Reader
Reader | Iliad, Book 19
Iliad
Homer
Text
Position
Line 1 of 424
Waypoints
| Line Ref | Monro and Allen | Ancient Greek |
|---|---|
| 1 | Primary Ἠὼς μὲν κροκόπεπλος ἀπʼ Ὠκεανοῖο ῥοάων |
| 2 | Primary ὄρνυθʼ, ἵνʼ ἀθανάτοισι φόως φέροι ἠδὲ βροτοῖσιν· |
| 3 | Primary ἣ δʼ ἐς νῆας ἵκανε θεοῦ πάρα δῶρα φέρουσα. |
| 4 | Primary εὗρε δὲ Πατρόκλῳ περικείμενον ὃν φίλον υἱὸν |
| 5 | Primary κλαίοντα λιγέως· πολέες δʼ ἀμφʼ αὐτὸν ἑταῖροι |
| 6 | Primary μύρονθʼ· ἣ δʼ ἐν τοῖσι παρίστατο δῖα θεάων, |
| 7 | Primary ἔν τʼ ἄρα οἱ φῦ χειρὶ ἔπος τʼ ἔφατʼ ἔκ τʼ ὀνόμαζε· |
| 8 | Primary τέκνον ἐμὸν τοῦτον μὲν ἐάσομεν ἀχνύμενοί περ |
| 9 | Primary κεῖσθαι, ἐπεὶ δὴ πρῶτα θεῶν ἰότητι δαμάσθη· |
| 10 | Primary τύνη δʼ Ἡφαίστοιο πάρα κλυτὰ τεύχεα δέξο |
| 11 | Primary καλὰ μάλʼ, οἷʼ οὔ πώ τις ἀνὴρ ὤμοισι φόρησεν. |
| 12 | Primary ὡς ἄρα φωνήσασα θεὰ κατὰ τεύχεʼ ἔθηκε |
| 13 | Primary πρόσθεν Ἀχιλλῆος· τὰ δʼ ἀνέβραχε δαίδαλα πάντα. |
| 14 | Primary Μυρμιδόνας δʼ ἄρα πάντας ἕλε τρόμος, οὐδέ τις ἔτλη |
| 15 | Primary ἄντην εἰσιδέειν, ἀλλʼ ἔτρεσαν. αὐτὰρ Ἀχιλλεὺς |
| 16 | Primary ὡς εἶδʼ, ὥς μιν μᾶλλον ἔδυ χόλος, ἐν δέ οἱ ὄσσε |
| 17 | Primary δεινὸν ὑπὸ βλεφάρων ὡς εἰ σέλας ἐξεφάανθεν· |
| 18 | Primary τέρπετο δʼ ἐν χείρεσσιν ἔχων θεοῦ ἀγλαὰ δῶρα. |
| 19 | Primary αὐτὰρ ἐπεὶ φρεσὶν ᾗσι τετάρπετο δαίδαλα λεύσσων |
| 20 | Primary αὐτίκα μητέρα ἣν ἔπεα πτερόεντα προσηύδα· |
| 21 | Primary μῆτερ ἐμὴ τὰ μὲν ὅπλα θεὸς πόρεν οἷʼ ἐπιεικὲς |
| 22 | Primary ἔργʼ ἔμεν ἀθανάτων, μὴ δὲ βροτὸν ἄνδρα τελέσσαι. |
| 23 | Primary νῦν δʼ ἤτοι μὲν ἐγὼ θωρήξομαι· ἀλλὰ μάλʼ αἰνῶς |
| 24 | Primary δείδω μή μοι τόφρα Μενοιτίου ἄλκιμον υἱὸν |
| 25 | Primary μυῖαι καδδῦσαι κατὰ χαλκοτύπους ὠτειλὰς |
| 26 | Primary εὐλὰς ἐγγείνωνται, ἀεικίσσωσι δὲ νεκρόν, |
| 27 | Primary ἐκ δʼ αἰὼν πέφαται, κατὰ δὲ χρόα πάντα σαπήῃ. |
| 28 | Primary τὸν δʼ ἠμείβετʼ ἔπειτα θεὰ Θέτις ἀργυρόπεζα· |
| 29 | Primary τέκνον μή τοι ταῦτα μετὰ φρεσὶ σῇσι μελόντων. |
| 30 | Primary τῷ μὲν ἐγὼ πειρήσω ἀλαλκεῖν ἄγρια φῦλα |
| 31 | Primary μυίας, αἵ ῥά τε φῶτας ἀρηϊφάτους κατέδουσιν· |
| 32 | Primary ἤν περ γὰρ κεῖταί γε τελεσφόρον εἰς ἐνιαυτόν, |
| 33 | Primary αἰεὶ τῷ γʼ ἔσται χρὼς ἔμπεδος, ἢ καὶ ἀρείων. |
| 34 | Primary ἀλλὰ σύ γʼ εἰς ἀγορὴν καλέσας ἥρωας Ἀχαιοὺς |
| 35 | Primary μῆνιν ἀποειπὼν Ἀγαμέμνονι ποιμένι λαῶν |
| 36 | Primary αἶψα μάλʼ ἐς πόλεμον θωρήσσεο, δύσεο δʼ ἀλκήν. |
| 37 | Primary ὣς ἄρα φωνήσασα μένος πολυθαρσὲς ἐνῆκε, |
| 38 | Primary Πατρόκλῳ δʼ αὖτʼ ἀμβροσίην καὶ νέκταρ ἐρυθρὸν |
| 39 | Primary στάξε κατὰ ῥινῶν, ἵνα οἱ χρὼς ἔμπεδος εἴη. |
| 40 | Primary αὐτὰρ ὃ βῆ παρὰ θῖνα θαλάσσης δῖος Ἀχιλλεὺς |
| 41 | Primary σμερδαλέα ἰάχων, ὦρσεν δʼ ἥρωας Ἀχαιούς. |
| 42 | Primary καί ῥʼ οἵ περ τὸ πάρος γε νεῶν ἐν ἀγῶνι μένεσκον |
| 43 | Primary οἵ τε κυβερνῆται καὶ ἔχον οἰήϊα νηῶν |
| 44 | Primary καὶ ταμίαι παρὰ νηυσὶν ἔσαν σίτοιο δοτῆρες, |
| 45 | Primary καὶ μὴν οἳ τότε γʼ εἰς ἀγορὴν ἴσαν, οὕνεκʼ Ἀχιλλεὺς |
| 46 | Primary ἐξεφάνη, δηρὸν δὲ μάχης ἐπέπαυτʼ ἀλεγεινῆς. |
| 47 | Primary τὼ δὲ δύω σκάζοντε βάτην Ἄρεος θεράποντε |
| 48 | Primary Τυδεΐδης τε μενεπτόλεμος καὶ δῖος Ὀδυσσεὺς |
| 49 | Primary ἔγχει ἐρειδομένω· ἔτι γὰρ ἔχον ἕλκεα λυγρά· |
| 50 | Primary κὰδ δὲ μετὰ πρώτῃ ἀγορῇ ἵζοντο κιόντες. |
| 51 | Primary αὐτὰρ ὃ δεύτατος ἦλθεν ἄναξ ἀνδρῶν Ἀγαμέμνων |
| 52 | Primary ἕλκος ἔχων· καὶ γὰρ τὸν ἐνὶ κρατερῇ ὑσμίνῃ |
