Reader
Reader | Iliad, Book 23
Iliad
Homer
Text
Position
Line 1 of 897
Waypoints
| Line Ref | Monro and Allen | Ancient Greek |
|---|---|
| 1 | Primary ὣς οἳ μὲν στενάχοντο κατὰ πτόλιν· αὐτὰρ Ἀχαιοὶ |
| 2 | Primary ἐπεὶ δὴ νῆάς τε καὶ Ἑλλήσποντον ἵκοντο, |
| 3 | Primary οἳ μὲν ἄρʼ ἐσκίδναντο ἑὴν ἐπὶ νῆα ἕκαστος, |
| 4 | Primary Μυρμιδόνας δʼ οὐκ εἴα ἀποσκίδνασθαι Ἀχιλλεύς, |
| 5 | Primary ἀλλʼ ὅ γε οἷς ἑτάροισι φιλοπτολέμοισι μετηύδα· |
| 6 | Primary Μυρμιδόνες ταχύπωλοι ἐμοὶ ἐρίηρες ἑταῖροι |
| 7 | Primary μὴ δή πω ὑπʼ ὄχεσφι λυώμεθα μώνυχας ἵππους, |
| 8 | Primary ἀλλʼ αὐτοῖς ἵπποισι καὶ ἅρμασιν ἆσσον ἰόντες |
| 9 | Primary Πάτροκλον κλαίωμεν· ὃ γὰρ γέρας ἐστὶ θανόντων. |
| 10 | Primary αὐτὰρ ἐπεί κʼ ὀλοοῖο τεταρπώμεσθα γόοιο, |
| 11 | Primary ἵππους λυσάμενοι δορπήσομεν ἐνθάδε πάντες. |
| 12 | Primary ὣς ἔφαθʼ, οἳ δʼ ᾤμωξαν ἀολλέες, ἦρχε δʼ Ἀχιλλεύς. |
| 13 | Primary οἳ δὲ τρὶς περὶ νεκρὸν ἐΰτριχας ἤλασαν ἵππους |
| 14 | Primary μυρόμενοι· μετὰ δέ σφι Θέτις γόου ἵμερον ὦρσε. |
| 15 | Primary δεύοντο ψάμαθοι, δεύοντο δὲ τεύχεα φωτῶν |
| 16 | Primary δάκρυσι· τοῖον γὰρ πόθεον μήστωρα φόβοιο. |
| 17 | Primary τοῖσι δὲ Πηλεΐδης ἁδινοῦ ἐξῆρχε γόοιο |
| 18 | Primary χεῖρας ἐπʼ ἀνδροφόνους θέμενος στήθεσσιν ἑταίρου· |
| 19 | Primary χαῖρέ μοι ὦ Πάτροκλε καὶ εἰν Ἀΐδαο δόμοισι· |
| 20 | Primary πάντα γὰρ ἤδη τοι τελέω τὰ πάροιθεν ὑπέστην |
| 21 | Primary Ἕκτορα δεῦρʼ ἐρύσας δώσειν κυσὶν ὠμὰ δάσασθαι, |
| 22 | Primary δώδεκα δὲ προπάροιθε πυρῆς ἀποδειροτομήσειν |
| 23 | Primary Τρώων ἀγλαὰ τέκνα σέθεν κταμένοιο χολωθείς. |
| 24 | Primary ἦ ῥα καὶ Ἕκτορα δῖον ἀεικέα μήδετο ἔργα |
| 25 | Primary πρηνέα πὰρ λεχέεσσι Μενοιτιάδαο τανύσσας |
| 26 | Primary ἐν κονίῃς· οἳ δʼ ἔντεʼ ἀφωπλίζοντο ἕκαστος |
| 27 | Primary χάλκεα μαρμαίροντα, λύον δʼ ὑψηχέας ἵππους, |
| 28 | Primary κὰδ δʼ ἷζον παρὰ νηῒ ποδώκεος Αἰακίδαο |
| 29 | Primary μυρίοι· αὐτὰρ ὃ τοῖσι τάφον μενοεικέα δαίνυ. |
| 30 | Primary πολλοὶ μὲν βόες ἀργοὶ ὀρέχθεον ἀμφὶ σιδήρῳ |
| 31 | Primary σφαζόμενοι, πολλοὶ δʼ ὄϊες καὶ μηκάδες αἶγες· |
| 32 | Primary πολλοὶ δʼ ἀργιόδοντες ὕες θαλέθοντες ἀλοιφῇ |
| 33 | Primary εὑόμενοι τανύοντο διὰ φλογὸς Ἡφαίστοιο· |
| 34 | Primary πάντῃ δʼ ἀμφὶ νέκυν κοτυλήρυτον ἔρρεεν αἷμα. |
| 35 | Primary αὐτὰρ τόν γε ἄνακτα ποδώκεα Πηλεΐωνα |
| 36 | Primary εἰς Ἀγαμέμνονα δῖον ἄγον βασιλῆες Ἀχαιῶν |
| 37 | Primary σπουδῇ παρπεπιθόντες ἑταίρου χωόμενον κῆρ. |
| 38 | Primary οἳ δʼ ὅτε δὴ κλισίην Ἀγαμέμνονος ἷξον ἰόντες, |
| 39 | Primary αὐτίκα κηρύκεσσι λιγυφθόγγοισι κέλευσαν |
| 40 | Primary ἀμφὶ πυρὶ στῆσαι τρίποδα μέγαν, εἰ πεπίθοιεν |
| 41 | Primary Πηλεΐδην λούσασθαι ἄπο βρότον αἱματόεντα. |
| 42 | Primary αὐτὰρ ὅ γʼ ἠρνεῖτο στερεῶς, ἐπὶ δʼ ὅρκον ὄμοσσεν· |
| 43 | Primary οὐ μὰ Ζῆνʼ, ὅς τίς τε θεῶν ὕπατος καὶ ἄριστος, |
| 44 | Primary οὐ θέμις ἐστὶ λοετρὰ καρήατος ἆσσον ἱκέσθαι |
| 45 | Primary πρίν γʼ ἐνὶ Πάτροκλον θέμεναι πυρὶ σῆμά τε χεῦαι |
| 46 | Primary κείρασθαί τε κόμην, ἐπεὶ οὔ μʼ ἔτι δεύτερον ὧδε |
| 47 | Primary ἵξετʼ ἄχος κραδίην ὄφρα ζωοῖσι μετείω. |
| 48 | Primary ἀλλʼ ἤτοι νῦν μὲν στυγερῇ πειθώμεθα δαιτί· |
| 49 | Primary ἠῶθεν δʼ ὄτρυνον ἄναξ ἀνδρῶν Ἀγάμεμνον |
| 50 | Primary ὕλην τʼ ἀξέμεναι παρά τε σχεῖν ὅσσʼ ἐπιεικὲς |
| 51 | Primary νεκρὸν ἔχοντα νέεσθαι ὑπὸ ζόφον ἠερόεντα, |
| 52 | Primary ὄφρʼ ἤτοι τοῦτον μὲν ἐπιφλέγῃ ἀκάματον πῦρ |
| 53 | Primary θᾶσσον ἀπʼ ὀφθαλμῶν, λαοὶ δʼ ἐπὶ ἔργα τράπωνται. |
| 54 | Primary ὣς ἔφαθʼ, οἳ δʼ ἄρα τοῦ μάλα μὲν κλύον ἠδὲ πίθοντο. |
| 55 | Primary ἐσσυμένως δʼ ἄρα δόρπον ἐφοπλίσσαντες ἕκαστοι |
| 56 | Primary δαίνυντʼ, οὐδέ τι θυμὸς ἐδεύετο δαιτὸς ἐΐσης. |
| 57 | Primary αὐτὰρ ἐπεὶ πόσιος καὶ ἐδητύος ἐξ ἔρον ἕντο, |
| 58 | Primary οἳ μὲν κακκείοντες ἔβαν κλισίην δὲ ἕκαστος, |
| 59 | Primary Πηλεΐδης δʼ ἐπὶ θινὶ πολυφλοίσβοιο θαλάσσης |
| 60 | Primary κεῖτο βαρὺ στενάχων πολέσιν μετὰ Μυρμιδόνεσσιν |
| 61 | Primary ἐν καθαρῷ, ὅθι κύματʼ ἐπʼ ἠϊόνος κλύζεσκον· |
| 62 | Primary εὖτε τὸν ὕπνος ἔμαρπτε λύων μελεδήματα θυμοῦ |
| 63 | Primary νήδυμος ἀμφιχυθείς· μάλα γὰρ κάμε φαίδιμα γυῖα |
| 64 | Primary Ἕκτορʼ ἐπαΐσσων προτὶ Ἴλιον ἠνεμόεσσαν· |
| 65 | Primary ἦλθε δʼ ἐπὶ ψυχὴ Πατροκλῆος δειλοῖο |
| 66 | Primary πάντʼ αὐτῷ μέγεθός τε καὶ ὄμματα κάλʼ ἐϊκυῖα |
| 67 | Primary καὶ φωνήν, καὶ τοῖα περὶ χροῒ εἵματα ἕστο· |
| 68 | Primary στῆ δʼ ἄρʼ ὑπὲρ κεφαλῆς καί μιν πρὸς μῦθον ἔειπεν· |
| 69 | Primary εὕδεις, αὐτὰρ ἐμεῖο λελασμένος ἔπλευ Ἀχιλλεῦ. |
| 70 | Primary οὐ μέν μευ ζώοντος ἀκήδεις, ἀλλὰ θανόντος· |
| 71 | Primary θάπτέ με ὅττι τάχιστα πύλας Ἀΐδαο περήσω. |
| 72 | Primary τῆλέ με εἴργουσι ψυχαὶ εἴδωλα καμόντων, |
| 73 | Primary οὐδέ μέ πω μίσγεσθαι ὑπὲρ ποταμοῖο ἐῶσιν, |
| 74 | Primary ἀλλʼ αὔτως ἀλάλημαι ἀνʼ εὐρυπυλὲς Ἄϊδος δῶ. |
| 75 | Primary καί μοι δὸς τὴν χεῖρʼ· ὀλοφύρομαι, οὐ γὰρ ἔτʼ αὖτις |
| 76 | Primary νίσομαι ἐξ Ἀΐδαο, ἐπήν με πυρὸς λελάχητε. |
| 77 | Primary οὐ μὲν γὰρ ζωοί γε φίλων ἀπάνευθεν ἑταίρων |
| 78 | Primary βουλὰς ἑζόμενοι βουλεύσομεν, ἀλλʼ ἐμὲ μὲν κὴρ |
| 79 | Primary ἀμφέχανε στυγερή, ἥ περ λάχε γιγνόμενόν περ· |
| 80 | Primary καὶ δὲ σοὶ αὐτῷ μοῖρα, θεοῖς ἐπιείκελʼ Ἀχιλλεῦ, |
| 81 | Primary τείχει ὕπο Τρώων εὐηφενέων ἀπολέσθαι. |
| 82 | Primary ἄλλο δέ τοι ἐρέω καὶ ἐφήσομαι αἴ κε πίθηαι· |
| 83 | Primary μὴ ἐμὰ σῶν ἀπάνευθε τιθήμεναι ὀστέʼ Ἀχιλλεῦ, |
| 84 | Primary ἀλλʼ ὁμοῦ ὡς ἐτράφημεν ἐν ὑμετέροισι δόμοισιν, |
| 85 | Primary εὖτέ με τυτθὸν ἐόντα Μενοίτιος ἐξ Ὀπόεντος |
| 86 | Primary ἤγαγεν ὑμέτερόνδʼ ἀνδροκτασίης ὕπο λυγρῆς, |
| 87 | Primary ἤματι τῷ ὅτε παῖδα κατέκτανον Ἀμφιδάμαντος |
| 88 | Primary νήπιος οὐκ ἐθέλων ἀμφʼ ἀστραγάλοισι χολωθείς· |
| 89 | Primary ἔνθά με δεξάμενος ἐν δώμασιν ἱππότα Πηλεὺς |
| 90 | Primary ἔτραφέ τʼ ἐνδυκέως καὶ σὸν θεράποντʼ ὀνόμηνεν· |
| 91 | Primary ὣς δὲ καὶ ὀστέα νῶϊν ὁμὴ σορὸς ἀμφικαλύπτοι |
| 92 | Primary χρύσεος ἀμφιφορεύς, τόν τοι πόρε πότνια μήτηρ. |
| 93 | Primary τὸν δʼ ἀπαμειβόμενος προσέφη πόδας ὠκὺς Ἀχιλλεύς· |
| 94 | Primary τίπτέ μοι ἠθείη κεφαλὴ δεῦρʼ εἰλήλουθας |
| 95 | Primary καί μοι ταῦτα ἕκαστʼ ἐπιτέλλεαι; αὐτὰρ ἐγώ τοι |
| 96 | Primary πάντα μάλʼ ἐκτελέω καὶ πείσομαι ὡς σὺ κελεύεις. |
| 97 | Primary ἀλλά μοι ἆσσον στῆθι· μίνυνθά περ ἀμφιβαλόντε |
| 98 | Primary ἀλλήλους ὀλοοῖο τεταρπώμεσθα γόοιο. |
| 99 | Primary ὣς ἄρα φωνήσας ὠρέξατο χερσὶ φίλῃσιν |
| 100 | Primary οὐδʼ ἔλαβε· ψυχὴ δὲ κατὰ χθονὸς ἠΰτε καπνὸς |
| 101 | Primary ᾤχετο τετριγυῖα· ταφὼν δʼ ἀνόρουσεν Ἀχιλλεὺς |
| 102 | Primary χερσί τε συμπλατάγησεν, ἔπος δʼ ὀλοφυδνὸν ἔειπεν· |
| 103 | Primary ὢ πόποι ἦ ῥά τίς ἐστι καὶ εἰν Ἀΐδαο δόμοισι |
| 104 | Primary ψυχὴ καὶ εἴδωλον, ἀτὰρ φρένες οὐκ ἔνι πάμπαν· |
| 105 | Primary παννυχίη γάρ μοι Πατροκλῆος δειλοῖο |
| 106 | Primary ψυχὴ ἐφεστήκει γοόωσά τε μυρομένη τε, |
| 107 | Primary καί μοι ἕκαστʼ ἐπέτελλεν, ἔϊκτο δὲ θέσκελον αὐτῷ. |
| 108 | Primary ὣς φάτο, τοῖσι δὲ πᾶσιν ὑφʼ ἵμερον ὦρσε γόοιο· |
| 109 | Primary μυρομένοισι δὲ τοῖσι φάνη ῥοδοδάκτυλος Ἠὼς |
| 110 | Primary ἀμφὶ νέκυν ἐλεεινόν. ἀτὰρ κρείων Ἀγαμέμνων |
| 111 | Primary οὐρῆάς τʼ ὄτρυνε καὶ ἀνέρας ἀξέμεν ὕλην |
| 112 | Primary πάντοθεν ἐκ κλισιῶν· ἐπὶ δʼ ἀνὴρ ἐσθλὸς ὀρώρει |
