Reader
Reader | Iliad, Book 16
Iliad
Homer
Text
Position
Line 1 of 867
Waypoints
| Line Ref | Monro and Allen | Ancient Greek |
|---|---|
| 1 | Primary ὣς οἳ μὲν περὶ νηὸς ἐϋσσέλμοιο μάχοντο· |
| 2 | Primary Πάτροκλος δʼ Ἀχιλῆϊ παρίστατο ποιμένι λαῶν |
| 3 | Primary δάκρυα θερμὰ χέων ὥς τε κρήνη μελάνυδρος, |
| 4 | Primary ἥ τε κατʼ αἰγίλιπος πέτρης δνοφερὸν χέει ὕδωρ. |
| 5 | Primary τὸν δὲ ἰδὼν ᾤκτιρε ποδάρκης δῖος Ἀχιλλεύς, |
| 6 | Primary καί μιν φωνήσας ἔπεα πτερόεντα προσηύδα· |
| 7 | Primary τίπτε δεδάκρυσαι Πατρόκλεες, ἠΰτε κούρη |
| 8 | Primary νηπίη, ἥ θʼ ἅμα μητρὶ θέουσʼ ἀνελέσθαι ἀνώγει |
| 9 | Primary εἱανοῦ ἁπτομένη, καί τʼ ἐσσυμένην κατερύκει, |
| 10 | Primary δακρυόεσσα δέ μιν ποτιδέρκεται, ὄφρʼ ἀνέληται· |
| 11 | Primary τῇ ἴκελος Πάτροκλε τέρεν κατὰ δάκρυον εἴβεις. |
| 12 | Primary ἠέ τι Μυρμιδόνεσσι πιφαύσκεαι, ἢ ἐμοὶ αὐτῷ, |
| 13 | Primary ἦέ τινʼ ἀγγελίην Φθίης ἐξέκλυες οἶος; |
| 14 | Primary ζώειν μὰν ἔτι φασὶ Μενοίτιον Ἄκτορος υἱόν, |
| 15 | Primary ζώει δʼ Αἰακίδης Πηλεὺς μετὰ Μυρμιδόνεσσι; |
| 16 | Primary τῶν κε μάλʼ ἀμφοτέρων ἀκαχοίμεθα τεθνηώτων. |
| 17 | Primary ἦε σύ γʼ Ἀργείων ὀλοφύρεαι, ὡς ὀλέκονται |
| 18 | Primary νηυσὶν ἔπι γλαφυρῇσιν ὑπερβασίης ἕνεκα σφῆς; |
| 19 | Primary ἐξαύδα, μὴ κεῦθε νόῳ, ἵνα εἴδομεν ἄμφω. |
| 20 | Primary τὸν δὲ βαρὺ στενάχων προσέφης Πατρόκλεες ἱππεῦ· |
| 21 | Primary ὦ Ἀχιλεῦ Πηλῆος υἱὲ μέγα φέρτατʼ Ἀχαιῶν |
| 22 | Primary μὴ νεμέσα· τοῖον γὰρ ἄχος βεβίηκεν Ἀχαιούς. |
| 23 | Primary οἳ μὲν γὰρ δὴ πάντες, ὅσοι πάρος ἦσαν ἄριστοι, |
| 24 | Primary ἐν νηυσὶν κέαται βεβλημένοι οὐτάμενοί τε. |
| 25 | Primary βέβληται μὲν ὃ Τυδεΐδης κρατερὸς Διομήδης, |
| 26 | Primary οὔτασται δʼ Ὀδυσεὺς δουρικλυτὸς ἠδʼ Ἀγαμέμνων, |
| 27 | Primary βέβληται δὲ καὶ Εὐρύπυλος κατὰ μηρὸν ὀϊστῷ. |
| 28 | Primary τοὺς μέν τʼ ἰητροὶ πολυφάρμακοι ἀμφιπένονται |
| 29 | Primary ἕλκεʼ ἀκειόμενοι· σὺ δʼ ἀμήχανος ἔπλευ Ἀχιλλεῦ. |
| 30 | Primary μὴ ἐμέ γʼ οὖν οὗτός γε λάβοι χόλος, ὃν σὺ φυλάσσεις |
| 31 | Primary αἰναρέτη· τί σευ ἄλλος ὀνήσεται ὀψίγονός περ |
| 32 | Primary αἴ κε μὴ Ἀργείοισιν ἀεικέα λοιγὸν ἀμύνῃς; |
| 33 | Primary νηλεές, οὐκ ἄρα σοί γε πατὴρ ἦν ἱππότα Πηλεύς, |
| 34 | Primary οὐδὲ Θέτις μήτηρ· γλαυκὴ δέ σε τίκτε θάλασσα |
| 35 | Primary πέτραι τʼ ἠλίβατοι, ὅτι τοι νόος ἐστὶν ἀπηνής. |
| 36 | Primary εἰ δέ τινα φρεσὶ σῇσι θεοπροπίην ἀλεείνεις |
| 37 | Primary καί τινά τοι πὰρ Ζηνὸς ἐπέφραδε πότνια μήτηρ, |
| 38 | Primary ἀλλʼ ἐμέ περ πρόες ὦχʼ, ἃμα δʼ ἄλλον λαὸν ὄπασσον |
| 39 | Primary Μυρμιδόνων, ἤν πού τι φόως Δαναοῖσι γένωμαι. |
| 40 | Primary δὸς δέ μοι ὤμοιιν τὰ σὰ τεύχεα θωρηχθῆναι, |
| 41 | Primary αἴ κʼ ἐμὲ σοὶ ἴσκοντες ἀπόσχωνται πολέμοιο |
| 42 | Primary Τρῶες, ἀναπνεύσωσι δʼ Ἀρήϊοι υἷες Ἀχαιῶν |
| 43 | Primary τειρόμενοι· ὀλίγη δέ τʼ ἀνάπνευσις πολέμοιο. |
| 44 | Primary ῥεῖα δέ κʼ ἀκμῆτες κεκμηότας ἄνδρας ἀϋτῇ |
| 45 | Primary ὤσαιμεν προτὶ ἄστυ νεῶν ἄπο καὶ κλισιάων. |
| 46 | Primary ὣς φάτο λισσόμενος μέγα νήπιος· ἦ γὰρ ἔμελλεν |
| 47 | Primary οἷ αὐτῷ θάνατόν τε κακὸν καὶ κῆρα λιτέσθαι. |
| 48 | Primary τὸν δὲ μέγʼ ὀχθήσας προσέφη πόδας ὠκὺς Ἀχιλλεύς· |
| 49 | Primary ὤ μοι διογενὲς Πατρόκλεες οἷον ἔειπες· |
| 50 | Primary οὔτε θεοπροπίης ἐμπάζομαι ἥν τινα οἶδα, |
| 51 | Primary οὔτέ τί μοι πὰρ Ζηνὸς ἐπέφραδε πότνια μήτηρ· |
| 52 | Primary ἀλλὰ τόδʼ αἰνὸν ἄχος κραδίην καὶ θυμὸν ἱκάνει, |
| 53 | Primary ὁππότε δὴ τὸν ὁμοῖον ἀνὴρ ἐθέλῃσιν ἀμέρσαι |
| 54 | Primary καὶ γέρας ἂψ ἀφελέσθαι, ὅ τε κράτεϊ προβεβήκῃ· |
| 55 | Primary αἰνὸν ἄχος τό μοί ἐστιν, ἐπεὶ πάθον ἄλγεα θυμῷ. |
| 56 | Primary κούρην ἣν ἄρα μοι γέρας ἔξελον υἷες Ἀχαιῶν, |
| 57 | Primary δουρὶ δʼ ἐμῷ κτεάτισσα πόλιν εὐτείχεα πέρσας, |
| 58 | Primary τὴν ἂψ ἐκ χειρῶν ἕλετο κρείων Ἀγαμέμνων |
| 59 | Primary Ἀτρεΐδης ὡς εἴ τινʼ ἀτίμητον μετανάστην. |
| 60 | Primary ἀλλὰ τὰ μὲν προτετύχθαι ἐάσομεν· οὐδʼ ἄρα πως ἦν |
| 61 | Primary ἀσπερχὲς κεχολῶσθαι ἐνὶ φρεσίν· ἤτοι ἔφην γε |
| 62 | Primary οὐ πρὶν μηνιθμὸν καταπαυσέμεν, ἀλλʼ ὁπότʼ ἂν δὴ |
| 63 | Primary νῆας ἐμὰς ἀφίκηται ἀϋτή τε πτόλεμός τε. |
| 64 | Primary τύνη δʼ ὤμοιιν μὲν ἐμὰ κλυτὰ τεύχεα δῦθι, |
| 65 | Primary ἄρχε δὲ Μυρμιδόνεσσι φιλοπτολέμοισι μάχεσθαι, |
| 66 | Primary εἰ δὴ κυάνεον Τρώων νέφος ἀμφιβέβηκε |
| 67 | Primary νηυσὶν ἐπικρατέως, οἳ δὲ ῥηγμῖνι θαλάσσης |
| 68 | Primary κεκλίαται, χώρης ὀλίγην ἔτι μοῖραν ἔχοντες |
| 69 | Primary Ἀργεῖοι, Τρώων δὲ πόλις ἐπὶ πᾶσα βέβηκε |
| 70 | Primary θάρσυνος· οὐ γὰρ ἐμῆς κόρυθος λεύσσουσι μέτωπον |
| 71 | Primary ἐγγύθι λαμπομένης· τάχα κεν φεύγοντες ἐναύλους |
| 72 | Primary πλήσειαν νεκύων, εἴ μοι κρείων Ἀγαμέμνων |
| 73 | Primary ἤπια εἰδείη· νῦν δὲ στρατὸν ἀμφιμάχονται. |
| 74 | Primary οὐ γὰρ Τυδεΐδεω Διομήδεος ἐν παλάμῃσι |
| 75 | Primary μαίνεται ἐγχείη Δαναῶν ἀπὸ λοιγὸν ἀμῦναι· |
| 76 | Primary οὐδέ πω Ἀτρεΐδεω ὀπὸς ἔκλυον αὐδήσαντος |
| 77 | Primary ἐχθρῆς ἐκ κεφαλῆς· ἀλλʼ Ἕκτορος ἀνδροφόνοιο |
| 78 | Primary Τρωσὶ κελεύοντος περιάγνυται, οἳ δʼ ἀλαλητῷ |
| 79 | Primary πᾶν πεδίον κατέχουσι μάχῃ νικῶντες Ἀχαιούς. |
| 80 | Primary ἀλλὰ καὶ ὧς Πάτροκλε νεῶν ἄπο λοιγὸν ἀμύνων |
| 81 | Primary ἔμπεσʼ ἐπικρατέως, μὴ δὴ πυρὸς αἰθομένοιο |
| 82 | Primary νῆας ἐνιπρήσωσι, φίλον δʼ ἀπὸ νόστον ἕλωνται. |
| 83 | Primary πείθεο δʼ ὥς τοι ἐγὼ μύθου τέλος ἐν φρεσὶ θείω, |
| 84 | Primary ὡς ἄν μοι τιμὴν μεγάλην καὶ κῦδος ἄρηαι |
| 85 | Primary πρὸς πάντων Δαναῶν, ἀτὰρ οἳ περικαλλέα κούρην |
| 86 | Primary ἂψ ἀπονάσσωσιν, ποτὶ δʼ ἀγλαὰ δῶρα πόρωσιν. |
| 87 | Primary ἐκ νηῶν ἐλάσας ἰέναι πάλιν· εἰ δέ κεν αὖ τοι |
| 88 | Primary δώῃ κῦδος ἀρέσθαι ἐρίγδουπος πόσις Ἥρης, |
| 89 | Primary μὴ σύ γʼ ἄνευθεν ἐμεῖο λιλαίεσθαι πολεμίζειν |
| 90 | Primary Τρωσὶ φιλοπτολέμοισιν· ἀτιμότερον δέ με θήσεις· |
| 91 | Primary μὴ δʼ ἐπαγαλλόμενος πολέμῳ καὶ δηϊοτῆτι |
| 92 | Primary Τρῶας ἐναιρόμενος προτὶ Ἴλιον ἡγεμονεύειν, |
| 93 | Primary μή τις ἀπʼ Οὐλύμποιο θεῶν αἰειγενετάων |
| 94 | Primary ἐμβήῃ· μάλα τούς γε φιλεῖ ἑκάεργος Ἀπόλλων· |
| 95 | Primary ἀλλὰ πάλιν τρωπᾶσθαι, ἐπὴν φάος ἐν νήεσσι |
| 96 | Primary θήῃς, τοὺς δʼ ἔτʼ ἐᾶν πεδίον κάτα δηριάασθαι. |
| 97 | Primary αἲ γὰρ Ζεῦ τε πάτερ καὶ Ἀθηναίη καὶ Ἄπολλον |
| 98 | Primary μήτέ τις οὖν Τρώων θάνατον φύγοι ὅσσοι ἔασι, |
| 99 | Primary μήτέ τις Ἀργείων, νῶϊν δʼ ἐκδῦμεν ὄλεθρον, |
| 100 | Primary ὄφρʼ οἶοι Τροίης ἱερὰ κρήδεμνα λύωμεν. |
| 101 | Primary ὣς οἳ μὲν τοιαῦτα πρὸς ἀλλήλους ἀγόρευον, |
| 102 | Primary Αἴας δʼ οὐκ ἔτʼ ἔμιμνε· βιάζετο γὰρ βελέεσσι· |
| 103 | Primary δάμνα μιν Ζηνός τε νόος καὶ Τρῶες ἀγαυοὶ |
| 104 | Primary βάλλοντες· δεινὴν δὲ περὶ κροτάφοισι φαεινὴ |
| 105 | Primary πήληξ βαλλομένη καναχὴν ἔχε, βάλλετο δʼ αἰεὶ |
| 106 | Primary κὰπ φάλαρʼ εὐποίηθʼ· ὃ δʼ ἀριστερὸν ὦμον ἔκαμνεν |
| 107 | Primary ἔμπεδον αἰὲν ἔχων σάκος αἰόλον· οὐδὲ δύναντο |
| 108 | Primary ἀμφʼ αὐτῷ πελεμίξαι ἐρείδοντες βελέεσσιν. |
