Reader
Reader | Homeric Hymns, Hymn 3
Homeric Hymns
Homeric tradition
Text
Position
Line 1 of 552
Waypoints
| Line Ref | Hugh G. Evelyn-White | Ancient Greek |
|---|---|
| 1 | Primary μνήσομαι οὐδὲ λάθωμαι Ἀπόλλωνος ἑκάτοιο, |
| 2 | Primary ὅντε θεοὶ κατὰ δῶμα Διὸς τρομέουσιν ἰόντα· |
| 3 | Primary καί ῥά τʼ ἀναΐσσουσιν ἐπὶ σχεδὸν ἐρχομένοιο |
| 4 | Primary πάντες ἀφʼ ἑδράων, ὅτε φαίδιμα τόξα τιταίνει. |
| 5 | Primary Λητὼ δʼ οἴη μίμνε παραὶ Διὶ τερπικεραύνῳ, |
| 6 | Primary ἥ ῥα βιόν τʼ ἐχάλασσε καὶ ἐκλήισσε φαρέτρην, |
| 7 | Primary καί οἱ ἀπʼ ἰφθίμων ὤμων χείρεσσιν ἑλοῦσα |
| 8 | Primary τόξα κατεκρέμασε πρὸς κίονα πατρὸς ἑοῖο |
| 9 | Primary πασσάλου ἐκ χρυσέου· τὸν δʼ ἐς θρόνον εἷσεν ἄγουσα. |
| 10 | Primary τῷ δʼ ἄρα νέκταρ ἔδωκε πατὴρ δέπαϊ χρυσείῳ |
| 11 | Primary δεικνύμενος φίλον υἱόν· ἔπειτα δὲ δαίμονες ἄλλοι |
| 12 | Primary ἔνθα καθίζουσιν· χαίρει δέ τε πότνια Λητώ, |
| 13 | Primary οὕνεκα τοξοφόρον καὶ καρτερὸν υἱὸν ἔτικτε. |
| 14 | Primary χαῖρε, μάκαιρʼ ὦ Λητοῖ, ἐπεὶ τέκες ἀγλαὰ τέκνα, |
| 15 | Primary Ἀπόλλωνά τʼ ἄνακτα καὶ Ἄρτεμιν ἰοχέαιραν, |
| 16 | Primary τὴν μὲν ἐν Ὀρτυγίῃ, τὸν δὲ κραναῇ ἐνὶ Δήλῳ, |
| 17 | Primary κεκλιμένη πρὸς μακρὸν ὄρος καὶ Κύνθιον ὄχθον, |
| 18 | Primary ἀγχοτάτω φοίνικος, ἐπʼ Ἰνωποῖο ῥεέθροις. |
| 19 | Primary πῶς τʼ ἄρ σʼ ὑμνήσω πάντως εὔυμνον ἐόντα; |
| 20 | Primary πάντη γάρ τοι, Φοῖβε, νόμοι βεβλήατʼ ἀοιδῆς, |
| 21 | Primary ἠμὲν ἀνʼ ἤπειρον πορτιτρόφον ἠδʼ ἀνὰ νήσους· |
| 22 | Primary πᾶσαι δὲ σκοπιαί τοι ἅδον καὶ πρώονες ἄκροι |
| 23 | Primary ὑψηλῶν ὀρέων ποταμοί θʼ ἅλαδε προρέοντες |
| 24 | Primary ἀκταί τʼ εἰς ἅλα κεκλιμέναι λιμένες τε θαλάσσης. |
| 25 | Primary ἦ ὥς σε πρῶτον Λητὼ τέκε, χάρμα βροτοῖσι, |
| 26 | Primary κλινθεῖσα πρὸς Κύνθου ὄρος κραναῇ ἐνὶ νήσῳ, |
| 27 | Primary Δήλῳ ἐν ἀμφιρύτῃ; ἑκάτερθε δὲ κῦμα κελαινὸν |
| 28 | Primary ἐξῄει χέρσονδε λιγυπνοίοις ἀνέμοισιν, |
| 29 | Primary ἔνθεν ἀπορνύμενος πᾶσι θνητοῖσιν ἀνάσσεις. |
| 30 | Primary ὅσσους Κρήτη τʼ ἐντὸς ἔχει καὶ δῆμος Ἀθηνῶν |
| 31 | Primary νῆσός τʼ Αἰγίνη ναυσικλειτή τʼ Εὔβοια, |
| 32 | Primary Αἰγαί, Πειρεσίαι τε καὶ ἀγχιάλη Πεπάρηθος |
| 33 | Primary Θρηίκιός τʼ Ἀθόως καὶ Πηλίου ἄκρα κάρηνα |
| 34 | Primary Θρηικίη τε Σάμος Ἴδης τʼ ὄρεα σκιόεντα, |
| 35 | Primary Σκῦρος καὶ Φώκαια καὶ Αὐτοκάνης ὄρος αἰπύ, |
| 36 | Primary Ἴμβρος τʼ εὐκτιμένη καὶ Λῆμνος ἀμιχθαλόεσσα |
| 37 | Primary Λέσβος τʼ ἠγαθέη, Μάκαρος ἕδος Αἰολίωνος, |
| 38 | Primary καὶ Χίος, ἣ νήσων λιπαρωτάτη εἰν ἁλὶ κεῖται, |
| 39 | Primary παιπαλόεις τε Μίμας καὶ Κωρύκου ἄκρα κάρηνα |
| 40 | Primary καὶ Κλάρος αἰγλήεσσα καὶ Αἰσαγέης ὄρος αἰπὺ |
| 41 | Primary καὶ Σάμος ὑδρηλὴ Μυκάλης τʼ αἰπεινὰ κάρηνα |
| 42 | Primary Μίλητός τε Κόως τε, πόλις Μερόπων ἀνθρώπων, |
| 43 | Primary καὶ Κνίδος αἰπεινὴ καὶ Κάρπαθος ἠνεμόεσσα |
| 44 | Primary Νάξος τʼ ἠδὲ Πάρος Ῥήναιά τε πετρήεσσα, |
| 45 | Primary τόσσον ἔπʼ ὠδίνουσα Ἑκηβόλον ἵκετο Λητώ, |
| 46 | Primary εἴ τίς οἱ γαιέων υἱεῖ θέλοι οἰκία θέσθαι. |
| 47 | Primary αἳ δὲ μάλʼ ἐτρόμεον καὶ ἐδείδισαν, οὐδέ τις ἔτλη |
| 48 | Primary Φοῖβον δέξασθαι, καὶ πιοτέρη περ ἐοῦσα· |
| 49 | Primary πρίν γʼ ὅτε δή ῥʼ ἐπὶ Δήλου ἐβήσατο πότνια Λητὼ |
| 50 | Primary καί μιν ἀνειρομένη ἔπεα πτερόεντα προσηύδα· |
| 51 | Primary δῆλʼ, εἰ γάρ κʼ ἐθέλοις ἕδος ἔμμεναι υἷος ἐμοῖο, |
| 52 | Primary Φοίβου Ἀπόλλωνος, θέσθαι τʼ ἔνι πίονα νηόν, — |
| 53 | Primary ἄλλος δʼ οὔτις σεῖό ποθʼ ἅψεται, οὐδέ σε λήσει· |
| 54 | Primary οὐδʼ εὔβων σέ γʼ ἔσεσθαι ὀίομαι οὔτʼ εὔμηλον, |
| 55 | Primary οὐδὲ τρύγην οἴσεις οὔτʼ ἂρ φυτὰ μυρία φύσεις. |
| 56 | Primary εἰ δέ κʼ Ἀπόλλωνος ἑκαέργου νηὸν ἔχῃσθα, |
| 57 | Primary ἄνθρωποί τοι πάντες ἀγινήσουσʼ ἑκατόμβας |
| 58 | Primary ἐνθάδʼ ἀγειρόμενοι, κνίσση δέ τοι ἄσπετος αἰεὶ |
| 59 | Primary δημοῦ ἀναΐξει βοσκήσεις θʼ οἵ κέ σʼ ἔχωσι |
| 60 | Primary χειρὸς ἀπʼ ἀλλοτρίης, ἐπεὶ οὔ τοι πῖαρ ὑπʼ οὖδας. |
| 61 | Primary ὣς φάτο· χαῖρε δὲ Δῆλος, ἀμειβομένη δὲ προσηύδα· |
| 62 | Primary Λητοῖ, κυδίστη θύγατερ μεγάλου Κοίοιο, |
| 63 | Primary ἀσπασίη κεν ἐγώ γε γονὴν ἑκάτοιο ἄνακτος |
| 64 | Primary δεξαίμην· αἰνῶς γὰρ ἐτήτυμόν εἰμι δυσηχὴς |
| 65 | Primary ἀνδράσιν· ὧδε δέ κεν περιτιμήεσσα γενοίμην. |
| 66 | Primary ἀλλὰ τόδε τρομέω, Λητοῖ, ἔπος, οὐδέ σε κεύσω· |
| 67 | Primary λίην γάρ τινά φασιν ἀτάσθαλον Ἀπόλλωνα |
| 68 | Primary ἔσσεσθαι, μέγα δὲ πρυτανευσέμεν ἀθανάτοισι |
