Reader
Reader | Iliad, Book 2
Iliad
Homer
Text
Position
Line 1 of 877
Waypoints
| Line Ref | Monro and Allen | Ancient Greek |
|---|---|
| 1 | Primary ἄλλοι μέν ῥα θεοί τε καὶ ἀνέρες ἱπποκορυσταὶ |
| 2 | Primary εὗδον παννύχιοι, Δία δʼ οὐκ ἔχε νήδυμος ὕπνος, |
| 3 | Primary ἀλλʼ ὅ γε μερμήριζε κατὰ φρένα ὡς Ἀχιλῆα |
| 4 | Primary τιμήσῃ, ὀλέσῃ δὲ πολέας ἐπὶ νηυσὶν Ἀχαιῶν. |
| 5 | Primary ἥδε δέ οἱ κατὰ θυμὸν ἀρίστη φαίνετο βουλή, |
| 6 | Primary πέμψαι ἐπʼ Ἀτρεΐδῃ Ἀγαμέμνονι οὖλον ὄνειρον· |
| 7 | Primary καί μιν φωνήσας ἔπεα πτερόεντα προσηύδα· |
| 8 | Primary βάσκʼ ἴθι οὖλε ὄνειρε θοὰς ἐπὶ νῆας Ἀχαιῶν· |
| 9 | Primary ἐλθὼν ἐς κλισίην Ἀγαμέμνονος Ἀτρεΐδαο |
| 10 | Primary πάντα μάλʼ ἀτρεκέως ἀγορευέμεν ὡς ἐπιτέλλω· |
| 11 | Primary θωρῆξαί ἑ κέλευε κάρη κομόωντας Ἀχαιοὺς |
| 12 | Primary πανσυδίῃ· νῦν γάρ κεν ἕλοι πόλιν εὐρυάγυιαν |
| 13 | Primary Τρώων· οὐ γὰρ ἔτʼ ἀμφὶς Ὀλύμπια δώματʼ ἔχοντες |
| 14 | Primary ἀθάνατοι φράζονται· ἐπέγναμψεν γὰρ ἅπαντας |
| 15 | Primary Ἥρη λισσομένη, Τρώεσσι δὲ κήδεʼ ἐφῆπται. |
| 16 | Primary ὣς φάτο, βῆ δʼ ἄρʼ ὄνειρος ἐπεὶ τὸν μῦθον ἄκουσε· |
| 17 | Primary καρπαλίμως δʼ ἵκανε θοὰς ἐπὶ νῆας Ἀχαιῶν, |
| 18 | Primary βῆ δʼ ἄρʼ ἐπʼ Ἀτρεΐδην Ἀγαμέμνονα· τὸν δὲ κίχανεν |
| 19 | Primary εὕδοντʼ ἐν κλισίῃ, περὶ δʼ ἀμβρόσιος κέχυθʼ ὕπνος. |
| 20 | Primary στῆ δʼ ἄρʼ ὑπὲρ κεφαλῆς Νηληΐῳ υἷι ἐοικώς |
| 21 | Primary Νέστορι, τόν ῥα μάλιστα γερόντων τῖʼ Ἀγαμέμνων· |
| 22 | Primary τῷ μιν ἐεισάμενος προσεφώνεε θεῖος ὄνειρος· |
| 23 | Primary εὕδεις Ἀτρέος υἱὲ δαΐφρονος ἱπποδάμοιο· |
| 24 | Primary οὐ χρὴ παννύχιον εὕδειν βουληφόρον ἄνδρα |
| 25 | Primary ᾧ λαοί τʼ ἐπιτετράφαται καὶ τόσσα μέμηλε· |
| 26 | Primary νῦν δʼ ἐμέθεν ξύνες ὦκα· Διὸς δέ τοι ἄγγελός εἰμι, |
| 27 | Primary ὃς σεῦ ἄνευθεν ἐὼν μέγα κήδεται ἠδʼ ἐλεαίρει. |
| 28 | Primary θωρῆξαί σε κέλευσε κάρη κομόωντας Ἀχαιοὺς |
| 29 | Primary πανσυδίῃ· νῦν γάρ κεν ἕλοις πόλιν εὐρυάγυιαν |
| 30 | Primary Τρώων· οὐ γὰρ ἔτʼ ἀμφὶς Ὀλύμπια δώματʼ ἔχοντες |
| 31 | Primary ἀθάνατοι φράζονται· ἐπέγναμψεν γὰρ ἅπαντας |
| 32 | Primary Ἥρη λισσομένη, Τρώεσσι δὲ κήδεʼ ἐφῆπται |
| 33 | Primary ἐκ Διός· ἀλλὰ σὺ σῇσιν ἔχε φρεσί, μηδέ σε λήθη |
| 34 | Primary αἱρείτω εὖτʼ ἄν σε μελίφρων ὕπνος ἀνήῃ. |
| 35 | Primary ὣς ἄρα φωνήσας ἀπεβήσετο, τὸν δὲ λίπʼ αὐτοῦ |
| 36 | Primary τὰ φρονέοντʼ ἀνὰ θυμὸν ἅ ῥʼ οὐ τελέεσθαι ἔμελλον· |
| 37 | Primary φῆ γὰρ ὅ γʼ αἱρήσειν Πριάμου πόλιν ἤματι κείνῳ |
| 38 | Primary νήπιος, οὐδὲ τὰ ᾔδη ἅ ῥα Ζεὺς μήδετο ἔργα· |
| 39 | Primary θήσειν γὰρ ἔτʼ ἔμελλεν ἐπʼ ἄλγεά τε στοναχάς τε |
| 40 | Primary Τρωσί τε καὶ Δαναοῖσι διὰ κρατερὰς ὑσμίνας. |
| 41 | Primary ἔγρετο δʼ ἐξ ὕπνου, θείη δέ μιν ἀμφέχυτʼ ὀμφή· |
| 42 | Primary ἕζετο δʼ ὀρθωθείς, μαλακὸν δʼ ἔνδυνε χιτῶνα |
