Reader
Reader | Sibylline Oracles, Book 8
Sibylline Oracles
Sibylline tradition
Text
Position
Line 0 of 500
Waypoints
| Line Ref | Greek source text | Ancient Greek |
|---|---|
| 0 | Primary Λόγος ὄγδοος |
| 1 | Primary Ἐρχομένης μεγάλης ὀργῆς ἐπὶ κόσμον ἀπειθῆ |
| 2 | Primary ἔσχατον εἰς αἰῶνα θεοῦ μηνίματα φαίνω |
| 3 | Primary πᾶσι προφητεύουσα κατὰ πτόλιν ἀνθρώποισιν. |
| 4 | Primary ἐξότε δὴ πύργος τ᾽ ἔπεσεν γλῶσσαί τ᾽ ἀνθρώπων |
| 5 | Primary ἐς πολλὰς θνητῶν ἐμερίσθησαν διαλέκτους, |
| 6 | Primary πρῶτα μὲν Αἰγύπτου βασιλήιον, εἶτα τὸ Περσῶν |
| 7 | Primary Μήδων Αἰθιόπων τε καὶ Ἀσσυρίης Βαβυλῶνος, |
| 8 | Primary εἶτα Μακηδονίης τῦφον μέγαν αὐχησάσης, |
| 9 | Primary πέμπτον δ᾽ εἶτ᾽ Ἰταλῶν κλεινὴ βασιλεία ἄθεσμος |
| 10 | Primary ὑστάτιον πᾶσιν δείξει κακὰ πολλὰ βροτοῖσιν |
| 11 | Primary καὶ πάσης γαίης ἀνδρῶν μόχθους δαπανήσει. |
| 12 | Primary ἄξει δ᾽ ἀκμῆτας βασιλεῖς ἐθνῶν ἐπὶ δυσμάς |
| 13 | Primary καὶ θεσμοὺς θήσει λαοῖς καὶ πάνθ᾽ ὑποτάξει. |
| 14 | Primary ὀψὲ θεοῦ μύλοι *γ᾽* ἀλέουσι τὸ λεπτὸν ἄλευρον. |
| 15 | Primary πῦρ τότε πάντ᾽ ὀλέσει καὶ λεπτὸν χοῦν ἀποδώσει |
| 16 | Primary ὑψικόμων ὀρέων κορυφὰς καὶ σαρκὸς ἁπάσης. |
| 17 | Primary ἀρχὴ πᾶσι κακῶν φιλοχρημοσύνη καὶ ἄνοια. |
| 18 | Primary χρυσοῦ γὰρ δολίοιο καὶ ἀργυρίου πόθος ἔσται· |
| 19 | Primary οὐδὲν γὰρ τούτων θνητοὶ μεῖζον προέκριναν, |
| 20 | Primary οὐ φάος ἠελίου, οὐκ οὐρανόν, οὐδὲ θάλασσαν, |
| 21 | Primary οὐ γαῖαν πλατύνωτον, ὅθεν φύουσιν ἅπαντα, |
| 22 | Primary οὐ τὸν πάντα διδόντα θεόν, γεννήτορα πάντων, |
| 23 | Primary οὐ πίστιν τούτων καὶ εὐσεβίην προέκριναν. |
| 24 | Primary πηγὴ δυσσεβίης καὶ ἀταξίης προοδηγός, |
| 25 | Primary μηχανίη πολέμων, εἰρήνης ἐχθρὰ ἀνία |
| 26 | Primary ἐχθραίνουσα τέκνοις γονέας καὶ τέκνα γονεῦσιν. |
| 27 | Primary κοὐδὲ γάμος δίχα χρυσοῦ ὅλως ποτὲ τίμιος ἔσται. |
| 28 | Primary γαῖά θ᾽ ὅρους ἕξει καὶ φρουροὺς πᾶσα θάλασσα |
| 29 | Primary πᾶσι μεριζομένη δολίως τοῖς χρυσὸν ἔχουσιν· |
| 30 | Primary ὡς αἰῶσι θέλοντες ἔχειν πολυθρέμμονα γαῖαν |
| 31 | Primary πορθήσουσι πένητας, ἵν᾽ αὐτοὶ πλείονα χῶρον |
| 32 | Primary προσπορίσαντες ἀλαζονίῃ καταδουλώσωσιν. |
| 33 | Primary κεἰ μὴ γαῖα πέλωρος ἀπ᾽ οὐρανοῦ ἀστερόεντος |
| 34 | Primary τὸν θρόνον εἶχε μακρήν, οὐκ ἦν ἴσον ἀνδράσι φέγγος, |
| 35 | Primary ἀλλ᾽ ἀγοραζόμενον χρυσῷ πλουτοῦσιν ὑπῆρχεν |
| 36 | Primary καὶ πτωχοῖς αἰῶν᾽ ἕτερον θεὸς ἡτοίμαζεν. |
| 37 | Primary ἥξει σοί ποτ᾽ ἄνωθεν ἴση, ὑψαύχενε Ῥώμη, |
| 38 | Primary οὐράνιος πληγὴ καὶ κάμψεις αὐχένα πρώτη |
| 39 | Primary κἀξεδαφισθήσῃ καὶ πῦρ σε ὅλην δαπανήσει |
| 40 | Primary κεκλιμένην ἐδάφεσσιν ἑοῖς, καὶ πλοῦτος ὀλεῖται |
| 41 | Primary καὶ σὰ θέμειλα λύκοι καὶ ἀλώπεκες οἰκήσουσιν. |
| 42 | Primary καὶ τότ᾽ ἔσῃ πανέρημος ὅλως, ὡς μὴ γεγονυῖα. |
| 43 | Primary ποῦ τότε Παλλάδιον; ποῖός σε θεὸς διασώσει, |
| 44 | Primary χρυσοῦς ἢ λίθινος ἢ χάλκεος; ἢ τότε ποῦ σοι |
| 45 | Primary δόγματα συγκλήτου; ποῦ Ῥείης ἠὲ Κρόνοιο |
| 46 | Primary ἠὲ Διὸς γενεὴ καὶ πάντων, ὧν ἐσεβάσθης, |
| 47 | Primary δαίμονας ἀψύχους, νεκύων εἴδωλα καμόντων, |
| 48 | Primary ὧν Κρήτη καύχημα τάφους ἡ δύσμορος ἕξει, |
| 49 | Primary θρησκεύουσα θρόνωσιν ἀναισθήτοις νεκύεσσιν. |
| 50 | Primary ἀλλ᾽ ὅτε σοι βασιλεῖς, χλιδανή, τρὶς πέντε γένωνται |
| 51 | Primary κόσμον δουλώσαντες ἀπ᾽ ἀντολίης μέχρι δυσμῶν, |
| 52 | Primary *ἔσσετ᾽ ἄναξ πολιόκρανος ἔχων πέλας οὔνομα πόντου*, |
| 53 | Primary κόσμον ἐποπτεύων μιαρῷ ποδί, δῶρα πορίζων, |
| 54 | Primary χρυσὸν μὲν πάμπλειστον ἔχων καὶ ἄργυρον ἐχθρῶν |
| 55 | Primary πλείονα συλλέξας καὶ γυμνώσας ἀναλύσει. |
| 56 | Primary καὶ μαγικῶν ἀδύτων μυστήρια πάντα μεθέξει, |
| 57 | Primary παῖδα θεὸν δεικνύσει, ἅπαντα σεβάσματα λύσει, |
| 58 | Primary *κἀξ ἀρχῆς * τὰ πλάνης μυστήρια πᾶσιν ἀνοίξει. |
| 59 | Primary αἴλινος ἔκτοτε καιρός, ὅτ᾽ Αἴλινος αὐτὸς ὀλεῖται. |
| 60 | Primary καί ποτε δῆμος ἐρεῖ· "μέγα σὸν κράτος, ἄστυ, πεσεῖται·" |
| 61 | Primary εἰδὼς εὐθὺ τὸ μέλλον ἐπερχόμενον κακὸν ἦμαρ. |