| 69 | Primary καὶ θνητοῖσι βροτοῖσιν ἐπὶ ζείδωρον ἄρουραν. |
| 70 | Primary τῷ ῥʼ αἰνῶς δείδοικα κατὰ φρένα καὶ κατὰ θυμόν, |
| 71 | Primary μή, ὁπότʼ ἂν τὸ πρῶτον ἴδῃ φάος ἠελίοιο, |
| 72 | Primary νῆσον ἀτιμήσας, ἐπεὶ ἦ κραναήπεδός εἰμι, |
| 73 | Primary ποσσὶ καταστρέψας ὤσῃ ἁλὸς ἐν πελάγεσσιν, |
| 74 | Primary ἔνθʼ ἐμὲ μὲν μέγα κῦμα κατὰ κρατὸς ἅλις αἰεὶ |
| 75 | Primary κλύσσει· ὃ δʼ ἄλλην γαῖαν ἀφίξεται, ἥ κεν ἅδῃ οἱ, |
| 76 | Primary τεύξασθαι νηόν τε καὶ ἄλσεα δενδρήεντα· |
| 77 | Primary πουλύποδες δʼ ἐν ἐμοὶ θαλάμας φῶκαί τε μέλαιναι |
| 78 | Primary οἰκία ποιήσονται ἀκηδέα, χήτεϊ λαῶν. |
| 79 | Primary ἀλλʼ εἴ μοι τλαίης γε, θεά, μέγαν ὅρκον ὀμόσσαι, |
| 80 | Primary ἐνθάδε μιν πρῶτον τεύξειν περικαλλέα νηὸν |
| 81 | Primary ἔμμεναι ἀνθρώπων χρηστήριον, αὐτὰρ ἔπειτα |
| 81a | Primary [ τεύξασθαι νηούς τε καὶ ἄλσεα δενδρηέντα ] |
| 82 | Primary πάντας ἐπʼ ἀνθρώπους, ἐπεὶ ἦ πολυώνυμος ἔσται. |
| 83 | Primary ὣς ἄρ ἔφη· Λητὼ δὲ θεῶν μέγαν ὅρκον ὄμοσσε· |
| 84 | Primary ἴστω νῦν τάδε Γαῖα καὶ Οὐρανὸς εὐρὺς ὕπερθεν |
| 85 | Primary καὶ τὸ κατειβόμενον Στυγὸς ὕδωρ, ὅστε μέγιστος |
| 86 | Primary ὅρκος δεινότατός τε πέλει μακάρεσσι θεοῖσιν· |
| 87 | Primary ἦ μὴν Φοίβου τῇδε θυώδης ἔσσεται αἰεὶ |
| 88 | Primary βωμὸς καὶ τέμενος, τίσει δέ σέ γʼ ἔξοχα πάντων. |
| 89 | Primary αὐτὰρ ἐπεί ῥʼ ὄμοσέν τε τελεύτησέν τε τὸν ὅρκον, |
| 90 | Primary Δῆλος μὲν μάλα χαῖρε γονῇ ἑκάτοιο ἄνακτος· |
| 91 | Primary Λητὼ δʼ ἐννῆμάρ τε καὶ ἐννέα νύκτας ἀέλπτοις |
| 92 | Primary ὠδίνεσσι πέπαρτο. θεαὶ δʼ ἔσαν ἔνδοθι πᾶσαι, |
| 93 | Primary ὅσσαι ἄρισται ἔασι, Διώνη τε Ῥείη τε |
| 94 | Primary Ἰχναίη τε Θέμις καὶ ἀγάστονος Ἀμφιτρίτη |
| 95 | Primary ἄλλαι τʼ ἀθάναται νόσφιν λευκωλένου Ἥρης· |
| 96 | Primary ἧστο γὰρ ἐν μεγάροισι Διὸς νεφεληγερέταο· |
| 97 | Primary μούνη δʼ οὐκ ἐπέπυστο μογοστόκος Εἰλείθυια· |
| 98 | Primary ἧστο γὰρ ἄκρῳ Ὀλύμπῳ ὑπὸ χρυσέοισι νέφεσσιν, |
| 99 | Primary Ἥρης φραδμοσύνης λευκωλένου, ἥ μιν ἔρυκε |
| 100 | Primary ζηλοσύνῃ, ὅτʼ ἄρʼ υἱὸν ἀμύμονά τε κρατερόν τε |
| 101 | Primary Λητὼ τέξεσθαι καλλιπλόκαμος τότʼ ἔμελλεν. |
| 102 | Primary αἳ δʼ Ἶριν προὔπεμψαν ἐυκτιμένης ἀπὸ νήσου, |
| 103 | Primary ἀξέμεν Εἰλείθυιαν, ὑποσχόμεναι μέγαν ὅρμον, |
| 104 | Primary χρυσείοισι λίνοισιν ἐερμένον, ἐννεάπηχυν· |
| 105 | Primary νόσφιν δʼ ἤνωγον καλέειν λευκωλένου Ἥρης, |
| 106 | Primary νή μιν ἔπειτʼ ἐπέεσσιν ἀποστρέψειεν ἰοῦσαν. |
| 107 | Primary αὐτὰρ ἐπεὶ τό γʼ ἄκουσε ποδήνεμος ὠκέα Ἶρις, |
| 108 | Primary βῆ ῥα θέειν, ταχέως δὲ διήνυσε πᾶν τὸ μεσηγύ. |
| 109 | Primary αὐτὰρ ἐπεί ῥʼ ἵκανε θεῶν ἕδος, αἰπὺν Ὄλυμπον, |
| 110 | Primary αὐτίκʼ ἄρʼ Εἰλείθυιαν ἀπὲκ μεγάροιο θύραζε |
| 111 | Primary ἐκπροκαλεσσαμένη ἔπεα πτερόεντα προσηύδα, |
| 112 | Primary πάντα μάλʼ, ὡς ἐπέτελλον Ὀλύμπια δώματʼ ἔχουσαι. |
| 113 | Primary τῇ δʼ ἄρα θυμὸν ἔπειθεν ἐνὶ στήθεσσι φίλοισι· |
| 114 | Primary βὰν δὲ ποσὶ τρήρωσι πελειάσιν ἴθμαθʼ ὁμοῖαι. |
| 115 | Primary εὖτʼ ἐπὶ Δήλου ἔβαινε μογοστόκος Εἰλείθυια, |
| 116 | Primary δὴ τότε τὴν τόκος εἷλε, μενοίνησεν δὲ τεκέσθαι. |
| 117 | Primary ἀμφὶ δὲ φοίνικι βάλε πήχεε, γοῦνα δʼ ἔρεισε |
| 118 | Primary λειμῶνι μαλακῷ· μείδησε δὲ γαῖʼ ὑπένερθεν· |
| 119 | Primary ἐκ δʼ ἔθορε πρὸ φόωσδε· θεαὶ δʼ ὀλόλυξαν ἅπασαι. |
| 120 | Primary ἔνθα σέ, ἤιε Φοῖβε, θεαὶ λόον ὕδατι καλῷ |
| 121 | Primary ἁγνῶς καὶ καθαρῶς, σπάρξαν δʼ ἐν φάρεϊ λευκῷ, |
| 122 | Primary λεπτῷ, νηγατέῳ· περὶ δὲ χρύσεον στρόφον ἧκαν. |
| 123 | Primary οὐδʼ ἄρʼ Ἀπόλλωνα χρυσάορα θήσατο μήτηρ, |
| 124 | Primary ἀλλὰ Θέμις νέκταρ τε καὶ ἀμβροσίην ἐρατεινὴν |
| 125 | Primary ἀθανάτῃσιν χερσὶν ἐπήρξατο· χαῖρε δὲ Λητώ, |
| 126 | Primary οὕνεκα τοξοφόρον καὶ καρτερὸν υἱὸν ἔτικτεν. |
| 127 | Primary αὐτὰρ ἐπεὶ δή, Φοῖβε, κατέβρως ἄμβροτον εἶδαρ, |
| 128 | Primary οὔ σέ γʼ ἔπειτʼ ἴσχον χρύσεοι στρόφοι ἀσπαίροντα, |
| 129 | Primary οὐδʼ ἔτι δέσματʼ ἔρυκε, λύοντο δὲ πείρατα πάντα. |
| 130 | Primary αὐτίκα δʼ ἀθανάτῃσι μετηύδα Φοῖβος Ἀπόλλων· |
| 131 | Primary -->εἴη μοι κίθαρίς τε φίλη καὶ καμπύλα τόξα, |
| 132 | Primary χρήσω δʼ ἀνθρώποισι Διὸς νημερτέα βουλήν. --> |
| 133 | Primary ὣς εἰπὼν ἐβίβασκεν ἐπὶ χθονὸς εὐρυοδείης |
| 134 | Primary Φοῖβος ἀκερσεκόμης, ἑκατηβόλος· αἳ δʼ ἄρα πᾶσαι |
| 135 | Primary θάμβεον ἀθάναται· χρυσῷ δʼ ἄρα Δῆλος ἅπασα |
| 136 | Primary [ βεβρίθει, καθορῶσα Διὸς Λητοὺς τε γενέθλην, |
| 137 | Primary γηθοσύνῃ, ὅτι μιν θεὸς εἵλετο οἰκία θέσθαι |
