Reader
Reader | Iliad, Book 21
Iliad
Homer
Text
Position
Line 1 of 611
Waypoints
| Line Ref | Monro and Allen | Ancient Greek |
|---|---|
| 1 | Primary ἀλλʼ ὅτε δὴ πόρον ἷξον ἐϋρρεῖος ποταμοῖο |
| 2 | Primary Ξάνθου δινήεντος, ὃν ἀθάνατος τέκετο Ζεύς, |
| 3 | Primary ἔνθα διατμήξας τοὺς μὲν πεδίον δὲ δίωκε |
| 4 | Primary πρὸς πόλιν, ᾗ περ Ἀχαιοὶ ἀτυζόμενοι φοβέοντο |
| 5 | Primary ἤματι τῷ προτέρῳ, ὅτε μαίνετο φαίδιμος Ἕκτωρ· |
| 6 | Primary τῇ ῥʼ οἵ γε προχέοντο πεφυζότες, ἠέρα δʼ Ἥρη |
| 7 | Primary πίτνα πρόσθε βαθεῖαν ἐρυκέμεν· ἡμίσεες δὲ |
| 8 | Primary ἐς ποταμὸν εἰλεῦντο βαθύρροον ἀργυροδίνην, |
| 9 | Primary ἐν δʼ ἔπεσον μεγάλῳ πατάγῳ, βράχε δʼ αἰπὰ ῥέεθρα, |
| 10 | Primary ὄχθαι δʼ ἀμφὶ περὶ μεγάλʼ ἴαχον· οἳ δʼ ἀλαλητῷ |
| 11 | Primary ἔννεον ἔνθα καὶ ἔνθα ἑλισσόμενοι περὶ δίνας. |
| 12 | Primary ὡς δʼ ὅθʼ ὑπὸ ῥιπῆς πυρὸς ἀκρίδες ἠερέθονται |
| 13 | Primary φευγέμεναι ποταμὸν δέ· τὸ δὲ φλέγει ἀκάματον πῦρ |
| 14 | Primary ὄρμενον ἐξαίφνης, ταὶ δὲ πτώσσουσι καθʼ ὕδωρ· |
| 15 | Primary ὣς ὑπʼ Ἀχιλλῆος Ξάνθου βαθυδινήεντος |
| 16 | Primary πλῆτο ῥόος κελάδων ἐπιμὶξ ἵππων τε καὶ ἀνδρῶν. |
| 17 | Primary αὐτὰρ ὃ διογενὴς δόρυ μὲν λίπεν αὐτοῦ ἐπʼ ὄχθῃ |
| 18 | Primary κεκλιμένον μυρίκῃσιν, ὃ δʼ ἔσθορε δαίμονι ἶσος |
| 19 | Primary φάσγανον οἶον ἔχων, κακὰ δὲ φρεσὶ μήδετο ἔργα, |
| 20 | Primary τύπτε δʼ ἐπιστροφάδην· τῶν δὲ στόνος ὄρνυτʼ ἀεικὴς |
| 21 | Primary ἄορι θεινομένων, ἐρυθαίνετο δʼ αἵματι ὕδωρ. |
| 22 | Primary ὡς δʼ ὑπὸ δελφῖνος μεγακήτεος ἰχθύες ἄλλοι |
| 23 | Primary φεύγοντες πιμπλᾶσι μυχοὺς λιμένος εὐόρμου |
| 24 | Primary δειδιότες· μάλα γάρ τε κατεσθίει ὅν κε λάβῃσιν· |
| 25 | Primary ὣς Τρῶες ποταμοῖο κατὰ δεινοῖο ῥέεθρα |
| 26 | Primary πτῶσσον ὑπὸ κρημνούς. ὃ δʼ ἐπεὶ κάμε χεῖρας ἐναίρων, |
| 27 | Primary ζωοὺς ἐκ ποταμοῖο δυώδεκα λέξατο κούρους |
| 28 | Primary ποινὴν Πατρόκλοιο Μενοιτιάδαο θανόντος· |
| 29 | Primary τοὺς ἐξῆγε θύραζε τεθηπότας ἠΰτε νεβρούς, |
| 30 | Primary δῆσε δʼ ὀπίσσω χεῖρας ἐϋτμήτοισιν ἱμᾶσι, |
| 31 | Primary τοὺς αὐτοὶ φορέεσκον ἐπὶ στρεπτοῖσι χιτῶσι, |
| 32 | Primary δῶκε δʼ ἑταίροισιν κατάγειν κοίλας ἐπὶ νῆας. |
| 33 | Primary αὐτὰρ ὃ ἂψ ἐπόρουσε δαϊζέμεναι μενεαίνων. |
| 34 | Primary ἔνθʼ υἷι Πριάμοιο συνήντετο Δαρδανίδαο |
| 35 | Primary ἐκ ποταμοῦ φεύγοντι Λυκάονι, τόν ῥά ποτʼ αὐτὸς |
| 36 | Primary ἦγε λαβὼν ἐκ πατρὸς ἀλωῆς οὐκ ἐθέλοντα |
| 37 | Primary ἐννύχιος προμολών· ὃ δʼ ἐρινεὸν ὀξέϊ χαλκῷ |
| 38 | Primary τάμνε νέους ὄρπηκας, ἵνʼ ἅρματος ἄντυγες εἶεν· |
| 39 | Primary τῷ δʼ ἄρʼ ἀνώϊστον κακὸν ἤλυθε δῖος Ἀχιλλεύς. |
| 40 | Primary καὶ τότε μέν μιν Λῆμνον ἐϋκτιμένην ἐπέρασσε |
| 41 | Primary νηυσὶν ἄγων, ἀτὰρ υἱὸς Ἰήσονος ὦνον ἔδωκε· |
| 42 | Primary κεῖθεν δὲ ξεῖνός μιν ἐλύσατο πολλὰ δʼ ἔδωκεν |
| 43 | Primary Ἴμβριος Ἠετίων, πέμψεν δʼ ἐς δῖαν Ἀρίσβην· |
| 44 | Primary ἔνθεν ὑπεκπροφυγὼν πατρώϊον ἵκετο δῶμα. |
| 45 | Primary ἕνδεκα δʼ ἤματα θυμὸν ἐτέρπετο οἷσι φίλοισιν |
| 46 | Primary ἐλθὼν ἐκ Λήμνοιο· δυωδεκάτῃ δέ μιν αὖτις |
| 47 | Primary χερσὶν Ἀχιλλῆος θεὸς ἔμβαλεν, ὅς μιν ἔμελλε |
| 48 | Primary πέμψειν εἰς Ἀΐδαο καὶ οὐκ ἐθέλοντα νέεσθαι. |
| 49 | Primary τὸν δʼ ὡς οὖν ἐνόησε ποδάρκης δῖος Ἀχιλλεὺς |
| 50 | Primary γυμνὸν ἄτερ κόρυθός τε καὶ ἀσπίδος, οὐδʼ ἔχεν ἔγχος, |
| 51 | Primary ἀλλὰ τὰ μέν ῥʼ ἀπὸ πάντα χαμαὶ βάλε· τεῖρε γὰρ ἱδρὼς |
| 52 | Primary φεύγοντʼ ἐκ ποταμοῦ, κάματος δʼ ὑπὸ γούνατʼ ἐδάμνα· |
| 53 | Primary ὀχθήσας δʼ ἄρα εἶπε πρὸς ὃν μεγαλήτορα θυμόν· |
| 54 | Primary ὢ πόποι ἦ μέγα θαῦμα τόδʼ ὀφθαλμοῖσιν ὁρῶμαι· |
| 55 | Primary ἦ μάλα δὴ Τρῶες μεγαλήτορες οὕς περ ἔπεφνον |
| 56 | Primary αὖτις ἀναστήσονται ὑπὸ ζόφου ἠερόεντος, |
| 57 | Primary οἷον δὴ καὶ ὅδʼ ἦλθε φυγὼν ὕπο νηλεὲς ἦμαρ |
| 58 | Primary Λῆμνον ἐς ἠγαθέην πεπερημένος· οὐδέ μιν ἔσχε |
| 59 | Primary πόντος ἁλὸς πολιῆς, ὃ πολέας ἀέκοντας ἐρύκει. |
| 60 | Primary ἀλλʼ ἄγε δὴ καὶ δουρὸς ἀκωκῆς ἡμετέροιο |
| 61 | Primary γεύσεται, ὄφρα ἴδωμαι ἐνὶ φρεσὶν ἠδὲ δαείω |
| 62 | Primary ἢ ἄρʼ ὁμῶς καὶ κεῖθεν ἐλεύσεται, ἦ μιν ἐρύξει |
| 63 | Primary γῆ φυσίζοος, ἥ τε κατὰ κρατερόν περ ἐρύκει. |
| 64 | Primary ὣς ὅρμαινε μένων· ὃ δέ οἱ σχεδὸν ἦλθε τεθηπὼς |
| 65 | Primary γούνων ἅψασθαι μεμαώς, περὶ δʼ ἤθελε θυμῷ |
| 66 | Primary ἐκφυγέειν θάνατόν τε κακὸν καὶ κῆρα μέλαιναν. |
| 67 | Primary ἤτοι ὃ μὲν δόρυ μακρὸν ἀνέσχετο δῖος Ἀχιλλεὺς |
| 68 | Primary οὐτάμεναι μεμαώς, ὃ δʼ ὑπέδραμε καὶ λάβε γούνων |
| 69 | Primary κύψας· ἐγχείη δʼ ἄρʼ ὑπὲρ νώτου ἐνὶ γαίῃ |
| 70 | Primary ἔστη ἱεμένη χροὸς ἄμεναι ἀνδρομέοιο. |
| 71 | Primary αὐτὰρ ὃ τῇ ἑτέρῃ μὲν ἑλὼν ἐλλίσσετο γούνων, |
| 72 | Primary τῇ δʼ ἑτέρῃ ἔχεν ἔγχος ἀκαχμένον οὐδὲ μεθίει· |
| 73 | Primary καί μιν φωνήσας ἔπεα πτερόεντα προσηύδα· |
| 74 | Primary γουνοῦμαι σʼ Ἀχιλεῦ· σὺ δέ μʼ αἴδεο καί μʼ ἐλέησον· |
| 75 | Primary ἀντί τοί εἰμʼ ἱκέταο διοτρεφὲς αἰδοίοιο· |
| 76 | Primary πὰρ γὰρ σοὶ πρώτῳ πασάμην Δημήτερος ἀκτὴν |