| 109 | Primary αἰεὶ δʼ ἀργαλέῳ ἔχετʼ ἄσθματι, κὰδ δέ οἱ ἱδρὼς |
| 110 | Primary πάντοθεν ἐκ μελέων πολὺς ἔρρεεν, οὐδέ πῃ εἶχεν |
| 111 | Primary ἀμπνεῦσαι· πάντῃ δὲ κακὸν κακῷ ἐστήρικτο. |
| 112 | Primary ἔσπετε νῦν μοι Μοῦσαι Ὀλύμπια δώματʼ ἔχουσαι, |
| 113 | Primary ὅππως δὴ πρῶτον πῦρ ἔμπεσε νηυσὶν Ἀχαιῶν. |
| 114 | Primary Ἕκτωρ Αἴαντος δόρυ μείλινον ἄγχι παραστὰς |
| 115 | Primary πλῆξʼ ἄορι μεγάλῳ αἰχμῆς παρὰ καυλὸν ὄπισθεν, |
| 116 | Primary ἀντικρὺ δʼ ἀπάραξε· τὸ μὲν Τελαμώνιος Αἴας |
| 117 | Primary πῆλʼ αὔτως ἐν χειρὶ κόλον δόρυ, τῆλε δʼ ἀπʼ αὐτοῦ |
| 118 | Primary αἰχμὴ χαλκείη χαμάδις βόμβησε πεσοῦσα. |
| 119 | Primary γνῶ δʼ Αἴας κατὰ θυμὸν ἀμύμονα ῥίγησέν τε |
| 120 | Primary ἔργα θεῶν, ὅ ῥα πάγχυ μάχης ἐπὶ μήδεα κεῖρε |
| 121 | Primary Ζεὺς ὑψιβρεμέτης, Τρώεσσι δὲ βούλετο νίκην· |
| 122 | Primary χάζετο δʼ ἐκ βελέων. τοὶ δʼ ἔμβαλον ἀκάματον πῦρ |
| 123 | Primary νηῒ θοῇ· τῆς δʼ αἶψα κατʼ ἀσβέστη κέχυτο φλόξ. |
| 124 | Primary ὣς τὴν μὲν πρυμνὴν πῦρ ἄμφεπεν· αὐτὰρ Ἀχιλλεὺς |
| 125 | Primary μηρὼ πληξάμενος Πατροκλῆα προσέειπεν· |
| 126 | Primary ὄρσεο διογενὲς Πατρόκλεες ἱπποκέλευθε· |
| 127 | Primary λεύσσω δὴ παρὰ νηυσὶ πυρὸς δηΐοιο ἰωήν· |
| 128 | Primary μὴ δὴ νῆας ἕλωσι καὶ οὐκέτι φυκτὰ πέλωνται· |
| 129 | Primary δύσεο τεύχεα θᾶσσον, ἐγὼ δέ κε λαὸν ἀγείρω. |
| 130 | Primary ὣς φάτο, Πάτροκλος δὲ κορύσσετο νώροπι χαλκῷ. |
| 131 | Primary κνημῖδας μὲν πρῶτα περὶ κνήμῃσιν ἔθηκε |
| 132 | Primary καλάς, ἀργυρέοισιν ἐπισφυρίοις ἀραρυίας· |
| 133 | Primary δεύτερον αὖ θώρηκα περὶ στήθεσσιν ἔδυνε |
| 134 | Primary ποικίλον ἀστερόεντα ποδώκεος Αἰακίδαο. |
| 135 | Primary ἀμφὶ δʼ ἄρʼ ὤμοισιν βάλετο ξίφος ἀργυρόηλον |
| 136 | Primary χάλκεον, αὐτὰρ ἔπειτα σάκος μέγα τε στιβαρόν τε· |
| 137 | Primary κρατὶ δʼ ἐπʼ ἰφθίμῳ κυνέην εὔτυκτον ἔθηκεν |
| 138 | Primary ἵππουριν· δεινὸν δὲ λόφος καθύπερθεν ἔνευεν. |
| 139 | Primary εἵλετο δʼ ἄλκιμα δοῦρε, τά οἱ παλάμηφιν ἀρήρει. |
| 140 | Primary ἔγχος δʼ οὐχ ἕλετʼ οἶον ἀμύμονος Αἰακίδαο |
| 141 | Primary βριθὺ μέγα στιβαρόν· τὸ μὲν οὐ δύνατʼ ἄλλος Ἀχαιῶν |
| 142 | Primary πάλλειν, ἀλλά μιν οἶος ἐπίστατο πῆλαι Ἀχιλλεὺς |
| 143 | Primary Πηλιάδα μελίην, τὴν πατρὶ φίλῳ πόρε Χείρων |
| 144 | Primary Πηλίου ἐκ κορυφῆς, φόνον ἔμμεναι ἡρώεσσιν. |
| 145 | Primary ἵππους δʼ Αὐτομέδοντα θοῶς ζευγνῦμεν ἄνωγε, |
| 146 | Primary τὸν μετʼ Ἀχιλλῆα ῥηξήνορα τῖε μάλιστα, |
| 147 | Primary πιστότατος δέ οἱ ἔσκε μάχῃ ἔνι μεῖναι ὁμοκλήν. |
| 148 | Primary τῷ δὲ καὶ Αὐτομέδων ὕπαγε ζυγὸν ὠκέας ἵππους |
| 149 | Primary Ξάνθον καὶ Βαλίον, τὼ ἅμα πνοιῇσι πετέσθην, |
| 150 | Primary τοὺς ἔτεκε Ζεφύρῳ ἀνέμῳ Ἅρπυια Ποδάργη |
| 151 | Primary βοσκομένη λειμῶνι παρὰ ῥόον Ὠκεανοῖο. |
| 152 | Primary ἐν δὲ παρηορίῃσιν ἀμύμονα Πήδασον ἵει, |
| 153 | Primary τόν ῥά ποτʼ Ἠετίωνος ἑλὼν πόλιν ἤγαγʼ Ἀχιλλεύς, |
| 154 | Primary ὃς καὶ θνητὸς ἐὼν ἕπεθʼ ἵπποις ἀθανάτοισι. |
| 155 | Primary Μυρμιδόνας δʼ ἄρʼ ἐποιχόμενος θώρηξεν Ἀχιλλεὺς |
| 156 | Primary πάντας ἀνὰ κλισίας σὺν τεύχεσιν· οἳ δὲ λύκοι ὣς |
| 157 | Primary ὠμοφάγοι, τοῖσίν τε περὶ φρεσὶν ἄσπετος ἀλκή, |
| 158 | Primary οἵ τʼ ἔλαφον κεραὸν μέγαν οὔρεσι δῃώσαντες |
| 159 | Primary δάπτουσιν· πᾶσιν δὲ παρήϊον αἵματι φοινόν· |
| 160 | Primary καί τʼ ἀγεληδὸν ἴασιν ἀπὸ κρήνης μελανύδρου |
| 161 | Primary λάψοντες γλώσσῃσιν ἀραιῇσιν μέλαν ὕδωρ |
| 162 | Primary ἄκρον ἐρευγόμενοι φόνον αἵματος· ἐν δέ τε θυμὸς |
| 163 | Primary στήθεσιν ἄτρομός ἐστι, περιστένεται δέ τε γαστήρ· |
| 164 | Primary τοῖοι Μυρμιδόνων ἡγήτορες ἠδὲ μέδοντες |
| 165 | Primary ἀμφʼ ἀγαθὸν θεράποντα ποδώκεος Αἰακίδαο |
| 166 | Primary ῥώοντʼ· ἐν δʼ ἄρα τοῖσιν ἀρήϊος ἵστατʼ Ἀχιλλεύς, |
| 167 | Primary ὀτρύνων ἵππους τε καὶ ἀνέρας ἀσπιδιώτας. |
| 168 | Primary πεντήκοντʼ ἦσαν νῆες θοαί, ᾗσιν Ἀχιλλεὺς |
| 169 | Primary ἐς Τροίην ἡγεῖτο Διῒ φίλος· ἐν δὲ ἑκάστῃ |
| 170 | Primary πεντήκοντʼ ἔσαν ἄνδρες ἐπὶ κληῗσιν ἑταῖροι· |
| 171 | Primary πέντε δʼ ἄρʼ ἡγεμόνας ποιήσατο τοῖς ἐπεποίθει |
| 172 | Primary σημαίνειν· αὐτὸς δὲ μέγα κρατέων ἤνασσε. |
| 173 | Primary τῆς μὲν ἰῆς στιχὸς ἦρχε Μενέσθιος αἰολοθώρηξ |
| 174 | Primary υἱὸς Σπερχειοῖο διιπετέος ποταμοῖο· |
| 175 | Primary ὃν τέκε Πηλῆος θυγάτηρ καλὴ Πολυδώρη |
| 176 | Primary Σπερχειῷ ἀκάμαντι γυνὴ θεῷ εὐνηθεῖσα, |
| 177 | Primary αὐτὰρ ἐπίκλησιν Βώρῳ Περιήρεος υἷι, |
| 178 | Primary ὅς ῥʼ ἀναφανδὸν ὄπυιε πορὼν ἀπερείσια ἕδνα. |
| 179 | Primary τῆς δʼ ἑτέρης Εὔδωρος ἀρήϊος ἡγεμόνευε |
| 180 | Primary παρθένιος, τὸν ἔτικτε χορῷ καλὴ Πολυμήλη |
| 181 | Primary Φύλαντος θυγάτηρ· τῆς δὲ κρατὺς ἀργεϊφόντης |
| 182 | Primary ἠράσατʼ, ὀφθαλμοῖσιν ἰδὼν μετὰ μελπομένῃσιν |
| 183 | Primary ἐν χορῷ Ἀρτέμιδος χρυσηλακάτου κελαδεινῆς. |
| 184 | Primary αὐτίκα δʼ εἰς ὑπερῷʼ ἀναβὰς παρελέξατο λάθρῃ |
| 185 | Primary Ἑρμείας ἀκάκητα, πόρεν δέ οἱ ἀγλαὸν υἱὸν |
| 186 | Primary Εὔδωρον πέρι μὲν θείειν ταχὺν ἠδὲ μαχητήν. |
| 187 | Primary αὐτὰρ ἐπεὶ δὴ τόν γε μογοστόκος Εἰλείθυια |
| 188 | Primary ἐξάγαγε πρὸ φόως δὲ καὶ ἠελίου ἴδεν αὐγάς, |
| 189 | Primary τὴν μὲν Ἐχεκλῆος κρατερὸν μένος Ἀκτορίδαο |
| 190 | Primary ἠγάγετο πρὸς δώματʼ, ἐπεὶ πόρε μυρία ἕδνα, |
| 191 | Primary τὸν δʼ ὃ γέρων Φύλας εὖ ἔτρεφεν ἠδʼ ἀτίταλλεν |
| 192 | Primary ἀμφαγαπαζόμενος ὡς εἴ θʼ ἑὸν υἱὸν ἐόντα. |
| 193 | Primary τῆς δὲ τρίτης Πείσανδρος ἀρήϊος ἡγεμόνευε |
| 194 | Primary Μαιμαλίδης, ὃς πᾶσι μετέπρεπε Μυρμιδόνεσσιν |
| 195 | Primary ἔγχεϊ μάρνασθαι μετὰ Πηλεΐωνος ἑταῖρον. |
| 196 | Primary τῆς δὲ τετάρτης ἦρχε γέρων ἱππηλάτα Φοῖνιξ, |
| 197 | Primary πέμπτης δʼ Ἀλκιμέδων Λαέρκεος υἱὸς ἀμύμων. |
| 198 | Primary αὐτὰρ ἐπεὶ δὴ πάντας ἅμʼ ἡγεμόνεσσιν Ἀχιλλεὺς |
| 199 | Primary στῆσεν ἐῢ κρίνας, κρατερὸν δʼ ἐπὶ μῦθον ἔτελλε· |
| 200 | Primary Μυρμιδόνες μή τίς μοι ἀπειλάων λελαθέσθω, |
| 201 | Primary ἃς ἐπὶ νηυσὶ θοῇσιν ἀπειλεῖτε Τρώεσσι |
| 202 | Primary πάνθʼ ὑπὸ μηνιθμόν, καί μʼ ᾐτιάασθε ἕκαστος· |
| 203 | Primary σχέτλιε Πηλέος υἱὲ χόλῳ ἄρα σʼ ἔτρεφε μήτηρ, |
| 204 | Primary νηλεές, ὃς παρὰ νηυσὶν ἔχεις ἀέκοντας ἑταίρους· |
| 205 | Primary οἴκαδέ περ σὺν νηυσὶ νεώμεθα ποντοπόροισιν |
| 206 | Primary αὖτις, ἐπεί ῥά τοι ὧδε κακὸς χόλος ἔμπεσε θυμῷ. |
| 207 | Primary ταῦτά μʼ ἀγειρόμενοι θάμʼ ἐβάζετε· νῦν δὲ πέφανται |
| 208 | Primary φυλόπιδος μέγα ἔργον, ἕης τὸ πρίν γʼ ἐράασθε. |
| 209 | Primary ἔνθά τις ἄλκιμον ἦτορ ἔχων Τρώεσσι μαχέσθω. |
| 210 | Primary ὣς εἰπὼν ὄτρυνε μένος καὶ θυμὸν ἑκάστου. |
| 211 | Primary μᾶλλον δὲ στίχες ἄρθεν, ἐπεὶ βασιλῆος ἄκουσαν. |
| 212 | Primary ὡς δʼ ὅτε τοῖχον ἀνὴρ ἀράρῃ πυκινοῖσι λίθοισι |
| 213 | Primary δώματος ὑψηλοῖο βίας ἀνέμων ἀλεείνων, |
| 214 | Primary ὣς ἄραρον κόρυθές τε καὶ ἀσπίδες ὀμφαλόεσσαι. |
| 215 | Primary ἀσπὶς ἄρʼ ἀσπίδʼ ἔρειδε, κόρυς κόρυν, ἀνέρα δʼ ἀνήρ· |
| 216 | Primary ψαῦον δʼ ἱππόκομοι κόρυθες λαμπροῖσι φάλοισι |
| 217 | Primary νευόντων, ὡς πυκνοὶ ἐφέστασαν ἀλλήλοισι. |
| 218 | Primary πάντων δὲ προπάροιθε δύʼ ἀνέρε θωρήσσοντο |
