Reader
Reader | Sibylline Oracles, Book 1
Sibylline Oracles
Sibylline tradition
Text
Position
Line 0 of 400
Waypoints
| Line Ref | Greek source text | Ancient Greek |
|---|---|
| 0 | Primary Οἱ Σιβυλλιακοὶ χρησμοί· Ἐκ τοῦ πρώτου λόγου |
| 1 | Primary Ἀρχομένη πρώτης γενεᾶς μερόπων ἀνθρώπων |
| 2 | Primary ἄχρις ἐπ᾽ ἐσχατίῃσι προφητεύσω τὰ ἕκαστα, |
| 3 | Primary ὁππόσα πρὶν γέγονεν, πόσα δ᾽ ἐστίν, ὁπόσσα δὲ μέλλει |
| 4 | Primary ἔσσεσθαι κόσμῳ διὰ δυσσεβίας ἀνθρώπων. |
| 5 | Primary πρῶτον δὴ κέλεταί με λέγειν θεὸς ὡς ἐγενήθη |
| 6 | Primary ἀτρεκέως κόσμος. σὺ δέ, ποικίλε θνητέ, πίφασκε |
| 7 | Primary νουνεχέως, ἵνα μήποτ᾽ ἐμῶν ἐφετμῶν ἀμελήσῃς, |
| 8 | Primary ὕψιστον βασιλῆα, ὃς ἔκτισε κόσμον ἅπαντα |
| 9 | Primary εἴπας, “γεινάσθω” καὶ ἐγείνατο. ἥδρασε γὰρ γῆν |
| 10 | Primary Ταρτάρῳ ἀμφιβαλὼν καὶ φῶς γλυκὺ αὐτὸς ἔδωκεν· |
| 11 | Primary οὐρανὸν ὕψωσεν, γλαυκὴν δ᾽ ἥπλωσε θάλασσαν, |
| 12 | Primary καὶ πόλον ἐστεφάνωσεν ἅλις πυριλαμπέσιν ἄστροις |
| 13 | Primary καὶ γαῖαν κόσμησε φυτοῖς, ποταμοῖσι δὲ πόντον |
| 14 | Primary χευάμενος ἐκέρασσε καὶ ἀέρι μῖξεν ἀυτμάς |
| 15 | Primary καὶ νέφεα δροσόεντα· τιθεὶς ἄρα καὶ γένος ἄλλο |
| 16 | Primary ἰχθύας ἐν πελάγεσσι καὶ ὄρνεα δῶκεν ἀήταις, |
| 17 | Primary ὕλαις δ᾽ αὖ θῆρας λασιαύχενας ἠδὲ δράκοντας |
| 18 | Primary ἑρπυστὰς { γαίῃ }, καὶ πάνθ᾽ ὅσα νῦν καθορᾶται, |
| 19 | Primary αὐτὸς ταῦτ᾽ ἐποίησε λόγῳ καὶ πάντ᾽ ἐγενήθη |
| 20 | Primary ὦκα καὶ ἀτρεκέως· ὅδε γὰρ πέλετ᾽ αὐτολόχευτος, |
| 21 | Primary οὐρανόθεν καθορῶν· ὑπὸ { τῷ } τετέλεστο δὲ κόσμος. |
| 22 | Primary καὶ τότε δὴ μετέπειτα πλάσεν πάλιν ἔμπνοον ἔργον |
| 23 | Primary εἰκόνος ἐξ ἰδίης ἀπομαξάμενος νέον ἄνδρα |
| 24 | Primary καλὸν θεσπέσιον, τὸν δὴ κέλετ᾽ ἐν παραδείσῳ |
| 25 | Primary ἀμβροσίῳ ναίειν, ὥς οἱ καλὰ ἔργα μεμήλῃ. |
| 26 | Primary αὐτὰρ ὃ μοῦνος ἐὼν παραδείσου ἐριθηλέι κήπῳ |
| 27 | Primary προσλαλιὴν ποθέεσκε καὶ ηὔχετο εἶδος ἀθρῆσαι |
| 28 | Primary ἄλλ᾽ οἷον αὐτὸς ἔχεν. τοῦ δὴ θεὸς αὐτὸς ἀπούρας |
| 29 | Primary ἐκ λαπάρης ὀστοῦν ἐποιήσατο Εὖαν ἀγητήν. |
| 30 | Primary κουριδίην ἄλοχον, ἣν δὴ πόρεν ἐν παραδείσῳ |
| 31 | Primary τούτῳ συνναίειν. ὃ δέ μιν κατιδὼν μέγα θυμῷ |
| 32 | Primary θαῦμ᾽ ἔχεν ἐξαίφνης, κεχαρημένος, οἷον ὁρᾶτο |
| 33 | Primary ἀντίτυπον μίμημα· σοφοῖς δ᾽ ἠμείβετο μύθοις |
| 34 | Primary αὐτομάτοις ῥείουσι· θεῷ γὰρ πάντ᾽ ἐμεμήλει. |
| 35 | Primary οὔτε γὰρ ἀκρασίῃ νόον ἔσκεπον οὔτε μὲν αἰδῶ |
| 36 | Primary εἶχον, ἀλλ᾽ ἦσαν κραδίῃς ἀπάνευθε κακοῖο, |
| 37 | Primary χὡς θῆρες βαίνεσκον ἀποσκεπέεσσι μέλεσσιν. |
| 38 | Primary τοῖσι δὲ καὶ μετέπειτα θεὸς ἐφετμὰς ἀγορεύσας |
| 39 | Primary δεῖξεν τοῦ δένδρου μὴ ψαῦσαι· τοὺς δὲ μάλ᾽ αἰνός |
| 40 | Primary ἐξαπάτησεν ὄφις δολίως ἐπὶ μοῖραν ἀπελθεῖν |
| 41 | Primary τοῦ θανάτου γνῶσίν τε λαβεῖν ἀγαθοῦ τε κακοῦ τε. |
| 42 | Primary ἀλλὰ γυνὴ πρώτη προδότις γείνατ᾽ ἐκείνῳ, |
| 43 | Primary ἣ δῶκεν, τοῦτον δ᾽ ἀδαῆ πείθεσκεν ἁμαρτεῖν. |
| 44 | Primary ὃς δὲ γυναικὸς ἔπεσσι πεπεισμένος ἐξελάθεσκεν |
| 45 | Primary ἀθανάτου κτίστου, σαφέων δ᾽ ἀμέλησεν ἐφετμῶν. |
| 46 | Primary τοὔνεκεν ἀντ᾽ ἀγαθοῖο λάβον κακόν, οἷον ἔπραξαν. |
| 47 | Primary καὶ τότε δὴ γλυκερῆς συκῆς πέταλ᾽ ἀμπείραντες |