| 77 | Primary ἤματι τῷ ὅτε μʼ εἷλες ἐϋκτιμένῃ ἐν ἀλωῇ, |
| 78 | Primary καί μʼ ἐπέρασσας ἄνευθεν ἄγων πατρός τε φίλων τε |
| 79 | Primary Λῆμνον ἐς ἠγαθέην, ἑκατόμβοιον δέ τοι ἦλφον. |
| 80 | Primary νῦν δὲ λύμην τρὶς τόσσα πορών· ἠὼς δέ μοί ἐστιν |
| 81 | Primary ἥδε δυωδεκάτη, ὅτʼ ἐς Ἴλιον εἰλήλουθα |
| 82 | Primary πολλὰ παθών· νῦν αὖ με τεῇς ἐν χερσὶν ἔθηκε |
| 83 | Primary μοῖρʼ ὀλοή· μέλλω που ἀπεχθέσθαι Διὶ πατρί, |
| 84 | Primary ὅς με σοὶ αὖτις δῶκε· μινυνθάδιον δέ με μήτηρ |
| 85 | Primary γείνατο Λαοθόη θυγάτηρ Ἄλταο γέροντος |
| 86 | Primary Ἄλτεω, ὃς Λελέγεσσι φιλοπτολέμοισιν ἀνάσσει |
| 87 | Primary Πήδασον αἰπήεσσαν ἔχων ἐπὶ Σατνιόεντι. |
| 88 | Primary τοῦ δʼ ἔχε θυγατέρα Πρίαμος, πολλὰς δὲ καὶ ἄλλας· |
| 89 | Primary τῆς δὲ δύω γενόμεσθα, σὺ δʼ ἄμφω δειροτομήσεις, |
| 90 | Primary ἤτοι τὸν πρώτοισι μετὰ πρυλέεσσι δάμασσας |
| 91 | Primary ἀντίθεον Πολύδωρον, ἐπεὶ βάλες ὀξέϊ δουρί· |
| 92 | Primary νῦν δὲ δὴ ἐνθάδʼ ἐμοὶ κακὸν ἔσσεται· οὐ γὰρ ὀΐω |
| 93 | Primary σὰς χεῖρας φεύξεσθαι, ἐπεί ῥʼ ἐπέλασσέ γε δαίμων. |
| 94 | Primary ἄλλο δέ τοι ἐρέω, σὺ δʼ ἐνὶ φρεσὶ βάλλεο σῇσι· |
| 95 | Primary μή με κτεῖνʼ, ἐπεὶ οὐχ ὁμογάστριος Ἕκτορός εἰμι, |
| 96 | Primary ὅς τοι ἑταῖρον ἔπεφνεν ἐνηέα τε κρατερόν τε. |
| 97 | Primary ὣς ἄρα μιν Πριάμοιο προσηύδα φαίδιμος υἱὸς |
| 98 | Primary λισσόμενος ἐπέεσσιν, ἀμείλικτον δʼ ὄπʼ ἄκουσε· |
| 99 | Primary νήπιε μή μοι ἄποινα πιφαύσκεο μηδʼ ἀγόρευε· |
| 100 | Primary πρὶν μὲν γὰρ Πάτροκλον ἐπισπεῖν αἴσιμον ἦμαρ |
| 101 | Primary τόφρά τί μοι πεφιδέσθαι ἐνὶ φρεσὶ φίλτερον ἦεν |
| 102 | Primary Τρώων, καὶ πολλοὺς ζωοὺς ἕλον ἠδʼ ἐπέρασσα· |
| 103 | Primary νῦν δʼ οὐκ ἔσθʼ ὅς τις θάνατον φύγῃ ὅν κε θεός γε |
| 104 | Primary Ἰλίου προπάροιθεν ἐμῇς ἐν χερσὶ βάλῃσι |
| 105 | Primary καὶ πάντων Τρώων, περὶ δʼ αὖ Πριάμοιό γε παίδων. |
| 106 | Primary ἀλλὰ φίλος θάνε καὶ σύ· τί ἦ ὀλοφύρεαι οὕτως; |
| 107 | Primary κάτθανε καὶ Πάτροκλος, ὅ περ σέο πολλὸν ἀμείνων. |
| 108 | Primary οὐχ ὁράᾳς οἷος καὶ ἐγὼ καλός τε μέγας τε; |
| 109 | Primary πατρὸς δʼ εἴμʼ ἀγαθοῖο, θεὰ δέ με γείνατο μήτηρ· |
| 110 | Primary ἀλλʼ ἔπι τοι καὶ ἐμοὶ θάνατος καὶ μοῖρα κραταιή· |
| 111 | Primary ἔσσεται ἢ ἠὼς ἢ δείλη ἢ μέσον ἦμαρ |
| 112 | Primary ὁππότε τις καὶ ἐμεῖο Ἄρῃ ἐκ θυμὸν ἕληται |
| 113 | Primary ἢ ὅ γε δουρὶ βαλὼν ἢ ἀπὸ νευρῆφιν ὀϊστῷ. |
| 114 | Primary ὣς φάτο, τοῦ δʼ αὐτοῦ λύτο γούνατα καὶ φίλον ἦτορ· |
| 115 | Primary ἔγχος μέν ῥʼ ἀφέηκεν, ὃ δʼ ἕζετο χεῖρε πετάσσας |
| 116 | Primary ἀμφοτέρας· Ἀχιλεὺς δὲ ἐρυσσάμενος ξίφος ὀξὺ |
| 117 | Primary τύψε κατὰ κληῗδα παρʼ αὐχένα, πᾶν δέ οἱ εἴσω |
| 118 | Primary δῦ ξίφος ἄμφηκες· ὃ δʼ ἄρα πρηνὴς ἐπὶ γαίῃ |
| 119 | Primary κεῖτο ταθείς, ἐκ δʼ αἷμα μέλαν ῥέε, δεῦε δὲ γαῖαν. |
| 120 | Primary τὸν δʼ Ἀχιλεὺς ποταμὸν δὲ λαβὼν ποδὸς ἧκε φέρεσθαι, |
| 121 | Primary καί οἱ ἐπευχόμενος ἔπεα πτερόεντʼ ἀγόρευεν· |
| 122 | Primary ἐνταυθοῖ νῦν κεῖσο μετʼ ἰχθύσιν, οἵ σʼ ὠτειλὴν |
| 123 | Primary αἷμʼ ἀπολιχμήσονται ἀκηδέες· οὐδέ σε μήτηρ |
| 124 | Primary ἐνθεμένη λεχέεσσι γοήσεται, ἀλλὰ Σκάμανδρος |
| 125 | Primary οἴσει δινήεις εἴσω ἁλὸς εὐρέα κόλπον· |
| 126 | Primary θρῴσκων τις κατὰ κῦμα μέλαιναν φρῖχʼ ὑπαΐξει |
| 127 | Primary ἰχθύς, ὅς κε φάγῃσι Λυκάονος ἀργέτα δημόν. |
| 128 | Primary φθείρεσθʼ εἰς ὅ κεν ἄστυ κιχείομεν Ἰλίου ἱρῆς |
| 129 | Primary ὑμεῖς μὲν φεύγοντες, ἐγὼ δʼ ὄπιθεν κεραΐζων. |
| 130 | Primary οὐδʼ ὑμῖν ποταμός περ ἐΰρροος ἀργυροδίνης |
| 131 | Primary ἀρκέσει, ᾧ δὴ δηθὰ πολέας ἱερεύετε ταύρους, |
| 132 | Primary ζωοὺς δʼ ἐν δίνῃσι καθίετε μώνυχας ἵππους. |
| 133 | Primary ἀλλὰ καὶ ὧς ὀλέεσθε κακὸν μόρον, εἰς ὅ κε πάντες |
| 134 | Primary τίσετε Πατρόκλοιο φόνον καὶ λοιγὸν Ἀχαιῶν, |
| 135 | Primary οὓς ἐπὶ νηυσὶ θοῇσιν ἐπέφνετε νόσφιν ἐμεῖο. |
| 136 | Primary ὣς ἄρʼ ἔφη, ποταμὸς δὲ χολώσατο κηρόθι μᾶλλον, |
| 137 | Primary ὅρμηνεν δʼ ἀνὰ θυμὸν ὅπως παύσειε πόνοιο |
| 138 | Primary δῖον Ἀχιλλῆα, Τρώεσσι δὲ λοιγὸν ἀλάλκοι. |
| 139 | Primary τόφρα δὲ Πηλέος υἱὸς ἔχων δολιχόσκιον ἔγχος |
| 140 | Primary Ἀστεροπαίῳ ἐπᾶλτο κατακτάμεναι μενεαίνων |
| 141 | Primary υἱέϊ Πηλεγόνος· τὸν δʼ Ἀξιὸς εὐρυρέεθρος |
| 142 | Primary γείνατο καὶ Περίβοια Ἀκεσσαμενοῖο θυγατρῶν |
| 143 | Primary πρεσβυτάτη· τῇ γάρ ῥα μίγη ποταμὸς βαθυδίνης. |
| 144 | Primary τῷ ῥʼ Ἀχιλεὺς ἐπόρουσεν, ὃ δʼ ἀντίος ἐκ ποταμοῖο |
| 145 | Primary ἔστη ἔχων δύο δοῦρε· μένος δέ οἱ ἐν φρεσὶ θῆκε |
| 146 | Primary Ξάνθος, ἐπεὶ κεχόλωτο δαϊκταμένων αἰζηῶν, |
| 147 | Primary τοὺς Ἀχιλεὺς ἐδάϊζε κατὰ ῥόον οὐδʼ ἐλέαιρεν. |
| 148 | Primary οἳ δʼ ὅτε δὴ σχεδὸν ἦσαν ἐπʼ ἀλλήλοισιν ἰόντες, |
| 149 | Primary τὸν πρότερος προσέειπε ποδάρκης δῖος Ἀχιλλεύς· |
| 150 | Primary τίς πόθεν εἰς ἀνδρῶν ὅ μευ ἔτλης ἀντίος ἐλθεῖν; |
| 151 | Primary δυστήνων δέ τε παῖδες ἐμῷ μένει ἀντιόωσι. |
| 152 | Primary τὸν δʼ αὖ Πηλεγόνος προσεφώνεε φαίδιμος υἱός· |
