὸν |
| 347 | Primary τέρπειν ὅππῃ οἱ νόος ὄρνυται; οὔ νύ τʼ ἀοιδοὶ |
| 348 | Primary αἴτιοι, ἀλλά ποθι Ζεὺς αἴτιος, ὅς τε δίδωσιν |
| 349 | Primary ἀνδράσιν ἀλφηστῇσιν, ὅπως ἐθέλῃσιν, ἑκάστῳ. |
| 350 | Primary τούτῳ δʼ οὐ νέμεσις Δαναῶν κακὸν οἶτον ἀείδειν· |
| 351 | Primary τὴν γὰρ ἀοιδὴν μᾶλλον ἐπικλείουσʼ ἄνθρωποι, |
| 352 | Primary ἥ τις ἀκουόντεσσι νεωτάτη ἀμφιπέληται. |
| 353 | Primary σοὶ δʼ ἐπιτολμάτω κραδίη καὶ θυμὸς ἀκούειν· |
| 354 | Primary οὐ γὰρ Ὀδυσσεὺς οἶος ἀπώλεσε νόστιμον ἦμαρ |
| 355 | Primary ἐν Τροίῃ, πολλοὶ δὲ καὶ ἄλλοι φῶτες ὄλοντο. |
| 356 | Primary ἀλλʼ εἰς οἶκον ἰοῦσα τὰ σʼ αὐτῆς ἔργα κόμιζε, |
| 357 | Primary ἱστόν τʼ ἠλακάτην τε, καὶ ἀμφιπόλοισι κέλευε |
| 358 | Primary ἔργον ἐποίχεσθαι· μῦθος δʼ ἄνδρεσσι μελήσει |
| 359 | Primary πᾶσι, μάλιστα δʼ ἐμοί· τοῦ γὰρ κράτος ἔστʼ ἐνὶ οἴκῳ. |
| 360 | Primary ἡ μὲν θαμβήσασα πάλιν οἶκόνδε βεβήκει· |
| 361 | Primary παιδὸς γὰρ μῦθον πεπνυμένον ἔνθετο θυμῷ. |
| 362 | Primary ἐς δʼ ὑπερῷʼ ἀναβᾶσα σὺν ἀμφιπόλοισι γυναιξὶ |
| 363 | Primary κλαῖεν ἔπειτʼ Ὀδυσῆα φίλον πόσιν, ὄφρα οἱ ὕπνον |
| 364 | Primary ἡδὺν ἐπὶ βλεφάροισι βάλε γλαυκῶπις Ἀθήνη. |
| 365 | Primary μνηστῆρες δʼ ὁμάδησαν ἀνὰ μέγαρα σκιόεντα, |
| 366 | Primary πάντες δʼ ἠρήσαντο παραὶ λεχέεσσι κλιθῆναι. |
| 367 | Primary τοῖσι δὲ Τηλέμαχος πεπνυμένος ἤρχετο μύθων· |
| 368 | Primary μητρὸς ἐμῆς μνηστῆρες ὑπέρβιον ὕβριν ἔχοντες, |
| 369 | Primary νῦν μὲν δαινύμενοι τερπώμεθα, μηδὲ βοητὺς |
| 370 | Primary ἔστω, ἐπεὶ τόδε καλὸν ἀκουέμεν ἐστὶν ἀοιδοῦ |
| 371 | Primary τοιοῦδʼ οἷος ὅδʼ ἐστί, θεοῖς ἐναλίγκιος αὐδήν. |
| 372 | Primary ἠῶθεν δʼ ἀγορήνδε καθεζώμεσθα κιόντες |
| 373 | Primary πάντες, ἵνʼ ὕμιν μῦθον ἀπηλεγέως ἀποείπω, |
| 374 | Primary ἐξιέναι μεγάρων· ἄλλας δʼ ἀλεγύνετε δαῖτας, |
| 375 | Primary ὑμὰ κτήματʼ ἔδοντες, ἀμειβόμενοι κατὰ οἴκους. |
| 376 | Primary εἰ δʼ ὕμιν δοκέει τόδε λωίτερον καὶ ἄμεινον |
| 377 | Primary ἔμμεναι, ἀνδρὸς ἑνὸς βίοτον νήποινον ὀλέσθαι, |
| 378 | Primary κείρετʼ· ἐγὼ δὲ θεοὺς ἐπιβώσομαι αἰὲν ἐόντας, |
| 379 | Primary αἴ κέ ποθι Ζεὺς δῷσι παλίντιτα ἔργα γενέσθαι· |