| 48 | Primary ἐσθῆτας τεῦξαν καὶ ἐπ᾽ ἀλλήλοισιν ἔθηκαν |
| 49 | Primary μήδεά τ᾽ ἀμφεκάλυψαν, ἐπεί σφισιν ἤιεν αἰδώς. |
| 50 | Primary τοῖσιν δ᾽ ἀθάνατος κότον ἔνθετο κἄβαλεν ἔξω |
| 51 | Primary ἀθανάτων χώρου. τόδε γὰρ τετελεσμένον ἦεν |
| 52 | Primary θνητῷ ἐνὶ χώρῳ μεῖναι, ἐπεὶ οὐκ ἐφύλαξαν |
| 53 | Primary ἀθανάτου μεγάλοιο θεοῦ λόγον εἰσαΐσαντες. |
| 54 | Primary οἳ δ᾽ ἄφαρ ἐξελθόντες ἐπὶ ζείδωρον ἄρουραν |
| 55 | Primary δάκρυσι καὶ στοναχαῖς δεύοντο· ἔπειτα δὲ τοῖσιν |
| 56 | Primary ἀθάνατος θεὸς αὐτὸς ἐπὶ προφερέστερον εἶπεν· |
| 57 | Primary "αὔξετε, πληθύνεσθε καὶ ἐργάζεσθ᾽ ἐπὶ γαίης |
| 58 | Primary ἐντέχνως, ἵν᾽ ἔχητε τροφῆς κόρον ἱδρώοντες." |
| 59 | Primary ὣς φάτο· τῆς δ᾽ ἀπάτης τὸν ἐπαίτιον ἑρπυστῆρα |
| 60 | Primary νηδύι καὶ κενεῶνι ποιήσατο γαῖαν ἐρείδειν |
| 61 | Primary πικρῶς ἐξελάσας· δεινὴν δ᾽ ἔχθραν προΐαψεν |
| 62 | Primary ἐν μέσῳ ἀλλήλων· καὶ ὃ μὲν κεφαλὴν προφυλάσσει |
| 63 | Primary σῴζειν, ὃς δὲ πτέρναν, ἐπεὶ θάνατός γε πάρεστιν |
| 64 | Primary πλησίον ἀνθρώπων καὶ ἰοβόλων κακοβούλων. |
| 65 | Primary καὶ τότε δὴ γενεὴ πληθύνετο, ὡς ἐκέλευσεν |
| 66 | Primary αὐτὸς ὁ παντοκράτωρ, καὶ αὔξανεν ἄλλος ἐπ᾽ ἄλλῳ |
| 67 | Primary λαὸς ἀπειρέσιος· οἴκους δὲ μὲν ἐξήσκησαν |
| 68 | Primary παντοίους ἠδ᾽ αὖτε πόλεις καὶ τείχε᾽ ἐποίουν |
| 69 | Primary εὖ καὶ ἐπισταμένως· οἷσιν πολυχρόνιον ἦμαρ |
| 70 | Primary ὤπασεν εἰς ζωὴν πολυήρατον· οὐ γὰρ ἀνίαις |
| 71 | Primary τειρόμενοι θνῇσκον, ἀλλ᾽ ὡς δεδμημένοι ὕπνῳ· |
| 72 | Primary ὄλβιοι οἱ μέροπες μεγαλήτορες, οὓς ἐφίλησεν |
| 73 | Primary σωτὴρ ἀθάνατος βασιλεὺς θεός. ἀλλὰ καὶ αὐτοί |
| 74 | Primary ἤλιτον ἀφροσύνῃ βεβολημένοι. οἳ γὰρ ἀναιδῶς |
| 75 | Primary ἐξεγέλων πατέρας καὶ μητέρας ἠτίμαζον, |
| 76 | Primary γνωστοὺς δ᾽ οὐ γίνωσκον ἀδελφειῶν ἐπίβουλοι. |
| 77 | Primary ἦσαν δ᾽ ἂρ μιαροὶ κεκορεσμένοι αἵματι φωτῶν |
| 78 | Primary καὶ πολέμους ἐποίουν. ἐπὶ δ᾽ αὐτοὺς ἤλυθεν ἄτη |
| 79 | Primary ὑστάτη οὐρανόθεν βεβολημένη, ἣ βιότοιο |
| 80 | Primary δεινοὺς ἐξεῖλεν· τοὺς δ᾽ αὖ ὑπεδέξατο Ἅιδης· |
| 81 | Primary Ἅιδην δ᾽ αὖτ᾽ ἐκάλεσσαν, ἐπεὶ πρῶτος μόλεν Ἀδάμ |
| 82 | Primary γευσάμενος θανάτου, γαίη δέ μιν ἀμφεκάλυψεν. |
| 83 | Primary τοὔνεκα δὴ πάντες οἱ ἐπιχθόνιοι γεγαῶτες |
| 84 | Primary ἀνέρες εἰν Ἀίδαο δόμοις ἰέναι καλέονται. |
| 85 | Primary ἀλλ᾽ οὗτοι πάντες καὶ εἰν Ἀίδαο μολόντες |
| 86 | Primary τιμὴν ἔσχηκαν, [καὶ] ἐπεὶ πρῶτον γένος ἦσαν. |
| 87 | Primary αὐτὰρ ἐπεὶ τούτους ὑπεδέξατο, δεύτερον αὖτις |
| 88 | Primary τῶν καταλειφθέντων [τε] δικαιοτάτων ἀνθρώπων |
| 89 | Primary ἄλλο γένος τεῦξεν πολυποίκιλον, οἷς ἐμεμήλει |
| 90 | Primary ἔργ᾽ ἐρατὰ σπουδαί τε καλαὶ καὶ ὑπείροχος αἰδώς |
| 91 | Primary καὶ πυκινὴ σοφίη· τέχνας δὲ μὲν ἐξήσκησαν |
| 92 | Primary παντοίας εὑρόντες ἀμηχανίαις ἐπινοίας. |
| 93 | Primary καί τις μὲν γαίην ἀρότροις ἐξεῦρε γεωργεῖν, |
| 94 | Primary ἄλλος τεκταίνειν, ἄλλῳ δὲ πλέειν μεμέλητο, |
| 95 | Primary ἄλλῳ δ᾽ ἀστρονομεῖν καὶ ὀνειροπολεῖν τὰ πετεινά, |
| 96 | Primary φαρμακίη δ᾽ ἄλλῳ, αὐτὰρ μαγικὴ πάλιν ἄλλῳ· |
| 97 | Primary ἄλλοι δ᾽ ἄλλα ἕκαστα μεμηλότα τεχνώοντο, |
| 98 | Primary Γρήγοροι ἀλφηστῆρες, ἐπωνυμίης μετέχοντες |
