Reader
Reader | Sibylline Oracles, Book 2
Sibylline Oracles
Sibylline tradition
Text
Position
Line 1 of 347
Waypoints
| Line Ref | Greek source text | Ancient Greek |
|---|---|
| 1 | Primary Ημος δὴ κατέπαυσε θεὸς πολυπάνσοφον ᾠδήν, |
| 2 | Primary πολλὰ λιταζομένης, καί μοι πάλιν ἐν στήθεσσιν |
| 3 | Primary ἔνθετο θεσπεσίων ἐπέων πολυγηθέα φωνήν. |
| 4 | Primary πᾶν δέμας ἐκπληχθεῖσα τάδ᾽ ἔσπομαι· οὐδὲ γὰρ οἶδα |
| 5 | Primary ὅττι λέγω, κέλεται δὲ θεὸς τὰ ἕκαστ᾽ ἀγορεύειν. |
| 6 | Primary ἀλλ᾽ ὁπόταν ἐπὶ γῆς σεισμοὶ μαλεροί τε κεραυνοί |
| 7 | Primary βρονταί τ᾽ ἀστεροπαί....... τε γῆς ἐρυσίβη |
| 8 | Primary καὶ μανίη θώων τε λύκων { τ᾽}> ἀνδροκτασίαι τε |
| 9 | Primary καὶ φθοραὶ ἀνθρώπων ἢ καὶ βοῶν μυκομενάων |
| 10 | Primary τετραπόδων κτηνῶν τε καὶ οὐρήων ταλαεργῶν |
| 11 | Primary ἠδ᾽ αἰγῶν ὀίων τε· ἔπειτα δὲ χέρσος ἄρουρα |
| 12 | Primary πολλὴ καλλειφθεῖσα γενήσεται ἐξ ἀμελείας |
| 13 | Primary καὶ καρποὶ λείψουσιν, ἐλευθεροπρασία δ᾽ ἔσται |
| 14 | Primary πλείστοις ἐν μερόπεσσι καὶ ἱεροσυλία ναῶν. |
| 15 | Primary δὴ τότε καὶ δεκάτη γενεὴ μετὰ ταῦτα φανεῖται |
| 16 | Primary ἀνθρώπων, ὁπόταν σεισίχθων ἀστεροπητής |
| 17 | Primary εἰδώλων ζῆλον θραύσει λαόν τε τινάξει |
| 18 | Primary Ῥώμης ἑπταλόφοιο, μέγας δέ τε πλοῦτος ὀλεῖται |
| 19 | Primary δαιόμενος πυρὶ πολλῷ ὑπὸ φλογὸς Ἡφαίστοιο. |
| 20 | Primary καὶ τότε δ᾽ αἱματόεσσαι ἀπ᾽ οὐρανίου καταβᾶσαι ― |
| 21 | Primary αὐτὰρ κόσμος ὅλος [τε] ἀπειρεσίων ἀνθρώπων |
| 22 | Primary ἀλλήλους κτείνουσι μεμηνότες, ἐν δὲ κυδοιμῷ |
| 23 | Primary λιμοὺς καὶ λοιμοὺς θήσει θεὸς ἠδὲ κεραυνούς |
| 24 | Primary ἀνθρώποις, οἳ ἄτερθε δίκης κρίνουσι θέμιστας. |
| 25 | Primary λεῖψις δ᾽ ἀνθρώπων ἔσται κατὰ κόσμον ἅπαντα, |
| 26 | Primary ὡς, ἴχνος εἰ κατίδῃ τις ἐπὶ χθονί, θαυμάσσειεν, |
| 27 | Primary ἀνθρώπου. τότε δ᾽ αὖτε μέγας θεὸς αἰθέρι ναίων |
| 28 | Primary ἀνδρῶν εὐσεβέων σωτὴρ κατὰ πάντα γένηται. |
| 29 | Primary καὶ τότε δ᾽ εἰρήνη τε βαθεῖά τε σύνεσις ἔσται, |
| 30 | Primary καὶ γῆ καρποφόρος καρποὺς πάλι πλείονας οἴσει |
| 31 | Primary οὐδὲ μεριζομένη οὐδ᾽ εἰσέτι λατρεύουσα. |
| 32 | Primary πᾶς δὲ λιμήν, πᾶς ὅρμος ἐλεύθερος ἀνθρώποισιν |
| 33 | Primary ἔσσεται, ὡς πάρος ἦεν, ἀναιδείη τ᾽ ἀπολεῖται. |
| 34 | Primary καὶ τότε δὴ μέγα σῆμα θεὸς μετέπειτα ποιήσει· |
| 35 | Primary λάμψει γὰρ στεφάνῳ λαμπρῷ παρομοίιος ἀστήρ |
| 36 | Primary λαμπρὸς παμφαίνων ἀπ᾽ οὐρανοῦ αἰγλήεντος |
| 37 | Primary ἤμασιν οὐκ ὀλίγοις· τότε γὰρ στέφος ἀνθρώποισιν |
| 38 | Primary δείξει ἀπ᾽ οὐρανόθεν ἐναγώνιον ἀθλεύουσιν |
| 39 | Primary καὶ *τόθμαι*· μέγας γὰρ ἀγὼν εἰσελαστικὸς ἔσται |
| 40 | Primary εἰς πόλιν οὐράνιον, οἰκουμενικὸς δέ τε πᾶσιν |
| 41 | Primary ἔσσεται ἀνθρώποισιν ἔχων κλέος ἀθανασίης. |
| 42 | Primary καὶ τότε πᾶς λαὸς ἐπ᾽ ἀθανάτοισιν ἀέθλοις |