| 380 | Primary νήποινοί κεν ἔπειτα δόμων ἔντοσθεν ὄλοισθε. |
| 381 | Primary ὣς ἔφαθʼ, οἱ δʼ ἄρα πάντες ὀδὰξ ἐν χείλεσι φύντες |
| 382 | Primary Τηλέμαχον θαύμαζον, ὃ θαρσαλέως ἀγόρευεν. |
| 383 | Primary τὸν δʼ αὖτʼ Ἀντίνοος προσέφη, Εὐπείθεος υἱός· |
| 384 | Primary Τηλέμαχʼ, ἦ μάλα δή σε διδάσκουσιν θεοὶ αὐτοὶ |
| 385 | Primary ὑψαγόρην τʼ ἔμεναι καὶ θαρσαλέως ἀγορεύειν· |
| 386 | Primary μὴ σέ γʼ ἐν ἀμφιάλῳ Ἰθάκῃ βασιλῆα Κρονίων |
| 387 | Primary ποιήσειεν, ὅ τοι γενεῇ πατρώιόν ἐστιν. |
| 388 | Primary τὸν δʼ αὖ Τηλέμαχος πεπνυμένος ἀντίον ηὔδα· |
| 389 | Primary Ἀντίνοʼ, ἦ καί μοι νεμεσήσεαι ὅττι κεν εἴπω; |
| 390 | Primary καί κεν τοῦτʼ ἐθέλοιμι Διός γε διδόντος ἀρέσθαι. |
| 391 | Primary ἦ φῂς τοῦτο κάκιστον ἐν ἀνθρώποισι τετύχθαι; |
| 392 | Primary οὐ μὲν γάρ τι κακὸν βασιλευέμεν· αἶψά τέ οἱ δῶ |
| 393 | Primary ἀφνειὸν πέλεται καὶ τιμηέστερος αὐτός. |
| 394 | Primary ἀλλʼ ἦ τοι βασιλῆες Ἀχαιῶν εἰσὶ καὶ ἄλλοι |
| 395 | Primary πολλοὶ ἐν ἀμφιάλῳ Ἰθάκῃ, νέοι ἠδὲ παλαιοί, |
| 396 | Primary τῶν κέν τις τόδʼ ἔχῃσιν, ἐπεὶ θάνε δῖος Ὀδυσσεύς· |
| 397 | Primary αὐτὰρ ἐγὼν οἴκοιο ἄναξ ἔσομʼ ἡμετέροιο |
| 398 | Primary καὶ δμώων, οὕς μοι ληίσσατο δῖος Ὀδυσσεύς. |
| 399 | Primary τὸν δʼ αὖτʼ Εὐρύμαχος Πολύβου πάϊς ἀντίον ηὔδα· |
| 400 | Primary Τηλέμαχʼ, ἦ τοι ταῦτα θεῶν ἐν γούνασι κεῖται, |
| 401 | Primary ὅς τις ἐν ἀμφιάλῳ Ἰθάκῃ βασιλεύσει Ἀχαιῶν· |
| 402 | Primary κτήματα δʼ αὐτὸς ἔχοις καὶ δώμασιν οἷσιν ἀνάσσοις. |
| 403 | Primary μὴ γὰρ ὅ γʼ ἔλθοι ἀνὴρ ὅς τίς σʼ ἀέκοντα βίηφιν |
| 404 | Primary κτήματʼ ἀπορραίσει, Ἰθάκης ἔτι ναιετοώσης. |
| 405 | Primary ἀλλʼ ἐθέλω σε, φέριστε, περὶ ξείνοιο ἐρέσθαι, |
| 406 | Primary ὁππόθεν οὗτος ἀνήρ, ποίης δʼ ἐξ εὔχεται εἶναι |
| 407 | Primary γαίης, ποῦ δέ νύ οἱ γενεὴ καὶ πατρὶς ἄρουρα. |
| 408 | Primary ἠέ τινʼ ἀγγελίην πατρὸς φέρει ἐρχομένοιο, |
| 409 | Primary ἦ ἑὸν αὐτοῦ χρεῖος ἐελδόμενος τόδʼ ἱκάνει; |
| 410 | Primary οἷον ἀναΐξας ἄφαρ οἴχεται, οὐδʼ ὑπέμεινε |
| 411 | Primary γνώμεναι· οὐ μὲν γάρ τι κακῷ εἰς ὦπα ἐῴκει. |