| 43 | Primary καλὸν νηγάτεον, περὶ δὲ μέγα βάλλετο φᾶρος· |
| 44 | Primary ποσσὶ δʼ ὑπὸ λιπαροῖσιν ἐδήσατο καλὰ πέδιλα, |
| 45 | Primary ἀμφὶ δʼ ἄρʼ ὤμοισιν βάλετο ξίφος ἀργυρόηλον· |
| 46 | Primary εἵλετο δὲ σκῆπτρον πατρώϊον ἄφθιτον αἰεὶ |
| 47 | Primary σὺν τῷ ἔβη κατὰ νῆας Ἀχαιῶν χαλκοχιτώνων· |
| 48 | Primary ἠὼς μέν ῥα θεὰ προσεβήσετο μακρὸν Ὄλυμπον |
| 49 | Primary Ζηνὶ φόως ἐρέουσα καὶ ἄλλοις ἀθανάτοισιν· |
| 50 | Primary αὐτὰρ ὃ κηρύκεσσι λιγυφθόγγοισι κέλευσε |
| 51 | Primary κηρύσσειν ἀγορὴν δὲ κάρη κομόωντας Ἀχαιούς· |
| 52 | Primary οἳ μὲν ἐκήρυσσον, τοὶ δʼ ἠγείροντο μάλʼ ὦκα· |
| 53 | Primary βουλὴν δὲ πρῶτον μεγαθύμων ἷζε γερόντων |
| 54 | Primary Νεστορέῃ παρὰ νηῒ Πυλοιγενέος βασιλῆος· |
| 55 | Primary τοὺς ὅ γε συγκαλέσας πυκινὴν ἀρτύνετο βουλήν· |
| 56 | Primary κλῦτε φίλοι· θεῖός μοι ἐνύπνιον ἦλθεν ὄνειρος |
| 57 | Primary ἀμβροσίην διὰ νύκτα· μάλιστα δὲ Νέστορι δίῳ |
| 58 | Primary εἶδός τε μέγεθός τε φυήν τʼ ἄγχιστα ἐῴκει· |
| 59 | Primary στῆ δʼ ἄρʼ ὑπὲρ κεφαλῆς καί με πρὸς μῦθον ἔειπεν· |
| 60 | Primary εὕδεις Ἀτρέος υἱὲ δαΐφρονος ἱπποδάμοιο· |
| 61 | Primary οὐ χρὴ παννύχιον εὕδειν βουληφόρον ἄνδρα, |
| 62 | Primary ᾧ λαοί τʼ ἐπιτετράφαται καὶ τόσσα μέμηλε· |
| 63 | Primary νῦν δʼ ἐμέθεν ξύνες ὦκα· Διὸς δέ τοι ἄγγελός εἰμι, |
| 64 | Primary ὃς σεῦ ἄνευθεν ἐὼν μέγα κήδεται ἠδʼ ἐλεαίρει· |
| 65 | Primary θωρῆξαί σε κέλευσε κάρη κομόωντας Ἀχαιοὺς |
| 66 | Primary πανσυδίῃ· νῦν γάρ κεν ἕλοις πόλιν εὐρυάγυιαν |
| 67 | Primary Τρώων· οὐ γὰρ ἔτʼ ἀμφὶς Ὀλύμπια δώματʼ ἔχοντες |
| 68 | Primary ἀθάνατοι φράζονται· ἐπέγναμψεν γὰρ ἅπαντας |
| 69 | Primary Ἥρη λισσομένη, Τρώεσσι δὲ κήδεʼ ἐφῆπται |
| 70 | Primary ἐκ Διός· ἀλλὰ σὺ σῇσιν ἔχε φρεσίν· ὣς ὃ μὲν εἰπὼν |
| 71 | Primary ᾤχετʼ ἀποπτάμενος, ἐμὲ δὲ γλυκὺς ὕπνος ἀνῆκεν. |
| 72 | Primary ἀλλʼ ἄγετʼ αἴ κέν πως θωρήξομεν υἷας Ἀχαιῶν· |
| 73 | Primary πρῶτα δʼ ἐγὼν ἔπεσιν πειρήσομαι, ἣ θέμις ἐστί, |
| 74 | Primary καὶ φεύγειν σὺν νηυσὶ πολυκλήϊσι κελεύσω· |
| 75 | Primary ὑμεῖς δʼ ἄλλοθεν ἄλλος ἐρητύειν ἐπέεσσιν. |
| 76 | Primary ἤτοι ὅ γʼ ὣς εἰπὼν κατʼ ἄρʼ ἕζετο, τοῖσι δʼ ἀνέστη |
| 77 | Primary Νέστωρ, ὅς ῥα Πύλοιο ἄναξ ἦν ἠμαθόεντος, |
| 78 | Primary ὅ σφιν ἐὺ φρονέων ἀγορήσατο καὶ μετέειπεν· |
| 79 | Primary ὦ φίλοι Ἀργείων ἡγήτορες ἠδὲ μέδοντες |
| 80 | Primary εἰ μέν τις τὸν ὄνειρον Ἀχαιῶν ἄλλος ἔνισπε |
| 81 | Primary ψεῦδός κεν φαῖμεν καὶ νοσφιζοίμεθα μᾶλλον· |
| 82 | Primary νῦν δʼ ἴδεν ὃς μέγʼ ἄριστος Ἀχαιῶν εὔχεται εἶναι· |
| 83 | Primary ἀλλʼ ἄγετʼ αἴ κέν πως θωρήξομεν υἷας Ἀχαιῶν. |
| 84 | Primary ὣς ἄρα φωνήσας βουλῆς ἐξῆρχε νέεσθαι, |
| 85 | Primary οἳ δʼ ἐπανέστησαν πείθοντό τε ποιμένι λαῶν |
| 86 | Primary σκηπτοῦχοι βασιλῆες· ἐπεσσεύοντο δὲ λαοί. |