| 43 | Primary ἀθλήσει νίκης περικαλλέος· οὐ γὰρ ἀναιδῶς |
| 44 | Primary ἀργυρίου τις ἐκεῖ δύναται στέφος ὠνήσασθαι. |
| 45 | Primary ἁγνὸς γὰρ Χριστὸς τούτοις τὰ δίκαια βραβεύσει |
| 46 | Primary καὶ δοκίμους στέψει, αὐτὰρ θέμα μάρτυσι δώσει |
| 47 | Primary ἀθάνατον ἄχρι καὶ θανάτου τὸν ἀγῶνα ποιοῦσιν. |
| 48 | Primary παρθενικοῖς δὲ δραμοῦσι καλῶς ἄφθαρτον ἄεθλον |
| 49 | Primary δώσει τοῦ θέματος καὶ τοῖς τὰ δίκαια νέμουσιν |
| 50 | Primary ἀνθρώποις πᾶσίν τε καὶ ἔθνεσιν ἀλλοδαποῖσιν |
| 51 | Primary τοῖς ὁσίως ζώουσι θεόν θ᾽ ἕνα γινώσκουσιν. |
| 52 | Primary οἳ δ᾽ ἀγαπῶσι γάμον τε γαμοκλοπιῶν τ᾽ ἀπέχονται, |
| 53 | Primary δώσει πλούσια δῶρα, αἰώνιον ἐλπίδα καὶ τοῖς. |
| 54 | Primary πᾶσά τε γὰρ ψυχὴ μερόπων θεοῦ ἐστι χάρισμα, |
| 55 | Primary κοὐ θέμις ἀνθρώποις τὴν ἄλγεσι πᾶσι μιαίνειν. |
| 56 | Primary μὴ πλουτεῖν ἀδίκως, ἀλλ᾽ ἐξ ὁσίων βιοτεύειν. |
| 57 | Primary ἀρκεῖσθαι παρεοῦσι καὶ ἀλλοτρίων ἀπέχεσθαι. |
| 58 | Primary ψεύδεα μὴ βάζειν, τὰ δ᾽ ἐτήτυμα πάντα φυλάσσειν. |
| 59 | Primary (μηδὲ μάτην εἴδωλα σέβου· τὸν δ᾽ ἄφθιτον αἰεί) |
| 60 | Primary πρῶτα θεὸν τίμα, μετέπειτα δὲ σεῖο γονῆας. |
| 61 | Primary πάντα δίκαια νέμειν, μηδ᾽ εἰς κρίσιν ἄδικον ἔλθῃς. |
| 62 | Primary μὴ ῥίψῃς πενίην ἀδίκως, μὴ κρῖνε προσώπῳ· |
| 63 | Primary ἢν σὺ κακῶς δικάσῃς, μετέπειτα θεός σε δικάσσει. |
| 64 | Primary μαρτυρίην ψευδῆ φεύγειν, τὰ δίκαια βραβεύειν. |
| 65 | Primary παρθεσίην τηρεῖν· ἀγάπην δ᾽ ἐν πᾶσι φυλάσσειν |
| 66 | Primary μέτρα νέμειν τὰ δίκαια· καλὸν δ᾽ ἐπίμετρον ἅπασιν. |
| 67 | Primary σταθμὸν μὴ κρούειν ἑτερόζυγον, ἀλλ᾽ ἴσον ἕλκειν. |
| 68 | Primary μήδ᾽ ἐπιορκήσῃς μήτ᾽ ἀγνὼς μήτε ἑκοντί· |
| 69 | Primary ψεύδορκον στυγέει θεός, ὅττι κεν ἄν τις ὀμόσσῃ. |
| 70 | Primary (ἐξ ἀδίκων ἔργων δῶρον χερὶ μήποτε δέξῃ.) |
| 71 | Primary σπέρματα μὴ κλέπτειν· ἐπαράσιμος ὅστις ἕληται |
| 72 | Primary (εἰς γενεὰς γενεῶν { εἰς } σκορπισμὸν βιότοιο. |
| 73 | Primary μὴ ἀρσενοκοιτεῖν, μὴ συκοφαντεῖν, μήτε φονεύειν.) |
| 74 | Primary μισθὸν μοχθήσαντι δίδου· μὴ θλῖβε πένητα. |
| 75 | Primary γλώσσῃ νοῦν ἐχέμεν· κρυπτὸν λόγον ἐν φρεσὶν ἴσχειν. |
| 76 | Primary (ὀρφανικοῖς χήραις ἐπιδευομένοις δὲ παράσχου.) |
| 77 | Primary μήτ᾽ ἀδικεῖν ἐθέλῃς μήτ᾽ οὖν ἀδικοῦντα ἐάσῃς. |
| 78 | Primary πτωχοῖς εὐθὺ δίδου μήδ᾽ αὔριον ἐλθέμεν εἴπῃς. |
| 79 | Primary (ἱδρώσῃ σταχύων χειρὶ χρῄζοντι παράσχου. |
| 80 | Primary ὃς δ᾽ ἐλεημοσύνην παρέχει, θεῷ οἶδε δανείζειν. |
| 81 | Primary ῥύεται ἐκ θανάτου ἔλεος, κρίσις ὁππόταν ἔλθῃ. |
| 82 | Primary οὐ θυσίην, ἔλεος δὲ θέλει θεὸς ἀντὶ θυσίης. |
| 83 | Primary ἔνδυσον [οὖν] γυμνόν, μετάδος πεινῶντ᾽ ἄρτων σῶν.) |
| 84 | Primary ἄστεγον εἰς οἶκον δέξαι καὶ τυφλὸν ὁδήγει. |
| 85 | Primary ναυηγοὺς οἴκτειρον· ὁ γὰρ πλοῦς ἐστιν ἄδηλος. |
