Reader
Reader | Odyssey, Book 24
Odyssey
Homer
Text
Position
Line 1 of 548
Waypoints
| Line Ref | A. T. Murray | Ancient Greek |
|---|---|
| 1 | Primary Ἑρμῆς δὲ ψυχὰς Κυλλήνιος ἐξεκαλεῖτο |
| 2 | Primary ἀνδρῶν μνηστήρων· ἔχε δὲ ῥάβδον μετὰ χερσὶν |
| 3 | Primary καλὴν χρυσείην, τῇ τʼ ἀνδρῶν ὄμματα θέλγει |
| 4 | Primary ὧν ἐθέλει, τοὺς δʼ αὖτε καὶ ὑπνώοντας ἐγείρει· |
| 5 | Primary τῇ ῥʼ ἄγε κινήσας, ταὶ δὲ τρίζουσαι ἕποντο. |
| 6 | Primary ὡς δʼ ὅτε νυκτερίδες μυχῷ ἄντρου θεσπεσίοιο |
| 7 | Primary τρίζουσαι ποτέονται, ἐπεί κέ τις ἀποπέσῃσιν |
| 8 | Primary ὁρμαθοῦ ἐκ πέτρης, ἀνά τʼ ἀλλήλῃσιν ἔχονται, |
| 9 | Primary ὣς αἱ τετριγυῖαι ἅμʼ ἤϊσαν· ἦρχε δʼ ἄρα σφιν |
| 10 | Primary Ἑρμείας ἀκάκητα κατʼ εὐρώεντα κέλευθα. |
| 11 | Primary πὰρ δʼ ἴσαν Ὠκεανοῦ τε ῥοὰς καὶ Λευκάδα πέτρην, |
| 12 | Primary ἠδὲ παρʼ Ἠελίοιο πύλας καὶ δῆμον ὀνείρων |
| 13 | Primary ἤϊσαν· αἶψα δʼ ἵκοντο κατʼ ἀσφοδελὸν λειμῶνα, |
| 14 | Primary ἔνθα τε ναίουσι ψυχαί, εἴδωλα καμόντων. |
| 15 | Primary εὗρον δὲ ψυχὴν Πηληϊάδεω Ἀχιλῆος |
| 16 | Primary καὶ Πατροκλῆος καὶ ἀμύμονος Ἀντιλόχοιο |
| 17 | Primary Αἴαντός θʼ, ὃς ἄριστος ἔην εἶδός τε δέμας τε |
| 18 | Primary τῶν ἄλλων Δαναῶν μετʼ ἀμύμονα Πηλεΐδαο |
| 19 | Primary ὣς οἱ μὲν περὶ κεῖνον ὁμίλεον· ἀγχίμολον δὲ |
| 20 | Primary ἤλυθʼ ἔπι ψυχὴ Ἀγαμέμνονος Ἀτρεΐδαο |
| 21 | Primary ἀχνυμένη· περὶ δʼ ἄλλαι ἀγηγέραθʼ, ὅσσαι ἅμʼ αὐτῷ |
| 22 | Primary οἴκῳ ἐν Αἰγίσθοιο θάνον καὶ πότμον ἐπέσπον. |
| 23 | Primary τὸν προτέρη ψυχὴ προσεφώνεε Πηλεΐωνος· |
| 24 | Primary Ἀτρεΐδη, περὶ μέν σʼ ἔφαμεν Διὶ τερπικεραύνῳ |
| 25 | Primary ἀνδρῶν ἡρώων φίλον ἔμμεναι ἤματα πάντα, |
| 26 | Primary οὕνεκα πολλοῖσίν τε καὶ ἰφθίμοισιν ἄνασσες |
| 27 | Primary δήμῳ ἔνι Τρώων, ὅθι πάσχομεν ἄλγεʼ Ἀχαιοί. |
| 28 | Primary ἦ τʼ ἄρα καὶ σοὶ πρῶϊ παραστήσεσθαι ἔμελλεν |
| 29 | Primary μοῖρʼ ὀλοή, τὴν οὔ τις ἀλεύεται ὅς κε γένηται. |
| 30 | Primary ὡς ὄφελες τιμῆς ἀπονήμενος, ἧς περ ἄνασσες, |
| 31 | Primary δήμῳ ἔνι Τρώων θάνατον καὶ πότμον ἐπισπεῖν· |
| 32 | Primary τῷ κέν τοι τύμβον μὲν ἐποίησαν Παναχαιοί, |
| 33 | Primary ἠδέ κε καὶ σῷ παιδὶ μέγα κλέος ἤραʼ ὀπίσσω· |
| 34 | Primary νῦν δʼ ἄρα σʼ οἰκτίστῳ θανάτῳ εἵμαρτο ἁλῶναι. |
| 35 | Primary τὸν δʼ αὖτε ψυχὴ προσεφώνεεν Ἀτρείδαο· |
| 36 | Primary ὄλβιε Πηλέος υἱέ, θεοῖς ἐπιείκελʼ Ἀχιλλεῦ, |
| 37 | Primary ὃς θάνες ἐν Τροίῃ ἑκὰς Ἄργεος· ἀμφὶ δέ σʼ ἄλλοι |
| 38 | Primary κτείνοντο Τρώων καὶ Ἀχαιῶν υἷες ἄριστοι, |
| 39 | Primary μαρνάμενοι περὶ σεῖο· σὺ δʼ ἐν στροφάλιγγι κονίης |
| 40 | Primary κεῖσο μέγας μεγαλωστί, λελασμένος ἱπποσυνάων. |
| 41 | Primary ἡμεῖς δὲ πρόπαν ἦμαρ ἐμαρνάμεθʼ· οὐδέ κε πάμπαν |
| 42 | Primary παυσάμεθα πτολέμου, εἰ μὴ Ζεὺς λαίλαπι παῦσεν. |
| 43 | Primary αὐτὰρ ἐπεί σʼ ἐπὶ νῆας ἐνείκαμεν ἐκ πολέμοιο, |
| 44 | Primary κάτθεμεν ἐν λεχέεσσι, καθήραντες χρόα καλὸν |
| 45 | Primary ὕδατί τε λιαρῷ καὶ ἀλείφατι· πολλὰ δέ σʼ ἀμφὶ |
| 46 | Primary δάκρυα θερμὰ χέον Δαναοὶ κείροντό τε χαίτας. |
| 47 | Primary μήτηρ δʼ ἐξ ἁλὸς ἦλθε σὺν ἀθανάτῃς ἁλίῃσιν |
| 48 | Primary ἀγγελίης ἀΐουσα· βοὴ δʼ ἐπὶ πόντον ὀρώρει |
| 49 | Primary θεσπεσίη, ὑπὸ δὲ τρόμος ἔλλαβε πάντας Ἀχαιούς· |
| 50 | Primary καί νύ κʼ ἀναΐξαντες ἔβαν κοίλας ἐπὶ νῆας, |
| 51 | Primary εἰ μὴ ἀνὴρ κατέρυκε παλαιά τε πολλά τε εἰδώς, |
| 52 | Primary Νέστωρ, οὗ καὶ πρόσθεν ἀρίστη φαίνετο βουλή· |
| 53 | Primary ὅ σφιν ἐϋφρονέων ἀγορήσατο καὶ μετέειπεν· |
| 54 | Primary ἴσχεσθʼ, Ἀργεῖοι, μὴ φεύγετε, κοῦροι Ἀχαιῶν· |
| 55 | Primary μήτηρ ἐξ ἁλὸς ἥδε σὺν ἀθανάτῃς ἁλίῃσιν |
| 56 | Primary ἔρχεται, οὗ παιδὸς τεθνηότος ἀντιόωσα. |
| 57 | Primary ὣς ἔφαθʼ, οἱ δʼ ἔσχοντο φόβου μεγάθυμοι Ἀχαιοί· |
| 58 | Primary ἀμφὶ δέ σʼ ἔστησαν κοῦραι ἁλίοιο γέροντος |
| 59 | Primary οἴκτρʼ ὀλοφυρόμεναι, περὶ δʼ ἄμβροτα εἵματα ἕσσαν. |
| 60 | Primary Μοῦσαι δʼ ἐννέα πᾶσαι ἀμειβόμεναι ὀπὶ καλῇ |
| 61 | Primary θρήνεον· ἔνθα κεν οὔ τινʼ ἀδάκρυτόν γʼ ἐνόησας |
| 62 | Primary Ἀργείων· τοῖον γὰρ ὑπώρορε Μοῦσα λίγεια. |
| 63 | Primary ἑπτὰ δὲ καὶ δέκα μέν σε ὁμῶς νύκτας τε καὶ ἦμαρ |
| 64 | Primary κλαίομεν ἀθάνατοί τε θεοὶ θνητοί τʼ ἄνθρωποι· |
| 65 | Primary ὀκτωκαιδεκάτῃ δʼ ἔδομεν πυρί, πολλὰ δέ σʼ ἀμφὶ |
| 66 | Primary μῆλα κατεκτάνομεν μάλα πίονα καὶ ἕλικας βοῦς. |
| 67 | Primary καίεο δʼ ἔν τʼ ἐσθῆτι θεῶν καὶ ἀλείφατι πολλῷ |
| 68 | Primary καὶ μέλιτι γλυκερῷ· πολλοὶ δʼ ἥρωες Ἀχαιοὶ |