| 138 | Primary νήσων ἠπείρου τε, φίλησε δὲ κηρόθι μᾶλλον. ] |
| 139 | Primary ἤνθησʼ, ὡς ὅτε τε ῥίον οὔρεος ἄνθεσιν ὕλης. |
| 140 | Primary αὐτὸς δʼ, ἀργυρότοξε, ἄναξ ἑκατηβόλʼ Ἄπολλον, |
| 141 | Primary ἄλλοτε μέν τʼ ἐπὶ Κύνθου ἐβήσαο παιπαλόεντος, |
| 142 | Primary ἄλλοτε δʼ ἂν νήσους τε καὶ ἀνέρας ἠλάσκαζες. |
| 143 | Primary πολλοί τοι νηοί τε καὶ ἄλσεα δενδρήεντα· |
| 144 | Primary πᾶσαι δὲ σκοπιαί τε φίλαι καὶ πρώονες ἄκροι |
| 145 | Primary ὑψηλῶν ὀρέων ποταμοί θʼ ἅλαδε προρέοντες· |
| 146 | Primary ἀλλὰ σὺ Δήλῳ, Φοῖβε, μάλιστʼ ἐπιτέρπεαι ἦτορ, |
| 147 | Primary ἔνθα τοι ἑλκεχίτωνες Ἰάονες ἠγερέθονται |
| 148 | Primary αὐτοῖς σὺν παίδεσσι καὶ αἰδοίῃς ἀλόχοισιν. |
| 149 | Primary οἱ δέ σε πυγμαχίῃ τε καὶ ὀρχηθμῷ καὶ ἀοιδῇ |
| 150 | Primary μνησάμενοι τέρπουσιν, ὅτʼ ἄν στήσωνται ἀγῶνα. |
| 151 | Primary φαίη κʼ ἀθανάτους καὶ ἀγήρως ἔμμεναι αἰεί, |
| 152 | Primary ὃς τόθʼ ὑπαντιάσειʼ, ὅτʼ Ἰάονες ἀθρόοι εἶεν· |
| 153 | Primary πάντων γάρ κεν ἴδοιτο χάριν, τέρψαιτο δὲ θυμὸν |
| 154 | Primary ἄνδρας τʼ εἰσορόων καλλιζώνους τε γυναῖκας |
| 155 | Primary νῆάς τʼ ὠκείας ἠδʼ αὐτῶν κτήματα πολλά. |
| 156 | Primary πρὸς δὲ τόδε μέγα θαῦμα, ὅου κλέος οὔποτʼ ὀλεῖται, |
| 157 | Primary κοῦραι Δηλιάδες, ἑκατηβελέταο θεράπναι· |
| 158 | Primary αἵ τʼ ἐπεὶ ἂρ πρῶτον μὲν Ἀπόλλωνʼ ὑμνήσωσιν, |
| 159 | Primary αὖτις δʼ αὖ Λητώ τε καὶ Ἄρτεμιν ἰοχέαιραν, |
| 160 | Primary μνησάμεναι ἀνδρῶν τε παλαιῶν ἠδὲ γυναικῶν |
| 161 | Primary ὕμνον ἀείδουσιν, θέλγουσι δὲ φῦλʼ ἀνθρώπων. |
| 162 | Primary πάντων δʼ ἀνθρώπων φωνὰς καὶ βαμβαλιαστὺν |
| 163 | Primary μιμεῖσθʼ ἴσασιν· φαίη δέ κεν αὐτὸς ἕκαστος |
| 164 | Primary φθέγγεσθʼ· οὕτω σφιν καλὴ συνάρηρεν ἀοιδή. |
| 165 | Primary ἀλλʼ ἄγεθʼ ἱλήκοι μὲν Ἀπόλλων Ἀρτέμιδι ξύν, |
| 166 | Primary χαίρετε δʼ ὑμεῖς πᾶσαι· ἐμεῖο δὲ καὶ μετόπισθεν |
| 167 | Primary μνήσασθʼ, ὁππότε κέν τις ἐπιχθονίων ἀνθρώπων |
| 168 | Primary ἐνθάδ’ ἀνείρηται ξεῖνος ταλαπείριος ἐλθών· |
| 169 | Primary -->ὦ κοῦραι, τίς δʼ ὔμμιν ἀνὴρ ἥδιστος ἀοιδῶν |
| 170 | Primary ἐνθάδε πωλεῖται, καὶ τέῳ τέρπεσθε μάλιστα; --> |
| 171 | Primary ὑμεῖς δʼ εὖ μάλα πᾶσαι ὑποκρίνασθαι ἀφήμως· |
| 172 | Primary -->τυφλὸς ἀνήρ, οἰκεῖ δὲ Χίῳ ἔνι παιπαλοέσσῃ |
| 173 | Primary τοῦ πᾶσαι μετόπισθεν ἀριστεύσουσιν ἀοιδαί. --> |
| 174 | Primary ἡμεῖς δʼ ὑμέτερον κλέος οἴσομεν, ὅσσον ἐπʼ αἶαν |
| 175 | Primary ἀνθρώπων στρεφόμεσθα πόλεις εὖ ναιεταώσας· |
| 176 | Primary οἳ δʼ ἐπὶ δὴ πείσονται, ἐπεὶ καὶ ἐτήτυμόν ἐστιν. |
| 177 | Primary αὐτὰρ ἐγὼν οὐ λήξω ἑκηβόλον Ἀπόλλωνα |
| 178 | Primary ὑμνέων ἀργυρότοξον, ὃν ἠύκομος τέκε Λητώ. |
| 179 | Primary ὦ ἄνα, καὶ Λυκίην καὶ Μῃονίην ἐρατεινὴν |
| 180 | Primary καὶ Μίλητον ἔχεις, ἔναλον πόλιν ἱμερόεσσαν, |
| 181 | Primary αὐτὸς δʼ αὖ Δήλοιο περικλύστης περικλύστοιο μέγʼ ἀνάσσεις. |
| 182 | Primary εἶσι δὲ φορμίζων Λητοῦς ἐρικυδέος υἱὸς |
| 183 | Primary φόρμιγγι γλαφυρῇ πρὸς Πυθὼ πετρήεσσαν, |
| 184 | Primary ἄμβροτα εἵματʼ ἔχων τεθυωμένα· τοῖο δὲ φόρμιγξ |
| 185 | Primary χρυσέου ὑπὸ πλήκτρου καναχὴν ἔχει ἱμερόεσσαν. |
| 186 | Primary ἔνθεν δὲ πρὸς Ὄλυμπον ἀπὸ χθονός, ὥστε νόημα, |
| 187 | Primary εἶσι Διὸς πρὸς δῶμα θεῶν μεθʼ ὁμήγυριν ἄλλων. |
| 188 | Primary αὐτίκα δʼ ἀθανάτοισι μέλει κίθαρις καὶ ἀοιδή· |
| 189 | Primary Μοῦσαι μέν θʼ ἅμα πᾶσαι ἀμειβόμεναι ὀπὶ καλῇ |
| 190 | Primary ὑμνεῦσίν ῥα θεῶν δῶρʼ ἄμβροτα ἠδʼ ἀνθρώπων |
| 191 | Primary τλημοσύνας, ὅσʼ ἔχοντες ὑπʼ ἀθανάτοισι θεοῖσι |
| 192 | Primary ζώουσʼ ἀφραδέες καὶ ἀμήχανοι, οὐδὲ δύνανται |
| 193 | Primary εὑρέμεναι θανάτοιό τʼ ἄκος καὶ γήραος ἄλκαρ· |
| 194 | Primary αὐτὰρ ἐυπλόκαμοι Χάριτες καὶ ἐύφρονες Ὧραι |
| 195 | Primary Ἁρμονίη θʼ Ἥβη τε Διὸς θυγάτηρ τʼ Ἀφροδίτη |
| 196 | Primary ὀρχεῦντʼ ἀλλήλων ἐπὶ καρπῷ χεῖρας ἔχουσαι· |
| 197 | Primary τῇσι μὲν οὔτʼ αἰσχρὴ μεταμέλπεται οὔτʼ ἐλάχεια, |
| 198 | Primary ἀλλὰ μάλα μεγάλη τε ἰδεῖν καὶ εἶδος ἀγητή, |
| 199 | Primary Ἄρτεμις ἰοχέαιρα ὁμότροφος Ἀπόλλωνι. |
| 200 | Primary ἐν δʼ αὖ τῇσιν Ἄρης καὶ ἐύσκοπος Ἀργειφόντης |
| 201 | Primary παίζουσʼ· αὐτὰρ ὁ Φοῖβος Ἀπόλλων ἐγκιθαρίζει |
| 202 | Primary καλὰ καὶ ὕψι βιβάς· αἴγλη δέ μιν ἀμφιφαείνει |
| 203 | Primary μαρμαρυγαί τε ποδῶν καὶ ἐυκλώστοιο χιτῶνος. |
| 204 | Primary οἳ δʼ ἐπιτέρπονται θυμὸν μέγαν εἰσορόωντες |
| 205 | Primary Λητώ τε χρυσοπλόκαμος καὶ μητίετα Ζεὺς |
| 206 | Primary υἷα φίλον παίζοντα μετʼ ἀθανάτοισι θεοῖσι. |