| 86 | Primary χεῖρα πεσόντι δίδου· σῶσον δ᾽ ἀπερίστατον ἄνδρα. |
| 87 | Primary κοινὰ πάθη πάντων, βίοτος τροχός, ἄστατος ὄλβος. |
| 88 | Primary πλοῦτον ἔχων σὴν χεῖρα πενητεύουσιν ὄρεξον. |
| 89 | Primary ὧν σοι ἔδωκε θεός, τούτων χρῄζοντι παράσχου. |
| 90 | Primary κοινὸς πᾶς ὁ βίος μερόπων, ἄνισος δὲ τέτυκται. |
| 91 | Primary (μήποτε ἄνδρα πένητα ἰδὼν σκώψῃς ἐπέεσσιν |
| 92 | Primary μηδὲ κακῶς γε προσείπῃς μωμητόν τινα φῶτα. |
| 93 | Primary τὸ ζῆν ἐν θανάτῳ δοκιμάζεται· εἴ τις ἔπραξεν |
| 94 | Primary ἔκνομον ἢ δίκαιον, διακρίνεται εἰς κρίσιν ἐλθών. |
| 95 | Primary μηδὲ φρένας βλάπτειν οἴνῳ μηδ᾽ ἄμετρα πίνειν. |
| 96 | Primary αἷμα δὲ μὴ φαγέειν, εἰδωλοθύτων δ᾽ ἀπέχεσθαι.) |
| 97 | Primary τὸ ξίφος ἀμφιβαλοῦ μὴ πρὸς φόνον, ἀλλ᾽ ἐπ᾽ ἄμυναν· |
| 98 | Primary εἴθε δὲ μὴ χρήσῃ μήτ᾽ ἔκνομα μήτε δικαίως· |
| 99 | Primary κἂν γὰρ ἀποκτείνῃς ἐχθρόν, σέο χεῖρα μιαίνεις. |
| 100 | Primary ἀγροῦ γειτονέοντος ἀπόσχου, μηδ᾽ ἄρ᾽ ὑπερβῇς· |
| 101 | Primary πᾶς ὅρος ἐστὶ δίκαιος, ὑπερβασίη δ᾽ ἀλεγεινή. |
| 102 | Primary κτῆσις ὀνήσιμός ἐσθ᾽ ὁσίων, ἀδίκων δὲ πονηρά. |
| 103 | Primary μηδέ τιν᾽ αὐξόμενον λωβήσῃ καρπὸν ἀρούρης. |
| 104 | Primary ἔστωσαν δ᾽ ὁμότιμοι ἐπήλυδες ἐν πολιήταις· |
| 105 | Primary πάντες γὰρ ξενίης πειρήσονται πολυμόχθου, |
| 106 | Primary (ὡς ξένοι ἀλλήλων· ξεῖνος δέ τε οὔτις ἐν ὑμῖν |
| 107 | Primary ἔσσετ᾽, ἐπεὶ πάντες βροτοὶ αἵματος ἐξ ἑνός ἐστε,) |
| 108 | Primary χώρη δ᾽ οὔτι βέβαιον ἔχει τόπον ἀνθρώποισιν. |
| 109 | Primary (μηδὲ θέλῃς πλουτεῖν μηδ᾽ εὔχεο· ἀλλὰ τόδ᾽ εὔχου |
| 110 | Primary ζῆν ἀπὸ τῶν ὀλίγων μηδέν τε ἔχοντα ἄδικον.) |
| 111 | Primary ἡ φιλοχρημοσύνη μήτηρ κακότητος ἁπάσης. |
| 112 | Primary (μὴ πόθος εἰς χρυσὸν ἢ εἰς ἄργυρον· ἐν δ᾽ ἄρα καὶ τοῖς |
| 113 | Primary ἔσσεται ἀμφήκης θυμοφθόρος ἔνθα σίδηρος.) |
| 114 | Primary χρυσὸς ἀεὶ δόλος ἐστὶ καὶ ἄργυρος ἀνθρώποισιν. |
| 115 | Primary χρυσὲ κακῶν ἀρχηγὲ βιοφθόρε πάντα χαλέπτων, |
| 116 | Primary εἴθε σε μὴ θνητοῖσι γενέσθαι πῆμα ποθεινόν· |
| 117 | Primary σοῦ γὰρ ἕκητι μάχαι τε λεηλασίαι τε φόνοι τε, |
| 118 | Primary ἐχθρὰ δὲ τέκνα γονεῦσιν ἀδελφειοί τε συναίμοις. |
| 119 | Primary (μηδὲ δόλους ῥάπτειν· μὴ πρὸς φίλον ἦτορ ὁπλίζειν.) |
| 120 | Primary μηδ᾽ ἕτερον κεύθῃς κραδίῃ νόον ἄλλ᾽ ἀγορεύων· |
| 121 | Primary μηδ᾽ ὡς πετροφυὴς πολύπους κατὰ χῶρον ἀμείβου. |
| 122 | Primary πᾶσιν δ᾽ ἁπλόος ἴσθι, τά τ᾽ ἐκ ψυχῆς ἀγόρευε. |
| 123 | Primary ὅστις ἑκὼν ἀδικεῖ, κακὸς ἀνήρ· ὃς δ᾽ ὑπ᾽ ἀνάγκης, |
| 124 | Primary οὐκ ἐρέω τὸ τέλος· βουλὴ δ᾽ εὐθύνεθ᾽ ἑκάστου. |
| 125 | Primary μὴ γαυροῦ σοφίῃ μήτ᾽ ἀλκῇ μήτ᾽ ἐνὶ πλούτῳ· |
| 126 | Primary εἷς θεός ἐστι σοφὸς δυνατός θ᾽ ἅμα καὶ πολύολβος. |
| 127 | Primary μηδὲ παροιχομένοισι κακοῖς τρύχου τεὸν ἦτορ· |
| 128 | Primary οὐκέτι γὰρ δύναται τὸ τετυγμένον εἶναι ἄτυκτον. |