| 62 | Primary καὶ τότε πενθήσουσιν ὁμοῦ τὴν σὴν προβλέποντες |
| 63 | Primary οἰκτροτάτην μοῖραν πατέρες καὶ νήπια τέκνα· |
| 64 | Primary αἴλινα θρηνήσουσι λυγροὶ παρὰ Θύμβριδος ὄχθαις. |
| 65 | Primary τὸν μέτα τρεῖς ἄρξουσι πανύστατον ἦμαρ ἔχοντες, |
| 66 | Primary οὔνομα πληρώσαντες ἐπουρανίοιο θεοῖο, |
| 67 | Primary οὗ τὸ κράτος καὶ νῦν καὶ εἰς αἰῶνας ἅπαντας. |
| 68 | Primary εἷς μὲν πρέσβυς ἐὼν σκήπτρων ἐπὶ πουλὺ κρατήσει, |
| 69 | Primary οἰκτρότατος βασιλεύς, ὃς χρήματα κόσμου ἅπαντα |
| 70 | Primary δώμασιν ἐγκλείσει τηρῶν, ἵν᾽, ὅταν γ᾽ ἐπανέλθῃ |
| 71 | Primary ἐκ περάτων γαίης ὁ φυγὰς μητροκτόνος αἴθων, |
| 72 | Primary ταῦτα ἅπασι διδοὺς πλοῦτον μέγαν Ἀσίδι θήσει. |
| 73 | Primary καὶ τότε πενθήσεις πλατυπόρφυρον ἡγεμονήων |
| 74 | Primary *φῶς* ἐκδυσαμένη καὶ πένθιμον εἷμα φοροῦσα, |
| 75 | Primary ὦ βασιλὶς μεγάλαυχε, Λατινίδος ἔκγονε Ῥώμης· |
| 76 | Primary οὐκέτι σοι τῆς σῆς μεγαλαυχενίης κλέος ἔσται, |
| 77 | Primary οὐδ᾽ ὀρθωθήσῃ ποτὲ δύσμορος, ἀλλὰ κλιθήσῃ· |
| 78 | Primary καὶ γὰρ ἀετοφόρων λεγεώνων δόξα πεσεῖται. |
| 79 | Primary ποῦ τότε σοι τὸ κράτος; ποία γῆ σύμμαχος ἔσται |
| 80 | Primary δουλωθεῖσα τεαῖς ματαιοφροσύνῃσιν ἀθέσμως; |
| 81 | Primary πάσης γὰρ γαίης θνητῶν τότε σύγχυσις ἔσται, |
| 82 | Primary αὐτὸς ὁ παντοκράτωρ ὅταν ἐλθὼν βήματι κρίνῃ |
| 83 | Primary ζώντων καὶ νεκύων ψυχὰς καὶ κόσμον ἅπαντα. |
| 84 | Primary κοὔτε γονεῖς τέκνοισι φίλοι, οὐ τέκνα γονεῦσιν |
| 85 | Primary ἔσσονται διὰ δυσσεβίην καὶ θλῖψιν ἄελπτον. |
| 86 | Primary ἔκτοτέ σοι βρυγμὸς καὶ σκορπισμὸς καὶ ἅλωσις, |
| 87 | Primary πτῶσις ὅταν ἔλθῃ πόλεων καὶ χάσματα γαίης· |
| 88 | Primary πορφύρεός τε δράκων ὁπόταν ἐπὶ κύμασιν ἔλθῃ |
| 89 | Primary γαστέρι πλῆθος ἔχων καὶ θρέψει σεῖο τὰ τέκνα |
| 90 | Primary ἐσσομένου λιμοῦ τε καὶ ἐμφυλίου πολέμοιο, |
| 91 | Primary ἐγγὺς μὲν κόσμου τὸ τέλος καὶ ἔσχατον ἦμαρ |
| 92 | Primary καὶ *δοκίμοις* κλητοῖς κρίσις ἀθανάτοιο θεοῖο. |
| 93 | Primary πρῶτα δὲ Ῥωμαίων ἀπαραίτητος χόλος ἔσται, |
| 94 | Primary αἱμοπότης καιρὸς καὶ δύστηνος βίος ἥξει. |
| 95 | Primary αἰαῖ σοι, Ἰταλὴ χώρη, μέγα βάρβαρον ἔθνος, |
| 96 | Primary οὐκ ἐνόησας, ὅθεν γυμνὴ καὶ ἀνάξιος ἦλθες |
| 97 | Primary πρὸς φάος ἠελίοιο, ἵν᾽ εἰς αὐτὸν πάλι χῶρον |
| 98 | Primary γυμνὴ χωρήσῃς καὶ ὕστερον ἐς κρίσιν ἔλθῃς |
| 99 | Primary ὡς ἀδίκως κρίνουσα............... |
| 100 | Primary χερσὶ γιγαντείῃσι μόνη κατὰ κόσμον ἅπαντα |
| 101 | Primary ἐξ ὕψους ἐλθοῦσα κατοικήσεις ὑπὸ γαῖαν. |
| 102 | Primary νάφθῃ κἀσφάλτῳ καὶ θείῳ καὶ πυρὶ πολλῷ |
| 103 | Primary ἐξαφανισθήσῃ καὶ ἔσῃ κόνις αἰώνεσσιν |
| 104 | Primary αἰθομένη· καὶ πᾶς ὁ βλέπων μυκηθμὸν ἀκούσει |
| 105 | Primary πένθιμον ἐξ Ἀίδαο μέγαν καὶ βρυγμὸν ὀδόντων |
| 106 | Primary καὶ ταῖς σαῖς παλάμαις ἄθεα στήθη παταγοῦσαν. |
| 107 | Primary πᾶσιν ὁμοῦ νύξ ἐστιν ἴση τοῖς πλοῦτον ἔχουσιν |
| 108 | Primary καὶ πτωχοῖς· γυμνοὶ δ᾽ ἀπὸ γῆς, γυμνοὶ πάλιν ἐς γῆν |
| 109 | Primary ἥξαντες λήγουσι βίου χρόνον ἐκτελέσαντες. |
| 110 | Primary οὐδεὶς δοῦλος ἐκεῖ, οὐ κύριος, οὐδὲ τύραννος, |
| 111 | Primary οὐ βασιλεῖς, οὐχ ἡγεμόνες μάλα τῦφον ἔχοντες, |
| 112 | Primary οὐ νομικὸς ῥήτωρ, οὐκ ἄρχων χρήμασι κρίνων· |
| 113 | Primary οὐ θυσιῶν σπονδαῖς ἐπὶ βωμοῖς αἷμα χέουσιν· |
| 114 | Primary τύμπανον οὐκ ἠχεῖ, οὐ κύμβαλον.......... |
| 115 | Primary οὐκ αὐλὸς πολύτρητος, ἔχοντα φρενοβλάβον αὐδήν, |
| 116 | Primary οὐ σκολιοῦ σύριγμα φέρον μίμημα δράκοντος, |
| 117 | Primary οὐ σάλπιγξ πολέμων ἀγγέλτρια βαρβαρόφωνος· |
| 118 | Primary οὐ κώμοις μεθύοντες ἀθέσμοις, οὐχὶ χορείαις· |
| 119 | Primary οὐ φθόγγος κιθάρης, οὐ μηχανίη κακοεργός· |
| 120 | Primary οὐκ ἔρις, οὐκ ὀργὴ πολυποίκιλος, οὐδὲ μάχαιρα |
| 121 | Primary ἔστι παρὰ φθιμένοις, ἀλλ᾽ αἰὼν κοινὸς ἅπασιν. ― |
| 122 | Primary κλειδοφύλαξ εἱρκτῆς μεγάλης ἐπὶ βῆμα θεοῖο. ― |
| 123 | Primary χρυσοῖς τε *ξοάνοισιν ἀργυρέοις λιθίνοισιν* |
| 124 | Primary ὡραῖαι γίνεσθε, ἵν᾽ ἔλθητ᾽ εἰς πικρὸν ἦμαρ |
| 125 | Primary σὴν πρώτην κόλασιν, Ῥώμη, καὶ βρυγμὸν ὁρῶσαι. |