| 69 | Primary τεύχεσιν ἐρρώσαντο πυρὴν πέρι καιομένοιο, |
| 70 | Primary πεζοί θʼ ἱππῆές τε· πολὺς δʼ ὀρυμαγδὸς ὀρώρει |
| 71 | Primary αὐτὰρ ἐπεὶ δή σε φλὸξ ἤνυσεν Ἡφαίστοιο, |
| 72 | Primary ἠῶθεν δή τοι λέγομεν λεύκʼ ὀστέʼ, Ἀχιλλεῦ, |
| 73 | Primary οἴνῳ ἐν ἀκρήτῳ καὶ ἀλείφατι· δῶκε δὲ μήτηρ |
| 74 | Primary χρύσεον ἀμφιφορῆα· Διωνύσοιο δὲ δῶρον |
| 75 | Primary φάσκʼ ἔμεναι, ἔργον δὲ περικλυτοῦ Ἡφαίστοιο. |
| 76 | Primary ἐν τῷ τοι κεῖται λεύκʼ ὀστέα, φαίδιμʼ Ἀχιλλεῦ, |
| 77 | Primary μίγδα δὲ Πατρόκλοιο Μενοιτιάδαο θανόντος, |
| 78 | Primary χωρὶς δʼ Ἀντιλόχοιο, τὸν ἔξοχα τῖες ἁπάντων |
| 79 | Primary τῶν ἄλλων ἑτάρων, μετὰ Πάτροκλόν γε θανόντα. |
| 80 | Primary ἀμφʼ αὐτοῖσι δʼ ἔπειτα μέγαν καὶ ἀμύμονα τύμβον |
| 81 | Primary χεύαμεν Ἀργείων ἱερὸς στρατὸς αἰχμητάων |
| 82 | Primary ἀκτῇ ἔπι προὐχούσῃ, ἐπὶ πλατεῖ Ἑλλησπόντῳ, |
| 83 | Primary ὥς κεν τηλεφανὴς ἐκ ποντόφιν ἀνδράσιν εἴη |
| 84 | Primary τοῖς οἳ νῦν γεγάασι καὶ οἳ μετόπισθεν ἔσονται. |
| 85 | Primary μήτηρ δʼ αἰτήσασα θεοὺς περικαλλέʼ ἄεθλα |
| 86 | Primary θῆκε μέσῳ ἐν ἀγῶνι ἀριστήεσσιν Ἀχαιῶν. |
| 87 | Primary ἤδη μὲν πολέων τάφῳ ἀνδρῶν ἀντεβόλησας |
| 88 | Primary ἡρώων, ὅτε κέν ποτʼ ἀποφθιμένου βασιλῆος |
| 89 | Primary ζώννυνταί τε νέοι καὶ ἐπεντύνονται ἄεθλα· |
| 90 | Primary ἀλλά κε κεῖνα μάλιστα ἰδὼν θηήσαο θυμῷ, |
| 91 | Primary οἷʼ ἐπὶ σοὶ κατέθηκε θεὰ περικαλλέʼ ἄεθλα, |
| 92 | Primary ἀργυρόπεζα Θέτις· μάλα γὰρ φίλος ἦσθα θεοῖσιν. |
| 93 | Primary ὣς σὺ μὲν οὐδὲ θανὼν ὄνομʼ ὤλεσας, ἀλλά τοι αἰεὶ |
| 94 | Primary πάντας ἐπʼ ἀνθρώπους κλέος ἔσσεται ἐσθλόν, Ἀχιλλεῦ, |
| 95 | Primary αὐτὰρ ἐμοὶ τί τόδʼ ἦδος, ἐπεὶ πόλεμον τολύπευσα; |
| 96 | Primary ἐν νόστῳ γάρ μοι Ζεὺς μήσατο λυγρὸν ὄλεθρον |
| 97 | Primary Αἰγίσθου ὑπὸ χερσὶ καὶ οὐλομένης ἀλόχοιο. |
| 98 | Primary ὣς οἱ μὲν τοιαῦτα πρὸς ἀλλήλους ἀγόρευον, |
| 99 | Primary ἀγχίμολον δέ σφʼ ἦλθε διάκτορος ἀργεϊφόντης, |
| 100 | Primary ψυχὰς μνηστήρων κατάγων Ὀδυσῆϊ δαμέντων, |
| 101 | Primary τὼ δʼ ἄρα θαμβήσαντʼ ἰθὺς κίον, ὡς ἐσιδέσθην. |
| 102 | Primary ἔγνω δὲ ψυχὴ Ἀγαμέμνονος Ἀτρεΐδαο |
| 103 | Primary παῖδα φίλον Μελανῆος, ἀγακλυτὸν Ἀμφιμέδοντα· |
| 104 | Primary ξεῖνος γάρ οἱ ἔην Ἰθάκῃ ἔνι οἰκία ναίων. |
| 105 | Primary τὸν προτέρη ψυχὴ προσεφώνεεν Ἀτρεΐδαο· |
| 106 | Primary Ἀμφίμεδον, τί παθόντες ἐρεμνὴν γαῖαν ἔδυτε |
| 107 | Primary πάντες κεκριμένοι καὶ ὁμήλικες; οὐδέ κεν ἄλλως |
| 108 | Primary κρινάμενος λέξαιτο κατὰ πτόλιν ἄνδρας ἀρίστους. |
| 109 | Primary ἦ ὔμμʼ ἐν νήεσσι Ποσειδάων ἐδάμασσεν, |
| 110 | Primary ὄρσας ἀργαλέους ἀνέμους καὶ κύματα μακρά; |
| 111 | Primary ἦ που ἀνάρσιοι ἄνδρες ἐδηλήσαντʼ ἐπὶ χέρσου |
| 112 | Primary βοῦς περιταμνομένους ἠδʼ οἰῶν πώεα καλά, |
| 113 | Primary ἠὲ περὶ πτόλιος μαχεούμενοι ἠδὲ γυναικῶν; |
| 114 | Primary εἰπέ μοι εἰρομένῳ· ξεῖνος δέ τοι εὔχομαι εἶναι. |
| 115 | Primary ἦ οὐ μέμνῃ ὅτε κεῖσε κατήλυθον ὑμέτερον δῶ, |
| 116 | Primary ὀτρυνέων Ὀδυσῆα σὺν ἀντιθέῳ Μενελάῳ |
| 117 | Primary Ἴλιον εἰς ἅμʼ ἕπεσθαι ἐϋσσέλμων ἐπὶ νηῶν; |
| 118 | Primary μηνὶ δʼ ἄρʼ οὔλῳ πάντα περήσαμεν εὐρέα πόντον, |
| 119 | Primary σπουδῇ παρπεπιθόντες Ὀδυσσῆα πτολίπορθον. |
| 120 | Primary τὸν δʼ αὖτε ψυχὴ προσεφώνεεν Ἀμφιμέδοντος· |
| 121 | Primary Ἀτρεΐδη κύδιστε, ἄναξ ἀνδρῶν Ἀγάμεμνον, |
| 122 | Primary μέμνημαι τάδε πάντα, διοτρεφές, ὡς ἀγορεύεις· |
| 123 | Primary σοὶ δʼ ἐγὼ εὖ μάλα πάντα καὶ ἀτρεκέως καταλέξω, |
| 124 | Primary ἡμετέρου θανάτοιο κακὸν τέλος, οἷον ἐτύχθη. |
| 125 | Primary μνώμεθʼ Ὀδυσσῆος δὴν οἰχομένοιο δάμαρτα· |
| 126 | Primary ἡ δʼ οὔτʼ ἠρνεῖτο στυγερὸν γάμον οὔτʼ ἐτελεύτα, |
| 127 | Primary ἡμῖν φραζομένη θάνατον καὶ κῆρα μέλαιναν, |
| 128 | Primary ἀλλὰ δόλον τόνδʼ ἄλλον ἐνὶ φρεσὶ μερμήριξε· |
| 129 | Primary στησαμένη μέγαν ἱστὸν ἐνὶ μεγάροισιν ὕφαινε, |
| 130 | Primary λεπτὸν καὶ περίμετρον· ἄφαρ δʼ ἡμῖν μετέειπε· |
| 131 | Primary κοῦροι ἐμοὶ μνηστῆρες, ἐπεὶ θάνε δῖος Ὀδυσσεύς, |
| 132 | Primary μίμνετʼ ἐπειγόμενοι τὸν ἐμὸν γάμον, εἰς ὅ κε φᾶρος |
| 133 | Primary ἐκτελέσω, μή μοι μεταμώνια νήματʼ ὄληται, |
| 134 | Primary Λαέρτῃ ἥρωϊ ταφήϊον, εἰς ὅτε κέν μιν |
| 135 | Primary μοῖρʼ ὀλοὴ καθέλῃσι τανηλεγέος θανάτοιο, |
| 136 | Primary μή τίς μοι κατὰ δῆμον Ἀχαιϊάδων νεμεσήσῃ, |
| 137 | Primary αἴ κεν ἄτερ σπείρου κεῖται πολλὰ κτεατίσσας. |
| 138 | Primary ὣς ἔφαθʼ, ἡμῖν δʼ αὖτʼ ἐπεπείθετο θυμὸς ἀγήνωρ. |