| 53 | Primary οὖτα Κόων Ἀντηνορίδης χαλκήρεϊ δουρί. |
| 54 | Primary αὐτὰρ ἐπεὶ δὴ πάντες ἀολλίσθησαν Ἀχαιοί, |
| 55 | Primary τοῖσι δʼ ἀνιστάμενος μετέφη πόδας ὠκὺς Ἀχιλλεύς· |
| 56 | Primary Ἀτρεΐδη ἦ ἄρ τι τόδʼ ἀμφοτέροισιν ἄρειον |
| 57 | Primary ἔπλετο σοὶ καὶ ἐμοί, ὅ τε νῶΐ περ ἀχνυμένω κῆρ |
| 58 | Primary θυμοβόρῳ ἔριδι μενεήναμεν εἵνεκα κούρης; |
| 59 | Primary τὴν ὄφελʼ ἐν νήεσσι κατακτάμεν Ἄρτεμις ἰῷ |
| 60 | Primary ἤματι τῷ ὅτʼ ἐγὼν ἑλόμην Λυρνησσὸν ὀλέσσας· |
| 61 | Primary τώ κʼ οὐ τόσσοι Ἀχαιοὶ ὀδὰξ ἕλον ἄσπετον οὖδας |
| 62 | Primary δυσμενέων ὑπὸ χερσὶν ἐμεῦ ἀπομηνίσαντος. |
| 63 | Primary Ἕκτορι μὲν καὶ Τρωσὶ τὸ κέρδιον· αὐτὰρ Ἀχαιοὺς |
| 64 | Primary δηρὸν ἐμῆς καὶ σῆς ἔριδος μνήσεσθαι ὀΐω. |
| 65 | Primary ἀλλὰ τὰ μὲν προτετύχθαι ἐάσομεν ἀχνύμενοί περ |
| 66 | Primary θυμὸν ἐνὶ στήθεσσι φίλον δαμάσαντες ἀνάγκῃ· |
| 67 | Primary νῦν δʼ ἤτοι μὲν ἐγὼ παύω χόλον, οὐδέ τί με χρὴ |
| 68 | Primary ἀσκελέως αἰεὶ μενεαινέμεν· ἀλλʼ ἄγε θᾶσσον |
| 69 | Primary ὄτρυνον πόλεμον δὲ κάρη κομόωντας Ἀχαιούς, |
| 70 | Primary ὄφρʼ ἔτι καὶ Τρώων πειρήσομαι ἀντίον ἐλθὼν |
| 71 | Primary αἴ κʼ ἐθέλωσʼ ἐπὶ νηυσὶν ἰαύειν· ἀλλά τινʼ οἴω |
| 72 | Primary ἀσπασίως αὐτῶν γόνυ κάμψειν, ὅς κε φύγῃσι |
| 73 | Primary δηΐου ἐκ πολέμοιο ὑπʼ ἔγχεος ἡμετέροιο. |
| 74 | Primary ὣς ἔφαθʼ, οἳ δʼ ἐχάρησαν ἐϋκνήμιδες Ἀχαιοὶ |
| 75 | Primary μῆνιν ἀπειπόντος μεγαθύμου Πηλεΐωνος. |
| 76 | Primary τοῖσι δὲ καὶ μετέειπεν ἄναξ ἀνδρῶν Ἀγαμέμνων |
| 77 | Primary αὐτόθεν ἐξ ἕδρης, οὐδʼ ἐν μέσσοισιν ἀναστάς· |
| 78 | Primary ὦ φίλοι ἥρωες Δαναοὶ θεράποντες Ἄρηος |
| 79 | Primary ἑσταότος μὲν καλὸν ἀκούειν, οὐδὲ ἔοικεν |
| 80 | Primary ὑββάλλειν· χαλεπὸν γὰρ ἐπισταμένῳ περ ἐόντι. |
| 81 | Primary ἀνδρῶν δʼ ἐν πολλῷ ὁμάδῳ πῶς κέν τις ἀκούσαι |
| 82 | Primary ἢ εἴποι; βλάβεται δὲ λιγύς περ ἐὼν ἀγορητής. |
| 83 | Primary Πηλεΐδῃ μὲν ἐγὼν ἐνδείξομαι· αὐτὰρ οἱ ἄλλοι |
| 84 | Primary σύνθεσθʼ Ἀργεῖοι, μῦθόν τʼ εὖ γνῶτε ἕκαστος. |
| 85 | Primary πολλάκι δή μοι τοῦτον Ἀχαιοὶ μῦθον ἔειπον |
| 86 | Primary καί τέ με νεικείεσκον· ἐγὼ δʼ οὐκ αἴτιός εἰμι, |
| 87 | Primary ἀλλὰ Ζεὺς καὶ Μοῖρα καὶ ἠεροφοῖτις Ἐρινύς, |
| 88 | Primary οἵ τέ μοι εἰν ἀγορῇ φρεσὶν ἔμβαλον ἄγριον ἄτην, |
| 89 | Primary ἤματι τῷ ὅτʼ Ἀχιλλῆος γέρας αὐτὸς ἀπηύρων. |
| 90 | Primary ἀλλὰ τί κεν ῥέξαιμι; θεὸς διὰ πάντα τελευτᾷ. |
| 91 | Primary πρέσβα Διὸς θυγάτηρ Ἄτη, ἣ πάντας ἀᾶται, |
| 92 | Primary οὐλομένη· τῇ μέν θʼ ἁπαλοὶ πόδες· οὐ γὰρ ἐπʼ οὔδει |
| 93 | Primary πίλναται, ἀλλʼ ἄρα ἥ γε κατʼ ἀνδρῶν κράατα βαίνει |
| 94 | Primary βλάπτουσʼ ἀνθρώπους· κατὰ δʼ οὖν ἕτερόν γε πέδησε. |
| 95 | Primary καὶ γὰρ δή νύ ποτε Ζεὺς ἄσατο, τόν περ ἄριστον |
| 96 | Primary ἀνδρῶν ἠδὲ θεῶν φασʼ ἔμμεναι· ἀλλʼ ἄρα καὶ τὸν |
| 97 | Primary Ἥρη θῆλυς ἐοῦσα δολοφροσύνῃς ἀπάτησεν, |
| 98 | Primary ἤματι τῷ ὅτʼ ἔμελλε βίην Ἡρακληείην |
| 99 | Primary Ἀλκμήνη τέξεσθαι ἐϋστεφάνῳ ἐνὶ Θήβῃ. |
| 100 | Primary ἤτοι ὅ γʼ εὐχόμενος μετέφη πάντεσσι θεοῖσι· |
| 101 | Primary κέκλυτέ μευ πάντές τε θεοὶ πᾶσαί τε θέαιναι, |
| 102 | Primary ὄφρʼ εἴπω τά με θυμὸς ἐνὶ στήθεσσιν ἀνώγει. |
| 103 | Primary σήμερον ἄνδρα φόως δὲ μογοστόκος Εἰλείθυια |
| 104 | Primary ἐκφανεῖ, ὃς πάντεσσι περικτιόνεσσιν ἀνάξει, |
| 105 | Primary τῶν ἀνδρῶν γενεῆς οἵ θʼ αἵματος ἐξ ἐμεῦ εἰσί. |
| 106 | Primary τὸν δὲ δολοφρονέουσα προσηύδα πότνια Ἥρη· |