| 129 | Primary μὴ προπετὴς ἐς χεῖρα· χαλίνου δ᾽ ἄγριον ὀργήν· |
| 130 | Primary πολλάκι γὰρ πλήξας ἀέκων φόνον ἐξετέλεσσεν. |
| 131 | Primary ἔστω κοινὰ πάθη, μηδὲν μέγα μηδ᾽ ὑπέροπλον. |
| 132 | Primary οὐκ ἀγαθὸν πλεονάζον ἔφυ θνητοῖσιν ὄνειαρ. |
| 133 | Primary ἡ πολλὴ δὲ τρυφὴ πρὸς ἀμέτρους ἕλκετ᾽ ἔρωτας. |
| 134 | Primary ὑψαυχεῖ δ᾽ ὁ πολὺς πλοῦτος καὶ ἐς ὕβριν ἀέξει. |
| 135 | Primary θυμὸς ὑπαρχόμενος μανίην ὀλοόφρονα τεύχει. |
| 136 | Primary ὀργὴ δ᾽ ἐστὶν ὄρεξις, ὑπερβαίνουσα δὲ μῆνις. |
| 137 | Primary ζῆλος τῶν ἀγαθῶν ἐσθλός, φαύλων δέ τε φαῦλος. |
| 138 | Primary τόλμα κακῶν ὀλοή, ἀγαθῶν δέ τε κῦδος ὀπάζει. |
| 139 | Primary σεμνὸς ἔρως ἀρετῆς, ὁ δὲ Κύπριδος αἶσχος ὀφέλλει. |
| 140 | Primary *ἡδὺς ἀγανόφρων* κικλήσκεται ἐν πολιήταις. |
| 141 | Primary ἐν μέτρῳ φαγέειν, πιέειν καὶ μυθολογεύειν· |
| 142 | Primary πάντων μέτρον ἄριστον· ὑπερβασίη δ᾽ ἀλεγεινόν. |
| 143 | Primary (μὴ φθονερός, μὴ ἄπιστος ἔσῃ, μὴ λοίδορος ἴσθι, |
| 144 | Primary μηδὲ κακογνώμων, μὴ ψευδαπάτης ἀμέτρητος.) |
| 145 | Primary σωφροσύνην ἀσκεῖν, αἰσχρῶν δ᾽ ἔργων ἀπέχεσθαι. |
| 146 | Primary μὴ μιμοῦ κακότητα, δίκῃ δ᾽ ἀπόλειψον ἄμυναν· |
| 147 | Primary πειθὼ μὲν γὰρ ὄνειαρ, ἔρις δ᾽ ἔριν ἀντιφυτεύει. |
| 148 | Primary μὴ πίστευε τάχιστα, πρὶν ἀτρεκέως πέρας ὄψει. |
| 149 | Primary οὗτος ἀγών, ταῦτ᾽ ἐστὶν ἀέθλια, ταῦτα βραβεῖα, |
| 150 | Primary τοῦτο πύλη ζωῆς καὶ εἴσοδος ἀθανασίης, |
| 151 | Primary ἣν θεὸς οὐράνιος δικαιοτάτοις ἀνθρώποις |
| 152 | Primary ἔστησεν νίκης ἐπαέθλιον· οἳ δὲ λαβόντες |
| 153 | Primary τὸ στέφος ἐνδόξως διελεύσονται διὰ ταύτης. |
| 154 | Primary ἀλλ᾽ ὁπόταν τόδε σῆμα φανῇ κατὰ κόσμον ἅπαντα, |
| 155 | Primary ἐκ γενετῆς παῖδες πολιοκρόταφοι γεγαῶτες, |
| 156 | Primary θλίψεις δ᾽ ἀνθρώπων λιμοὶ λοιμοὶ πόλεμοί τε, |
| 157 | Primary καιρῶν δ᾽ ἀλλαγίη, πενθήματα, δάκρυα πολλά, |
| 158 | Primary αἶ, ὁπόσων παῖδες *χώραις ἐνὶ θοινήσονται |
| 159 | Primary οἴκτρ᾽ ὀλοφυρόμενοι γονέας*, ἐν φάρεσι σάρκας |
| 160 | Primary ἐνθέντες, θάψουσιν ἐπὶ χθονὶ μητέρι λαῶν |
| 161 | Primary αἵμασι καὶ κονίῃσι πεφυρμένοι· ὦ μέγα δειλοί |
| 162 | Primary ὑστατίης γενεῆς φῶτες κακοεργέες αἰνοί |
| 163 | Primary νήπιοι οὐδὲ νοοῦντες, ὅθ᾽, ἡνίκα φῦλα γυναικῶν |
| 164 | Primary μὴ τίκτωσιν, ἔφυ τὸ θέρος μερόπων ἀνθρώπων. |
| 165 | Primary ἡ δὲ συναίρεσις ἐγγύς, ὅταν τινὲς ἀντὶ προφητῶν |
| 166 | Primary ψευδαπάται πελάσωσιν ἐπὶ χθονὶ φημίζοντες. |
| 167 | Primary καὶ Βελίαρ θ᾽ ἥξει καὶ σήματα πολλὰ ποιήσει |
| 168 | Primary ἀνθρώποις. τότε δὴ ὁσίων ἀκαταστασί᾽ ἀνδρῶν |
| 169 | Primary ἐκλεκτῶν πιστῶν τε, λεηλασίη τε γένηται |
| 170 | Primary τούτων ἠδ᾽ Ἑβραίων. δεινὸς δ᾽ αὐτοῖς χόλος ἥξει, |
| 171 | Primary ἡνίκα δὴ δεκάφυλος ἀπ᾽ ἀντολίης λαὸς ἥξει |
| 172 | Primary ζητήσων λαόν, ὃν ἀπώλεσεν Ἀσσύριος κλών, |