| 99 | Primary ταύτης, ὅττι φρεσὶν ἀκοίμητον νόον εἶχον |
| 100 | Primary ἄπληστόν τε δέμας· στιβαροὶ μεγάλῳ ἐπὶ εἴδει |
| 101 | Primary ἦσαν· ὅμως δ᾽ ἔμολον ὑπὸ ταρτάριον δόμον αἰνόν, |
| 102 | Primary δεσμοῖς ἀρρήκτοις πεφυλαγμένοι ἐξαποτῖσαι |
| 103 | Primary εἰς γένναν μαλεροῦ λάβρου πυρὸς ἀκαμάτοιο. |
| 104 | Primary τῶν δὴ καὶ μετέπειτα πάλιν γένος ὀμβριμόθυμον |
| 105 | Primary ἐξεφάνη τρίτατον ὑπερφιάλων ἀνθρώπων |
| 106 | Primary δεινῶν, οἳ κακὰ πολλὰ παρὰ σφίσιν ἐξεπονοῦντο. |
| 107 | Primary καὶ τούσδ᾽ ὑσμῖναί { τ᾽ } ἀνδροκτασίαι τε μάχαι τε |
| 108 | Primary συνεχέως ὤλεσκον ὑπέρβιον ἦτορ ἔχοντας. |
| 109 | Primary ἐκ τῶν δὴ μετὰ ταῦτα κατήλυθεν ὀψιτέλεστον |
| 110 | Primary ὁπλότατον γένος ἄλλο μιαιφόνον ἀκριτόβουλον |
| 111 | Primary ἀνδρῶν ἐν τετράτῃ γενεῇ· οἳ πολλὰ χέεσκον |
| 112 | Primary αἵματα οὔτε θεὸν δειδιότες οὔτ᾽ ἀνθρώπους |
| 113 | Primary αἰδόμενοι· μάλα γάρ τοι ἐπ᾽ αὐτοῖσιν βεβόλητο |
| 114 | Primary οἰστρομανὴς μῆνις καὶ δυσσεβίη ἀλεγεινή. |
| 115 | Primary καὶ τοὺς μὲν πόλεμοί τ᾽ ἀνδροκτασίαι τε μάχαι τε |
| 116 | Primary εἰς ἔρεβος προΐαψαν οἰζυρούς περ ἐόντας |
| 117 | Primary ἄνδρας δυσσεβέας. τοὺς δ᾽ αὖ μετόπισθε χόλοισιν |
| 118 | Primary οὐράνιος θεὸς αὐτὸς ἑοῦ μετεθήκατο κόσμου |
| 119 | Primary Ταρτάρῳ ἀμφιβαλὼν μεγάλῳ ὑπὸ πυθμένι γαίης. |
| 120 | Primary καὶ πάλιν ἄλλο γένος πολὺ χειρότερον μετόπισθεν |
| 121 | Primary ἀνθρώπων ποίησ᾽, οἷς οὐκ ἀγαθὸν μετέπειτα |
| 122 | Primary ἀθάνατος θεὸς τεῦξεν, ἐπεὶ κακὰ πόλλ᾽ ἐπονοῦντο. |
| 123 | Primary οἳ γὰρ ὑβριστῆρες πολλῷ πλέον ἢ ὅτ᾽ ἐκεῖνοι |
| 124 | Primary Γίγαντες σκολιοὶ μιαρῶς δύσφημα χέοντες. |
| 125 | Primary μοῦνος δ᾽ ἐν πάντεσσι δικαιότατος καὶ ἀληθής |
| 126 | Primary ἦν Νῶε, πιστότατος καλοῖς τ᾽ ἔργοισι μεμηλώς. |
| 127 | Primary καὶ τῷ μὲν θεὸς αὐτὸς ἀπ᾽ οὐρανόθεν φάτο τοῖα· |
| 128 | Primary "Νῶε, δέμας θάρσυνον ἑὸν λαοῖσί τε πᾶσιν |
| 129 | Primary κήρυξον μετάνοιαν, ὅπως σωθῶσιν ἅπαντες. |
| 130 | Primary ἢν δέ γε οὐκ ἀλέγωσιν ἀναιδέα θυμὸν ἔχοντες, |
| 131 | Primary πᾶν γένος ἐξολέσω μεγάλοις ὑδάτων κατακλυσμοῖς. |
| 132 | Primary σοὶ δ᾽ ὦκ᾽ ἐν ῥίζῃσιν ἀδιψήτοισι τεθηλός |
| 133 | Primary δουράτεον κέλομαι δῶμ᾽ ἄφθιτον ἀσκήσασθαι. |
| 134 | Primary θήσω δ᾽ ἐν στήθεσσι νόον πυκινὴν δέ τε τέχνην |
| 135 | Primary καὶ μέτρα κατὰ κόλπον· ἐμοὶ δέ τε πάντα μελήσει, |
| 136 | Primary ὥστε σε σωθῆναι καὶ ὅσοι σὺν σοὶ ναίουσιν. |
| 137 | Primary [εἰμὶ δ᾽ ἔγωγε ὁ ὤν, σὺ δ᾽ ἐνὶ φρεσὶ σῇσι νόησον· |
| 138 | Primary οὐρανὸν ἐνδέδυμαι, περιβέβλημαι δὲ θάλασσαν, |
| 139 | Primary γαῖα δέ μοι στήριγμα ποδῶν, περὶ σῶμα κέχυται |
| 140 | Primary ἀὴρ ἠδ᾽ ἄστρων με χορὸς περιδέδρομε πάντη. |
| 141 | Primary ἐννέα γράμματ᾽ ἔχω· τετρασύλλαβός εἰμι· νόει με· |
| 142 | Primary αἱ τρεῖς αἱ πρῶται δύο γράμματ᾽ ἔχουσιν ἑκάστη, |
| 143 | Primary ἡ λοιπὴ δὲ τὰ λοιπὰ καί εἰσιν ἄφωνα τὰ πέντε· |
| 144 | Primary τοῦ παντὸς δ᾽ ἀριθμοῦ ἑκατοντάδες εἰσὶ δὶς ὀκτώ |
| 145 | Primary καὶ τρεῖς, τρὶς δεκάδες σύν γ᾽ ἑπτά. γνοὺς δὲ τίς εἰμι |
| 146 | Primary οὐκ ἀμύητος ἔσῃ τῆς παρ᾽ ἐμοὶ σοφίης."] |
| 147 | Primary ὣς φάτο· τὸν δὲ τρόμος λάβε μυρίος, οἷον ἄκουσεν. |
| 148 | Primary καὶ τότε δὴ νοερῶς τεχνησάμενος τὰ ἕκαστα |