| 153 | Primary Πηλεΐδη μεγάθυμε τί ἦ γενεὴν ἐρεείνεις; |
| 154 | Primary εἴμʼ ἐκ Παιονίης ἐριβώλου τηλόθʼ ἐούσης |
| 155 | Primary Παίονας ἄνδρας ἄγων δολιχεγχέας· ἥδε δέ μοι νῦν |
| 156 | Primary ἠὼς ἑνδεκάτη ὅτε Ἴλιον εἰλήλουθα. |
| 157 | Primary αὐτὰρ ἐμοὶ γενεὴ ἐξ Ἀξιοῦ εὐρὺ ῥέοντος |
| 158 | Primary Ἀξιοῦ, ὃς κάλλιστον ὕδωρ ἐπὶ γαῖαν ἵησιν, |
| 159 | Primary ὃς τέκε Πηλεγόνα κλυτὸν ἔγχεϊ· τὸν δʼ ἐμέ φασι |
| 160 | Primary γείνασθαι· νῦν αὖτε μαχώμεθα φαίδιμʼ Ἀχιλλεῦ. |
| 161 | Primary ὣς φάτʼ ἀπειλήσας, ὃ δʼ ἀνέσχετο δῖος Ἀχιλλεὺς |
| 162 | Primary Πηλιάδα μελίην· ὃ δʼ ἁμαρτῇ δούρασιν ἀμφὶς |
| 163 | Primary ἥρως Ἀστεροπαῖος, ἐπεὶ περιδέξιος ἦεν. |
| 164 | Primary καί ῥʼ ἑτέρῳ μὲν δουρὶ σάκος βάλεν, οὐδὲ διὰ πρὸ |
| 165 | Primary ῥῆξε σάκος· χρυσὸς γὰρ ἐρύκακε δῶρα θεοῖο· |
| 166 | Primary τῷ δʼ ἑτέρῳ μιν πῆχυν ἐπιγράβδην βάλε χειρὸς |
| 167 | Primary δεξιτερῆς, σύτο δʼ αἷμα κελαινεφές· ἣ δʼ ὑπὲρ αὐτοῦ |
| 168 | Primary γαίῃ ἐνεστήρικτο λιλαιομένη χροὸς ἆσαι. |
| 169 | Primary δεύτερος αὖτʼ Ἀχιλεὺς μελίην ἰθυπτίωνα |
| 170 | Primary Ἀστεροπαίῳ ἐφῆκε κατακτάμεναι μενεαίνων. |
| 171 | Primary καὶ τοῦ μέν ῥʼ ἀφάμαρτεν, ὃ δʼ ὑψηλὴν βάλεν ὄχθην, |
| 172 | Primary μεσσοπαγὲς δʼ ἄρʼ ἔθηκε κατʼ ὄχθης μείλινον ἔγχος. |
| 173 | Primary Πηλεΐδης δʼ ἄορ ὀξὺ ἐρυσσάμενος παρὰ μηροῦ |
| 174 | Primary ἆλτʼ ἐπί οἱ μεμαώς· ὃ δʼ ἄρα μελίην Ἀχιλῆος |
| 175 | Primary οὐ δύνατʼ ἐκ κρημνοῖο ἐρύσσαι χειρὶ παχείῃ. |
| 176 | Primary τρὶς μέν μιν πελέμιξεν ἐρύσσασθαι μενεαίνων, |
| 177 | Primary τρὶς δὲ μεθῆκε βίης· τὸ δὲ τέτρατον ἤθελε θυμῷ |
| 178 | Primary ἆξαι ἐπιγνάμψας δόρυ μείλινον Αἰακίδαο, |
| 179 | Primary ἀλλὰ πρὶν Ἀχιλεὺς σχεδὸν ἄορι θυμὸν ἀπηύρα. |
| 180 | Primary γαστέρα γάρ μιν τύψε παρʼ ὀμφαλόν, ἐκ δʼ ἄρα πᾶσαι |
| 181 | Primary χύντο χαμαὶ χολάδες· τὸν δὲ σκότος ὄσσε κάλυψεν |
| 182 | Primary ἀσθμαίνοντʼ· Ἀχιλεὺς δʼ ἄρʼ ἐνὶ στήθεσσιν ὀρούσας |
| 183 | Primary τεύχεά τʼ ἐξενάριξε καὶ εὐχόμενος ἔπος ηὔδα· |
| 184 | Primary κεῖσʼ οὕτως· χαλεπόν τοι ἐρισθενέος Κρονίωνος |
| 185 | Primary παισὶν ἐριζέμεναι ποταμοῖό περ ἐκγεγαῶτι. |
| 186 | Primary φῆσθα σὺ μὲν ποταμοῦ γένος ἔμμεναι εὐρὺ ῥέοντος, |
| 187 | Primary αὐτὰρ ἐγὼ γενεὴν μεγάλου Διὸς εὔχομαι εἶναι. |
| 188 | Primary τίκτέ μʼ ἀνὴρ πολλοῖσιν ἀνάσσων Μυρμιδόνεσσι |
| 189 | Primary Πηλεὺς Αἰακίδης· ὃ δʼ ἄρʼ Αἰακὸς ἐκ Διὸς ἦεν. |
| 190 | Primary τὼ κρείσσων μὲν Ζεὺς ποταμῶν ἁλιμυρηέντων, |
| 191 | Primary κρείσσων αὖτε Διὸς γενεὴ ποταμοῖο τέτυκται. |
| 192 | Primary καὶ γὰρ σοὶ ποταμός γε πάρα μέγας, εἰ δύναταί τι |
| 193 | Primary χραισμεῖν· ἀλλʼ οὐκ ἔστι Διὶ Κρονίωνι μάχεσθαι, |
| 194 | Primary τῷ οὐδὲ κρείων Ἀχελώϊος ἰσοφαρίζει, |
| 195 | Primary οὐδὲ βαθυρρείταο μέγα σθένος Ὠκεανοῖο, |
| 196 | Primary ἐξ οὗ περ πάντες ποταμοὶ καὶ πᾶσα θάλασσα |
| 197 | Primary καὶ πᾶσαι κρῆναι καὶ φρείατα μακρὰ νάουσιν· |
| 198 | Primary ἀλλὰ καὶ ὃς δείδοικε Διὸς μεγάλοιο κεραυνὸν |
| 199 | Primary δεινήν τε βροντήν, ὅτʼ ἀπʼ οὐρανόθεν σμαραγήσῃ. |
| 200 | Primary ἦ ῥα, καὶ ἐκ κρημνοῖο ἐρύσσατο χάλκεον ἔγχος, |
| 201 | Primary τὸν δὲ κατʼ αὐτόθι λεῖπεν, ἐπεὶ φίλον ἦτορ ἀπηύρα, |
| 202 | Primary κείμενον ἐν ψαμάθοισι, δίαινε δέ μιν μέλαν ὕδωρ. |
| 203 | Primary τὸν μὲν ἄρʼ ἐγχέλυές τε καὶ ἰχθύες ἀμφεπένοντο |
| 204 | Primary δημὸν ἐρεπτόμενοι ἐπινεφρίδιον κείροντες· |
| 205 | Primary αὐτὰρ ὃ βῆ ῥʼ ἰέναι μετὰ Παίονας ἱπποκορυστάς, |
| 206 | Primary οἵ ῥʼ ἔτι πὰρ ποταμὸν πεφοβήατο δινήεντα, |
| 207 | Primary ὡς εἶδον τὸν ἄριστον ἐνὶ κρατερῇ ὑσμίνῃ |
| 208 | Primary χέρσʼ ὕπο Πηλεΐδαο καὶ ἄορι ἶφι δαμέντα. |
| 209 | Primary ἔνθʼ ἕλε Θερσίλοχόν τε Μύδωνά τε Ἀστύπυλόν τε |
| 210 | Primary Μνῆσόν τε Θρασίον τε καὶ Αἴνιον ἠδʼ Ὀφελέστην· |
| 211 | Primary καί νύ κʼ ἔτι πλέονας κτάνε Παίονας ὠκὺς Ἀχιλλεύς, |
| 212 | Primary εἰ μὴ χωσάμενος προσέφη ποταμὸς βαθυδίνης |
| 213 | Primary ἀνέρι εἰσάμενος, βαθέης δʼ ἐκ φθέγξατο δίνης· |
| 214 | Primary ὦ Ἀχιλεῦ, περὶ μὲν κρατέεις, περὶ δʼ αἴσυλα ῥέζεις |
| 215 | Primary ἀνδρῶν· αἰεὶ γάρ τοι ἀμύνουσιν θεοὶ αὐτοί. |
| 216 | Primary εἴ τοι Τρῶας ἔδωκε Κρόνου παῖς πάντας ὀλέσσαι, |
| 217 | Primary ἐξ ἐμέθεν γʼ ἐλάσας πεδίον κάτα μέρμερα ῥέζε· |
| 218 | Primary πλήθει γὰρ δή μοι νεκύων ἐρατεινὰ ῥέεθρα, |
| 219 | Primary οὐδέ τί πῃ δύναμαι προχέειν ῥόον εἰς ἅλα δῖαν |
| 220 | Primary στεινόμενος νεκύεσσι, σὺ δὲ κτείνεις ἀϊδήλως. |
| 221 | Primary ἀλλʼ ἄγε δὴ καὶ ἔασον· ἄγη μʼ ἔχει ὄρχαμε λαῶν. |
| 222 | Primary τὸν δʼ ἀπαμειβόμενος προσέφη πόδας ὠκὺς Ἀχιλλεύς· |
| 223 | Primary ἔσται ταῦτα Σκάμανδρε διοτρεφές, ὡς σὺ κελεύεις. |
| 224 | Primary Τρῶας δʼ οὐ πρὶν λήξω ὑπερφιάλους ἐναρίζων, |
| 225 | Primary πρὶν ἔλσαι κατὰ ἄστυ καὶ Ἕκτορι πειρηθῆναι |
| 226 | Primary ἀντιβίην, ἤ κέν με δαμάσσεται, ἦ κεν ἐγὼ τόν. |
| 227 | Primary ὣς εἰπὼν Τρώεσσιν ἐπέσσυτο δαίμονι ἶσος· |
| 228 | Primary καὶ τότʼ Ἀπόλλωνα προσέφη ποταμὸς βαθυδίνης· |