| 113 | Primary Μηριόνης θεράπων ἀγαπήνορος Ἰδομενῆος. |
| 114 | Primary οἳ δʼ ἴσαν ὑλοτόμους πελέκεας ἐν χερσὶν ἔχοντες |
| 115 | Primary σειράς τʼ εὐπλέκτους· πρὸ δʼ ἄρʼ οὐρῆες κίον αὐτῶν. |
| 116 | Primary πολλὰ δʼ ἄναντα κάταντα πάραντά τε δόχμιά τʼ ἦλθον· |
| 117 | Primary ἀλλʼ ὅτε δὴ κνημοὺς προσέβαν πολυπίδακος Ἴδης, |
| 118 | Primary αὐτίκʼ ἄρα δρῦς ὑψικόμους ταναήκεϊ χαλκῷ |
| 119 | Primary τάμνον ἐπειγόμενοι· ταὶ δὲ μεγάλα κτυπέουσαι |
| 120 | Primary πῖπτον· τὰς μὲν ἔπειτα διαπλήσσοντες Ἀχαιοὶ |
| 121 | Primary ἔκδεον ἡμιόνων· ταὶ δὲ χθόνα ποσσὶ δατεῦντο |
| 122 | Primary ἐλδόμεναι πεδίοιο διὰ ῥωπήϊα πυκνά. |
| 123 | Primary πάντες δʼ ὑλοτόμοι φιτροὺς φέρον· ὡς γὰρ ἀνώγει |
| 124 | Primary Μηριόνης θεράπων ἀγαπήνορος Ἰδομενῆος. |
| 125 | Primary κὰδ δʼ ἄρʼ ἐπʼ ἀκτῆς βάλλον ἐπισχερώ, ἔνθʼ ἄρʼ Ἀχιλλεὺς |
| 126 | Primary φράσσατο Πατρόκλῳ μέγα ἠρίον ἠδὲ οἷ αὐτῷ. |
| 127 | Primary αὐτὰρ ἐπεὶ πάντῃ παρακάββαλον ἄσπετον ὕλην |
| 128 | Primary ἥατʼ ἄρʼ αὖθι μένοντες ἀολλέες. αὐτὰρ Ἀχιλλεὺς |
| 129 | Primary αὐτίκα Μυρμιδόνεσσι φιλοπτολέμοισι κέλευσε |
| 130 | Primary χαλκὸν ζώννυσθαι, ζεῦξαι δʼ ὑπʼ ὄχεσφιν ἕκαστον |
| 131 | Primary ἵππους· οἳ δʼ ὄρνυντο καὶ ἐν τεύχεσσιν ἔδυνον, |
| 132 | Primary ἂν δʼ ἔβαν ἐν δίφροισι παραιβάται ἡνίοχοί τε, |
| 133 | Primary πρόσθε μὲν ἱππῆες, μετὰ δὲ νέφος εἵπετο πεζῶν |
| 134 | Primary μυρίοι· ἐν δὲ μέσοισι φέρον Πάτροκλον ἑταῖροι. |
| 135 | Primary θριξὶ δὲ πάντα νέκυν καταείνυσαν, ἃς ἐπέβαλλον |
| 136 | Primary κειρόμενοι· ὄπιθεν δὲ κάρη ἔχε δῖος Ἀχιλλεὺς |
| 137 | Primary ἀχνύμενος· ἕταρον γὰρ ἀμύμονα πέμπʼ Ἄϊδος δέ. |
| 138 | Primary οἳ δʼ ὅτε χῶρον ἵκανον ὅθί σφισι πέφραδʼ Ἀχιλλεὺς |
| 139 | Primary κάτθεσαν, αἶψα δέ οἱ μενοεικέα νήεον ὕλην. |
| 140 | Primary ἔνθʼ αὖτʼ ἄλλʼ ἐνόησε ποδάρκης δῖος Ἀχιλλεύς· |
| 141 | Primary στὰς ἀπάνευθε πυρῆς ξανθὴν ἀπεκείρατο χαίτην, |
| 142 | Primary τήν ῥα Σπερχειῷ ποταμῷ τρέφε τηλεθόωσαν· |
| 143 | Primary ὀχθήσας δʼ ἄρα εἶπεν ἰδὼν ἐπὶ οἴνοπα πόντον· |
| 144 | Primary Σπερχείʼ ἄλλως σοί γε πατὴρ ἠρήσατο Πηλεὺς |
| 145 | Primary κεῖσέ με νοστήσαντα φίλην ἐς πατρίδα γαῖαν |
| 146 | Primary σοί τε κόμην κερέειν ῥέξειν θʼ ἱερὴν ἑκατόμβην, |
| 147 | Primary πεντήκοντα δʼ ἔνορχα παρʼ αὐτόθι μῆλʼ ἱερεύσειν |
| 148 | Primary ἐς πηγάς, ὅθι τοι τέμενος βωμός τε θυήεις. |
| 149 | Primary ὣς ἠρᾶθʼ ὃ γέρων, σὺ δέ οἱ νόον οὐκ ἐτέλεσσας. |
| 150 | Primary νῦν δʼ ἐπεὶ οὐ νέομαί γε φίλην ἐς πατρίδα γαῖαν |
| 151 | Primary Πατρόκλῳ ἥρωϊ κόμην ὀπάσαιμι φέρεσθαι. |
| 152 | Primary ὣς εἰπὼν ἐν χερσὶ κόμην ἑτάροιο φίλοιο |
| 153 | Primary θῆκεν, τοῖσι δὲ πᾶσιν ὑφʼ ἵμερον ὦρσε γόοιο. |
| 154 | Primary καί νύ κʼ ὀδυρομένοισιν ἔδυ φάος ἠελίοιο |
| 155 | Primary εἰ μὴ Ἀχιλλεὺς αἶψʼ Ἀγαμέμνονι εἶπε παραστάς· |
| 156 | Primary Ἀτρεΐδη, σοὶ γάρ τε μάλιστά γε λαὸς Ἀχαιῶν |
| 157 | Primary πείσονται μύθοισι, γόοιο μὲν ἔστι καὶ ἆσαι, |
| 158 | Primary νῦν δʼ ἀπὸ πυρκαϊῆς σκέδασον καὶ δεῖπνον ἄνωχθι |
| 159 | Primary ὅπλεσθαι· τάδε δʼ ἀμφὶ πονησόμεθʼ οἷσι μάλιστα |
| 160 | Primary κήδεός ἐστι νέκυς· παρὰ δʼ οἵ τʼ ἀγοὶ ἄμμι μενόντων. |
| 161 | Primary αὐτὰρ ἐπεὶ τό γʼ ἄκουσεν ἄναξ ἀνδρῶν Ἀγαμέμνων, |
| 162 | Primary αὐτίκα λαὸν μὲν σκέδασεν κατὰ νῆας ἐΐσας, |
| 163 | Primary κηδεμόνες δὲ παρʼ αὖθι μένον καὶ νήεον ὕλην, |
| 164 | Primary ποίησαν δὲ πυρὴν ἑκατόμπεδον ἔνθα καὶ ἔνθα, |
| 165 | Primary ἐν δὲ πυρῇ ὑπάτῃ νεκρὸν θέσαν ἀχνύμενοι κῆρ. |
| 166 | Primary πολλὰ δὲ ἴφια μῆλα καὶ εἰλίποδας ἕλικας βοῦς |
| 167 | Primary πρόσθε πυρῆς ἔδερόν τε καὶ ἄμφεπον· ἐκ δʼ ἄρα πάντων |
| 168 | Primary δημὸν ἑλὼν ἐκάλυψε νέκυν μεγάθυμος Ἀχιλλεὺς |
| 169 | Primary ἐς πόδας ἐκ κεφαλῆς, περὶ δὲ δρατὰ σώματα νήει. |
| 170 | Primary ἐν δʼ ἐτίθει μέλιτος καὶ ἀλείφατος ἀμφιφορῆας |
| 171 | Primary πρὸς λέχεα κλίνων· πίσυρας δʼ ἐριαύχενας ἵππους |
| 172 | Primary ἐσσυμένως ἐνέβαλλε πυρῇ μεγάλα στεναχίζων. |
| 173 | Primary ἐννέα τῷ γε ἄνακτι τραπεζῆες κύνες ἦσαν, |
| 174 | Primary καὶ μὲν τῶν ἐνέβαλλε πυρῇ δύο δειροτομήσας, |
| 175 | Primary δώδεκα δὲ Τρώων μεγαθύμων υἱέας ἐσθλοὺς |
| 176 | Primary χαλκῷ δηϊόων· κακὰ δὲ φρεσὶ μήδετο ἔργα· |
| 177 | Primary ἐν δὲ πυρὸς μένος ἧκε σιδήρεον ὄφρα νέμοιτο. |
| 178 | Primary ᾤμωξέν τʼ ἄρʼ ἔπειτα, φίλον δʼ ὀνόμηνεν ἑταῖρον· |
| 179 | Primary χαῖρέ μοι ὦ Πάτροκλε καὶ εἰν Ἀΐδαο δόμοισι· |
| 180 | Primary πάντα γὰρ ἤδη τοι τελέω τὰ πάροιθεν ὑπέστην, |
| 181 | Primary δώδεκα μὲν Τρώων μεγαθύμων υἱέας ἐσθλοὺς |
| 182 | Primary τοὺς ἅμα σοὶ πάντας πῦρ ἐσθίει· Ἕκτορα δʼ οὔ τι |
| 183 | Primary δώσω Πριαμίδην πυρὶ δαπτέμεν, ἀλλὰ κύνεσσιν. |
| 184 | Primary ὣς φάτʼ ἀπειλήσας· τὸν δʼ οὐ κύνες ἀμφεπένοντο, |
| 185 | Primary ἀλλὰ κύνας μὲν ἄλαλκε Διὸς θυγάτηρ Ἀφροδίτη |
| 186 | Primary ἤματα καὶ νύκτας, ῥοδόεντι δὲ χρῖεν ἐλαίῳ |
| 187 | Primary ἀμβροσίῳ, ἵνα μή μιν ἀποδρύφοι ἑλκυστάζων. |
| 188 | Primary τῷ δʼ ἐπὶ κυάνεον νέφος ἤγαγε Φοῖβος Ἀπόλλων |
| 189 | Primary οὐρανόθεν πεδίον δέ, κάλυψε δὲ χῶρον ἅπαντα |
| 190 | Primary ὅσσον ἐπεῖχε νέκυς, μὴ πρὶν μένος ἠελίοιο |
| 191 | Primary σκήλειʼ ἀμφὶ περὶ χρόα ἴνεσιν ἠδὲ μέλεσσιν. |
| 192 | Primary οὐδὲ πυρὴ Πατρόκλου ἐκαίετο τεθνηῶτος· |
| 193 | Primary ἔνθʼ αὖτʼ ἀλλʼ ἐνόησε ποδάρκης δῖος Ἀχιλλεύς· |
| 194 | Primary στὰς ἀπάνευθε πυρῆς δοιοῖς ἠρᾶτʼ ἀνέμοισι |
| 195 | Primary Βορέῃ καὶ Ζεφύρῳ, καὶ ὑπίσχετο ἱερὰ καλά· |
| 196 | Primary πολλὰ δὲ καὶ σπένδων χρυσέῳ δέπαϊ λιτάνευεν |
| 197 | Primary ἐλθέμεν, ὄφρα τάχιστα πυρὶ φλεγεθοίατο νεκροί, |
| 198 | Primary ὕλη τε σεύαιτο καήμεναι. ὦκα δὲ Ἶρις |
| 199 | Primary ἀράων ἀΐουσα μετάγγελος ἦλθʼ ἀνέμοισιν. |
| 200 | Primary οἳ μὲν ἄρα Ζεφύροιο δυσαέος ἀθρόοι ἔνδον |
| 201 | Primary εἰλαπίνην δαίνυντο· θέουσα δὲ Ἶρις ἐπέστη |
| 202 | Primary βηλῷ ἔπι λιθέῳ· τοὶ δʼ ὡς ἴδον ὀφθαλμοῖσι |
| 203 | Primary πάντες ἀνήϊξαν, κάλεόν τέ μιν εἰς ἓ ἕκαστος· |
| 204 | Primary ἣ δʼ αὖθʼ ἕζεσθαι μὲν ἀνήνατο, εἶπε δὲ μῦθον· |
| 205 | Primary οὐχ ἕδος· εἶμι γὰρ αὖτις ἐπʼ Ὠκεανοῖο ῥέεθρα |
| 206 | Primary Αἰθιόπων ἐς γαῖαν, ὅθι ῥέζουσʼ ἑκατόμβας |
| 207 | Primary ἀθανάτοις, ἵνα δὴ καὶ ἐγὼ μεταδαίσομαι ἱρῶν. |
| 208 | Primary ἀλλʼ Ἀχιλεὺς Βορέην ἠδὲ Ζέφυρον κελαδεινὸν |
| 209 | Primary ἐλθεῖν ἀρᾶται, καὶ ὑπίσχεται ἱερὰ καλά, |
| 210 | Primary ὄφρα πυρὴν ὄρσητε καήμεναι, ᾗ ἔνι κεῖται |
| 211 | Primary Πάτροκλος, τὸν πάντες ἀναστενάχουσιν Ἀχαιοί. |
| 212 | Primary ἣ μὲν ἄρʼ ὣς εἰποῦσʼ ἀπεβήσετο, τοὶ δʼ ὀρέοντο |
| 213 | Primary ἠχῇ θεσπεσίῃ νέφεα κλονέοντε πάροιθεν. |
| 214 | Primary αἶψα δὲ πόντον ἵκανον ἀήμεναι, ὦρτο δὲ κῦμα |
| 215 | Primary πνοιῇ ὕπο λιγυρῇ· Τροίην δʼ ἐρίβωλον ἱκέσθην, |
| 216 | Primary ἐν δὲ πυρῇ πεσέτην, μέγα δʼ ἴαχε θεσπιδαὲς πῦρ. |
| 217 | Primary παννύχιοι δʼ ἄρα τοί γε πυρῆς ἄμυδις φλόγʼ ἔβαλλον |
| 218 | Primary φυσῶντες λιγέως· ὃ δὲ πάννυχος ὠκὺς Ἀχιλλεὺς |
| 219 | Primary χρυσέου ἐκ κρητῆρος ἑλὼν δέπας ἀμφικύπελλον |
| 220 | Primary οἶνον ἀφυσσόμενος χαμάδις χέε, δεῦε δὲ γαῖαν |
| 221 | Primary ψυχὴν κικλήσκων Πατροκλῆος δειλοῖο. |
| 222 | Primary ὡς δὲ πατὴρ οὗ παιδὸς ὀδύρεται ὀστέα καίων |
| 223 | Primary νυμφίου, ὅς τε θανὼν δειλοὺς ἀκάχησε τοκῆας, |
| 224 | Primary ὣς Ἀχιλεὺς ἑτάροιο ὀδύρετο ὀστέα καίων, |