| 126 | Primary κοὐκέτι σοι δούλειον ὑπὸ ζυγὸν αὐχένα θήσει |
| 127 | Primary οὐ Σύρος, οὐχ Ἕλλην, οὐ βάρβαρος, οὐκ ἔθνος ἄλλο. |
| 128 | Primary ἐκπορθηθήσῃ κἀκπραχθήσῃ ὅσ᾽ ἔπραξας, |
| 129 | Primary δώσεις τ᾽ οἰμώξασα φόβῳ, μέχρι πάντ᾽ ἀποτίσεις· |
| 130 | Primary καὶ σὺ θρίαμβος ἔσῃ κόσμῳ καὶ ὄνειδος ἁπάντων. ― |
| 131 | Primary ἔκτοτε Λατίνων ἕκτη γενεὴ βασιλήων |
| 132 | Primary ὑστάτιον βίον ἐκτελέσει καὶ σκῆπτρα προλείψει. |
| 133 | Primary τῆς αὐτῆς γενεῆς ἕτερος βασιλεὺς βασιλεύσει, |
| 134 | Primary ὃς πάσης γαίης ἄρξει καὶ σκῆπτρα κρατήσει, |
| 135 | Primary ἄρξει δ᾽ αὐτοκέραστα θεοῦ βουλαῖσι μεγίστου· |
| 136 | Primary παῖδες καὶ παίδων τούτου γενεὴ *ἀσαλεύτων*· |
| 137 | Primary ὣς γὰρ θέσφατόν ἐστι περιπλομένοιο χρόνοιο, |
| 138 | Primary ὁππόταν Αἰγύπτου βασιλεῖς τρὶς πέντε γένωνται. |
| 139 | Primary ἔνθεν ὅταν φοίνικος ἐπέλθῃ πενταχρόνοιο ― |
| 140 | Primary ἥξει πορθήσων λαῶν γένος, ἄκριτα φῦλα, |
| 141 | Primary Ἑβραίων ἔθνος. τότ᾽ Ἄρης Ἄρεα προνομεύσει, |
| 142 | Primary Ῥωμαίων ὑπέροπλον ἀπειλὴν αὐτὸς ὀλέσσει. |
| 143 | Primary ὤλετο { γὰρ } Ῥώμης ἀρχὴ τότε τηλεθόωσα, |
| 144 | Primary ἀρχαίη πολέεσσι περικτιόνεσσιν ἄνασσα. |
| 145 | Primary οὐκέτι νικήσειε πέδον Ῥώμης ἐριθήλου, |
| 146 | Primary ὁππόταν ἐξ Ἀσίης κρατέων ἔλθῃ σὺν Ἄρηι. |
| 147 | Primary ταῦτα δὲ πάντ᾽ ἔρξας ἥξει κρηπισθὲν ἐς ἄστυ. |
| 148 | Primary τρὶς δὲ τριηκοσίους καὶ τεσσαράκοντα καὶ ὀκτώ |
| 149 | Primary πληρώσεις λυκάβαντας, ὅταν σοι δύσμορος ἥξῃ |
| 150 | Primary μοῖρα βιαζομένη τεὸν οὔνομα πληρώσασα. |
| 151 | Primary οἴμοι ἐγὼ τριτάλαινα, πότ᾽ ὄψομαι ἦμαρ ἐκεῖνο |
| 152 | Primary *σεῖό ποτε *, Ῥώμη, πᾶσιν δὲ μάλιστα Λατίνοις; |
| 153 | Primary κώμαζ᾽, εἰ βούλει σύ, τὸν ἐν κρυφίαισι λοχείαις |
| 154 | Primary Ἀσίδος ἐκ γαίης ἐπὶ Τρωικὸν ἅρμ᾽ ἐπιβάντα, |
| 155 | Primary θυμὸν ἔχοντ᾽ αἴθωνος. ὅταν δ᾽ ἰσθμὸν διακόψῃ |
| 156 | Primary παπταίνων, ἐπὶ πάντας ἰών, πέλαγος διαμείψας, |
| 157 | Primary καὶ τότε θῆρα μέγαν μετελεύσεται αἷμα κελαινόν. |
| 158 | Primary τὸν δὲ λέοντ᾽ ἐδίωξε κύων ὀλέκοντα νομῆας. |
| 159 | Primary σκῆπτρα δ᾽ ἀφαιρήσουσι καὶ εἰς Ἀίδαο περήσει. |
| 160 | Primary ἥξει καὶ Ῥοδίοις κακὸν ὕστατον, ἀλλὰ μέγιστον, |
| 161 | Primary καὶ Θήβῃσι κακή γε μένει μετόπισθεν ἅλωσις. |
| 162 | Primary Αἴγυπτος δ᾽ ἀπολεῖται ὑφ᾽ ἡγεμόνων κακότητος. |
| 163 | Primary [ὡς δὲ καὶ οἳ μετόπισθ᾽ ἔφυγον βροτοὶ αἰπὺν ὄλεθρον, |
| 164 | Primary τρὶς μακαριστὸς ἔην καὶ τετράκις ὄλβιος ἀνήρ.] |
| 165 | Primary ἔσται καὶ Ῥώμη ῥύμη καὶ Δῆλος ἄδηλος |
| 166 | Primary καὶ Σάμος ἄμμος — — — — — — — |
| 167 | Primary ὕστερον *αὖ καὶ ἔπειτά γε τοὺς Πέρσας κακὸν ἥξει* |
| 168 | Primary ἀνθ᾽ ὑπερηφανίης, ἀπολεῖται ὕβρις ἅπασα. |
| 169 | Primary καὶ τότε { δ᾽ } ἁγνὸς ἄναξ πάσης γῆς σκῆπτρα κρατήσει |
| 170 | Primary εἰς αἰῶνας ἅπαντας {ὁ} τοὺς φθιμένους ἀνεγείρας |
| 171 | Primary τρεῖς Ῥώμῃ Ὕψιστος ἄγοι οἰκτρῇ τότε μοίρῃ, |
| 172 | Primary πάντες δ᾽ ἄνθρωποι μελάθροις ἰδίοισιν ὀλοῦνται· |
| 173 | Primary ἀλλ᾽ οὐ μὴ πεισθῶσιν, ὅ κεν πολὺ λώιον εἴη. |
| 174 | Primary ἀλλ᾽ ὁπόταν δὴ πᾶσιν ἐπαυξήσῃ κακὸν ἦμαρ |
| 175 | Primary λιμοῦ καὶ λοιμοῦ δυσανασχέτου ἠδὲ κυδοιμοῦ, |
| 176 | Primary καὶ τότ᾽ ἔπειτ᾽ αὖτις κρείων ἔμπροσθεν ὁ τλήμων |
| 177 | Primary συγκαλέσας βουλὴν βουλεύσεται, ὡς ἀπολέσσει ― |
| 178 | Primary ξηρὰ μὲν ἀνθήσουσιν ὁμοῦ φύλλοισι φανέντα· |
| 179 | Primary οὐράνιον δ᾽ ἔδαφος *δείξει* στερεᾷ ἐπὶ πέτρῃ |
| 180 | Primary ὄμβρον τε φλογμόν τε πολύπνοιάν τ᾽ ἐπὶ γαῖαν |
| 181 | Primary καὶ σπορίμων πληθὺν ἰῶν κατὰ γαῖαν ἅπασαν. ― |
| 182 | Primary ἀλλὰ πάλιν πράξουσιν ἀναιδέα θυμὸν ἔχοντες, |
| 183 | Primary οὐ μήνιμα θεοῦ δειδιότες οὐδ᾽ ἀνθρώπων, |
| 184 | Primary αἰδοίην προλιπόντες, ἀναιδείην ποθέοντες, |
| 185 | Primary ἀστασίῃσι τύραννοι ἁμαρτωλοί τε βίαιοι |
| 186 | Primary ψεῦσται ἀπιστόφιλοι κακοπράγμονες οὐδὲν ἀληθεῖς |
| 187 | Primary πιστολέται εὑρεσσίλογοι δύσφημα χέοντες· |
| 188 | Primary οὐδέ σφιν πλούτου κόρος ἔσσεται· ἀλλά τ᾽ ἀναιδῶς |