| 229 | Primary ὢ πόποι ἀργυρότοξε Διὸς τέκος οὐ σύ γε βουλὰς |
| 230 | Primary εἰρύσαο Κρονίωνος, ὅ τοι μάλα πόλλʼ ἐπέτελλε |
| 231 | Primary Τρωσὶ παρεστάμεναι καὶ ἀμύνειν, εἰς ὅ κεν ἔλθῃ |
| 232 | Primary δείελος ὀψὲ δύων, σκιάσῃ δʼ ἐρίβωλον ἄρουραν. |
| 233 | Primary ἦ, καὶ Ἀχιλλεὺς μὲν δουρικλυτὸς ἔνθορε μέσσῳ |
| 234 | Primary κρημνοῦ ἀπαΐξας· ὃ δʼ ἐπέσσυτο οἴδματι θύων, |
| 235 | Primary πάντα δʼ ὄρινε ῥέεθρα κυκώμενος, ὦσε δὲ νεκροὺς |
| 236 | Primary πολλούς, οἵ ῥα κατʼ αὐτὸν ἅλις ἔσαν, οὓς κτάνʼ Ἀχιλλεύς |
| 237 | Primary τοὺς ἔκβαλλε θύραζε μεμυκὼς ἠΰτε ταῦρος |
| 238 | Primary χέρσον δέ· ζωοὺς δὲ σάω κατὰ καλὰ ῥέεθρα, |
| 239 | Primary κρύπτων ἐν δίνῃσι βαθείῃσιν μεγάλῃσι. |
| 240 | Primary δεινὸν δʼ ἀμφʼ Ἀχιλῆα κυκώμενον ἵστατο κῦμα, |
| 241 | Primary ὤθει δʼ ἐν σάκεϊ πίπτων ῥόος· οὐδὲ πόδεσσιν |
| 242 | Primary εἶχε στηρίξασθαι· ὃ δὲ πτελέην ἕλε χερσὶν |
| 243 | Primary εὐφυέα μεγάλην· ἣ δʼ ἐκ ῥιζῶν ἐριποῦσα |
| 244 | Primary κρημνὸν ἅπαντα διῶσεν, ἐπέσχε δὲ καλὰ ῥέεθρα |
| 245 | Primary ὄζοισιν πυκινοῖσι, γεφύρωσεν δέ μιν αὐτὸν |
| 246 | Primary εἴσω πᾶσʼ ἐριποῦσʼ· ὃ δʼ ἄρʼ ἐκ δίνης ἀνορούσας |
| 247 | Primary ἤϊξεν πεδίοιο ποσὶ κραιπνοῖσι πέτεσθαι |
| 248 | Primary δείσας· οὐδέ τʼ ἔληγε θεὸς μέγας, ὦρτο δʼ ἐπʼ αὐτῷ |
| 249 | Primary ἀκροκελαινιόων, ἵνα μιν παύσειε πόνοιο |
| 250 | Primary δῖον Ἀχιλλῆα, Τρώεσσι δὲ λοιγὸν ἀλάλκοι. |
| 251 | Primary Πηλεΐδης δʼ ἀπόρουσεν ὅσον τʼ ἐπὶ δουρὸς ἐρωή, |
| 252 | Primary αἰετοῦ οἴματʼ ἔχων μέλανος τοῦ θηρητῆρος, |
| 253 | Primary ὅς θʼ ἅμα κάρτιστός τε καὶ ὤκιστος πετεηνῶν· |
| 254 | Primary τῷ ἐϊκὼς ἤϊξεν, ἐπὶ στήθεσσι δὲ χαλκὸς |
| 255 | Primary σμερδαλέον κονάβιζεν· ὕπαιθα δὲ τοῖο λιασθεὶς |
| 256 | Primary φεῦγʼ, ὃ δʼ ὄπισθε ῥέων ἕπετο μεγάλῳ ὀρυμαγδῷ. |
| 257 | Primary ὡς δʼ ὅτʼ ἀνὴρ ὀχετηγὸς ἀπὸ κρήνης μελανύδρου |
| 258 | Primary ἂμ φυτὰ καὶ κήπους ὕδατι ῥόον ἡγεμονεύῃ |
| 259 | Primary χερσὶ μάκελλαν ἔχων, ἀμάρης ἐξ ἔχματα βάλλων· |
| 260 | Primary τοῦ μέν τε προρέοντος ὑπὸ ψηφῖδες ἅπασαι |
| 261 | Primary ὀχλεῦνται· τὸ δέ τʼ ὦκα κατειβόμενον κελαρύζει |
| 262 | Primary χώρῳ ἔνι προαλεῖ, φθάνει δέ τε καὶ τὸν ἄγοντα· |
| 263 | Primary ὣς αἰεὶ Ἀχιλῆα κιχήσατο κῦμα ῥόοιο |
| 264 | Primary καὶ λαιψηρὸν ἐόντα· θεοὶ δέ τε φέρτεροι ἀνδρῶν. |
| 265 | Primary ὁσσάκι δʼ ὁρμήσειε ποδάρκης δῖος Ἀχιλλεὺς |
| 266 | Primary στῆναι ἐναντίβιον καὶ γνώμεναι εἴ μιν ἅπαντες |
| 267 | Primary ἀθάνατοι φοβέουσι, τοὶ οὐρανὸν εὐρὺν ἔχουσι, |
| 268 | Primary τοσσάκι μιν μέγα κῦμα διιπετέος ποταμοῖο |
| 269 | Primary πλάζʼ ὤμους καθύπερθεν· ὃ δʼ ὑψόσε ποσσὶν ἐπήδα |
| 270 | Primary θυμῷ ἀνιάζων· ποταμὸς δʼ ὑπὸ γούνατʼ ἐδάμνα |
| 271 | Primary λάβρος ὕπαιθα ῥέων, κονίην δʼ ὑπέρεπτε ποδοῖιν. |
| 272 | Primary Πηλεΐδης δʼ ᾤμωξεν ἰδὼν εἰς οὐρανὸν εὐρύν· |
| 273 | Primary Ζεῦ πάτερ ὡς οὔ τίς με θεῶν ἐλεεινὸν ὑπέστη |
| 274 | Primary ἐκ ποταμοῖο σαῶσαι· ἔπειτα δὲ καί τι πάθοιμι. |
| 275 | Primary ἄλλος δʼ οὔ τις μοι τόσον αἴτιος Οὐρανιώνων, |
| 276 | Primary ἀλλὰ φίλη μήτηρ, ἥ με ψεύδεσσιν ἔθελγεν· |
| 277 | Primary ἥ μʼ ἔφατο Τρώων ὑπὸ τείχεϊ θωρηκτάων |
| 278 | Primary λαιψηροῖς ὀλέεσθαι Ἀπόλλωνος βελέεσσιν. |
| 279 | Primary ὥς μʼ ὄφελʼ Ἕκτωρ κτεῖναι ὃς ἐνθάδε γʼ ἔτραφʼ ἄριστος· |
| 280 | Primary τώ κʼ ἀγαθὸς μὲν ἔπεφνʼ, ἀγαθὸν δέ κεν ἐξενάριξε· |
| 281 | Primary νῦν δέ με λευγαλέῳ θανάτῳ εἵμαρτο ἁλῶναι |
| 282 | Primary ἐρχθέντʼ ἐν μεγάλῳ ποταμῷ ὡς παῖδα συφορβόν, |
| 283 | Primary ὅν ῥά τʼ ἔναυλος ἀποέρσῃ χειμῶνι περῶντα. |
| 284 | Primary ὣς φάτο, τῷ δὲ μάλʼ ὦκα Ποσειδάων καὶ Ἀθήνη |
| 285 | Primary στήτην ἐγγὺς ἰόντε, δέμας δʼ ἄνδρεσσιν ἐΐκτην, |
| 286 | Primary χειρὶ δὲ χεῖρα λαβόντες ἐπιστώσαντʼ ἐπέεσσι. |
| 287 | Primary τοῖσι δὲ μύθων ἦρχε Ποσειδάων ἐνοσίχθων· |
| 288 | Primary Πηλεΐδη μήτʼ ἄρ τι λίην τρέε μήτέ τι τάρβει· |
| 289 | Primary τοίω γάρ τοι νῶϊ θεῶν ἐπιταρρόθω εἰμὲν |
| 290 | Primary Ζηνὸς ἐπαινήσαντος ἐγὼ καὶ Παλλὰς Ἀθήνη· |
| 291 | Primary ὡς οὔ τοι ποταμῷ γε δαμήμεναι αἴσιμόν ἐστιν, |
| 292 | Primary ἀλλʼ ὅδε μὲν τάχα λωφήσει, σὺ δὲ εἴσεαι αὐτός· |
| 293 | Primary αὐτάρ τοι πυκινῶς ὑποθησόμεθʼ αἴ κε πίθηαι· |
| 294 | Primary μὴ πρὶν παύειν χεῖρας ὁμοιΐου πολέμοιο |
| 295 | Primary πρὶν κατὰ Ἰλιόφι κλυτὰ τείχεα λαὸν ἐέλσαι |
| 296 | Primary Τρωϊκόν, ὅς κε φύγῃσι· σὺ δʼ Ἕκτορι θυμὸν ἀπούρας |
| 297 | Primary ἂψ ἐπὶ νῆας ἴμεν· δίδομεν δέ τοι εὖχος ἀρέσθαι. |
| 298 | Primary τὼ μὲν ἄρʼ ὣς εἰπόντε μετʼ ἀθανάτους ἀπεβήτην· |
| 299 | Primary αὐτὰρ ὃ βῆ, μέγα γάρ ῥα θεῶν ὄτρυνεν ἐφετμή, |
| 300 | Primary ἐς πεδίον· τὸ δὲ πᾶν πλῆθʼ ὕδατος ἐκχυμένοιο, |
| 301 | Primary πολλὰ δὲ τεύχεα καλὰ δαὶ κταμένων αἰζηῶν |
| 302 | Primary πλῶον καὶ νέκυες· τοῦ δʼ ὑψόσε γούνατʼ ἐπήδα |
| 303 | Primary πρὸς ῥόον ἀΐσσοντος ἀνʼ ἰθύν, οὐδέ μιν ἴσχεν |
| 304 | Primary εὐρὺ ῥέων ποταμός· μέγα γὰρ σθένος ἔμβαλʼ Ἀθήνη. |