| 225 | Primary ἑρπύζων παρὰ πυρκαϊὴν ἁδινὰ στεναχίζων. |
| 226 | Primary ἦμος δʼ ἑωσφόρος εἶσι φόως ἐρέων ἐπὶ γαῖαν, |
| 227 | Primary ὅν τε μέτα κροκόπεπλος ὑπεὶρ ἅλα κίδναται ἠώς, |
| 228 | Primary τῆμος πυρκαϊὴ ἐμαραίνετο, παύσατο δὲ φλόξ. |
| 229 | Primary οἳ δʼ ἄνεμοι πάλιν αὖτις ἔβαν οἶκον δὲ νέεσθαι |
| 230 | Primary Θρηΐκιον κατὰ πόντον· ὃ δʼ ἔστενεν οἴδματι θύων. |
| 231 | Primary Πηλεΐδης δʼ ἀπὸ πυρκαϊῆς ἑτέρωσε λιασθεὶς |
| 232 | Primary κλίνθη κεκμηώς, ἐπὶ δὲ γλυκὺς ὕπνος ὄρουσεν· |
| 233 | Primary οἳ δʼ ἀμφʼ Ἀτρεΐωνα ἀολλέες ἠγερέθοντο· |
| 234 | Primary τῶν μιν ἐπερχομένων ὅμαδος καὶ δοῦπος ἔγειρεν, |
| 235 | Primary ἕζετο δʼ ὀρθωθεὶς καί σφεας πρὸς μῦθον ἔειπεν· |
| 236 | Primary Ἀτρεΐδη τε καὶ ἄλλοι ἀριστῆες Παναχαιῶν, |
| 237 | Primary πρῶτον μὲν κατὰ πυρκαϊὴν σβέσατʼ αἴθοπι οἴνῳ |
| 238 | Primary πᾶσαν, ὁπόσσον ἐπέσχε πυρὸς μένος· αὐτὰρ ἔπειτα |
| 239 | Primary ὀστέα Πατρόκλοιο Μενοιτιάδαο λέγωμεν |
| 240 | Primary εὖ διαγιγνώσκοντες· ἀριφραδέα δὲ τέτυκται· |
| 241 | Primary ἐν μέσσῃ γὰρ ἔκειτο πυρῇ, τοὶ δʼ ἄλλοι ἄνευθεν |
| 242 | Primary ἐσχατιῇ καίοντʼ ἐπιμὶξ ἵπποι τε καὶ ἄνδρες. |
| 243 | Primary καὶ τὰ μὲν ἐν χρυσέῃ φιάλῃ καὶ δίπλακι δημῷ |
| 244 | Primary θείομεν, εἰς ὅ κεν αὐτὸς ἐγὼν Ἄϊδι κεύθωμαι. |
| 245 | Primary τύμβον δʼ οὐ μάλα πολλὸν ἐγὼ πονέεσθαι ἄνωγα, |
| 246 | Primary ἀλλʼ ἐπιεικέα τοῖον· ἔπειτα δὲ καὶ τὸν Ἀχαιοὶ |
| 247 | Primary εὐρύν θʼ ὑψηλόν τε τιθήμεναι, οἵ κεν ἐμεῖο |
| 248 | Primary δεύτεροι ἐν νήεσσι πολυκλήϊσι λίπησθε. |
| 249 | Primary ὣς ἔφαθʼ, οἳ δʼ ἐπίθοντο ποδώκεϊ Πηλεΐωνι. |
| 250 | Primary πρῶτον μὲν κατὰ πυρκαϊὴν σβέσαν αἴθοπι οἴνῳ |
| 251 | Primary ὅσσον ἐπὶ φλὸξ ἦλθε, βαθεῖα δὲ κάππεσε τέφρη· |
| 252 | Primary κλαίοντες δʼ ἑτάροιο ἐνηέος ὀστέα λευκὰ |
| 253 | Primary ἄλλεγον ἐς χρυσέην φιάλην καὶ δίπλακα δημόν, |
| 254 | Primary ἐν κλισίῃσι δὲ θέντες ἑανῷ λιτὶ κάλυψαν· |
| 255 | Primary τορνώσαντο δὲ σῆμα θεμείλιά τε προβάλοντο |
| 256 | Primary ἀμφὶ πυρήν· εἶθαρ δὲ χυτὴν ἐπὶ γαῖαν ἔχευαν, |
| 257 | Primary χεύαντες δὲ τὸ σῆμα πάλιν κίον. αὐτὰρ Ἀχιλλεὺς |
| 258 | Primary αὐτοῦ λαὸν ἔρυκε καὶ ἵζανεν εὐρὺν ἀγῶνα, |
| 259 | Primary νηῶν δʼ ἔκφερʼ ἄεθλα λέβητάς τε τρίποδάς τε |
| 260 | Primary ἵππους θʼ ἡμιόνους τε βοῶν τʼ ἴφθιμα κάρηνα, |
| 261 | Primary ἠδὲ γυναῖκας ἐϋζώνους πολιόν τε σίδηρον. |
| 262 | Primary ἱππεῦσιν μὲν πρῶτα ποδώκεσιν ἀγλάʼ ἄεθλα |
| 263 | Primary θῆκε γυναῖκα ἄγεσθαι ἀμύμονα ἔργα ἰδυῖαν |
| 264 | Primary καὶ τρίποδʼ ὠτώεντα δυωκαιεικοσίμετρον |
| 265 | Primary τῷ πρώτῳ· ἀτὰρ αὖ τῷ δευτέρῳ ἵππον ἔθηκεν |
| 266 | Primary ἑξέτεʼ ἀδμήτην βρέφος ἡμίονον κυέουσαν· |
| 267 | Primary αὐτὰρ τῷ τριτάτῳ ἄπυρον κατέθηκε λέβητα |
| 268 | Primary καλὸν τέσσαρα μέτρα κεχανδότα λευκὸν ἔτʼ αὔτως· |
| 269 | Primary τῷ δὲ τετάρτῳ θῆκε δύω χρυσοῖο τάλαντα, |
| 270 | Primary πέμπτῳ δʼ ἀμφίθετον φιάλην ἀπύρωτον ἔθηκε. |
| 271 | Primary στῆ δʼ ὀρθὸς καὶ μῦθον ἐν Ἀργείοισιν ἔειπεν· |
| 272 | Primary Ἀτρεΐδη τε καὶ ἄλλοι ἐϋκνήμιδες Ἀχαιοὶ |
| 273 | Primary ἱππῆας τάδʼ ἄεθλα δεδεγμένα κεῖτʼ ἐν ἀγῶνι. |
| 274 | Primary εἰ μὲν νῦν ἐπὶ ἄλλῳ ἀεθλεύοιμεν Ἀχαιοὶ |
| 275 | Primary ἦ τʼ ἂν ἐγὼ τὰ πρῶτα λαβὼν κλισίην δὲ φεροίμην. |
| 276 | Primary ἴστε γὰρ ὅσσον ἐμοὶ ἀρετῇ περιβάλλετον ἵπποι· |
| 277 | Primary ἀθάνατοί τε γάρ εἰσι, Ποσειδάων δὲ πόρʼ αὐτοὺς |
| 278 | Primary πατρὶ ἐμῷ Πηλῆϊ, ὃ δʼ αὖτʼ ἐμοὶ ἐγγυάλιξεν. |
| 279 | Primary ἀλλʼ ἤτοι μὲν ἐγὼ μενέω καὶ μώνυχες ἵπποι· |
| 280 | Primary τοίου γὰρ κλέος ἐσθλὸν ἀπώλεσαν ἡνιόχοιο |
| 281 | Primary ἠπίου, ὅς σφωϊν μάλα πολλάκις ὑγρὸν ἔλαιον |
| 282 | Primary χαιτάων κατέχευε λοέσσας ὕδατι λευκῷ. |
| 283 | Primary τὸν τώ γʼ ἑσταότες πενθείετον, οὔδεϊ δέ σφι |
| 284 | Primary χαῖται ἐρηρέδαται, τὼ δʼ ἕστατον ἀχνυμένω κῆρ. |
| 285 | Primary ἄλλοι δὲ στέλλεσθε κατὰ στρατόν, ὅς τις Ἀχαιῶν |
| 286 | Primary ἵπποισίν τε πέποιθε καὶ ἅρμασι κολλητοῖσιν. |
| 287 | Primary ὣς φάτο Πηλεΐδης, ταχέες δʼ ἱππῆες ἄγερθεν. |
| 288 | Primary ὦρτο πολὺ πρῶτος μὲν ἄναξ ἀνδρῶν Εὔμηλος |
| 289 | Primary Ἀδμήτου φίλος υἱός, ὃς ἱπποσύνῃ ἐκέκαστο· |
| 290 | Primary τῷ δʼ ἐπὶ Τυδεΐδης ὦρτο κρατερὸς Διομήδης, |
| 291 | Primary ἵππους δὲ Τρῳοὺς ὕπαγε ζυγόν, οὕς ποτʼ ἀπηύρα |
| 292 | Primary Αἰνείαν, ἀτὰρ αὐτὸν ὑπεξεσάωσεν Ἀπόλλων. |
| 293 | Primary τῷ δʼ ἄρʼ ἐπʼ Ἀτρεΐδης ὦρτο ξανθὸς Μενέλαος |
| 294 | Primary διογενής, ὑπὸ δὲ ζυγὸν ἤγαγεν ὠκέας ἵππους |
| 295 | Primary Αἴθην τὴν Ἀγαμεμνονέην τὸν ἑόν τε Πόδαργον· |
| 296 | Primary τὴν Ἀγαμέμνονι δῶκʼ Ἀγχισιάδης Ἐχέπωλος |
| 297 | Primary δῶρʼ, ἵνα μή οἱ ἕποιθʼ ὑπὸ Ἴλιον ἠνεμόεσσαν, |
| 298 | Primary ἀλλʼ αὐτοῦ τέρποιτο μένων· μέγα γάρ οἱ ἔδωκε |
| 299 | Primary Ζεὺς ἄφενος, ναῖεν δʼ ὅ γʼ ἐν εὐρυχόρῳ Σικυῶνι· |
| 300 | Primary τὴν ὅ γʼ ὑπὸ ζυγὸν ἦγε μέγα δρόμου ἰσχανόωσαν. |
| 301 | Primary Ἀντίλοχος δὲ τέταρτος ἐΰτριχας ὁπλίσαθʼ ἵππους, |
| 302 | Primary Νέστορος ἀγλαὸς υἱὸς ὑπερθύμοιο ἄνακτος |
| 303 | Primary τοῦ Νηληϊάδαο· Πυλοιγενέες δέ οἱ ἵπποι |
| 304 | Primary ὠκύποδες φέρον ἅρμα· πατὴρ δέ οἱ ἄγχι παραστὰς |
| 305 | Primary μυθεῖτʼ εἰς ἀγαθὰ φρονέων νοέοντι καὶ αὐτῷ· |
| 306 | Primary Ἀντίλοχʼ ἤτοι μέν σε νέον περ ἐόντʼ ἐφίλησαν |
| 307 | Primary Ζεύς τε Ποσειδάων τε, καὶ ἱπποσύνας ἐδίδαξαν |
| 308 | Primary παντοίας· τὼ καί σε διδασκέμεν οὔ τι μάλα χρεώ· |
| 309 | Primary οἶσθα γὰρ εὖ περὶ τέρμαθʼ ἑλισσέμεν· ἀλλά τοι ἵπποι |
| 310 | Primary βάρδιστοι θείειν· τώ τʼ οἴω λοίγιʼ ἔσεσθαι. |
| 311 | Primary τῶν δʼ ἵπποι μὲν ἔασιν ἀφάρτεροι, οὐδὲ μὲν αὐτοὶ |
| 312 | Primary πλείονα ἴσασιν σέθεν αὐτοῦ μητίσασθαι. |
| 313 | Primary ἀλλʼ ἄγε δὴ σὺ φίλος μῆτιν ἐμβάλλεο θυμῷ |
| 314 | Primary παντοίην, ἵνα μή σε παρεκπροφύγῃσιν ἄεθλα. |
| 315 | Primary μήτι τοι δρυτόμος μέγʼ ἀμείνων ἠὲ βίηφι· |
| 316 | Primary μήτι δʼ αὖτε κυβερνήτης ἐνὶ οἴνοπι πόντῳ |
| 317 | Primary νῆα θοὴν ἰθύνει ἐρεχθομένην ἀνέμοισι· |
| 318 | Primary μήτι δʼ ἡνίοχος περιγίγνεται ἡνιόχοιο. |
| 319 | Primary ἀλλʼ ὃς μέν θʼ ἵπποισι καὶ ἅρμασιν οἷσι πεποιθὼς |
| 320 | Primary ἀφραδέως ἐπὶ πολλὸν ἑλίσσεται ἔνθα καὶ ἔνθα, |
| 321 | Primary ἵπποι δὲ πλανόωνται ἀνὰ δρόμον, οὐδὲ κατίσχει· |
| 322 | Primary ὃς δέ κε κέρδεα εἰδῇ ἐλαύνων ἥσσονας ἵππους, |
| 323 | Primary αἰεὶ τέρμʼ ὁρόων στρέφει ἐγγύθεν, οὐδέ ἑ λήθει |
| 324 | Primary ὅππως τὸ πρῶτον τανύσῃ βοέοισιν ἱμᾶσιν, |
| 325 | Primary ἀλλʼ ἔχει ἀσφαλέως καὶ τὸν προὔχοντα δοκεύει. |
| 326 | Primary σῆμα δέ τοι ἐρέω μάλʼ ἀριφραδές, οὐδέ σε λήσει. |
| 327 | Primary ἕστηκε ξύλον αὖον ὅσον τʼ ὄργυιʼ ὑπὲρ αἴης |
| 328 | Primary ἢ δρυὸς ἢ πεύκης· τὸ μὲν οὐ καταπύθεται ὄμβρῳ, |
| 329 | Primary λᾶε δὲ τοῦ ἑκάτερθεν ἐρηρέδαται δύο λευκὼ |
| 330 | Primary ἐν ξυνοχῇσιν ὁδοῦ, λεῖος δʼ ἱππόδρομος ἀμφὶς |
| 331 | Primary ἤ τευ σῆμα βροτοῖο πάλαι κατατεθνηῶτος, |
| 332 | Primary ἢ τό γε νύσσα τέτυκτο ἐπὶ προτέρων ἀνθρώπων, |
| 333 | Primary καὶ νῦν τέρματʼ ἔθηκε ποδάρκης δῖος Ἀχιλλεύς. |
| 334 | Primary τῷ σὺ μάλʼ ἐγχρίμψας ἐλάαν σχεδὸν ἅρμα καὶ ἵππους, |
| 335 | Primary αὐτὸς δὲ κλινθῆναι ἐϋπλέκτῳ ἐνὶ δίφρῳ |
| 336 | Primary ἦκʼ ἐπʼ ἀριστερὰ τοῖιν· ἀτὰρ τὸν δεξιὸν ἵππον |
| 337 | Primary κένσαι ὁμοκλήσας, εἶξαί τέ οἱ ἡνία χερσίν. |