| 207 | Primary πῶς τʼ ἄρ σʼ ὑμνήσω πάντως εὔυμνον ἐόντα; |
| 208 | Primary ἠέ σʼ ἐνὶ μνηστῆρσιν ἀείδω καὶ φιλότητι, |
| 209 | Primary ὅππως μνωόμενος ἔκιες Ἀζαντίδα κούρην |
| 210 | Primary Ἴσχυʼ ἅμʼ ἀντιθέῳ Ἐλατιονίδη εὐίππῳ; |
| 211 | Primary ἢ ἅμα Θόρβαντι Τριοπέῳ γένος, ἢ ἅμʼ Ἐρευθεῖ; |
| 212 | Primary ἢ ἅμα Λευκίππῳ καὶ Λευκίπποιο δάμαρτι |
| 213 | Primary πεζός, ὃ δʼ ἵπποισιν· οὐ μὴν Τρίοπός γʼ ἐνέλειπεν. |
| 214 | Primary ἢ ὡς τὸ πρῶτον χρηστήριον ἀνθρώποισι |
| 215 | Primary ζητεύων κατὰ γαῖαν ἔβης, ἑκατηβόλʼ Ἄπολλον; |
| 216 | Primary Πιερίην μὲν πρῶτον ἀπʼ Οὐλύμποιο κατῆλθες· |
| 217 | Primary Λέκτον τʼ ἠμαθοέντα παρέστιχες ἠδʼ Ἐνιῆνας |
| 218 | Primary καὶ διὰ Περραιβούς· τάχα δʼ εἰς Ἰαωλκὸν ἵκανες, |
| 219 | Primary Κηναίου τʼ ἐπέβης ναυσικλειτῆς Εὐβοίης. |
| 220 | Primary στῆς δʼ ἐπὶ Ληλάντῳ πεδίῳ· τό τοι οὐχ ἅδε θυμῷ |
| 221 | Primary τεύξασθαι νηόν τε καὶ ἄλσεα δενδρήεντα. |
| 222 | Primary ἔνθεν δʼ Εὔριπον διαβάς, ἑκατηβόλʼ Ἄπολλον, |
| 223 | Primary βῆς ἄνʼ ὄρος ζάθεον, χλωρόν· τάχα δʼ ἷξες ἀπʼ αὐτοῦ |
| 224 | Primary ἐς Μυκαλησσὸν ἰὼν καὶ Τευμησσὸν λεχεποίην. |
| 225 | Primary Θήβης δʼ εἰσαφίκανες ἕδος καταειμένον ὕλῃ· |
| 226 | Primary οὐ γάρ πώ τις ἔναιε βροτῶν ἱερῇ ἐνὶ Θήβῃ, |
| 227 | Primary οὐδʼ ἄρα πω τότε γʼ ἦσαν ἀταρπιτοὶ οὐδὲ κέλευθοι |
| 228 | Primary Θήβης ἂμ πεδίον πυρηφόρον, ἀλλʼ ἔχεν ὕλη. |
| 229 | Primary ἔνθεν δὲ προτέρω ἔκιες, ἑκατηβόλʼ Ἄπολλον, |
| 230 | Primary Ὀγχηστὸν δʼ ἷξες, Ποσιδήιον ἀγλαὸν ἄλσος· |
| 231 | Primary ἔνθα νεοδμὴς πῶλος ἀναπνέει ἀχθόμενός περ |
| 232 | Primary ἕλκων ἅρματα καλά· χαμαὶ δʼ ἐλατὴρ ἀγαθός περ |
| 233 | Primary ἐκ δίφροιο θορὼν ὁδὸν ἔρχεται· οἳ δὲ τέως μὲν |
| 234 | Primary κείνʼ ὄχεα κροτέουσι ἀνακτορίην ἀφιέντες. |
| 235 | Primary εἰ δέ κεν ἅρματʼ ἀγῇσιν ἐν ἄλσεϊ δενδρήεντι, |
| 236 | Primary ἵππους μὲν κομέουσι, τὰ δὲ κλίναντες ἐῶσιν· |
| 237 | Primary ὣς γὰρ τὰ πρώτισθʼ ὁσίη γένεθʼ· οἳ δὲ ἄνακτι |
| 238 | Primary εὔχονται, δίφρον δὲ θεοῦ τότε μοῖρα φυλάσσει. |
| 239 | Primary ἔνθεν δὲ προτέρω ἔκιες, ἑκατηβόλʼ Ἄπολλον· |
| 240 | Primary Κηφισσὸν δʼ ἄρʼ ἔπειτα κιχήσαο καλλιρέεθρον, |
| 241 | Primary ὅς τε Λιλαίηθεν προχέει καλλίρροον ὕδωρ. |
| 242 | Primary τὸν διαβάς, Ἑκάεργε, καὶ Ὠκαλέην πολύπυργον |
| 243 | Primary ἔνθεν ἄρʼ εἰς Ἁλίαρτον ἀφίκεο ποιήεντα. |
| 244 | Primary βῆς δʼ ἐπὶ Τελφούσης· τόθι τοι ἅδε χῶρος ἀπήμων |
| 245 | Primary τεύξασθαι νηόν τε καὶ ἄλσεα δενδρήεντα· |
| 246 | Primary στῆς δὲ μάλʼ ἄγχʼ αὐτῆς καὶ μιν πρὸς μῦθον ἔειπες· |
| 247 | Primary -->Τελφοῦσʼ, ἐνθάδε δὴ φρονέω περικαλλέα νηὸν |
| 248 | Primary ἀνθρώπων τεῦξαι χρηστήριον, οἵτε μοι αἰεὶ |
| 249 | Primary ἐνθάδʼ ἀγινήσουσι τεληέσσας ἑκατόμβας, |
| 250 | Primary ἠμὲν ὅσοι Πελοπόννησον πίειραν ἔχουσιν |
| 251 | Primary ἠδʼ ὅσοι Εὐρώπην τε καὶ ἀμφιρύτας κατὰ νήσους, |
| 252 | Primary χρησόμενοι· τοῖσιν δέ κʼ ἐγὼ νημερτέα βουλὴν |
| 253 | Primary πᾶσι θεμιστεύοιμι χρέων ἐνὶ πίονι νηῷ. --> |
| 254 | Primary ὣς εἰπὼν διέθηκε θεμείλια Φοῖβος Ἀπόλλων |
| 255 | Primary εὐρέα καὶ μάλα μακρὰ διηνεκές· ἣ δὲ ἰδοῦσα |
| 256 | Primary Τελφοῦσα κραδίην ἐχολώσατο εἶπέ τε μῦθον· |
| 257 | Primary -->φοῖβε ἄναξ ἑκάεργε, ἔπος τί τοι ἐν φρεσὶ θήσω. |
| 258 | Primary ἐνθάδʼ ἐπεὶ φρονέεις τεῦξαι περικαλλέα νηὸν |
| 259 | Primary ἔμμεναι ἀνθρώποις χρηστήριον, οἵτε τοι αἰεὶ |
| 260 | Primary ἐνθάδʼ ἀγινήσουσι τεληέσσας ἑκατόμβας· |
| 261 | Primary ἀλλʼ ἔκ τοι ἐρέω, σὺ δʼ ἐνὶ φρεσὶ βάλλεο σῇσι, |
| 262 | Primary πημανέει σʼ αἰεὶ κτύπος ἵππων ὠκειάων |
| 263 | Primary ἀρδόμενοί τʼ οὐρῆες ἐμῶν ἱερῶν ἀπὸ πηγέων· |
| 264 | Primary ἔνθα τις ἀνθρώπων βουλήσεται εἰσοράασθαι |
| 265 | Primary ἅρματά τʼ εὐποίητα καὶ ὠκυπόδων κτύπον ἵππων |
| 266 | Primary ἢ νηόν τε μέγαν καὶ κτήματα πόλλʼ ἐνεόντα. |
| 267 | Primary ἀλλʼ εἰ δή τι πίθοιο, σὺ δὲ κρείσσων καὶ ἀρείων |
| 268 | Primary ἐσσί, ἄναξ, ἐμέθεν, σεῦ δὲ σθένος ἐστὶ μέγιστον, |
| 269 | Primary ἐν Κρίσῃ ποίησαι ὑπὸ πτυχὶ Παρνησοῖο. |
| 270 | Primary ἔνθʼ οὔθʼ ἅρματα καλὰ δονήσεται οὔτε τοι ἵππων |
| 271 | Primary ὠκυπόδων κτύπος ἔσται ἐύδμητον περὶ βωμόν, |
| 272 | Primary ἀλλά τοι ὣς προσάγοιεν Ἰηπαιήονι δῶρα |
| 273 | Primary ἀνθρώπων κλυτὰ φῦλα· σὺ δὲ φρένας ἀμφιγεγηθὼς |
| 274 | Primary δέξαιʼ ἱερὰ καλὰ περικτιόνων ἀνθρώπων. --> |
| 275 | Primary ὣς εἰποῦσʼ Ἑκάτου πέπιθε φρένας, ὄφρα οἱ αὐτῇ |
| 276 | Primary Τελφούσῃ κλέος εἴη ἐπὶ χθονί, μηδʼ Ἑκάτοιο. |