| 305 | Primary οὐδὲ Σκάμανδρος ἔληγε τὸ ὃν μένος, ἀλλʼ ἔτι μᾶλλον |
| 306 | Primary χώετο Πηλεΐωνι, κόρυσσε δὲ κῦμα ῥόοιο |
| 307 | Primary ὑψόσʼ ἀειρόμενος, Σιμόεντι δὲ κέκλετʼ ἀΰσας· |
| 308 | Primary φίλε κασίγνητε σθένος ἀνέρος ἀμφότεροί περ |
| 309 | Primary σχῶμεν, ἐπεὶ τάχα ἄστυ μέγα Πριάμοιο ἄνακτος |
| 310 | Primary ἐκπέρσει, Τρῶες δὲ κατὰ μόθον οὐ μενέουσιν. |
| 311 | Primary ἀλλʼ ἐπάμυνε τάχιστα, καὶ ἐμπίπληθι ῥέεθρα |
| 312 | Primary ὕδατος ἐκ πηγέων, πάντας δʼ ὀρόθυνον ἐναύλους, |
| 313 | Primary ἵστη δὲ μέγα κῦμα, πολὺν δʼ ὀρυμαγδὸν ὄρινε |
| 314 | Primary φιτρῶν καὶ λάων, ἵνα παύσομεν ἄγριον ἄνδρα |
| 315 | Primary ὃς δὴ νῦν κρατέει, μέμονεν δʼ ὅ γε ἶσα θεοῖσι. |
| 316 | Primary φημὶ γὰρ οὔτε βίην χραισμησέμεν οὔτέ τι εἶδος |
| 317 | Primary οὔτε τὰ τεύχεα καλά, τά που μάλα νειόθι λίμνης |
| 318 | Primary κείσεθʼ ὑπʼ ἰλύος κεκαλυμμένα· κὰδ δέ μιν αὐτὸν |
| 319 | Primary εἰλύσω ψαμάθοισιν ἅλις χέραδος περιχεύας |
| 320 | Primary μυρίον, οὐδέ οἱ ὀστέʼ ἐπιστήσονται Ἀχαιοὶ |
| 321 | Primary ἀλλέξαι· τόσσην οἱ ἄσιν καθύπερθε καλύψω. |
| 322 | Primary αὐτοῦ οἱ καὶ σῆμα τετεύξεται, οὐδέ τί μιν χρεὼ |
| 323 | Primary ἔσται τυμβοχόης, ὅτε μιν θάπτωσιν Ἀχαιοί. |
| 324 | Primary ἦ, καὶ ἐπῶρτʼ Ἀχιλῆϊ κυκώμενος ὑψόσε θύων |
| 325 | Primary μορμύρων ἀφρῷ τε καὶ αἵματι καὶ νεκύεσσι. |
| 326 | Primary πορφύρεον δʼ ἄρα κῦμα διιπετέος ποταμοῖο |
| 327 | Primary ἵστατʼ ἀειρόμενον, κατὰ δʼ ᾕρεε Πηλεΐωνα· |
| 328 | Primary Ἥρη δὲ μέγʼ ἄϋσε περιδείσασʼ Ἀχιλῆϊ |
| 329 | Primary μή μιν ἀποέρσειε μέγας ποταμὸς βαθυδίνης, |
| 330 | Primary αὐτίκα δʼ Ἥφαιστον προσεφώνεεν ὃν φίλον υἱόν· |
| 331 | Primary ὄρσεο κυλλοπόδιον ἐμὸν τέκος· ἄντα σέθεν γὰρ |
| 332 | Primary Ξάνθον δινήεντα μάχῃ ἠΐσκομεν εἶναι· |
| 333 | Primary ἀλλʼ ἐπάμυνε τάχιστα, πιφαύσκεο δὲ φλόγα πολλήν. |
| 334 | Primary αὐτὰρ ἐγὼ Ζεφύροιο καὶ ἀργεστᾶο Νότοιο |
| 335 | Primary εἴσομαι ἐξ ἁλόθεν χαλεπὴν ὄρσουσα θύελλαν, |
| 336 | Primary ἥ κεν ἀπὸ Τρώων κεφαλὰς καὶ τεύχεα κήαι |
| 337 | Primary φλέγμα κακὸν φορέουσα· σὺ δὲ Ξάνθοιο παρʼ ὄχθας |
| 338 | Primary δένδρεα καῖʼ, ἐν δʼ αὐτὸν ἵει πυρί· μὴ δέ σε πάμπαν |
| 339 | Primary μειλιχίοις ἐπέεσσιν ἀποτρεπέτω καὶ ἀρειῇ· |
| 340 | Primary μὴ δὲ πρὶν ἀπόπαυε τεὸν μένος, ἀλλʼ ὁπότʼ ἂν δὴ |
| 341 | Primary φθέγξομʼ ἐγὼν ἰάχουσα, τότε σχεῖν ἀκάματον πῦρ. |
| 342 | Primary ὣς ἔφαθʼ, Ἥφαιστος δὲ τιτύσκετο θεσπιδαὲς πῦρ. |
| 343 | Primary πρῶτα μὲν ἐν πεδίῳ πῦρ δαίετο, καῖε δὲ νεκροὺς |
| 344 | Primary πολλούς, οἵ ῥα κατʼ αὐτὸν ἅλις ἔσαν, οὓς κτάνʼ Ἀχιλλεύς· |
| 345 | Primary πᾶν δʼ ἐξηράνθη πεδίον, σχέτο δʼ ἀγλαὸν ὕδωρ. |
| 346 | Primary ὡς δʼ ὅτʼ ὀπωρινὸς Βορέης νεοαρδέʼ ἀλωὴν |
| 347 | Primary αἶψʼ ἀγξηράνῃ· χαίρει δέ μιν ὅς τις ἐθείρῃ· |
| 348 | Primary ὣς ἐξηράνθη πεδίον πᾶν, κὰδ δʼ ἄρα νεκροὺς |
| 349 | Primary κῆεν· ὃ δʼ ἐς ποταμὸν τρέψε φλόγα παμφανόωσαν. |
| 350 | Primary καίοντο πτελέαι τε καὶ ἰτέαι ἠδὲ μυρῖκαι, |
| 351 | Primary καίετο δὲ λωτός τε ἰδὲ θρύον ἠδὲ κύπειρον, |
| 352 | Primary τὰ περὶ καλὰ ῥέεθρα ἅλις ποταμοῖο πεφύκει· |
| 353 | Primary τείροντʼ ἐγχέλυές τε καὶ ἰχθύες οἳ κατὰ δίνας, |
| 354 | Primary οἳ κατὰ καλὰ ῥέεθρα κυβίστων ἔνθα καὶ ἔνθα |
| 355 | Primary πνοιῇ τειρόμενοι πολυμήτιος Ἡφαίστοιο. |
| 356 | Primary καίετο δʼ ἲς ποταμοῖο ἔπος τʼ ἔφατʼ ἔκ τʼ ὀνόμαζεν· |
| 357 | Primary Ἥφαιστʼ, οὔ τις σοί γε θεῶν δύνατʼ ἀντιφερίζειν, |
| 358 | Primary οὐδʼ ἂν ἐγὼ σοί γʼ ὧδε πυρὶ φλεγέθοντι μαχοίμην. |
| 359 | Primary λῆγʼ ἔριδος, Τρῶας δὲ καὶ αὐτίκα δῖος Ἀχιλλεὺς |
| 360 | Primary ἄστεος ἐξελάσειε· τί μοι ἔριδος καὶ ἀρωγῆς; |
| 361 | Primary φῆ πυρὶ καιόμενος, ἀνὰ δʼ ἔφλυε καλὰ ῥέεθρα. |
| 362 | Primary ὡς δὲ λέβης ζεῖ ἔνδον ἐπειγόμενος πυρὶ πολλῷ |
| 363 | Primary κνίσην μελδόμενος ἁπαλοτρεφέος σιάλοιο |
| 364 | Primary πάντοθεν ἀμβολάδην, ὑπὸ δὲ ξύλα κάγκανα κεῖται, |
| 365 | Primary ὣς τοῦ καλὰ ῥέεθρα πυρὶ φλέγετο, ζέε δʼ ὕδωρ· |
| 366 | Primary οὐδʼ ἔθελε προρέειν, ἀλλʼ ἴσχετο· τεῖρε δʼ ἀϋτμὴ |
| 367 | Primary Ἡφαίστοιο βίηφι πολύφρονος. αὐτὰρ ὅ γʼ Ἥρην |
| 368 | Primary πολλὰ λισσόμενος ἔπεα πτερόεντα προσηύδα· |
| 369 | Primary Ἥρη τίπτε σὸς υἱὸς ἐμὸν ῥόον ἔχραε κήδειν |
| 370 | Primary ἐξ ἄλλων; οὐ μέν τοι ἐγὼ τόσον αἴτιός εἰμι |
| 371 | Primary ὅσσον οἱ ἄλλοι πάντες, ὅσοι Τρώεσσιν ἀρωγοί. |
| 372 | Primary ἀλλʼ ἤτοι μὲν ἐγὼν ἀποπαύσομαι εἰ σὺ κελεύεις, |
| 373 | Primary παυέσθω δὲ καὶ οὗτος· ἐγὼ δʼ ἐπὶ καὶ τόδʼ ὀμοῦμαι, |
| 374 | Primary μή ποτʼ ἐπὶ Τρώεσσιν ἀλεξήσειν κακὸν ἦμαρ, |
| 375 | Primary μὴ δʼ ὁπότʼ ἂν Τροίη μαλερῷ πυρὶ πᾶσα δάηται |
| 376 | Primary καιομένη, καίωσι δʼ ἀρήϊοι υἷες Ἀχαιῶν. |
| 377 | Primary αὐτὰρ ἐπεὶ τό γʼ ἄκουσε θεὰ λευκώλενος Ἥρη, |
| 378 | Primary αὐτίκʼ ἄρʼ Ἥφαιστον προσεφώνεεν ὃν φίλον υἱόν· |
| 379 | Primary Ἥφαιστε σχέο τέκνον ἀγακλεές· οὐ γὰρ ἔοικεν |
| 380 | Primary ἀθάνατον θεὸν ὧδε βροτῶν ἕνεκα στυφελίζειν. |