| 87 | Primary ἠΰτε ἔθνεα εἶσι μελισσάων ἁδινάων |
| 88 | Primary πέτρης ἐκ γλαφυρῆς αἰεὶ νέον ἐρχομενάων, |
| 89 | Primary βοτρυδὸν δὲ πέτονται ἐπʼ ἄνθεσιν εἰαρινοῖσιν· |
| 90 | Primary αἳ μέν τʼ ἔνθα ἅλις πεποτήαται, αἳ δέ τε ἔνθα· |
| 91 | Primary ὣς τῶν ἔθνεα πολλὰ νεῶν ἄπο καὶ κλισιάων |
| 92 | Primary ἠϊόνος προπάροιθε βαθείης ἐστιχόωντο |
| 93 | Primary ἰλαδὸν εἰς ἀγορήν· μετὰ δέ σφισιν ὄσσα δεδήει |
| 94 | Primary ὀτρύνουσʼ ἰέναι Διὸς ἄγγελος· οἳ δʼ ἀγέροντο. |
| 95 | Primary τετρήχει δʼ ἀγορή, ὑπὸ δὲ στεναχίζετο γαῖα |
| 96 | Primary λαῶν ἱζόντων, ὅμαδος δʼ ἦν· ἐννέα δέ σφεας |
| 97 | Primary κήρυκες βοόωντες ἐρήτυον, εἴ ποτʼ ἀϋτῆς |
| 98 | Primary σχοίατʼ, ἀκούσειαν δὲ διοτρεφέων βασιλήων. |
| 99 | Primary σπουδῇ δʼ ἕζετο λαός, ἐρήτυθεν δὲ καθʼ ἕδρας |
| 100 | Primary παυσάμενοι κλαγγῆς· ἀνὰ δὲ κρείων Ἀγαμέμνων |
| 101 | Primary ἔστη σκῆπτρον ἔχων τὸ μὲν Ἥφαιστος κάμε τεύχων. |
| 102 | Primary Ἥφαιστος μὲν δῶκε Διὶ Κρονίωνι ἄνακτι, |
| 103 | Primary αὐτὰρ ἄρα Ζεὺς δῶκε διακτόρῳ ἀργεϊφόντῃ· |
| 104 | Primary Ἑρμείας δὲ ἄναξ δῶκεν Πέλοπι πληξίππῳ, |
| 105 | Primary αὐτὰρ ὃ αὖτε Πέλοψ δῶκʼ Ἀτρέϊ ποιμένι λαῶν, |
| 106 | Primary Ἀτρεὺς δὲ θνῄσκων ἔλιπεν πολύαρνι Θυέστῃ, |
| 107 | Primary αὐτὰρ ὃ αὖτε Θυέστʼ Ἀγαμέμνονι λεῖπε φορῆναι, |
| 108 | Primary πολλῇσιν νήσοισι καὶ Ἄργεϊ παντὶ ἀνάσσειν. |
| 109 | Primary τῷ ὅ γʼ ἐρεισάμενος ἔπεʼ Ἀργείοισι μετηύδα· |
| 110 | Primary ὦ φίλοι ἥρωες Δαναοὶ θεράποντες Ἄρηος |
| 111 | Primary Ζεύς με μέγα Κρονίδης ἄτῃ ἐνέδησε βαρείῃ, |
| 112 | Primary σχέτλιος, ὃς πρὶν μέν μοι ὑπέσχετο καὶ κατένευσεν |
| 113 | Primary Ἴλιον ἐκπέρσαντʼ εὐτείχεον ἀπονέεσθαι, |
| 114 | Primary νῦν δὲ κακὴν ἀπάτην βουλεύσατο, καί με κελεύει |
| 115 | Primary δυσκλέα Ἄργος ἱκέσθαι, ἐπεὶ πολὺν ὤλεσα λαόν. |
| 116 | Primary οὕτω που Διὶ μέλλει ὑπερμενέϊ φίλον εἶναι, |
| 117 | Primary ὃς δὴ πολλάων πολίων κατέλυσε κάρηνα |
| 118 | Primary ἠδʼ ἔτι καὶ λύσει· τοῦ γὰρ κράτος ἐστὶ μέγιστον. |
| 119 | Primary αἰσχρὸν γὰρ τόδε γʼ ἐστὶ καὶ ἐσσομένοισι πυθέσθαι |
| 120 | Primary μὰψ οὕτω τοιόνδε τοσόνδε τε λαὸν Ἀχαιῶν |
| 121 | Primary ἄπρηκτον πόλεμον πολεμίζειν ἠδὲ μάχεσθαι |
| 122 | Primary ἀνδράσι παυροτέροισι, τέλος δʼ οὔ πώ τι πέφανται· |
| 123 | Primary εἴ περ γάρ κʼ ἐθέλοιμεν Ἀχαιοί τε Τρῶές τε |
| 124 | Primary ὅρκια πιστὰ ταμόντες ἀριθμηθήμεναι ἄμφω, |
| 125 | Primary Τρῶας μὲν λέξασθαι ἐφέστιοι ὅσσοι ἔασιν, |
| 126 | Primary ἡμεῖς δʼ ἐς δεκάδας διακοσμηθεῖμεν Ἀχαιοί, |
| 127 | Primary Τρώων δʼ ἄνδρα ἕκαστοι ἑλοίμεθα οἰνοχοεύειν, |
| 128 | Primary πολλαί κεν δεκάδες δευοίατο οἰνοχόοιο. |
| 129 | Primary τόσσον ἐγώ φημι πλέας ἔμμεναι υἷας Ἀχαιῶν |
| 130 | Primary Τρώων, οἳ ναίουσι κατὰ πτόλιν· ἀλλʼ ἐπίκουροι |