| 149 | Primary λαοὺς {ἐλ}λιτάνευε, λόγων δ᾽ ἐξήρχετο τοίων· |
| 150 | Primary "ἄνδρες ἀπιστοκόροι, μεγάλῳ βεβολημένοι οἴστρῳ, |
| 151 | Primary οὐ λήσει θεὸν ὅσσ᾽ ἐπράξατε· πάντα γὰρ οἶδεν |
| 152 | Primary ἀθάνατος σωτὴρ πανεπίσκοπος, ὅς μ᾽ ἐκέλευσεν |
| 153 | Primary ἀγγέλλειν ὑμῖν, ἵνα μὴ φρεσὶν ἐξαπόλησθε. |
| 154 | Primary νήψατε, τὰς κακίας ἀποκόψατε, μηδὲ βιαίως |
| 155 | Primary ἀλλήλοις μάρνασθε μιαιφόνον ἦτορ ἔχοντες, |
| 156 | Primary αἵμασιν ἀνδρομέοις πολλὴν γαῖαν ἀρδεύοντες. |
| 157 | Primary αἰδέσθητε, βροτοί, τὸν ὑπερμεγέθη καὶ ἄτρεστον |
| 158 | Primary οὐράνιον κτίστην, θεὸν ἄφθιτον, ὃς πόλον οἰκεῖ, |
| 159 | Primary καὶ τοῦτον πάντες λιτανεύσατε — χρηστὸς ὑπάρχει — |
| 160 | Primary τοῦτον ὑπὲρ ζωῆς πόλεων κόσμοιό τε παντός |
| 161 | Primary τετραπόδων πτηνῶν θ᾽, ὡς ἵλεως ἔσσεθ᾽ ἅπασιν. |
| 162 | Primary ἔσται γὰρ ὅτε κόσμος ὅλος ἀπερείσιος ἀνδρῶν |
| 163 | Primary ὕδασιν ὀλλύμενος φοβερὰν ὀλολύξετ᾽ ἀοιδήν. |
| 164 | Primary ἔσται δ᾽ ἐξαπίνης ἀὴρ ἀκατάστατος ὑμῖν |
| 165 | Primary καὶ χόλος οὐρανόθεν μεγάλου θεοῦ ἥξει ἐφ᾽ ὑμᾶς. |
| 166 | Primary ἔσται δ᾽ ἀτρεκέως, ὅτ᾽ ἐς ἀνθρώπους προϊάψει ― |
| 167 | Primary σωτὴρ ἀθάνατος, ἂν μὴ θεὸν ἱλάξησθε |
| 168 | Primary καὶ μετάνοιαν ἔχητ᾽ ἀπὸ νῦν, καὶ μηκέτι μηδέν |
| 169 | Primary δύσκολον ἠὲ κακόν γ᾽ ἀθεμίστως ἄλλος ἐπ᾽ ἄλλῳ |
| 170 | Primary πράττῃ, ἀλλ᾽ ὁσίῳ βιότῳ πεφυλαγμένος εἴη." |
| 171 | Primary οἳ δέ μιν εἰσαΐοντες ἐμυκτήριζον ἕκαστος |
| 172 | Primary ἔκφρονα κικλήσκοντες, ἀτὰρ μεμανημένον ἄνδρα. |
| 173 | Primary καὶ τότε δ᾽ αὖ, πάλιν αὖθις ἀνίαχε Νῶε ἀοιδήν· |
| 174 | Primary "ὦ μέγα δείλαιοι κακοήτορες ἄστατοι ἄνδρες, |
| 175 | Primary αἰδοίην προλιπόντες, ἀναιδείην ποθέοντες, |
| 176 | Primary ἀστασίῃσι τύραννοι ἁμαρτωλοί τε βίαιοι |
| 177 | Primary ψεῦσται ἀπιστοκόροι κακοπράγμονες οὐδὲν ἀληθεῖς |
| 178 | Primary λεκτροκλόποι θ᾽ εὑρεσσίλογοι δύσφημα χέοντες, |
| 179 | Primary οὐκ ὀργήν τε θεοῦ δειδιότες ὑψίστοιο, |
| 180 | Primary εἰς γενεὴν πέμπτην πεφυλαγμένοι ἐξαποτῖσαι. |
| 181 | Primary οὐ κλαίετ᾽ ἄλλυδις ἄλλον, ἀπηνέες, ἀλλὰ γελᾶτε· |
| 182 | Primary σαρδόνιον μείδημα γελάσσετε, ὁππόταν ἥξῃ |
| 183 | Primary τοῦτο, λέγω, τὸ θεοῦ φοβερὸν καὶ ἐπήλυτον ὕδωρ. |
| 184 | Primary [ὁππότε κεν Ῥείης μιερὸν γένος ἐν χθονὶ κῦμα |
| 185 | Primary ἀέναον ῥίζῃς ἐν ἀδιψήτοισι τεθηλός |
| 186 | Primary αὐτόπρεμνον ἄιστον ἰῇ ἐν νυκτὶ γένηται, |
| 187 | Primary καὶ πόλεις αὐτάνδρους σεισίχθων ἐννοσίγαιος |
| 188 | Primary κευθμῶνας γαίης σκεδάσει καὶ τείχεα λύσει.] |
| 189 | Primary καὶ τότε κόσμος ἅπας ἀπειρεσίων ἀνθρώπων |
| 190 | Primary θνήξεται. αὐτὰρ ἐγὼ πόσα πενθήσω, πόσα κλαύσω |
| 191 | Primary οἴκῳ δουρατέῳ, πόσα δάκρυα κύμασι μίξω; |
| 192 | Primary ἢν γὰρ ἐπέλθῃ τοῦτο θεοῦ κεκελευσμένον ὕδωρ, |
| 193 | Primary πλεύσει γῆ, πλεύσουσιν ὄρη, πλεύσει δὲ καὶ αἰθήρ, |
| 194 | Primary ὕδωρ ἔσται ἅπαντα καὶ ὕδασι πάντ᾽ ἀπολεῖται. |
| 195 | Primary στήσονται δ᾽ ἄνεμοι καὶ δεύτερος ἔσσεται αἰών. |
| 196 | Primary ὦ Φρυγίη, πρώτη δ᾽ ἀναδύσῃ ἀφ᾽ ὕδατος ἄκρου· |
| 197 | Primary πρώτη δ᾽ αὖ θρέψεις γενεὴν ἑτέρην ἀνθρώπων |
| 198 | Primary ἀρχομένην αὖθις· ἔσσῃ δὲ τροφὸς περὶ πάντων." |