| 381 | Primary ὣς ἔφαθʼ, Ἥφαιστος δὲ κατέσβεσε θεσπιδαὲς πῦρ, |
| 382 | Primary ἄψορρον δʼ ἄρα κῦμα κατέσσυτο καλὰ ῥέεθρα. |
| 383 | Primary αὐτὰρ ἐπεὶ Ξάνθοιο δάμη μένος, οἳ μὲν ἔπειτα |
| 384 | Primary παυσάσθην, Ἥρη γὰρ ἐρύκακε χωομένη περ· |
| 385 | Primary ἐν δʼ ἄλλοισι θεοῖσιν ἔρις πέσε βεβριθυῖα |
| 386 | Primary ἀργαλέη, δίχα δέ σφιν ἐνὶ φρεσὶ θυμὸς ἄητο· |
| 387 | Primary σὺν δʼ ἔπεσον μεγάλῳ πατάγῳ, βράχε δʼ εὐρεῖα χθών, |
| 388 | Primary ἀμφὶ δὲ σάλπιγξεν μέγας οὐρανός. ἄϊε δὲ Ζεὺς |
| 389 | Primary ἥμενος Οὐλύμπῳ· ἐγέλασσε δέ οἱ φίλον ἦτορ |
| 390 | Primary γηθοσύνῃ, ὅθʼ ὁρᾶτο θεοὺς ἔριδι ξυνιόντας. |
| 391 | Primary ἔνθʼ οἵ γʼ οὐκέτι δηρὸν ἀφέστασαν· ἦρχε γὰρ Ἄρης |
| 392 | Primary ῥινοτόρος, καὶ πρῶτος Ἀθηναίῃ ἐπόρουσε |
| 393 | Primary χάλκεον ἔγχος ἔχων, καὶ ὀνείδειον φάτο μῦθον· |
| 394 | Primary τίπτʼ αὖτʼ ὦ κυνάμυια θεοὺς ἔριδι ξυνελαύνεις |
| 395 | Primary θάρσος ἄητον ἔχουσα, μέγας δέ σε θυμὸς ἀνῆκεν; |
| 396 | Primary ἦ οὐ μέμνῃ ὅτε Τυδεΐδην Διομήδεʼ ἀνῆκας |
| 397 | Primary οὐτάμεναι, αὐτὴ δὲ πανόψιον ἔγχος ἑλοῦσα |
| 398 | Primary ἰθὺς ἐμεῦ ὦσας, διὰ δὲ χρόα καλὸν ἔδαψας; |
| 399 | Primary τώ σʼ αὖ νῦν ὀΐω ἀποτισέμεν ὅσσα ἔοργας. |
| 400 | Primary ὣς εἰπὼν οὔτησε κατʼ αἰγίδα θυσσανόεσσαν |
| 401 | Primary σμερδαλέην, ἣν οὐδὲ Διὸς δάμνησι κεραυνός· |
| 402 | Primary τῇ μιν Ἄρης οὔτησε μιαιφόνος ἔγχεϊ μακρῷ. |
| 403 | Primary ἣ δʼ ἀναχασσαμένη λίθον εἵλετο χειρὶ παχείῃ |
| 404 | Primary κείμενον ἐν πεδίῳ μέλανα τρηχύν τε μέγαν τε, |
| 405 | Primary τόν ῥʼ ἄνδρες πρότεροι θέσαν ἔμμεναι οὖρον ἀρούρης· |
| 406 | Primary τῷ βάλε θοῦρον Ἄρηα κατʼ αὐχένα, λῦσε δὲ γυῖα. |
| 407 | Primary ἑπτὰ δʼ ἐπέσχε πέλεθρα πεσών, ἐκόνισε δὲ χαίτας, |
| 408 | Primary τεύχεά τʼ ἀμφαράβησε· γέλασσε δὲ Παλλὰς Ἀθήνη, |
| 409 | Primary καί οἱ ἐπευχομένη ἔπεα πτερόεντα προσηύδα· |
| 410 | Primary νηπύτιʼ οὐδέ νύ πώ περ ἐπεφράσω ὅσσον ἀρείων |
| 411 | Primary εὔχομʼ ἐγὼν ἔμεναι, ὅτι μοι μένος ἰσοφαρίζεις. |
| 412 | Primary οὕτω κεν τῆς μητρὸς ἐρινύας ἐξαποτίνοις, |
| 413 | Primary ἥ τοι χωομένη κακὰ μήδεται οὕνεκʼ Ἀχαιοὺς |
| 414 | Primary κάλλιπες, αὐτὰρ Τρωσὶν ὑπερφιάλοισιν ἀμύνεις. |
| 415 | Primary ὣς ἄρα φωνήσασα πάλιν τρέπεν ὄσσε φαεινώ· |
| 416 | Primary τὸν δʼ ἄγε χειρὸς ἑλοῦσα Διὸς θυγάτηρ Ἀφροδίτη |
| 417 | Primary πυκνὰ μάλα στενάχοντα· μόγις δʼ ἐσαγείρετο θυμόν. |
| 418 | Primary τὴν δʼ ὡς οὖν ἐνόησε θεὰ λευκώλενος Ἥρη, |
| 419 | Primary αὐτίκʼ Ἀθηναίην ἔπεα πτερόεντα προσηύδα· |
| 420 | Primary ὢ πόποι αἰγιόχοιο Διὸς τέκος Ἀτρυτώνη |
| 421 | Primary καὶ δʼ αὖθʼ ἡ κυνάμυια ἄγει βροτολοιγὸν Ἄρηα |
| 422 | Primary δηΐου ἐκ πολέμοιο κατὰ κλόνον· ἀλλὰ μέτελθε. |
| 423 | Primary ὣς φάτʼ, Ἀθηναίη δὲ μετέσσυτο, χαῖρε δὲ θυμῷ, |
| 424 | Primary καί ῥʼ ἐπιεισαμένη πρὸς στήθεα χειρὶ παχείῃ |
| 425 | Primary ἤλασε· τῆς δʼ αὐτοῦ λύτο γούνατα καὶ φίλον ἦτορ. |
| 426 | Primary τὼ μὲν ἄρʼ ἄμφω κεῖντο ἐπὶ χθονὶ πουλυβοτείρῃ, |
| 427 | Primary ἣ δʼ ἄρʼ ἐπευχομένη ἔπεα πτερόεντʼ ἀγόρευε· |
| 428 | Primary τοιοῦτοι νῦν πάντες ὅσοι Τρώεσσιν ἀρωγοὶ |
| 429 | Primary εἶεν, ὅτʼ Ἀργείοισι μαχοίατο θωρηκτῇσιν, |
| 430 | Primary ὧδέ τε θαρσαλέοι καὶ τλήμονες, ὡς Ἀφροδίτη |
| 431 | Primary ἦλθεν Ἄρῃ ἐπίκουρος ἐμῷ μένει ἀντιόωσα· |
| 432 | Primary τώ κεν δὴ πάλαι ἄμμες ἐπαυσάμεθα πτολέμοιο |
| 433 | Primary Ἰλίου ἐκπέρσαντες ἐϋκτίμενον πτολίεθρον. |
| 434 | Primary ὣς φάτο, μείδησεν δὲ θεὰ λευκώλενος Ἥρη. |
| 435 | Primary αὐτὰρ Ἀπόλλωνα προσέφη κρείων ἐνοσίχθων· |
| 436 | Primary Φοῖβε τί ἢ δὴ νῶϊ διέσταμεν; οὐδὲ ἔοικεν |
| 437 | Primary ἀρξάντων ἑτέρων· τὸ μὲν αἴσχιον αἴ κʼ ἀμαχητὶ |
| 438 | Primary ἴομεν Οὔλυμπον δὲ Διὸς ποτὶ χαλκοβατὲς δῶ. |
| 439 | Primary ἄρχε· σὺ γὰρ γενεῆφι νεώτερος· οὐ γὰρ ἔμοιγε |
| 440 | Primary καλόν, ἐπεὶ πρότερος γενόμην καὶ πλείονα οἶδα. |
| 441 | Primary νηπύτιʼ ὡς ἄνοον κραδίην ἔχες· οὐδέ νυ τῶν περ |
| 442 | Primary μέμνηαι ὅσα δὴ πάθομεν κακὰ Ἴλιον ἀμφὶ |
| 443 | Primary μοῦνοι νῶϊ θεῶν, ὅτʼ ἀγήνορι Λαομέδοντι |
| 444 | Primary πὰρ Διὸς ἐλθόντες θητεύσαμεν εἰς ἐνιαυτὸν |
| 445 | Primary μισθῷ ἔπι ῥητῷ· ὃ δὲ σημαίνων ἐπέτελλεν. |
| 446 | Primary ἤτοι ἐγὼ Τρώεσσι πόλιν πέρι τεῖχος ἔδειμα |
| 447 | Primary εὐρύ τε καὶ μάλα καλόν, ἵνʼ ἄρρηκτος πόλις εἴη· |
| 448 | Primary Φοῖβε σὺ δʼ εἰλίποδας ἕλικας βοῦς βουκολέεσκες |
| 449 | Primary Ἴδης ἐν κνημοῖσι πολυπτύχου ὑληέσσης. |
| 450 | Primary ἀλλʼ ὅτε δὴ μισθοῖο τέλος πολυγηθέες ὧραι |
| 451 | Primary ἐξέφερον, τότε νῶϊ βιήσατο μισθὸν ἅπαντα |
| 452 | Primary Λαομέδων ἔκπαγλος, ἀπειλήσας δʼ ἀπέπεμπε. |
| 453 | Primary σὺν μὲν ὅ γʼ ἠπείλησε πόδας καὶ χεῖρας ὕπερθε |
| 454 | Primary δήσειν, καὶ περάαν νήσων ἔπι τηλεδαπάων· |
| 455 | Primary στεῦτο δʼ ὅ γʼ ἀμφοτέρων ἀπολεψέμεν οὔατα χαλκῷ. |
| 456 | Primary νῶϊ δὲ ἄψορροι κίομεν κεκοτηότι θυμῷ |
| 457 | Primary μισθοῦ χωόμενοι, τὸν ὑποστὰς οὐκ ἐτέλεσσε. |