| 189 | Primary πλείονα συλλέξουσι· τυραννωθέντες ὀλοῦνται. |
| 190 | Primary ἄστρα πεσεῖται ἅπαντα θαλάσσης ἀντίπρῳρα, |
| 191 | Primary *πολλὰ μὲν ἑξῆς ἄστρα*, καὶ ἀκτινόεντα κομήτην |
| 192 | Primary ἄνθρωποι καλέουσι τὸν ἀστέρα, σῆμα πόνοιο |
| 193 | Primary πολλοῦ ἐπερχομένου, πολέμου καὶ δηιοτῆτος. |
| 194 | Primary μή ποτ᾽ ἐγὼ ζῴην, ὅτε ἡ μιαρὰ βασιλεύσει, |
| 195 | Primary ἀλλὰ τότ᾽, οὐρανίη ὅταν ἡ χάρις ἐμβασιλεύσῃ, |
| 196 | Primary καὶ ὁπόταν ἱερός ποτε παῖς *δολοφῶν* ἁπάντων |
| 197 | Primary ἐξολέσῃ δεσμοῖς ὀλοόφρονα βυσσὸν ἀνοίγων, |
| 198 | Primary αἰφνίδιος δὲ βροτοὺς ξύλινος δόμος ἀμφικαλύψῃ. |
| 199 | Primary ἀλλ᾽ ὅταν ἡ δεκάτη γενεὴ δόμον Ἄιδος εἴσω, |
| 200 | Primary θηλυτέρης μετέπειτα μέγα κράτος· ᾗ κακὰ πολλά |
| 201 | Primary αὐξήσει θεὸς αὐτός, ὅταν βασιληίδα τιμήν |
| 202 | Primary στεψαμένη τετύχῃ· σύμπαν δ᾽ ἔτος *ἥπιος* αἰών. |
| 203 | Primary ἠέλιος [μὲν] αὐχμηρὰ τρέχων νυκτερινὰ φαίνει, |
| 204 | Primary λείψει δ᾽ ἄστρα πόλον· πολλῇ δέ τε λαίλαπι θύων |
| 205 | Primary γαῖαν ἐρημώσει· νεκρῶν δ᾽ ἐπανάστασις ἔσται· |
| 206 | Primary καὶ χωλῶν δρόμος ὠκύτατος καὶ κωφὸς ἀκούσει |
| 207 | Primary καὶ τυφλοὶ βλέψουσι, λαλήσουσ᾽ οὐ λαλέοντες, |
| 208 | Primary καὶ κοινὸς πάντεσσι βίος καὶ πλοῦτος ἐσεῖται. |
| 209 | Primary γαῖα δ᾽ ἴση πάντων οὐ τείχεσιν οὐ περιφραγμοῖς |
| 210 | Primary διαμεριζομένη καρπούς ποτε πλείονας οἴσει, |
| 211 | Primary πηγὰς δὲ γλυκεροῦ οἴνου λευκοῦ τε γάλακτος |
| 212 | Primary καὶ μέλιτος δώσει.................. ― |
| 213 | Primary καὶ *κρίσιν* ἀθανάτοιο θεοῦ............ |
| 214 | Primary ἀλλ᾽ ὅταν ἀλλάξῃ θεὸς καιροὺς.......... |
| 215 | Primary χεῖμα θέρος ποιῶν, τότε θέσφατα { πάντα τελεῖται }. |
| 216 | Primary ἀλλ᾽ ὅτε κόσμος ὄλωλεν.............. ⁂ |
| 217 | Primary Ἱδρώσει δὲ χθών, κρίσεως σημεῖον ὅτ᾽ ἔσται. |
| 218 | Primary Ἥξει δ᾽ οὐρανόθεν βασιλεὺς αἰῶσιν ὁ μέλλων, |
| 219 | Primary Σάρκα παρὼν πᾶσαν κρῖναι καὶ κόσμον ἅπαντα. |
| 220 | Primary Ὄψονται δὲ θεὸν μέροπες πιστοὶ καὶ ἄπιστοι |
| 221 | Primary Ὕψιστον μετὰ τῶν ἁγίων ἐπὶ τέρμα χρόνοιο. |
| 222 | Primary Σαρκοφόρων δ᾽ ἀνδρῶν ψυχὰς ἐπὶ βήματι κρίνει, |
| 223 | Primary Χέρσος ὅταν ποτὲ κόσμος ὅλος καὶ ἄκανθα γένηται. |
| 224 | Primary Ῥίψουσιν δ᾽ εἴδωλα βροτοὶ καὶ πλοῦτον ἅπαντα. |
| 225 | Primary Ἐκκαύσει δὲ τὸ πῦρ γῆν οὐρανὸν ἠδὲ θάλασσαν |
| 226 | Primary Ἰχνεῦον, ῥήξει τε πύλας εἱρκτῆς Ἀίδαο. |
| 227 | Primary Σὰρξ τότε πᾶσα νεκρῶν ἐς ἐλευθέριον φάος ἥξει |
| 228 | Primary Τῶν ἁγίων· ἀνόμους δὲ τὸ πῦρ αἰῶσιν ἐλέγξει. |
| 229 | Primary Ὁππόσα τις πράξας ἔλαθεν, τότε πάντα λαλήσει· |
| 230 | Primary Στήθεα γὰρ ζοφόεντα θεὸς φωστῆρσιν ἀνοίξει. |
| 231 | Primary Θρῆνος δ᾽ ἐκ πάντων ἔσται καὶ βρυγμὸς ὀδόντων. |
| 232 | Primary Ἐκλείψει σέλας ἠελίου ἄστρων τε χορεῖαι. |
| 233 | Primary Οὐρανὸν εἱλίξει· μήνης δέ τε φέγγος ὀλεῖται. |
| 234 | Primary Ὑψώσει δὲ φάραγγας, ὀλεῖ δ᾽ ὑψώματα βουνῶν, |
| 235 | Primary Ὕψος δ᾽ οὐκέτι λυγρὸν ἐν ἀνθρώποισι φανεῖται. |
| 236 | Primary Ἶσα δ᾽ ὄρη πεδίοις ἔσται καὶ πᾶσα θάλασσα |
| 237 | Primary Οὐκέτι πλοῦν ἕξει. γῆ γὰρ φρυχθεῖσα τότ᾽ ἔσται |
| 238 | Primary Σὺν πηγαῖς, ποταμοί τε καχλάζοντες λείψουσιν. |
| 239 | Primary Σάλπιγξ δ᾽ οὐρανόθεν φωνὴν πολύθρηνον ἀφήσει |
| 240 | Primary Ὠρύουσα μύσος μελέων καὶ πήματα κόσμου. |
| 241 | Primary Ταρτάρεον δὲ χάος δείξει τότε γαῖα χανοῦσα. |
| 242 | Primary Ἥξουσιν δ᾽ ἐπὶ βῆμα θεοῦ βασιλῆος ἅπαντες. |
| 243 | Primary Ῥεύσει δ᾽ οὐρανόθεν ποταμὸς πυρὸς ἠδὲ θεείου. |
| 244 | Primary Σῆμα δέ τοι τότε πᾶσι βροτοῖς, σφρηγὶς ἐπίσημος |
| 245 | Primary Τὸ ξύλον ἐν πιστοῖς, τὸ κέρας τὸ ποθούμενον ἔσται, |
| 246 | Primary Ἀνδρῶν εὐσεβέων ζωή, πρόσκομμα δὲ κόσμου, |
| 247 | Primary Ὕδασι φωτίζον κλητοὺς ἐν δώδεκα πηγαῖς· |
| 248 | Primary Ῥάβδος ποιμαίνουσα σιδηρείη γε κρατήσει. |
| 249 | Primary Οὗτος ὁ νῦν προγραφεὶς ἐν ἀκροστιχίοις θεὸς ἡμῶν |
| 250 | Primary Σωτὴρ ἀθάνατος βασιλεύς, ὁ παθὼν ἕνεχ᾽ ἡμῶν. |
| 251 | Primary ὃν Μωσῆς ἐτύπωσε προτείνας ὠλένας ἁγνάς |