| 131 | Primary πολλέων ἐκ πολίων ἐγχέσπαλοι ἄνδρες ἔασιν, |
| 132 | Primary οἵ με μέγα πλάζουσι καὶ οὐκ εἰῶσʼ ἐθέλοντα |
| 133 | Primary Ἰλίου ἐκπέρσαι εὖ ναιόμενον πτολίεθρον. |
| 134 | Primary ἐννέα δὴ βεβάασι Διὸς μεγάλου ἐνιαυτοί, |
| 135 | Primary καὶ δὴ δοῦρα σέσηπε νεῶν καὶ σπάρτα λέλυνται· |
| 136 | Primary αἳ δέ που ἡμέτεραί τʼ ἄλοχοι καὶ νήπια τέκνα |
| 137 | Primary εἵατʼ ἐνὶ μεγάροις ποτιδέγμεναι· ἄμμι δὲ ἔργον |
| 138 | Primary αὔτως ἀκράαντον οὗ εἵνεκα δεῦρʼ ἱκόμεσθα. |
| 139 | Primary ἀλλʼ ἄγεθʼ ὡς ἂν ἐγὼ εἴπω πειθώμεθα πάντες· |
| 140 | Primary φεύγωμεν σὺν νηυσὶ φίλην ἐς πατρίδα γαῖαν· |
| 141 | Primary οὐ γὰρ ἔτι Τροίην αἱρήσομεν εὐρυάγυιαν. |
| 142 | Primary ὣς φάτο, τοῖσι δὲ θυμὸν ἐνὶ στήθεσσιν ὄρινε |
| 143 | Primary πᾶσι μετὰ πληθὺν ὅσοι οὐ βουλῆς ἐπάκουσαν· |
| 144 | Primary κινήθη δʼ ἀγορὴ φὴ κύματα μακρὰ θαλάσσης |
| 145 | Primary πόντου Ἰκαρίοιο, τὰ μέν τʼ Εὖρός τε Νότος τε |
| 146 | Primary ὤρορʼ ἐπαΐξας πατρὸς Διὸς ἐκ νεφελάων. |
| 147 | Primary ὡς δʼ ὅτε κινήσῃ Ζέφυρος βαθὺ λήϊον ἐλθὼν |
| 148 | Primary λάβρος ἐπαιγίζων, ἐπί τʼ ἠμύει ἀσταχύεσσιν, |
| 149 | Primary ὣς τῶν πᾶσʼ ἀγορὴ κινήθη· τοὶ δʼ ἀλαλητῷ |
| 150 | Primary νῆας ἔπʼ ἐσσεύοντο, ποδῶν δʼ ὑπένερθε κονίη |
| 151 | Primary ἵστατʼ ἀειρομένη· τοὶ δʼ ἀλλήλοισι κέλευον |
| 152 | Primary ἅπτεσθαι νηῶν ἠδʼ ἑλκέμεν εἰς ἅλα δῖαν, |
| 153 | Primary οὐρούς τʼ ἐξεκάθαιρον· ἀϋτὴ δʼ οὐρανὸν ἷκεν |
| 154 | Primary οἴκαδε ἱεμένων· ὑπὸ δʼ ᾕρεον ἕρματα νηῶν. |
| 155 | Primary ἔνθά κεν Ἀργείοισιν ὑπέρμορα νόστος ἐτύχθη |
| 156 | Primary εἰ μὴ Ἀθηναίην Ἥρη πρὸς μῦθον ἔειπεν· |
| 157 | Primary ὢ πόποι αἰγιόχοιο Διὸς τέκος Ἀτρυτώνη, |
| 158 | Primary οὕτω δὴ οἶκον δὲ φίλην ἐς πατρίδα γαῖαν |
| 159 | Primary Ἀργεῖοι φεύξονται ἐπʼ εὐρέα νῶτα θαλάσσης, |
| 160 | Primary κὰδ δέ κεν εὐχωλὴν Πριάμῳ καὶ Τρωσὶ λίποιεν |
| 161 | Primary Ἀργείην Ἑλένην, ἧς εἵνεκα πολλοὶ Ἀχαιῶν |
| 162 | Primary ἐν Τροίῃ ἀπόλοντο φίλης ἀπὸ πατρίδος αἴης· |
| 163 | Primary ἀλλʼ ἴθι νῦν κατὰ λαὸν Ἀχαιῶν χαλκοχιτώνων· |
| 164 | Primary σοῖς ἀγανοῖς ἐπέεσσιν ἐρήτυε φῶτα ἕκαστον, |
| 165 | Primary μηδὲ ἔα νῆας ἅλα δʼ ἑλκέμεν ἀμφιελίσσας. |
| 166 | Primary ὣς ἔφατʼ, οὐδʼ ἀπίθησε θεὰ γλαυκῶπις Ἀθήνη, |
| 167 | Primary βῆ δὲ κατʼ Οὐλύμποιο καρήνων ἀΐξασα· |
| 168 | Primary καρπαλίμως δʼ ἵκανε θοὰς ἐπὶ νῆας Ἀχαιῶν. |
| 169 | Primary εὗρεν ἔπειτʼ Ὀδυσῆα Διὶ μῆτιν ἀτάλαντον |
| 170 | Primary ἑσταότʼ· οὐδʼ ὅ γε νηὸς ἐϋσσέλμοιο μελαίνης |
| 171 | Primary ἅπτετʼ, ἐπεί μιν ἄχος κραδίην καὶ θυμὸν ἵκανεν· |
| 172 | Primary ἀγχοῦ δʼ ἱσταμένη προσέφη γλαυκῶπις Ἀθήνη· |
| 173 | Primary διογενὲς Λαερτιάδη πολυμήχανʼ Ὀδυσσεῦ, |
| 174 | Primary οὕτω δὴ οἶκον δὲ φίλην ἐς πατρίδα γαῖαν |