| 338 | Primary ἐν νύσσῃ δέ τοι ἵππος ἀριστερὸς ἐγχριμφθήτω, |
| 339 | Primary ὡς ἄν τοι πλήμνη γε δοάσσεται ἄκρον ἱκέσθαι |
| 340 | Primary κύκλου ποιητοῖο· λίθου δʼ ἀλέασθαι ἐπαυρεῖν, |
| 341 | Primary μή πως ἵππους τε τρώσῃς κατά θʼ ἅρματα ἄξῃς· |
| 342 | Primary χάρμα δὲ τοῖς ἄλλοισιν, ἐλεγχείη δὲ σοὶ αὐτῷ |
| 343 | Primary ἔσσεται· ἀλλὰ φίλος φρονέων πεφυλαγμένος εἶναι. |
| 344 | Primary εἰ γάρ κʼ ἐν νύσσῃ γε παρεξελάσῃσθα διώκων, |
| 345 | Primary οὐκ ἔσθʼ ὅς κέ σʼ ἕλῃσι μετάλμενος οὐδὲ παρέλθῃ, |
| 346 | Primary οὐδʼ εἴ κεν μετόπισθεν Ἀρίονα δῖον ἐλαύνοι |
| 347 | Primary Ἀδρήστου ταχὺν ἵππον, ὃς ἐκ θεόφιν γένος ἦεν, |
| 348 | Primary ἢ τοὺς Λαομέδοντος, οἳ ἐνθάδε γʼ ἔτραφεν ἐσθλοί. |
| 349 | Primary ὣς εἰπὼν Νέστωρ Νηλήϊος ἂψ ἐνὶ χώρῃ |
| 350 | Primary ἕζετʼ, ἐπεὶ ᾧ παιδὶ ἑκάστου πείρατʼ ἔειπε. |
| 351 | Primary Μηριόνης δʼ ἄρα πέμπτος ἐΰτριχας ὁπλίσαθʼ ἵππους. |
| 352 | Primary ἂν δʼ ἔβαν ἐς δίφρους, ἐν δὲ κλήρους ἐβάλοντο· |
| 353 | Primary πάλλʼ Ἀχιλεύς, ἐκ δὲ κλῆρος θόρε Νεστορίδαο |
| 354 | Primary Ἀντιλόχου· μετὰ τὸν δʼ ἔλαχε κρείων Εὔμηλος· |
| 355 | Primary τῷ δʼ ἄρʼ ἐπʼ Ἀτρεΐδης δουρὶ κλειτὸς Μενέλαος, |
| 356 | Primary τῷ δʼ ἐπὶ Μηριόνης λάχʼ ἐλαυνέμεν· ὕστατος αὖτε |
| 357 | Primary Τυδεΐδης ὄχʼ ἄριστος ἐὼν λάχʼ ἐλαυνέμεν ἵππους. |
| 358 | Primary στὰν δὲ μεταστοιχί, σήμηνε δὲ τέρματʼ Ἀχιλλεὺς |
| 359 | Primary τηλόθεν ἐν λείῳ πεδίῳ· παρὰ δὲ σκοπὸν εἷσεν |
| 360 | Primary ἀντίθεον Φοίνικα ὀπάονα πατρὸς ἑοῖο, |
| 361 | Primary ὡς μεμνέῳτο δρόμους καὶ ἀληθείην ἀποείποι. |
| 362 | Primary οἳ δʼ ἅμα πάντες ἐφʼ ἵπποιιν μάστιγας ἄειραν, |
| 363 | Primary πέπληγόν θʼ ἱμᾶσιν, ὁμόκλησάν τʼ ἐπέεσσιν |
| 364 | Primary ἐσσυμένως· οἳ δʼ ὦκα διέπρησσον πεδίοιο |
| 365 | Primary νόσφι νεῶν ταχέως· ὑπὸ δὲ στέρνοισι κονίη |
| 366 | Primary ἵστατʼ ἀειρομένη ὥς τε νέφος ἠὲ θύελλα, |
| 367 | Primary χαῖται δʼ ἐρρώοντο μετὰ πνοιῇς ἀνέμοιο. |
| 368 | Primary ἅρματα δʼ ἄλλοτε μὲν χθονὶ πίλνατο πουλυβοτείρῃ, |
| 369 | Primary ἄλλοτε δʼ ἀΐξασκε μετήορα· τοὶ δʼ ἐλατῆρες |
| 370 | Primary ἕστασαν ἐν δίφροισι, πάτασσε δὲ θυμὸς ἑκάστου |
| 371 | Primary νίκης ἱεμένων· κέκλοντο δὲ οἷσιν ἕκαστος |
| 372 | Primary ἵπποις, οἳ δʼ ἐπέτοντο κονίοντες πεδίοιο. |
| 373 | Primary ἀλλʼ ὅτε δὴ πύματον τέλεον δρόμον ὠκέες ἵπποι |
| 374 | Primary ἂψ ἐφʼ ἁλὸς πολιῆς, τότε δὴ ἀρετή γε ἑκάστου |
| 375 | Primary φαίνετʼ, ἄφαρ δʼ ἵπποισι τάθη δρόμος· ὦκα δʼ ἔπειτα |
| 376 | Primary αἳ Φηρητιάδαο ποδώκεες ἔκφερον ἵπποι. |
| 377 | Primary τὰς δὲ μετʼ ἐξέφερον Διομήδεος ἄρσενες ἵπποι |
| 378 | Primary Τρώϊοι, οὐδέ τι πολλὸν ἄνευθʼ ἔσαν, ἀλλὰ μάλʼ ἐγγύς· |
| 379 | Primary αἰεὶ γὰρ δίφρου ἐπιβησομένοισιν ἐΐκτην, |
| 380 | Primary πνοιῇ δʼ Εὐμήλοιο μετάφρενον εὐρέε τʼ ὤμω |
| 381 | Primary θέρμετʼ· ἐπʼ αὐτῷ γὰρ κεφαλὰς καταθέντε πετέσθην. |
| 382 | Primary καί νύ κεν ἢ παρέλασσʼ ἢ ἀμφήριστον ἔθηκεν, |
| 383 | Primary εἰ μὴ Τυδέος υἷϊ κοτέσσατο Φοῖβος Ἀπόλλων, |
| 384 | Primary ὅς ῥά οἱ ἐκ χειρῶν ἔβαλεν μάστιγα φαεινήν. |
| 385 | Primary τοῖο δʼ ἀπʼ ὀφθαλμῶν χύτο δάκρυα χωομένοιο, |
| 386 | Primary οὕνεκα τὰς μὲν ὅρα ἔτι καὶ πολὺ μᾶλλον ἰούσας, |
| 387 | Primary οἳ δέ οἱ ἐβλάφθησαν ἄνευ κέντροιο θέοντες. |
| 388 | Primary οὐδʼ ἄρʼ Ἀθηναίην ἐλεφηράμενος λάθʼ Ἀπόλλων |
| 389 | Primary Τυδεΐδην, μάλα δʼ ὦκα μετέσσυτο ποιμένα λαῶν, |
| 390 | Primary δῶκε δέ οἱ μάστιγα, μένος δʼ ἵπποισιν ἐνῆκεν· |
| 391 | Primary ἣ δὲ μετʼ Ἀδμήτου υἱὸν κοτέουσʼ ἐβεβήκει, |
| 392 | Primary ἵππειον δέ οἱ ἦξε θεὰ ζυγόν· αἳ δέ οἱ ἵπποι |
| 393 | Primary ἀμφὶς ὁδοῦ δραμέτην, ῥυμὸς δʼ ἐπὶ γαῖαν ἐλύσθη. |
| 394 | Primary αὐτὸς δʼ ἐκ δίφροιο παρὰ τροχὸν ἐξεκυλίσθη, |
| 395 | Primary ἀγκῶνάς τε περιδρύφθη στόμα τε ῥῖνάς τε, |
| 396 | Primary θρυλίχθη δὲ μέτωπον ἐπʼ ὀφρύσι· τὼ δέ οἱ ὄσσε |
| 397 | Primary δακρυόφι πλῆσθεν, θαλερὴ δέ οἱ ἔσχετο φωνή. |
| 398 | Primary Τυδεΐδης δὲ παρατρέψας ἔχε μώνυχας ἵππους, |
| 399 | Primary πολλὸν τῶν ἄλλων ἐξάλμενος· ἐν γὰρ Ἀθήνη |
| 400 | Primary ἵπποις ἧκε μένος καὶ ἐπʼ αὐτῷ κῦδος ἔθηκε. |
| 401 | Primary τῷ δʼ ἄρʼ ἐπʼ Ἀτρεΐδης εἶχε ξανθὸς Μενέλαος. |
| 402 | Primary Ἀντίλοχος δʼ ἵπποισιν ἐκέκλετο πατρὸς ἑοῖο· |
| 403 | Primary ἔμβητον καὶ σφῶϊ· τιταίνετον ὅττι τάχιστα. |
| 404 | Primary ἤτοι μὲν κείνοισιν ἐριζέμεν οὔ τι κελεύω |
| 405 | Primary Τυδεΐδεω ἵπποισι δαΐφρονος, οἷσιν Ἀθήνη |
| 406 | Primary νῦν ὤρεξε τάχος καὶ ἐπʼ αὐτῷ κῦδος ἔθηκεν· |
| 407 | Primary ἵππους δʼ Ἀτρεΐδαο κιχάνετε, μὴ δὲ λίπησθον, |
| 408 | Primary καρπαλίμως, μὴ σφῶϊν ἐλεγχείην καταχεύῃ |
| 409 | Primary Αἴθη θῆλυς ἐοῦσα· τί ἢ λείπεσθε φέριστοι; |
| 410 | Primary ὧδε γὰρ ἐξερέω, καὶ μὴν τετελεσμένον ἔσται· |
| 411 | Primary οὐ σφῶϊν κομιδὴ παρὰ Νέστορι ποιμένι λαῶν |
| 412 | Primary ἔσσεται, αὐτίκα δʼ ὔμμε κατακτενεῖ ὀξέϊ χαλκῷ, |
| 413 | Primary αἴ κʼ ἀποκηδήσαντε φερώμεθα χεῖρον ἄεθλον. |
| 414 | Primary ἀλλʼ ἐφομαρτεῖτον καὶ σπεύδετον ὅττι τάχιστα· |
| 415 | Primary ταῦτα δʼ ἐγὼν αὐτὸς τεχνήσομαι ἠδὲ νοήσω |
| 416 | Primary στεινωπῷ ἐν ὁδῷ παραδύμεναι, οὐδέ με λήσει. |
| 417 | Primary ὣς ἔφαθʼ, οἳ δὲ ἄνακτος ὑποδείσαντες ὁμοκλὴν |
| 418 | Primary μᾶλλον ἐπιδραμέτην ὀλίγον χρόνον· αἶψα δʼ ἔπειτα |
| 419 | Primary στεῖνος ὁδοῦ κοίλης ἴδεν Ἀντίλοχος μενεχάρμης. |
| 420 | Primary ῥωχμὸς ἔην γαίης, ᾗ χειμέριον ἀλὲν ὕδωρ |
| 421 | Primary ἐξέρρηξεν ὁδοῖο, βάθυνε δὲ χῶρον ἅπαντα· |
| 422 | Primary τῇ ῥʼ εἶχεν Μενέλαος ἁματροχιὰς ἀλεείνων. |
| 423 | Primary Ἀντίλοχος δὲ παρατρέψας ἔχε μώνυχας ἵππους |
| 424 | Primary ἐκτὸς ὁδοῦ, ὀλίγον δὲ παρακλίνας ἐδίωκεν. |
| 425 | Primary Ἀτρεΐδης δʼ ἔδεισε καὶ Ἀντιλόχῳ ἐγεγώνει· |
| 426 | Primary Ἀντίλοχʼ ἀφραδέως ἱππάζεαι, ἀλλʼ ἄνεχʼ ἵππους· |
| 427 | Primary στεινωπὸς γὰρ ὁδός, τάχα δʼ εὐρυτέρη παρελάσσαι· |
| 428 | Primary μή πως ἀμφοτέρους δηλήσεαι ἅρματι κύρσας. |
| 429 | Primary ὣς ἔφατʼ, Ἀντίλοχος δʼ ἔτι καὶ πολὺ μᾶλλον ἔλαυνε |
| 430 | Primary κέντρῳ ἐπισπέρχων ὡς οὐκ ἀΐοντι ἐοικώς. |
| 431 | Primary ὅσσα δὲ δίσκου οὖρα κατωμαδίοιο πέλονται, |
| 432 | Primary ὅν τʼ αἰζηὸς ἀφῆκεν ἀνὴρ πειρώμενος ἥβης, |
| 433 | Primary τόσσον ἐπιδραμέτην· αἳ δʼ ἠρώησαν ὀπίσσω |
| 434 | Primary Ἀτρεΐδεω· αὐτὸς γὰρ ἑκὼν μεθέηκεν ἐλαύνειν |
| 435 | Primary μή πως συγκύρσειαν ὁδῷ ἔνι μώνυχες ἵπποι, |
| 436 | Primary δίφρους τʼ ἀνστρέψειαν ἐϋπλεκέας, κατὰ δʼ αὐτοὶ |
| 437 | Primary ἐν κονίῃσι πέσοιεν ἐπειγόμενοι περὶ νίκης. |
| 438 | Primary τὸν καὶ νεικείων προσέφη ξανθὸς Μενέλαος· |
| 439 | Primary Ἀντίλοχʼ οὔ τις σεῖο βροτῶν ὀλοώτερος ἄλλος· |
| 440 | Primary ἔρρʼ, ἐπεὶ οὔ σʼ ἔτυμόν γε φάμεν πεπνῦσθαι Ἀχαιοί. |
| 441 | Primary ἀλλʼ οὐ μὰν οὐδʼ ὧς ἄτερ ὅρκου οἴσῃ ἄεθλον. |
| 442 | Primary ὣς εἰπὼν ἵπποισιν ἐκέκλετο φώνησέν τε· |
| 443 | Primary μή μοι ἐρύκεσθον μὴ δʼ ἕστατον ἀχνυμένω κῆρ. |
| 444 | Primary φθήσονται τούτοισι πόδες καὶ γοῦνα καμόντα |
| 445 | Primary ἢ ὑμῖν· ἄμφω γὰρ ἀτέμβονται νεότητος. |
| 446 | Primary ὣς ἔφαθʼ, οἳ δὲ ἄνακτος ὑποδείσαντες ὁμοκλὴν |
| 447 | Primary μᾶλλον ἐπιδραμέτην, τάχα δέ σφισιν ἄγχι γένοντο. |
| 448 | Primary Ἀργεῖοι δʼ ἐν ἀγῶνι καθήμενοι εἰσορόωντο |
| 449 | Primary ἵππους· τοὶ δὲ πέτοντο κονίοντες πεδίοιο. |