| 107 | Primary ψευστήσεις, οὐδʼ αὖτε τέλος μύθῳ ἐπιθήσεις. |
| 108 | Primary εἰ δʼ ἄγε νῦν μοι ὄμοσσον Ὀλύμπιε καρτερὸν ὅρκον, |
| 109 | Primary ἦ μὲν τὸν πάντεσσι περικτιόνεσσιν ἀνάξειν |
| 110 | Primary ὅς κεν ἐπʼ ἤματι τῷδε πέσῃ μετὰ ποσσὶ γυναικὸς |
| 111 | Primary τῶν ἀνδρῶν οἳ σῆς ἐξ αἵματός εἰσι γενέθλης. |
| 112 | Primary ὣς ἔφατο· Ζεὺς δʼ οὔ τι δολοφροσύνην ἐνόησεν, |
| 113 | Primary ἀλλʼ ὄμοσεν μέγαν ὅρκον, ἔπειτα δὲ πολλὸν ἀάσθη. |
| 114 | Primary Ἥρη δʼ ἀΐξασα λίπεν ῥίον Οὐλύμποιο, |
| 115 | Primary καρπαλίμως δʼ ἵκετʼ Ἄργος Ἀχαιικόν, ἔνθʼ ἄρα ᾔδη |
| 116 | Primary ἰφθίμην ἄλοχον Σθενέλου Περσηϊάδαο. |
| 117 | Primary ἣ δʼ ἐκύει φίλον υἱόν, ὃ δʼ ἕβδομος ἑστήκει μείς· |
| 118 | Primary ἐκ δʼ ἄγαγε πρὸ φόως δὲ καὶ ἠλιτόμηνον ἐόντα, |
| 119 | Primary Ἀλκμήνης δʼ ἀπέπαυσε τόκον, σχέθε δʼ Εἰλειθυίας. |
| 120 | Primary αὐτὴ δʼ ἀγγελέουσα Δία Κρονίωνα προσηύδα· |
| 121 | Primary Ζεῦ πάτερ ἀργικέραυνε ἔπος τί τοι ἐν φρεσὶ θήσω· |
| 122 | Primary ἤδη ἀνὴρ γέγονʼ ἐσθλὸς ὃς Ἀργείοισιν ἀνάξει |
| 123 | Primary Εὐρυσθεὺς Σθενέλοιο πάϊς Περσηϊάδαο |
| 124 | Primary σὸν γένος· οὔ οἱ ἀεικὲς ἀνασσέμεν Ἀργείοισιν. |
| 125 | Primary ὣς φάτο, τὸν δʼ ἄχος ὀξὺ κατὰ φρένα τύψε βαθεῖαν· |
| 126 | Primary αὐτίκα δʼ εἷλʼ Ἄτην κεφαλῆς λιπαροπλοκάμοιο |
| 127 | Primary χωόμενος φρεσὶν ᾗσι, καὶ ὤμοσε καρτερὸν ὅρκον |
| 128 | Primary μή ποτʼ ἐς Οὔλυμπόν τε καὶ οὐρανὸν ἀστερόεντα |
| 129 | Primary αὖτις ἐλεύσεσθαι Ἄτην, ἣ πάντας ἀᾶται. |
| 130 | Primary ὣς εἰπὼν ἔρριψεν ἀπʼ οὐρανοῦ ἀστερόεντος |
| 131 | Primary χειρὶ περιστρέψας· τάχα δʼ ἵκετο ἔργʼ ἀνθρώπων. |
| 132 | Primary τὴν αἰεὶ στενάχεσχʼ ὅθʼ ἑὸν φίλον υἱὸν ὁρῷτο |
| 133 | Primary ἔργον ἀεικὲς ἔχοντα ὑπʼ Εὐρυσθῆος ἀέθλων. |
| 134 | Primary ὣς καὶ ἐγών, ὅτε δʼ αὖτε μέγας κορυθαίολος Ἕκτωρ |
| 135 | Primary Ἀργείους ὀλέκεσκεν ἐπὶ πρυμνῇσι νέεσσιν, |
| 136 | Primary οὐ δυνάμην λελαθέσθʼ Ἄτης ᾗ πρῶτον ἀάσθην. |
| 137 | Primary ἀλλʼ ἐπεὶ ἀασάμην καί μευ φρένας ἐξέλετο Ζεύς, |
| 138 | Primary ἂψ ἐθέλω ἀρέσαι, δόμεναί τʼ ἀπερείσιʼ ἄποινα· |
| 139 | Primary ἀλλʼ ὄρσευ πόλεμον δὲ καὶ ἄλλους ὄρνυθι λαούς. |
| 140 | Primary δῶρα δʼ ἐγὼν ὅδε πάντα παρασχέμεν ὅσσά τοι ἐλθὼν |
| 141 | Primary χθιζὸς ἐνὶ κλισίῃσιν ὑπέσχετο δῖος Ὀδυσσεύς. |
| 142 | Primary εἰ δʼ ἐθέλεις, ἐπίμεινον ἐπειγόμενός περ Ἄρηος, |
| 143 | Primary δῶρα δέ τοι θεράποντες ἐμῆς παρὰ νηὸς ἑλόντες |
| 144 | Primary οἴσουσʼ, ὄφρα ἴδηαι ὅ τοι μενοεικέα δώσω. |
| 145 | Primary τὸν δʼ ἀπαμειβόμενος προσέφη πόδας ὠκὺς Ἀχιλλεύς· |
| 146 | Primary Ἀτρεΐδη κύδιστε ἄναξ ἀνδρῶν Ἀγάμεμνον |
| 147 | Primary δῶρα μὲν αἴ κʼ ἐθέλῃσθα παρασχέμεν, ὡς ἐπιεικές, |
| 148 | Primary ἤ τʼ ἐχέμεν παρὰ σοί· νῦν δὲ μνησώμεθα χάρμης |
| 149 | Primary αἶψα μάλʼ· οὐ γὰρ χρὴ κλοτοπεύειν ἐνθάδʼ ἐόντας |
| 150 | Primary οὐδὲ διατρίβειν· ἔτι γὰρ μέγα ἔργον ἄρεκτον· |
| 151 | Primary ὥς κέ τις αὖτʼ Ἀχιλῆα μετὰ πρώτοισιν ἴδηται |
| 152 | Primary ἔγχεϊ χαλκείῳ Τρώων ὀλέκοντα φάλαγγας. |
| 153 | Primary ὧδέ τις ὑμείων μεμνημένος ἀνδρὶ μαχέσθω. |
| 154 | Primary τὸν δʼ ἀπαμειβόμενος προσέφη πολύμητις Ὀδυσσεύς· |
| 155 | Primary μὴ δʼ οὕτως, ἀγαθός περ ἐών, θεοείκελʼ Ἀχιλλεῦ |
| 156 | Primary νήστιας ὄτρυνε προτὶ Ἴλιον υἷας Ἀχαιῶν |
| 157 | Primary Τρωσὶ μαχησομένους, ἐπεὶ οὐκ ὀλίγον χρόνον ἔσται |
| 158 | Primary φύλοπις, εὖτʼ ἂν πρῶτον ὁμιλήσωσι φάλαγγες |
| 159 | Primary ἀνδρῶν, ἐν δὲ θεὸς πνεύσῃ μένος ἀμφοτέροισιν. |