| 458 | Primary τοῦ δὴ νῦν λαοῖσι φέρεις χάριν, οὐδὲ μεθʼ ἡμέων |
| 459 | Primary πειρᾷ ὥς κε Τρῶες ὑπερφίαλοι ἀπόλωνται |
| 460 | Primary πρόχνυ κακῶς σὺν παισὶ καὶ αἰδοίῃς ἀλόχοισι |
| 461 | Primary τὸν δʼ αὖτε προσέειπεν ἄναξ ἑκάεργος Ἀπόλλων· |
| 462 | Primary ἐννοσίγαιʼ οὐκ ἄν με σαόφρονα μυθήσαιο |
| 463 | Primary ἔμμεναι, εἰ δὴ σοί γε βροτῶν ἕνεκα πτολεμίξω |
| 464 | Primary δειλῶν, οἳ φύλλοισιν ἐοικότες ἄλλοτε μέν τε |
| 465 | Primary ζαφλεγέες τελέθουσιν ἀρούρης καρπὸν ἔδοντες, |
| 466 | Primary ἄλλοτε δὲ φθινύθουσιν ἀκήριοι. ἀλλὰ τάχιστα |
| 467 | Primary παυώμεσθα μάχης· οἳ δʼ αὐτοὶ δηριαάσθων. |
| 468 | Primary ὣς ἄρα φωνήσας πάλιν ἐτράπετʼ· αἴδετο γάρ ῥα |
| 469 | Primary πατροκασιγνήτοιο μιγήμεναι ἐν παλάμῃσι. |
| 470 | Primary τὸν δὲ κασιγνήτη μάλα νείκεσε πότνια θηρῶν |
| 471 | Primary Ἄρτεμις ἀγροτέρη, καὶ ὀνείδειον φάτο μῦθον· |
| 472 | Primary φεύγεις δὴ ἑκάεργε, Ποσειδάωνι δὲ νίκην |
| 473 | Primary πᾶσαν ἐπέτρεψας, μέλεον δέ οἱ εὖχος ἔδωκας· |
| 474 | Primary νηπύτιε τί νυ τόξον ἔχεις ἀνεμώλιον αὔτως; |
| 475 | Primary μή σευ νῦν ἔτι πατρὸς ἐνὶ μεγάροισιν ἀκούσω |
| 476 | Primary εὐχομένου, ὡς τὸ πρὶν ἐν ἀθανάτοισι θεοῖσιν, |
| 477 | Primary ἄντα Ποσειδάωνος ἐναντίβιον πολεμίζειν. |
| 478 | Primary ὣς φάτο, τὴν δʼ οὔ τι προσέφη ἑκάεργος Ἀπόλλων, |
| 479 | Primary ἀλλὰ χολωσαμένη Διὸς αἰδοίη παράκοιτις |
| 480 | Primary νείκεσεν ἰοχέαιραν ὀνειδείοις ἐπέεσσι· |
| 481 | Primary πῶς δὲ σὺ νῦν μέμονας κύον ἀδεὲς ἀντίʼ ἐμεῖο |
| 482 | Primary στήσεσθαι; χαλεπή τοι ἐγὼ μένος ἀντιφέρεσθαι |
| 483 | Primary τοξοφόρῳ περ ἐούσῃ, ἐπεὶ σὲ λέοντα γυναιξὶ |
| 484 | Primary Ζεὺς θῆκεν, καὶ ἔδωκε κατακτάμεν ἥν κʼ ἐθέλῃσθα. |
| 485 | Primary ἤτοι βέλτερόν ἐστι κατʼ οὔρεα θῆρας ἐναίρειν |
| 486 | Primary ἀγροτέρας τʼ ἐλάφους ἢ κρείσσοσιν ἶφι μάχεσθαι. |
| 487 | Primary εἰ δʼ ἐθέλεις πολέμοιο δαήμεναι, ὄφρʼ ἐῢ εἰδῇς |
| 488 | Primary ὅσσον φερτέρη εἴμʼ, ὅτι μοι μένος ἀντιφερίζεις. |
| 489 | Primary ἦ ῥα, καὶ ἀμφοτέρας ἐπὶ καρπῷ χεῖρας ἔμαρπτε |
| 490 | Primary σκαιῇ, δεξιτερῇ δʼ ἄρʼ ἀπʼ ὤμων αἴνυτο τόξα, |
| 491 | Primary αὐτοῖσιν δʼ ἄρʼ ἔθεινε παρʼ οὔατα μειδιόωσα |
| 492 | Primary ἐντροπαλιζομένην· ταχέες δʼ ἔκπιπτον ὀϊστοί. |
| 493 | Primary δακρυόεσσα δʼ ὕπαιθα θεὰ φύγεν ὥς τε πέλεια, |
| 494 | Primary ἥ ῥά θʼ ὑπʼ ἴρηκος κοίλην εἰσέπτατο πέτρην |
| 495 | Primary χηραμόν· οὐδʼ ἄρα τῇ γε ἁλώμεναι αἴσιμον ἦεν· |
| 496 | Primary ὣς ἣ δακρυόεσσα φύγεν, λίπε δʼ αὐτόθι τόξα. |
| 497 | Primary Λητὼ δὲ προσέειπε διάκτορος ἀργεϊφόντης· |
| 498 | Primary Λητοῖ ἐγὼ δέ τοι οὔ τι μαχήσομαι· ἀργαλέον δὲ |
| 499 | Primary πληκτίζεσθʼ ἀλόχοισι Διὸς νεφεληγερέταο· |
| 500 | Primary ἀλλὰ μάλα πρόφρασσα μετʼ ἀθανάτοισι θεοῖσιν |
| 501 | Primary εὔχεσθαι ἐμὲ νικῆσαι κρατερῆφι βίηφιν. |
| 502 | Primary ὣς ἄρʼ ἔφη, Λητὼ δὲ συναίνυτο καμπύλα τόξα |
| 503 | Primary πεπτεῶτʼ ἄλλυδις ἄλλα μετὰ στροφάλιγγι κονίης. |
| 504 | Primary ἣ μὲν τόξα λαβοῦσα πάλιν κίε θυγατέρος ἧς· |
| 505 | Primary ἣ δʼ ἄρʼ Ὄλυμπον ἵκανε Διὸς ποτὶ χαλκοβατὲς δῶ, |
| 506 | Primary δακρυόεσσα δὲ πατρὸς ἐφέζετο γούνασι κούρη, |
| 507 | Primary ἀμφὶ δʼ ἄρʼ ἀμβρόσιος ἑανὸς τρέμε· τὴν δὲ προτὶ οἷ |
| 508 | Primary εἷλε πατὴρ Κρονίδης, καὶ ἀνείρετο ἡδὺ γελάσσας· |
| 509 | Primary τίς νύ σε τοιάδʼ ἔρεξε φίλον τέκος Οὐρανιώνων |
| 510 | Primary μαψιδίως, ὡς εἴ τι κακὸν ῥέζουσαν ἐνωπῇ; |
| 511 | Primary τὸν δʼ αὖτε προσέειπεν ἐϋστέφανος κελαδεινή· |
| 512 | Primary σή μʼ ἄλοχος στυφέλιξε πάτερ λευκώλενος Ἥρη, |
| 513 | Primary ἐξ ἧς ἀθανάτοισιν ἔρις καὶ νεῖκος ἐφῆπται. |
| 514 | Primary ὣς οἳ μὲν τοιαῦτα πρὸς ἀλλήλους ἀγόρευον· |
| 515 | Primary αὐτὰρ Ἀπόλλων Φοῖβος ἐδύσετο Ἴλιον ἱρήν· |
| 516 | Primary μέμβλετο γάρ οἱ τεῖχος ἐϋδμήτοιο πόληος |
| 517 | Primary μὴ Δαναοὶ πέρσειαν ὑπὲρ μόρον ἤματι κείνῳ. |
| 518 | Primary οἳ δʼ ἄλλοι πρὸς Ὄλυμπον ἴσαν θεοὶ αἰὲν ἐόντες, |
| 519 | Primary οἳ μὲν χωόμενοι, οἳ δὲ μέγα κυδιόωντες· |
| 520 | Primary κὰδ δʼ ἷζον παρὰ πατρὶ κελαινεφεῖ· αὐτὰρ Ἀχιλλεὺς |
| 521 | Primary Τρῶας ὁμῶς αὐτούς τʼ ὄλεκεν καὶ μώνυχας ἵππους. |
| 522 | Primary ὡς δʼ ὅτε καπνὸς ἰὼν εἰς οὐρανὸν εὐρὺν ἵκηται |
| 523 | Primary ἄστεος αἰθομένοιο, θεῶν δέ ἑ μῆνις ἀνῆκε, |
| 524 | Primary πᾶσι δʼ ἔθηκε πόνον, πολλοῖσι δὲ κήδεʼ ἐφῆκεν, |
| 525 | Primary ὣς Ἀχιλεὺς Τρώεσσι πόνον καὶ κήδεʼ ἔθηκεν. |
| 526 | Primary ἑστήκει δʼ ὃ γέρων Πρίαμος θείου ἐπὶ πύργου, |
| 527 | Primary ἐς δʼ ἐνόησʼ Ἀχιλῆα πελώριον· αὐτὰρ ὑπʼ αὐτοῦ |
| 528 | Primary Τρῶες ἄφαρ κλονέοντο πεφυζότες, οὐδέ τις ἀλκὴ |
| 529 | Primary γίγνεθʼ· ὃ δʼ οἰμώξας ἀπὸ πύργου βαῖνε χαμᾶζε |
| 530 | Primary ὀτρύνων παρὰ τεῖχος ἀγακλειτοὺς πυλαωρούς· |
| 531 | Primary πεπταμένας ἐν χερσὶ πύλας ἔχετʼ εἰς ὅ κε λαοὶ |
| 532 | Primary ἔλθωσι προτὶ ἄστυ πεφυζότες· ἦ γὰρ Ἀχιλλεὺς |
| 533 | Primary ἐγγὺς ὅδε κλονέων· νῦν οἴω λοίγιʼ ἔσεσθαι. |
| 534 | Primary αὐτὰρ ἐπεί κʼ ἐς τεῖχος ἀναπνεύσωσιν ἀλέντες, |