| 139 | Primary ἔνθα καὶ ἠματίη μὲν ὑφαίνεσκεν μέγαν ἱστόν, |
| 140 | Primary νύκτας δʼ ἀλλύεσκεν, ἐπεὶ δαΐδας παραθεῖτο. |
| 141 | Primary ὣς τρίετες μὲν ἔληθε δόλῳ καὶ ἔπειθεν Ἀχαιούς· |
| 142 | Primary ἀλλʼ ὅτε τέτρατον ἦλθεν ἔτος καὶ ἐπήλυθον ὧραι, |
| 143 | Primary μηνῶν φθινόντων, περὶ δʼ ἤματα πόλλʼ ἐτελέσθη, |
| 144 | Primary καὶ τότε δή τις ἔειπε γυναικῶν, ἣ σάφα ᾔδη, |
| 145 | Primary καὶ τήν γʼ ἀλλύουσαν ἐφεύρομεν ἀγλαὸν ἱστόν. |
| 146 | Primary ὣς τὸ μὲν ἐξετέλεσσε καὶ οὐκ ἐθέλουσʼ, ὑπʼ ἀνάγκης. |
| 147 | Primary εὖθʼ ἡ φᾶρος ἔδειξεν, ὑφήνασα μέγαν ἱστόν, |
| 148 | Primary πλύνασʼ, ἠελίῳ ἐναλίγκιον ἠὲ σελήνῃ, |
| 149 | Primary καὶ τότε δή ῥʼ Ὀδυσῆα κακός ποθεν ἤγαγε δαίμων |
| 150 | Primary ἀγροῦ ἐπʼ ἐσχατιήν, ὅθι δώματα ναῖε συβώτης. |
| 151 | Primary ἔνθʼ ἦλθεν φίλος υἱὸς Ὀδυσσῆος θείοιο, |
| 152 | Primary ἐκ Πύλου ἠμαθόεντος ἰὼν σὺν νηῒ μελαίνῃ· |
| 153 | Primary τὼ δὲ μνηστῆρσιν θάνατον κακὸν ἀρτύναντε |
| 154 | Primary ἵκοντο προτὶ ἄστυ περικλυτόν, ἦ τοι Ὀδυσσεὺς |
| 155 | Primary ὕστερος, αὐτὰρ Τηλέμαχος πρόσθʼ ἡγεμόνευε. |
| 156 | Primary τὸν δὲ συβώτης ἦγε κακὰ χροῒ εἵματʼ ἔχοντα, |
| 157 | Primary πτωχῷ λευγαλέῳ ἐναλίγκιον ἠδὲ γέροντι |
| 158 | Primary σκηπτόμενον· τὰ δὲ λυγρὰ περὶ χροῒ εἵματα ἕστο· |
| 159 | Primary οὐδέ τις ἡμείων δύνατο γνῶναι τὸν ἐόντα |
| 160 | Primary ἐξαπίνης προφανέντʼ, οὐδʼ οἳ προγενέστεροι ἦσαν, |
| 161 | Primary ἀλλʼ ἔπεσίν τε κακοῖσιν ἐνίσσομεν ἠδὲ βολῇσιν. |
| 162 | Primary αὐτὰρ ὁ τῆος ἐτόλμα ἐνὶ μεγάροισιν ἑοῖσι |
| 163 | Primary βαλλόμενος καὶ ἐνισσόμενος τετληότι θυμῷ· |
| 164 | Primary ἀλλʼ ὅτε δή μιν ἔγειρε Διὸς νοός αἰγιόχοιο, |
| 165 | Primary σὺν μὲν Τηλεμάχῳ περικαλλέα τεύχεʼ ἀείρας |
| 166 | Primary ἐς θάλαμον κατέθηκε καὶ ἐκλήϊσεν ὀχῆας, |
| 167 | Primary αὐτὰρ ὁ ἣν ἄλοχον πολυκερδείῃσιν ἄνωγε |
| 168 | Primary τόξον μνηστήρεσσι θέμεν πολιόν τε σίδηρον, |
| 169 | Primary ἡμῖν αἰνομόροισιν ἀέθλια καὶ φόνου ἀρχήν. |
| 170 | Primary οὐδέ τις ἡμείων δύνατο κρατεροῖο βιοῖο |
| 171 | Primary νευρὴν ἐντανύσαι, πολλὸν δʼ ἐπιδευέες ἦμεν. |
| 172 | Primary ἀλλʼ ὅτε χεῖρας ἵκανεν Ὀδυσσῆος μέγα τόξον, |
| 173 | Primary ἔνθʼ ἡμεῖς μὲν πάντες ὁμοκλέομεν ἐπέεσσι |
| 174 | Primary τόξον μὴ δόμεναι, μηδʼ εἰ μάλα πολλʼ ἀγορεύοι· |
| 175 | Primary Τηλέμαχος δέ μιν οἶος ἐποτρύνων ἐκέλευσεν. |
| 176 | Primary αὐτὰρ ὁ δέξατο χειρὶ πολύτλας δῖος Ὀδυσσεύς, |
| 177 | Primary ῥηϊδίως δʼ ἐτάνυσσε βιόν, διὰ δʼ ἧκε σιδήρου, |
| 178 | Primary στῆ δʼ ἄρʼ ἐπʼ οὐδὸν ἰών, ταχέας δʼ ἐκχεύατʼ ὀϊστοὺς |
| 179 | Primary δεινὸν παπταίνων, βάλε δʼ Ἀντίνοον βασιλῆα. |
| 180 | Primary αὐτὰρ ἔπειτʼ ἄλλοις ἐφίει βέλεα στονόεντα, |
| 181 | Primary ἄντα τιτυσκόμενος· τοὶ δʼ ἀγχιστῖνοι ἔπιπτον. |
| 182 | Primary γνωτὸν δʼ ἦν ὅ ῥά τίς σφι θεῶν ἐπιτάρροθος ἦεν· |
| 183 | Primary αὐτίκα γὰρ κατὰ δώματʼ ἐπισπόμενοι μένεϊ σφῷ |
| 184 | Primary κτεῖνον ἐπιστροφάδην, τῶν δὲ στόνος ὤρνυτʼ ἀεικὴς |
| 185 | Primary κράτων τυπτομένων, δάπεδον δʼ ἅπαν αἵματι θῦεν. |
| 186 | Primary ὣς ἡμεῖς, Ἀγάμεμνον, ἀπωλόμεθʼ, ὧν ἔτι καὶ νῦν |
| 187 | Primary σώματʼ ἀκηδέα κεῖται ἐνὶ μεγάροις Ὀδυσῆος· |
| 188 | Primary οὐ γάρ πω ἴσασι φίλοι κατὰ δώμαθʼ ἑκάστου, |
| 189 | Primary οἵ κʼ ἀπονίψαντες μέλανα βρότον ἐξ ὠτειλέων |
| 190 | Primary κατθέμενοι γοάοιεν· ὃ γὰρ γέρας ἐστὶ θανόντων. |
| 191 | Primary τὸν δʼ αὖτε ψυχὴ προσεφώνεεν Ἀτρεΐδαο· |
| 192 | Primary ὄλβιε Λαέρταο πάϊ, πολυμήχανʼ Ὀδυσσεῦ, |
| 193 | Primary ἦ ἄρα σὺν μεγάλῃ ἀρετῇ ἐκτήσω ἄκοιτιν. |
| 194 | Primary ὡς ἀγαθαὶ φρένες ἦσαν ἀμύμονι Πηνελοπείῃ, |
| 195 | Primary κούρῃ Ἰκαρίου· ὡς εὖ μέμνητʼ Ὀδυσῆος, |
| 196 | Primary ἀνδρὸς κουριδίου· τῷ οἱ κλέος οὔ ποτʼ ὀλεῖται |
| 197 | Primary ἧς ἀρετῆς, τεύξουσι δʼ ἐπιχθονίοισιν ἀοιδὴν |
| 198 | Primary ἀθάνατοι χαρίεσσαν ἐχέφρονι Πηνελοπείῃ, |
| 199 | Primary οὐχ ὡς Τυνδαρέου κούρη κακὰ μήσατο ἔργα, |
| 200 | Primary κουρίδιον κτείνασα πόσιν, στυγερὴ δέ τʼ ἀοιδὴ |
| 201 | Primary ἔσσετʼ ἐπʼ ἀνθρώπους, χαλεπὴν δέ τε φῆμιν ὀπάσσει |
| 202 | Primary θηλυτέρῃσι γυναιξί, καὶ ἥ κʼ εὐεργὸς ἔῃσιν. |
| 203 | Primary ὣς οἱ μὲν τοιαῦτα πρὸς ἀλλήλους ἀγόρευον, |
| 204 | Primary ἑσταότʼ εἰν Ἀΐδαο δόμοις, ὑπὸ κεύθεσι γαίης· |
| 205 | Primary οἱ δʼ ἐπεὶ ἐκ πόλιος κατέβαν, τάχα δʼ ἀγρὸν ἵκοντο |
| 206 | Primary καλὸν Λαέρταο τετυγμένον, ὅν ῥά ποτʼ αὐτὸς |
| 207 | Primary Λαέρτης κτεάτισσεν, ἐπεὶ μάλα πόλλʼ ἐμόγησεν. |