| 219 | Primary Πάτροκλός τε καὶ Αὐτομέδων ἕνα θυμὸν ἔχοντες |
| 220 | Primary πρόσθεν Μυρμιδόνων πολεμιζέμεν. αὐτὰρ Ἀχιλλεὺς |
| 221 | Primary βῆ ῥʼ ἴμεν ἐς κλισίην, χηλοῦ δʼ ἀπὸ πῶμʼ ἀνέῳγε |
| 222 | Primary καλῆς δαιδαλέης, τήν οἱ Θέτις ἀργυρόπεζα |
| 223 | Primary θῆκʼ ἐπὶ νηὸς ἄγεσθαι ἐῢ πλήσασα χιτώνων |
| 224 | Primary χλαινάων τʼ ἀνεμοσκεπέων οὔλων τε ταπήτων. |
| 225 | Primary ἔνθα δέ οἱ δέπας ἔσκε τετυγμένον, οὐδέ τις ἄλλος |
| 226 | Primary οὔτʼ ἀνδρῶν πίνεσκεν ἀπʼ αὐτοῦ αἴθοπα οἶνον, |
| 227 | Primary οὔτέ τεῳ σπένδεσκε θεῶν, ὅτε μὴ Διὶ πατρί. |
| 228 | Primary τό ῥα τότʼ ἐκ χηλοῖο λαβὼν ἐκάθηρε θεείῳ |
| 229 | Primary πρῶτον, ἔπειτα δʼ ἔνιψʼ ὕδατος καλῇσι ῥοῇσι, |
| 230 | Primary νίψατο δʼ αὐτὸς χεῖρας, ἀφύσσατο δʼ αἴθοπα οἶνον. |
| 231 | Primary εὔχετʼ ἔπειτα στὰς μέσῳ ἕρκεϊ, λεῖβε δὲ οἶνον |
| 232 | Primary οὐρανὸν εἰσανιδών· Δία δʼ οὐ λάθε τερπικέραυνον· |
| 233 | Primary Ζεῦ ἄνα Δωδωναῖε Πελασγικὲ τηλόθι ναίων |
| 234 | Primary Δωδώνης μεδέων δυσχειμέρου, ἀμφὶ δὲ Σελλοὶ |
| 235 | Primary σοὶ ναίουσʼ ὑποφῆται ἀνιπτόποδες χαμαιεῦναι, |
| 236 | Primary ἠμὲν δή ποτʼ ἐμὸν ἔπος ἔκλυες εὐξαμένοιο, |
| 237 | Primary τίμησας μὲν ἐμέ, μέγα δʼ ἴψαο λαὸν Ἀχαιῶν, |
| 238 | Primary ἠδʼ ἔτι καὶ νῦν μοι τόδʼ ἐπικρήηνον ἐέλδωρ· |
| 239 | Primary αὐτὸς μὲν γὰρ ἐγὼ μενέω νηῶν ἐν ἀγῶνι, |
| 240 | Primary ἀλλʼ ἕταρον πέμπω πολέσιν μετὰ Μυρμιδόνεσσι |
| 241 | Primary μάρνασθαι· τῷ κῦδος ἅμα πρόες εὐρύοπα Ζεῦ, |
| 242 | Primary θάρσυνον δέ οἱ ἦτορ ἐνὶ φρεσίν, ὄφρα καὶ Ἕκτωρ |
| 243 | Primary εἴσεται ἤ ῥα καὶ οἶος ἐπίστηται πολεμίζειν |
| 244 | Primary ἡμέτερος θεράπων, ἦ οἱ τότε χεῖρες ἄαπτοι |
| 245 | Primary μαίνονθʼ, ὁππότʼ ἐγώ περ ἴω μετὰ μῶλον Ἄρηος. |
| 246 | Primary αὐτὰρ ἐπεί κʼ ἀπὸ ναῦφι μάχην ἐνοπήν τε δίηται, |
| 247 | Primary ἀσκηθής μοι ἔπειτα θοὰς ἐπὶ νῆας ἵκοιτο |
| 248 | Primary τεύχεσί τε ξὺν πᾶσι καὶ ἀγχεμάχοις ἑτάροισιν. |
| 249 | Primary ὣς ἔφατʼ εὐχόμενος, τοῦ δʼ ἔκλυε μητίετα Ζεύς. |
| 250 | Primary τῷ δʼ ἕτερον μὲν ἔδωκε πατήρ, ἕτερον δʼ ἀνένευσε· |
| 251 | Primary νηῶν μέν οἱ ἀπώσασθαι πόλεμόν τε μάχην τε |
| 252 | Primary δῶκε, σόον δʼ ἀνένευσε μάχης ἐξαπονέεσθαι. |
| 253 | Primary ἤτοι ὃ μὲν σπείσας τε καὶ εὐξάμενος Διὶ πατρὶ |
| 254 | Primary ἂψ κλισίην εἰσῆλθε, δέπας δʼ ἀπέθηκʼ ἐνὶ χηλῷ, |
| 255 | Primary στῆ δὲ πάροιθʼ ἐλθὼν κλισίης, ἔτι δʼ ἤθελε θυμῷ |
| 256 | Primary εἰσιδέειν Τρώων καὶ Ἀχαιῶν φύλοπιν αἰνήν. |
| 257 | Primary οἳ δʼ ἅμα Πατρόκλῳ μεγαλήτορι θωρηχθέντες |
| 258 | Primary ἔστιχον, ὄφρʼ ἐν Τρωσὶ μέγα φρονέοντες ὄρουσαν. |
| 259 | Primary αὐτίκα δὲ σφήκεσσιν ἐοικότες ἐξεχέοντο |
| 260 | Primary εἰνοδίοις, οὓς παῖδες ἐριδμαίνωσιν ἔθοντες |
| 261 | Primary αἰεὶ κερτομέοντες ὁδῷ ἔπι οἰκίʼ ἔχοντας |
| 262 | Primary νηπίαχοι· ξυνὸν δὲ κακὸν πολέεσσι τιθεῖσι. |
| 263 | Primary τοὺς δʼ εἴ περ παρά τίς τε κιὼν ἄνθρωπος ὁδίτης |
| 264 | Primary κινήσῃ ἀέκων, οἳ δʼ ἄλκιμον ἦτορ ἔχοντες |
| 265 | Primary πρόσσω πᾶς πέτεται καὶ ἀμύνει οἷσι τέκεσσι. |
| 266 | Primary τῶν τότε Μυρμιδόνες κραδίην καὶ θυμὸν ἔχοντες |
| 267 | Primary ἐκ νηῶν ἐχέοντο· βοὴ δʼ ἄσβεστος ὀρώρει. |
| 268 | Primary Πάτροκλος δʼ ἑτάροισιν ἐκέκλετο μακρὸν ἀΰσας· |
| 269 | Primary Μυρμιδόνες ἕταροι Πηληϊάδεω Ἀχιλῆος |
| 270 | Primary ἀνέρες ἔστε φίλοι, μνήσασθε δὲ θούριδος ἀλκῆς, |
| 271 | Primary ὡς ἂν Πηλεΐδην τιμήσομεν, ὃς μέγʼ ἄριστος |
| 272 | Primary Ἀργείων παρὰ νηυσὶ καὶ ἀγχέμαχοι θεράποντες, |
| 273 | Primary γνῷ δὲ καὶ Ἀτρεΐδης εὐρὺ κρείων Ἀγαμέμνων |
| 274 | Primary ἣν ἄτην, ὅ τʼ ἄριστον Ἀχαιῶν οὐδὲν ἔτισεν. |
| 275 | Primary ὣς εἰπὼν ὄτρυνε μένος καὶ θυμὸν ἑκάστου, |
| 276 | Primary ἐν δʼ ἔπεσον Τρώεσσιν ἀολλέες· ἀμφὶ δὲ νῆες |
| 277 | Primary σμερδαλέον κονάβησαν ἀϋσάντων ὑπʼ Ἀχαιῶν. |
| 278 | Primary Τρῶες δʼ ὡς εἴδοντο Μενοιτίου ἄλκιμον υἱὸν |
| 279 | Primary αὐτὸν καὶ θεράποντα σὺν ἔντεσι μαρμαίροντας, |
| 280 | Primary πᾶσιν ὀρίνθη θυμός, ἐκίνηθεν δὲ φάλαγγες |
| 281 | Primary ἐλπόμενοι παρὰ ναῦφι ποδώκεα Πηλεΐωνα |
| 282 | Primary μηνιθμὸν μὲν ἀπορρῖψαι, φιλότητα δʼ ἑλέσθαι· |
| 283 | Primary πάπτηνεν δὲ ἕκαστος ὅπῃ φύγοι αἰπὺν ὄλεθρον. |
| 284 | Primary Πάτροκλος δὲ πρῶτος ἀκόντισε δουρὶ φαεινῷ |
| 285 | Primary ἀντικρὺ κατὰ μέσσον, ὅθι πλεῖστοι κλονέοντο, |
| 286 | Primary νηῒ πάρα πρυμνῇ μεγαθύμου Πρωτεσιλάου, |
| 287 | Primary καὶ βάλε Πυραίχμην, ὃς Παίονας ἱπποκορυστὰς |
| 288 | Primary ἤγαγεν ἐξ Ἀμυδῶνος ἀπʼ Ἀξιοῦ εὐρὺ ῥέοντος· |
| 289 | Primary τὸν βάλε δεξιὸν ὦμον· ὃ δʼ ὕπτιος ἐν κονίῃσι |
| 290 | Primary κάππεσεν οἰμώξας, ἕταροι δέ μιν ἀμφεφόβηθεν |
| 291 | Primary Παίονες· ἐν γὰρ Πάτροκλος φόβον ἧκεν ἅπασιν |
| 292 | Primary ἡγεμόνα κτείνας, ὃς ἀριστεύεσκε μάχεσθαι. |
| 293 | Primary ἐκ νηῶν δʼ ἔλασεν, κατὰ δʼ ἔσβεσεν αἰθόμενον πῦρ. |
| 294 | Primary ἡμιδαὴς δʼ ἄρα νηῦς λίπετʼ αὐτόθι· τοὶ δὲ φόβηθεν |
| 295 | Primary Τρῶες θεσπεσίῳ ὁμάδῳ· Δαναοὶ δʼ ἐπέχυντο |
| 296 | Primary νῆας ἀνὰ γλαφυράς· ὅμαδος δʼ ἀλίαστος ἐτύχθη. |
| 297 | Primary ὡς δʼ ὅτʼ ἀφʼ ὑψηλῆς κορυφῆς ὄρεος μεγάλοιο |
| 298 | Primary κινήσῃ πυκινὴν νεφέλην στεροπηγερέτα Ζεύς, |
| 299 | Primary ἔκ τʼ ἔφανεν πᾶσαι σκοπιαὶ καὶ πρώονες ἄκροι |
| 300 | Primary καὶ νάπαι, οὐρανόθεν δʼ ἄρʼ ὑπερράγη ἄσπετος αἰθήρ, |
| 301 | Primary ὣς Δαναοὶ νηῶν μὲν ἀπωσάμενοι δήϊον πῦρ |
| 302 | Primary τυτθὸν ἀνέπνευσαν, πολέμου δʼ οὐ γίγνετʼ ἐρωή· |
| 303 | Primary οὐ γάρ πώ τι Τρῶες ἀρηϊφίλων ὑπʼ Ἀχαιῶν |
| 304 | Primary προτροπάδην φοβέοντο μελαινάων ἀπὸ νηῶν, |
| 305 | Primary ἀλλʼ ἔτʼ ἄρʼ ἀνθίσταντο, νεῶν δʼ ὑπόεικον ἀνάγκῃ. |
| 306 | Primary ἔνθα δʼ ἀνὴρ ἕλεν ἄνδρα κεδασθείσης ὑσμίνης |
| 307 | Primary ἡγεμόνων. πρῶτος δὲ Μενοιτίου ἄλκιμος υἱὸς |
| 308 | Primary αὐτίκʼ ἄρα στρεφθέντος Ἀρηϊλύκου βάλε μηρὸν |
| 309 | Primary ἔγχεϊ ὀξυόεντι, διὰ πρὸ δὲ χαλκὸν ἔλασσε· |
| 310 | Primary ῥῆξεν δʼ ὀστέον ἔγχος, ὃ δὲ πρηνὴς ἐπὶ γαίῃ |
| 311 | Primary κάππεσʼ· ἀτὰρ Μενέλαος ἀρήϊος οὖτα Θόαντα |
| 312 | Primary στέρνον γυμνωθέντα παρʼ ἀσπίδα, λῦσε δὲ γυῖα. |
| 313 | Primary Φυλεΐδης δʼ Ἄμφικλον ἐφορμηθέντα δοκεύσας |
| 314 | Primary ἔφθη ὀρεξάμενος πρυμνὸν σκέλος, ἔνθα πάχιστος |
| 315 | Primary μυὼν ἀνθρώπου πέλεται· περὶ δʼ ἔγχεος αἰχμῇ |
| 316 | Primary νεῦρα διεσχίσθη· τὸν δὲ σκότος ὄσσε κάλυψε. |
| 317 | Primary Νεστορίδαι δʼ ὃ μὲν οὔτασʼ Ἀτύμνιον ὀξέϊ δουρὶ |
| 318 | Primary Ἀντίλοχος, λαπάρης δὲ διήλασε χάλκεον ἔγχος· |
| 319 | Primary ἤριπε δὲ προπάροιθε. Μάρις δʼ αὐτοσχεδὰ δουρὶ |
| 320 | Primary Ἀντιλόχῳ ἐπόρουσε κασιγνήτοιο χολωθεὶς |
| 321 | Primary στὰς πρόσθεν νέκυος· τοῦ δʼ ἀντίθεος Θρασυμήδης |
| 322 | Primary ἔφθη ὀρεξάμενος πρὶν οὐτάσαι, οὐδʼ ἀφάμαρτεν, |
| 323 | Primary ὦμον ἄφαρ· πρυμνὸν δὲ βραχίονα δουρὸς ἀκωκὴ |
| 324 | Primary δρύψʼ ἀπὸ μυώνων, ἀπὸ δʼ ὀστέον ἄχρις ἄραξε· |
| 325 | Primary δούπησεν δὲ πεσών, κατὰ δὲ σκότος ὄσσε κάλυψεν. |
| 326 | Primary ὣς τὼ μὲν δοιοῖσι κασιγνήτοισι δαμέντε |