| 175 | Primary φεύξεσθʼ ἐν νήεσσι πολυκλήϊσι πεσόντες, |
| 176 | Primary κὰδ δέ κεν εὐχωλὴν Πριάμῳ καὶ Τρωσὶ λίποιτε |
| 177 | Primary Ἀργείην Ἑλένην, ἧς εἵνεκα πολλοὶ Ἀχαιῶν |
| 178 | Primary ἐν Τροίῃ ἀπόλοντο φίλης ἀπὸ πατρίδος αἴης; |
| 179 | Primary ἀλλʼ ἴθι νῦν κατὰ λαὸν Ἀχαιῶν, μηδʼ ἔτʼ ἐρώει, |
| 180 | Primary σοῖς δʼ ἀγανοῖς ἐπέεσσιν ἐρήτυε φῶτα ἕκαστον, |
| 181 | Primary μηδὲ ἔα νῆας ἅλα δʼ ἑλκέμεν ἀμφιελίσσας. |
| 182 | Primary ὣς φάθʼ, ὃ δὲ ξυνέηκε θεᾶς ὄπα φωνησάσης, |
| 183 | Primary βῆ δὲ θέειν, ἀπὸ δὲ χλαῖναν βάλε· τὴν δὲ κόμισσε |
| 184 | Primary κῆρυξ Εὐρυβάτης Ἰθακήσιος ὅς οἱ ὀπήδει· |
| 185 | Primary αὐτὸς δʼ Ἀτρεΐδεω Ἀγαμέμνονος ἀντίος ἐλθὼν |
| 186 | Primary δέξατό οἱ σκῆπτρον πατρώϊον ἄφθιτον αἰεί· |
| 187 | Primary σὺν τῷ ἔβη κατὰ νῆας Ἀχαιῶν χαλκοχιτώνων. |
| 188 | Primary ὅν τινα μὲν βασιλῆα καὶ ἔξοχον ἄνδρα κιχείη |
| 189 | Primary τὸν δʼ ἀγανοῖς ἐπέεσσιν ἐρητύσασκε παραστάς· |
| 190 | Primary δαιμόνιʼ οὔ σε ἔοικε κακὸν ὣς δειδίσσεσθαι, |
| 191 | Primary ἀλλʼ αὐτός τε κάθησο καὶ ἄλλους ἵδρυε λαούς· |
| 192 | Primary οὐ γάρ πω σάφα οἶσθʼ οἷος νόος Ἀτρεΐωνος· |
| 193 | Primary νῦν μὲν πειρᾶται, τάχα δʼ ἴψεται υἷας Ἀχαιῶν. |
| 194 | Primary ἐν βουλῇ δʼ οὐ πάντες ἀκούσαμεν οἷον ἔειπε. |
| 195 | Primary μή τι χολωσάμενος ῥέξῃ κακὸν υἷας Ἀχαιῶν· |
| 196 | Primary θυμὸς δὲ μέγας ἐστὶ διοτρεφέων βασιλήων, |
| 197 | Primary τιμὴ δʼ ἐκ Διός ἐστι, φιλεῖ δέ ἑ μητίετα Ζεύς. |
| 198 | Primary ὃν δʼ αὖ δήμου τʼ ἄνδρα ἴδοι βοόωντά τʼ ἐφεύροι, |
| 199 | Primary τὸν σκήπτρῳ ἐλάσασκεν ὁμοκλήσασκέ τε μύθῳ· |
| 200 | Primary δαιμόνιʼ ἀτρέμας ἧσο καὶ ἄλλων μῦθον ἄκουε, |
| 201 | Primary οἳ σέο φέρτεροί εἰσι, σὺ δʼ ἀπτόλεμος καὶ ἄναλκις |
| 202 | Primary οὔτέ ποτʼ ἐν πολέμῳ ἐναρίθμιος οὔτʼ ἐνὶ βουλῇ· |
| 203 | Primary οὐ μέν πως πάντες βασιλεύσομεν ἐνθάδʼ Ἀχαιοί· |
| 204 | Primary οὐκ ἀγαθὸν πολυκοιρανίη· εἷς κοίρανος ἔστω, |
| 205 | Primary εἷς βασιλεύς, ᾧ δῶκε Κρόνου πάϊς ἀγκυλομήτεω |
| 206 | Primary σκῆπτρόν τʼ ἠδὲ θέμιστας, ἵνά σφισι βουλεύῃσι. |
| 207 | Primary ὣς ὅ γε κοιρανέων δίεπε στρατόν· οἳ δʼ ἀγορὴν δὲ |
| 208 | Primary αὖτις ἐπεσσεύοντο νεῶν ἄπο καὶ κλισιάων |
| 209 | Primary ἠχῇ, ὡς ὅτε κῦμα πολυφλοίσβοιο θαλάσσης |
| 210 | Primary αἰγιαλῷ μεγάλῳ βρέμεται, σμαραγεῖ δέ τε πόντος. |
| 211 | Primary ἄλλοι μέν ῥʼ ἕζοντο, ἐρήτυθεν δὲ καθʼ ἕδρας· |
| 212 | Primary Θερσίτης δʼ ἔτι μοῦνος ἀμετροεπὴς ἐκολῴα, |
| 213 | Primary ὃς ἔπεα φρεσὶν ᾗσιν ἄκοσμά τε πολλά τε ᾔδη |
| 214 | Primary μάψ, ἀτὰρ οὐ κατὰ κόσμον, ἐριζέμεναι βασιλεῦσιν, |
| 215 | Primary ἀλλʼ ὅ τι οἱ εἴσαιτο γελοίϊον Ἀργείοισιν |
| 216 | Primary ἔμμεναι· αἴσχιστος δὲ ἀνὴρ ὑπὸ Ἴλιον ἦλθε· |
| 217 | Primary φολκὸς ἔην, χωλὸς δʼ ἕτερον πόδα· τὼ δέ οἱ ὤμω |