| 199 | Primary ἀλλ᾽ ὅτε δὴ γενεῇ τὰ μάτην ἐλάλησεν ἀθέσμῳ, |
| 200 | Primary Ὕψιστος ὤφθη, πάλι δ᾽ ἴαχε φώνησέν τε· |
| 201 | Primary "ἤδη καιρὸς ἔπεστι, Νῶε, τὰ ἕκαστ᾽ ἀγορεύειν, |
| 202 | Primary ὅσσα τε ἤματι τῷ σοι ὑπέστην καὶ κατένευσα, |
| 203 | Primary πάντα μάλ᾽, ὅσσα πάρος γενεαὶ κακὰ μυρί᾽ ἔπραξαν, |
| 204 | Primary ῥέξαι ἀπειρεσίῳ κόσμῳ διὰ λαὸν ἀπειθῆ. |
| 205 | Primary ἀλλὰ τάχει ἔμβηθι σὺν υἱέσιν ἠδὲ δάμαρτι |
| 206 | Primary καὶ νύμφαις. καλέσον δ᾽, ὁπόσοις κέλομαι ἀγορεύειν, |
| 207 | Primary τετραπόδων φῦλα καὶ ἑρπετὰ καὶ πετεηνά. |
| 208 | Primary τοῖσι δ᾽ ἐνὶ στήθεσσιν ἐγὼ μετέπειτα βαλοῦμαι |
| 209 | Primary προφρονέως ἰέναι, ὁπόσων ζωὴν ἐπιτείλω." |
| 210 | Primary ὣς ἔφατ᾽· αὐτὰρ ὃ βῆ, μέγα δ᾽ ἴαχε φώνησέν τε. |
| 211 | Primary καὶ τότε δ᾽ αὖ ἄλοχος καὶ υἱέες ἠδέ τε νύμφαι |
| 212 | Primary οἴκῳ δουρατέῳ ἐσελήλυθαν· αὐτὰρ ἔπειτα |
| 213 | Primary βῆσαν τἆλλα ἕκασθ᾽, ὅσα περ θεὸς ἤθελε *ῥέξαι.* |
| 214 | Primary ἀλλ᾽ ὅτε δ᾽ ἁρμονία κληὶς περὶ πῶμ᾽ ἐγενήθη |
| 215 | Primary εἰς πλάγιον ἁρμοσθεῖσα περιξεστῷ ἐνὶ τοίχῳ, |
| 216 | Primary δὴ τότ᾽ ἐπουρανίοιο θεοῦ ἐτελείετο βουλή. |
| 217 | Primary σὺν δ᾽ ἔβαλεν νεφέλας, κρύψεν δὲ πυραυγέα δίσκον, |
| 218 | Primary σὺν δ᾽ ἄστροις μήνην καὶ οὐράνιον στεφάνωμα, |
| 219 | Primary πάντα περισκεπάσας μεγάλ᾽ ἔκτυπε, δεῖμα βροτοῖσιν, |
| 220 | Primary πρηστῆρας πέμπων· συνεπηγείροντο δ᾽ ἀῆται |
| 221 | Primary πάντες καὶ ὑδάτων φλέβες ἐλύοντο ἅπασαι |
| 222 | Primary οὐρανόθεν μεγάλων ἀνεοιγομένων καταρακτῶν, |
| 223 | Primary καὶ μυχῶν γαίης καὶ ἀβύσσου ἀκαμάτοιο |
| 224 | Primary ὕδατα μυριόεντα φάνη καὶ γῆ ἐκαλύφθη |
| 225 | Primary πᾶσα ἀπειρέσιος. αὐτὸς δ᾽ ἐπενήχετο ὄμβρῳ |
| 226 | Primary οἶκος θεσπέσιος· πολλοῖσι δὲ κύμασι λάβροις |
| 227 | Primary ῥηγνύμενος καὶ νηχόμενος ἀνέμων ὑπὸ ῥιπῆς |
| 228 | Primary ὤρνυτο δειμαλέως· ἔτεμνεν μυρίον ἀφρόν |
| 229 | Primary στείρη κινυμένων ὑδάτων κελαρυζομενάων. |
| 230 | Primary ἀλλ᾽ ὅτε κόσμον ἅπαντα θεὸς κατέκλυσσ᾽ ὑετοῖσιν, |
| 231 | Primary καὶ τότε δ᾽ αὖ Νῶε φρεσὶν ἔνθετο, ὄφρ᾽ ἐσαθρήσῃ |
| 232 | Primary ἀθανάτου βούλησιν ἴδῃ δέ τε νηρέος ᾅδην· |
| 233 | Primary ὦκα δὲ πῶμ᾽ ἀνέῳξε περιξεστοῦ ἀπὸ τοίχου |
| 234 | Primary ἐμπείρως ἁρμοῖσι κατ᾽ ἀντίον ἁρμοσθέντα. |
| 235 | Primary καὶ λεύσας ὑδάτων ἀπειρεσίων πολὺ πλῆθος |
| 236 | Primary πάντοσε * Νῶε ἔμορ * ἐν ὀφθαλμοῖσιν ὁρᾶσθαι, |
| 237 | Primary δεῖμ᾽ ἔχε καὶ κραδίην πάλλεν μέγα. καὶ τότε δ᾽ ἀήρ |
| 238 | Primary βαιὸν στειλάμενος, ἐπεὶ κάμεν ἤμασι πολλοῖς |
| 239 | Primary κόσμον ὅλον δεύων, τότε δείελον οἷά τε χλωρόν |
| 240 | Primary αἱματόεντα πόλον μέγαν τε πυραυγέα δίσκον |
| 241 | Primary δεῖξεν κεκμηκότα· μόλις δ᾽ ἔσχεν Νῶε θάρσος. |
| 242 | Primary καὶ τότε δὴ πελίην οἴην ἀπὸ νόσφι ποιήσας |
| 243 | Primary ἔκβαλεν, ὄφρα γνῷ ἐνὶ φρεσίν, εἴ ποτε γαῖα |
| 244 | Primary φαίνετ᾽ ἔτι στερεή. ἣ δὲ πτερύγεσσι καμοῦσα |
| 245 | Primary πάντα περιπτήσασα, πάλιν τρέπετ᾽· οὔτε γὰρ ὕδωρ |
| 246 | Primary ἦν κοπάσαν, μάλα γάρ τε πεπληρώκει τὰ ἕκαστα. |
| 247 | Primary αὐτὰρ ὃς ἡσυχάσας πάλιν ἤματα πέμπε πέλειαν |
| 248 | Primary αὖτις, ἵνα γνῷ, εἴπερ ἐπαύσατο ὕδατα πολλά. |