| 327 | Primary βήτην εἰς Ἔρεβος Σαρπηδόνος ἐσθλοὶ ἑταῖροι |
| 328 | Primary υἷες ἀκοντισταὶ Ἀμισωδάρου, ὅς ῥα Χίμαιραν |
| 329 | Primary θρέψεν ἀμαιμακέτην πολέσιν κακὸν ἀνθρώποισιν. |
| 330 | Primary Αἴας δὲ Κλεόβουλον Ὀϊλιάδης ἐπορούσας |
| 331 | Primary ζωὸν ἕλε βλαφθέντα κατὰ κλόνον· ἀλλά οἱ αὖθι |
| 332 | Primary λῦσε μένος πλήξας ξίφει αὐχένα κωπήεντι. |
| 333 | Primary πᾶν δʼ ὑπεθερμάνθη ξίφος αἵματι· τὸν δὲ κατʼ ὄσσε |
| 334 | Primary ἔλλαβε πορφύρεος θάνατος καὶ μοῖρα κραταιή. |
| 335 | Primary Πηνέλεως δὲ Λύκων τε συνέδραμον· ἔγχεσι μὲν γὰρ |
| 336 | Primary ἤμβροτον ἀλλήλων, μέλεον δʼ ἠκόντισαν ἄμφω· |
| 337 | Primary τὼ δʼ αὖτις ξιφέεσσι συνέδραμον. ἔνθα Λύκων μὲν |
| 338 | Primary ἱπποκόμου κόρυθος φάλον ἤλασεν, ἀμφὶ δὲ καυλὸν |
| 339 | Primary φάσγανον ἐρραίσθη· ὃ δʼ ὑπʼ οὔατος αὐχένα θεῖνε |
| 340 | Primary Πηνέλεως, πᾶν δʼ εἴσω ἔδυ ξίφος, ἔσχεθε δʼ οἶον |
| 341 | Primary δέρμα, παρηέρθη δὲ κάρη, ὑπέλυντο δὲ γυῖα. |
| 342 | Primary Μηριόνης δʼ Ἀκάμαντα κιχεὶς ποσὶ καρπαλίμοισι |
| 343 | Primary νύξʼ ἵππων ἐπιβησόμενον κατὰ δεξιὸν ὦμον· |
| 344 | Primary ἤριπε δʼ ἐξ ὀχέων, κατὰ δʼ ὀφθαλμῶν κέχυτʼ ἀχλύς. |
| 345 | Primary Ἰδομενεὺς δʼ Ἐρύμαντα κατὰ στόμα νηλέϊ χαλκῷ |
| 346 | Primary νύξε· τὸ δʼ ἀντικρὺ δόρυ χάλκεον ἐξεπέρησε |
| 347 | Primary νέρθεν ὑπʼ ἐγκεφάλοιο, κέασσε δʼ ἄρʼ ὀστέα λευκά· |
| 348 | Primary ἐκ δʼ ἐτίναχθεν ὀδόντες, ἐνέπλησθεν δέ οἱ ἄμφω |
| 349 | Primary αἵματος ὀφθαλμοί· τὸ δʼ ἀνὰ στόμα καὶ κατὰ ῥῖνας |
| 350 | Primary πρῆσε χανών· θανάτου δὲ μέλαν νέφος ἀμφεκάλυψεν. |
| 351 | Primary οὗτοι ἄρʼ ἡγεμόνες Δαναῶν ἕλον ἄνδρα ἕκαστος. |
| 352 | Primary ὡς δὲ λύκοι ἄρνεσσιν ἐπέχραον ἢ ἐρίφοισι |
| 353 | Primary σίνται ὑπʼ ἐκ μήλων αἱρεύμενοι, αἵ τʼ ἐν ὄρεσσι |
| 354 | Primary ποιμένος ἀφραδίῃσι διέτμαγεν· οἳ δὲ ἰδόντες |
| 355 | Primary αἶψα διαρπάζουσιν ἀνάλκιδα θυμὸν ἐχούσας· |
| 356 | Primary ὣς Δαναοὶ Τρώεσσιν ἐπέχραον· οἳ δὲ φόβοιο |
| 357 | Primary δυσκελάδου μνήσαντο, λάθοντο δὲ θούριδος ἀλκῆς. |
| 358 | Primary Αἴας δʼ ὃ μέγας αἰὲν ἐφʼ Ἕκτορι χαλκοκορυστῇ |
| 359 | Primary ἵετʼ ἀκοντίσσαι· ὃ δὲ ἰδρείῃ πολέμοιο |
| 360 | Primary ἀσπίδι ταυρείῃ κεκαλυμμένος εὐρέας ὤμους |
| 361 | Primary σκέπτετʼ ὀϊστῶν τε ῥοῖζον καὶ δοῦπον ἀκόντων. |
| 362 | Primary ἦ μὲν δὴ γίγνωσκε μάχης ἑτεραλκέα νίκην· |
| 363 | Primary ἀλλὰ καὶ ὧς ἀνέμιμνε, σάω δʼ ἐρίηρας ἑταίρους. |
| 364 | Primary ὡς δʼ ὅτʼ ἀπʼ Οὐλύμπου νέφος ἔρχεται οὐρανὸν εἴσω |
| 365 | Primary αἰθέρος ἐκ δίης, ὅτε τε Ζεὺς λαίλαπα τείνῃ, |
| 366 | Primary ὣς τῶν ἐκ νηῶν γένετο ἰαχή τε φόβος τε, |
| 367 | Primary οὐδὲ κατὰ μοῖραν πέραον πάλιν. Ἕκτορα δʼ ἵπποι |
| 368 | Primary ἔκφερον ὠκύποδες σὺν τεύχεσι, λεῖπε δὲ λαὸν |
| 369 | Primary Τρωϊκόν, οὓς ἀέκοντας ὀρυκτὴ τάφρος ἔρυκε. |
| 370 | Primary πολλοὶ δʼ ἐν τάφρῳ ἐρυσάρματες ὠκέες ἵπποι |
| 371 | Primary ἄξαντʼ ἐν πρώτῳ ῥυμῷ λίπον ἅρματʼ ἀνάκτων, |
| 372 | Primary Πάτροκλος δʼ ἕπετο σφεδανὸν Δαναοῖσι κελεύων |
| 373 | Primary Τρωσὶ κακὰ φρονέων· οἳ δὲ ἰαχῇ τε φόβῳ τε |
| 374 | Primary πάσας πλῆσαν ὁδούς, ἐπεὶ ἂρ τμάγεν· ὕψι δʼ ἀέλλη |
| 375 | Primary σκίδναθʼ ὑπὸ νεφέων, τανύοντο δὲ μώνυχες ἵπποι |
| 376 | Primary ἄψορρον προτὶ ἄστυ νεῶν ἄπο καὶ κλισιάων. |
| 377 | Primary Πάτροκλος δʼ ᾗ πλεῖστον ὀρινόμενον ἴδε λαόν, |
| 378 | Primary τῇ ῥʼ ἔχʼ ὁμοκλήσας· ὑπὸ δʼ ἄξοσι φῶτες ἔπιπτον |
| 379 | Primary πρηνέες ἐξ ὀχέων, δίφροι δʼ ἀνακυμβαλίαζον. |
| 380 | Primary ἀντικρὺ δʼ ἄρα τάφρον ὑπέρθορον ὠκέες ἵπποι |
| 381 | Primary ἄμβροτοι, οὓς Πηλῆϊ θεοὶ δόσαν ἀγλαὰ δῶρα, |
| 382 | Primary πρόσσω ἱέμενοι, ἐπὶ δʼ Ἕκτορι κέκλετο θυμός· |
| 383 | Primary ἵετο γὰρ βαλέειν· τὸν δʼ ἔκφερον ὠκέες ἵπποι. |
| 384 | Primary ὡς δʼ ὑπὸ λαίλαπι πᾶσα κελαινὴ βέβριθε χθὼν |
| 385 | Primary ἤματʼ ὀπωρινῷ, ὅτε λαβρότατον χέει ὕδωρ |
| 386 | Primary Ζεύς, ὅτε δή ῥʼ ἄνδρεσσι κοτεσσάμενος χαλεπήνῃ, |
| 387 | Primary οἳ βίῃ εἰν ἀγορῇ σκολιὰς κρίνωσι θέμιστας, |
| 388 | Primary ἐκ δὲ δίκην ἐλάσωσι θεῶν ὄπιν οὐκ ἀλέγοντες· |
| 389 | Primary τῶν δέ τε πάντες μὲν ποταμοὶ πλήθουσι ῥέοντες, |
| 390 | Primary πολλὰς δὲ κλιτῦς τότʼ ἀποτμήγουσι χαράδραι, |
| 391 | Primary ἐς δʼ ἅλα πορφυρέην μεγάλα στενάχουσι ῥέουσαι |
| 392 | Primary ἐξ ὀρέων ἐπικάρ, μινύθει δέ τε ἔργʼ ἀνθρώπων· |
| 393 | Primary ὣς ἵπποι Τρῳαὶ μεγάλα στενάχοντο θέουσαι. |
| 394 | Primary Πάτροκλος δʼ ἐπεὶ οὖν πρώτας ἐπέκερσε φάλαγγας, |
| 395 | Primary ἂψ ἐπὶ νῆας ἔεργε παλιμπετές, οὐδὲ πόληος |
| 396 | Primary εἴα ἱεμένους ἐπιβαινέμεν, ἀλλὰ μεσηγὺ |
| 397 | Primary νηῶν καὶ ποταμοῦ καὶ τείχεος ὑψηλοῖο |
| 398 | Primary κτεῖνε μεταΐσσων, πολέων δʼ ἀπετίνυτο ποινήν. |
| 399 | Primary ἔνθʼ ἤτοι Πρόνοον πρῶτον βάλε δουρὶ φαεινῷ |
| 400 | Primary στέρνον γυμνωθέντα παρʼ ἀσπίδα, λῦσε δὲ γυῖα· |
| 401 | Primary δούπησεν δὲ πεσών· ὃ δὲ Θέστορα Ἤνοπος υἱὸν |
| 402 | Primary δεύτερον ὁρμηθείς· ὃ μὲν εὐξέστῳ ἐνὶ δίφρῳ |
| 403 | Primary ἧστο ἀλείς· ἐκ γὰρ πλήγη φρένας, ἐκ δʼ ἄρα χειρῶν |
| 404 | Primary ἡνία ἠΐχθησαν· ὃ δʼ ἔγχεϊ νύξε παραστὰς |
| 405 | Primary γναθμὸν δεξιτερόν, διὰ δʼ αὐτοῦ πεῖρεν ὀδόντων, |
| 406 | Primary ἕλκε δὲ δουρὸς ἑλὼν ὑπὲρ ἄντυγος, ὡς ὅτε τις φὼς |
| 407 | Primary πέτρῃ ἔπι προβλῆτι καθήμενος ἱερὸν ἰχθὺν |
| 408 | Primary ἐκ πόντοιο θύραζε λίνῳ καὶ ἤνοπι χαλκῷ· |
| 409 | Primary ὣς ἕλκʼ ἐκ δίφροιο κεχηνότα δουρὶ φαεινῷ, |
| 410 | Primary κὰδ δʼ ἄρʼ ἐπὶ στόμʼ ἔωσε· πεσόντα δέ μιν λίπε θυμός. |
| 411 | Primary αὐτὰρ ἔπειτʼ Ἐρύλαον ἐπεσσύμενον βάλε πέτρῳ |
| 412 | Primary μέσσην κὰκ κεφαλήν· ἣ δʼ ἄνδιχα πᾶσα κεάσθη |
| 413 | Primary ἐν κόρυθι βριαρῇ· ὃ δʼ ἄρα πρηνὴς ἐπὶ γαίῃ |
| 414 | Primary κάππεσεν, ἀμφὶ δέ μιν θάνατος χύτο θυμοραϊστής. |
| 415 | Primary αὐτὰρ ἔπειτʼ Ἐρύμαντα καὶ Ἀμφοτερὸν καὶ Ἐπάλτην |
| 416 | Primary Τληπόλεμόν τε Δαμαστορίδην Ἐχίον τε Πύριν τε |
| 417 | Primary Ἰφέα τʼ Εὔιππόν τε καὶ Ἀργεάδην Πολύμηλον |
| 418 | Primary πάντας ἐπασσυτέρους πέλασε χθονὶ πουλυβοτείρῃ. |
| 419 | Primary Σαρπηδὼν δʼ ὡς οὖν ἴδʼ ἀμιτροχίτωνας ἑταίρους |
| 420 | Primary χέρσʼ ὕπο Πατρόκλοιο Μενοιτιάδαο δαμέντας, |
| 421 | Primary κέκλετʼ ἄρʼ ἀντιθέοισι καθαπτόμενος Λυκίοισιν· |
| 422 | Primary αἰδὼς ὦ Λύκιοι· πόσε φεύγετε; νῦν θοοὶ ἔστε. |
| 423 | Primary ἀντήσω γὰρ ἐγὼ τοῦδʼ ἀνέρος, ὄφρα δαείω |
| 424 | Primary ὅς τις ὅδε κρατέει καὶ δὴ κακὰ πολλὰ ἔοργε |
| 425 | Primary Τρῶας, ἐπεὶ πολλῶν τε καὶ ἐσθλῶν γούνατʼ ἔλυσεν. |
| 426 | Primary ἦ ῥα, καὶ ἐξ ὀχέων σὺν τεύχεσιν ἆλτο χαμᾶζε. |
| 427 | Primary Πάτροκλος δʼ ἑτέρωθεν ἐπεὶ ἴδεν ἔκθορε δίφρου. |
| 428 | Primary οἳ δʼ ὥς τʼ αἰγυπιοὶ γαμψώνυχες ἀγκυλοχεῖλαι |
| 429 | Primary πέτρῃ ἐφʼ ὑψηλῇ μεγάλα κλάζοντε μάχωνται, |
| 430 | Primary ὣς οἳ κεκλήγοντες ἐπʼ ἀλλήλοισιν ὄρουσαν. |
| 431 | Primary τοὺς δὲ ἰδὼν ἐλέησε Κρόνου πάϊς ἀγκυλομήτεω, |
| 432 | Primary Ἥρην δὲ προσέειπε κασιγνήτην ἄλοχόν τε· |
| 433 | Primary ὤ μοι ἐγών, ὅ τέ μοι Σαρπηδόνα φίλτατον ἀνδρῶν |