| 450 | Primary πρῶτος δʼ Ἰδομενεὺς Κρητῶν ἀγὸς ἐφράσαθʼ ἵππους· |
| 451 | Primary ἧστο γὰρ ἐκτὸς ἀγῶνος ὑπέρτατος ἐν περιωπῇ· |
| 452 | Primary τοῖο δʼ ἄνευθεν ἐόντος ὁμοκλητῆρος ἀκούσας |
| 453 | Primary ἔγνω, φράσσατο δʼ ἵππον ἀριπρεπέα προὔχοντα, |
| 454 | Primary ὃς τὸ μὲν ἄλλο τόσον φοῖνιξ ἦν, ἐν δὲ μετώπῳ |
| 455 | Primary λευκὸν σῆμα τέτυκτο περίτροχον ἠΰτε μήνη. |
| 456 | Primary στῆ δʼ ὀρθὸς καὶ μῦθον ἐν Ἀργείοισιν ἔειπεν· |
| 457 | Primary ὦ φίλοι Ἀργείων ἡγήτορες ἠδὲ μέδοντες |
| 458 | Primary οἶος ἐγὼν ἵππους αὐγάζομαι ἦε καὶ ὑμεῖς; |
| 459 | Primary ἄλλοι μοι δοκέουσι παροίτεροι ἔμμεναι ἵπποι, |
| 460 | Primary ἄλλος δʼ ἡνίοχος ἰνδάλλεται· αἳ δέ που αὐτοῦ |
| 461 | Primary ἔβλαβεν ἐν πεδίῳ, αἳ κεῖσέ γε φέρτεραι ἦσαν· |
| 462 | Primary ἤτοι γὰρ τὰς πρῶτα ἴδον περὶ τέρμα βαλούσας, |
| 463 | Primary νῦν δʼ οὔ πῃ δύναμαι ἰδέειν· πάντῃ δέ μοι ὄσσε |
| 464 | Primary Τρωϊκὸν ἂμ πεδίον παπταίνετον εἰσορόωντι· |
| 465 | Primary ἦε τὸν ἡνίοχον φύγον ἡνία, οὐδὲ δυνάσθη |
| 466 | Primary εὖ σχεθέειν περὶ τέρμα καὶ οὐκ ἐτύχησεν ἑλίξας· |
| 467 | Primary ἔνθά μιν ἐκπεσέειν ὀΐω σύν θʼ ἅρματα ἆξαι, |
| 468 | Primary αἳ δʼ ἐξηρώησαν, ἐπεὶ μένος ἔλλαβε θυμόν. |
| 469 | Primary ἀλλὰ ἴδεσθε καὶ ὔμμες ἀνασταδόν· οὐ γὰρ ἔγωγε |
| 470 | Primary εὖ διαγιγνώσκω· δοκέει δέ μοι ἔμμεναι ἀνὴρ |
| 471 | Primary Αἰτωλὸς γενεήν, μετὰ δʼ Ἀργείοισιν ἀνάσσει |
| 472 | Primary Τυδέος ἱπποδάμου υἱὸς κρατερὸς Διομήδης. |
| 473 | Primary τὸν δʼ αἰσχρῶς ἐνένιπεν Ὀϊλῆος ταχὺς Αἴας· |
| 474 | Primary Ἰδομενεῦ τί πάρος λαβρεύεαι; αἳ δέ τʼ ἄνευθεν |
| 475 | Primary ἵπποι ἀερσίποδες πολέος πεδίοιο δίενται. |
| 476 | Primary οὔτε νεώτατός ἐσσι μετʼ Ἀργείοισι τοσοῦτον, |
| 477 | Primary οὔτέ τοι ὀξύτατον κεφαλῆς ἐκδέρκεται ὄσσε· |
| 478 | Primary ἀλλʼ αἰεὶ μύθοις λαβρεύεαι· οὐδέ τί σε χρὴ |
| 479 | Primary λαβραγόρην ἔμεναι· πάρα γὰρ καὶ ἀμείνονες ἄλλοι. |
| 480 | Primary ἵπποι δʼ αὐταὶ ἔασι παροίτεραι, αἳ τὸ πάρος περ, |
| 481 | Primary Εὐμήλου, ἐν δʼ αὐτὸς ἔχων εὔληρα βέβηκε. |
| 482 | Primary τὸν δὲ χολωσάμενος Κρητῶν ἀγὸς ἀντίον ηὔδα· |
| 483 | Primary Αἶαν νεῖκος ἄριστε κακοφραδὲς ἄλλά τε πάντα |
| 484 | Primary δεύεαι Ἀργείων, ὅτι τοι νόος ἐστὶν ἀπηνής. |
| 485 | Primary δεῦρό νυν ἢ τρίποδος περιδώμεθον ἠὲ λέβητος, |
| 486 | Primary ἴστορα δʼ Ἀτρεΐδην Ἀγαμέμνονα θείομεν ἄμφω, |
| 487 | Primary ὁππότεραι πρόσθʼ ἵπποι, ἵνα γνώῃς ἀποτίνων. |
| 488 | Primary ὣς ἔφατʼ, ὄρνυτο δʼ αὐτίκʼ Ὀϊλῆος ταχὺς Αἴας |
| 489 | Primary χωόμενος χαλεποῖσιν ἀμείψασθαι ἐπέεσσι· |
| 490 | Primary καί νύ κε δὴ προτέρω ἔτʼ ἔρις γένετʼ ἀμφοτέροισιν, |
| 491 | Primary εἰ μὴ Ἀχιλλεὺς αὐτὸς ἀνίστατο καὶ φάτο μῦθον· |
| 492 | Primary μηκέτι νῦν χαλεποῖσιν ἀμείβεσθον ἐπέεσσιν |
| 493 | Primary Αἶαν Ἰδομενεῦ τε κακοῖς, ἐπεὶ οὐδὲ ἔοικε. |
| 494 | Primary καὶ δʼ ἄλλῳ νεμεσᾶτον ὅτις τοιαῦτά γε ῥέζοι. |
| 495 | Primary ἀλλʼ ὑμεῖς ἐν ἀγῶνι καθήμενοι εἰσοράασθε |
| 496 | Primary ἵππους· οἳ δὲ τάχʼ αὐτοὶ ἐπειγόμενοι περὶ νίκης |
| 497 | Primary ἐνθάδʼ ἐλεύσονται· τότε δὲ γνώσεσθε ἕκαστος |
| 498 | Primary ἵππους Ἀργείων, οἳ δεύτεροι οἵ τε πάροιθεν. |
| 499 | Primary ὣς φάτο, Τυδεΐδης δὲ μάλα σχεδὸν ἦλθε διώκων, |
| 500 | Primary μάστι δʼ αἰὲν ἔλαυνε κατωμαδόν· οἳ δέ οἱ ἵπποι |
| 501 | Primary ὑψόσʼ ἀειρέσθην ῥίμφα πρήσσοντε κέλευθον. |
| 502 | Primary αἰεὶ δʼ ἡνίοχον κονίης ῥαθάμιγγες ἔβαλλον, |
| 503 | Primary ἅρματα δὲ χρυσῷ πεπυκασμένα κασσιτέρῳ τε |
| 504 | Primary ἵπποις ὠκυπόδεσσιν ἐπέτρεχον· οὐδέ τι πολλὴ |
| 505 | Primary γίγνετʼ ἐπισσώτρων ἁρματροχιὴ κατόπισθεν |
| 506 | Primary ἐν λεπτῇ κονίῃ· τὼ δὲ σπεύδοντε πετέσθην. |
| 507 | Primary στῆ δὲ μέσῳ ἐν ἀγῶνι, πολὺς δʼ ἀνεκήκιεν ἱδρὼς |
| 508 | Primary ἵππων ἔκ τε λόφων καὶ ἀπὸ στέρνοιο χαμᾶζε. |
| 509 | Primary αὐτὸς δʼ ἐκ δίφροιο χαμαὶ θόρε παμφανόωντος, |
| 510 | Primary κλῖνε δʼ ἄρα μάστιγα ποτὶ ζυγόν· οὐδὲ μάτησεν |
| 511 | Primary ἴφθιμος Σθένελος, ἀλλʼ ἐσσυμένως λάβʼ ἄεθλον, |
| 512 | Primary δῶκε δʼ ἄγειν ἑτάροισιν ὑπερθύμοισι γυναῖκα |
| 513 | Primary καὶ τρίποδʼ ὠτώεντα φέρειν· ὃ δʼ ἔλυεν ὑφʼ ἵππους. |
| 514 | Primary τῷ δʼ ἄρʼ ἐπʼ Ἀντίλοχος Νηλήϊος ἤλασεν ἵππους |
| 515 | Primary κέρδεσιν, οὔ τι τάχει γε, παραφθάμενος Μενέλαον· |
| 516 | Primary ἀλλὰ καὶ ὧς Μενέλαος ἔχʼ ἐγγύθεν ὠκέας ἵππους. |
| 517 | Primary ὅσσον δὲ τροχοῦ ἵππος ἀφίσταται, ὅς ῥα ἄνακτα |
| 518 | Primary ἕλκῃσιν πεδίοιο τιταινόμενος σὺν ὄχεσφι· |
| 519 | Primary τοῦ μέν τε ψαύουσιν ἐπισσώτρου τρίχες ἄκραι |
| 520 | Primary οὐραῖαι· ὃ δέ τʼ ἄγχι μάλα τρέχει, οὐδέ τι πολλὴ |
| 521 | Primary χώρη μεσσηγὺς πολέος πεδίοιο θέοντος· |
| 522 | Primary τόσσον δὴ Μενέλαος ἀμύμονος Ἀντιλόχοιο |
| 523 | Primary λείπετʼ· ἀτὰρ τὰ πρῶτα καὶ ἐς δίσκουρα λέλειπτο, |
| 524 | Primary ἀλλά μιν αἶψα κίχανεν· ὀφέλλετο γὰρ μένος ἠῢ |
| 525 | Primary ἵππου τῆς Ἀγαμεμνονέης καλλίτριχος Αἴθης· |
| 526 | Primary εἰ δέ κʼ ἔτι προτέρω γένετο δρόμος ἀμφοτέροισι, |
| 527 | Primary τώ κέν μιν παρέλασσʼ οὐδʼ ἀμφήριστον ἔθηκεν. |
| 528 | Primary αὐτὰρ Μηριόνης θεράπων ἐῢς Ἰδομενῆος |
| 529 | Primary λείπετʼ ἀγακλῆος Μενελάου δουρὸς ἐρωήν· |
| 530 | Primary βάρδιστοι μὲν γάρ οἱ ἔσαν καλλίτριχες ἵπποι, |
| 531 | Primary ἤκιστος δʼ ἦν αὐτὸς ἐλαυνέμεν ἅρμʼ ἐν ἀγῶνι. |
| 532 | Primary υἱὸς δʼ Ἀδμήτοιο πανύστατος ἤλυθεν ἄλλων |
| 533 | Primary ἕλκων ἅρματα καλὰ ἐλαύνων πρόσσοθεν ἵππους. |
| 534 | Primary τὸν δὲ ἰδὼν ᾤκτειρε ποδάρκης δῖος Ἀχιλλεύς, |
| 535 | Primary στὰς δʼ ἄρʼ ἐν Ἀργείοις ἔπεα πτερόεντʼ ἀγόρευε· |
| 536 | Primary λοῖσθος ἀνὴρ ὤριστος ἐλαύνει μώνυχας ἵππους· |
| 537 | Primary ἀλλʼ ἄγε δή οἱ δῶμεν ἀέθλιον ὡς ἐπιεικὲς |
| 538 | Primary δεύτερʼ· ἀτὰρ τὰ πρῶτα φερέσθω Τυδέος υἱός. |
| 539 | Primary ὣς ἔφαθʼ, οἳ δʼ ἄρα πάντες ἐπῄνεον ὡς ἐκέλευε. |
| 540 | Primary καί νύ κέ οἱ πόρεν ἵππον, ἐπῄνησαν γὰρ Ἀχαιοί, |
| 541 | Primary εἰ μὴ ἄρʼ Ἀντίλοχος μεγαθύμου Νέστορος υἱὸς |
| 542 | Primary Πηλεΐδην Ἀχιλῆα δίκῃ ἠμείψατʼ ἀναστάς· |
| 543 | Primary ὦ Ἀχιλεῦ μάλα τοι κεχολώσομαι αἴ κε τελέσσῃς |
| 544 | Primary τοῦτο ἔπος· μέλλεις γὰρ ἀφαιρήσεσθαι ἄεθλον |
| 545 | Primary τὰ φρονέων ὅτι οἱ βλάβεν ἅρματα καὶ ταχέʼ ἵππω |
| 546 | Primary αὐτός τʼ ἐσθλὸς ἐών· ἀλλʼ ὤφελεν ἀθανάτοισιν |
| 547 | Primary εὔχεσθαι· τό κεν οὔ τι πανύστατος ἦλθε διώκων. |
| 548 | Primary εἰ δέ μιν οἰκτίρεις καί τοι φίλος ἔπλετο θυμῷ |
| 549 | Primary ἔστί τοι ἐν κλισίῃ χρυσὸς πολύς, ἔστι δὲ χαλκὸς |
| 550 | Primary καὶ πρόβατʼ, εἰσὶ δέ τοι δμῳαὶ καὶ μώνυχες ἵπποι· |
| 551 | Primary τῶν οἱ ἔπειτʼ ἀνελὼν δόμεναι καὶ μεῖζον ἄεθλον |
| 552 | Primary ἠὲ καὶ αὐτίκα νῦν, ἵνα σʼ αἰνήσωσιν Ἀχαιοί. |
| 553 | Primary τὴν δʼ ἐγὼ οὐ δώσω· περὶ δʼ αὐτῆς πειρηθήτω |
| 554 | Primary ἀνδρῶν ὅς κʼ ἐθέλῃσιν ἐμοὶ χείρεσσι μάχεσθαι. |
| 555 | Primary ὣς φάτο, μείδησεν δὲ ποδάρκης δῖος Ἀχιλλεὺς |
| 556 | Primary χαίρων Ἀντιλόχῳ, ὅτι οἱ φίλος ἦεν ἑταῖρος· |
| 557 | Primary καί μιν ἀμειβόμενος ἔπεα πτερόεντα προσηύδα· |
| 558 | Primary Ἀντίλοχʼ, εἰ μὲν δή με κελεύεις οἴκοθεν ἄλλο |
| 559 | Primary Εὐμήλῳ ἐπιδοῦναι, ἐγὼ δέ κε καὶ τὸ τελέσσω. |
| 560 | Primary δώσω οἱ θώρηκα, τὸν Ἀστεροπαῖον ἀπηύρων |
| 561 | Primary χάλκεον, ᾧ πέρι χεῦμα φαεινοῦ κασσιτέροιο |