| 249 | Primary ἣ δ᾽ ἄρα πωτήεσσα διέπτατο, βῇ δ᾽ ἐπὶ γαῖαν, |
| 250 | Primary βαιὸν δ᾽ ἀμπαύσασα δέμας νοτερῇ ἐπὶ γαίῃ |
| 251 | Primary ἂψ ἐπὶ Νῶε πάλιν δέ τε ἤλυθε, κάρφος ἐλαίας |
| 252 | Primary σῆμα φέρουσα μέγ᾽ ἀγγελίης. θάρσος δ᾽ ἔχε πάντας |
| 253 | Primary καὶ μέγα χάρμ᾽, ὅτι γαῖαν ἐφελπίζεσκον ἀθρῆσαι. |
| 254 | Primary καὶ τότε δὴ μετέπειτ᾽ ἄλλον μελανόπτερον ὄρνιν |
| 255 | Primary τάχος *ὑπεξέπεμπεν*· ὃ δὲ πτερύγεσσι πεποιθώς |
| 256 | Primary προφρονέως πέτατο, γαίῃ δ᾽ ἐλθὼν ἐπέμεινεν. |
| 257 | Primary γνῶ δέ τε Νῶε ὅτι γαῖα πέλει πέλας ἆσσον ἐοῦσα. |
| 258 | Primary ἀλλ᾽ ὅτε δὴ ῥοθίοις ἐπὶ κύμασιν ἔνθα καὶ ἔνθα |
| 259 | Primary ἀμβροσίη τέχνη ἐπενήχετο οἴδμασι πόντου, |
| 260 | Primary πηγνυμένη ὀλίγης ἐπ᾽ ᾐόνος ἐστήρικτο. |
| 261 | Primary ἔστι δέ τι Φρυγίης ἐπ᾽ ἠπείροιο μελαίνης |
| 262 | Primary ἠλίβατον τανύμηκες ὄρος· Ἀραρὰτ δὲ καλεῖται, |
| 263 | Primary ὅττ᾽ ἄρα σωθήσεσθαι ἐπ᾽ αὐτῷ πάντες ἔμελλον, |
| 264 | Primary ἐν τούτῳ μεγάλη δὲ ποθὴ καταθύμιος ἦεν· |
| 265 | Primary ἔνθα φλέβες μεγάλου *ποταμοῦ Μαρσύου* πέφυκαν. |
| 266 | Primary τῷδε κιβωτὸς ἔμεινεν ἐν ὑψηλοῖσι καρήνοις |
| 267 | Primary ληξάντων ὑδάτων, τότε δ᾽ αὖ πάλιν οὐρανόθι πρό |
| 268 | Primary θεσπεσίη μεγάλοιο θεοῦ πάλιν ἴαχε φωνή |
| 269 | Primary τοῖον ἔπος· "Νῶε πεφυλαγμένε πιστὲ δίκαιε, |
| 270 | Primary θαρσαλέως ἔξελθε σὺν υἱέσι καί τε δάμαρτι |
| 271 | Primary καὶ νύμφαις τρισσαῖς καὶ πλήσατε γαῖαν ἅπασαν |
| 272 | Primary αὐξόμενοι πληθυνόμενοι τὰ δίκαια νέμοντες |
| 273 | Primary ἀλλήλοις, γενεαῖς γενεῶν, ἄχρις εἰς κρίσιν ἥξει |
| 274 | Primary πᾶν γένος ἀνθρώπων, ἐπεὶ κρίσις ἔσσεθ᾽ ἅπασιν." |
| 275 | Primary ὣς ἔφατ᾽ ἀμβροσίη φωνή. Νῶε δ᾽ ἀπὸ κοίτης |
| 276 | Primary ᾖσσ᾽ ἀποθαρσήσας ἐπὶ γῆς, υἱοὶ δὲ σὺν αὐτῷ |
| 277 | Primary ἠδὲ δάμαρ νύμφαι τε καὶ ἑρπετὰ καὶ πετεηνά |
| 278 | Primary τετραπόδων θηρῶν τε γένη καὶ τἆλλ᾽ ἅμα πάντα |
| 279 | Primary οἴκου δουρατέου ἐξῄεσαν εἰς ἕνα χῶρον. |
| 280 | Primary καὶ τότε δή τοι Νῶε δικαιότατος ἀνθρώπων |
| 281 | Primary ὄγδοος ἐξῆλθεν δὶς εἴκοσι καὶ μίαν ἠῶ |
| 282 | Primary πληρώσας ὑδάτεσσι θεοῦ μεγάλου διὰ βουλάς. |
| 283 | Primary ἔνθ᾽ αὖτις βιότοιο νέη ἀνέτειλε γενέθλη |
| 284 | Primary χρυσείη πρώτη, ἥτις πέλεθ᾽ ἕκτη, ἀρίστη, |
| 285 | Primary ἐξότε πρωτόπλαστος ἀνὴρ γένετ᾽· οὔνομα δ᾽ αὐτῇ |
| 286 | Primary οὐρανίη, ὅτι πάντα θεῷ μεμελημένη ἔσται. |
| 287 | Primary ὦ γενεῆς ἕκτης πρῶτον γένος, ὦ μέγα χάρμα, |
| 288 | Primary ἧς ἔλαχον μετέπειτα, ὅτ᾽ ἔκφυγον αἰπὺν ὄλεθρον |
| 289 | Primary πολλὰ κλυδωνισθεῖσα *σὺν ἐμῷ πόσει* καὶ δαέρεσσιν |
| 290 | Primary ἠδ᾽ ἑκυρῷ ἑκυρῇ θ᾽ ὁμονύμφοις τ᾽ αἰνὰ παθοῦσα. |
| 291 | Primary ἄρτια δ᾽ αἰνήσω· ἔσται πολυποίκιλον ἄνθος |
| 292 | Primary ἐν συκῇ· μεσάσει δὲ χρόνος· βασιλήιον ἀρχήν |
| 293 | Primary σκηπτροφόρον δ᾽ ἕξει. τρεῖς γὰρ βασιλεῖς μεγάθυμοι, |
| 294 | Primary ἄνδρε δικαιότατοι, μοίρας *δέ τε δηλήσονται *· |
| 295 | Primary πουλυετῆ δ᾽ ἄρξουσι χρόνον τὰ δίκαια νέμοντες |
| 296 | Primary ἀνδράσιν, οἷσι μέμηλε πόνος καὶ ἔργ᾽ ἐρατεινά. |
| 297 | Primary γαίη δ᾽ αὖ καρποῖς ἐπαγάλλεται αὐτομάτοισιν |
| 298 | Primary φυομένη πολλοῖσιν, ὑπερσταχυοῦσα γενέθλῃ. |
| 299 | Primary οἱ δὲ τιθηνευτῆρες ἀγήραοι ἤματα πάντα |