| 160 | Primary ἀλλὰ πάσασθαι ἄνωχθι θοῇς ἐπὶ νηυσὶν Ἀχαιοὺς |
| 161 | Primary σίτου καὶ οἴνοιο· τὸ γὰρ μένος ἐστὶ καὶ ἀλκή. |
| 162 | Primary οὐ γὰρ ἀνὴρ πρόπαν ἦμαρ ἐς ἠέλιον καταδύντα |
| 163 | Primary ἄκμηνος σίτοιο δυνήσεται ἄντα μάχεσθαι· |
| 164 | Primary εἴ περ γὰρ θυμῷ γε μενοινάᾳ πολεμίζειν, |
| 165 | Primary ἀλλά τε λάθρῃ γυῖα βαρύνεται, ἠδὲ κιχάνει |
| 166 | Primary δίψά τε καὶ λιμός, βλάβεται δέ τε γούνατʼ ἰόντι. |
| 167 | Primary ὃς δέ κʼ ἀνὴρ οἴνοιο κορεσσάμενος καὶ ἐδωδῆς |
| 168 | Primary ἀνδράσι δυσμενέεσσι πανημέριος πολεμίζῃ, |
| 169 | Primary θαρσαλέον νύ οἱ ἦτορ ἐνὶ φρεσίν, οὐδέ τι γυῖα |
| 170 | Primary πρὶν κάμνει πρὶν πάντας ἐρωῆσαι πολέμοιο. |
| 171 | Primary ἀλλʼ ἄγε λαὸν μὲν σκέδασον καὶ δεῖπνον ἄνωχθι |
| 172 | Primary ὅπλεσθαι· τὰ δὲ δῶρα ἄναξ ἀνδρῶν Ἀγαμέμνων |
| 173 | Primary οἰσέτω ἐς μέσσην ἀγορήν, ἵνα πάντες Ἀχαιοὶ |
| 174 | Primary ὀφθαλμοῖσιν ἴδωσι, σὺ δὲ φρεσὶ σῇσιν ἰανθῇς. |
| 175 | Primary ὀμνυέτω δέ τοι ὅρκον ἐν Ἀργείοισιν ἀναστὰς |
| 176 | Primary μή ποτε τῆς εὐνῆς ἐπιβήμεναι ἠδὲ μιγῆναι· |
| 177 | Primary ἣ θέμις ἐστὶν ἄναξ ἤ τʼ ἀνδρῶν ἤ τε γυναικῶν· |
| 178 | Primary καὶ δὲ σοὶ αὐτῷ θυμὸς ἐνὶ φρεσὶν ἵλαος ἔστω. |
| 179 | Primary αὐτὰρ ἔπειτά σε δαιτὶ ἐνὶ κλισίῃς ἀρεσάσθω |
| 180 | Primary πιείρῃ, ἵνα μή τι δίκης ἐπιδευὲς ἔχῃσθα. |
| 181 | Primary Ἀτρεΐδη σὺ δʼ ἔπειτα δικαιότερος καὶ ἐπʼ ἄλλῳ |
| 182 | Primary ἔσσεαι. οὐ μὲν γάρ τι νεμεσσητὸν βασιλῆα |
| 183 | Primary ἄνδρʼ ἀπαρέσσασθαι ὅτε τις πρότερος χαλεπήνῃ. |
| 184 | Primary τὸν δʼ αὖτε προσέειπεν ἄναξ ἀνδρῶν Ἀγαμέμνων· |
| 185 | Primary χαίρω σεῦ Λαερτιάδη τὸν μῦθον ἀκούσας· |
| 186 | Primary ἐν μοίρῃ γὰρ πάντα διίκεο καὶ κατέλεξας. |
| 187 | Primary ταῦτα δʼ ἐγὼν ἐθέλω ὀμόσαι, κέλεται δέ με θυμός, |
| 188 | Primary οὐδʼ ἐπιορκήσω πρὸς δαίμονος. αὐτὰρ Ἀχιλλεὺς |
| 189 | Primary μιμνέτω αὐτόθι τεῖος ἐπειγόμενός περ Ἄρηος· |
| 190 | Primary μίμνετε δʼ ἄλλοι πάντες ἀολλέες, ὄφρά κε δῶρα |
| 191 | Primary ἐκ κλισίης ἔλθῃσι καὶ ὅρκια πιστὰ τάμωμεν. |
| 192 | Primary σοὶ δʼ αὐτῷ τόδʼ ἐγὼν ἐπιτέλλομαι ἠδὲ κελεύω· |
| 193 | Primary κρινάμενος κούρητας ἀριστῆας Παναχαιῶν |
| 194 | Primary δῶρα ἐμῆς παρὰ νηὸς ἐνεικέμεν, ὅσσʼ Ἀχιλῆϊ |
| 195 | Primary χθιζὸν ὑπέστημεν δώσειν, ἀγέμεν τε γυναῖκας. |
| 196 | Primary Ταλθύβιος δέ μοι ὦκα κατὰ στρατὸν εὐρὺν Ἀχαιῶν |
| 197 | Primary κάπρον ἑτοιμασάτω ταμέειν Διί τʼ Ἠελίῳ τε. |
| 198 | Primary τὸν δʼ ἀπαμειβόμενος προσέφη πόδας ὠκὺς Ἀχιλλεύς· |
| 199 | Primary Ἀτρεΐδη κύδιστε ἄναξ ἀνδρῶν Ἀγάμεμνον |
| 200 | Primary ἄλλοτέ περ καὶ μᾶλλον ὀφέλλετε ταῦτα πένεσθαι, |
| 201 | Primary ὁππότε τις μεταπαυσωλὴ πολέμοιο γένηται |
| 202 | Primary καὶ μένος οὐ τόσον ᾖσιν ἐνὶ στήθεσσιν ἐμοῖσι. |
| 203 | Primary νῦν δʼ οἳ μὲν κέαται δεδαϊγμένοι, οὓς ἐδάμασσεν |
| 204 | Primary Ἕκτωρ Πριαμίδης, ὅτε οἱ Ζεὺς κῦδος ἔδωκεν, |
| 205 | Primary ὑμεῖς δʼ ἐς βρωτὺν ὀτρύνετον· ἦ τʼ ἂν ἔγωγε |
| 206 | Primary νῦν μὲν ἀνώγοιμι πτολεμίζειν υἷας Ἀχαιῶν |
| 207 | Primary νήστιας ἀκμήνους, ἅμα δʼ ἠελίῳ καταδύντι |
| 208 | Primary τεύξεσθαι μέγα δόρπον, ἐπὴν τεισαίμεθα λώβην. |
| 209 | Primary πρὶν δʼ οὔ πως ἂν ἔμοιγε φίλον κατὰ λαιμὸν ἰείη |
| 210 | Primary οὐ πόσις οὐδὲ βρῶσις ἑταίρου τεθνηῶτος |
| 211 | Primary ὅς μοι ἐνὶ κλισίῃ δεδαϊγμένος ὀξέϊ χαλκῷ |
| 212 | Primary κεῖται ἀνὰ πρόθυρον τετραμμένος, ἀμφὶ δʼ ἑταῖροι |