| 252 | Primary νικῶν τὸν Ἀμαλὴκ πίστει, ἵνα λαὸς ἐπιγνῷ |
| 253 | Primary ἐκλεκτὸν παρὰ πατρὶ θεῷ καὶ τίμιον εἶναι |
| 254 | Primary τὴν ῥάβδον Δαυὶδ καὶ τὸν λίθον, ὅνπερ ὑπέστη, |
| 255 | Primary εἰς ὃν ὁ πιστεύσας ζωὴν αἰώνιον ἕξει. |
| 256 | Primary οὐδὲ γὰρ ἐν δόξῃ, ἀλλ᾽ ὡς βροτὸς εἰς κτίσιν ἥξει |
| 257 | Primary οἰκτρὸς ἄτιμος ἄμορφος, ἵν᾽ οἰκτροῖς ἐλπίδα δώσει· |
| 258 | Primary καὶ φθαρτῇ σαρκὶ μορφὴν καὶ πίστιν ἀπίστοις |
| 259 | Primary οὐράνιον δώσει καὶ μορφώσει τὸν ἀπ᾽ ἀρχῆς |
| 260 | Primary ἄνθρωπον πλασθέντα θεοῦ παλάμαις ἁγίαισιν, |
| 261 | Primary ὅν τ᾽ ἐπλάνησεν ὄφις δολίως ἐπὶ μοῖραν ἀπελθεῖν |
| 262 | Primary τοῦ θανάτου γνῶσίν τε λαβεῖν ἀγαθοῦ τε κακοῦ τε, |
| 263 | Primary ὥστε θεὸν προλιπόντα λατρεύειν ἤθεσι θνητοῖς. |
| 264 | Primary αὐτὸν γὰρ πρώτιστα λαβὼν σύμβουλον ἀπ᾽ ἀρχῆς |
| 265 | Primary εἶπεν ὁ παντοκράτωρ· "ποιήσωμεν, τέκνον, ἄμφω |
| 266 | Primary εἰκόνος ἡμετέρης ἀπομαξάμενοι βροτὰ φῦλα· |
| 267 | Primary νῦν μὲν ἐγὼ χερσίν, σὺ δ᾽ ἔπειτα λόγῳ θεραπεύσεις |
| 268 | Primary μορφὴν ἡμετέρην, ἵνα κοινὸν ἀνάστεμα δῶμεν." |
| 269 | Primary γνώμης οὖν ταύτης μεμνημένος ἐς κτίσιν ἥξει |
| 270 | Primary ἀντίτυπον μίμημα φέρων εἰς παρθένον ἁγνήν, |
| 271 | Primary ὕδατι φωτίζων διὰ πρεσβυτέρων ἅμα χειρῶν, |
| 272 | Primary πάντα λόγῳ πράσσων, πᾶσαν δὲ νόσον θεραπεύων. |
| 273 | Primary τοὺς ἀνέμους παύσειε λόγῳ, στορέσει δὲ θάλασσαν |
| 274 | Primary μαινομένην ποσὶν εἰρήνης πίστει τε πατήσας. |
| 275 | Primary ἐκ δ᾽ ἄρτων ἅμα πέντε καὶ ἰχθύος εἰναλίοιο |
| 276 | Primary ἀνδρῶν χιλιάδας ἐν ἐρήμῳ πέντε κορέσσει, |
| 277 | Primary καὶ τὰ περισσεύοντα λαβὼν τότε κλάσματα πάντα |
| 278 | Primary δώδεκα πληρώσει κοφίνους εἰς ἐλπίδα λαῶν. |
| 279 | Primary καὶ καλέσει ψυχὰς μακάρων, οἰκτροὺς δ᾽ ἀγαπήσει, |
| 280 | Primary οἳ καλὸν ἀντὶ κακοῦ χλευαζόμενοι πρήξουσιν |
| 281 | Primary τυπτόμενοι μαστιζόμενοι πενίην ποθέοντες. |
| 282 | Primary πάντα νοῶν καὶ πάντα βλέπων καὶ πάντ᾽ ἐπακούων |
| 283 | Primary σπλάγχνα κατοπτεύσει καὶ γυμνώσει πρὸς ἔλεγχον· |
| 284 | Primary αὐτὸς γὰρ πάντων ἀκοὴ καὶ νοῦς καὶ ὅρασις |
| 285 | Primary καὶ λόγος ὁ κτίζων μορφάς, ᾧ πάνθ᾽ ὑπακούει, |
| 286 | Primary καὶ νέκυας σῴζων, πᾶσαν δὲ νόσον θεραπεύων. |
| 287 | Primary εἰς ἀνόμων χεῖρας καὶ ἀπίστων ὕστερον ἥξει, |
| 288 | Primary δώσουσιν δὲ θεῷ ῥαπίσματα χερσὶν ἀνάγνοις |
| 289 | Primary καὶ στόμασιν μιαροῖς ἐμπτύσματα φαρμακόεντα. |
| 290 | Primary δώσει δ᾽ εἰς μάστιγας ἀναπλώσας τότε νῶτον· |
| 291 | Primary [αὐτὸς γὰρ κόσμῳ παραδώσει παρθένον ἁγνήν.] |
| 292 | Primary καὶ κολαφιζόμενος σιγήσει, μή τις ἐπιγνῷ, |
| 293 | Primary τίς τίνος ὢν πόθεν ἦλθεν, ἵνα φθιμένοισι λαλήσει. |
| 294 | Primary καὶ στέφανον φορέσει τὸν ἀκάνθινον· ἐκ γὰρ ἀκανθῶν |
| 295 | Primary τὸ στέφος ἐκλεκτῶν αἰώνιόν ἐστιν ἄγαλμα. |
| 296 | Primary πλευρὰς νύξουσιν καλάμῳ διὰ τὸν νόμον αὐτῶν· |
| 297 | Primary ἐκ καλάμων γὰρ σειομένων ὑπὸ πνεύματος *ἄλλου* |
| 298 | Primary πρὸς κρίματα * ψυχῆς * ἐτράφη ὀργῆς καὶ ἀμοιβῆς. |
| 299 | Primary ἀλλ᾽ ὅτε ταῦτά γε πάντα τελειωθῇ ἅπερ εἶπον. |
| 300 | Primary εἰς αὐτὸν τότε πᾶς λύεται νόμος, ὅστις ἀπ᾽ ἀρχῆς |
| 301 | Primary δόγμασιν ἀνθρώποις ἐδόθη διὰ λαὸν ἀπειθῆ. |
| 302 | Primary ἐκπετάσει χεῖρας καὶ κόσμον ἅπαντα μετρήσει. |
| 303 | Primary εἰς δὲ τὸ βρῶμα χολὴν καὶ πιεῖν ὄξος ἔδωκαν· |
| 304 | Primary τῆς ἀφιλοξενίης ταύτην δείξουσι τράπεζαν. |
| 305 | Primary ναοῦ δὲ σχισθῇ τὸ πέτασμα καὶ ἤματι μέσσῳ |
| 306 | Primary νὺξ ἔσται σκοτόεσσα πελώριος ἐν τρισὶν ὥραις. |
| 307 | Primary οὐκέτι γὰρ κρυφίῳ τε νόμῳ ναῷ τε λατρεύειν |
| 308 | Primary φαντασίαις κόσμου κεκαλυμμένον αὖτις ἐδείχθη |
| 309 | Primary αὐθέντου καταβάντος ἐπὶ χθονὸς ἀενάοιο. |
| 310 | Primary ἥξει δ᾽ εἰς Ἀίδην ἀγγέλλων ἐλπίδα πᾶσιν |
| 311 | Primary τοῖς ἁγίοις, τέλος αἰώνων καὶ ἔσχατον ἦμαρ, |
| 312 | Primary καὶ θανάτου μοῖραν τελέσει τρίτον ἦμαρ ὑπνώσας· |
| 313 | Primary καὶ τότ᾽ ἀπὸ φθιμένων ἀναλύσας εἰς φάος ἥξει |