| 300 | Primary ἔσσονται, νόσφιν νούσων κρυερῶν μαλεράων |
| 301 | Primary θνήξονται ὕπνῳ βεβολημένοι, ἐς δ᾽ Ἀχέροντα |
| 302 | Primary εἰν Ἀίδαο δόμοις ἀπελεύσονται καὶ ἐκεῖσε |
| 303 | Primary τιμὴν ἕξουσιν, ἐπεὶ μακάρων γένος ἦσαν, |
| 304 | Primary ὄλβιοι ἀνέρες, οἷς Σαβαὼθ νόον ἐσθλὸν ἔδωκεν, |
| 305 | Primary αὐτὰρ καὶ τούτοισιν ἀεὶ συμφράσσατο βουλάς. |
| 306 | Primary ἀλλ᾽ οὗτοι μάκαρες καὶ εἰν Ἀίδαο μολόντες |
| 307 | Primary ἔσσονται. τότε δ᾽ αὖτε βαρὺ στιβαρὸν μετέπειτα |
| 308 | Primary δεύτερον αὖ γένος ἄλλο χαμαιγενέων ἀνθρώπων, |
| 309 | Primary Τιτήνων. ὅμοιος δὲ τύπος ἐπὶ πᾶσιν ἑκάστων |
| 310 | Primary εἶδος καὶ μέγεθός τε, φυὴ φωνή τε μί᾽ ἔσται, |
| 311 | Primary ὡς πάρος ἐκ πρώτης γενεῆς θεὸς ἐν στήθεσσιν |
| 312 | Primary ἔνθετο. ἀλλὰ καὶ αὐτοὶ ὑπέρβιον ἦτορ ἔχοντες |
| 313 | Primary ὕστατα βουλεύσονται ἐπειγόμενοι πρὸς ὄλεθρον |
| 314 | Primary ἀντίβιον μαχέσασθαι ἐπ᾽ οὐρανῷ ἀστερόεντι. |
| 315 | Primary καὶ τότε δ᾽ ὠκεανοῦ μεγάλου ῥύσις ἔσσετ᾽ ἐν αὐτοῖς |
| 316 | Primary μαινομένων ὑδάτων. ὁ μέγας Σαβαὼθ δὲ χολωθείς |
| 317 | Primary εἴρξει κωλύων, ὅτι μὴ κατακλυσμὸν ὑπέστη |
| 318 | Primary αὖτις ποιήσειν ἐπ᾽ ἀνθρώπους κακοθύμους. |
| 319 | Primary ἀλλ᾽ ὁπόταν ὑδάτων πολλῶν ἀπερείσιον οἶδμα |
| 320 | Primary κύματος ὀρνυμένοιο ἐπ᾽ ἄλλυδις ἄλλο ποιήσει |
| 321 | Primary ὀργῆς παύεσθαι, εἰς ἄλλα τε βένθεα πόντου |
| 322 | Primary μέτρ᾽ ὀλιγώσειεν λιμέσιν καὶ τρηχέσιν ἀκταῖς |
| 323 | Primary ἀμφὶ γαίῃ ὁρίσας ὁ μέγας θεὸς ὑψικέραυνος· |
| 324 | Primary δὴ τότε καὶ μεγάλοιο θεοῦ παῖς ἀνθρώποισιν |
| 325 | Primary ἥξει σαρκοφόρος θνητοῖς ὁμοιούμενος ἐν γῇ, |
| 326 | Primary τέσσαρα φωνήεντα φέρων, τὸ δ᾽ ἄφωνον ἐν αὐτῷ |
| 327 | Primary δισσόν· ἐγὼ δέ κέ τοι ἀριθμόν γ᾽ ὅλον ἐξονομήνω· |
| 328 | Primary ὀκτὼ γὰρ μονάδας, τόσσας δεκάδας δ᾽ ἐπὶ ταύταις |
| 329 | Primary ἠδ᾽ ἑκατοντάδας ὀκτὼ ἀπιστοκόροις ἀνθρώποις |
| 330 | Primary οὔνομα δηλώσει· σὺ δ᾽ ἐνὶ φρεσὶ σῇσι νόησον |
| 331 | Primary ἀθανάτοιο θεοῦ Χριστὸν παῖδ᾽ ὑψίστοιο. |
| 332 | Primary αὐτὸς πληρώσει δὲ θεοῦ νόμον, οὐ καταλύσει, |
| 333 | Primary ἀντίτυπον μίμημα φέρων, καὶ πάντα διδάξει. |
| 334 | Primary τούτῳ προσκομίσουσ᾽ ἱερεῖς χρυσὸν προφέροντες, |
| 335 | Primary σμύρναν ἀτὰρ λίβανον· καὶ γὰρ τάδε πάντα ποιήσει. |
| 336 | Primary ἀλλ᾽ ὁπόταν φωνή τις ἐρημαίης διὰ χώρης |
| 337 | Primary ἥξῃ ἀπαγγέλλουσα βροτοῖς καὶ πᾶσι βοήσῃ |
| 338 | Primary εὐθείας ἀτραποὺς ποιησέμεν ἠδ᾽ ἀπορῖψαι |
| 339 | Primary ἐκ κραδίης κακίας καὶ ὕδασι φωτίζεσθαι |
| 340 | Primary πᾶν δέμας ἀνθρώπων, ἵνα γεννηθέντες ἄνωθεν |
| 341 | Primary μηκέτι μηδὲν ὅλως γε παρεκβαίνωσι δικαίων· |
| 342 | Primary τὴν δ᾽ αὖ βαρβαρόφρων, πεπεδημένος ὀρχηθμοῖσιν, |
| 343 | Primary ἐκκόψας δώσει μισθόν· τότε σῆμα βροτοῖσιν |
| 344 | Primary ἔσσεται ἐξαίφνης, ὁπόταν πεφυλαγμένος ἥξῃ |
| 345 | Primary ἐκ γῆς Αἰγύπτοιο καλὸς λίθος· ἐν δ᾽ ἄρα τούτῳ |
| 346 | Primary λαὸς προσκόψει Ἑβραίων· ἔθνη δ᾽ ἀγεροῦνται |
| 347 | Primary αὐτοῦ ὑφηγήσει· καὶ γὰρ θεὸν ὑψιμέδοντα |
| 348 | Primary γνώσονται διὰ τοῦδε ἀταρπιτὸν ἐν φαῒ κοινῷ. |
| 349 | Primary δείξει γὰρ ζωὴν αἰώνιον ἀνθρώποισιν |