| 277 | Primary ἔνθεν δὲ προτέρω ἔκιες, ἑκατηβόλʼ Ἄπολλον· |
| 278 | Primary ἷξες δʼ ἐς Φλεγύων ἀνδρῶν πόλιν ὑβριστάων, |
| 279 | Primary οἳ Διὸς οὐκ ἀλέγοντες ἐπὶ χθονὶ ναιετάασκον |
| 280 | Primary ἐν καλῇ βήσσῃ Κηφισίδος ἐγγύθι λίμνης. |
| 281 | Primary ἔνθεν καρπαλίμως προσέβης πρὸς δειράδα θύων |
| 282 | Primary ἵκεο δʼ ἐς Κρίσην ὑπὸ Παρνησὸν νιφόεντα, |
| 283 | Primary κνημὸν πρὸς Ζέφυρον τετραμμένον, αὐτὰρ ὕπερθεν |
| 284 | Primary πέτρη ἐπικρέμαται, κοίλη δʼ ὑποδέδρομε βῆσσα, |
| 285 | Primary τρηχεῖʼ· ἔνθα ἄναξ τεκμήρατο Φοῖβος Ἀπόλλων |
| 286 | Primary νηὸν ποιήσασθαι ἐπήρατον εἶπέ τε μῦθον· |
| 287 | Primary -->ἐνθάδε δὴ φρονέω τεῦξαι περικαλλέα νηὸν |
| 288 | Primary ἔμμεναι ἀνθρώποις χρηστήριον, οἵτε μοι αἰεὶ |
| 289 | Primary ἐνθάδʼ ἀγινήσουσι τεληέσσας ἑκατόμβας, |
| 290 | Primary ἠμὲν ὅσοι Πελοπόννησον πίειραν ἔχουσιν, |
| 291 | Primary ἠδʼ ὅσοι Εὐρώπην τε καὶ ἀμφιρύτας κατὰ νήσους, |
| 292 | Primary χρησόμενοι· τοῖσιν δʼ ἄρʼ ἐγὼ νημερτέα βουλὴν |
| 293 | Primary πᾶσι θεμιστεύοιμι χρέων ἐνὶ πίονι νηῷ. --> |
| 294 | Primary ὣς εἰπὼν διέθηκε θεμείλια Φοῖβος Ἀπόλλων |
| 295 | Primary εὐρέα καὶ μάλα μακρὰ διηνεκές· αὐτὰρ ἐπʼ αὐτοῖς |
| 296 | Primary λάινον οὐδὸν ἔθηκε Τροφώνιος ἠδʼ Ἀγαμήδης, |
| 297 | Primary υἱέες Ἐργίνου, φίλοι ἀθανάτοισι θεοῖσιν· |
| 298 | Primary ἀμφὶ δὲ νηὸν ἔνασσαν ἀθέσφατα φῦλʼ ἀνθρώπων |
| 299 | Primary ξεστοῖσιν λάεσσιν, ἀοίδιμον ἔμμεναι αἰεί. |
| 300 | Primary ἀγχοῦ δὲ κρήνη καλλίρροος, ἔνθα δράκαιναν |
| 301 | Primary κτεῖνεν ἄναξ, Διὸς υἱός, ἀπὸ κρατεροῖο βιοῖο, |
| 302 | Primary ζατρεφέα, μεγάλην, τέρας ἄγριον, ἣ κακὰ πολλὰ |
| 303 | Primary ἀνθρώπους ἔρδεσκεν ἐπὶ χθονί, πολλὰ μὲν αὐτούς, |
| 304 | Primary πολλὰ δὲ μῆλα ταναύποδʼ, ἐπεὶ πέλε πῆμα δαφοινόν. |
| 305 | Primary καὶ ποτε δεξαμένη χρυσοθρόνου ἔτρεφεν Ἥρης |
| 306 | Primary δεινόν τʼ ἀργαλέον τε Τυφάονα, πῆμα βροτοῖσιν· |
| 307 | Primary ὅν ποτʼ ἄρʼ Ἥρη ἔτικτε χολωσαμένη Διὶ πατρί, |
| 308 | Primary ἡνίκʼ ἄρα Κρονίδης ἐρικυδέα γείνατʼ Ἀθήνην |
| 309 | Primary ἐν κορυφῇ· ἣ δʼ αἶψα χολώσατο πότνια Ἥρη |
| 310 | Primary ἠδὲ καὶ ἀγρομένοισι μετʼ ἀθανάτοισιν ἔειπε· |
| 311 | Primary -->κέκλυτέ μευ, πάντες τε θεοὶ πᾶσαί τε θέαιναι, |
| 312 | Primary ὡς ἔμʼ ἀτιμάζειν ἄρχει νεφεληγερέτα Ζεὺς |
| 313 | Primary πρῶτος, ἐπεί μʼ ἄλοχον ποιήσατο κέδνʼ εἰδυῖαν· |
| 314 | Primary καὶ νῦν νόσφιν ἐμεῖο τέκε γλαυκῶπιν Ἀθήνην, |
| 315 | Primary ἣ πᾶσιν μακάρεσσι μεταπρέπει ἀθανάτοισιν· |
| 316 | Primary αὐτὰρ ὅ γʼ ἠπεδανὸς γέγονεν μετὰ πᾶσι θεοῖσι |
| 317 | Primary παῖς ἐμὸς Ἥφαιστος, ῥικνὸς πόδας, ὃν τέκον αὐτή· |
| 317a | Primary [ αἶσχος ἐμοὶ καὶ ὄνειδος ἐν οὐρανῷ ὅντε καὶ αὐτή ] |
| 318 | Primary ῥῖψʼ ἀνὰ χερσὶν ἑλοῦσα καὶ ἔμβαλον εὐρέι πόντῳ· |
| 319 | Primary ἀλλά ἑ Νηρῆος θυγάτηρ Θέτις ἀργυρόπεζα |
| 320 | Primary δέξατο καὶ μετὰ ᾗσι κασιγνήτῃσι κόμισσεν. |
| 321 | Primary ὡς ὄφελʼ ἄλλο θεοῖσι χαρίζεσθαι μακάρεσσι. |
| 322 | Primary σχέτλιε, ποικιλομῆτα, τί νῦν μητίσεαι ἄλλο; |
| 323 | Primary πῶς ἔτλης οἶος τεκέειν γλαυκῶπιν Ἀθήνην; |
| 324 | Primary οὐκ ἂν ἐγὼ τεκόμην; καὶ σὴ κεκλημένη ἔμπης |
| 325 | Primary ἦα ῥʼ ἐν ἀθανάτοισιν, οἳ οὐρανὸν εὐρὺν ἔχουσι. |
| 325a | Primary φράζεο νῦν μή τοί τι κακὸν μητίσομʼ ὀπίσσω. |
| 326 | Primary καὶ νῦν μέντοι ἐγὼ τεχνήσομαι, ὥς κε γένηται |
| 327 | Primary παῖς ἐμός, ὅς κε θεοῖσι μεταπρέποι ἀθανάτοισιν, |
| 328 | Primary οὔτε σὸν αἰσχύνασʼ ἱερὸν λέχος οὔτʼ ἐμὸν αὐτῆς. |
| 329 | Primary οὐδέ τοι εἰς εὐνὴν πωλήσομαι, ἀλλʼ ἀπὸ σεῖο |
| 330 | Primary τηλόθʼ ἐοῦσα θεοῖσι μετέσσομαι ἀθανάτοισιν. --> |
| 331 | Primary ὣς εἰποῦσʼ ἀπὸ νόσφι θεῶν κίε χωομένη κῆρ. |
| 332 | Primary αὐτίκʼ ἔπειτʼ ἠρᾶτο βοῶπις πότνια Ἥρη, |
| 333 | Primary χειρὶ καταπρηνεῖ δʼ ἔλασε χθόνα καὶ φάτο μῦθον· |
| 334 | Primary -->κέκλυτε νῦν μευ, Γαῖα καὶ Οὐρανὸς εὐρὺς ὕπερθεν |
| 335 | Primary Τιτῆνές τε θεοί, τοὶ ὑπὸ χθονὶ ναιετάοντες |
| 336 | Primary Τάρταρον ἀμφὶ μέγαν, τῶν ἒξ ἄνδρες τε θεοί τε· |
| 337 | Primary αὐτοὶ νῦν μευ πάντες ἀκούσατε καὶ δότε παῖδα |
| 338 | Primary νόσφι Διός, μηδέν τι βίην ἐπιδευέα κείνου· |
| 339 | Primary ἀλλʼ ὅ γε φέρτερος ἔστω, ὅσον Κρόνου εὐρύοπα Ζεύς. --> |
| 340 | Primary ὣς ἄρα φωνήσασʼ ἵμασε χθόνα χειρὶ παχείῃ· |
| 341 | Primary κινήθη δʼ ἄρα Γαῖα φερέσβιος· ἣ δὲ ἰδοῦσα |
| 342 | Primary τέρπετο ὃν κατὰ θυμόν· ὀίετο γὰρ τελέεσθαι. |
| 343 | Primary ἐκ τούτου δὴ ἔπειτα τελεσφόρον εἰς ἐνιαυτὸν |