| 562 | Primary ἀμφιδεδίνηται· πολέος δέ οἱ ἄξιος ἔσται. |
| 563 | Primary ἦ ῥα, καὶ Αὐτομέδοντι φίλῳ ἐκέλευσεν ἑταίρῳ |
| 564 | Primary οἰσέμεναι κλισίηθεν· ὃ δʼ ᾤχετο καί οἱ ἔνεικεν, |
| 565 | Primary Εὐμήλῳ δʼ ἐν χερσὶ τίθει· ὃ δὲ δέξατο χαίρων. |
| 566 | Primary τοῖσι δὲ καὶ Μενέλαος ἀνίστατο θυμὸν ἀχεύων |
| 567 | Primary Ἀντιλόχῳ ἄμοτον κεχολωμένος· ἐν δʼ ἄρα κῆρυξ |
| 568 | Primary χειρὶ σκῆπτρον ἔθηκε, σιωπῆσαί τε κέλευσεν |
| 569 | Primary Ἀργείους· ὃ δʼ ἔπειτα μετηύδα ἰσόθεος φώς· |
| 570 | Primary Ἀντίλοχε πρόσθεν πεπνυμένε ποῖον ἔρεξας. |
| 571 | Primary ᾔσχυνας μὲν ἐμὴν ἀρετήν, βλάψας δέ μοι ἵππους |
| 572 | Primary τοὺς σοὺς πρόσθε βαλών, οἵ τοι πολὺ χείρονες ἦσαν. |
| 573 | Primary ἀλλʼ ἄγετʼ Ἀργείων ἡγήτορες ἠδὲ μέδοντες |
| 574 | Primary ἐς μέσον ἀμφοτέροισι δικάσσατε, μὴ δʼ ἐπʼ ἀρωγῇ, |
| 575 | Primary μή ποτέ τις εἴπῃσιν Ἀχαιῶν χαλκοχιτώνων· |
| 576 | Primary Ἀντίλοχον ψεύδεσσι βιησάμενος Μενέλαος |
| 577 | Primary οἴχεται ἵππον ἄγων, ὅτι οἱ πολὺ χείρονες ἦσαν |
| 578 | Primary ἵπποι, αὐτὸς δὲ κρείσσων ἀρετῇ τε βίῃ τε. |
| 579 | Primary εἰ δʼ ἄγʼ ἐγὼν αὐτὸς δικάσω, καί μʼ οὔ τινά φημι |
| 580 | Primary ἄλλον ἐπιπλήξειν Δαναῶν· ἰθεῖα γὰρ ἔσται. |
| 581 | Primary Ἀντίλοχʼ εἰ δʼ ἄγε δεῦρο διοτρεφές, ἣ θέμις ἐστί, |
| 582 | Primary στὰς ἵππων προπάροιθε καὶ ἅρματος, αὐτὰρ ἱμάσθλην |
| 583 | Primary χερσὶν ἔχε ῥαδινήν, ᾗ περ τὸ πρόσθεν ἔλαυνες, |
| 584 | Primary ἵππων ἁψάμενος γαιήοχον ἐννοσίγαιον |
| 585 | Primary ὄμνυθι μὴ μὲν ἑκὼν τὸ ἐμὸν δόλῳ ἅρμα πεδῆσαι. |
| 586 | Primary τὸν δʼ αὖτʼ Ἀντίλοχος πεπνυμένος ἀντίον ηὔδα· |
| 587 | Primary ἄνσχεο νῦν· πολλὸν γὰρ ἔγωγε νεώτερός εἰμι |
| 588 | Primary σεῖο ἄναξ Μενέλαε, σὺ δὲ πρότερος καὶ ἀρείων. |
| 589 | Primary οἶσθʼ οἷαι νέου ἀνδρὸς ὑπερβασίαι τελέθουσι· |
| 590 | Primary κραιπνότερος μὲν γάρ τε νόος, λεπτὴ δέ τε μῆτις. |
| 591 | Primary τώ τοι ἐπιτλήτω κραδίη· ἵππον δέ τοι αὐτὸς |
| 592 | Primary δώσω, τὴν ἀρόμην. εἰ καί νύ κεν οἴκοθεν ἄλλο |
| 593 | Primary μεῖζον ἐπαιτήσειας, ἄφαρ κέ τοι αὐτίκα δοῦναι |
| 594 | Primary βουλοίμην ἢ σοί γε διοτρεφὲς ἤματα πάντα |
| 595 | Primary ἐκ θυμοῦ πεσέειν καὶ δαίμοσιν εἶναι ἀλιτρός. |
| 596 | Primary ἦ ῥα καὶ ἵππον ἄγων μεγαθύμου Νέστορος υἱὸς |
| 597 | Primary ἐν χείρεσσι τίθει Μενελάου· τοῖο δὲ θυμὸς |
| 598 | Primary ἰάνθη ὡς εἴ τε περὶ σταχύεσσιν ἐέρση |
| 599 | Primary ληΐου ἀλδήσκοντος, ὅτε φρίσσουσιν ἄρουραι· |
| 600 | Primary ὣς ἄρα σοὶ Μενέλαε μετὰ φρεσὶ θυμὸς ἰάνθη. |
| 601 | Primary καί μιν φωνήσας ἔπεα πτερόεντα προσηύδα· |
| 602 | Primary Ἀντίλοχε νῦν μέν τοι ἐγὼν ὑποείξομαι αὐτὸς |
| 603 | Primary χωόμενος, ἐπεὶ οὔ τι παρήορος οὐδʼ ἀεσίφρων |
| 604 | Primary ἦσθα πάρος· νῦν αὖτε νόον νίκησε νεοίη. |
| 605 | Primary δεύτερον αὖτʼ ἀλέασθαι ἀμείνονας ἠπεροπεύειν. |
| 606 | Primary οὐ γάρ κέν με τάχʼ ἄλλος ἀνὴρ παρέπεισεν Ἀχαιῶν. |
| 607 | Primary ἀλλὰ σὺ γὰρ δὴ πολλὰ πάθες καὶ πολλὰ μόγησας |
| 608 | Primary σός τε πατὴρ ἀγαθὸς καὶ ἀδελφεὸς εἵνεκʼ ἐμεῖο· |
| 609 | Primary τώ τοι λισσομένῳ ἐπιπείσομαι, ἠδὲ καὶ ἵππον |
| 610 | Primary δώσω ἐμήν περ ἐοῦσαν, ἵνα γνώωσι καὶ οἵδε |
| 611 | Primary ὡς ἐμὸς οὔ ποτε θυμὸς ὑπερφίαλος καὶ ἀπηνής. |
| 612 | Primary ἦ ῥα, καὶ Ἀντιλόχοιο Νοήμονι δῶκεν ἑταίρῳ |
| 613 | Primary ἵππον ἄγειν· ὃ δʼ ἔπειτα λέβηθʼ ἕλε παμφανόωντα. |
| 614 | Primary Μηριόνης δʼ ἀνάειρε δύω χρυσοῖο τάλαντα |
| 615 | Primary τέτρατος, ὡς ἔλασεν. πέμπτον δʼ ὑπελείπετʼ ἄεθλον, |
| 616 | Primary ἀμφίθετος φιάλη· τὴν Νέστορι δῶκεν Ἀχιλλεὺς |
| 617 | Primary Ἀργείων ἀνʼ ἀγῶνα φέρων, καὶ ἔειπε παραστάς· |
| 618 | Primary τῆ νῦν, καὶ σοὶ τοῦτο γέρον κειμήλιον ἔστω |
| 619 | Primary Πατρόκλοιο τάφου μνῆμʼ ἔμμεναι· οὐ γὰρ ἔτʼ αὐτὸν |
| 620 | Primary ὄψῃ ἐν Ἀργείοισι· δίδωμι δέ τοι τόδʼ ἄεθλον |
| 621 | Primary αὔτως· οὐ γὰρ πύξ γε μαχήσεαι, οὐδὲ παλαίσεις, |
| 622 | Primary οὐδʼ ἔτʼ ἀκοντιστὺν ἐσδύσεαι, οὐδὲ πόδεσσι |
| 623 | Primary θεύσεαι· ἤδη γὰρ χαλεπὸν κατὰ γῆρας ἐπείγει. |
| 624 | Primary ὣς εἰπὼν ἐν χερσὶ τίθει· ὃ δʼ ἐδέξατο χαίρων, |
| 625 | Primary καί μιν φωνήσας ἔπεα πτερόεντα προσηύδα· |
| 626 | Primary ναὶ δὴ ταῦτά γε πάντα τέκος κατὰ μοῖραν ἔειπες· |
| 627 | Primary οὐ γὰρ ἔτʼ ἔμπεδα γυῖα φίλος πόδες, οὐδέ τι χεῖρες |
| 628 | Primary ὤμων ἀμφοτέρωθεν ἐπαΐσσονται ἐλαφραί. |
| 629 | Primary εἴθʼ ὣς ἡβώοιμι βίη τέ μοι ἔμπεδος εἴη |
| 630 | Primary ὡς ὁπότε κρείοντʼ Ἀμαρυγκέα θάπτον Ἐπειοὶ |
| 631 | Primary Βουπρασίῳ, παῖδες δʼ ἔθεσαν βασιλῆος ἄεθλα· |
| 632 | Primary ἔνθʼ οὔ τίς μοι ὁμοῖος ἀνὴρ γένετʼ, οὔτʼ ἄρʼ Ἐπειῶν |
| 633 | Primary οὔτʼ αὐτῶν Πυλίων οὔτʼ Αἰτωλῶν μεγαθύμων. |
| 634 | Primary πὺξ μὲν ἐνίκησα Κλυτομήδεα Ἤνοπος υἱόν, |
| 635 | Primary Ἀγκαῖον δὲ πάλῃ Πλευρώνιον, ὅς μοι ἀνέστη· |
| 636 | Primary Ἴφικλον δὲ πόδεσσι παρέδραμον ἐσθλὸν ἐόντα, |
| 637 | Primary δουρὶ δʼ ὑπειρέβαλον Φυλῆά τε καὶ Πολύδωρον. |
| 638 | Primary οἴοισίν μʼ ἵπποισι παρήλασαν Ἀκτορίωνε |
| 639 | Primary πλήθει πρόσθε βαλόντες ἀγασσάμενοι περὶ νίκης, |
| 640 | Primary οὕνεκα δὴ τὰ μέγιστα παρʼ αὐτόθι λείπετʼ ἄεθλα. |
| 641 | Primary οἳ δʼ ἄρʼ ἔσαν δίδυμοι· ὃ μὲν ἔμπεδον ἡνιόχευεν, |
| 642 | Primary ἔμπεδον ἡνιόχευʼ, ὃ δʼ ἄρα μάστιγι κέλευεν. |
| 643 | Primary ὥς ποτʼ ἔον· νῦν αὖτε νεώτεροι ἀντιοώντων |
| 644 | Primary ἔργων τοιούτων· ἐμὲ δὲ χρὴ γήραϊ λυγρῷ |
| 645 | Primary πείθεσθαι, τότε δʼ αὖτε μετέπρεπον ἡρώεσσιν. |
| 646 | Primary ἀλλʼ ἴθι καὶ σὸν ἑταῖρον ἀέθλοισι κτερέϊζε. |
| 647 | Primary τοῦτο δʼ ἐγὼ πρόφρων δέχομαι, χαίρει δέ μοι ἦτορ, |
| 648 | Primary ὥς μευ ἀεὶ μέμνησαι ἐνηέος, οὐδέ σε λήθω, |
| 649 | Primary τιμῆς ἧς τέ μʼ ἔοικε τετιμῆσθαι μετʼ Ἀχαιοῖς. |
| 650 | Primary σοὶ δὲ θεοὶ τῶνδʼ ἀντὶ χάριν μενοεικέα δοῖεν. |
| 651 | Primary ὣς φάτο, Πηλεΐδης δὲ πολὺν καθʼ ὅμιλον Ἀχαιῶν |
| 652 | Primary ᾤχετʼ, ἐπεὶ πάντʼ αἶνον ἐπέκλυε Νηλεΐδαο. |
| 653 | Primary αὐτὰρ ὃ πυγμαχίης ἀλεγεινῆς θῆκεν ἄεθλα· |
| 654 | Primary ἡμίονον ταλαεργὸν ἄγων κατέδησʼ ἐν ἀγῶνι |
| 655 | Primary ἑξέτεʼ ἀδμήτην, ἥ τʼ ἀλγίστη δαμάσασθαι· |
| 656 | Primary τῷ δʼ ἄρα νικηθέντι τίθει δέπας ἀμφικύπελλον. |
| 657 | Primary στῆ δʼ ὀρθὸς καὶ μῦθον ἐν Ἀργείοισιν ἔειπεν· |
| 658 | Primary Ἀτρεΐδη τε καὶ ἄλλοι ἐϋκνήμιδες Ἀχαιοὶ |
| 659 | Primary ἄνδρε δύω περὶ τῶνδε κελεύομεν, ὥ περ ἀρίστω, |
| 660 | Primary πὺξ μάλʼ ἀνασχομένω πεπληγέμεν· ᾧ δέ κʼ Ἀπόλλων |
| 661 | Primary δώῃ καμμονίην, γνώωσι δὲ πάντες Ἀχαιοί, |
| 662 | Primary ἡμίονον ταλαεργὸν ἄγων κλισίην δὲ νεέσθω· |
| 663 | Primary αὐτὰρ ὃ νικηθεὶς δέπας οἴσεται ἀμφικύπελλον. |
| 664 | Primary ὣς ἔφατʼ, ὄρνυτο δʼ αὐτίκʼ ἀνὴρ ἠΰς τε μέγας τε |
| 665 | Primary εἰδὼς πυγμαχίης υἱὸς Πανοπῆος Ἐπειός, |
| 666 | Primary ἅψατο δʼ ἡμιόνου ταλαεργοῦ φώνησέν τε· |
| 667 | Primary ἆσσον ἴτω ὅς τις δέπας οἴσεται ἀμφικύπελλον· |
| 668 | Primary ἡμίονον δʼ οὔ φημί τινʼ ἀξέμεν ἄλλον Ἀχαιῶν |
| 669 | Primary πυγμῇ νικήσαντʼ, ἐπεὶ εὔχομαι εἶναι ἄριστος. |
| 670 | Primary ἦ οὐχ ἅλις ὅττι μάχης ἐπιδεύομαι; οὐδʼ ἄρα πως ἦν |
| 671 | Primary ἐν πάντεσσʼ ἔργοισι δαήμονα φῶτα γενέσθαι. |
| 672 | Primary ὧδε γὰρ ἐξερέω, τὸ δὲ καὶ τετελεσμένον ἔσται· |
| 673 | Primary ἀντικρὺ χρόα τε ῥήξω σύν τʼ ὀστέʼ ἀράξω. |