| 434 | Primary μοῖρʼ ὑπὸ Πατρόκλοιο Μενοιτιάδαο δαμῆναι. |
| 435 | Primary διχθὰ δέ μοι κραδίη μέμονε φρεσὶν ὁρμαίνοντι, |
| 436 | Primary ἤ μιν ζωὸν ἐόντα μάχης ἄπο δακρυοέσσης |
| 437 | Primary θείω ἀναρπάξας Λυκίης ἐν πίονι δήμῳ, |
| 438 | Primary ἦ ἤδη ὑπὸ χερσὶ Μενοιτιάδαο δαμάσσω. |
| 439 | Primary τὸν δʼ ἠμείβετʼ ἔπειτα βοῶπις πότνια Ἥρη· |
| 440 | Primary αἰνότατε Κρονίδη ποῖον τὸν μῦθον ἔειπες. |
| 441 | Primary ἄνδρα θνητὸν ἐόντα πάλαι πεπρωμένον αἴσῃ |
| 442 | Primary ἂψ ἐθέλεις θανάτοιο δυσηχέος ἐξαναλῦσαι; |
| 443 | Primary ἔρδʼ· ἀτὰρ οὔ τοι πάντες ἐπαινέομεν θεοὶ ἄλλοι. |
| 444 | Primary ἄλλο δέ τοι ἐρέω, σὺ δʼ ἐνὶ φρεσὶ βάλλεο σῇσιν· |
| 445 | Primary αἴ κε ζὼν πέμψῃς Σαρπηδόνα ὃν δὲ δόμον δέ, |
| 446 | Primary φράζεο μή τις ἔπειτα θεῶν ἐθέλῃσι καὶ ἄλλος |
| 447 | Primary πέμπειν ὃν φίλον υἱὸν ἀπὸ κρατερῆς ὑσμίνης· |
| 448 | Primary πολλοὶ γὰρ περὶ ἄστυ μέγα Πριάμοιο μάχονται |
| 449 | Primary υἱέες ἀθανάτων, τοῖσιν κότον αἰνὸν ἐνήσεις. |
| 450 | Primary ἀλλʼ εἴ τοι φίλος ἐστί, τεὸν δʼ ὀλοφύρεται ἦτορ, |
| 451 | Primary ἤτοι μέν μιν ἔασον ἐνὶ κρατερῇ ὑσμίνῃ |
| 452 | Primary χέρσʼ ὕπο Πατρόκλοιο Μενοιτιάδαο δαμῆναι· |
| 453 | Primary αὐτὰρ ἐπὴν δὴ τόν γε λίπῃ ψυχή τε καὶ αἰών, |
| 454 | Primary πέμπειν μιν θάνατόν τε φέρειν καὶ νήδυμον ὕπνον |
| 455 | Primary εἰς ὅ κε δὴ Λυκίης εὐρείης δῆμον ἵκωνται, |
| 456 | Primary ἔνθά ἑ ταρχύσουσι κασίγνητοί τε ἔται τε |
| 457 | Primary τύμβῳ τε στήλῃ τε· τὸ γὰρ γέρας ἐστὶ θανόντων. |
| 458 | Primary ὣς ἔφατʼ, οὐδʼ ἀπίθησε πατὴρ ἀνδρῶν τε θεῶν τε· |
| 459 | Primary αἱματοέσσας δὲ ψιάδας κατέχευεν ἔραζε |
| 460 | Primary παῖδα φίλον τιμῶν, τόν οἱ Πάτροκλος ἔμελλε |
| 461 | Primary φθίσειν ἐν Τροίῃ ἐριβώλακι τηλόθι πάτρης. |
| 462 | Primary οἳ δʼ ὅτε δὴ σχεδὸν ἦσαν ἐπʼ ἀλλήλοισιν ἰόντες, |
| 463 | Primary ἔνθʼ ἤτοι Πάτροκλος ἀγακλειτὸν Θρασύμηλον, |
| 464 | Primary ὅς ῥʼ ἠῢς θεράπων Σαρπηδόνος ἦεν ἄνακτος, |
| 465 | Primary τὸν βάλε νείαιραν κατὰ γαστέρα, λῦσε δὲ γυῖα. |
| 466 | Primary Σαρπηδὼν δʼ αὐτοῦ μὲν ἀπήμβροτε δουρὶ φαεινῷ |
| 467 | Primary δεύτερον ὁρμηθείς, ὃ δὲ Πήδασον οὔτασεν ἵππον |
| 468 | Primary ἔγχεϊ δεξιὸν ὦμον· ὃ δʼ ἔβραχε θυμὸν ἀΐσθων, |
| 469 | Primary κὰδ δʼ ἔπεσʼ ἐν κονίῃσι μακών, ἀπὸ δʼ ἔπτατο θυμός. |
| 470 | Primary τὼ δὲ διαστήτην, κρίκε δὲ ζυγόν, ἡνία δέ σφι |
| 471 | Primary σύγχυτʼ, ἐπεὶ δὴ κεῖτο παρήορος ἐν κονίῃσι. |
| 472 | Primary τοῖο μὲν Αὐτομέδων δουρικλυτὸς εὕρετο τέκμωρ· |
| 473 | Primary σπασσάμενος τανύηκες ἄορ παχέος παρὰ μηροῦ |
| 474 | Primary ἀΐξας ἀπέκοψε παρήορον οὐδʼ ἐμάτησε· |
| 475 | Primary τὼ δʼ ἰθυνθήτην, ἐν δὲ ῥυτῆρσι τάνυσθεν· |
| 476 | Primary τὼ δʼ αὖτις συνίτην ἔριδος πέρι θυμοβόροιο. |
| 477 | Primary ἔνθʼ αὖ Σαρπηδὼν μὲν ἀπήμβροτε δουρὶ φαεινῷ, |
| 478 | Primary Πατρόκλου δʼ ὑπὲρ ὦμον ἀριστερὸν ἤλυθʼ ἀκωκὴ |
| 479 | Primary ἔγχεος, οὐδʼ ἔβαλʼ αὐτόν· ὃ δʼ ὕστερος ὄρνυτο χαλκῷ |
| 480 | Primary Πάτροκλος· τοῦ δʼ οὐχ ἅλιον βέλος ἔκφυγε χειρός, |
| 481 | Primary ἀλλʼ ἔβαλʼ ἔνθʼ ἄρα τε φρένες ἔρχαται ἀμφʼ ἁδινὸν κῆρ. |
| 482 | Primary ἤριπε δʼ ὡς ὅτε τις δρῦς ἤριπεν ἢ ἀχερωῒς |
| 483 | Primary ἠὲ πίτυς βλωθρή, τήν τʼ οὔρεσι τέκτονες ἄνδρες |
| 484 | Primary ἐξέταμον πελέκεσσι νεήκεσι νήϊον εἶναι· |
| 485 | Primary ὣς ὃ πρόσθʼ ἵππων καὶ δίφρου κεῖτο τανυσθεὶς |
| 486 | Primary βεβρυχὼς κόνιος δεδραγμένος αἱματοέσσης. |
| 487 | Primary ἠΰτε ταῦρον ἔπεφνε λέων ἀγέληφι μετελθὼν |
| 488 | Primary αἴθωνα μεγάθυμον ἐν εἰλιπόδεσσι βόεσσι, |
| 489 | Primary ὤλετό τε στενάχων ὑπὸ γαμφηλῇσι λέοντος, |
| 490 | Primary ὣς ὑπὸ Πατρόκλῳ Λυκίων ἀγὸς ἀσπιστάων |
| 491 | Primary κτεινόμενος μενέαινε, φίλον δʼ ὀνόμηνεν ἑταῖρον· |
| 492 | Primary Γλαῦκε πέπον πολεμιστὰ μετʼ ἀνδράσι νῦν σε μάλα χρὴ |
| 493 | Primary αἰχμητήν τʼ ἔμεναι καὶ θαρσαλέον πολεμιστήν· |
| 494 | Primary νῦν τοι ἐελδέσθω πόλεμος κακός, εἰ θοός ἐσσι. |
| 495 | Primary πρῶτα μὲν ὄτρυνον Λυκίων ἡγήτορας ἄνδρας |
| 496 | Primary πάντῃ ἐποιχόμενος Σαρπηδόνος ἀμφιμάχεσθαι· |
| 497 | Primary αὐτὰρ ἔπειτα καὶ αὐτὸς ἐμεῦ πέρι μάρναο χαλκῷ. |
| 498 | Primary σοὶ γὰρ ἐγὼ καὶ ἔπειτα κατηφείη καὶ ὄνειδος |
| 499 | Primary ἔσσομαι ἤματα πάντα διαμπερές, εἴ κέ μʼ Ἀχαιοὶ |
| 500 | Primary τεύχεα συλήσωσι νεῶν ἐν ἀγῶνι πεσόντα. |
| 501 | Primary ἀλλʼ ἔχεο κρατερῶς, ὄτρυνε δὲ λαὸν ἅπαντα. |
| 502 | Primary ὣς ἄρα μιν εἰπόντα τέλος θανάτοιο κάλυψεν |
| 503 | Primary ὀφθαλμοὺς ῥῖνάς θʼ· ὃ δὲ λὰξ ἐν στήθεσι βαίνων |
| 504 | Primary ἐκ χροὸς ἕλκε δόρυ, προτὶ δὲ φρένες αὐτῷ ἕποντο· |
| 505 | Primary τοῖο δʼ ἅμα ψυχήν τε καὶ ἔγχεος ἐξέρυσʼ αἰχμήν. |
| 506 | Primary Μυρμιδόνες δʼ αὐτοῦ σχέθον ἵππους φυσιόωντας |
| 507 | Primary ἱεμένους φοβέεσθαι, ἐπεὶ λίπον ἅρματʼ ἀνάκτων. |
| 508 | Primary Γλαύκῳ δʼ αἰνὸν ἄχος γένετο φθογγῆς ἀΐοντι· |
| 509 | Primary ὠρίνθη δέ οἱ ἦτορ ὅ τʼ οὐ δύνατο προσαμῦναι. |
| 510 | Primary χειρὶ δʼ ἑλὼν ἐπίεζε βραχίονα· τεῖρε γὰρ αὐτὸν |
| 511 | Primary ἕλκος, ὃ δή μιν Τεῦκρος ἐπεσσύμενον βάλεν ἰῷ |
| 512 | Primary τείχεος ὑψηλοῖο, ἀρὴν ἑτάροισιν ἀμύνων. |
| 513 | Primary εὐχόμενος δʼ ἄρα εἶπεν ἑκηβόλῳ Ἀπόλλωνι· |
| 514 | Primary κλῦθι ἄναξ ὅς που Λυκίης ἐν πίονι δήμῳ |
| 515 | Primary εἲς ἢ ἐνὶ Τροίῃ· δύνασαι δὲ σὺ πάντοσʼ ἀκούειν |
| 516 | Primary ἀνέρι κηδομένῳ, ὡς νῦν ἐμὲ κῆδος ἱκάνει. |
| 517 | Primary ἕλκος μὲν γὰρ ἔχω τόδε καρτερόν, ἀμφὶ δέ μοι χεὶρ |
| 518 | Primary ὀξείῃς ὀδύνῃσιν ἐλήλαται, οὐδέ μοι αἷμα |
| 519 | Primary τερσῆναι δύναται, βαρύθει δέ μοι ὦμος ὑπʼ αὐτοῦ· |
| 520 | Primary ἔγχος δʼ οὐ δύναμαι σχεῖν ἔμπεδον, οὐδὲ μάχεσθαι |
| 521 | Primary ἐλθὼν δυσμενέεσσιν. ἀνὴρ δʼ ὤριστος ὄλωλε |
| 522 | Primary Σαρπηδὼν Διὸς υἱός· ὃ δʼ οὐ οὗ παιδὸς ἀμύνει. |
| 523 | Primary ἀλλὰ σύ πέρ μοι ἄναξ τόδε καρτερὸν ἕλκος ἄκεσσαι, |
| 524 | Primary κοίμησον δʼ ὀδύνας, δὸς δὲ κράτος, ὄφρʼ ἑτάροισι |
| 525 | Primary κεκλόμενος Λυκίοισιν ἐποτρύνω πολεμίζειν, |
| 526 | Primary αὐτός τʼ ἀμφὶ νέκυι κατατεθνηῶτι μάχωμαι. |
| 527 | Primary ὣς ἔφατʼ εὐχόμενος, τοῦ δʼ ἔκλυε Φοῖβος Ἀπόλλων. |
| 528 | Primary αὐτίκα παῦσʼ ὀδύνας ἀπὸ δʼ ἕλκεος ἀργαλέοιο |
| 529 | Primary αἷμα μέλαν τέρσηνε, μένος δέ οἱ ἔμβαλε θυμῷ. |
| 530 | Primary Γλαῦκος δʼ ἔγνω ᾗσιν ἐνὶ φρεσὶ γήθησέν τε |
| 531 | Primary ὅττί οἱ ὦκʼ ἤκουσε μέγας θεὸς εὐξαμένοιο. |
| 532 | Primary πρῶτα μὲν ὄτρυνεν Λυκίων ἡγήτορας ἄνδρας |
| 533 | Primary πάντῃ ἐποιχόμενος Σαρπηδόνος ἀμφιμάχεσθαι· |
| 534 | Primary αὐτὰρ ἔπειτα μετὰ Τρῶας κίε μακρὰ βιβάσθων |
| 535 | Primary Πουλυδάμαντʼ ἔπι Πανθοΐδην καὶ Ἀγήνορα δῖον, |
| 536 | Primary βῆ δὲ μετʼ Αἰνείαν τε καὶ Ἕκτορα χαλκοκορυστήν, |
| 537 | Primary ἀγχοῦ δʼ ἱστάμενος ἔπεα πτερόεντα προσηύδα· |
| 538 | Primary Ἕκτορ νῦν δὴ πάγχυ λελασμένος εἰς ἐπικούρων, |
| 539 | Primary οἳ σέθεν εἵνεκα τῆλε φίλων καὶ πατρίδος αἴης |
| 540 | Primary θυμὸν ἀποφθινύθουσι· σὺ δʼ οὐκ ἐθέλεις ἐπαμύνειν. |
| 541 | Primary κεῖται Σαρπηδὼν Λυκίων ἀγὸς ἀσπιστάων, |
| 542 | Primary ὃς Λυκίην εἴρυτο δίκῃσί τε καὶ σθένεϊ ᾧ· |