| 314 | Primary πρῶτος ἀναστάσεως κλητοῖς ἀρχὴν ὑποδείξας, |
| 315 | Primary ἀθανάτου πηγῆς ἀπολουσάμενος ὑδάτεσσιν |
| 316 | Primary τὰς πρότερον κακίας, ἵνα γεννηθέντες ἄνωθεν |
| 317 | Primary μηκέτι δουλεύσωσιν ἀθέσμοις ἤθεσι κόσμου. |
| 318 | Primary πρῶτα δὲ τοῖς ἰδίοις φανερῶς τότε κύριος ὀφθῇ |
| 319 | Primary σάρκινος, ὡς πάρος ἦν, χερσίν τε ποσίν τ᾽ ἐπιδείξει |
| 320 | Primary τέσσαρα τοῖς ἰδίοις ἴχνη πηχθέντα μέλεσσιν, |
| 321 | Primary ἀντολίην τε δύσιν τε μεσημβρίην τε καὶ ἄρκτον· |
| 322 | Primary τόσσαι γὰρ κόσμου βασιληίδες ἐκτελέσουσιν |
| 323 | Primary πρᾶξιν τὴν ἀθέμιστον ἐπίψογον εἰς τύπον ἡμῶν. |
| 324 | Primary χαῖρ᾽, ἁγνὴ θύγατερ Σιών, -. -. πολλὰ παθοῦσα· |
| 325 | Primary αὐτός σου βασιλεὺς ἐπιβὰς ἐπὶ πῶλον ἐσάγει |
| 326 | Primary *πρᾶος πᾶσι φανείς, ἵνα τὸ(ν) ζυγὸν ἡμῶν* |
| 327 | Primary δοῦλον δυσβάστακτον ἐπ᾽ αὐχένι κείμενον ἄρῃ |
| 328 | Primary καὶ θεσμοὺς ἀθέους λύσῃ δεσμούς τε βιαίους. |
| 329 | Primary αὐτόν σου γίνωσκε θεὸν θεοῦ υἱὸν ἐόντα· |
| 330 | Primary τοῦτον δοξάζουσα καὶ ἐν στέρνοισιν ἔχουσα |
| 331 | Primary ἐκ ψυχῆς ἀγάπα καὶ τοὔνομα βάστασον αὐτοῦ. |
| 332 | Primary τοὺς προτέρους δ᾽ ἀπόθου καὶ λοῦσον ἀφ᾽ αἵματος αὐτοῦ· |
| 333 | Primary οὐ γὰρ σαῖς οἴμαις ἱλάσκεται οὐδὲ λιταῖσιν, |
| 334 | Primary οὐ θυσίαις προσέχει φθαρταῖς ἄφθαρτος ὑπάρχων· |
| 335 | Primary *ἀλλ᾽ ὕμνον στομάτων συνετῶν τότε ἐκπροφέροντες* |
| 336 | Primary γνῶθι, τίς ἔσθ᾽ οὗτος, καὶ τὸν γενετῆρα τότ᾽ ὄψει. ⁂ |
| 337 | Primary χηρεύσει τότε πάντα χρόνῳ στοιχεῖα τὰ κόσμου, |
| 338 | Primary ἀὴρ γαῖα θάλασσα φάος πυρὸς αἰθομένοιο· |
| 339 | Primary καὶ πόλος οὐράνιος καὶ νὺξ καὶ ἤματα πάντα |
| 340 | Primary εἰς ἓν συρρήξουσι καὶ εἰς μορφὴν πανέρημον. |
| 341 | Primary ἄστρα γὰρ οὐρανόθεν φωστήρων πάντα πεσεῖται. |
| 342 | Primary κοὐκέτι δὴ πτήσονται ἐπ᾽ ἀέρος εὔπτεροι ὄρνεις |
| 343 | Primary οὐδὲ βάσις γαίης· θῆρες γὰρ ἅπαντες ὀλοῦνται. |
| 344 | Primary κοὐκ ἀνδρῶν φωναί, οὐ θηρῶν, οὐ πετεηνῶν. |
| 345 | Primary κόσμος ἄτακτος ἐὼν οὐ χρήσιμον ἦχον ἀκούσει· |
| 346 | Primary ἠχήσει δὲ βαθὺς πόντος μέγαν ἦχον ἀπειλῆς |
| 347 | Primary ζῷά τε νηκτὰ τρέμοντα θαλάσσης πάντα θανεῖται· |
| 348 | Primary καὶ ναῦς φόρτον ἔχουσ᾽ ἐπὶ κύμασιν οὐκέτι πλεύσει. |
| 349 | Primary μυκήσει δὲ χθὼν αἱμασσομένη πολέμοισιν· |
| 350 | Primary πᾶσαι δ᾽ ἀνθρώπων ψυχαὶ βρύξουσιν ὀδοῦσιν |
| 351 | Primary [τῶν ἀνόμων *ψυχῶν* ὀλολυγμοῖσίν τε φόβῳ τε,] |
| 352 | Primary τηκόμεναι δίψει λιμῷ λοιμῷ τε φόνοις τε |
| 353 | Primary καὶ καλέσουσι καλὸν τὸ θανεῖν καὶ φεύξετ᾽ ἀπ᾽ αὐτῶν· |
| 354 | Primary οὐκέτι γὰρ θάνατος κείνους, οὐ νὺξ ἀναπαύσει· |
| 355 | Primary πολλὰ δ᾽ ἐρωτήσουσι μάτην θεὸν ὑψιμέδοντα, |
| 356 | Primary καὶ τότ᾽ ἀποστρέψει φανερῶς τὸ πρόσωπον ἀπ᾽ αὐτῶν. |
| 357 | Primary ἑπτὰ γὰρ αἰώνων μετανοίας ἤματ᾽ ἔδωκεν |
| 358 | Primary ἀνδράσι πλαζομένοις διὰ χειρῶν παρθένου ἁγνῆς. |
| 359 | Primary αὐτός μοι τάδε πάντα θεὸς νόῳ ἐγκατέδειξεν |
| 360 | Primary καὶ δι᾽ ἐμοῦ στόματος τὰ λελεγμένα πάντα τελέσσει· |
| 361 | Primary Οἶδα δ᾽ ἐγὼ ψάμμου τ᾽ ἀριθμὸν καὶ μέτρα θαλάσσης, |
| 362 | Primary οἶδα μυχοὺς γαίης καὶ Τάρταρον ἠερόεντα, |
| 363 | Primary οἶδ᾽ ἀριθμοὺς ἄστρων καὶ δένδρεα καὶ πόσα φῦλα |
| 364 | Primary τετραπόδων νηκτῶν τε καὶ ὀρνίθων πετεηνῶν |
| 365 | Primary καὶ μερόπων ὄντων τε καὶ ἐσσομένων νεκύων τε· |
| 366 | Primary αὐτὸς γὰρ μορφὰς καὶ νοῦν ἀνδρῶν ἐτύπωσα, |
| 367 | Primary καὶ λόγον ὀρθὸν ἔδωκα ἐπιστήμην τ᾽ ἐδίδαξα, |
| 368 | Primary ὀφθαλμοὺς ὁ πλάσας καὶ ὦτα, βλέπων καὶ ἀκούων |
| 369 | Primary καὶ πᾶν ἐνθύμημα νοῶν καὶ πᾶσι συνίστωρ |
| 370 | Primary ἐντὸς ἐὼν σιγῶ καὶ ὕστερον αὐτὸς ἐλέγξω |
| 371 | Primary [κἀκπράξων -.-. ὅσσα λαθών γε βροτῶν τις ἔπραξεν, |
| 372 | Primary *ἐλθὼν καὶ* ἐπὶ βῆμα θεοῦ θνητοῖσι λαλήσων.]· |
| 373 | Primary καὶ κωφοῦ ξυνίημι καὶ οὐ λαλέοντος ἀκούω |
| 374 | Primary καὶ πόσον ἐστὶ τὸ πᾶν ἀπὸ γῆς εἰς οὐρανὸν ὕψος, |
| 375 | Primary ἀρχὴν καὶ τέλος οἶδα, ὃς οὐρανὸν ἔκτισα καὶ γῆν. |