| 218 | Primary κυρτὼ ἐπὶ στῆθος συνοχωκότε· αὐτὰρ ὕπερθε |
| 219 | Primary φοξὸς ἔην κεφαλήν, ψεδνὴ δʼ ἐπενήνοθε λάχνη. |
| 220 | Primary ἔχθιστος δʼ Ἀχιλῆϊ μάλιστʼ ἦν ἠδʼ Ὀδυσῆϊ· |
| 221 | Primary τὼ γὰρ νεικείεσκε· τότʼ αὖτʼ Ἀγαμέμνονι δίῳ |
| 222 | Primary ὀξέα κεκλήγων λέγʼ ὀνείδεα· τῷ δʼ ἄρʼ Ἀχαιοὶ |
| 223 | Primary ἐκπάγλως κοτέοντο νεμέσσηθέν τʼ ἐνὶ θυμῷ. |
| 224 | Primary αὐτὰρ ὃ μακρὰ βοῶν Ἀγαμέμνονα νείκεε μύθῳ· |
| 225 | Primary Ἀτρεΐδη τέο δʼ αὖτʼ ἐπιμέμφεαι ἠδὲ χατίζεις; |
| 226 | Primary πλεῖαί τοι χαλκοῦ κλισίαι, πολλαὶ δὲ γυναῖκες |
| 227 | Primary εἰσὶν ἐνὶ κλισίῃς ἐξαίρετοι, ἅς τοι Ἀχαιοὶ |
| 228 | Primary πρωτίστῳ δίδομεν εὖτʼ ἂν πτολίεθρον ἕλωμεν. |
| 229 | Primary ἦ ἔτι καὶ χρυσοῦ ἐπιδεύεαι, ὅν κέ τις οἴσει |
| 230 | Primary Τρώων ἱπποδάμων ἐξ Ἰλίου υἷος ἄποινα, |
| 231 | Primary ὅν κεν ἐγὼ δήσας ἀγάγω ἢ ἄλλος Ἀχαιῶν, |
| 232 | Primary ἠὲ γυναῖκα νέην, ἵνα μίσγεαι ἐν φιλότητι, |
| 233 | Primary ἥν τʼ αὐτὸς ἀπονόσφι κατίσχεαι; οὐ μὲν ἔοικεν |
| 234 | Primary ἀρχὸν ἐόντα κακῶν ἐπιβασκέμεν υἷας Ἀχαιῶν. |
| 235 | Primary ὦ πέπονες κάκʼ ἐλέγχεʼ Ἀχαιΐδες οὐκέτʼ Ἀχαιοὶ |
| 236 | Primary οἴκαδέ περ σὺν νηυσὶ νεώμεθα, τόνδε δʼ ἐῶμεν |
| 237 | Primary αὐτοῦ ἐνὶ Τροίῃ γέρα πεσσέμεν, ὄφρα ἴδηται |
| 238 | Primary ἤ ῥά τί οἱ χἠμεῖς προσαμύνομεν ἦε καὶ οὐκί· |
| 239 | Primary ὃς καὶ νῦν Ἀχιλῆα ἕο μέγʼ ἀμείνονα φῶτα |
| 240 | Primary ἠτίμησεν· ἑλὼν γὰρ ἔχει γέρας αὐτὸς ἀπούρας. |
| 241 | Primary ἀλλὰ μάλʼ οὐκ Ἀχιλῆϊ χόλος φρεσίν, ἀλλὰ μεθήμων· |
| 242 | Primary ἦ γὰρ ἂν Ἀτρεΐδη νῦν ὕστατα λωβήσαιο· |
| 243 | Primary ὣς φάτο νεικείων Ἀγαμέμνονα ποιμένα λαῶν, |
| 244 | Primary Θερσίτης· τῷ δʼ ὦκα παρίστατο δῖος Ὀδυσσεύς, |
| 245 | Primary καί μιν ὑπόδρα ἰδὼν χαλεπῷ ἠνίπαπε μύθῳ· |
| 246 | Primary Θερσῖτʼ ἀκριτόμυθε, λιγύς περ ἐὼν ἀγορητής, |
| 247 | Primary ἴσχεο, μηδʼ ἔθελʼ οἶος ἐριζέμεναι βασιλεῦσιν· |
| 248 | Primary οὐ γὰρ ἐγὼ σέο φημὶ χερειότερον βροτὸν ἄλλον |
| 249 | Primary ἔμμεναι, ὅσσοι ἅμʼ Ἀτρεΐδῃς ὑπὸ Ἴλιον ἦλθον. |
| 250 | Primary τὼ οὐκ ἂν βασιλῆας ἀνὰ στόμʼ ἔχων ἀγορεύοις, |
| 251 | Primary καί σφιν ὀνείδεά τε προφέροις, νόστόν τε φυλάσσοις. |
| 252 | Primary οὐδέ τί πω σάφα ἴδμεν ὅπως ἔσται τάδε ἔργα, |
| 253 | Primary ἢ εὖ ἦε κακῶς νοστήσομεν υἷες Ἀχαιῶν. |
| 254 | Primary τὼ νῦν Ἀτρεΐδῃ Ἀγαμέμνονι ποιμένι λαῶν |
| 255 | Primary ἧσαι ὀνειδίζων, ὅτι οἱ μάλα πολλὰ διδοῦσιν |
| 256 | Primary ἥρωες Δαναοί· σὺ δὲ κερτομέων ἀγορεύεις. |
| 257 | Primary ἀλλʼ ἔκ τοι ἐρέω, τὸ δὲ καὶ τετελεσμένον ἔσται· |
| 258 | Primary εἴ κʼ ἔτι σʼ ἀφραίνοντα κιχήσομαι ὥς νύ περ ὧδε, |
| 259 | Primary μηκέτʼ ἔπειτʼ Ὀδυσῆϊ κάρη ὤμοισιν ἐπείη, |
| 260 | Primary μηδʼ ἔτι Τηλεμάχοιο πατὴρ κεκλημένος εἴην, |
| 261 | Primary εἰ μὴ ἐγώ σε λαβὼν ἀπὸ μὲν φίλα εἵματα δύσω, |