| 535 | Primary αὖτις ἐπανθέμεναι σανίδας πυκινῶς ἀραρυίας· |
| 536 | Primary δείδια γὰρ μὴ οὖλος ἀνὴρ ἐς τεῖχος ἅληται. |
| 537 | Primary ὣς ἔφαθʼ, οἳ δʼ ἄνεσάν τε πύλας καὶ ἀπῶσαν ὀχῆας· |
| 538 | Primary αἳ δὲ πετασθεῖσαι τεῦξαν φάος· αὐτὰρ Ἀπόλλων |
| 539 | Primary ἀντίος ἐξέθορε Τρώων ἵνα λοιγὸν ἀλάλκοι. |
| 540 | Primary οἳ δʼ ἰθὺς πόλιος καὶ τείχεος ὑψηλοῖο |
| 541 | Primary δίψῃ καρχαλέοι κεκονιμένοι ἐκ πεδίοιο |
| 542 | Primary φεῦγον· ὃ δὲ σφεδανὸν ἔφεπʼ ἔγχεϊ, λύσσα δέ οἱ κῆρ |
| 543 | Primary αἰὲν ἔχε κρατερή, μενέαινε δὲ κῦδος ἀρέσθαι. |
| 544 | Primary ἔνθά κεν ὑψίπυλον Τροίην ἕλον υἷες Ἀχαιῶν, |
| 545 | Primary εἰ μὴ Ἀπόλλων Φοῖβος Ἀγήνορα δῖον ἀνῆκε |
| 546 | Primary φῶτʼ Ἀντήνορος υἱὸν ἀμύμονά τε κρατερόν τε. |
| 547 | Primary ἐν μέν οἱ κραδίῃ θάρσος βάλε, πὰρ δέ οἱ αὐτὸς |
| 548 | Primary ἔστη, ὅπως θανάτοιο βαρείας χεῖρας ἀλάλκοι |
| 549 | Primary φηγῷ κεκλιμένος· κεκάλυπτο δʼ ἄρʼ ἠέρι πολλῇ. |
| 550 | Primary αὐτὰρ ὅ γʼ ὡς ἐνόησεν Ἀχιλλῆα πτολίπορθον |
| 551 | Primary ἔστη, πολλὰ δέ οἱ κραδίη πόρφυρε μένοντι· |
| 552 | Primary ὀχθήσας δʼ ἄρα εἶπε πρὸς ὃν μεγαλήτορα θυμόν· |
| 553 | Primary ὤ μοι ἐγών· εἰ μέν κεν ὑπὸ κρατεροῦ Ἀχιλῆος |
| 554 | Primary φεύγω, τῇ περ οἱ ἄλλοι ἀτυζόμενοι κλονέονται, |
| 555 | Primary αἱρήσει με καὶ ὧς, καὶ ἀνάλκιδα δειροτομήσει. |
| 556 | Primary εἰ δʼ ἂν ἐγὼ τούτους μὲν ὑποκλονέεσθαι ἐάσω |
| 557 | Primary Πηλεΐδῃ Ἀχιλῆϊ, ποσὶν δʼ ἀπὸ τείχεος ἄλλῃ |
| 558 | Primary φεύγω πρὸς πεδίον Ἰλήϊον, ὄφρʼ ἂν ἵκωμαι |
| 559 | Primary Ἴδης τε κνημοὺς κατά τε ῥωπήϊα δύω· |
| 560 | Primary ἑσπέριος δʼ ἂν ἔπειτα λοεσσάμενος ποταμοῖο |
| 561 | Primary ἱδρῶ ἀποψυχθεὶς προτὶ Ἴλιον ἀπονεοίμην· |
| 562 | Primary ἀλλὰ τί ἤ μοι ταῦτα φίλος διελέξατο θυμός; |
| 563 | Primary μή μʼ ἀπαειρόμενον πόλιος πεδίον δὲ νοήσῃ |
| 564 | Primary καί με μεταΐξας μάρψῃ ταχέεσσι πόδεσσιν. |
| 565 | Primary οὐκέτʼ ἔπειτʼ ἔσται θάνατον καὶ κῆρας ἀλύξαι· |
| 566 | Primary λίην γὰρ κρατερὸς περὶ πάντων ἔστʼ ἀνθρώπων. |
| 567 | Primary εἰ δέ κέ οἱ προπάροιθε πόλεος κατεναντίον ἔλθω· |
| 568 | Primary καὶ γάρ θην τούτῳ τρωτὸς χρὼς ὀξέϊ χαλκῷ, |
| 569 | Primary ἐν δὲ ἴα ψυχή, θνητὸν δέ ἕ φασʼ ἄνθρωποι |
| 570 | Primary ἔμμεναι· αὐτάρ οἱ Κρονίδης Ζεὺς κῦδος ὀπάζει. |
| 571 | Primary ὣς εἰπὼν Ἀχιλῆα ἀλεὶς μένεν, ἐν δέ οἱ ἦτορ |
| 572 | Primary ἄλκιμον ὁρμᾶτο πτολεμίζειν ἠδὲ μάχεσθαι. |
| 573 | Primary ἠΰτε πάρδαλις εἶσι βαθείης ἐκ ξυλόχοιο |
| 574 | Primary ἀνδρὸς θηρητῆρος ἐναντίον, οὐδέ τι θυμῷ |
| 575 | Primary ταρβεῖ οὐδὲ φοβεῖται, ἐπεί κεν ὑλαγμὸν ἀκούσῃ· |
| 576 | Primary εἴ περ γὰρ φθάμενός μιν ἢ οὐτάσῃ ἠὲ βάλῃσιν, |
| 577 | Primary ἀλλά τε καὶ περὶ δουρὶ πεπαρμένη οὐκ ἀπολήγει |
| 578 | Primary ἀλκῆς, πρίν γʼ ἠὲ ξυμβλήμεναι ἠὲ δαμῆναι· |
| 579 | Primary ὣς Ἀντήνορος υἱὸς ἀγαυοῦ δῖος Ἀγήνωρ |
| 580 | Primary οὐκ ἔθελεν φεύγειν, πρὶν πειρήσαιτʼ Ἀχιλῆος. |
| 581 | Primary ἀλλʼ ὅ γʼ ἄρʼ ἀσπίδα μὲν πρόσθʼ ἔσχετο πάντοσʼ ἐΐσην, |
| 582 | Primary ἐγχείῃ δʼ αὐτοῖο τιτύσκετο, καὶ μέγʼ ἀΰτει· |
| 583 | Primary ἦ δή που μάλʼ ἔολπας ἐνὶ φρεσὶ φαίδιμʼ Ἀχιλλεῦ |
| 584 | Primary ἤματι τῷδε πόλιν πέρσειν Τρώων ἀγερώχων |
| 585 | Primary νηπύτιʼ· ἦ τʼ ἔτι πολλὰ τετεύξεται ἄλγεʼ ἐπʼ αὐτῇ. |
| 586 | Primary ἐν γάρ οἱ πολέες τε καὶ ἄλκιμοι ἀνέρες εἰμέν, |
| 587 | Primary οἳ καὶ πρόσθε φίλων τοκέων ἀλόχων τε καὶ υἱῶν |
| 588 | Primary Ἴλιον εἰρυόμεσθα· σὺ δʼ ἐνθάδε πότμον ἐφέψεις |
| 589 | Primary ὧδʼ ἔκπαγλος ἐὼν καὶ θαρσαλέος πολεμιστής. |
| 590 | Primary ἦ ῥα, καὶ ὀξὺν ἄκοντα βαρείης χειρὸς ἀφῆκε, |
| 591 | Primary καί ῥʼ ἔβαλε κνήμην ὑπὸ γούνατος οὐδʼ ἀφάμαρτεν. |
| 592 | Primary ἀμφὶ δέ οἱ κνημὶς νεοτεύκτου κασσιτέροιο |
| 593 | Primary σμερδαλέον κονάβησε· πάλιν δʼ ἀπὸ χαλκὸς ὄρουσε |
| 594 | Primary βλημένου, οὐδʼ ἐπέρησε, θεοῦ δʼ ἠρύκακε δῶρα. |
| 595 | Primary Πηλεΐδης δʼ ὁρμήσατʼ Ἀγήνορος ἀντιθέοιο |
| 596 | Primary δεύτερος· οὐδʼ ἔτʼ ἔασεν Ἀπόλλων κῦδος ἀρέσθαι, |
| 597 | Primary ἀλλά μιν ἐξήρπαξε, κάλυψε δʼ ἄρʼ ἠέρι πολλῇ, |
| 598 | Primary ἡσύχιον δʼ ἄρα μιν πολέμου ἔκπεμπε νέεσθαι. |
| 599 | Primary αὐτὰρ ὃ Πηλεΐωνα δόλῳ ἀποέργαθε λαοῦ· |
| 600 | Primary αὐτῷ γὰρ ἑκάεργος Ἀγήνορι πάντα ἐοικὼς |
| 601 | Primary ἔστη πρόσθε ποδῶν, ὃ δʼ ἐπέσσυτο ποσσὶ διώκειν· |
| 602 | Primary εἷος ὃ τὸν πεδίοιο διώκετο πυροφόροιο |
| 603 | Primary τρέψας πὰρ ποταμὸν βαθυδινήεντα Σκάμανδρον |
| 604 | Primary τυτθὸν ὑπεκπροθέοντα· δόλῳ δʼ ἄρʼ ἔθελγεν Ἀπόλλων |
| 605 | Primary ὡς αἰεὶ ἔλποιτο κιχήσεσθαι ποσὶν οἷσι· |
| 606 | Primary τόφρʼ ἄλλοι Τρῶες πεφοβημένοι ἦλθον ὁμίλῳ |
| 607 | Primary ἀσπάσιοι προτὶ ἄστυ, πόλις δʼ ἔμπλητο ἀλέντων. |
| 608 | Primary οὐδʼ ἄρα τοί γʼ ἔτλαν πόλιος καὶ τείχεος ἐκτὸς |
| 609 | Primary μεῖναι ἔτʼ ἀλλήλους, καὶ γνώμεναι ὅς τε πεφεύγοι |
| 610 | Primary ὅς τʼ ἔθανʼ ἐν πολέμῳ· ἀλλʼ ἐσσυμένως ἐσέχυντο |
| 611 | Primary ἐς πόλιν, ὅν τινα τῶν γε πόδες καὶ γοῦνα σαώσαι. |