| 213 | Primary μύρονται· τό μοι οὔ τι μετὰ φρεσὶ ταῦτα μέμηλεν, |
| 214 | Primary ἀλλὰ φόνος τε καὶ αἷμα καὶ ἀργαλέος στόνος ἀνδρῶν. |
| 215 | Primary τὸν δʼ ἀπαμειβόμενος προσέφη πολύμητις Ὀδυσσεύς· |
| 216 | Primary ὦ Ἀχιλεῦ Πηλῆος υἱὲ μέγα φέρτατʼ Ἀχαιῶν, |
| 217 | Primary κρείσσων εἰς ἐμέθεν καὶ φέρτερος οὐκ ὀλίγον περ |
| 218 | Primary ἔγχει, ἐγὼ δέ κε σεῖο νοήματί γε προβαλοίμην |
| 219 | Primary πολλόν, ἐπεὶ πρότερος γενόμην καὶ πλείονα οἶδα. |
| 220 | Primary τώ τοι ἐπιτλήτω κραδίη μύθοισιν ἐμοῖσιν. |
| 221 | Primary αἶψά τε φυλόπιδος πέλεται κόρος ἀνθρώποισιν, |
| 222 | Primary ἧς τε πλείστην μὲν καλάμην χθονὶ χαλκὸς ἔχευεν, |
| 223 | Primary ἄμητος δʼ ὀλίγιστος, ἐπὴν κλίνῃσι τάλαντα |
| 224 | Primary Ζεύς, ὅς τʼ ἀνθρώπων ταμίης πολέμοιο τέτυκται. |
| 225 | Primary γαστέρι δʼ οὔ πως ἔστι νέκυν πενθῆσαι Ἀχαιούς· |
| 226 | Primary λίην γὰρ πολλοὶ καὶ ἐπήτριμοι ἤματα πάντα |
| 227 | Primary πίπτουσιν· πότε κέν τις ἀναπνεύσειε πόνοιο; |
| 228 | Primary ἀλλὰ χρὴ τὸν μὲν καταθάπτειν ὅς κε θάνῃσι |
| 229 | Primary νηλέα θυμὸν ἔχοντας ἐπʼ ἤματι δακρύσαντας· |
| 230 | Primary ὅσσοι δʼ ἂν πολέμοιο περὶ στυγεροῖο λίπωνται |
| 231 | Primary μεμνῆσθαι πόσιος καὶ ἐδητύος, ὄφρʼ ἔτι μᾶλλον |
| 232 | Primary ἀνδράσι δυσμενέεσσι μαχώμεθα νωλεμὲς αἰεὶ |
| 233 | Primary ἑσσάμενοι χροῒ χαλκὸν ἀτειρέα. μηδέ τις ἄλλην |
| 234 | Primary λαῶν ὀτρυντὺν ποτιδέγμενος ἰσχαναάσθω· |
| 235 | Primary ἥδε γὰρ ὀτρυντὺς κακὸν ἔσσεται ὅς κε λίπηται |
| 236 | Primary νηυσὶν ἐπʼ Ἀργείων· ἀλλʼ ἀθρόοι ὁρμηθέντες |
| 237 | Primary Τρωσὶν ἐφʼ ἱπποδάμοισιν ἐγείρομεν ὀξὺν Ἄρηα. |
| 238 | Primary ἦ, καὶ Νέστορος υἷας ὀπάσσατο κυδαλίμοιο |
| 239 | Primary Φυλεΐδην τε Μέγητα Θόαντά τε Μηριόνην τε |
| 240 | Primary καὶ Κρειοντιάδην Λυκομήδεα καὶ Μελάνιππον· |
| 241 | Primary βὰν δʼ ἴμεν ἐς κλισίην Ἀγαμέμνονος Ἀτρεΐδαο. |
| 242 | Primary αὐτίκʼ ἔπειθʼ ἅμα μῦθος ἔην, τετέλεστο δὲ ἔργον· |
| 243 | Primary ἑπτὰ μὲν ἐκ κλισίης τρίποδας φέρον, οὕς οἱ ὑπέστη, |
| 244 | Primary αἴθωνας δὲ λέβητας ἐείκοσι, δώδεκα δʼ ἵππους· |
| 245 | Primary ἐκ δʼ ἄγον αἶψα γυναῖκας ἀμύμονα ἔργα ἰδυίας |
| 246 | Primary ἕπτʼ, ἀτὰρ ὀγδοάτην Βρισηΐδα καλλιπάρῃον. |
| 247 | Primary χρυσοῦ δὲ στήσας Ὀδυσεὺς δέκα πάντα τάλαντα |
| 248 | Primary ἦρχʼ, ἅμα δʼ ἄλλοι δῶρα φέρον κούρητες Ἀχαιῶν. |
| 249 | Primary καὶ τὰ μὲν ἐν μέσσῃ ἀγορῇ θέσαν, ἂν δʼ Ἀγαμέμνων |
| 250 | Primary ἵστατο· Ταλθύβιος δὲ θεῷ ἐναλίγκιος αὐδὴν |
| 251 | Primary κάπρον ἔχων ἐν χερσὶ παρίστατο ποιμένι λαῶν. |
| 252 | Primary Ἀτρεΐδης δὲ ἐρυσσάμενος χείρεσσι μάχαιραν, |
| 253 | Primary ἥ οἱ πὰρ ξίφεος μέγα κουλεὸν αἰὲν ἄωρτο, |
| 254 | Primary κάπρου ἀπὸ τρίχας ἀρξάμενος Διὶ χεῖρας ἀνασχὼν |
| 255 | Primary εὔχετο· τοὶ δʼ ἄρα πάντες ἐπʼ αὐτόφιν εἵατο σιγῇ |
| 256 | Primary Ἀργεῖοι κατὰ μοῖραν ἀκούοντες βασιλῆος. |
| 257 | Primary εὐξάμενος δʼ ἄρα εἶπεν ἰδὼν εἰς οὐρανὸν εὐρύν· |
| 258 | Primary ἴστω νῦν Ζεὺς πρῶτα θεῶν ὕπατος καὶ ἄριστος |
| 259 | Primary Γῆ τε καὶ Ἠέλιος καὶ Ἐρινύες, αἵ θʼ ὑπὸ γαῖαν |
| 260 | Primary ἀνθρώπους τίνυνται, ὅτις κʼ ἐπίορκον ὀμόσσῃ, |
| 261 | Primary μὴ μὲν ἐγὼ κούρῃ Βρισηΐδι χεῖρʼ ἐπένεικα, |
| 262 | Primary οὔτʼ εὐνῆς πρόφασιν κεχρημένος οὔτέ τευ ἄλλου. |
| 263 | Primary ἀλλʼ ἔμενʼ ἀπροτίμαστος ἐνὶ κλισίῃσιν ἐμῇσιν. |
| 264 | Primary εἰ δέ τι τῶνδʼ ἐπίορκον ἐμοὶ θεοὶ ἄλγεα δοῖεν |
| 265 | Primary πολλὰ μάλʼ, ὅσσα διδοῦσιν ὅτίς σφʼ ἀλίτηται ὀμόσσας. |