| 262 | Primary χλαῖνάν τʼ ἠδὲ χιτῶνα, τά τʼ αἰδῶ ἀμφικαλύπτει, |
| 263 | Primary αὐτὸν δὲ κλαίοντα θοὰς ἐπὶ νῆας ἀφήσω |
| 264 | Primary πεπλήγων ἀγορῆθεν ἀεικέσσι πληγῇσιν. |
| 265 | Primary ὣς ἄρʼ ἔφη, σκήπτρῳ δὲ μετάφρενον ἠδὲ καὶ ὤμω |
| 266 | Primary πλῆξεν· ὃ δʼ ἰδνώθη, θαλερὸν δέ οἱ ἔκπεσε δάκρυ· |
| 267 | Primary σμῶδιξ δʼ αἱματόεσσα μεταφρένου ἐξυπανέστη |
| 268 | Primary σκήπτρου ὕπο χρυσέου· ὃ δʼ ἄρʼ ἕζετο τάρβησέν τε, |
| 269 | Primary ἀλγήσας δʼ ἀχρεῖον ἰδὼν ἀπομόρξατο δάκρυ. |
| 270 | Primary οἳ δὲ καὶ ἀχνύμενοί περ ἐπʼ αὐτῷ ἡδὺ γέλασσαν· |
| 271 | Primary ὧδε δέ τις εἴπεσκεν ἰδὼν ἐς πλησίον ἄλλον· |
| 272 | Primary ὢ πόποι ἦ δὴ μυρίʼ Ὀδυσσεὺς ἐσθλὰ ἔοργε |
| 273 | Primary βουλάς τʼ ἐξάρχων ἀγαθὰς πόλεμόν τε κορύσσων· |
| 274 | Primary νῦν δὲ τόδε μέγʼ ἄριστον ἐν Ἀργείοισιν ἔρεξεν, |
| 275 | Primary ὃς τὸν λωβητῆρα ἐπεσβόλον ἔσχʼ ἀγοράων. |
| 276 | Primary οὔ θήν μιν πάλιν αὖτις ἀνήσει θυμὸς ἀγήνωρ |
| 277 | Primary νεικείειν βασιλῆας ὀνειδείοις ἐπέεσσιν. |
| 278 | Primary ὣς φάσαν ἣ πληθύς· ἀνὰ δʼ ὃ πτολίπορθος Ὀδυσσεὺς |
| 279 | Primary ἔστη σκῆπτρον ἔχων· παρὰ δὲ γλαυκῶπις Ἀθήνη |
| 280 | Primary εἰδομένη κήρυκι σιωπᾶν λαὸν ἀνώγει, |
| 281 | Primary ὡς ἅμα θʼ οἳ πρῶτοί τε καὶ ὕστατοι υἷες Ἀχαιῶν |
| 282 | Primary μῦθον ἀκούσειαν καὶ ἐπιφρασσαίατο βουλήν· |
| 283 | Primary ὅ σφιν ἐὺ φρονέων ἀγορήσατο καὶ μετέειπεν· |
| 284 | Primary Ἀτρεΐδη νῦν δή σε ἄναξ ἐθέλουσιν Ἀχαιοὶ |
| 285 | Primary πᾶσιν ἐλέγχιστον θέμεναι μερόπεσσι βροτοῖσιν, |
| 286 | Primary οὐδέ τοι ἐκτελέουσιν ὑπόσχεσιν ἥν περ ὑπέσταν |
| 287 | Primary ἐνθάδʼ ἔτι στείχοντες ἀπʼ Ἄργεος ἱπποβότοιο |
| 288 | Primary Ἴλιον ἐκπέρσαντʼ εὐτείχεον ἀπονέεσθαι. |
| 289 | Primary ὥς τε γὰρ ἢ παῖδες νεαροὶ χῆραί τε γυναῖκες |
| 290 | Primary ἀλλήλοισιν ὀδύρονται οἶκον δὲ νέεσθαι. |
| 291 | Primary ἦ μὴν καὶ πόνος ἐστὶν ἀνιηθέντα νέεσθαι· |
| 292 | Primary καὶ γάρ τίς θʼ ἕνα μῆνα μένων ἀπὸ ἧς ἀλόχοιο |
| 293 | Primary ἀσχαλάᾳ σὺν νηῒ πολυζύγῳ, ὅν περ ἄελλαι |
| 294 | Primary χειμέριαι εἰλέωσιν ὀρινομένη τε θάλασσα· |
| 295 | Primary ἡμῖν δʼ εἴνατός ἐστι περιτροπέων ἐνιαυτὸς |
| 296 | Primary ἐνθάδε μιμνόντεσσι· τὼ οὐ νεμεσίζομʼ Ἀχαιοὺς |
| 297 | Primary ἀσχαλάαν παρὰ νηυσὶ κορωνίσιν· ἀλλὰ καὶ ἔμπης |
| 298 | Primary αἰσχρόν τοι δηρόν τε μένειν κενεόν τε νέεσθαι. |
| 299 | Primary τλῆτε φίλοι, καὶ μείνατʼ ἐπὶ χρόνον ὄφρα δαῶμεν |
| 300 | Primary ἢ ἐτεὸν Κάλχας μαντεύεται ἦε καὶ οὐκί. |
| 301 | Primary εὖ γὰρ δὴ τόδε ἴδμεν ἐνὶ φρεσίν, ἐστὲ δὲ πάντες |
| 302 | Primary μάρτυροι, οὓς μὴ κῆρες ἔβαν θανάτοιο φέρουσαι· |
| 303 | Primary χθιζά τε καὶ πρωΐζʼ ὅτʼ ἐς Αὐλίδα νῆες Ἀχαιῶν |
| 304 | Primary ἠγερέθοντο κακὰ Πριάμῳ καὶ Τρωσὶ φέρουσαι, |