| 344 | Primary οὔτε πότʼ εἰς εὐνὴν Διὸς ἤλυθε μητιόεντος, |
| 345 | Primary οὔτε πότʼ ἐς θῶκον πολυδαίδαλον, ὡς τὸ πάρος περ |
| 346 | Primary αὐτῷ ἐφεζομένη πυκινὰς φραζέσκετο βουλάς· |
| 347 | Primary ἀλλʼ ἥ γʼ ἐν νηοῖσι πολυλλίστοισι μένουσα |
| 348 | Primary τέρπετο οἷς ἱεροῖσι βοῶπις πότνια Ἥρη. |
| 349 | Primary ἀλλʼ ὅτε δὴ μῆνές τε καὶ ἡμέραι ἐξετελεῦντο |
| 350 | Primary ἂψ περιτελλομένου ἔτεος καὶ ἐπήλυθον ὧραι, |
| 351 | Primary ἣ δʼ ἔτεκʼ οὔτε θεοῖς ἐναλίγκιον οὔτε βροτοῖσι, |
| 352 | Primary δεινόν τʼ ἀργαλέον τε Τυφάονα, πῆμα βροτοῖσιν. |
| 353 | Primary αὐτίκα τόνδε λαβοῦσα βοῶπις πότνια Ἥρη |
| 354 | Primary δῶκεν ἔπειτα φέρουσα κακῷ κακόν· ἣ δʼ ὑπέδεκτο. |
| 355 | Primary ὃς κακὰ πόλλʼ ἔρδεσκεν ἀγακλυτὰ φῦλʼ ἀνθρώπων· |
| 356 | Primary ὃς τῇ γʼ ἀντιάσειε, φέρεσκέ μιν αἴσιμον ἦμαρ, |
| 357 | Primary πρίν γέ οἱ ἰὸν ἐφῆκε ἄναξ ἑκάεργος Ἀπόλλων |
| 358 | Primary καρτερόν· ἣ δʼ ὀδύνῃσιν ἐρεχθομένη χαλεπῇσι |
| 359 | Primary κεῖτο μέγʼ ἀσθμαίνουσα κυλινδομένη κατὰ χῶρον. |
| 360 | Primary θεσπεσίη δʼ ἐνοπὴ γένετʼ ἄσπετος· ἣ δὲ καθʼ ὕλην |
| 361 | Primary πυκνὰ μάλʼ ἔνθα καὶ ἔνθα ἑλίσσετο, λεῖπε δὲ θυμὸν |
| 362 | Primary φοινὸν ἀποπνείουσʼ· ὃ δʼ ἐπηύξατο Φοῖβος Ἀπόλλων· |
| 363 | Primary -->ἐνταυθοῖ νῦν πύθευ ἐπὶ χθονὶ βωτιανείρῃ· |
| 364 | Primary οὐδὲ σύ γε ζώουσα κακὸν δήλημα βροτοῖσιν |
| 365 | Primary ἔσσεαι, οἳ γαίης πολυφόρβου καρπὸν ἔδοντες |
| 366 | Primary ἐνθάδʼ ἀγινήσουσι τεληέσσας ἑκατόμβας· |
| 367 | Primary οὐδέ τί τοι θάνατόν γε δυσηλεγέʼ οὔτε Τυφωεὺς |
| 368 | Primary ἀρκέσει οὔτε Χίμαιρα δυσώνυμος, ἀλλά σέ γʼ αὐτοῦ |
| 369 | Primary πύσει Γαῖα μέλαινα καὶ ἠλέκτωρ Ὑπερίων. --> |
| 370 | Primary ὣς φάτʼ ἐπευχόμενος· τὴν δὲ σκότος ὄσσε κάλυψε. |
| 371 | Primary τὴν δʼ αὐτοῦ κατέπυσʼ ἱερὸν μένος Ἠελίοιο, |
| 372 | Primary ἐξ οὗ νῦν Πυθὼ κικλήσκεται· οἳ δὲ ἄνακτα |
| 373 | Primary Πύθιον ἀγκαλέουσιν ἐπώνυμον, οὕνεκα κεῖθι |
| 374 | Primary αὐτοῦ πῦσε πέλωρ μένος ὀξέος Ἠελίοιο. |
| 375 | Primary καὶ τότʼ ἄρʼ ἔγνω ᾗσιν ἐνὶ φρεσὶ Φοῖβος Ἀπόλλων, |
| 376 | Primary οὕνεκά μιν κρήνη καλλίρροος ἐξαπάφησε· |
| 377 | Primary βῆ δʼ ἐπὶ Τελφούσῃ κεχολωμένος, αἶψα δʼ ἵκανε· |
| 378 | Primary στῆ δὲ μάλʼ ἄγχʼ αὐτῆς καί μιν πρὸς μῦθον ἔειπε· |
| 379 | Primary -->Τελφοῦσʼ, οὐκ ἄρʼ ἔμελλες ἐμὸν νόον ἐξαπαφοῦσα |
| 380 | Primary χῶρον ἔχουσʼ ἐρατὸν προρέειν καλλίρροον ὕδωρ. |
| 381 | Primary ἐνθάδε δὴ καὶ ἐμὸν κλέος ἔσσεται, οὐδὲ σὸν οἴης. --> |
| 382 | Primary ἦ καὶ ἐπὶ ῥίον ὦσε ἄναξ ἑκάεργος Ἀπόλλων |
| 383 | Primary πετραίῃς προχυτῇσιν, ἀπέκρυψεν δὲ ῥέεθρα |
| 384 | Primary καὶ βωμὸν ποιήσατʼ ἐν ἄλσεϊ δενδρήεντι, |
| 385 | Primary ἄγχι μάλα κρήνης καλλιρρόου· ἔνθαδʼ ἄνακτι |
| 386 | Primary πάντες ἐπίκλησιν Τελφουσίῳ εὐχετόωνται, |
| 387 | Primary οὕνεκα Τελφούσης ἱερῆς ᾔσχυνε ῥέεθρα. |
| 388 | Primary καὶ τότε δὴ κατὰ θυμὸν ἐφράζετο Φοῖβος Απόλλων, |
| 389 | Primary οὕστινας ἀνθρώπους ὀργείονας εἰσαγάγοιτο, |
| 390 | Primary οἳ θεραπεύσονται Πυθοῖ ἔνι πετρηέσσῃ· |
| 391 | Primary ταῦτʼ ἄρα ὁρμαίνων ἐνόησʼ ἐπὶ οἴνοπι πόντῳ |
| 392 | Primary νῆα θοήν· ἐν δʼ ἄνδρες ἔσαν πολέες τε καὶ ἐσθλοί, |
| 393 | Primary Κρῆτες ἀπὸ Κνωσοῦ Μινωίου, οἵ ῥα ἄνακτι |
| 394 | Primary ἱερά τε ῥέζουσι καὶ ἀγγέλλουσι θέμιστας |
| 395 | Primary φοίβου Ἀπόλλωνος χρυσαόρου, ὅττι κεν εἴπῃ |
| 396 | Primary χρείων ἐκ δάφνης γυάλων ὕπο Παρνησοῖο. |
| 397 | Primary οἳ μὲν ἐπὶ πρῆξιν καὶ χρήματα νηὶ μελαίνῃ |
| 398 | Primary ἐς Πύλον ἠμαθόεντα Πυλοιγενέας τʼ ἀνθρώπους |
| 399 | Primary ἔπλεον· αὐτὰρ ὃ τοῖσι συνήντετο Φοῖβος Ἀπόλλων· |
| 400 | Primary ἐν πόντῳ δʼ ἐπόρουσε δέμας δελφῖνι ἐοικὼς |
| 401 | Primary νηὶ θοῇ καὶ κεῖτο πέλωρ μέγα τε δεινόν τε· |
| 402 | Primary τῶν δʼ οὔτις κατὰ θυμὸν ἐπεφράσαθʼ ὥστε νοῆσαι |
| 402a | Primary [ ἐκβάλλειν δʼ ἔθελον δελφῖνʼ· ὁ δὲ νῆα μέλαιναν ] |
| 403 | Primary πάντοσʼ ἀνασσείσασκε, τίνασσε δὲ νήια δοῦρα. |
| 404 | Primary οἳ δʼ ἀκέων ἐνὶ νηὶ καθήατο δειμαίνοντες· |
| 405 | Primary οὐδʼ οἵ γʼ ὅπλʼ ἔλυον κοίλην ἀνὰ νῆα μέλαιναν, |
| 406 | Primary οὐδʼ ἔλυον λαῖφος νηὸς κυανοπρώροιο, |
| 407 | Primary ἀλλʼ ὡς τὰ πρώτιστα κατεστήσαντο βοεῦσιν, |
| 408 | Primary ὣς ἔπλεον· κραιπνὸς δὲ Νότος κατόπισθεν ἔπειγε |
| 409 | Primary νῆα θοήν· πρῶτον δὲ παρημείβοντο Μάλειαν, |
| 410 | Primary πὰρ δὲ Λακωνίδα γαῖαν ἁλιστέφανον πτολίεθρον |
| 411 | Primary ἷξον καὶ χῶρον τερψιμβρότου Ἠελίοιο, |