| 266 | Primary ἦ, καὶ ἀπὸ στόμαχον κάπρου τάμε νηλέϊ χαλκῷ. |
| 267 | Primary τὸν μὲν Ταλθύβιος πολιῆς ἁλὸς ἐς μέγα λαῖτμα |
| 268 | Primary ῥῖψʼ ἐπιδινήσας βόσιν ἰχθύσιν· αὐτὰρ Ἀχιλλεὺς |
| 269 | Primary ἀνστὰς Ἀργείοισι φιλοπτολέμοισι μετηύδα· |
| 270 | Primary Ζεῦ πάτερ ἦ μεγάλας ἄτας ἄνδρεσσι διδοῖσθα· |
| 271 | Primary οὐκ ἂν δή ποτε θυμὸν ἐνὶ στήθεσσιν ἐμοῖσιν |
| 272 | Primary Ἀτρεΐδης ὤρινε διαμπερές, οὐδέ κε κούρην |
| 273 | Primary ἦγεν ἐμεῦ ἀέκοντος ἀμήχανος· ἀλλά ποθι Ζεὺς |
| 274 | Primary ἤθελʼ Ἀχαιοῖσιν θάνατον πολέεσσι γενέσθαι. |
| 275 | Primary νῦν δʼ ἔρχεσθʼ ἐπὶ δεῖπνον, ἵνα ξυνάγωμεν Ἄρηα. |
| 276 | Primary ὣς ἄρʼ ἐφώνησεν, λῦσεν δʼ ἀγορὴν αἰψηρήν. |
| 277 | Primary οἳ μὲν ἄρʼ ἐσκίδναντο ἑὴν ἐπὶ νῆα ἕκαστος, |
| 278 | Primary δῶρα δὲ Μυρμιδόνες μεγαλήτορες ἀμφεπένοντο, |
| 279 | Primary βὰν δʼ ἐπὶ νῆα φέροντες Ἀχιλλῆος θείοιο. |
| 280 | Primary καὶ τὰ μὲν ἐν κλισίῃσι θέσαν, κάθισαν δὲ γυναῖκας, |
| 281 | Primary ἵππους δʼ εἰς ἀγέλην ἔλασαν θεράποντες ἀγαυοί. |
| 282 | Primary Βρισηῒς δʼ ἄρʼ ἔπειτʼ ἰκέλη χρυσέῃ Ἀφροδίτῃ |
| 283 | Primary ὡς ἴδε Πάτροκλον δεδαϊγμένον ὀξέϊ χαλκῷ, |
| 284 | Primary ἀμφʼ αὐτῷ χυμένη λίγʼ ἐκώκυε, χερσὶ δʼ ἄμυσσε |
| 285 | Primary στήθεά τʼ ἠδʼ ἁπαλὴν δειρὴν ἰδὲ καλὰ πρόσωπα. |
| 286 | Primary εἶπε δʼ ἄρα κλαίουσα γυνὴ ἐϊκυῖα θεῇσι· |
| 287 | Primary Πάτροκλέ μοι δειλῇ πλεῖστον κεχαρισμένε θυμῷ |
| 288 | Primary ζωὸν μέν σε ἔλειπον ἐγὼ κλισίηθεν ἰοῦσα, |
| 289 | Primary νῦν δέ σε τεθνηῶτα κιχάνομαι ὄρχαμε λαῶν |
| 290 | Primary ἂψ ἀνιοῦσʼ· ὥς μοι δέχεται κακὸν ἐκ κακοῦ αἰεί. |
| 291 | Primary ἄνδρα μὲν ᾧ ἔδοσάν με πατὴρ καὶ πότνια μήτηρ |
| 292 | Primary εἶδον πρὸ πτόλιος δεδαϊγμένον ὀξέϊ χαλκῷ, |
| 293 | Primary τρεῖς τε κασιγνήτους, τούς μοι μία γείνατο μήτηρ, |
| 294 | Primary κηδείους, οἳ πάντες ὀλέθριον ἦμαρ ἐπέσπον. |
| 295 | Primary οὐδὲ μὲν οὐδέ μʼ ἔασκες, ὅτʼ ἄνδρʼ ἐμὸν ὠκὺς Ἀχιλλεὺς |
| 296 | Primary ἔκτεινεν, πέρσεν δὲ πόλιν θείοιο Μύνητος, |
| 297 | Primary κλαίειν, ἀλλά μʼ ἔφασκες Ἀχιλλῆος θείοιο |
| 298 | Primary κουριδίην ἄλοχον θήσειν, ἄξειν τʼ ἐνὶ νηυσὶν |
| 299 | Primary ἐς Φθίην, δαίσειν δὲ γάμον μετὰ Μυρμιδόνεσσι. |
| 300 | Primary τώ σʼ ἄμοτον κλαίω τεθνηότα μείλιχον αἰεί. |
| 301 | Primary ὣς ἔφατο κλαίουσʼ, ἐπὶ δὲ στενάχοντο γυναῖκες |
| 302 | Primary Πάτροκλον πρόφασιν, σφῶν δʼ αὐτῶν κήδεʼ ἑκάστη. |
| 303 | Primary αὐτὸν δʼ ἀμφὶ γέροντες Ἀχαιῶν ἠγερέθοντο |
| 304 | Primary λισσόμενοι δειπνῆσαι· ὃ δʼ ἠρνεῖτο στεναχίζων· |
| 305 | Primary λίσσομαι, εἴ τις ἔμοιγε φίλων ἐπιπείθεθʼ ἑταίρων, |
| 306 | Primary μή με πρὶν σίτοιο κελεύετε μηδὲ ποτῆτος |
| 307 | Primary ἄσασθαι φίλον ἦτορ, ἐπεί μʼ ἄχος αἰνὸν ἱκάνει· |
| 308 | Primary δύντα δʼ ἐς ἠέλιον μενέω καὶ τλήσομαι ἔμπης. |
| 309 | Primary ὣς εἰπὼν ἄλλους μὲν ἀπεσκέδασεν βασιλῆας, |
| 310 | Primary δοιὼ δʼ Ἀτρεΐδα μενέτην καὶ δῖος Ὀδυσσεὺς |
| 311 | Primary Νέστωρ Ἰδομενεύς τε γέρων θʼ ἱππηλάτα Φοῖνιξ |
| 312 | Primary τέρποντες πυκινῶς ἀκαχήμενον· οὐδέ τι θυμῷ |
| 313 | Primary τέρπετο, πρὶν πολέμου στόμα δύμεναι αἱματόεντος. |
| 314 | Primary μνησάμενος δʼ ἁδινῶς ἀνενείκατο φώνησέν τε· |
| 315 | Primary ἦ ῥά νύ μοί ποτε καὶ σὺ δυσάμμορε φίλταθʼ ἑταίρων |
| 316 | Primary αὐτὸς ἐνὶ κλισίῃ λαρὸν παρὰ δεῖπνον ἔθηκας |
| 317 | Primary αἶψα καὶ ὀτραλέως, ὁπότε σπερχοίατʼ Ἀχαιοὶ |
| 318 | Primary Τρωσὶν ἐφʼ ἱπποδάμοισι φέρειν πολύδακρυν Ἄρηα. |