| 208 | Primary ἔνθα οἱ οἶκος ἔην, περὶ δὲ κλίσιον θέε πάντη, |
| 209 | Primary ἐν τῷ σιτέσκοντο καὶ ἵζανον ἠδὲ ἴαυον |
| 210 | Primary δμῶες ἀναγκαῖοι, τοί οἱ φίλα ἐργάζοντο. |
| 211 | Primary ἐν δὲ γυνὴ Σικελὴ γρηῢς πέλεν, ἥ ῥα γέροντα |
| 212 | Primary ἐνδυκέως κομέεσκεν ἐπʼ ἀγροῦ, νόσφι πόληος. |
| 213 | Primary ἔνθʼ Ὀδυσεὺς δμώεσσι καὶ υἱέϊ μῦθον ἔειπεν· |
| 214 | Primary ὑμεῖς μὲν νῦν ἔλθετʼ ἐϋκτίμενον δόμον εἴσω, |
| 215 | Primary δεῖπνον δʼ αἶψα συῶν ἱερεύσατε ὅς τις ἄριστος· |
| 216 | Primary αὐτὰρ ἐγὼ πατρὸς πειρήσομαι ἡμετέροιο, |
| 217 | Primary αἴ κέ μʼ ἐπιγνώῃ καὶ φράσσεται ὀφθαλμοῖσιν, |
| 218 | Primary ἦέ κεν ἀγνοιῇσι, πολὺν χρόνον ἀμφὶς ἐόντα. |
| 219 | Primary ὣς εἰπὼν δμώεσσιν ἀρήϊα τεύχεʼ ἔδωκεν. |
| 220 | Primary οἱ μὲν ἔπειτα δόμονδε θοῶς κίον, αὐτὰρ Ὀδυσσεὺς |
| 221 | Primary ἆσσον ἴεν πολυκάρπου ἀλωῆς πειρητίζων. |
| 222 | Primary οὐδʼ εὗρεν Δολίον, μέγαν ὄρχατον ἐσκαταβαίνων, |
| 223 | Primary οὐδέ τινα δμώων οὐδʼ υἱῶν· ἀλλʼ ἄρα τοί γε |
| 224 | Primary αἱμασιὰς λέξοντες ἀλωῆς ἔμμεναι ἕρκος |
| 225 | Primary ᾤχοντʼ, αὐτὰρ ὁ τοῖσι γέρων ὁδὸν ἡγεμόνευε. |
| 226 | Primary τὸν δʼ οἶον πατέρʼ εὗρεν ἐϋκτιμένῃ ἐν ἀλωῇ, |
| 227 | Primary λιστρεύοντα φυτόν· ῥυπόωντα δὲ ἕστο χιτῶνα |
| 228 | Primary ῥαπτὸν ἀεικέλιον, περὶ δὲ κνήμῃσι βοείας |
| 229 | Primary κνημῖδας ῥαπτὰς δέδετο, γραπτῦς ἀλεείνων, |
| 230 | Primary χειρῖδάς τʼ ἐπὶ χερσὶ βάτων ἕνεκʼ· αὐτὰρ ὕπερθεν |
| 231 | Primary αἰγείην κυνέην κεφαλῇ ἔχε, πένθος ἀέξων. |
| 232 | Primary τὸν δʼ ὡς οὖν ἐνόησε πολύτλας δῖος Ὀδυσσεὺς |
| 233 | Primary γήραϊ τειρόμενον, μέγα δὲ φρεσὶ πένθος ἔχοντα, |
| 234 | Primary στὰς ἄρʼ ὑπὸ βλωθρὴν ὄγχνην κατὰ δάκρυον εἶβε. |
| 235 | Primary μερμήριξε δʼ ἔπειτα κατὰ φρένα καὶ κατὰ θυμὸν |
| 236 | Primary κύσσαι καὶ περιφῦναι ἑὸν πατέρʼ, ἠδὲ ἕκαστα |
| 237 | Primary εἰπεῖν, ὡς ἔλθοι καὶ ἵκοιτʼ ἐς πατρίδα γαῖαν, |
| 238 | Primary ἦ πρῶτʼ ἐξερέοιτο ἕκαστά τε πειρήσαιτο. |
| 239 | Primary ὧδε δέ οἱ φρονέοντι δοάσσατο κέρδιον εἶναι, |
| 240 | Primary πρῶτον κερτομίοις ἐπέεσσιν πειρηθῆναι. |
| 241 | Primary τὰ φρονέων ἰθὺς κίεν αὐτοῦ δῖος Ὀδυσσεύς. |
| 242 | Primary ἦ τοι ὁ μὲν κατέχων κεφαλὴν φυτὸν ἀμφελάχαινε· |
| 243 | Primary τὸν δὲ παριστάμενος προσεφώνεε φαίδιμος υἱός· |
| 244 | Primary ὦ γέρον, οὐκ ἀδαημονίη σʼ ἔχει ἀμφιπολεύειν |
| 245 | Primary ὄρχατον, ἀλλʼ εὖ τοι κομιδὴ ἔχει, οὐδέ τι πάμπαν, |
| 246 | Primary οὐ φυτόν, οὐ συκέη, οὐκ ἄμπελος, οὐ μὲν ἐλαίη, |
| 247 | Primary οὐκ ὄγχνη, οὐ πρασιή τοι ἄνευ κομιδῆς κατὰ κῆπον. |
| 248 | Primary ἄλλο δέ τοι ἐρέω, σὺ δὲ μὴ χόλον ἔνθεο θυμῷ |
| 249 | Primary αὐτόν σʼ οὐκ ἀγαθὴ κομιδὴ ἔχει, ἀλλʼ ἅμα γῆρας |
| 250 | Primary λυγρὸν ἔχεις αὐχμεῖς τε κακῶς καὶ ἀεικέα ἕσσαι. |
| 251 | Primary οὐ μὲν ἀεργίης γε ἄναξ ἕνεκʼ οὔ σε κομίζει, |
| 252 | Primary οὐδέ τί τοι δούλειον ἐπιπρέπει εἰσοράασθαι |
| 253 | Primary εἶδος καὶ μέγεθος· βασιλῆϊ γὰρ ἀνδρὶ ἔοικας. |
| 254 | Primary τοιούτῳ δὲ ἔοικας, ἐπεὶ λούσαιτο φάγοι τε, |
| 255 | Primary εὑδέμεναι μαλακῶς· ἡ γὰρ δίκη ἐστὶ γερόντων. |
| 256 | Primary ἀλλʼ ἄγε μοι τόδε εἰπὲ καὶ ἀτρεκέως κατάλεξον, |
| 257 | Primary τεῦ δμὼς εἶς ἀνδρῶν; τεῦ δʼ ὄρχατον ἀμφιπολεύεις; |
| 258 | Primary καὶ μοι τοῦτʼ ἀγόρευσον ἐτήτυμον, ὄφρʼ ἐῢ εἰδῶ, |
| 259 | Primary εἰ ἐτεόν γʼ Ἰθάκην τήνδʼ ἱκόμεθʼ, ὥς μοι ἔειπεν |
| 260 | Primary οὗτος ἀνὴρ νῦν δὴ ξυμβλήμενος ἐνθάδʼ ἰόντι, |
| 261 | Primary οὔ τι μάλʼ ἀρτίφρων, ἐπεὶ οὐ τόλμησεν ἕκαστα |
| 262 | Primary εἰπεῖν ἠδʼ ἐπακοῦσαι ἐμὸν ἔπος, ὡς ἐρέεινον |
| 263 | Primary ἀμφὶ ξείνῳ ἐμῷ, ἤ που ζώει τε καὶ ἔστιν |
| 264 | Primary ἦ ἤδη τέθνηκε καὶ εἰν Ἀΐδαο δόμοισιν. |
| 265 | Primary ἐκ γάρ τοι ἐρέω, σὺ δὲ σύνθεο καί μευ ἄκουσον· |
| 266 | Primary ἄνδρα ποτʼ ἐξείνισσα φίλῃ ἐνὶ πατρίδι γαίῃ |
| 267 | Primary ἡμέτερόνδʼ ἐλθόντα, καὶ οὔ πω τις βροτὸς ἄλλος |
| 268 | Primary ξείνων τηλεδαπῶν φιλίων ἐμὸν ἵκετο δῶμα· |
| 269 | Primary εὔχετο δʼ ἐξ Ἰθάκης γένος ἔμμεναι, αὐτὰρ ἔφασκε |
| 270 | Primary Λαέρτην Ἀρκεισιάδην πατέρʼ ἔμμεναι αὐτῷ. |
| 271 | Primary τὸν μὲν ἐγὼ πρὸς δώματʼ ἄγων ἐῢ ἐξείνισσα, |
| 272 | Primary ἐνδυκέως φιλέων, πολλῶν κατὰ οἶκον ἐόντων, |
| 273 | Primary καί οἱ δῶρα πόρον ξεινήϊα, οἷα ἐῴκει. |
| 274 | Primary χρυσοῦ μέν οἱ δῶκʼ εὐεργέος ἑπτὰ τάλαντα, |
| 275 | Primary δῶκα δέ οἱ κρητῆρα πανάργυρον ἀνθεμόεντα, |
| 276 | Primary δώδεκα δʼ ἁπλοΐδας χλαίνας, τόσσους δὲ τάπητας, |