| 350 | Primary ἐκλεκτοῖς, ἀνόμοις δὲ τὸ πῦρ αἰῶσιν ἐποίσει. |
| 351 | Primary καὶ τότε δὴ νοσεροὺς ἰήσεται ἠδ᾽ ἐπιμώμους |
| 352 | Primary πάντας, ὅσοι τούτῳ πίστιν ἐνιποιήσονται. |
| 353 | Primary βλέψουσιν δέ τε τυφλοί, ἀτὰρ βαδίσουσί τε χωλοί, |
| 354 | Primary κωφοί τ᾽ εἰσαΐσουσι, λαλήσουσ᾽ οὐ λαλέοντες. |
| 355 | Primary δαίμονας ἐξελάσει, νεκρῶν δ᾽ ἐπανάστασις ἔσται· |
| 356 | Primary κύματα πεζεύσει καὶ ἐρημαίῳ ἐνὶ χώρῳ |
| 357 | Primary ἐξ ἄρτων πέντε καὶ ἰχθύος εἰναλίοιο |
| 358 | Primary χιλιάδας κορέσει πέντε, τὰ δὲ λείψανα τούτων |
| 359 | Primary δώδεκα πληρώσει κοφίνους εἰς ἐλπίδα λαῶν. ― ― |
| 360 | Primary Καὶ τότε δ᾽ Ἰσραὴλ μεμεθυσμένος οὐχὶ νοήσει, |
| 361 | Primary οὐδὲ μὲν αὖθ᾽ ἀίσει βεβαρημένος οὔασι λεπτοῖς. |
| 362 | Primary ἀλλ᾽ ὁπόταν Ἑβραίοις ἥξῃ χόλος Ὑψίστοιο |
| 363 | Primary οἰστρομανὴς καὶ πίστιν ἀπ᾽ αὐτῶν ἐξαφελεῖται, |
| 364 | Primary οὐρανίου ὅτι παῖδα θεοῦ διεδηλήσαντο, |
| 365 | Primary καὶ τότε δὴ κολάφους καὶ πτύσματα φαρμακόεντα |
| 366 | Primary Ἰσραὴλ δώσει μυσαροῖς ἐνὶ χείλεσι τούτῳ. |
| 367 | Primary εἰς δὲ τὸ βρῶμα χολὴν καὶ εἰς ποτὸν ὄξος ἄκρατον |
| 368 | Primary δυσσεβέως δώσουσι κακῷ βεβολημένοι οἴστρῳ |
| 369 | Primary στήθεα καὶ κραδίην, ἀτὰρ ὄμμασιν οὐκ ἐσορῶντες |
| 370 | Primary τυφλότεροι σπαλάκων, φοβερώτεροι ἑρπυστήρων |
| 371 | Primary θηρῶν ἰοβόλων, βαρέι πεπεδημένοι ὕπνῳ. |
| 372 | Primary ἀλλ᾽ ὅταν ἐκπετάσῃ χεῖρας καὶ πάντα μετρήσῃ |
| 373 | Primary καὶ στέφανον φορέσῃ τὸν ἀκάνθινον ἠδέ τε πλευράν |
| 374 | Primary νύξωσιν καλάμοισιν, ὅτου χάριν ἐν τρισὶν ὥραις |
| 375 | Primary νὺξ ἔσται σκοτόεσσα πελώριος ἤματι μέσσῳ |
| 376 | Primary καὶ τότε δὴ ναὸς Σολομώνιος ἀνθρώποισιν |
| 377 | Primary σῆμα μέγ᾽ ἐκελέσει, ὁπόταν Ἀιδωνέος οἶκον |
| 378 | Primary βήσεται ἀγγέλλων ἐπαναστασίην τεθνεῶσιν. |
| 379 | Primary αὐτὰρ ἐπὴν ἔλθῃ τρισὶν ἤμασιν ἐς φάος αὖτις |
| 380 | Primary καὶ δείξῃ θνητοῖσι τύπον καὶ πάντα διδάξῃ, |
| 381 | Primary ἐν νεφέλαις ἐπιβὰς εἰς οὐρανοῦ οἶκον ὁδεύσει |
| 382 | Primary καλλείψας κόσμῳ εὐαγγελίης διάθημα. |
| 383 | Primary τοῦ καὶ ἐπωνυμίῃ βλαστὸς νέος ἀνθήσειεν |
| 384 | Primary ἐξ ἐθνῶν Μεγάλοιο νόμῳ καθοδηγηθέντων. |
| 385 | Primary ἀλλά γε καὶ μετὰ ταῦτα σοφοὶ καθοδηγοὶ ἔσονται, |
| 386 | Primary καὶ τότε δὴ παῦσις ἔσται μετέπειτα προφητῶν. |
| 387 | Primary ἔνθεν ὅταν Ἑβραῖοι τὸ κακὸν θέρος ἀμήσωνται, |
| 388 | Primary πολλὸν δ᾽ αὖ χρυσόν τε καὶ ἄργυρον ἐξαλαπάξει |
| 389 | Primary Ῥωμαῖος βασιλεύς. μετὰ δ᾽ αὖ βασιληίδες ἄλλαι |
| 390 | Primary συνεχέως ἔσσονται ἀπολλυμένων βασιλειῶν |
| 391 | Primary καὶ θλίψουσι βροτούς. μέγα δ᾽ ἔσσεται ἀνδράσι κείνοις |
| 392 | Primary πτῶμ᾽, ὁπόταν ἄρξωνθ᾽ ὑπερηφανίης ἀδίκοιο. |
| 393 | Primary ἀλλ᾽ ὁπόταν ναὸς Σολομώνιος ἐν χθονὶ δίᾳ |
| 394 | Primary καππέσεται βληθεὶς ὑπ᾽ ἀνδρῶν βαρβαροφώνων |
| 395 | Primary χαλκεοθωρήκων, Ἑβραῖοι δ᾽ ἀπὸ γῆς ἐλάσονται |
| 396 | Primary πλαζόμενοι κεραϊζόμενοι, πολλὴν δέ τοι αἶραν |
| 397 | Primary ἐν σίτῳ μίξουσι, κακὴ στάσις ἔσται ἅπασιν |
| 398 | Primary ἀνδράσιν· αἱ δὲ πόλεις ὑβριζόμεναι παρ᾽ ἕκαστα |
| 399 | Primary ἀλλήλας κλαύσουσιν, ἐπεὶ κακὸν ἤλιτον ἔργον |
| 400 | Primary δεξάμεναι μεγάλοιο θεοῦ χόλον ἐν κόλποισιν. |