| 543 | Primary τὸν δʼ ὑπὸ Πατρόκλῳ δάμασʼ ἔγχεϊ χάλκεος Ἄρης. |
| 544 | Primary ἀλλὰ φίλοι πάρστητε, νεμεσσήθητε δὲ θυμῷ, |
| 545 | Primary μὴ ἀπὸ τεύχεʼ ἕλωνται, ἀεικίσσωσι δὲ νεκρὸν |
| 546 | Primary Μυρμιδόνες, Δαναῶν κεχολωμένοι ὅσσοι ὄλοντο, |
| 547 | Primary τοὺς ἐπὶ νηυσὶ θοῇσιν ἐπέφνομεν ἐγχείῃσιν. |
| 548 | Primary ὣς ἔφατο, Τρῶας δὲ κατὰ κρῆθεν λάβε πένθος |
| 549 | Primary ἄσχετον, οὐκ ἐπιεικτόν, ἐπεί σφισιν ἕρμα πόληος |
| 550 | Primary ἔσκε καὶ ἀλλοδαπός περ ἐών· πολέες γὰρ ἅμʼ αὐτῷ |
| 551 | Primary λαοὶ ἕποντʼ, ἐν δʼ αὐτὸς ἀριστεύεσκε μάχεσθαι· |
| 552 | Primary βὰν δʼ ἰθὺς Δαναῶν λελιημένοι· ἦρχε δʼ ἄρά σφιν |
| 553 | Primary Ἕκτωρ χωόμενος Σαρπηδόνος. αὐτὰρ Ἀχαιοὺς |
| 554 | Primary ὦρσε Μενοιτιάδεω Πατροκλῆος λάσιον κῆρ· |
| 555 | Primary Αἴαντε πρώτω προσέφη μεμαῶτε καὶ αὐτώ· |
| 556 | Primary Αἴαντε νῦν σφῶϊν ἀμύνεσθαι φίλον ἔστω, |
| 557 | Primary οἷοί περ πάρος ἦτε μετʼ ἀνδράσιν ἢ καὶ ἀρείους. |
| 558 | Primary κεῖται ἀνὴρ ὃς πρῶτος ἐσήλατο τεῖχος Ἀχαιῶν |
| 559 | Primary Σαρπηδών· ἀλλʼ εἴ μιν ἀεικισσαίμεθʼ ἑλόντες, |
| 560 | Primary τεύχεά τʼ ὤμοιιν ἀφελοίμεθα, καί τινʼ ἑταίρων |
| 561 | Primary αὐτοῦ ἀμυνομένων δαμασαίμεθα νηλέϊ χαλκῷ. |
| 562 | Primary ὣς ἔφαθʼ, οἳ δὲ καὶ αὐτοὶ ἀλέξασθαι μενέαινον. |
| 563 | Primary οἳ δʼ ἐπεὶ ἀμφοτέρωθεν ἐκαρτύναντο φάλαγγας |
| 564 | Primary Τρῶες καὶ Λύκιοι καὶ Μυρμιδόνες καὶ Ἀχαιοί, |
| 565 | Primary σύμβαλον ἀμφὶ νέκυι κατατεθνηῶτι μάχεσθαι |
| 566 | Primary δεινὸν ἀΰσαντες· μέγα δʼ ἔβραχε τεύχεα φωτῶν. |
| 567 | Primary Ζεὺς δʼ ἐπὶ νύκτʼ ὀλοὴν τάνυσε κρατερῇ ὑσμίνῃ, |
| 568 | Primary ὄφρα φίλῳ περὶ παιδὶ μάχης ὀλοὸς πόνος εἴη. |
| 569 | Primary ὦσαν δὲ πρότεροι Τρῶες ἑλίκωπας Ἀχαιούς· |
| 570 | Primary βλῆτο γὰρ οὔ τι κάκιστος ἀνὴρ μετὰ Μυρμιδόνεσσιν |
| 571 | Primary υἱὸς Ἀγακλῆος μεγαθύμου δῖος Ἐπειγεύς, |
| 572 | Primary ὅς ῥʼ ἐν Βουδείῳ εὖ ναιομένῳ ἤνασσε |
| 573 | Primary τὸ πρίν· ἀτὰρ τότε γʼ ἐσθλὸν ἀνεψιὸν ἐξεναρίξας |
| 574 | Primary ἐς Πηλῆʼ ἱκέτευσε καὶ ἐς Θέτιν ἀργυρόπεζαν· |
| 575 | Primary οἳ δʼ ἅμʼ Ἀχιλλῆϊ ῥηξήνορι πέμπον ἕπεσθαι |
| 576 | Primary Ἴλιον εἰς εὔπωλον, ἵνα Τρώεσσι μάχοιτο. |
| 577 | Primary τόν ῥα τόθʼ ἁπτόμενον νέκυος βάλε φαίδιμος Ἕκτωρ |
| 578 | Primary χερμαδίῳ κεφαλήν· ἣ δʼ ἄνδιχα πᾶσα κεάσθη |
| 579 | Primary ἐν κόρυθι βριαρῇ· ὃ δʼ ἄρα πρηνὴς ἐπὶ νεκρῷ |
| 580 | Primary κάππεσεν, ἀμφὶ δέ μιν θάνατος χύτο θυμοραϊστής. |
| 581 | Primary Πατρόκλῳ δʼ ἄρʼ ἄχος γένετο φθιμένου ἑτάροιο, |
| 582 | Primary ἴθυσεν δὲ διὰ προμάχων ἴρηκι ἐοικὼς |
| 583 | Primary ὠκέϊ, ὅς τʼ ἐφόβησε κολοιούς τε ψῆράς τε· |
| 584 | Primary ὣς ἰθὺς Λυκίων Πατρόκλεες ἱπποκέλευθε |
| 585 | Primary ἔσσυο καὶ Τρώων, κεχόλωσο δὲ κῆρ ἑτάροιο. |
| 586 | Primary καί ῥʼ ἔβαλε Σθενέλαον Ἰθαιμένεος φίλον υἱὸν |
| 587 | Primary αὐχένα χερμαδίῳ, ῥῆξεν δʼ ἀπὸ τοῖο τένοντας. |
| 588 | Primary χώρησαν δʼ ὑπό τε πρόμαχοι καὶ φαίδιμος Ἕκτωρ. |
| 589 | Primary ὅσση δʼ αἰγανέης ῥιπὴ ταναοῖο τέτυκται, |
| 590 | Primary ἥν ῥά τʼ ἀνὴρ ἀφέῃ πειρώμενος ἢ ἐν ἀέθλῳ |
| 591 | Primary ἠὲ καὶ ἐν πολέμῳ δηΐων ὕπο θυμοραϊστέων, |
| 592 | Primary τόσσον ἐχώρησαν Τρῶες, ὤσαντο δʼ Ἀχαιοί. |
| 593 | Primary Γλαῦκος δὲ πρῶτος Λυκίων ἀγὸς ἀσπιστάων |
| 594 | Primary ἐτράπετʼ, ἔκτεινεν δὲ Βαθυκλῆα μεγάθυμον |
| 595 | Primary Χάλκωνος φίλον υἱόν, ὃς Ἑλλάδι οἰκία ναίων |
| 596 | Primary ὄλβῳ τε πλούτῳ τε μετέπρεπε Μυρμιδόνεσσι. |
| 597 | Primary τὸν μὲν ἄρα Γλαῦκος στῆθος μέσον οὔτασε δουρὶ |
| 598 | Primary στρεφθεὶς ἐξαπίνης, ὅτε μιν κατέμαρπτε διώκων· |
| 599 | Primary δούπησεν δὲ πεσών· πυκινὸν δʼ ἄχος ἔλλαβʼ Ἀχαιούς, |
| 600 | Primary ὡς ἔπεσʼ ἐσθλὸς ἀνήρ· μέγα δὲ Τρῶες κεχάροντο, |
| 601 | Primary στὰν δʼ ἀμφʼ αὐτὸν ἰόντες ἀολλέες· οὐδʼ ἄρʼ Ἀχαιοὶ |
| 602 | Primary ἀλκῆς ἐξελάθοντο, μένος δʼ ἰθὺς φέρον αὐτῶν. |
| 603 | Primary ἔνθʼ αὖ Μηριόνης Τρώων ἕλεν ἄνδρα κορυστὴν |
| 604 | Primary Λαόγονον θρασὺν υἱὸν Ὀνήτορος, ὃς Διὸς ἱρεὺς |
| 605 | Primary Ἰδαίου ἐτέτυκτο, θεὸς δʼ ὣς τίετο δήμῳ. |
| 606 | Primary τὸν βάλʼ ὑπὸ γναθμοῖο καὶ οὔατος· ὦκα δὲ θυμὸς |
| 607 | Primary ᾤχετʼ ἀπὸ μελέων, στυγερὸς δʼ ἄρα μιν σκότος εἷλεν. |
| 608 | Primary Αἰνείας δʼ ἐπὶ Μηριόνῃ δόρυ χάλκεον ἧκεν· |
| 609 | Primary ἔλπετο γὰρ τεύξεσθαι ὑπασπίδια προβιβῶντος. |
| 610 | Primary ἀλλʼ ὃ μὲν ἄντα ἰδὼν ἠλεύατο χάλκεον ἔγχος· |
| 611 | Primary πρόσσω γὰρ κατέκυψε, τὸ δʼ ἐξόπιθεν δόρυ μακρὸν |
| 612 | Primary οὔδει ἐνισκίμφθη, ἐπὶ δʼ οὐρίαχος πελεμίχθη |
| 613 | Primary ἔγχεος· ἔνθα δʼ ἔπειτʼ ἀφίει μένος ὄβριμος Ἄρης. |
| 614 | Primary αἰχμὴ δʼ Αἰνείαο κραδαινομένη κατὰ γαίης |
| 615 | Primary ᾤχετʼ, ἐπεί ῥʼ ἅλιον στιβαρῆς ἀπὸ χειρὸς ὄρουσεν. |
| 616 | Primary Αἰνείας δʼ ἄρα θυμὸν ἐχώσατο φώνησέν τε· |
| 617 | Primary Μηριόνη τάχα κέν σε καὶ ὀρχηστήν περ ἐόντα |
| 618 | Primary ἔγχος ἐμὸν κατέπαυσε διαμπερές, εἴ σʼ ἔβαλόν περ. |
| 619 | Primary τὸν δʼ αὖ Μηριόνης δουρικλυτὸς ἀντίον ηὔδα· |
| 620 | Primary Αἰνεία χαλεπόν σε καὶ ἴφθιμόν περ ἐόντα |
| 621 | Primary πάντων ἀνθρώπων σβέσσαι μένος, ὅς κέ σευ ἄντα |
| 622 | Primary ἔλθῃ ἀμυνόμενος· θνητὸς δέ νυ καὶ σὺ τέτυξαι. |
| 623 | Primary εἰ καὶ ἐγώ σε βάλοιμι τυχὼν μέσον ὀξέϊ χαλκῷ, |
| 624 | Primary αἶψά κε καὶ κρατερός περ ἐὼν καὶ χερσὶ πεποιθὼς |
| 625 | Primary εὖχος ἐμοὶ δοίης, ψυχὴν δʼ Ἄϊδι κλυτοπώλῳ. |
| 626 | Primary ὣς φάτο, τὸν δʼ ἐνένιπε Μενοιτίου ἄλκιμος υἱός· |
| 627 | Primary Μηριόνη τί σὺ ταῦτα καὶ ἐσθλὸς ἐὼν ἀγορεύεις; |
| 628 | Primary ὦ πέπον οὔ τοι Τρῶες ὀνειδείοις ἐπέεσσι |
| 629 | Primary νεκροῦ χωρήσουσι· πάρος τινὰ γαῖα καθέξει. |
| 630 | Primary ἐν γὰρ χερσὶ τέλος πολέμου, ἐπέων δʼ ἐνὶ βουλῇ· |
| 631 | Primary τὼ οὔ τι χρὴ μῦθον ὀφέλλειν, ἀλλὰ μάχεσθαι. |
| 632 | Primary ὣς εἰπὼν ὃ μὲν ἦρχʼ, ὃ δʼ ἅμʼ ἕσπετο ἰσόθεος φώς. |
| 633 | Primary τῶν δʼ ὥς τε δρυτόμων ἀνδρῶν ὀρυμαγδὸς ὀρώρει |
| 634 | Primary οὔρεος ἐν βήσσῃς, ἕκαθεν δέ τε γίγνετʼ ἀκουή, |
| 635 | Primary ὣς τῶν ὄρνυτο δοῦπος ἀπὸ χθονὸς εὐρυοδείης |
| 636 | Primary χαλκοῦ τε ῥινοῦ τε βοῶν τʼ εὐποιητάων, |
| 637 | Primary νυσσομένων ξίφεσίν τε καὶ ἔγχεσιν ἀμφιγύοισιν. |
| 638 | Primary οὐδʼ ἂν ἔτι φράδμων περ ἀνὴρ Σαρπηδόνα δῖον |
| 639 | Primary ἔγνω, ἐπεὶ βελέεσσι καὶ αἵματι καὶ κονίῃσιν |
| 640 | Primary ἐκ κεφαλῆς εἴλυτο διαμπερὲς ἐς πόδας ἄκρους. |
| 641 | Primary οἳ δʼ αἰεὶ περὶ νεκρὸν ὁμίλεον, ὡς ὅτε μυῖαι |
| 642 | Primary σταθμῷ ἔνι βρομέωσι περιγλαγέας κατὰ πέλλας |
| 643 | Primary ὥρῃ ἐν εἰαρινῇ, ὅτε τε γλάγος ἄγγεα δεύει· |
| 644 | Primary ὣς ἄρα τοὶ περὶ νεκρὸν ὁμίλεον, οὐδέ ποτε Ζεὺς |
| 645 | Primary τρέψεν ἀπὸ κρατερῆς ὑσμίνης ὄσσε φαεινώ, |
| 646 | Primary ἀλλὰ κατʼ αὐτοὺς αἰὲν ὅρα καὶ φράζετο θυμῷ, |
| 647 | Primary πολλὰ μάλʼ ἀμφὶ φόνῳ Πατρόκλου μερμηρίζων, |
| 648 | Primary ἢ ἤδη καὶ κεῖνον ἐνὶ κρατερῇ ὑσμίνῃ |
| 649 | Primary αὐτοῦ ἐπʼ ἀντιθέῳ Σαρπηδόνι φαίδιμος Ἕκτωρ |
| 650 | Primary χαλκῷ δῃώσῃ, ἀπό τʼ ὤμων τεύχεʼ ἕληται, |