| 674 | Primary κηδεμόνες δέ οἱ ἐνθάδʼ ἀολλέες αὖθι μενόντων, |
| 675 | Primary οἵ κέ μιν ἐξοίσουσιν ἐμῇς ὑπὸ χερσὶ δαμέντα. |
| 676 | Primary ὣς ἔφαθʼ, οἳ δʼ ἄρα πάντες ἀκὴν ἐγένοντο σιωπῇ. |
| 677 | Primary Εὐρύαλος δέ οἱ οἶος ἀνίστατο ἰσόθεος φὼς |
| 678 | Primary Μηκιστῆος υἱὸς Ταλαϊονίδαο ἄνακτος, |
| 679 | Primary ὅς ποτε Θήβας δʼ ἦλθε δεδουπότος Οἰδιπόδαο |
| 680 | Primary ἐς τάφον· ἔνθα δὲ πάντας ἐνίκα Καδμείωνας. |
| 681 | Primary τὸν μὲν Τυδεΐδης δουρὶ κλυτὸς ἀμφεπονεῖτο |
| 682 | Primary θαρσύνων ἔπεσιν, μέγα δʼ αὐτῷ βούλετο νίκην. |
| 683 | Primary ζῶμα δέ οἱ πρῶτον παρακάββαλεν, αὐτὰρ ἔπειτα |
| 684 | Primary δῶκεν ἱμάντας ἐϋτμήτους βοὸς ἀγραύλοιο. |
| 685 | Primary τὼ δὲ ζωσαμένω βήτην ἐς μέσσον ἀγῶνα, |
| 686 | Primary ἄντα δʼ ἀνασχομένω χερσὶ στιβαρῇσιν ἅμʼ ἄμφω |
| 687 | Primary σύν ῥʼ ἔπεσον, σὺν δέ σφι βαρεῖαι χεῖρες ἔμιχθεν. |
| 688 | Primary δεινὸς δὲ χρόμαδος γενύων γένετʼ, ἔρρεε δʼ ἱδρὼς |
| 689 | Primary πάντοθεν ἐκ μελέων· ἐπὶ δʼ ὄρνυτο δῖος Ἐπειός, |
| 690 | Primary κόψε δὲ παπτήναντα παρήϊον· οὐδʼ ἄρʼ ἔτι δὴν |
| 691 | Primary ἑστήκειν· αὐτοῦ γὰρ ὑπήριπε φαίδιμα γυῖα. |
| 692 | Primary ὡς δʼ ὅθʼ ὑπὸ φρικὸς Βορέω ἀναπάλλεται ἰχθὺς |
| 693 | Primary θίνʼ ἐν φυκιόεντι, μέλαν δέ ἑ κῦμα κάλυψεν, |
| 694 | Primary ὣς πληγεὶς ἀνέπαλτʼ· αὐτὰρ μεγάθυμος Ἐπειὸς |
| 695 | Primary χερσὶ λαβὼν ὤρθωσε· φίλοι δʼ ἀμφέσταν ἑταῖροι, |
| 696 | Primary οἵ μιν ἄγον διʼ ἀγῶνος ἐφελκομένοισι πόδεσσιν |
| 697 | Primary αἷμα παχὺ πτύοντα κάρη βάλλονθʼ ἑτέρωσε· |
| 698 | Primary κὰδ δʼ ἀλλοφρονέοντα μετὰ σφίσιν εἷσαν ἄγοντες, |
| 699 | Primary αὐτοὶ δʼ οἰχόμενοι κόμισαν δέπας ἀμφικύπελλον. |
| 700 | Primary Πηλεΐδης δʼ αἶψʼ ἄλλα κατὰ τρίτα θῆκεν ἄεθλα |
| 701 | Primary δεικνύμενος Δαναοῖσι παλαισμοσύνης ἀλεγεινῆς, |
| 702 | Primary τῷ μὲν νικήσαντι μέγαν τρίποδʼ ἐμπυριβήτην, |
| 703 | Primary τὸν δὲ δυωδεκάβοιον ἐνὶ σφίσι τῖον Ἀχαιοί· |
| 704 | Primary ἀνδρὶ δὲ νικηθέντι γυναῖκʼ ἐς μέσσον ἔθηκε, |
| 705 | Primary πολλὰ δʼ ἐπίστατο ἔργα, τίον δέ ἑ τεσσαράβοιον. |
| 706 | Primary στῆ δʼ ὀρθὸς καὶ μῦθον ἐν Ἀργείοισιν ἔειπεν· |
| 707 | Primary ὄρνυσθʼ οἳ καὶ τούτου ἀέθλου πειρήσεσθον. |
| 708 | Primary ὣς ἔφατʼ, ὦρτο δʼ ἔπειτα μέγας Τελαμώνιος Αἴας, |
| 709 | Primary ἂν δʼ Ὀδυσεὺς πολύμητις ἀνίστατο κέρδεα εἰδώς. |
| 710 | Primary ζωσαμένω δʼ ἄρα τώ γε βάτην ἐς μέσσον ἀγῶνα, |
| 711 | Primary ἀγκὰς δʼ ἀλλήλων λαβέτην χερσὶ στιβαρῇσιν |
| 712 | Primary ὡς ὅτʼ ἀμείβοντες, τούς τε κλυτὸς ἤραρε τέκτων |
| 713 | Primary δώματος ὑψηλοῖο βίας ἀνέμων ἀλεείνων. |
| 714 | Primary τετρίγει δʼ ἄρα νῶτα θρασειάων ἀπὸ χειρῶν |
| 715 | Primary ἑλκόμενα στερεῶς· κατὰ δὲ νότιος ῥέεν ἱδρώς, |
| 716 | Primary πυκναὶ δὲ σμώδιγγες ἀνὰ πλευράς τε καὶ ὤμους |
| 717 | Primary αἵματι φοινικόεσσαι ἀνέδραμον· οἳ δὲ μάλʼ αἰεὶ |
| 718 | Primary νίκης ἱέσθην τρίποδος πέρι ποιητοῖο· |
| 719 | Primary οὔτʼ Ὀδυσεὺς δύνατο σφῆλαι οὔδει τε πελάσσαι, |
| 720 | Primary οὔτʼ Αἴας δύνατο, κρατερὴ δʼ ἔχεν ἲς Ὀδυσῆος. |
| 721 | Primary ἀλλʼ ὅτε δή ῥʼ ἀνίαζον ἐϋκνήμιδας Ἀχαιούς, |
| 722 | Primary δὴ τότε μιν προσέειπε μέγας Τελαμώνιος Αἴας· |
| 723 | Primary διογενὲς Λαερτιάδη πολυμήχανʼ Ὀδυσσεῦ |
| 724 | Primary ἤ μʼ ἀνάειρʼ, ἢ ἐγὼ σέ· τὰ δʼ αὖ Διὶ πάντα μελήσει. |
| 725 | Primary ὣς εἰπὼν ἀνάειρε· δόλου δʼ οὐ λήθετʼ Ὀδυσσεύς· |
| 726 | Primary κόψʼ ὄπιθεν κώληπα τυχών, ὑπέλυσε δὲ γυῖα, |
| 727 | Primary κὰδ δʼ ἔβαλʼ ἐξοπίσω· ἐπὶ δὲ στήθεσσιν Ὀδυσσεὺς |
| 728 | Primary κάππεσε· λαοὶ δʼ αὖ θηεῦντό τε θάμβησάν τε. |
| 729 | Primary δεύτερος αὖτʼ ἀνάειρε πολύτλας δῖος Ὀδυσσεύς, |
| 730 | Primary κίνησεν δʼ ἄρα τυτθὸν ἀπὸ χθονός, οὐδʼ ἔτʼ ἄειρεν, |
| 731 | Primary ἐν δὲ γόνυ γνάμψεν· ἐπὶ δὲ χθονὶ κάππεσον ἄμφω |
| 732 | Primary πλησίοι ἀλλήλοισι, μιάνθησαν δὲ κονίῃ. |
| 733 | Primary καί νύ κε τὸ τρίτον αὖτις ἀναΐξαντʼ ἐπάλαιον, |
| 734 | Primary εἰ μὴ Ἀχιλλεὺς αὐτὸς ἀνίστατο καὶ κατέρυκε· |
| 735 | Primary μηκέτʼ ἐρείδεσθον, μὴ δὲ τρίβεσθε κακοῖσι· |
| 736 | Primary νίκη δʼ ἀμφοτέροισιν· ἀέθλια δʼ ἶσʼ ἀνελόντες |
| 737 | Primary ἔρχεσθʼ, ὄφρα καὶ ἄλλοι ἀεθλεύωσιν Ἀχαιοί. |
| 738 | Primary ὣς ἔφαθʼ, οἳ δʼ ἄρα τοῦ μάλα μὲν κλύον ἠδὲ πίθοντο, |
| 739 | Primary καί ῥʼ ἀπομορξαμένω κονίην δύσαντο χιτῶνας. |
| 740 | Primary Πηλεΐδης δʼ αἶψʼ ἄλλα τίθει ταχυτῆτος ἄεθλα |
| 741 | Primary ἀργύρεον κρητῆρα τετυγμένον· ἓξ δʼ ἄρα μέτρα |
| 742 | Primary χάνδανεν, αὐτὰρ κάλλει ἐνίκα πᾶσαν ἐπʼ αἶαν |
| 743 | Primary πολλόν, ἐπεὶ Σιδόνες πολυδαίδαλοι εὖ ἤσκησαν, |
| 744 | Primary Φοίνικες δʼ ἄγον ἄνδρες ἐπʼ ἠεροειδέα πόντον, |
| 745 | Primary στῆσαν δʼ ἐν λιμένεσσι, Θόαντι δὲ δῶρον ἔδωκαν· |
| 746 | Primary υἷος δὲ Πριάμοιο Λυκάονος ὦνον ἔδωκε |
| 747 | Primary Πατρόκλῳ ἥρωϊ Ἰησονίδης Εὔνηος. |
| 748 | Primary καὶ τὸν Ἀχιλλεὺς θῆκεν ἄεθλον οὗ ἑτάροιο, |
| 749 | Primary ὅς τις ἐλαφρότατος ποσσὶ κραιπνοῖσι πέλοιτο· |
| 750 | Primary δευτέρῳ αὖ βοῦν θῆκε μέγαν καὶ πίονα δημῷ, |
| 751 | Primary ἡμιτάλαντον δὲ χρυσοῦ λοισθήϊʼ ἔθηκε. |
| 752 | Primary στῆ δʼ ὀρθὸς καὶ μῦθον ἐν Ἀργείοισιν ἔειπεν· |
| 753 | Primary ὄρνυσθʼ οἳ καὶ τούτου ἀέθλου πειρήσεσθε. |
| 754 | Primary ὣς ἔφατʼ, ὄρνυτο δʼ αὐτίκʼ Ὀϊλῆος ταχὺς Αἴας, |
| 755 | Primary ἂν δʼ Ὀδυσεὺς πολύμητις, ἔπειτα δὲ Νέστορος υἱὸς |
| 756 | Primary Ἀντίλοχος· ὃ γὰρ αὖτε νέους ποσὶ πάντας ἐνίκα. |
| 757 | Primary στὰν δὲ μεταστοιχί· σήμηνε δὲ τέρματʼ Ἀχιλλεύς. |
| 758 | Primary τοῖσι δʼ ἀπὸ νύσσης τέτατο δρόμος· ὦκα δʼ ἔπειτα |
| 759 | Primary ἔκφερʼ Ὀϊλιάδης· ἐπὶ δʼ ὄρνυτο δῖος Ὀδυσσεὺς |
| 760 | Primary ἄγχι μάλʼ, ὡς ὅτε τίς τε γυναικὸς ἐϋζώνοιο |
| 761 | Primary στήθεός ἐστι κανών, ὅν τʼ εὖ μάλα χερσὶ τανύσσῃ |
| 762 | Primary πηνίον ἐξέλκουσα παρὲκ μίτον, ἀγχόθι δʼ ἴσχει |
| 763 | Primary στήθεος· ὣς Ὀδυσεὺς θέεν ἐγγύθεν, αὐτὰρ ὄπισθεν |
| 764 | Primary ἴχνια τύπτε πόδεσσι πάρος κόνιν ἀμφιχυθῆναι· |
| 765 | Primary κὰδ δʼ ἄρα οἱ κεφαλῆς χέʼ ἀϋτμένα δῖος Ὀδυσσεὺς |
| 766 | Primary αἰεὶ ῥίμφα θέων· ἴαχον δʼ ἐπὶ πάντες Ἀχαιοὶ |
| 767 | Primary νίκης ἱεμένῳ, μάλα δὲ σπεύδοντι κέλευον. |
| 768 | Primary ἀλλʼ ὅτε δὴ πύματον τέλεον δρόμον, αὐτίκʼ Ὀδυσσεὺς |
| 769 | Primary εὔχετʼ Ἀθηναίῃ γλαυκώπιδι ὃν κατὰ θυμόν· |
| 770 | Primary κλῦθι θεά, ἀγαθή μοι ἐπίρροθος ἐλθὲ ποδοῖιν. |
| 771 | Primary ὣς ἔφατʼ εὐχόμενος· τοῦ δʼ ἔκλυε Παλλὰς Ἀθήνη, |
| 772 | Primary γυῖα δʼ ἔθηκεν ἐλαφρά, πόδας καὶ χεῖρας ὕπερθεν. |
| 773 | Primary ἀλλʼ ὅτε δὴ τάχʼ ἔμελλον ἐπαΐξασθαι ἄεθλον, |
| 774 | Primary ἔνθʼ Αἴας μὲν ὄλισθε θέων, βλάψεν γὰρ Ἀθήνη, |
| 775 | Primary τῇ ῥα βοῶν κέχυτʼ ὄνθος ἀποκταμένων ἐριμύκων, |
| 776 | Primary οὓς ἐπὶ Πατρόκλῳ πέφνεν πόδας ὠκὺς Ἀχιλλεύς· |
| 777 | Primary ἐν δʼ ὄνθου βοέου πλῆτο στόμα τε ῥῖνάς τε· |
| 778 | Primary κρητῆρʼ αὖτʼ ἀνάειρε πολύτλας δῖος Ὀδυσσεύς, |
| 779 | Primary ὡς ἦλθε φθάμενος· ὃ δὲ βοῦν ἕλε φαίδιμος Αἴας. |
| 780 | Primary στῆ δὲ κέρας μετὰ χερσὶν ἔχων βοὸς ἀγραύλοιο |
| 781 | Primary ὄνθον ἀποπτύων, μετὰ δʼ Ἀργείοισιν ἔειπεν· |
| 782 | Primary ὢ πόποι ἦ μʼ ἔβλαψε θεὰ πόδας, ἣ τὸ πάρος περ |
| 783 | Primary μήτηρ ὣς Ὀδυσῆϊ παρίσταται ἠδʼ ἐπαρήγει. |
| 784 | Primary ὣς ἔφαθʼ, οἳ δʼ ἄρα πάντες ἐπʼ αὐτῷ ἡδὺ γέλασσαν. |
| 785 | Primary Ἀντίλοχος δʼ ἄρα δὴ λοισθήϊον ἔκφερʼ ἄεθλον |