| 277 | Primary τόσσα δὲ φάρεα καλά, τόσους δʼ ἐπὶ τοῖσι χιτῶνας, |
| 278 | Primary χωρὶς δʼ αὖτε γυναῖκας, ἀμύμονα ἔργα ἰδυίας, |
| 279 | Primary τέσσαρας εἰδαλίμας, ἃς ἤθελεν αὐτὸς ἑλέσθαι. |
| 280 | Primary τὸν δʼ ἠμείβετʼ ἔπειτα πατὴρ κατὰ δάκρυον εἴβων· |
| 281 | Primary ξεῖνʼ, ἦ τοι μὲν γαῖαν ἱκάνεις, ἣν ἐρεείνεις, |
| 282 | Primary ὑβρισταὶ δʼ αὐτὴν καὶ ἀτάσθαλοι ἄνδρες ἔχουσιν· |
| 283 | Primary δῶρα δʼ ἐτώσια ταῦτα χαρίζεο, μυρίʼ ὀπάζων· |
| 284 | Primary εἰ γάρ μιν ζωόν γʼ ἐκίχεις Ἰθάκης ἐνὶ δήμῳ, |
| 285 | Primary τῷ κέν σʼ εὖ δώροισιν ἀμειψάμενος ἀπέπεμψε |
| 286 | Primary καὶ ξενίῃ ἀγαθῇ ἡ γὰρ θέμις, ὅς τις ὑπάρξῃ. |
| 287 | Primary ἀλλʼ ἄγε μοι τόδε εἰπὲ καὶ ἀτρεκέως κατάλεξον, |
| 288 | Primary πόστον δὴ ἔτος ἐστίν, ὅτε ξείνισσας ἐκεῖνον |
| 289 | Primary σὸν ξεῖνον δύστηνον, ἐμὸν παῖδʼ, εἴ ποτʼ ἔην γε, |
| 290 | Primary δύσμορον; ὅν που τῆλε φίλων καὶ πατρίδος αἴης |
| 291 | Primary ἠέ που ἐν πόντῳ φάγον ἰχθύες, ἢ ἐπὶ χέρσου |
| 292 | Primary θηρσὶ καὶ οἰωνοῖσιν ἕλωρ γένετʼ· οὐδέ ἑ μήτηρ |
| 293 | Primary κλαῦσε περιστείλασα πατήρ θʼ, οἵ μιν τεκόμεσθα· |
| 294 | Primary οὐδʼ ἄλοχος πολύδωρος, ἐχέφρων Πηνελόπεια, |
| 295 | Primary κώκυσʼ ἐν λεχέεσσιν ἑὸν πόσιν, ὡς ἐπεῴκει, |
| 296 | Primary ὀφθαλμοὺς καθελοῦσα· τὸ γὰρ γέρας ἐστὶ θανόντων. |
| 297 | Primary καί μοι τοῦτʼ ἀγόρευσον ἐτήτυμον, ὄφρʼ ἐῢ εἰδῶ· |
| 298 | Primary τίς πόθεν εἶς ἀνδρῶν; πόθι τοι πόλις ἠδὲ τοκῆες; |
| 299 | Primary ποῦ δὲ νηῦς ἕστηκε θοή, ἥ σʼ ἤγαγε δεῦρο |
| 300 | Primary ἀντιθέους θʼ ἑτάρους; ἦ ἔμπορος εἰλήλουθας |
| 301 | Primary νηὸς ἐπʼ ἀλλοτρίης, οἱ δʼ ἐκβήσαντες ἔβησαν; |
| 302 | Primary τὸν δʼ ἀπαμειβόμενος προσέφη πολύμητις Ὀδυσσεύς· |
| 303 | Primary τοιγὰρ ἐγώ τοι πάντα μάλʼ ἀτρεκέως καταλέξω. |
| 304 | Primary εἰμὶ μὲν ἐξ Ἀλύβαντος, ὅθι κλυτὰ δώματα ναίω, |
| 305 | Primary υἱὸς Ἀφείδαντος Πολυπημονίδαο ἄνακτος· |
| 306 | Primary αὐτὰρ ἐμοί γʼ ὄνομʼ ἐστὶν Ἐπήριτος· ἀλλά με δαίμων |
| 307 | Primary πλάγξʼ ἀπὸ Σικανίης δεῦρʼ ἐλθέμεν οὐκ ἐθέλοντα· |
| 308 | Primary νηῦς δέ μοι ἥδʼ ἕστηκεν ἐπʼ ἀγροῦ νόσφι πόληος. |
| 309 | Primary αὐτὰρ Ὀδυσσῆϊ τόδε δὴ πέμπτον ἔτος ἐστίν, |
| 310 | Primary ἐξ οὗ κεῖθεν ἔβη καὶ ἐμῆς ἀπελήλυθε πάτρης, |
| 311 | Primary δύσμορος· ἦ τέ οἱ ἐσθλοὶ ἔσαν ὄρνιθες ἰόντι, |
| 312 | Primary δεξιοί, οἷς χαίρων μὲν ἐγὼν ἀπέπεμπον ἐκεῖνον, |
| 313 | Primary χαῖρε δὲ κεῖνος ἰών· θυμὸς δʼ ἔτι νῶϊν ἐώλπει |
| 314 | Primary μίξεσθαι ξενίῃ ἠδʼ ἀγλαὰ δῶρα διδώσειν. |
| 315 | Primary ὣς φάτο, τὸν δʼ ἄχεος νεφέλη ἐκάλυψε μέλαινα· |
| 316 | Primary ἀμφοτέρῃσι δὲ χερσὶν ἑλὼν κόνιν αἰθαλόεσσαν |
| 317 | Primary χεύατο κὰκ κεφαλῆς πολιῆς, ἁδινὰ στεναχίζων. |
| 318 | Primary τοῦ δʼ ὠρίνετο θυμός, ἀνὰ ῥῖνας δέ οἱ ἤδη |
| 319 | Primary δριμὺ μένος προὔτυψε φίλον πατέρʼ εἰσορόωντι. |
| 320 | Primary κύσσε δέ μιν περιφὺς ἐπιάλμενος, ἠδὲ προσηύδα· |
| 321 | Primary κεῖνος μέν τοι ὅδʼ αὐτὸς ἐγώ, πάτερ, ὃν σὺ μεταλλᾷς, |
| 322 | Primary ἤλυθον εἰκοστῷ ἔτεϊ ἐς πατρίδα γαῖαν. |
| 323 | Primary ἀλλʼ ἴσχεο κλαυθμοῖο γόοιό τε δακρυόεντος. |
| 324 | Primary ἐκ γάρ τοι ἐρέω· μάλα δὲ χρὴ σπευδέμεν ἔμπης· |
| 325 | Primary μνηστῆρας κατέπεφνον ἐν ἡμετέροισι δόμοισι, |
| 326 | Primary λώβην τινύμενος θυμαλγέα καὶ κακὰ ἔργα. |
| 327 | Primary τὸν δʼ αὖ Λαέρτης ἀπαμείβετο φώνησέν τε· |
| 328 | Primary εἰ μὲν δὴ Ὀδυσεύς γε ἐμὸς πάϊς ἐνθάδʼ ἱκάνεις, |
| 329 | Primary σῆμά τί μοι νῦν εἰπὲ ἀριφραδές, ὄφρα πεποίθω. |
| 330 | Primary τὸν δʼ ἀπαμειβόμενος προσέφη πολύμητις Ὀδυσσεύς· |
| 331 | Primary οὐλὴν μὲν πρῶτον τήνδε φράσαι ὀφθαλμοῖσι, |
| 332 | Primary τὴν ἐν Παρνησῷ μʼ ἔλασεν σῦς λευκῷ ὀδόντι |
| 333 | Primary οἰχόμενον· σὺ δέ με προΐεις καὶ πότνια μήτηρ |
| 334 | Primary ἐς πατέρʼ Αὐτόλυκον μητρὸς φίλον, ὄφρʼ ἂν ἑλοίμην |
| 335 | Primary δῶρα, τὰ δεῦρο μολών μοι ὑπέσχετο καὶ κατένευσεν. |
| 336 | Primary εἰ δʼ ἄγε τοι καὶ δένδρεʼ ἐϋκτιμένην κατʼ ἀλωὴν |
| 337 | Primary εἴπω, ἅ μοί ποτʼ ἔδωκας, ἐγὼ δʼ ᾔτεόν σε ἕκαστα |
| 338 | Primary παιδνὸς ἐών, κατὰ κῆπον ἐπισπόμενος· διὰ δʼ αὐτῶν |
| 339 | Primary ἱκνεύμεσθα, σὺ δʼ ὠνόμασας καὶ ἔειπες ἕκαστα. |
| 340 | Primary ὄγχνας μοι δῶκας τρισκαίδεκα καὶ δέκα μηλέας, |
| 341 | Primary συκέας τεσσαράκοντʼ· ὄρχους δέ μοι ὧδʼ ὀνόμηνας |
| 342 | Primary δώσειν πεντήκοντα, διατρύγιος δὲ ἕκαστος |
| 343 | Primary ἤην· ἔνθα δʼ ἀνὰ σταφυλαὶ παντοῖαι ἔασιν— |
| 344 | Primary ὁππότε δὴ Διὸς ὧραι ἐπιβρίσειαν ὕπερθεν. |