| 412 | Primary τὸν δʼ αὖ Τηλέμαχος πεπνυμένος ἀντίον ηὔδα· |
| 413 | Primary Εὐρύμαχʼ, ἦ τοι νόστος ἀπώλετο πατρὸς ἐμοῖο· |
| 414 | Primary οὔτʼ οὖν ἀγγελίῃ ἔτι πείθομαι, εἴ ποθεν ἔλθοι, |
| 415 | Primary οὔτε θεοπροπίης ἐμπάζομαι, ἥν τινα μήτηρ |
| 416 | Primary ἐς μέγαρον καλέσασα θεοπρόπον ἐξερέηται. |
| 417 | Primary ξεῖνος δʼ οὗτος ἐμὸς πατρώιος ἐκ Τάφου ἐστίν, |
| 418 | Primary Μέντης δʼ Ἀγχιάλοιο δαΐφρονος εὔχεται εἶναι |
| 419 | Primary υἱός, ἀτὰρ Ταφίοισι φιληρέτμοισιν ἀνάσσει. |
| 420 | Primary ὣς φάτο Τηλέμαχος, φρεσὶ δʼ ἀθανάτην θεὸν ἔγνω. |
| 421 | Primary οἱ δʼ εἰς ὀρχηστύν τε καὶ ἱμερόεσσαν ἀοιδὴν |
| 422 | Primary τρεψάμενοι τέρποντο, μένον δʼ ἐπὶ ἕσπερον ἐλθεῖν. |
| 423 | Primary τοῖσι δὲ τερπομένοισι μέλας ἐπὶ ἕσπερος ἦλθε· |
| 424 | Primary δὴ τότε κακκείοντες ἔβαν οἶκόνδε ἕκαστος. |
| 425 | Primary Τηλέμαχος δʼ, ὅθι οἱ θάλαμος περικαλλέος αὐλῆς |
| 426 | Primary ὑψηλὸς δέδμητο περισκέπτῳ ἐνὶ χώρῳ, |
| 427 | Primary ἔνθʼ ἔβη εἰς εὐνὴν πολλὰ φρεσὶ μερμηρίζων. |
| 428 | Primary τῷ δʼ ἄρʼ ἅμʼ αἰθομένας δαΐδας φέρε κεδνὰ ἰδυῖα |
| 429 | Primary Εὐρύκλειʼ, Ὦπος θυγάτηρ Πεισηνορίδαο, |
| 430 | Primary τήν ποτε Λαέρτης πρίατο κτεάτεσσιν ἑοῖσιν |
| 431 | Primary πρωθήβην ἔτʼ ἐοῦσαν, ἐεικοσάβοια δʼ ἔδωκεν, |
| 432 | Primary ἶσα δέ μιν κεδνῇ ἀλόχῳ τίεν ἐν μεγάροισιν, |
| 433 | Primary εὐνῇ δʼ οὔ ποτʼ ἔμικτο, χόλον δʼ ἀλέεινε γυναικός· |
| 434 | Primary ἥ οἱ ἅμʼ αἰθομένας δαΐδας φέρε, καί ἑ μάλιστα |
| 435 | Primary δμῳάων φιλέεσκε, καὶ ἔτρεφε τυτθὸν ἐόντα. |
| 436 | Primary ὤιξεν δὲ θύρας θαλάμου πύκα ποιητοῖο, |
| 437 | Primary ἕζετο δʼ ἐν λέκτρῳ, μαλακὸν δʼ ἔκδυνε χιτῶνα· |
| 438 | Primary καὶ τὸν μὲν γραίης πυκιμηδέος ἔμβαλε χερσίν. |
| 439 | Primary ἡ μὲν τὸν πτύξασα καὶ ἀσκήσασα χιτῶνα, |
| 440 | Primary πασσάλῳ ἀγκρεμάσασα παρὰ τρητοῖσι λέχεσσι |
| 441 | Primary βῆ ῥʼ ἴμεν ἐκ θαλάμοιο, θύρην δʼ ἐπέρυσσε κορώνῃ |
| 442 | Primary ἀργυρέῃ, ἐπὶ δὲ κληῖδʼ ἐτάνυσσεν ἱμάντι. |
| 443 | Primary ἔνθʼ ὅ γε παννύχιος, κεκαλυμμένος οἰὸς ἀώτῳ, |
| 444 | Primary βούλευε φρεσὶν ᾗσιν ὁδὸν τὴν πέφραδʼ Ἀθήνη. |