| 412 | Primary Ταίναρον, ἔνθα τε μῆλα βαθύτριχα βόσκεται αἰεὶ |
| 413 | Primary Ἠελίοιο ἄνακτος, ἔχει δʼ ἐπιτερπέα χῶρον. |
| 414 | Primary οἳ μὲν ἄρʼ ἔνθʼ ἔθελον νῆα σχεῖν ἠδʼ ἀποβάντες |
| 415 | Primary φράσσασθαι μέγα θαῦμα καὶ ὀφθαλμοῖσιν ἰδέσθαι, |
| 416 | Primary εἰ μενέει νηὸς γλαφυρῆς δαπέδοισι πέλωρον |
| 417 | Primary ἢ εἰς οἶδμʼ ἅλιον πολυΐχθυον αὖτις ὀρούσει. |
| 418 | Primary ἀλλʼ οὐ πηδαλίοισιν ἐπείθετο νηῦς εὐεργής, |
| 419 | Primary ἀλλὰ παρὲκ Πελοπόννησον πίειραν ἔχουσα |
| 420 | Primary ἤιʼ ὁδόν· πνοιῇ δὲ ἄναξ ἑκάεργος Ἀπόλλων |
| 421 | Primary ῥηιδίως ἴθυνʼ· ἣ δὲ πρήσσουσα κέλευθον |
| 422 | Primary Ἀρήνην ἵκανε καὶ Ἀργυφέην ἐρατεινὴν |
| 423 | Primary καὶ Θρύον, Ἀλφειοῖο πόρον, καὶ ἐύκτιτον Αἶπυ |
| 424 | Primary καὶ Πύλον ἠμαθόεντα Πυλοιγενέας τʼ ἀνθρώπους. |
| 425 | Primary βῆ δὲ παρὰ Κπουνοὺς καὶ Χαλκίδα καὶ παρὰ Δύμην |
| 426 | Primary ἠδὲ παρʼ Ἤλιδα δῖαν, ὅθι κρατέουσιν Ἐπειοί. |
| 427 | Primary εὖτε Φερὰς ἐπέβαλλεν, ἀγαλλομένη Διὸς οὔρῳ, |
| 428 | Primary καί σφιν ὑπὲκ νεφέων Ἰθάκης τʼ ὄρος αἰπὺ πέφαντο |
| 429 | Primary Δουλίχιόν τε Σάμη τε καὶ ὑλήεσσα Ζάκυνθος. |
| 430 | Primary ἀλλʼ ὅτε δὴ Πελοπόννησον παρενίσατο πᾶσαν |
| 431 | Primary καὶ δὴ ἐπὶ Κρίσης κατεφαίνετο κόλπος ἀπείρων, |
| 432 | Primary ὅστε διὲκ Πελοπόννησον πίειραν ἐέργει· |
| 433 | Primary ἦλθʼ ἄνεμος Ζέφυρος μέγας, αἴθριος, ἐκ Διὸς αἴσης, |
| 434 | Primary λάβρος ἐπαιγίζων ἐξ αἰθέρος, ὄφρα τάχιστα |
| 435 | Primary νηῦς ἀνύσειε θέουσα θαλάσσης ἁλμυρὸν ὕδωρ. |
| 436 | Primary ἄψορροι δὴ ἔπειτα πρὸς ἠῶ τʼ ἠέλιόν τε |
| 437 | Primary ἔπλεον· ἡγεμόνευε δʼ ἄναξ Διὸς υἱὸς Ἀπόλλων· |
| 438 | Primary ἷξον δʼ ἐς Κρίσην εὐδείελον, ἀμπελόεσσαν, |
| 439 | Primary ἐς λιμένʼ· ἣ δʼ ἀμάθοισιν ἐχρίμψατο ποντοπόρος νηῦς. |
| 440 | Primary ἔνθʼ ἐκ νηὸς ὄρουσε ἄναξ ἑκάεργος Ἀπόλλων, |
| 441 | Primary ἀστέρι εἰδόμενος μέσῳ ἤματι· τοῦ δʼ ἀπὸ πολλαὶ |
| 442 | Primary σπινθαρίδες πωτῶντο, σέλας δʼ εἰς οὐρανὸν ἷκεν· |
| 443 | Primary ἐς δʼ ἄδυτον κατέδυσε διὰ τριπόδων ἐριτίμων. |
| 444 | Primary ἔνθʼ ἄρʼ ὅ γε φλόγα δαῖε πιφαυσκόμενος τὰ ἃ κῆλα· |
| 445 | Primary πᾶσαν δὲ Κρίσην κάτεχεν σέλας· αἳ δʼ ὀλόλυξαν |
| 446 | Primary Κρισαίων ἄλοχοι καλλίζωνοί τε θύγατρες |
| 447 | Primary Φοίβου ὑπὸ ῥιπῆς· μέγα γὰρ δέος ἔμβαλʼ ἑκάστῳ. |
| 448 | Primary ἔνθεν δʼ αὖτʼ ἐπὶ νῆα νόημʼ ὣς ἆλτο πέτεσθαι, |
| 449 | Primary ἀνέρι εἰδόμενος αἰζηῷ τε κρατερῷ τε, |
| 450 | Primary πρωθήβῃ, χαίτῃς εἰλυμένος εὐρέας ὤμους· |
| 451 | Primary καί σφεας φωνήσας ἔπεα πτερόεντα προσηύδα· |
| 452 | Primary -->ὦ ξεῖνοι, τίνες ἐστέ; πόθεν πλεῖθʼ ὑγρὰ κέλευθα; |
| 453 | Primary ἤ τι κατὰ πρῆξιν ἢ μαψιδίως ἀλάλησθε |
| 454 | Primary οἷά τε ληιστῆρες ὑπεὶρ ἅλα, τοί τʼ ἀλόωνται |
| 455 | Primary ψυχὰς παρθέμενοι, κακὸν ἀλλοδαποῖσι φέροντες; |
| 456 | Primary τίφθʼ οὕτως ἧσθον τετιηότες, οὐδʼ ἐπὶ γαῖαν |
| 457 | Primary ἐκβῆτʼ, οὐδὲ καθʼ ὅπλα μελαίνης νηὸς ἔθεσθε; |
| 458 | Primary αὕτη μέν γε δίκη πέλει ἀνδρῶν ἀλφηστάων, |
| 459 | Primary ὁππότʼ ἂν ἐκ πόντοιο ποτὶ χθονὶ νηὶ μελαίνῃ |
| 460 | Primary ἔλθωσιν καμάτῳ ἀδηκότες, αὐτίκα δέ σφεας |
| 461 | Primary σίτοιο γλυκεροῖο περὶ φρένας ἵμερος αἱρεῖ. --> |
| 462 | Primary ὣς φάτο καί σφιν θάρσος ἐνὶ στήθεσσιν ἔθηκε. |
| 463 | Primary τὸν καὶ ἀμειβόμενος Κρητῶν ἀγὸς ἀντίον ηὔδα· |
| 464 | Primary -->ξεῖνʼ, ἐπεὶ οὐ μὲν γάρ τι καταθνητοῖσι ἔοικας, |
| 465 | Primary οὐ δέμας οὐδὲ φυήν, ἀλλʼ ἀθανάτοισι θεοῖσιν, |
| 466 | Primary οὖλέ τε καὶ μέγα χαῖρε, θεοὶ δέ τοι ὄλβια δοῖεν. |
| 467 | Primary καί μοι τοῦτʼ ἀγόρευσον ἐτήτυμον, ὄφρʼ εὖ εἰδῶ· |
| 468 | Primary τίς δῆμος; τίς γαῖα; τίνες βροτοὶ ἐγγεγάασιν; |
| 469 | Primary ἄλλῃ γὰρ φρονέοντες ἐπεπλέομεν μέγα λαῖτμα |
| 470 | Primary ἐς Πύλον ἐκ Κρήτης, ἔνθεν γένος εὐχόμεθʼ εἶναι· |
| 471 | Primary νῦν δʼ ὧδε ξὺν νηὶ κατήλθομεν οὔ τι ἑκόντες, |
| 472 | Primary νόστου ἱέμενοι, ἄλλην ὁδόν, ἄλλα κέλευθα· |
| 473 | Primary ἀλλά τις ἀθανάτων δεῦρʼ ἤγαγεν οὐκ ἐθέλοντας. --> |
| 474 | Primary τοὺς δʼ ἀπαμειβόμενος προσέφη ἑκάεργος Ἀπόλλων· |
| 475 | Primary -->ξεῖνοι, τοὶ Κνωσὸν πολυδένδρεον ἀμφενεμεσθε |
| 476 | Primary τὸ πρίν, ἀτὰρ νῦν οὐκ ἔθʼ ὑπότροποι αὖτις ἔσεσθε |
| 477 | Primary ἔς τε πόλιν ἐρατὴν καὶ δώματα καλὰ ἕκαστος |
| 478 | Primary ἔς τε φίλας ἀλόχους· ἀλλʼ ἐνθάδε πίονα νηὸν |
| 479 | Primary ἕξετʼ ἐμὸν πολλοῖσι τετιμένον ἀνθρώποισιν. |
| 480 | Primary εἰμὶ δʼ ἐγὼ Διὸς υἱός, Ἀπόλλων δʼ εὔχομαι εἶναι· |