| 345 | Primary ὣς φάτο, τοῦ δʼ αὐτοῦ λύτο γούνατα καὶ φίλον ἦτορ, |
| 346 | Primary σήματʼ ἀναγνόντος τά οἱ ἔμπεδα πέφραδʼ Ὀδυσσεύς. |
| 347 | Primary ἀμφὶ δὲ παιδὶ φίλῳ βάλε πήχεε· τὸν δὲ ποτὶ οἷ |
| 348 | Primary εἷλεν ἀποψύχοντα πολύτλας δῖος Ὀδυσσεύς. |
| 349 | Primary αὐτὰρ ἐπεί ῥʼ ἄμπνυτο καὶ ἐς φρένα θυμὸς ἀγέρθη, |
| 350 | Primary ἐξαῦτις μύθοισιν ἀμειβόμενος προσέειπε· |
| 351 | Primary Ζεῦ πάτερ, ἦ ῥα ἔτʼ ἔστε θεοὶ κατὰ μακρὸν Ὄλυμπον, |
| 352 | Primary εἰ ἐτεὸν μνηστῆρες ἀτάσθαλον ὕβριν ἔτισαν. |
| 353 | Primary νῦν δʼ αἰνῶς δείδοικα κατὰ φρένα μὴ τάχα πάντες |
| 354 | Primary ἐνθάδʼ ἐπέλθωσιν Ἰθακήσιοι, ἀγγελίας δὲ |
| 355 | Primary πάντη ἐποτρύνωσι Κεφαλλήνων πολίεσσι. |
| 356 | Primary τὸν δʼ ἀπαμειβόμενος προσέφη πολύμητις Ὀδυσσεύς· |
| 357 | Primary θάρσει, μή τοι ταῦτα μετὰ φρεσὶ σῇσι μελόντων. |
| 358 | Primary ἀλλʼ ἴομεν προτὶ οἶκον, ὃς ὀρχάτου ἐγγύθι κεῖται· |
| 359 | Primary ἔνθα δὲ Τηλέμαχον καὶ βουκόλον ἠδὲ συβώτην |
| 360 | Primary προὔπεμψʼ, ὡς ἂν δεῖπνον ἐφοπλίσσωσι τάχιστα. |
| 361 | Primary ὣς ἄρα φωνήσαντε βάτην πρὸς δώματα καλά. |
| 362 | Primary οἱ δʼ ὅτε δή ῥʼ ἵκοντο δόμους εὖ ναιετάοντας, |
| 363 | Primary εὗρον Τηλέμαχον καὶ βουκόλον ἠδὲ συβώτην |
| 364 | Primary ταμνομένους κρέα πολλὰ κερῶντάς τʼ αἴθοπα οἶνον. |
| 365 | Primary τόφρα δὲ Λαέρτην μεγαλήτορα ᾧ ἐνὶ οἴκῳ |
| 366 | Primary ἀμφίπολος Σικελὴ λοῦσεν καὶ χρῖσεν ἐλαίῳ, |
| 367 | Primary ἀμφὶ δʼ ἄρα χλαῖναν καλὴν βάλεν· αὐτὰρ Ἀθήνη |
| 368 | Primary ἄγχι παρισταμένη μέλεʼ ἤλδανε ποιμένι λαῶν, |
| 369 | Primary μείζονα δʼ ἠὲ πάρος καὶ πάσσονα θῆκεν ἰδέσθαι. |
| 370 | Primary ἐκ δʼ ἀσαμίνθου βῆ· θαύμαζε δέ μιν φίλος υἱός, |
| 371 | Primary ὡς ἴδεν ἀθανάτοισι θεοῖς ἐναλίγκιον ἄντην· |
| 372 | Primary καί μιν φωνήσας ἔπεα πτερόεντα προσηύδα· |
| 373 | Primary ὦ πάτερ, ἦ μάλα τίς σε θεῶν αἰειγενετάων |
| 374 | Primary εἶδός τε μέγεθός τε ἀμείνονα θῆκεν ἰδέσθαι. |
| 375 | Primary τὸν δʼ αὖ Λαέρτης πεπνυμένος ἀντίον ηὔδα· |
| 376 | Primary αἲ γάρ, Ζεῦ τε πάτερ καὶ Ἀθηναίη καὶ Ἄπολλον, |
| 377 | Primary οἷος Νήρικον εἷλον, ἐϋκτίμενον πτολίεθρον, |
| 378 | Primary ἀκτὴν ἠπείροιο, Κεφαλλήνεσσιν ἀνάσσων, |
| 379 | Primary τοῖος ἐών τοι χθιζὸς ἐν ἡμετέροισι δόμοισιν, |
| 380 | Primary τεύχεʼ ἔχων ὤμοισιν, ἐφεστάμεναι καὶ ἀμύνειν |
| 381 | Primary ἄνδρας μνηστῆρας· τῷ κε σφέων γούνατʼ ἔλυσα |
| 382 | Primary πολλῶν ἐν μεγάροισι, σὺ δὲ φρένας ἔνδον ἐγήθεις. |
| 383 | Primary ὣς οἷ μὲν τοιαῦτα πρὸς ἀλλήλους ἀγόρευον. |
| 384 | Primary οἱ δʼ ἐπεὶ οὖν παύσαντο πόνου τετύκοντό τε δαῖτα, |
| 385 | Primary ἑξείης ἕζοντο κατὰ κλισμούς τε θρόνους τε· |
| 386 | Primary ἔνθʼ οἱ μὲν δείπνῳ ἐπεχείρεον, ἀγχίμολον δὲ |
| 387 | Primary ἦλθʼ ὁ γέρων Δολίος, σὺν δʼ υἱεῖς τοῖο γέροντος, |
| 388 | Primary ἐξ ἔργων μογέοντες, ἐπεὶ προμολοῦσα κάλεσσεν |
| 389 | Primary μήτηρ γρηῦς Σικελή, ἥ σφεας τρέφε καί ῥα γέροντα |
| 390 | Primary ἐνδυκέως κομέεσκεν, ἐπεὶ κατὰ γῆρας ἔμαρψεν. |
| 391 | Primary οἱ δʼ ὡς οὖν Ὀδυσῆα ἴδον φράσσαντό τε θυμῷ, |
| 392 | Primary ἔσταν ἐνὶ μεγάροισι τεθηπότες· αὐτὰρ Ὀδυσσεὺς |
| 393 | Primary μειλιχίοις ἐπέεσσι καθαπτόμενος προσέειπεν· |
| 394 | Primary ὦ γέρον, ἵζʼ ἐπὶ δεῖπνον, ἀπεκλελάθεσθε δὲ θάμβευς· |
| 395 | Primary δηρὸν γὰρ σίτῳ ἐπιχειρήσειν μεμαῶτες |
| 396 | Primary μίμνομεν ἐν μεγάροις, ὑμέας ποτιδέγμενοι αἰεί. |
| 397 | Primary ὣς ἄρ ἔφη, Δολίος δʼ ἰθὺς κίε χεῖρε πετάσσας |
| 398 | Primary ἀμφοτέρας, Ὀδυσεῦς δὲ λαβὼν κύσε χεῖρʼ ἐπὶ καρπῷ, |
| 399 | Primary καί μιν φωνήσας ἔπεα πτερόεντα προσηύδα· |
| 400 | Primary ὦ φίλʼ, ἐπεὶ νόστησας ἐελδομένοισι μάλʼ ἡμῖν |
| 401 | Primary οὐδʼ ἔτʼ ὀϊομένοισι, θεοὶ δέ σʼ ἀνήγαγον αὐτοί, |
| 402 | Primary οὖλέ τε καὶ μάλα χαῖρε, θεοὶ δέ τοι ὄλβια δοῖεν. |
| 403 | Primary καί μοι τοῦτʼ ἀγόρευσον ἐτήτυμον, ὄφρʼ ἐῢ εἰδῶ, |
| 404 | Primary ἢ ἤδη σάφα οἶδε περίφρων Πηνελόπεια |
| 405 | Primary νοστήσαντά σε δεῦρʼ, ἦ ἄγγελον ὀτρύνωμεν. |
| 406 | Primary τὸν δʼ ἀπαμειβόμενος προσέφη πολύμητις Ὀδυσσεύς |
| 407 | Primary ὦ γέρον, ἤδη οἶδε· τί σε χρὴ ταῦτα πένεσθαι; |
| 408 | Primary ὣς φάθʼ, ὁ δʼ αὖτις ἄρʼ ἕζετʼ ἐϋξέστου ἐπὶ δίφρου. |
| 409 | Primary ὣς δʼ αὔτως παῖδες Δολίου κλυτὸν ἀμφʼ Ὀδυσῆα |
| 410 | Primary δεικανόωντʼ ἐπέεσσι καὶ ἐν χείρεσσι φύοντο, |
| 411 | Primary ἑξείης δʼ ἕζοντο παραὶ Δολίον, πατέρα σφόν. |
| 412 | Primary ὣς οἱ μὲν περὶ δεῖπνον ἐνὶ μεγάροισι πένοντο· |