| 786 | Primary μειδιόων, καὶ μῦθον ἐν Ἀργείοισιν ἔειπεν· |
| 787 | Primary εἰδόσιν ὔμμʼ ἐρέω πᾶσιν φίλοι, ὡς ἔτι καὶ νῦν |
| 788 | Primary ἀθάνατοι τιμῶσι παλαιοτέρους ἀνθρώπους. |
| 789 | Primary Αἴας μὲν γὰρ ἐμεῖʼ ὀλίγον προγενέστερός ἐστιν, |
| 790 | Primary οὗτος δὲ προτέρης γενεῆς προτέρων τʼ ἀνθρώπων· |
| 791 | Primary ὠμογέροντα δέ μίν φασʼ ἔμμεναι· ἀργαλέον δὲ |
| 792 | Primary ποσσὶν ἐριδήσασθαι Ἀχαιοῖς, εἰ μὴ Ἀχιλλεῖ. |
| 793 | Primary ὣς φάτο, κύδηνεν δὲ ποδώκεα Πηλεΐωνα. |
| 794 | Primary τὸν δʼ Ἀχιλεὺς μύθοισιν ἀμειβόμενος προσέειπεν· |
| 795 | Primary Ἀντίλοχʼ οὐ μέν τοι μέλεος εἰρήσεται αἶνος, |
| 796 | Primary ἀλλά τοι ἡμιτάλαντον ἐγὼ χρυσοῦ ἐπιθήσω. |
| 797 | Primary ὣς εἰπὼν ἐν χερσὶ τίθει, ὃ δʼ ἐδέξατο χαίρων. |
| 798 | Primary αὐτὰρ Πηλεΐδης κατὰ μὲν δολιχόσκιον ἔγχος |
| 799 | Primary θῆκʼ ἐς ἀγῶνα φέρων, κατὰ δʼ ἀσπίδα καὶ τρυφάλειαν |
| 800 | Primary τεύχεα Σαρπήδοντος, ἅ μιν Πάτροκλος ἀπηύρα. |
| 801 | Primary στῆ δʼ ὀρθὸς καὶ μῦθον ἐν Ἀργείοισιν ἔειπεν· |
| 802 | Primary ἄνδρε δύω περὶ τῶνδε κελεύομεν, ὥ περ ἀρίστω, |
| 803 | Primary τεύχεα ἑσσαμένω ταμεσίχροα χαλκὸν ἑλόντε |
| 804 | Primary ἀλλήλων προπάροιθεν ὁμίλου πειρηθῆναι. |
| 805 | Primary ὁππότερός κε φθῇσιν ὀρεξάμενος χρόα καλόν, |
| 806 | Primary ψαύσῃ δʼ ἐνδίνων διά τʼ ἔντεα καὶ μέλαν αἷμα, |
| 807 | Primary τῷ μὲν ἐγὼ δώσω τόδε φάσγανον ἀργυρόηλον |
| 808 | Primary καλὸν Θρηΐκιον, τὸ μὲν Ἀστεροπαῖον ἀπηύρων· |
| 809 | Primary τεύχεα δʼ ἀμφότεροι ξυνήϊα ταῦτα φερέσθων· |
| 810 | Primary καί σφιν δαῖτʼ ἀγαθὴν παραθήσομεν ἐν κλισίῃσιν. |
| 811 | Primary ὣς ἔφατʼ, ὦρτο δʼ ἔπειτα μέγας Τελαμώνιος Αἴας, |
| 812 | Primary ἂν δʼ ἄρα Τυδεΐδης ὦρτο, κρατερὸς Διομήδης. |
| 813 | Primary οἳ δʼ ἐπεὶ οὖν ἑκάτερθεν ὁμίλου θωρήχθησαν, |
| 814 | Primary ἐς μέσον ἀμφοτέρω συνίτην μεμαῶτε μάχεσθαι |
| 815 | Primary δεινὸν δερκομένω· θάμβος δʼ ἔχε πάντας Ἀχαιούς. |
| 816 | Primary ἀλλʼ ὅτε δὴ σχεδὸν ἦσαν ἐπʼ ἀλλήλοισιν ἰόντες, |
| 817 | Primary τρὶς μὲν ἐπήϊξαν, τρὶς δὲ σχεδὸν ὁρμήθησαν. |
| 818 | Primary ἔνθʼ Αἴας μὲν ἔπειτα κατʼ ἀσπίδα πάντοσʼ ἐΐσην |
| 819 | Primary νύξʼ, οὐδὲ χρόʼ ἵκανεν· ἔρυτο γὰρ ἔνδοθι θώρηξ· |
| 820 | Primary Τυδεΐδης δʼ ἄρʼ ἔπειτα ὑπὲρ σάκεος μεγάλοιο |
| 821 | Primary αἰὲν ἐπʼ αὐχένι κῦρε φαεινοῦ δουρὸς ἀκωκῇ. |
| 822 | Primary καὶ τότε δή ῥʼ Αἴαντι περιδείσαντες Ἀχαιοὶ |
| 823 | Primary παυσαμένους ἐκέλευσαν ἀέθλια ἶσʼ ἀνελέσθαι. |
| 824 | Primary αὐτὰρ Τυδεΐδῃ δῶκεν μέγα φάσγανον ἥρως |
| 825 | Primary σὺν κολεῷ τε φέρων καὶ ἐϋτμήτῳ τελαμῶνι. |
| 826 | Primary αὐτὰρ Πηλεΐδης θῆκεν σόλον αὐτοχόωνον |
| 827 | Primary ὃν πρὶν μὲν ῥίπτασκε μέγα σθένος Ἠετίωνος· |
| 828 | Primary ἀλλʼ ἤτοι τὸν ἔπεφνε ποδάρκης δῖος Ἀχιλλεύς, |
| 829 | Primary τὸν δʼ ἄγετʼ ἐν νήεσσι σὺν ἄλλοισι κτεάτεσσι. |
| 830 | Primary στῆ δʼ ὀρθὸς καὶ μῦθον ἐν Ἀργείοισιν ἔειπεν· |
| 831 | Primary ὄρνυσθʼ οἳ καὶ τούτου ἀέθλου πειρήσεσθε. |
| 832 | Primary εἴ οἱ καὶ μάλα πολλὸν ἀπόπροθι πίονες ἀγροί, |
| 833 | Primary ἕξει μιν καὶ πέντε περιπλομένους ἐνιαυτοὺς |
| 834 | Primary χρεώμενος· οὐ μὲν γάρ οἱ ἀτεμβόμενός γε σιδήρου |
| 835 | Primary ποιμὴν οὐδʼ ἀροτὴρ εἶσʼ ἐς πόλιν, ἀλλὰ παρέξει. |
| 836 | Primary ὣς ἔφατʼ, ὦρτο δʼ ἔπειτα μενεπτόλεμος Πολυποίτης, |
| 837 | Primary ἂν δὲ Λεοντῆος κρατερὸν μένος ἀντιθέοιο, |
| 838 | Primary ἂν δʼ Αἴας Τελαμωνιάδης καὶ δῖος Ἐπειός. |
| 839 | Primary ἑξείης δʼ ἵσταντο, σόλον δʼ ἕλε δῖος Ἐπειός, |
| 840 | Primary ἧκε δὲ δινήσας· γέλασαν δʼ ἐπὶ πάντες Ἀχαιοί. |
| 841 | Primary δεύτερος αὖτʼ ἀφέηκε Λεοντεὺς ὄζος Ἄρηος· |
| 842 | Primary τὸ τρίτον αὖτʼ ἔρριψε μέγας Τελαμώνιος Αἴας |
| 843 | Primary χειρὸς ἄπο στιβαρῆς, καὶ ὑπέρβαλε σήματα πάντων. |
| 844 | Primary ἀλλʼ ὅτε δὴ σόλον εἷλε μενεπτόλεμος Πολυποίτης, |
| 845 | Primary ὅσσόν τίς τʼ ἔρριψε καλαύροπα βουκόλος ἀνήρ, |
| 846 | Primary ἣ δέ θʼ ἑλισσομένη πέτεται διὰ βοῦς ἀγελαίας, |
| 847 | Primary τόσσον παντὸς ἀγῶνος ὑπέρβαλε· τοὶ δὲ βόησαν. |
| 848 | Primary ἀνστάντες δʼ ἕταροι Πολυποίταο κρατεροῖο |
| 849 | Primary νῆας ἔπι γλαφυρὰς ἔφερον βασιλῆος ἄεθλον. |
| 850 | Primary αὐτὰρ ὃ τοξευτῇσι τίθει ἰόεντα σίδηρον, |
| 851 | Primary κὰδ δʼ ἐτίθει δέκα μὲν πελέκεας, δέκα δʼ ἡμιπέλεκκα, |
| 852 | Primary ἱστὸν δʼ ἔστησεν νηὸς κυανοπρῴροιο |
| 853 | Primary τηλοῦ ἐπὶ ψαμάθοις, ἐκ δὲ τρήρωνα πέλειαν |
| 854 | Primary λεπτῇ μηρίνθῳ δῆσεν ποδός, ἧς ἄρʼ ἀνώγει |
| 855 | Primary τοξεύειν· ὃς μέν κε βάλῃ τρήρωνα πέλειαν, |
| 856 | Primary πάντας ἀειράμενος πελέκεας οἶκον δὲ φερέσθω· |
| 857 | Primary ὃς δέ κε μηρίνθοιο τύχῃ ὄρνιθος ἁμαρτών, |
| 858 | Primary ἥσσων γὰρ δὴ κεῖνος, ὃ δʼ οἴσεται ἡμιπέλεκκα. |
| 859 | Primary ὣς ἔφατʼ, ὦρτο δʼ ἔπειτα βίη Τεύκροιο ἄνακτος, |
| 860 | Primary ἂν δʼ ἄρα Μηριόνης θεράπων ἐῢς Ἰδομενῆος. |
| 861 | Primary κλήρους δʼ ἐν κυνέῃ χαλκήρεϊ πάλλον ἑλόντες, |
| 862 | Primary Τεῦκρος δὲ πρῶτος κλήρῳ λάχεν· αὐτίκα δʼ ἰὸν |
| 863 | Primary ἧκεν ἐπικρατέως, οὐδʼ ἠπείλησεν ἄνακτι |
| 864 | Primary ἀρνῶν πρωτογόνων ῥέξειν κλειτὴν ἑκατόμβην. |
| 865 | Primary ὄρνιθος μὲν ἅμαρτε· μέγηρε γάρ οἱ τό γʼ Ἀπόλλων· |
| 866 | Primary αὐτὰρ ὃ μήρινθον βάλε πὰρ πόδα, τῇ δέδετʼ ὄρνις· |
| 867 | Primary ἀντικρὺ δʼ ἀπὸ μήρινθον τάμε πικρὸς ὀϊστός. |
| 868 | Primary ἣ μὲν ἔπειτʼ ἤϊξε πρὸς οὐρανόν, ἣ δὲ παρείθη |
| 869 | Primary μήρινθος ποτὶ γαῖαν· ἀτὰρ κελάδησαν Ἀχαιοί. |
| 870 | Primary σπερχόμενος δʼ ἄρα Μηριόνης ἐξείρυσε χειρὸς |
| 871 | Primary τόξον· ἀτὰρ δὴ ὀϊστὸν ἔχεν πάλαι, ὡς ἴθυνεν. |
| 872 | Primary αὐτίκα δʼ ἠπείλησεν ἑκηβόλῳ Ἀπόλλωνι |
| 873 | Primary ἀρνῶν πρωτογόνων ῥέξειν κλειτὴν ἑκατόμβην. |
| 874 | Primary ὕψι δʼ ὑπὸ νεφέων εἶδε τρήρωνα πέλειαν· |
| 875 | Primary τῇ ῥʼ ὅ γε δινεύουσαν ὑπὸ πτέρυγος βάλε μέσσην, |
| 876 | Primary ἀντικρὺ δὲ διῆλθε βέλος· τὸ μὲν ἂψ ἐπὶ γαίῃ |
| 877 | Primary πρόσθεν Μηριόναο πάγη ποδός· αὐτὰρ ἣ ὄρνις |
| 878 | Primary ἱστῷ ἐφεζομένη νηὸς κυανοπρῴροιο |
| 879 | Primary αὐχένʼ ἀπεκρέμασεν, σὺν δὲ πτερὰ πυκνὰ λίασθεν. |
| 880 | Primary ὠκὺς δʼ ἐκ μελέων θυμὸς πτάτο, τῆλε δʼ ἀπʼ αὐτοῦ |
| 881 | Primary κάππεσε· λαοὶ δʼ αὖ θηεῦντό τε θάμβησάν τε. |
| 882 | Primary ἂν δʼ ἄρα Μηριόνης πελέκεας δέκα πάντας ἄειρε, |
| 883 | Primary Τεῦκρος δʼ ἡμιπέλεκκα φέρεν κοίλας ἐπὶ νῆας. |
| 884 | Primary αὐτὰρ Πηλεΐδης κατὰ μὲν δολιχόσκιον ἔγχος, |
| 885 | Primary κὰδ δὲ λέβητʼ ἄπυρον βοὸς ἄξιον ἀνθεμόεντα |
| 886 | Primary θῆκʼ ἐς ἀγῶνα φέρων· καί ῥʼ ἥμονες ἄνδρες ἀνέσταν· |
| 887 | Primary ἂν μὲν ἄρʼ Ἀτρεΐδης εὐρὺ κρείων Ἀγαμέμνων, |
| 888 | Primary ἂν δʼ ἄρα Μηριόνης, θεράπων ἐῢς Ἰδομενῆος. |
| 889 | Primary τοῖσι δὲ καὶ μετέειπε ποδάρκης δῖος Ἀχιλλεύς· |
| 890 | Primary Ἀτρεΐδη· ἴδμεν γὰρ ὅσον προβέβηκας ἁπάντων |
| 891 | Primary ἠδʼ ὅσσον δυνάμει τε καὶ ἥμασιν ἔπλευ ἄριστος· |
| 892 | Primary ἀλλὰ σὺ μὲν τόδʼ ἄεθλον ἔχων κοίλας ἐπὶ νῆας |
| 893 | Primary ἔρχευ, ἀτὰρ δόρυ Μηριόνῃ ἥρωϊ πόρωμεν, |
| 894 | Primary εἰ σύ γε σῷ θυμῷ ἐθέλοις· κέλομαι γὰρ ἔγωγε. |
| 895 | Primary ὣς ἔφατʼ, οὐδʼ ἀπίθησεν ἄναξ ἀνδρῶν Ἀγαμέμνων· |
| 896 | Primary δῶκε δὲ Μηριόνῃ δόρυ χάλκεον· αὐτὰρ ὅ γʼ ἥρως |
| 897 | Primary Ταλθυβίῳ κήρυκι δίδου περικαλλὲς ἄεθλον. |