| 651 | Primary ἦ ἔτι καὶ πλεόνεσσιν ὀφέλλειεν πόνον αἰπύν. |
| 652 | Primary ὧδε δέ οἱ φρονέοντι δοάσσατο κέρδιον εἶναι |
| 653 | Primary ὄφρʼ ἠῢς θεράπων Πηληϊάδεω Ἀχιλῆος |
| 654 | Primary ἐξαῦτις Τρῶάς τε καὶ Ἕκτορα χαλκοκορυστὴν |
| 655 | Primary ὤσαιτο προτὶ ἄστυ, πολέων δʼ ἀπὸ θυμὸν ἕλοιτο. |
| 656 | Primary Ἕκτορι δὲ πρωτίστῳ ἀνάλκιδα θυμὸν ἐνῆκεν· |
| 657 | Primary ἐς δίφρον δʼ ἀναβὰς φύγαδʼ ἔτραπε, κέκλετο δʼ ἄλλους |
| 658 | Primary Τρῶας φευγέμεναι· γνῶ γὰρ Διὸς ἱρὰ τάλαντα. |
| 659 | Primary ἔνθʼ οὐδʼ ἴφθιμοι Λύκιοι μένον, ἀλλὰ φόβηθεν |
| 660 | Primary πάντες, ἐπεὶ βασιλῆα ἴδον βεβλαμμένον ἦτορ |
| 661 | Primary κείμενον ἐν νεκύων ἀγύρει· πολέες γὰρ ἐπʼ αὐτῷ |
| 662 | Primary κάππεσον, εὖτʼ ἔριδα κρατερὴν ἐτάνυσσε Κρονίων. |
| 663 | Primary οἳ δʼ ἄρʼ ἀπʼ ὤμοιιν Σαρπηδόνος ἔντεʼ ἕλοντο |
| 664 | Primary χάλκεα μαρμαίροντα, τὰ μὲν κοίλας ἐπὶ νῆας |
| 665 | Primary δῶκε φέρειν ἑτάροισι Μενοιτίου ἄλκιμος υἱός. |
| 666 | Primary καὶ τότʼ Ἀπόλλωνα προσέφη νεφεληγερέτα Ζεύς· |
| 667 | Primary εἰ δʼ ἄγε νῦν φίλε Φοῖβε, κελαινεφὲς αἷμα κάθηρον |
| 668 | Primary ἐλθὼν ἐκ βελέων Σαρπηδόνα, καί μιν ἔπειτα |
| 669 | Primary πολλὸν ἀπὸ πρὸ φέρων λοῦσον ποταμοῖο ῥοῇσι |
| 670 | Primary χρῖσόν τʼ ἀμβροσίῃ, περὶ δʼ ἄμβροτα εἵματα ἕσσον· |
| 671 | Primary πέμπε δέ μιν πομποῖσιν ἅμα κραιπνοῖσι φέρεσθαι |
| 672 | Primary ὕπνῳ καὶ θανάτῳ διδυμάοσιν, οἵ ῥά μιν ὦκα |
| 673 | Primary θήσουσʼ ἐν Λυκίης εὐρείης πίονι δήμῳ, |
| 674 | Primary ἔνθά ἑ ταρχύσουσι κασίγνητοί τε ἔται τε |
| 675 | Primary τύμβῳ τε στήλῃ τε· τὸ γὰρ γέρας ἐστὶ θανόντων. |
| 676 | Primary ὣς ἔφατʼ, οὐδʼ ἄρα πατρὸς ἀνηκούστησεν Ἀπόλλων. |
| 677 | Primary βῆ δὲ κατʼ Ἰδαίων ὀρέων ἐς φύλοπιν αἰνήν, |
| 678 | Primary αὐτίκα δʼ ἐκ βελέων Σαρπηδόνα δῖον ἀείρας |
| 679 | Primary πολλὸν ἀπὸ πρὸ φέρων λοῦσεν ποταμοῖο ῥοῇσι |
| 680 | Primary χρῖσέν τʼ ἀμβροσίῃ, περὶ δʼ ἄμβροτα εἵματα ἕσσε· |
| 681 | Primary πέμπε δέ μιν πομποῖσιν ἅμα κραιπνοῖσι φέρεσθαι, |
| 682 | Primary ὕπνῳ καὶ θανάτῳ διδυμάοσιν, οἵ ῥά μιν ὦκα |
| 683 | Primary κάτθεσαν ἐν Λυκίης εὐρείης πίονι δήμῳ. |
| 684 | Primary Πάτροκλος δʼ ἵπποισι καὶ Αὐτομέδοντι κελεύσας |
| 685 | Primary Τρῶας καὶ Λυκίους μετεκίαθε, καὶ μέγʼ ἀάσθη |
| 686 | Primary νήπιος· εἰ δὲ ἔπος Πηληϊάδαο φύλαξεν |
| 687 | Primary ἦ τʼ ἂν ὑπέκφυγε κῆρα κακὴν μέλανος θανάτοιο. |
| 688 | Primary ἀλλʼ αἰεί τε Διὸς κρείσσων νόος ἠέ περ ἀνδρῶν· |
| 689 | Primary ὅς τε καὶ ἄλκιμον ἄνδρα φοβεῖ καὶ ἀφείλετο νίκην |
| 690 | Primary ῥηϊδίως, ὅτε δʼ αὐτὸς ἐποτρύνῃσι μάχεσθαι· |
| 691 | Primary ὅς οἱ καὶ τότε θυμὸν ἐνὶ στήθεσσιν ἀνῆκεν. |
| 692 | Primary ἔνθα τίνα πρῶτον τίνα δʼ ὕστατον ἐξενάριξας |
| 693 | Primary Πατρόκλεις, ὅτε δή σε θεοὶ θάνατον δὲ κάλεσσαν; |
| 694 | Primary Ἄδρηστον μὲν πρῶτα καὶ Αὐτόνοον καὶ Ἔχεκλον |
| 695 | Primary καὶ Πέριμον Μεγάδην καὶ Ἐπίστορα καὶ Μελάνιππον, |
| 696 | Primary αὐτὰρ ἔπειτʼ Ἔλασον καὶ Μούλιον ἠδὲ Πυλάρτην· |
| 697 | Primary τοὺς ἕλεν· οἳ δʼ ἄλλοι φύγαδε μνώοντο ἕκαστος. |
| 698 | Primary ἔνθά κεν ὑψίπυλον Τροίην ἕλον υἷες Ἀχαιῶν |
| 699 | Primary Πατρόκλου ὑπὸ χερσί, περὶ πρὸ γὰρ ἔγχεϊ θῦεν, |
| 700 | Primary εἰ μὴ Ἀπόλλων Φοῖβος ἐϋδμήτου ἐπὶ πύργου |
| 701 | Primary ἔστη τῷ ὀλοὰ φρονέων, Τρώεσσι δʼ ἀρήγων. |
| 702 | Primary τρὶς μὲν ἐπʼ ἀγκῶνος βῆ τείχεος ὑψηλοῖο |
| 703 | Primary Πάτροκλος, τρὶς δʼ αὐτὸν ἀπεστυφέλιξεν Ἀπόλλων |
| 704 | Primary χείρεσσʼ ἀθανάτῃσι φαεινὴν ἀσπίδα νύσσων. |
| 705 | Primary ἀλλʼ ὅτε δὴ τὸ τέταρτον ἐπέσσυτο δαίμονι ἶσος, |
| 706 | Primary δεινὰ δʼ ὁμοκλήσας ἔπεα πτερόεντα προσηύδα· |
| 707 | Primary χάζεο διογενὲς Πατρόκλεες· οὔ νύ τοι αἶσα |
| 708 | Primary σῷ ὑπὸ δουρὶ πόλιν πέρθαι Τρώων ἀγερώχων, |
| 709 | Primary οὐδʼ ὑπʼ Ἀχιλλῆος, ὅς περ σέο πολλὸν ἀμείνων. |
| 710 | Primary ὣς φάτο, Πάτροκλος δʼ ἀνεχάζετο πολλὸν ὀπίσσω |
| 711 | Primary μῆνιν ἀλευάμενος ἑκατηβόλου Ἀπόλλωνος. |
| 712 | Primary Ἕκτωρ δʼ ἐν Σκαιῇσι πύλῃς ἔχε μώνυχας ἵππους· |
| 713 | Primary δίζε γὰρ ἠὲ μάχοιτο κατὰ κλόνον αὖτις ἐλάσσας, |
| 714 | Primary ἦ λαοὺς ἐς τεῖχος ὁμοκλήσειεν ἀλῆναι. |
| 715 | Primary ταῦτʼ ἄρα οἱ φρονέοντι παρίστατο Φοῖβος Ἀπόλλων |
| 716 | Primary ἀνέρι εἰσάμενος αἰζηῷ τε κρατερῷ τε |
| 717 | Primary Ἀσίῳ, ὃς μήτρως ἦν Ἕκτορος ἱπποδάμοιο |
| 718 | Primary αὐτοκασίγνητος Ἑκάβης, υἱὸς δὲ Δύμαντος, |
| 719 | Primary ὃς Φρυγίῃ ναίεσκε ῥοῇς ἔπι Σαγγαρίοιο· |
| 720 | Primary τῷ μιν ἐεισάμενος προσέφη Διὸς υἱὸς Ἀπόλλων· |
| 721 | Primary Ἕκτορ τίπτε μάχης ἀποπαύεαι; οὐδέ τί σε χρή. |
| 722 | Primary αἴθʼ ὅσον ἥσσων εἰμί, τόσον σέο φέρτερος εἴην· |
| 723 | Primary τώ κε τάχα στυγερῶς πολέμου ἀπερωήσειας. |
| 724 | Primary ἀλλʼ ἄγε Πατρόκλῳ ἔφεπε κρατερώνυχας ἵππους, |
| 725 | Primary αἴ κέν πώς μιν ἕλῃς, δώῃ δέ τοι εὖχος Ἀπόλλων. |
| 726 | Primary ὣς εἰπὼν ὃ μὲν αὖτις ἔβη θεὸς ἂμ πόνον ἀνδρῶν, |
| 727 | Primary Κεβριόνῃ δʼ ἐκέλευσε δαΐφρονι φαίδιμος Ἕκτωρ |
| 728 | Primary ἵππους ἐς πόλεμον πεπληγέμεν. αὐτὰρ Ἀπόλλων |
| 729 | Primary δύσεθʼ ὅμιλον ἰών, ἐν δὲ κλόνον Ἀργείοισιν |
| 730 | Primary ἧκε κακόν, Τρωσὶν δὲ καὶ Ἕκτορι κῦδος ὄπαζεν. |
| 731 | Primary Ἕκτωρ δʼ ἄλλους μὲν Δαναοὺς ἔα οὐδʼ ἐνάριζεν· |
| 732 | Primary αὐτὰρ ὃ Πατρόκλῳ ἔφεπε κρατερώνυχας ἵππους. |
| 733 | Primary Πάτροκλος δʼ ἑτέρωθεν ἀφʼ ἵππων ἆλτο χαμᾶζε |
| 734 | Primary σκαιῇ ἔγχος ἔχων· ἑτέρηφι δὲ λάζετο πέτρον |
| 735 | Primary μάρμαρον ὀκριόεντα τόν οἱ περὶ χεὶρ ἐκάλυψεν, |
| 736 | Primary ἧκε δʼ ἐρεισάμενος, οὐδὲ δὴν χάζετο φωτός, |
| 737 | Primary οὐδʼ ἁλίωσε βέλος, βάλε δʼ Ἕκτορος ἡνιοχῆα |
| 738 | Primary Κεβριόνην νόθον υἱὸν ἀγακλῆος Πριάμοιο |
| 739 | Primary ἵππων ἡνίʼ ἔχοντα μετώπιον ὀξέϊ λᾶϊ. |
| 740 | Primary ἀμφοτέρας δʼ ὀφρῦς σύνελεν λίθος, οὐδέ οἱ ἔσχεν |
| 741 | Primary ὀστέον, ὀφθαλμοὶ δὲ χαμαὶ πέσον ἐν κονίῃσιν |
| 742 | Primary αὐτοῦ πρόσθε ποδῶν· ὃ δʼ ἄρʼ ἀρνευτῆρι ἐοικὼς |
| 743 | Primary κάππεσʼ ἀπʼ εὐεργέος δίφρου, λίπε δʼ ὀστέα θυμός. |
| 744 | Primary τὸν δʼ ἐπικερτομέων προσέφης Πατρόκλεες ἱππεῦ· |
| 745 | Primary ὢ πόποι ἦ μάλʼ ἐλαφρὸς ἀνήρ, ὡς ῥεῖα κυβιστᾷ. |
| 746 | Primary εἰ δή που καὶ πόντῳ ἐν ἰχθυόεντι γένοιτο, |
| 747 | Primary πολλοὺς ἂν κορέσειεν ἀνὴρ ὅδε τήθεα διφῶν |
| 748 | Primary νηὸς ἀποθρῴσκων, εἰ καὶ δυσπέμφελος εἴη, |
| 749 | Primary ὡς νῦν ἐν πεδίῳ ἐξ ἵππων ῥεῖα κυβιστᾷ. |
| 750 | Primary ἦ ῥα καὶ ἐν Τρώεσσι κυβιστητῆρες ἔασιν. |
| 751 | Primary ὣς εἰπὼν ἐπὶ Κεβριόνῃ ἥρωϊ βεβήκει |
| 752 | Primary οἶμα λέοντος ἔχων, ὅς τε σταθμοὺς κεραΐζων |
| 753 | Primary ἔβλητο πρὸς στῆθος, ἑή τέ μιν ὤλεσεν ἀλκή· |
| 754 | Primary ὣς ἐπὶ Κεβριόνῃ Πατρόκλεες ἆλσο μεμαώς. |
| 755 | Primary Ἕκτωρ δʼ αὖθʼ ἑτέρωθεν ἀφʼ ἵππων ἆλτο χαμᾶζε. |
| 756 | Primary τὼ περὶ Κεβριόναο λέονθʼ ὣς δηρινθήτην, |
| 757 | Primary ὥ τʼ ὄρεος κορυφῇσι περὶ κταμένης ἐλάφοιο |
| 758 | Primary ἄμφω πεινάοντε μέγα φρονέοντε μάχεσθον· |
| 759 | Primary ὣς περὶ Κεβριόναο δύω μήστωρες ἀϋτῆς |