| 481 | Primary ὑμέας δʼ ἤγαγον ἐνθάδʼ ὑπὲρ μέγα λαῖμα θαλάσσης, |
| 482 | Primary οὔ τι κακὰ φρονέων, ἀλλʼ ἐνθάδε πίονα νηὸν |
| 483 | Primary ἕξετʼ ἐμὸν πᾶσιν μάλα τίμιον ἀνθρώποισι, |
| 484 | Primary βουλάς τʼ ἀθανάτων εἰδήσετε, τῶν ἰότητι |
| 485 | Primary αἰεὶ τιμήσεσθε διαμπερὲς ἤματα πάντα. |
| 486 | Primary ἀλλʼ ἄγεθʼ, ὡς ἂν ἐγὼ εἴπω, πείθεσθε τάχιστα· |
| 487 | Primary ἱστία μὲν πρῶτον κάθετον λύσαντε βοείας, |
| 488 | Primary νῆα δʼ ἔπειτα θοὴν μὲν ἐπʼ ἠπείρου ἐρύσασθε, |
| 489 | Primary ἐκ δὲ κτήμαθʼ ἕλεσθε καὶ ἔντεα νηὸς ἐίσης |
| 490 | Primary καὶ βωμὸν ποιήσατʼ ἐπὶ ῥηγμῖνι θαλάσσης· |
| 491 | Primary πῦρ δʼ ἐπικαίοντες ἐπί τʼ ἄλφιτα λευκὰ θύοντες |
| 492 | Primary εὔχεσθαι δὴ ἔπειτα παριστάμενοι περὶ βωμόν. |
| 493 | Primary ὡς μὲν ἐγὼ τὸ πρῶτον ἐν ἠεροειδέι πόντῳ |
| 494 | Primary εἰδόμενος δελφῖνι θοῆς ἐπὶ νηὸς ὄρουσα, |
| 495 | Primary ὣς ἐμοὶ εὔχεσθαι Δελφινίῳ· αὐτὰρ ὁ βωμὸς |
| 496 | Primary αὐτὸς Δελφίνιος καὶ ἐπόψιος ἔσσεται αἰεί. |
| 497 | Primary δειπνῆσαί τʼ ἄρʼ ἔπειτα θοῇ παρὰ νηὶ μελαίνῃ |
| 498 | Primary καὶ σπεῖσαι μακάρεσσι θεοῖς, οἳ Ὄλυμπον ἔχουσιν. |
| 499 | Primary αὐτὰρ ἐπὴν σίτοιο μελίφρονος ἐξ ἔρον ἧσθε, |
| 500 | Primary ἔρχεσθαί θʼ ἅμʼ ἐμοὶ καὶ ἰηπαιήονʼ ἀείδειν, |
| 501 | Primary εἰς ὅ κε χῶρον ἵκησθον, ἵνʼ ἕξετε πίονα νηόν. --> |
| 502 | Primary ὣς ἔφαθʼ· οἳ δʼ ἄρα τοῦ μάλα μὲν κλύον ἠδʼ ἐπίθοντο. |
| 503 | Primary ἱστία μὲν πρῶτον κάθεσαν, λῦσαν δὲ βοείας, |
| 504 | Primary ἱστὸν δʼ ἱστοδόκῃ πέλασαν προτόνοισιν ὑφέντες· |
| 505 | Primary ἐκ δὲ καὶ αὐτοὶ βαῖνον ἐπὶ ῥηγμῖνι θαλάσσης. |
| 506 | Primary ἐκ δʼ ἁλὸς ἤπειρόνδε θοὴν ἀνὰ νῆʼ ἐρύσαντο |
| 507 | Primary ὑψοῦ ἐπὶ ψαμάθοις, ὑπὸ δʼ ἕρματα μακρὰ τάνυσσαν· |
| 508 | Primary καὶ βωμὸν ποίησαν ἐπὶ ῥηγμῖνι θαλάσσης· |
| 509 | Primary πῦρ δʼ ἐπικαίοντες ἐπί τʼ ἄλφιτα λευκὰ θύοντες |
| 510 | Primary εὔχονθʼ, ὡς ἐκέλευε, παριστάμενοι περὶ βωμόν. |
| 511 | Primary δόρπον ἔπειθʼ εἵλοντο θοῇ παρὰ νηὶ μελαίνῃ |
| 512 | Primary καὶ σπεῖσαν μακάρεσσι θεοῖς, οἳ Ὄλυμπον ἔχουσιν. |
| 513 | Primary αὐτὰρ ἐπεὶ πόσιος καὶ ἐδητύος ἐξ ἔρον ἕντο, |
| 514 | Primary βάν ῥʼ ἴμεν· ἦρχε δʼ ἄρα σφιν ἄναξ Διὸς υἱὸς Ἀπόλλων, |
| 515 | Primary φόρμιγγʼ ἐν χείρεσσιν ἔχων, ἐρατὸν κιθαρίζων, |
| 516 | Primary καλὰ καὶ ὕψι βιβάς· οἳ δὲ ῥήσσοντες ἕποντο |
| 517 | Primary Κρῆτες πρὸς Πυθὼ καὶ ἰηπαιήονʼ ἄειδον, |
| 518 | Primary οἷοί τε Κρητῶν παιήονες, οἷσί τε Μοῦσα |
| 519 | Primary ἐν στήθεσσιν ἔθηκε θεὰ μελίγηρυν ἀοιδήν. |
| 520 | Primary ἄκμητοι δὲ λόφον προσέβαν ποσίν, αἶψα δʼ ἵκοντο |
| 521 | Primary Παρνησὸν καὶ χῶρον ἐπήρατον, ἔνθʼ ἄρʼ ἔμελλον |
| 522 | Primary οἰκήσειν πολλοῖσι τετιμένοι ἀνθρώποισι· |
| 523 | Primary δεῖξε δʼ ἄγων ἄδυτον ζάθεον καὶ πίονα νηόν. |
| 524 | Primary τῶν δʼ ὠρίνετο θυμὸς ἐνὶ στήθεσσι φίλοισι· |
| 525 | Primary τὸν καὶ ἀνειρόμενος Κρητῶν ἀγὸς ἀντίον ηὔδα· |
| 526 | Primary -->ὦ ἄνα, εἰ δὴ τῆλε φίλων καὶ πατρίδος αἴης |
| 527 | Primary ἤγαγες· οὕτω που τῷ σῷ φίλον ἔπλετο θυμῷ· |
| 528 | Primary πῶς καὶ νῦν βιόμεσθα; τό σε φράζεσθαι ἄνωγμεν. |
| 529 | Primary οὔτε τρυγηφόρος ἥδε γʼ ἐπήρατος οὔτʼ εὐλείμων, |
| 530 | Primary ὥστʼ ἀπό τʼ εὖ ζώειν καὶ ἅμʼ ἀνθρώποισιν ὀπάζειν. --> |
| 531 | Primary τοὺς δʼ ἐπιμειδήσας προσέφη Διὸς υἱὸς Ἀπόλλων· |
| 532 | Primary -->νήπιοι ἄνθρωποι, δυστλήμονες, οἳ μελεδῶνας |
| 533 | Primary βούλεσθʼ ἀργαλέους τε πόνους καὶ στείνεα θυμῷ· |
| 534 | Primary ῥηίδιον ἔπος ὔμμʼ ἐρέω καὶ ἐπὶ φρεσὶ θήσω, |
| 535 | Primary δεξιτερῇ μάλʼ ἕκαστος ἔχων ἐν χειρὶ μάχαιραν, |
| 536 | Primary σφάζειν αἰεὶ μῆλα· τὰ δʼ ἄφθονα πάντα παρέσται, |
| 537 | Primary ὅσσα τʼ ἐμοί κʼ ἀγάγωσι περικλυτὰ φῦλʼ ἀνθρώπων· |
| 538 | Primary νηὸν δὲ προφύλαχθε, δέδεχθε δὲ φῦλʼ ἀνθρώπων |
| 539 | Primary ἐνθάδʼ ἀγειρομένων καὶ ἐμὴν ἰθύν τε μάλιστα. |
| 539a | Primary [ δείκνυσθε θνητοῖσι· σὺ δὲ φρεσὶ δέξο θέμιστα. |
| 539b | Primary εἰ δέ τις ἀφραδίῃς οὐ πείσεται, ἀλλʼ ἀλογήσει ] |
| 540 | Primary ἠέ τι τηΰσιον ἔπος ἔσσεται ἠέ τι ἔργον |
| 541 | Primary ὕβρις θʼ, ἣ θέμις ἐστὶ καταθνητῶν ἀνθρώπων, |
| 542 | Primary ἄλλοι ἔπειθʼ ὑμῖν σημάντορες ἄνδρες ἔσονται, |
| 543 | Primary τῶν ὑπʼ ἀναγκαίῃ δεδμήσεσθʼ ἤματα πάντα. |
| 544 | Primary εἴρηταί τοι πάντα· σὺ δὲ φρεσὶ σῇσι φύλαξαι. --> |
| 545 | Primary καὶ σὺ μὲν οὕτω χαῖρε, Διὸς καὶ Λητοῦς υἱέ· |
| 546 | Primary αὐτὰρ ἐγὼ καὶ σεῖο καὶ ἄλλης μνήσομʼ ἀοιδῆς. |