| 173 | Primary συμφύλων Ἑβραίων· ἔθνη δ᾽ ἐπὶ τοῖσιν ὀλοῦνται. |
| 174 | Primary ὕστερον αὖ ἄρξουσιν ὑπερμενέων ἀνθρώπων |
| 175 | Primary ἐκλεκτοὶ πιστοὶ Ἑβραῖοι καταδουλώσαντες |
| 176 | Primary αὐτοὺς ὡς τὸ πάροιθεν, ἐπεὶ κράτος οὔποτε λείψει. |
| 177 | Primary ὕψιστος πάντων πανεπίσκοπος αἰθέρι ναίων |
| 178 | Primary ὕπνον ἐπ᾽ ἀνθρώποις σκεδάσει βλέφαρ᾽ ἀμφικαλύψας. |
| 179 | Primary ὦ μάκαρες θεράποντες, ὅσους ἐλθὼν ἀγρυπνοῦντας |
| 180 | Primary εὕροι ὁ δεσπόζων· τοὶ δ᾽ ἐγρήγορθαν ἅπαντες |
| 181 | Primary πάντοτε προσδοκάοντες ἀκοιμήτοις βλεφάροισιν. |
| 182 | Primary *ἥξει γάρ τ᾽* ἠοῦς ἢ δείλης ἢ μέσον ἦμαρ· |
| 183 | Primary ἥξει δ᾽ ἀτρεκέως καὶ ἔσσεται ὡς ἀγορεύω, |
| 184 | Primary ἔσσεται ἐσσομένοις, ὅτ᾽ ἀπ᾽ οὐρανοῦ ἀστερόεντος |
| 185 | Primary ἄστρα τε πάντα μέσῳ ἐνὶ ἤματι πᾶσι φανεῖται |
| 186 | Primary σὺν δυσὶ φωστῆρσιν κατεπειγομένοιο χρόνοιο. |
| 187 | Primary καὶ τόθ᾽ ὁ Θεσβίτης ἀπ᾽ οὐρανοῦ ἅρμα τιταίνων |
| 188 | Primary οὐράνιον, γαίῃ δ᾽ ἐπιβὰς τότε σήματα τρισσά |
| 189 | Primary κόσμῳ ὅλῳ δείξει ἀπολλυμένου βιότοιο. |
| 190 | Primary αἶ, ὁπόσαι κείνῳ ἐνὶ ἤματι φορτοφοροῦσαι |
| 191 | Primary γαστέρι φωραθῶσιν, ὅσαι δέ τε νήπια τέκνα |
| 192 | Primary γαλαδοτοῦσιν, ὅσαι δ᾽ ἐπὶ κύματι ναιετάουσιν· |
| 193 | Primary αἶ, ὁπόσοι κείνην τὴν ἡμέραν ἀθρήσουσιν· |
| 194 | Primary ἀχλὺς γὰρ ζοφερὴ σκεπάσει τὸν ἀπείρονα κόσμον |
| 195 | Primary ἀντολίης δύσεως τε μεσημβρίης τε καὶ ἄρκτου. |
| 196 | Primary καὶ τότε δὴ ποταμός τε μέγας πυρὸς αἰθομένοιο |
| 197 | Primary ῥεύσει ἀπ᾽ οὐρανόθεν καὶ πάντα τόπον δαπανήσει, |
| 198 | Primary γαῖάν τ᾽ ὠκεανόν τε μέγαν γλαυκήν τε θάλασσαν |
| 199 | Primary λίμνας καὶ ποταμοὺς πηγὰς καὶ ἀμείλιχον Ἅιδην |
| 200 | Primary καὶ πόλον οὐράνιον. ἀτὰρ οὐράνιοι φωστῆρες |
| 201 | Primary εἰς ἓν συρρήξουσι καὶ εἰς μορφὴν πανέρημον. |
| 202 | Primary ἄστρα γὰρ οὐρανόθεν τε θαλάσσῃ πάντα πεσεῖται· |
| 203 | Primary ψυχαὶ δ᾽ ἀνθρώπων πᾶσαι βρύξουσιν ὀδοῦσιν |
| 204 | Primary καιόμεναι ποταμῷ καὶ θείῳ καὶ πυρὸς ὁρμῇ |
| 205 | Primary ἐν δαπέδῳ μαλερῷ, τέφρα δέ τε πάντα καλύψει. |
| 206 | Primary καὶ τότε χηρεύσει στοιχεῖα πρόπαντα τὰ κόσμου |
| 207 | Primary ἀὴρ γαῖα θάλασσα φάος πόλος ἤματα νύκτες· |
| 208 | Primary κοὐκέτι πωτήσονται ἐν ἠέρι ἄπλετοι ὄρνεις, |
| 209 | Primary οὐ ζῷα νηκτὰ θάλασσαν ὅλως ἔτι νηχήσονται, |
| 210 | Primary οὐ ναῦς ἔμφορτος ἐπὶ κύμασι ποντοπορήσει, |
| 211 | Primary οὐ βόες ἰθυντῆρες ἀροτρεύσουσιν ἄρουραν, |
| 212 | Primary οὐκ ἦχος δένδρων ἀνέμων ὕπο· ἀλλ᾽ ἅμα πάντα |
| 213 | Primary εἰς ἓν χωνεύσει καὶ εἰς καθαρὸν διαλέξει. |
| 214 | Primary ἡνίκα δ᾽ ἀθανάτου θεοῦ ἄφθιτοι ἀγγελτῆρες |
| 215 | Primary Βαρακιὴλ Ῥαμιὴλ Οὐριὴλ Σαμιὴλ Ἀζαήλ τε, |
| 216 | Primary αὐτοὶ ἐπιστάμενοι ὅσα τις κακὰ πρόσθεν ἔρεξεν, |