| 376 | Primary [πάντα γὰρ ἐξ αὐτοῦ, τὰ ἀπ᾽ ἀρχῆς εἰς τέλος οἶδε.] |
| 377 | Primary μοῦνος γὰρ θεός εἰμι καὶ οὐκ ἔστιν θεὸς ἄλλος. |
| 378 | Primary εἰκόνα θεσπίζουσιν ἐμὴν πλασθεῖσαν ἀφ᾽ ὕλης, |
| 379 | Primary χερσί τε μορφώσαντες ἑαῖς εἴδωλον ἄναυδον |
| 380 | Primary δοξάζουσι λιταῖς καὶ θρησκείῃσιν ἀνάγνοις. |
| 381 | Primary τὸν κτίστην προλιπόντες ἀσελγείαις ἐλάτρευσαν |
| 382 | Primary *πάντες δ᾽ αὐτοῦ* ἔχοντες ἀχρήστοις δῶρα διδοῦσιν |
| 383 | Primary *καὶ ὡς ἐμὰς * τιμὰς τάδε χρήσιμα πάντα δοκοῦσιν |
| 384 | Primary θοίνῃ κνισσοῦντες, ὡς τοῖς ἰδίοις νεκύεσσιν. |
| 385 | Primary σάρκας γὰρ καίουσι καὶ ὀστέα μυελόεντα |
| 386 | Primary θύοντες βωμοῖς καὶ δαίμοσιν αἷμα χέουσιν |
| 387 | Primary καὶ λύχνους ἅπτουσιν ἐμοὶ τῷ φῶτα διδόντι, |
| 388 | Primary χὡς διψῶντι θεῷ θνητοὶ σπένδουσι τὸν οἶνον |
| 389 | Primary εἰς οὐδὲν μεθύοντες ἐπ᾽ εἰδώλοισιν ἀχρήστοις. |
| 390 | Primary οὐ χρῄζω θυσίης ἢ σπονδῆς ὑμετέρηφιν, |
| 391 | Primary οὐ κνίσσης μιαρῆς, οὐχ αἵματος ἐχθίστοιο. |
| 392 | Primary ταῦτα γὰρ ἐς μνήμην βασιλήων ἠδὲ τυράννων |
| 393 | Primary δαίμοσι ποιήσουσι νεκροῖς, ὡς οὐρανίοισιν, |
| 394 | Primary θρησκείαν ἄθεον καὶ ὀλέθριον ἐκτελέοντες. |
| 395 | Primary καὶ καλέουσι θεοὺς ἄθεοι τὰς εἰκόνας αὐτῶν |
| 396 | Primary τὸν κτίστην προλιπόντες, ἀπ᾽ αὐτῶν ἐλπίδα πᾶσαν |
| 397 | Primary καὶ ζωὴν νομίσαντες ἔχειν, κωφοῖς καὶ ἀναύδοις |
| 398 | Primary ἐς τὸ κακὸν πιστοὶ ἀγαθὸν τέλος ἀγνοιοῦσιν. |
| 399 | Primary αὐτὸς ὁδοὺς προέθηκα δύο, ζωῆς θανάτου τε, |
| 400 | Primary καὶ γνώμῃ προέθηκ᾽ ἀγαθὴν ζωὴν προελέσθαι· |
| 401 | Primary αὐτοὶ δ᾽ ἐς θάνατον καὶ πῦρ αἰώνιον ᾖξαν. |
| 402 | Primary εἰκών ἐστ᾽ ἄνθρωπος ἐμὴ λόγον ὀρθὸν ἔχουσα |
| 403 | Primary τούτῳ θὲς καθαρὰν καὶ ἀναίμακτον σὺ τράπεζαν |
| 404 | Primary πληρώσας ἀγαθῶν καὶ δὸς πεινῶντι τὸν ἄρτον |
| 405 | Primary καὶ διψῶντι ποτὸν καὶ εἵματα σώματι γυμνῷ |
| 406 | Primary ἐκ μόχθων ἰδίων πορίσας ἁγναῖς παλάμῃσιν. |
| 407 | Primary θλιβόμενον κτῆσαι καὶ τῷ κάμνοντι παράστα |
| 408 | Primary καὶ ζῶσαν θυσίαν ἐμοὶ τῷ ζῶντι πόριζε, |
| 409 | Primary σπείρων νῦν ἐς ὕδωρ, ἵνα σοι κἀγώ ποτε δώσω |
| 410 | Primary καρποὺς ἀθανάτους, καὶ φῶς αἰώνιον ἕξεις |
| 411 | Primary καὶ ζωὴν ἀμάραντον, ὅταν πυρὶ πάντας ἐλέγξω. |
| 412 | Primary χωνεύσω γὰρ ἅπαντα καὶ εἰς καθαρὸν διαλέξω, |
| 413 | Primary οὐρανὸν εἱλίξω, γαίης κευθμῶνας ἀνοίξω, |
| 414 | Primary καὶ τότ᾽ ἀναστήσω νεκροὺς μοῖραν ἀναλύσας |
| 415 | Primary καὶ θανάτου κέντρον, καὶ ὕστερον εἰς κρίσιν ἥξω |
| 416 | Primary κρίνων εὐσεβέων καὶ δυσσεβέων βίον ἀνδρῶν· |
| 417 | Primary καὶ κριὸν κριῷ καὶ ποιμένι ποιμένα θήσω |
| 418 | Primary καὶ μόσχον μόσχῳ πέλας ἀλλήλων ἐς ἔλεγχον· |
| 419 | Primary οἵτινες ὑψώθησαν ἐλεγχόμενοι ὑπ᾽ ἐλέγχῳ |
| 420 | Primary καὶ στόμα παντὸς ἔφραξαν, ἵν᾽ αὐτοὶ ζηλώσαντες |
| 421 | Primary τοὺς ὁσίως πράσσοντας ἴσως καταδουλώσουσιν |
| 422 | Primary σιγᾶν προστάσσοντες, ἐπειγόμενοι διὰ κέρδος. |
| 423 | Primary *καὶ δόκιμοι παρ᾽ ἐμοὶ τότε χωρήσουσιν ἅπαντες*, |
| 424 | Primary κοὐκέτι λοιπὸν ἐρεῖς λυπούμενος, "αὔριον ἔσται", |
| 425 | Primary οὐκ "ἐχθὲς γέγονεν"· οὐκ ἤματα πολλὰ μεριμνᾷς, |
| 426 | Primary οὐκ ἔαρ, οὐ χειμῶν᾽, οὔτ᾽ ἂρ θέρος, οὐ μετόπωρον, |
| 427 | Primary οὐ δύσιν ἀντολίην· ποιήσω γὰρ μακρὸν ἦμαρ. |
| 428 | Primary εἰς δ᾽ αἰῶνα τὸ φῶς -.-. -- πεποθημένον ἔσται. ― |
| 429 | Primary αὐτογένητος, ἄχραντος, ἀένναος ἀίδιός τε, |
| 430 | Primary *οὐρανοῦχος ἰσχύι μετρῶν* πυρόεσσαν αὐτμήν |
| 431 | Primary καὶ πατάγου σκῆπτρον κατέχει σὺν ἀπηνέι πυρσῷ, |
| 432 | Primary πρηΰνει τε βαρυκτυπέων δουπήματα βροντῶν, |
| 433 | Primary γῆν κλονέων κατέχει ῥοιζήματα...... |
| 434 | Primary κἀστεροπῶν μάστιγας ἀπαμβλύνει πυροφεγγεῖς |
| 435 | Primary ὄμβρων δ᾽ ἄσπετα χεύματ᾽ ἔχει ῥιπάς τε χαλάζης |
| 436 | Primary κρυμαλέης νεφελῶν τε βολὰς καὶ χείματος ὁρμάς. ― |
| 437 | Primary αὐτοὶ μὲν γὰρ ἕκαστα νόῳ διατεκμαίρονται, |
| 438 | Primary ὅσσα περ αὐτῷ σοι δοκέει πρήσσειν τ᾽ ἐπινεύεις. ― |