| 760 | Primary Πάτροκλός τε Μενοιτιάδης καὶ φαίδιμος Ἕκτωρ |
| 761 | Primary ἵεντʼ ἀλλήλων ταμέειν χρόα νηλέϊ χαλκῷ. |
| 762 | Primary Ἕκτωρ μὲν κεφαλῆφιν ἐπεὶ λάβεν οὐχὶ μεθίει· |
| 763 | Primary Πάτροκλος δʼ ἑτέρωθεν ἔχεν ποδός· οἳ δὲ δὴ ἄλλοι |
| 764 | Primary Τρῶες καὶ Δαναοὶ σύναγον κρατερὴν ὑσμίνην. |
| 765 | Primary ὡς δʼ Εὖρός τε Νότος τʼ ἐριδαίνετον ἀλλήλοιιν |
| 766 | Primary οὔρεος ἐν βήσσῃς βαθέην πελεμιζέμεν ὕλην |
| 767 | Primary φηγόν τε μελίην τε τανύφλοιόν τε κράνειαν, |
| 768 | Primary αἵ τε πρὸς ἀλλήλας ἔβαλον τανυήκεας ὄζους |
| 769 | Primary ἠχῇ θεσπεσίῃ, πάταγος δέ τε ἀγνυμενάων, |
| 770 | Primary ὣς Τρῶες καὶ Ἀχαιοὶ ἐπʼ ἀλλήλοισι θορόντες |
| 771 | Primary δῄουν, οὐδʼ ἕτεροι μνώοντʼ ὀλοοῖο φόβοιο. |
| 772 | Primary πολλὰ δὲ Κεβριόνην ἀμφʼ ὀξέα δοῦρα πεπήγει |
| 773 | Primary ἰοί τε πτερόεντες ἀπὸ νευρῆφι θορόντες, |
| 774 | Primary πολλὰ δὲ χερμάδια μεγάλʼ ἀσπίδας ἐστυφέλιξαν |
| 775 | Primary μαρναμένων ἀμφʼ αὐτόν· ὃ δʼ ἐν στροφάλιγγι κονίης |
| 776 | Primary κεῖτο μέγας μεγαλωστί, λελασμένος ἱπποσυνάων. |
| 777 | Primary ὄφρα μὲν Ἠέλιος μέσον οὐρανὸν ἀμφιβεβήκει, |
| 778 | Primary τόφρα μάλʼ ἀμφοτέρων βέλεʼ ἥπτετο, πῖπτε δὲ λαός· |
| 779 | Primary ἦμος δʼ Ἠέλιος μετενίσετο βουλυτὸν δέ, |
| 780 | Primary καὶ τότε δή ῥʼ ὑπὲρ αἶσαν Ἀχαιοὶ φέρτεροι ἦσαν. |
| 781 | Primary ἐκ μὲν Κεβριόνην βελέων ἥρωα ἔρυσσαν |
| 782 | Primary Τρώων ἐξ ἐνοπῆς, καὶ ἀπʼ ὤμων τεύχεʼ ἕλοντο, |
| 783 | Primary Πάτροκλος δὲ Τρωσὶ κακὰ φρονέων ἐνόρουσε. |
| 784 | Primary τρὶς μὲν ἔπειτʼ ἐπόρουσε θοῷ ἀτάλαντος Ἄρηϊ |
| 785 | Primary σμερδαλέα ἰάχων, τρὶς δʼ ἐννέα φῶτας ἔπεφνεν. |
| 786 | Primary ἀλλʼ ὅτε δὴ τὸ τέταρτον ἐπέσσυτο δαίμονι ἶσος, |
| 787 | Primary ἔνθʼ ἄρα τοι Πάτροκλε φάνη βιότοιο τελευτή· |
| 788 | Primary ἤντετο γάρ τοι Φοῖβος ἐνὶ κρατερῇ ὑσμίνῃ |
| 789 | Primary δεινός· ὃ μὲν τὸν ἰόντα κατὰ κλόνον οὐκ ἐνόησεν, |
| 790 | Primary ἠέρι γὰρ πολλῇ κεκαλυμμένος ἀντεβόλησε· |
| 791 | Primary στῆ δʼ ὄπιθεν, πλῆξεν δὲ μετάφρενον εὐρέε τʼ ὤμω |
| 792 | Primary χειρὶ καταπρηνεῖ, στρεφεδίνηθεν δέ οἱ ὄσσε. |
| 793 | Primary τοῦ δʼ ἀπὸ μὲν κρατὸς κυνέην βάλε Φοῖβος Ἀπόλλων· |
| 794 | Primary ἣ δὲ κυλινδομένη καναχὴν ἔχε ποσσὶν ὑφʼ ἵππων |
| 795 | Primary αὐλῶπις τρυφάλεια, μιάνθησαν δὲ ἔθειραι |
| 796 | Primary αἵματι καὶ κονίῃσι· πάρος γε μὲν οὐ θέμις ἦεν |
| 797 | Primary ἱππόκομον πήληκα μιαίνεσθαι κονίῃσιν, |
| 798 | Primary ἀλλʼ ἀνδρὸς θείοιο κάρη χαρίεν τε μέτωπον |
| 799 | Primary ῥύετʼ Ἀχιλλῆος· τότε δὲ Ζεὺς Ἕκτορι δῶκεν |
| 800 | Primary ᾗ κεφαλῇ φορέειν, σχεδόθεν δέ οἱ ἦεν ὄλεθρος. |
| 801 | Primary πᾶν δέ οἱ ἐν χείρεσσιν ἄγη δολιχόσκιον ἔγχος |
| 802 | Primary βριθὺ μέγα στιβαρὸν κεκορυθμένον· αὐτὰρ ἀπʼ ὤμων |
| 803 | Primary ἀσπὶς σὺν τελαμῶνι χαμαὶ πέσε τερμιόεσσα. |
| 804 | Primary λῦσε δέ οἱ θώρηκα ἄναξ Διὸς υἱὸς Ἀπόλλων. |
| 805 | Primary τὸν δʼ ἄτη φρένας εἷλε, λύθεν δʼ ὑπὸ φαίδιμα γυῖα, |
| 806 | Primary στῆ δὲ ταφών· ὄπιθεν δὲ μετάφρενον ὀξέϊ δουρὶ |
| 807 | Primary ὤμων μεσσηγὺς σχεδόθεν βάλε Δάρδανος ἀνὴρ |
| 808 | Primary Πανθοΐδης Εὔφορβος, ὃς ἡλικίην ἐκέκαστο |
| 809 | Primary ἔγχεΐ θʼ ἱπποσύνῃ τε πόδεσσί τε καρπαλίμοισι· |
| 810 | Primary καὶ γὰρ δὴ τότε φῶτας ἐείκοσι βῆσεν ἀφʼ ἵππων |
| 811 | Primary πρῶτʼ ἐλθὼν σὺν ὄχεσφι διδασκόμενος πολέμοιο· |
| 812 | Primary ὅς τοι πρῶτος ἐφῆκε βέλος Πατρόκλεες ἱππεῦ |
| 813 | Primary οὐδὲ δάμασσʼ· ὃ μὲν αὖτις ἀνέδραμε, μίκτο δʼ ὁμίλῳ, |
| 814 | Primary ἐκ χροὸς ἁρπάξας δόρυ μείλινον, οὐδʼ ὑπέμεινε |
| 815 | Primary Πάτροκλον γυμνόν περ ἐόντʼ ἐν δηϊοτῆτι. |
| 816 | Primary Πάτροκλος δὲ θεοῦ πληγῇ καὶ δουρὶ δαμασθεὶς |
| 817 | Primary ἂψ ἑτάρων εἰς ἔθνος ἐχάζετο κῆρʼ ἀλεείνων. |
| 818 | Primary Ἕκτωρ δʼ ὡς εἶδεν Πατροκλῆα μεγάθυμον |
| 819 | Primary ἂψ ἀναχαζόμενον βεβλημένον ὀξέϊ χαλκῷ, |
| 820 | Primary ἀγχίμολόν ῥά οἱ ἦλθε κατὰ στίχας, οὖτα δὲ δουρὶ |
| 821 | Primary νείατον ἐς κενεῶνα, διὰ πρὸ δὲ χαλκὸν ἔλασσε· |
| 822 | Primary δούπησεν δὲ πεσών, μέγα δʼ ἤκαχε λαὸν Ἀχαιῶν· |
| 823 | Primary ὡς δʼ ὅτε σῦν ἀκάμαντα λέων ἐβιήσατο χάρμῃ, |
| 824 | Primary ὥ τʼ ὄρεος κορυφῇσι μέγα φρονέοντε μάχεσθον |
| 825 | Primary πίδακος ἀμφʼ ὀλίγης· ἐθέλουσι δὲ πιέμεν ἄμφω· |
| 826 | Primary πολλὰ δέ τʼ ἀσθμαίνοντα λέων ἐδάμασσε βίηφιν· |
| 827 | Primary ὣς πολέας πεφνόντα Μενοιτίου ἄλκιμον υἱὸν |
| 828 | Primary Ἕκτωρ Πριαμίδης σχεδὸν ἔγχεϊ θυμὸν ἀπηύρα, |
| 829 | Primary καί οἱ ἐπευχόμενος ἔπεα πτερόεντα προσηύδα· |
| 830 | Primary Πάτροκλʼ ἦ που ἔφησθα πόλιν κεραϊξέμεν ἁμήν, |
| 831 | Primary Τρωϊάδας δὲ γυναῖκας ἐλεύθερον ἦμαρ ἀπούρας |
| 832 | Primary ἄξειν ἐν νήεσσι φίλην ἐς πατρίδα γαῖαν |
| 833 | Primary νήπιε· τάων δὲ πρόσθʼ Ἕκτορος ὠκέες ἵπποι |
| 834 | Primary ποσσὶν ὀρωρέχαται πολεμίζειν· ἔγχεϊ δʼ αὐτὸς |
| 835 | Primary Τρωσὶ φιλοπτολέμοισι μεταπρέπω, ὅ σφιν ἀμύνω |
| 836 | Primary ἦμαρ ἀναγκαῖον· σὲ δέ τʼ ἐνθάδε γῦπες ἔδονται. |
| 837 | Primary ἆ δείλʼ, οὐδέ τοι ἐσθλὸς ἐὼν χραίσμησεν Ἀχιλλεύς, |
| 838 | Primary ὅς πού τοι μάλα πολλὰ μένων ἐπετέλλετʼ ἰόντι· |
| 839 | Primary μή μοι πρὶν ἰέναι Πατρόκλεες ἱπποκέλευθε |
| 840 | Primary νῆας ἔπι γλαφυρὰς πρὶν Ἕκτορος ἀνδροφόνοιο |
| 841 | Primary αἱματόεντα χιτῶνα περὶ στήθεσσι δαΐξαι. |
| 842 | Primary ὥς πού σε προσέφη, σοὶ δὲ φρένας ἄφρονι πεῖθε. |
| 843 | Primary τὸν δʼ ὀλιγοδρανέων προσέφης Πατρόκλεες ἱππεῦ· |
| 844 | Primary ἤδη νῦν Ἕκτορ μεγάλʼ εὔχεο· σοὶ γὰρ ἔδωκε |
| 845 | Primary νίκην Ζεὺς Κρονίδης καὶ Ἀπόλλων, οἵ με δάμασσαν |
| 846 | Primary ῥηιδίως· αὐτοὶ γὰρ ἀπʼ ὤμων τεύχεʼ ἕλοντο. |
| 847 | Primary τοιοῦτοι δʼ εἴ πέρ μοι ἐείκοσιν ἀντεβόλησαν, |
| 848 | Primary πάντές κʼ αὐτόθʼ ὄλοντο ἐμῷ ὑπὸ δουρὶ δαμέντες. |
| 849 | Primary ἀλλά με μοῖρʼ ὀλοὴ καὶ Λητοῦς ἔκτανεν υἱός, |
| 850 | Primary ἀνδρῶν δʼ Εὔφορβος· σὺ δέ με τρίτος ἐξεναρίζεις. |
| 851 | Primary ἄλλο δέ τοι ἐρέω, σὺ δʼ ἐνὶ φρεσὶ βάλλεο σῇσιν· |
| 852 | Primary οὔ θην οὐδʼ αὐτὸς δηρὸν βέῃ, ἀλλά τοι ἤδη |
| 853 | Primary ἄγχι παρέστηκεν θάνατος καὶ μοῖρα κραταιὴ |
| 854 | Primary χερσὶ δαμέντʼ Ἀχιλῆος ἀμύμονος Αἰακίδαο. |
| 855 | Primary ὣς ἄρα μιν εἰπόντα τέλος θανάτοιο κάλυψε· |
| 856 | Primary ψυχὴ δʼ ἐκ ῥεθέων πταμένη Ἄϊδος δὲ βεβήκει |
| 857 | Primary ὃν πότμον γοόωσα λιποῦσʼ ἀνδροτῆτα καὶ ἥβην. |
| 858 | Primary τὸν καὶ τεθνηῶτα προσηύδα φαίδιμος Ἕκτωρ· |
| 859 | Primary Πατρόκλεις τί νύ μοι μαντεύεαι αἰπὺν ὄλεθρον; |
| 860 | Primary τίς δʼ οἶδʼ εἴ κʼ Ἀχιλεὺς Θέτιδος πάϊς ἠϋκόμοιο |
| 861 | Primary φθήῃ ἐμῷ ὑπὸ δουρὶ τυπεὶς ἀπὸ θυμὸν ὀλέσσαι; |
| 862 | Primary ὣς ἄρα φωνήσας δόρυ χάλκεον ἐξ ὠτειλῆς |
| 863 | Primary εἴρυσε λὰξ προσβάς, τὸν δʼ ὕπτιον ὦσʼ ἀπὸ δουρός. |
| 864 | Primary αὐτίκα δὲ ξὺν δουρὶ μετʼ Αὐτομέδοντα βεβήκει |
| 865 | Primary ἀντίθεον θεράποντα ποδώκεος Αἰακίδαο· |
| 866 | Primary ἵετο γὰρ βαλέειν· τὸν δʼ ἔκφερον ὠκέες ἵπποι |
| 867 | Primary ἄμβροτοι, οὓς Πηλῆϊ θεοὶ δόσαν ἀγλαὰ δῶρα. |