| 217 | Primary ἀνθρώπων ψυχὰς [τε] ἀπὸ ζόφου ἠερόεντος |
| 218 | Primary εἰς κρίσιν ἄξουσιν πάσας ἐπὶ βῆμα θεοῖο |
| 219 | Primary ἀθανάτου μεγάλου· εἷς γὰρ μόνος ἄφθιτός ἐστιν, |
| 220 | Primary αὐτὸς ὁ παντοκράτωρ, θνητῶν ὃ δικασπόλος ἔσται· |
| 221 | Primary καὶ τότε νερτερίοις ψυχὰς καὶ πνεῦμα καὶ αὐδήν |
| 222 | Primary δώσει ἐπουράνιος, καί τ᾽ ὀστέα ἁρμοσθέντα |
| 223 | Primary ἁρμοῖς παντοίοις, σάρκες καὶ νεῦρα. - -. |
| 224 | Primary καὶ φλέβες ἠδέ τε δέρμα περὶ χροῒ καὶ πρὶν ἔθειραι |
| 225 | Primary ἀμβροσίως πηχθέντα, καὶ ἔμπνοα κινηθέντα |
| 226 | Primary σώματ᾽ ἐπιχθονίων ἑνὶ ἤματ᾽ ἀναστήσονται. |
| 227 | Primary καὶ τότ᾽ ἀμειλίκτοιο καὶ ἀρρήκτου *ἀδάμαντος |
| 228 | Primary κλεῖθρα πέλωρα πυλῶν τε ἀχαλκεύτου Ἀίδαο* |
| 229 | Primary ῥηξάμενος Οὐριὴλ μέγας ἄγγελος εὐθὺ βαλεῖται, |
| 230 | Primary καὶ πάσας μορφὰς πολυπενθέας εἰς κρίσιν ἄξει |
| 231 | Primary εἰδώλων τὰ μάλιστα παλαιγενέων Τιτήνων |
| 232 | Primary ἠδέ τε Γιγάντων, καὶ ὅσας εἷλεν κατακλυσμός, |
| 233 | Primary καί θ᾽ ἃς ἐν πελάγεσσιν ἀπώλεσε κῦμα θαλάσσης |
| 234 | Primary ἠδ᾽ ὁπόσας θῆρες καὶ ἑρπετὰ καὶ πετεηνά |
| 235 | Primary θοινήσαντο, ὅλας ταύτας ἐπὶ βῆμα καλέσσει· |
| 236 | Primary καὶ πάλιν, ἃς ἔφθειρεν ἐνὶ φλογὶ σαρκοφάγον πῦρ, |
| 237 | Primary καὶ ταύτας ἐπὶ βῆμα θεοῦ στήσειεν ἀγείρας. |
| 238 | Primary ἡνίκα δ᾽ ἀνστήσῃ νέκυας μοῖραν καταλύσας |
| 239 | Primary καὶ καθίσῃ Σαβαὼθ Ἀδωναῖος ὑψικέραυνος |
| 240 | Primary ἐς θρόνον οὐράνιον [τε] μέγαν δέ τε κίονα πήξῃ, |
| 241 | Primary ἥξει δ᾽ ἐν νεφέλῃ πρὸς ἄφθιτον ἄφθιτος αὐτός |
| 242 | Primary ἐν δόξῃ Χριστὸς σὺν ἀμύμοσιν ἀγγελτῆρσιν |
| 243 | Primary καὶ καθίσει Μεγάλῳ ἐπὶ δεξιά, βήματι κρίνων |
| 244 | Primary εὐσεβέων βίοτον καὶ δυσσεβέων τρόπον ἀνδρῶν. |
| 245 | Primary ἥξει καὶ Μωσῆς ὁ μέγας φίλος Ὑψίστοιο |
| 246 | Primary σάρκας δυσάμενος· Ἀβραὰμ δ᾽ αὐτὸς μέγας ἥξει, |
| 247 | Primary Ἰσαὰκ ἠδ᾽ Ἰακώβ, Ἰησοῦς Δανιήλ τ᾽ Ἠλίας, |
| 248 | Primary Ἀμβακοὺμ καὶ Ἰωνᾶς καὶ οὓς ἔκταν Ἑβραῖοι. |
| 249 | Primary τοὺς δὲ μετ᾽ Ἠρεμίαν ἐπὶ βήματι πάντας ὀλέσσει |
| 250 | Primary κρινομένους Ἑβραίους, ἵνα ἄξια ἔργα λάβωσιν |
| 251 | Primary καὶ τίσωσ᾽, ὅσα περ βιότῳ θνητῷ τις ἔπραξεν. |
| 252 | Primary καὶ τότε δὴ πάντες διὰ αἰθομένου ποταμοῖο |
| 253 | Primary καὶ φλογὸς ἀσβέστου διελεύσονθ᾽· οἵ τε δίκαιοι |
| 254 | Primary πάντες σωθήσοντ᾽· ἀσεβεῖς δ᾽ ἐπὶ τοῖσιν ὀλοῦνται |
| 255 | Primary εἰς αἰῶνας ὅλους, ὁπόσοι κακὰ πρόσθεν ἔρεξαν, |
| 256 | Primary ἠδὲ φόνους ἐποίησαν, ὅσοι δὲ συνίστορές εἰσιν, |
| 257 | Primary ψεῦσται καὶ κλέπται δόλιοί τ᾽ οἰκοφθόροι αἰνοί |
| 258 | Primary δειπνολόχοι καὶ κλεψίγαμοι δύσφημα χέοντες |
| 259 | Primary δεινοί θ᾽ ὑβρισταί τ᾽ ἄνομοί τ᾽ εἰδωλολάτραι τε· |
| 260 | Primary ἠδ᾽ ὁπόσοι μέγαν ἀθάνατον θεὸν ἐγκατέλειψαν |