| 319 | Primary νῦν δὲ σὺ μὲν κεῖσαι δεδαϊγμένος, αὐτὰρ ἐμὸν κῆρ |
| 320 | Primary ἄκμηνον πόσιος καὶ ἐδητύος, ἔνδον ἐόντων, |
| 321 | Primary σῇ ποθῇ· οὐ μὲν γάρ τι κακώτερον ἄλλο πάθοιμι, |
| 322 | Primary οὐδʼ εἴ κεν τοῦ πατρὸς ἀποφθιμένοιο πυθοίμην, |
| 323 | Primary ὅς που νῦν Φθίηφι τέρεν κατὰ δάκρυον εἴβει |
| 324 | Primary χήτεϊ τοιοῦδʼ υἷος· ὃ δʼ ἀλλοδαπῷ ἐνὶ δήμῳ |
| 325 | Primary εἵνεκα ῥιγεδανῆς Ἑλένης Τρωσὶν πολεμίζω· |
| 326 | Primary ἠὲ τὸν ὃς Σκύρῳ μοι ἔνι τρέφεται φίλος υἱός, |
| 327 | Primary εἴ που ἔτι ζώει γε Νεοπτόλεμος θεοειδής. |
| 328 | Primary πρὶν μὲν γάρ μοι θυμὸς ἐνὶ στήθεσσιν ἐώλπει |
| 329 | Primary οἶον ἐμὲ φθίσεσθαι ἀπʼ Ἄργεος ἱπποβότοιο |
| 330 | Primary αὐτοῦ ἐνὶ Τροίῃ, σὲ δέ τε Φθίην δὲ νέεσθαι, |
| 331 | Primary ὡς ἄν μοι τὸν παῖδα θοῇ ἐνὶ νηῒ μελαίνῃ |
| 332 | Primary Σκυρόθεν ἐξαγάγοις καί οἱ δείξειας ἕκαστα |
| 333 | Primary κτῆσιν ἐμὴν δμῶάς τε καὶ ὑψερεφὲς μέγα δῶμα. |
| 334 | Primary ἤδη γὰρ Πηλῆά γʼ ὀΐομαι ἢ κατὰ πάμπαν |
| 335 | Primary τεθνάμεν, ἤ που τυτθὸν ἔτι ζώοντʼ ἀκάχησθαι |
| 336 | Primary γήραΐ τε στυγερῷ καὶ ἐμὴν ποτιδέγμενον αἰεὶ |
| 337 | Primary λυγρὴν ἀγγελίην, ὅτʼ ἀποφθιμένοιο πύθηται. |
| 338 | Primary ὣς ἔφατο κλαίων, ἐπὶ δὲ στενάχοντο γέροντες, |
| 339 | Primary μνησάμενοι τὰ ἕκαστος ἐνὶ μεγάροισιν ἔλειπον· |
| 340 | Primary μυρομένους δʼ ἄρα τούς γε ἰδὼν ἐλέησε Κρονίων, |
| 341 | Primary αἶψα δʼ Ἀθηναίην ἔπεα πτερόεντα προσηύδα· |
| 342 | Primary τέκνον ἐμόν, δὴ πάμπαν ἀποίχεαι ἀνδρὸς ἑῆος. |
| 343 | Primary ἦ νύ τοι οὐκέτι πάγχυ μετὰ φρεσὶ μέμβλετʼ Ἀχιλλεύς; |
| 344 | Primary κεῖνος ὅ γε προπάροιθε νεῶν ὀρθοκραιράων |
| 345 | Primary ἧσται ὀδυρόμενος ἕταρον φίλον· οἳ δὲ δὴ ἄλλοι |
| 346 | Primary οἴχονται μετὰ δεῖπνον, ὃ δʼ ἄκμηνος καὶ ἄπαστος. |
| 347 | Primary ἀλλʼ ἴθι οἱ νέκτάρ τε καὶ ἀμβροσίην ἐρατεινὴν |
| 348 | Primary στάξον ἐνὶ στήθεσσʼ, ἵνα μή μιν λιμὸς ἵκηται. |
| 349 | Primary ὣς εἰπὼν ὄτρυνε πάρος μεμαυῖαν Ἀθήνην· |
| 350 | Primary ἣ δʼ ἅρπῃ ἐϊκυῖα τανυπτέρυγι λιγυφώνῳ |
| 351 | Primary οὐρανοῦ ἐκκατεπᾶλτο διʼ αἰθέρος. αὐτὰρ Ἀχαιοὶ |
| 352 | Primary αὐτίκα θωρήσσοντο κατὰ στρατόν· ἣ δʼ Ἀχιλῆϊ |
| 353 | Primary νέκταρ ἐνὶ στήθεσσι καὶ ἀμβροσίην ἐρατεινὴν |
| 354 | Primary στάξʼ, ἵνα μή μιν λιμὸς ἀτερπὴς γούναθʼ ἵκοιτο· |
| 355 | Primary αὐτὴ δὲ πρὸς πατρὸς ἐρισθενέος πυκινὸν δῶ |
| 356 | Primary ᾤχετο, τοὶ δʼ ἀπάνευθε νεῶν ἐχέοντο θοάων. |
| 357 | Primary ὡς δʼ ὅτε ταρφειαὶ νιφάδες Διὸς ἐκποτέονται |
| 358 | Primary ψυχραὶ ὑπὸ ῥιπῆς αἰθρηγενέος Βορέαο, |
| 359 | Primary ὣς τότε ταρφειαὶ κόρυθες λαμπρὸν γανόωσαι |
| 360 | Primary νηῶν ἐκφορέοντο καὶ ἀσπίδες ὀμφαλόεσσαι |
| 361 | Primary θώρηκές τε κραταιγύαλοι καὶ μείλινα δοῦρα. |
| 362 | Primary αἴγλη δʼ οὐρανὸν ἷκε, γέλασσε δὲ πᾶσα περὶ χθὼν |
| 363 | Primary χαλκοῦ ὑπὸ στεροπῆς· ὑπὸ δὲ κτύπος ὄρνυτο ποσσὶν |
| 364 | Primary ἀνδρῶν· ἐν δὲ μέσοισι κορύσσετο δῖος Ἀχιλλεύς. |
| 365 | Primary τοῦ καὶ ὀδόντων μὲν καναχὴ πέλε, τὼ δέ οἱ ὄσσε |
| 366 | Primary λαμπέσθην ὡς εἴ τε πυρὸς σέλας, ἐν δέ οἱ ἦτορ |
| 367 | Primary δῦνʼ ἄχος ἄτλητον· ὃ δʼ ἄρα Τρωσὶν μενεαίνων |
| 368 | Primary δύσετο δῶρα θεοῦ, τά οἱ Ἥφαιστος κάμε τεύχων. |
| 369 | Primary κνημῖδας μὲν πρῶτα περὶ κνήμῃσιν ἔθηκε |
| 370 | Primary καλὰς ἀργυρέοισιν ἐπισφυρίοις ἀραρυίας· |
| 371 | Primary δεύτερον αὖ θώρηκα περὶ στήθεσσιν ἔδυνεν. |