| 439 | Primary *σῷ παιδὶ πρὸ κτίσεως πάσης στέρνοις ἴσοισι πεφυκώς* |
| 440 | Primary σύμβουλος, πλάστης μερόπων κτίστης τε βίοιο. |
| 441 | Primary ὃν πρώτῃ στόματος γλυκερῇ προσφθέγξαο φωνῇ· |
| 442 | Primary "ποιήσωμεν ἰδοὺ πανομοίιον ἀνέρα μορφῇ |
| 443 | Primary ἡμετέρῃ καὶ δῶμεν ἔχειν ζωαρκέα πνοιήν· |
| 444 | Primary ᾧ θνητῷ περ ἐόντι τὰ κοσμικὰ πάντα λατρεύσει |
| 445 | Primary καὶ χοικῷ πλασθέντι τὰ πάνθ᾽ ὑποτάξομεν αὐτῷ". |
| 446 | Primary ταῦτα δ᾽ ἔφησθα Λόγῳ, τῇ σῇ φρενὶ πάντα δ᾽ ἐτύχθη· |
| 447 | Primary πάντα δ᾽ ὁμοῦ στοιχεῖα κελεύσματι πείθετο τῷ σῷ, |
| 448 | Primary καὶ κτίσις ἀίδιος συνετάσσετο πλάσματι θνητῷ, |
| 449 | Primary οὐρανὸς ἀὴρ πῦρ χθὼν γῆ καὶ χεῦμα θαλάσσης, |
| 450 | Primary ἠέλιος μήνη, χορὸς ἄστρων *οὔρεα...* |
| 451 | Primary εὐφρόνη ἡμέρη ὕπνος ἔγερσις πνεῦμα καὶ ὁρμή, |
| 452 | Primary ψυχὴ καὶ σύνεσις, τέχνη φωνή τε καὶ ἀλκή |
| 453 | Primary ζῴων τ᾽ ἄγρια φῦλα τὰ νηκτῶν καὶ πετεηνῶν |
| 454 | Primary πεζῶν τ᾽ ἀμφιβίων τε καὶ ἑρπυστῶν διφυῶν τε· |
| 455 | Primary πάντα γὰρ αὐτός σοι συνετάσσετο σῇ ὑπ᾽ ἀγωγῇ. |
| 456 | Primary ὑστατίοις τε χρόνοις χθόν᾽ ἀμείψατο καὶ βραχὺς ἐλθών |
| 457 | Primary παρθένου ἐκ Μαρίας λαγόνων ἀνέτειλε νέον φῶς, |
| 458 | Primary οὐρανόθεν δὲ μολὼν βροτέην ἐνεδύσατο μορφήν. |
| 459 | Primary πρῶτα μὲν οὖν Γαβριὴλ σθεναρὸν δέμας ἁγνὸν ἐδείχθη· |
| 460 | Primary δεύτερα καὶ κούρην ἀρχάγγελος ἔννεπε φωνῇ· |
| 461 | Primary "δέξαι ἀχράντοισι θεὸν σοῖς, παρθένε, κόλποις". |
| 462 | Primary ὣς εἰπὼν ἔμπνευσε θεὸς χάριν *ἠδ᾽ αἰεὶ* κούρῃ· |
| 463 | Primary τὴν δ᾽ ἄρα τάρβος ὁμοῦ θάμβος θ᾽ ἕλεν εἰσαΐουσαν, |
| 464 | Primary στῆ δ᾽ ἄρ᾽ ὑποτρομέουσα· νόος δέ οἱ ἐπτοίητο |
| 465 | Primary παλλομένης κραδίης ὑπ᾽ ἀγνώστοισιν ἀκουαῖς. |
| 466 | Primary αὖτις δ᾽ εὐφράνθη καὶ ἰάνθη κέαρ αὐδῇ, |
| 467 | Primary κουρίδιον δ᾽ ἐγέλασσεν, ἑὴν δ᾽ ἐρύθηνε παρειήν |
| 468 | Primary χάρματι τερπομένη καὶ θελγομένη φρένας αἰδοῖ, |
| 469 | Primary καί οἱ θάρσος ἐπῆλθεν. ἔπος δ᾽ εἰσέπτατο νηδύν, |
| 470 | Primary σαρκωθὲν δὲ χρόνῳ καὶ γαστέρι ζῳογονηθέν |
| 471 | Primary ἐπλάσθη βροτέην ἰδέην καὶ κοῦρος ἐτύχθη |
| 472 | Primary παρθενικοῖς τοκετοῖς· τόδε γὰρ μέγα θαῦμα βροτοῖσιν, |
| 473 | Primary ἀλλ᾽ οὐδὲν μέγα θαῦμα θεῷ πατρὶ καὶ θεῷ υἱῷ. |
| 474 | Primary τικτόμενον δὲ βρέφος ποτὶ δ᾽ ἔπτατο γηθοσύνη χθών, |
| 475 | Primary οὐράνιος δ᾽ ἐγέλασσε θρόνος καὶ ἀγάλλετο κόσμος. |
| 476 | Primary καινοφαὴς δὲ μάγοισι σεβάσθη θέσφατος ἀστήρ, |
| 477 | Primary σπειρωθὲν δὲ βρέφος δείχθη θεοπειθέσι φάτνῃ |
| 478 | Primary βουπελάταις τε καὶ αἰγονόμοις καὶ ποιμέσιν ἀρνῶν· |
| 479 | Primary καὶ Λόγου ἡ Βηθλεὲμ πατρὶς θεόκλητος ἐλέχθη. ⁂ |
| 480 | Primary ἐν κραδίῃ τε ταπεινοφρονεῖν, πικρὰ τέρματα μισεῖν |
| 481 | Primary καὶ πάντων ἀγαπᾶν τὸν πλησίον ὥσπερ ἑαυτόν· |
| 482 | Primary καὶ θεὸν ἐκ ψυχῆς φιλέειν, αὐτῷ δὲ λατρεύειν. |
| 483 | Primary τοὔνεκ᾽ ἄρ᾽ ἡμεῖς καὶ ὁσίης Χριστοῖο γενέθλης |
| 484 | Primary οὐρανίης πεφυῶτες ἐπικλεόμεσθα σύναιμοι |
| 485 | Primary μνῆστιν ἐυφροσύνης ἐπὶ θρησκείῃσιν ἔχοντες, |
| 486 | Primary εὐσεβίης τε καὶ ἀτρεκίης βαίνοντες ἀταρπούς. |
| 487 | Primary οὔποτε πρὸς νηῶν ἀδύτοις ἐώμεσθα πελάζειν, |
| 488 | Primary οὐ ξοάνοις σπένδειν, οὐδ᾽ εὐχωλῇσι γεραίρειν, |
| 489 | Primary οὐδ᾽ ὀδμαῖς ἀνθῶν πολυτερπέσιν οὐδὲ μὲν αὐγαῖς |
| 490 | Primary λαμπτήρων, ἀτὰρ οὐδ᾽ *ἄρα τοὺς* ἀναθήμασι κοσμεῖν, |
| 491 | Primary οὐ λιβάνου ἀτμοῖσιν ἀνιεῖσιν φλόγα *βωμόν*· |
| 492 | Primary οὐδ᾽ ἐπὶ ταυροθύτοις μηλόσφαγα αἵματα λοιβαῖς |
| 493 | Primary λυτροχαρεῖς πέμπειν, χθονίας μειλίγματα ποινῆς· |
| 494 | Primary οὐδ᾽ ἀπὸ σαρκοβόροιο πυρῆς κνισσώδεϊ καπνῷ |
| 495 | Primary καὶ μιαραῖς πνοιῇσι μιαίνειν αἰθέρος αὐγήν· |
| 496 | Primary ἀλλ᾽ ἁγναῖς πραπίδεσσι γεγηθότες εὔφρονι θυμῷ |
| 497 | Primary ἀφνειαῖς τ᾽ ἀγάπῃσι καὶ εὐδώροις παλάμῃσιν |
| 498 | Primary μειλιχίοις ψαλμοῖσι θεοπρεπέεσσί τε μολπαῖς |
| 499 | Primary ἄφθιτον ἐξυμνεῖν σε καὶ ἄψευστον κελόμεσθα, |
| 500 | Primary παγγενετῆρα θεόν, πινυτόφρονα......... ⁂ |