| 261 | Primary βλάσφημοι δ᾽ ἐγένοντο καὶ εὐσεβέων κεραϊσταί |
| 262 | Primary πιστολέται καὶ τῶν δικαίων φθισήνορες ἀνδρῶν· |
| 263 | Primary ἠδ᾽ ὁπόσοι δολίοις καὶ ἀναιδέσιν ἀμφιπροσώποις |
| 264 | Primary πρεσβύτεροι γεραροί τε διήκονες εἰσορόωσιν … |
| 265 | Primary αἰδόμενοι *κρίνουσ᾽ ἀδίκως ἑτέροισι ποιοῦντες* |
| 266 | Primary ψευδαπάταις φήμῃσι πεπεισμένοι...... |
| 267 | Primary παρδαλίων τε λύκων ὀλοώτεροι ἠδὲ [κάκιστοι·] |
| 268 | Primary ἠδ᾽ ὁπόσοι μεγάλως ὑπερήφανοι ἠδὲ τοκισταί, |
| 269 | Primary οἳ τόκον ἔκ γε τόκων συναθροίζοντες κατὰ οἴκους |
| 270 | Primary ὀρφανικοὺς χήρας τε καταβλάπτουσιν [ἕκαστα·] |
| 271 | Primary ἠδ᾽ ὁπόσοι χήρῃσι καὶ ὀρφανικοῖσι διδοῦσιν |
| 272 | Primary ἐξ ἀδίκων ἔργων, ὁπόσοι δ᾽ ἰδίων ἀπὸ μόχθων |
| 273 | Primary δόντες ὀνειδίζουσιν· ὅσοι δὲ γονεῖς ἐνὶ γήρᾳ |
| 274 | Primary κάλλιπον οὐ τίσαντες ὅλως, οὐ θρέπτρα γονεῦσιν |
| 275 | Primary ἀντιπαρασχόντες, αὐτὰρ δ᾽ ὅσοι ἠπείθησαν |
| 276 | Primary ἠδὲ καὶ ἀντεῖπαν λόγον ἄγριον εἰς γενετῆρας· |
| 277 | Primary ἠδ᾽ ὁπόσοι πίστεις [τε] ἀπηρνήσαντο λαβόντες· |
| 278 | Primary καὶ θεράποντες ὅσοι κατὰ δεσποτέων ἐγένοντο, |
| 279 | Primary καὶ πάλιν οἳ τὴν σάρκα ἀσελγείῃ ἐμίηναν, |
| 280 | Primary ἠδ᾽ ὁπόσοι ζώνην τὴν παρθενικὴν ἀπέλυσαν |
| 281 | Primary λάθρη μισγόμενοι, ὅσσαι δ᾽ ἐνὶ γαστέρι φόρτους |
| 282 | Primary ἐκτρώσκουσιν, ὅσοι τε τόκους ῥίπτουσιν ἀθέσμως· |
| 283 | Primary φαρμακοὺς ἢ φαρμακίδας σὺν τοῖσι καὶ αὐτούς |
| 284 | Primary ὀργὴ ἐπουρανίοιο καὶ ἀφθάρτοιο θεοῖο |
| 285 | Primary κίονι προσπελάσειεν, ὅπου περὶ κύκλον ἅπαντα |
| 286 | Primary ἀκάματος ποταμὸς πύρινος ῥεῖ, τοὺς δ᾽ ἅμα πάντας |
| 287 | Primary ἄγγελοι ἀθανάτοιο θεοῖό τε αἰὲν ἐόντος |
| 288 | Primary ἐν φλογίναις μάστιξι καὶ ἐν πυρίναις ἁλύσεσσιν |
| 289 | Primary δεσμοῖς ἀρρήκτοις τε περισφίγξαντες ὕπερθεν |
| 290 | Primary δεινοτάτως κολάσουσιν· ἔπειτα δὲ νυκτὸς ἀμολγῷ |
| 291 | Primary ἐν γέννῃ θηρσὶν ὑπὸ ταρταρίοισι βαλοῦνται |
| 292 | Primary πολλοῖς δειμαλέοισιν, ὅπου σκότος ἐστὶν ἄμετρον. |
| 293 | Primary ἀλλ᾽ ὁπόταν πολλὰς κολάσεις ἐνιποιήσωνται |
| 294 | Primary πᾶσιν, ὅσων κακὸν ἦτορ ἔην, ἀτὰρ ὕστερον αὖτε |
| 295 | Primary ἐκ ποταμοῦ μεγάλου πύρινος τροχὸς ἀμφικατέρξει |
| 296 | Primary αὐτούς, ὅττ᾽ ἄρα τοῖσιν ἀτάσθαλα ἔργα μέμηλεν. |
| 297 | Primary καὶ τότε θρηνήσουσιν ἐπ᾽ ἄλλυδις ἄλλος ἄπωθεν |
| 298 | Primary οἰκτροτάτῃ μοίρῃ πατέρες καὶ νήπια τέκνα, |
| 299 | Primary μητέρες ἠδέ τε τέκν᾽ ὑπομάζια δακρυόεντα. |
| 300 | Primary οὐδέ σφιν δακρύων κόρος ἔσσεται οὐδὲ μὲν αὐδή |
| 301 | Primary οἴκτρ᾽ ὀλοφυρομένων ἐσακούσεται ἄλλυδις ἄλλου, |
| 302 | Primary ἀλλὰ μακρὰν ζοφόενθ᾽ ὑπὸ Τάρταρον εὐρώεντα |
| 303 | Primary τειρόμενοι βώσονται· ἐπ᾽ οὐχ ὁσίοισι δὲ χώροις |
| 304 | Primary τίσουσιν τρὶς τόσσον ὅσον κακὸν ἤλιτον ἔργον |