| 413 | Primary Ὄσσα δʼ ἄρʼ ἄγγελος ὦκα κατὰ πτόλιν ᾤχετο πάντη, |
| 414 | Primary μνηστήρων στυγερὸν θάνατον καὶ κῆρʼ ἐνέπουσα. |
| 415 | Primary οἱ δʼ ἄρʼ ὁμῶς ἀΐοντες ἐφοίτων ἄλλοθεν ἄλλος |
| 416 | Primary μυχμῷ τε στοναχῇ τε δόμων προπάροιθʼ Ὀδυσῆος, |
| 417 | Primary ἐκ δὲ νέκυς οἴκων φόρεον καὶ θάπτον ἕκαστοι, |
| 418 | Primary τοὺς δʼ ἐξ ἀλλάων πολίων οἶκόνδε ἕκαστον |
| 419 | Primary πέμπον ἄγειν ἁλιεῦσι θοῇς ἐπὶ νηυσὶ τιθέντες· |
| 420 | Primary αὐτοὶ δʼ εἰς ἀγορὴν κίον ἀθρόοι, ἀχνύμενοι κῆρ. |
| 421 | Primary αὐτὰρ ἐπεί ῥʼ ἤγερθεν ὁμηγερέες τʼ ἐγένοντο, |
| 422 | Primary τοῖσιν δʼ Εὐπείθης ἀνά θʼ ἵστατο καὶ μετέειπε· |
| 423 | Primary παιδὸς γάρ οἱ ἄλαστον ἐνὶ φρεσὶ πένθος ἔκειτο, |
| 424 | Primary Ἀντινόου, τὸν πρῶτον ἐνήρατο δῖος Ὀδυσσεύς· |
| 425 | Primary τοῦ ὅ γε δάκρυ χέων ἀγορήσατο καὶ μετέειπεν· |
| 426 | Primary ὦ φίλοι, ἦ μέγα ἔργον ἀνὴρ ὅδʼ ἐμήσατʼ Ἀχαιούς· |
| 427 | Primary τοὺς μὲν σὺν νήεσσιν ἄγων πολέας τε καὶ ἐσθλοὺς |
| 428 | Primary ὤλεσε μὲν νῆας γλαφυράς, ἀπὸ δʼ ὤλεσε λαούς· |
| 429 | Primary τοὺς δʼ ἐλθὼν ἔκτεινε Κεφαλλήνων ὄχʼ ἀρίστους, |
| 430 | Primary ἀλλʼ ἄγετε, πρὶν τοῦτον ἢ ἐς Πύλον ὦκα ἱκέσθαι |
| 431 | Primary ἢ καὶ ἐς Ἤλιδα δῖαν, ὅθι κρατέουσιν Ἐπειοί, |
| 432 | Primary ἴομεν· ἦ καὶ ἔπειτα κατηφέες ἐσσόμεθʼ αἰεί· |
| 433 | Primary λώβη γὰρ τάδε γʼ ἐστὶ καὶ ἐσσομένοισι πυθέσθαι, |
| 434 | Primary εἰ δὴ μὴ παίδων τε κασιγνήτων τε φονῆας |
| 435 | Primary τισόμεθʼ. οὐκ ἂν ἐμοί γε μετὰ φρεσὶν ἡδὺ γένοιτο |
| 436 | Primary ζωέμεν, ἀλλὰ τάχιστα θανὼν φθιμένοισι μετείην. |
| 437 | Primary ἀλλʼ ἴομεν, μὴ φθέωσι περαιωθέντες ἐκεῖνοι. |
| 438 | Primary ὣς φάτο δάκρυ χέων, οἶκτος δʼ ἕλε πάντας Ἀχαιούς. |
| 439 | Primary ἀγχίμολον δέ σφʼ ἦλθε Μέδων καὶ θεῖος ἀοιδὸς |
| 440 | Primary ἐκ μεγάρων Ὀδυσῆος, ἐπεί σφεας ὕπνος ἀνῆκεν, |
| 441 | Primary ἔσταν δʼ ἐν μέσσοισι· τάφος δʼ ἕλεν ἄνδρα ἕκαστον. |
| 442 | Primary τοῖσι δὲ καὶ μετέειπε Μέδων πεπνυμένα εἰδώς· |
| 443 | Primary κέκλυτε δὴ νῦν μευ, Ἰθακήσιοι· οὐ γὰρ Ὀδυσσεὺς |
| 444 | Primary ἀθανάτων ἀέκητι θεῶν τάδʼ ἐμήσατο ἔργα· |
| 445 | Primary αὐτὸς ἐγὼν εἶδον θεὸν ἄμβροτον, ὅς ῥʼ Ὀδυσῆϊ |
| 446 | Primary ἐγγύθεν ἑστήκει καὶ Μέντορι πάντα ἐῴκει. |
| 447 | Primary ἀθάνατος δὲ θεὸς τοτὲ μὲν προπάροιθʼ Ὀδυσῆος |
| 448 | Primary φαίνετο θαρσύνων, τοτὲ δὲ μνηστῆρας ὀρίνων |
| 449 | Primary θῦνε κατὰ μέγαρον· τοὶ δʼ ἀγχιστῖνοι ἔπιπτον. |
| 450 | Primary ὣς φάτο, τοὺς δʼ ἄρα πάντας ὑπὸ χλωρὸν δέος ᾕρει. |
| 451 | Primary τοῖσι δὲ καὶ μετέειπε γέρων ἥρως Ἁλιθέρσης |
| 452 | Primary Μαστορίδης· ὁ γὰρ οἶος ὅρα πρόσσω καὶ ὀπίσσω· |
| 453 | Primary ὅ σφιν ἐϋφρονέων ἀγορήσατο καὶ μετέειπε· |
| 454 | Primary κέκλυτε δὴ νῦν μευ, Ἰθακήσιοι, ὅττι κεν εἴπω· |
| 455 | Primary ὑμετέρῃ κακότητι, φίλοι, τάδε ἔργα γένοντο· |
| 456 | Primary οὐ γὰρ ἐμοὶ πείθεσθʼ, οὐ Μέντορι ποιμένι λαῶν, |
| 457 | Primary ὑμετέρους παῖδας καταπαυέμεν ἀφροσυνάων, |
| 458 | Primary οἳ μέγα ἔργον ἔρεξαν ἀτασθαλίῃσι κακῇσι, |
| 459 | Primary κτήματα κείροντες καὶ ἀτιμάζοντες ἄκοιτιν |
| 460 | Primary ἀνδρὸς ἀριστῆος· τὸν δʼ οὐκέτι φάντο νέεσθαι. |
| 461 | Primary καὶ νῦν ὧδε γένοιτο. πίθεσθέ μοι ὡς ἀγορεύω· |
| 462 | Primary μὴ ἴομεν, μή πού τις ἐπίσπαστον κακὸν εὕρῃ. |
| 463 | Primary ὣς ἔφαθʼ, οἱ δʼ ἄρʼ ἀνήϊξαν μεγάλῳ ἀλαλητῷ |
| 464 | Primary ἡμίσεων πλείους· τοὶ δʼ ἀθρόοι αὐτόθι μίμνον· |
| 465 | Primary οὐ γὰρ σφιν ἅδε μῦθος ἐνὶ φρεσίν, ἀλλʼ Εὐπείθει |
| 466 | Primary πείθοντʼ· αἶψα δʼ ἔπειτʼ ἐπὶ τεύχεα ἐσσεύοντο. |
| 467 | Primary αὐτὰρ ἐπεί ῥʼ ἕσσαντο περὶ χροῒ νώροπα χαλκόν, |
| 468 | Primary ἀθρόοι ἠγερέθοντο πρὸ ἄστεος εὐρυχόροιο. |
| 469 | Primary τοῖσιν δʼ Εὐπείθης ἡγήσατο νηπιέῃσι· |
| 470 | Primary φῆ δʼ ὅ γε τίσεσθαι παιδὸς φόνον, οὐδʼ ἄρʼ ἔμελλεν |
| 471 | Primary ἂψ ἀπονοστήσειν, ἀλλʼ αὐτοῦ πότμον ἐφέψειν. |
| 472 | Primary αὐτὰρ Ἀθηναίη Ζῆνα Κρονίωνα προσηύδα· |
| 473 | Primary ὦ πάτερ ἡμέτερε, Κρονίδη, ὕπατε κρειόντων, |
| 474 | Primary εἰπέ μοι εἰρομένῃ, τί νύ τοι νόος ἔνδοθι κεύθει; |
| 475 | Primary ἢ προτέρω πόλεμόν τε κακὸν καὶ φύλοπιν αἰνὴν |
| 476 | Primary τεύξεις, ἦ φιλότητα μετʼ ἀμφοτέροισι τίθησθα; |
| 477 | Primary τὴν δʼ ἀπαμειβόμενος προσέφη νεφεληγερέτα Ζεύς· |
| 478 | Primary τέκνον ἐμόν, τί με ταῦτα διείρεαι ἠδὲ μεταλλᾷς; |
| 479 | Primary οὐ γὰρ δὴ τοῦτον μὲν ἐβούλευσας νόον αὐτή, |
| 480 | Primary ὡς ἦ τοι κείνους Ὀδυσεὺς ἀποτίσεται ἐλθών; |