| 372 | Primary ἀμφὶ δʼ ἄρʼ ὤμοισιν βάλετο ξίφος ἀργυρόηλον |
| 373 | Primary χάλκεον· αὐτὰρ ἔπειτα σάκος μέγα τε στιβαρόν τε |
| 374 | Primary εἵλετο, τοῦ δʼ ἀπάνευθε σέλας γένετʼ ἠΰτε μήνης. |
| 375 | Primary ὡς δʼ ὅτʼ ἂν ἐκ πόντοιο σέλας ναύτῃσι φανήῃ |
| 376 | Primary καιομένοιο πυρός, τό τε καίεται ὑψόθʼ ὄρεσφι |
| 377 | Primary σταθμῷ ἐν οἰοπόλῳ· τοὺς δʼ οὐκ ἐθέλοντας ἄελλαι |
| 378 | Primary πόντον ἐπʼ ἰχθυόεντα φίλων ἀπάνευθε φέρουσιν· |
| 379 | Primary ὣς ἀπʼ Ἀχιλλῆος σάκεος σέλας αἰθέρʼ ἵκανε |
| 380 | Primary καλοῦ δαιδαλέου· περὶ δὲ τρυφάλειαν ἀείρας |
| 381 | Primary κρατὶ θέτο βριαρήν· ἣ δʼ ἀστὴρ ὣς ἀπέλαμπεν |
| 382 | Primary ἵππουρις τρυφάλεια, περισσείοντο δʼ ἔθειραι |
| 383 | Primary χρύσεαι, ἃς Ἥφαιστος ἵει λόφον ἀμφὶ θαμειάς. |
| 384 | Primary πειρήθη δʼ ἕο αὐτοῦ ἐν ἔντεσι δῖος Ἀχιλλεύς, |
| 385 | Primary εἰ οἷ ἐφαρμόσσειε καὶ ἐντρέχοι ἀγλαὰ γυῖα· |
| 386 | Primary τῷ δʼ εὖτε πτερὰ γίγνετʼ, ἄειρε δὲ ποιμένα λαῶν. |
| 387 | Primary ἐκ δʼ ἄρα σύριγγος πατρώϊον ἐσπάσατʼ ἔγχος |
| 388 | Primary βριθὺ μέγα στιβαρόν· τὸ μὲν οὐ δύνατʼ ἄλλος Ἀχαιῶν |
| 389 | Primary πάλλειν, ἀλλά μιν οἶος ἐπίστατο πῆλαι Ἀχιλλεύς, |
| 390 | Primary Πηλιάδα μελίην, τὴν πατρὶ φίλῳ πόρε Χείρων |
| 391 | Primary Πηλίου ἐκ κορυφῆς φόνον ἔμμεναι ἡρώεσσιν· |
| 392 | Primary ἵππους δʼ Αὐτομέδων τε καὶ Ἄλκιμος ἀμφιέποντες |
| 393 | Primary ζεύγνυον· ἀμφὶ δὲ καλὰ λέπαδνʼ ἕσαν, ἐν δὲ χαλινοὺς |
| 394 | Primary γαμφηλῇς ἔβαλον, κατὰ δʼ ἡνία τεῖναν ὀπίσσω |
| 395 | Primary κολλητὸν ποτὶ δίφρον. ὃ δὲ μάστιγα φαεινὴν |
| 396 | Primary χειρὶ λαβὼν ἀραρυῖαν ἐφʼ ἵπποιιν ἀνόρουσεν |
| 397 | Primary Αὐτομέδων· ὄπιθεν δὲ κορυσσάμενος βῆ Ἀχιλλεὺς |
| 398 | Primary τεύχεσι παμφαίνων ὥς τʼ ἠλέκτωρ Ὑπερίων, |
| 399 | Primary σμερδαλέον δʼ ἵπποισιν ἐκέκλετο πατρὸς ἑοῖο· |
| 400 | Primary Ξάνθέ τε καὶ Βαλίε τηλεκλυτὰ τέκνα Ποδάργης |
| 401 | Primary ἄλλως δὴ φράζεσθε σαωσέμεν ἡνιοχῆα |
| 402 | Primary ἂψ Δαναῶν ἐς ὅμιλον ἐπεί χʼ ἕωμεν πολέμοιο, |
| 403 | Primary μηδʼ ὡς Πάτροκλον λίπετʼ αὐτόθι τεθνηῶτα. |
| 404 | Primary τὸν δʼ ἄρʼ ὑπὸ ζυγόφι προσέφη πόδας αἰόλος ἵππος |
| 405 | Primary Ξάνθος, ἄφαρ δʼ ἤμυσε καρήατι· πᾶσα δὲ χαίτη |
| 406 | Primary ζεύγλης ἐξεριποῦσα παρὰ ζυγὸν οὖδας ἵκανεν· |
| 407 | Primary αὐδήεντα δʼ ἔθηκε θεὰ λευκώλενος Ἥρη· |
| 408 | Primary καὶ λίην σʼ ἔτι νῦν γε σαώσομεν ὄβριμʼ Ἀχιλλεῦ· |
| 409 | Primary ἀλλά τοι ἐγγύθεν ἦμαρ ὀλέθριον· οὐδέ τοι ἡμεῖς |
| 410 | Primary αἴτιοι, ἀλλὰ θεός τε μέγας καὶ Μοῖρα κραταιή. |
| 411 | Primary οὐδὲ γὰρ ἡμετέρῃ βραδυτῆτί τε νωχελίῃ τε |
| 412 | Primary Τρῶες ἀπʼ ὤμοιιν Πατρόκλου τεύχεʼ ἕλοντο· |
| 413 | Primary ἀλλὰ θεῶν ὤριστος, ὃν ἠΰκομος τέκε Λητώ, |
| 414 | Primary ἔκτανʼ ἐνὶ προμάχοισι καὶ Ἕκτορι κῦδος ἔδωκε. |
| 415 | Primary νῶϊ δὲ καί κεν ἅμα πνοιῇ Ζεφύροιο θέοιμεν, |
| 416 | Primary ἥν περ ἐλαφροτάτην φάσʼ ἔμμεναι· ἀλλὰ σοὶ αὐτῷ |
| 417 | Primary μόρσιμόν ἐστι θεῷ τε καὶ ἀνέρι ἶφι δαμῆναι. |
| 418 | Primary ὣς ἄρα φωνήσαντος Ἐρινύες ἔσχεθον αὐδήν. |
| 419 | Primary τὸν δὲ μέγʼ ὀχθήσας προσέφη πόδας ὠκὺς Ἀχιλλεύς· |
| 420 | Primary Ξάνθε τί μοι θάνατον μαντεύεαι; οὐδέ τί σε χρή. |
| 421 | Primary εὖ νυ τὸ οἶδα καὶ αὐτὸς ὅ μοι μόρος ἐνθάδʼ ὀλέσθαι |
| 422 | Primary νόσφι φίλου πατρὸς καὶ μητέρος· ἀλλὰ καὶ ἔμπης |
| 423 | Primary οὐ λήξω πρὶν Τρῶας ἅδην ἐλάσαι πολέμοιο. |
| 424 | Primary ἦ ῥα, καὶ ἐν πρώτοις ἰάχων ἔχε μώνυχας ἵππους. |