| 305 | Primary δαιόμενοι πυρὶ πολλῷ· ἐπιβρύξουσι δ᾽ ὀδοῦσιν |
| 306 | Primary πάντες τηκόμενοι δίψῃ μαλερῇ τε βίῃ τε, |
| 307 | Primary καὶ καλέσουσι καλὸν τὸ θανεῖν καὶ φεύξετ᾽ ἀπ᾽ αὐτῶν. |
| 308 | Primary οὐκέτι γὰρ θάνατος τούτους, οὐ νὺξ ἀναπαύσει. |
| 309 | Primary πολλὰ δ᾽ ἐρωτήσουσι μάτην θεὸν ὑψιμέδοντα, |
| 310 | Primary καὶ τότ᾽ ἀποστρέψει φανερῶς τὸ πρόσωπον ἀπ᾽ αὐτῶν. |
| 311 | Primary ἑπτὰ γὰρ αἰώνων μετανοίας ἤματ᾽ ἔδωκεν |
| 312 | Primary ἀνδράσι πλαζομένοις διὰ χειρὸς παρθένου ἁγνῆς. |
| 313 | Primary τοὺς δ᾽ ἄλλους, ὁπόσοις τε δίκη καλά τ᾽ ἔργα μέμηλεν |
| 314 | Primary ἠδὲ καὶ εὐσεβίη τε δικαιότατοί τε λογισμοί, |
| 315 | Primary ἄγγελοι αἰρόμενοι δι᾽ αἰθομένου ποταμοῖο |
| 316 | Primary εἰς φῶς ἄξουσιν καὶ εἰς ζωὴν ἀμέριμνον, |
| 317 | Primary ἔνθα πέλει τρίβος ἀθάνατος μεγάλοιο θεοῖο |
| 318 | Primary καὶ τρισσαὶ πηγαὶ οἴνου μέλιτός τε γάλακτος· |
| 319 | Primary γαῖα δ᾽ ἴση πάντων οὐ τείχεσιν οὐ περιφραγμοῖς |
| 320 | Primary διαμεριζομένη καρποὺς τότε πλείονας οἴσει |
| 321 | Primary αὐτομάτη, κοινοί τε βίοι καὶ πλοῦτος ἄμοιρος. |
| 322 | Primary οὐ γὰρ πτωχὸς ἐκεῖ, οὐ πλούσιος, οὐδὲ τύραννος, |
| 323 | Primary οὐ δοῦλος, οὐδ᾽ αὖ μέγας, οὐ μικρός τις ἔτ᾽ ἔσται, |
| 324 | Primary οὐ βασιλεῖς, οὐχ ἡγεμόνες· κοινῇ δ᾽ ἅμα πάντες. |
| 325 | Primary κοὐκέτ᾽ ἐρεῖ τις ὅλως "νὺξ ἤλυθεν", οὐδὲ μὲν "αὔριον", |
| 326 | Primary οὐκ "ἐχθὲς γέγονεν", οὐκ ἤματα πολλὰ μεριμνᾷ, |
| 327 | Primary οὐκ ἔαρ, οὐχὶ θέρος, οὐ χειμῶν᾽, οὐ μετόπωρον, |
| 328 | Primary οὐ γάμον, οὐ θάνατον, οὐ πράσεις, οὐδ᾽ ἀγορασμούς, |
| 329 | Primary οὐ δύσιν ἀντολίην· ποιήσει γὰρ μακρὸν ἦμαρ· |
| 330 | Primary τοῖς καὶ ὁ παντοκράτωρ θεὸς ἄφθιτος ἄλλο παρέξει. |
| 331 | Primary εὐσεβέσιν, ὁπόταν θεὸν ἄφθιτον αἰτήσωνται, |
| 332 | Primary ἐκ μαλεροῖο πυρὸς καὶ ἀθανάτων ἀπὸ βρυγμῶν |
| 333 | Primary ἀνθρώπους σῶσαι δώσει· καὶ τοῦτο ποιήσει· |
| 334 | Primary λεξάμενος γὰρ ἐσαῦθις ἀπὸ φλογὸς ἀκαμάτοιο |
| 335 | Primary ἄλλοσ᾽ ἀποστήσας πέμψει διὰ λαὸν ἑαυτοῦ |
| 336 | Primary εἰς ζωὴν ἑτέραν καὶ αἰώνιον ἀθανάτοισιν |
| 337 | Primary Ἠλυσίῳ πεδίῳ, ὅθι οἱ πέλε κύματα μακρά |
| 338 | Primary λίμνης ἀενάου Ἀχερουσιάδος βαθυκόλπου. |
| 339 | Primary αἰαῖ ἐγὼ δειλή, τί γενήσομαι ἤματι τῷδε, |
| 340 | Primary ἀνθ᾽ ὧν ἡ δύσφρων γε πονησαμένη περὶ πάντων |
| 341 | Primary ἤλιτον οὔτε γάμῳ μεμελημένη οὔτε λογισμοῖς· |
| 342 | Primary ἀλλὰ καὶ ἐν μελάθροισιν ἐμοῖς πολυπάμμονος ἀνδρός |
| 343 | Primary δευομένους ἀπέκλεισα· τὰ δ᾽ ἔκνομα πρόσθεν ἔρεξα |
| 344 | Primary εἰδυῖα. σὺ δέ, σῶτερ, ἐμῶν ἀπὸ μαστικτήρων |
| 345 | Primary ῥῦσαι δή με κυνῶπιν, ἀναιδέα περ ῥέξασαν. |
| 346 | Primary ἥδε δ᾽ ἐγὼ λίτομαί σε βαιὸν παῦσαί μεν ἀοιδῆς, |
| 347 | Primary ἅγιε μαννοδότα, βασιλεῦ μεγάλης βασιλείης. |