| 481 | Primary ἔρξον ὅπως ἐθέλεις· ἐρέω τέ τοι ὡς ἐπέοικεν. |
| 482 | Primary ἐπεὶ δὴ μνηστῆρας ἐτίσατο δῖος Ὀδυσσεύς, |
| 483 | Primary ὅρκια πιστὰ ταμόντες ὁ μὲν βασιλευέτω αἰεί, |
| 484 | Primary ἡμεῖς δʼ αὖ παίδων τε κασιγνήτων τε φόνοιο |
| 485 | Primary ἔκλησιν θέωμεν· τοὶ δʼ ἀλλήλους φιλεόντων |
| 486 | Primary ὡς τὸ πάρος, πλοῦτος δὲ καὶ εἰρήνη ἅλις ἔστω. |
| 487 | Primary ὣς εἰπὼν ὤτρυνε πάρος μεμαυῖαν Ἀθήνην, |
| 488 | Primary βῆ δὲ κατʼ Οὐλύμποιο καρήνων ἀΐξασα. |
| 489 | Primary οἱ δʼ ἐπεὶ οὖν σίτοιο μελίφρονος ἐξ ἔρον ἕντο, |
| 490 | Primary τοῖς δʼ ἄρα μύθων ἦρχε πολύτλας δῖος Ὀδυσσεύς· |
| 491 | Primary ἐξελθών τις ἴδοι μὴ δὴ σχεδὸν ὦσι κιόντες. |
| 492 | Primary ὣς ἔφατʼ· ἐκ δʼ υἱὸς Δολίου κίεν, ὡς ἐκέλευεν· |
| 493 | Primary στῆ δʼ ἄρʼ ἐπʼ οὐδὸν ἰών, τοὺς δὲ σχεδὸν ἔσιδε πάντας· |
| 494 | Primary αἶψα δʼ Ὀδυσσῆα ἔπεα πτερόεντα προσηύδα· |
| 495 | Primary οἵδε δὴ ἐγγὺς ἔασʼ· ἀλλʼ ὁπλιζώμεθα θᾶσσον. |
| 496 | Primary ὣς ἔφαθʼ, οἱ δʼ ὤρνυντο καὶ ἐν τεύχεσσι δύοντο, |
| 497 | Primary τέσσαρες ἀμφʼ Ὀδυσῆʼ, ἓξ δʼ υἱεῖς οἱ Δολίοιο· |
| 498 | Primary ἐν δʼ ἄρα Λαέρτης Δολίος τʼ ἐς τεύχεʼ ἔδυνον, |
| 499 | Primary καὶ πολιοί περ ἐόντες, ἀναγκαῖοι πολεμισταί. |
| 500 | Primary αὐτὰρ ἐπεί ῥʼ ἕσσαντο περὶ χροῒ νώροπα χαλκόν, |
| 501 | Primary ὤϊξάν ῥα θύρας, ἐκ δʼ ἤϊον, ἄρχε δʼ Ὀδυσσεύς. |
| 502 | Primary τοῖσι δʼ ἐπʼ ἀγχίμολον θυγάτηρ Διὸς ἦλθεν Ἀθήνη |
| 503 | Primary Μέντορι εἰδομένη ἠμὲν δέμας ἠδὲ καὶ αὐδήν. |
| 504 | Primary τὴν μὲν ἰδὼν γήθησε πολύτλας δῖος Ὀδυσσεύς· |
| 505 | Primary αἶψα δὲ Τηλέμαχον προσεφώνεεν ὃν φίλον υἱόν· |
| 506 | Primary Τηλέμαχʼ, ἤδη μὲν τόδε γʼ εἴσεαι αὐτὸς ἐπελθών, |
| 507 | Primary ἀνδρῶν μαρναμένων ἵνα τε κρίνονται ἄριστοι, |
| 508 | Primary μή τι καταισχύνειν πατέρων γένος, οἳ τὸ πάρος περ |
| 509 | Primary ἀλκῇ τʼ ἠνορέῃ τε κεκάσμεθα πᾶσαν ἐπʼ αἶαν. |
| 510 | Primary τὸν δʼ αὖ Τηλέμαχος πεπνυμένος ἀντίον ηὔδα· |
| 511 | Primary ὄψεαι, αἴ κʼ ἐθέλῃσθα, πάτερ φίλε, τῷδʼ ἐπὶ θυμῷ |
| 512 | Primary οὔ τι καταισχύνοντα τεὸν γένος, ὡς ἀγορεύεις. |
| 513 | Primary ὣς φάτο, Λαέρτης δʼ ἐχάρη καὶ μῦθον ἔειπε· |
| 514 | Primary τίς νύ μοι ἡμέρη ἥδε, θεοὶ φίλοι; ἦ μάλα χαίρω· |
| 515 | Primary υἱός θʼ υἱωνός τʼ ἀρετῆς πέρι δῆριν ἔχουσιν. |
| 516 | Primary τὸν δὲ παρισταμένη προσέφη γλαυκῶπις Ἀθήνη· |
| 517 | Primary ὦ Ἀρκεισιάδη, πάντων πολὺ φίλταθʼ ἑταίρων, |
| 518 | Primary εὐξάμενος κούρῃ γλαυκώπιδι καὶ Διὶ πατρί, |
| 519 | Primary αἶψα μαλʼ ἀμπεπαλὼν προΐει δολιχόσκιον ἔγχος. |
| 520 | Primary ὣς φάτο, καί ῥʼ ἔμπνευσε μένος μέγα Παλλὰς Ἀθήνη |
| 521 | Primary εὐξάμενος δʼ ἄρʼ ἔπειτα Διὸς κούρῃ μεγάλοιο, |
| 522 | Primary αἶψα μάλʼ ἀμπεπαλὼν προΐει δολιχόσκιον ἔγχος, |
| 523 | Primary καὶ βάλεν Εὐπείθεα κόρυθος διὰ χαλκοπαρῄου. |
| 524 | Primary ἡ δʼ οὐκ ἔγχος ἔρυτο, διαπρὸ δὲ εἴσατο χαλκός, |
| 525 | Primary δούπησεν δὲ πεσών, ἀράβησε δὲ τεύχεʼ ἐπʼ αὐτῷ. |
| 526 | Primary ἐν δʼ ἔπεσον προμάχοις Ὀδυσεὺς καὶ φαίδιμος υἱός, |
| 527 | Primary τύπτον δὲ ξίφεσίν τε καὶ ἔγχεσιν ἀμφιγύοισι. |
| 528 | Primary καί νύ κε δὴ πάντας ὄλεσαν καὶ ἔθηκαν ἀνόστους, |
| 529 | Primary εἰ μὴ Ἀθηναίη, κούρη Διὸς αἰγιόχοιο, |
| 530 | Primary ἤϋσεν φωνῇ, κατὰ ἔσχεθε λαὸν ἅπαντα. |
| 531 | Primary ἴσχεσθε πτολέμου, Ἰθακήσιοι, ἀργαλέοιο, |
| 532 | Primary ὥς κεν ἀναιμωτί γε διακρινθῆτε τάχιστα. |
| 533 | Primary ὣς φάτʼ Ἀθηναίη, τοὺς δὲ χλωρὸν δέος εἷλεν· |
| 534 | Primary τῶν δʼ ἄρα δεισάντων ἐκ χειρῶν ἔπτατο τεύχεα, |
| 535 | Primary πάντα δʼ ἐπὶ χθονὶ πῖπτε, θεᾶς ὄπα φωνησάσης· |
| 536 | Primary πρὸς δὲ πόλιν τρωπῶντο λιλαιόμενοι βιότοιο. |
| 537 | Primary σμερδαλέον δʼ ἐβόησε πολύτλας δῖος Ὀδυσσεύς, |
| 538 | Primary οἴμησεν δὲ ἀλεὶς ὥς τʼ αἰετὸς ὑψιπετήεις. |
| 539 | Primary καὶ τότε δὴ Κρονίδης ἀφίει ψολόεντα κεραυνόν, |
| 540 | Primary κὰδ δʼ ἔπεσε πρόσθε γλαυκώπιδος ὀβριμοπάτρης. |
| 541 | Primary δὴ τότʼ Ὀδυσσῆα προσέφη γλαυκῶπις Ἀθήνη· |
| 542 | Primary διογενὲς Λαερτιάδη, πολυμήχανʼ Ὀδυσσεῦ, |
| 543 | Primary ἴσχεο, παῦε δὲ νεῖκος ὁμοιΐου πολέμοιο, |
| 544 | Primary μή πως τοι Κρονίδης κεχολώσεται εὐρύοπα Ζεύς. |
| 545 | Primary ὣς φάτʼ Ἀθηναίη, ὁ δʼ ἐπείθετο, χαῖρε δὲ θυμῷ. |
| 546 | Primary ὅρκια δʼ αὖ κατόπισθε μετʼ ἀμφοτέροισιν ἔθηκεν |
| 547 | Primary Παλλὰς Ἀθηναίη, κούρη Διὸς αἰγιόχοιο, |
| 548 | Primary Μέντορι εἰδομένη ἠμὲν δέμας ἠδὲ καὶ αὐδήν. |