| 305 | Primary ἡμεῖς δʼ ἀμφὶ περὶ κρήνην ἱεροὺς κατὰ βωμοὺς |
| 306 | Primary ἕρδομεν ἀθανάτοισι τεληέσσας ἑκατόμβας |
| 307 | Primary καλῇ ὑπὸ πλατανίστῳ ὅθεν ῥέεν ἀγλαὸν ὕδωρ· |
| 308 | Primary ἔνθʼ ἐφάνη μέγα σῆμα· δράκων ἐπὶ νῶτα δαφοινὸς |
| 309 | Primary σμερδαλέος, τόν ῥʼ αὐτὸς Ὀλύμπιος ἧκε φόως δέ, |
| 310 | Primary βωμοῦ ὑπαΐξας πρός ῥα πλατάνιστον ὄρουσεν. |
| 311 | Primary ἔνθα δʼ ἔσαν στρουθοῖο νεοσσοί, νήπια τέκνα, |
| 312 | Primary ὄζῳ ἐπʼ ἀκροτάτῳ πετάλοις ὑποπεπτηῶτες |
| 313 | Primary ὀκτώ, ἀτὰρ μήτηρ ἐνάτη ἦν ἣ τέκε τέκνα· |
| 314 | Primary ἔνθʼ ὅ γε τοὺς ἐλεεινὰ κατήσθιε τετριγῶτας· |
| 315 | Primary μήτηρ δʼ ἀμφεποτᾶτο ὀδυρομένη φίλα τέκνα· |
| 316 | Primary τὴν δʼ ἐλελιξάμενος πτέρυγος λάβεν ἀμφιαχυῖαν. |
| 317 | Primary αὐτὰρ ἐπεὶ κατὰ τέκνα φάγε στρουθοῖο καὶ αὐτήν, |
| 318 | Primary τὸν μὲν ἀρίζηλον θῆκεν θεὸς ὅς περ ἔφηνε· |
| 319 | Primary λᾶαν γάρ μιν ἔθηκε Κρόνου πάϊς ἀγκυλομήτεω· |
| 320 | Primary ἡμεῖς δʼ ἑσταότες θαυμάζομεν οἷον ἐτύχθη. |
| 321 | Primary ὡς οὖν δεινὰ πέλωρα θεῶν εἰσῆλθʼ ἑκατόμβας, |
| 322 | Primary Κάλχας δʼ αὐτίκʼ ἔπειτα θεοπροπέων ἀγόρευε· |
| 323 | Primary τίπτʼ ἄνεῳ ἐγένεσθε κάρη κομόωντες Ἀχαιοί; |
| 324 | Primary ἡμῖν μὲν τόδʼ ἔφηνε τέρας μέγα μητίετα Ζεὺς |
| 325 | Primary ὄψιμον ὀψιτέλεστον, ὅου κλέος οὔ ποτʼ ὀλεῖται. |
| 326 | Primary ὡς οὗτος κατὰ τέκνα φάγε στρουθοῖο καὶ αὐτὴν |
| 327 | Primary ὀκτώ, ἀτὰρ μήτηρ ἐνάτη ἦν ἣ τέκε τέκνα, |
| 328 | Primary ὣς ἡμεῖς τοσσαῦτʼ ἔτεα πτολεμίξομεν αὖθι, |
| 329 | Primary τῷ δεκάτῳ δὲ πόλιν αἱρήσομεν εὐρυάγυιαν. |
| 330 | Primary κεῖνος τὼς ἀγόρευε· τὰ δὴ νῦν πάντα τελεῖται. |
| 331 | Primary ἀλλʼ ἄγε μίμνετε πάντες ἐϋκνήμιδες Ἀχαιοὶ |
| 332 | Primary αὐτοῦ εἰς ὅ κεν ἄστυ μέγα Πριάμοιο ἕλωμεν. |
| 333 | Primary ὣς ἔφατʼ, Ἀργεῖοι δὲ μέγʼ ἴαχον, ἀμφὶ δὲ νῆες |
| 334 | Primary σμερδαλέον κονάβησαν ἀϋσάντων ὑπʼ Ἀχαιῶν, |
| 335 | Primary μῦθον ἐπαινήσαντες Ὀδυσσῆος θείοιο· |
| 336 | Primary τοῖσι δὲ καὶ μετέειπε Γερήνιος ἱππότα Νέστωρ· |
| 337 | Primary ὦ πόποι ἦ δὴ παισὶν ἐοικότες ἀγοράασθε |
| 338 | Primary νηπιάχοις οἷς οὔ τι μέλει πολεμήϊα ἔργα. |
| 339 | Primary πῇ δὴ συνθεσίαι τε καὶ ὅρκια βήσεται ἥμιν; |
| 340 | Primary ἐν πυρὶ δὴ βουλαί τε γενοίατο μήδεά τʼ ἀνδρῶν |
| 341 | Primary σπονδαί τʼ ἄκρητοι καὶ δεξιαί, ᾗς ἐπέπιθμεν· |
| 342 | Primary αὔτως γὰρ ἐπέεσσʼ ἐριδαίνομεν, οὐδέ τι μῆχος |
| 343 | Primary εὑρέμεναι δυνάμεσθα, πολὺν χρόνον ἐνθάδʼ ἐόντες. |
| 344 | Primary Ἀτρεΐδη σὺ δʼ ἔθʼ ὡς πρὶν ἔχων ἀστεμφέα βουλὴν |
| 345 | Primary ἄρχευʼ Ἀργείοισι κατὰ κρατερὰς ὑσμίνας, |
| 346 | Primary τούσδε δʼ ἔα φθινύθειν ἕνα καὶ δύο, τοί κεν Ἀχαιῶν |
| 347 | Primary νόσφιν βουλεύωσʼ· ἄνυσις δʼ οὐκ ἔσσεται αὐτῶν· |
| 348 | Primary πρὶν Ἄργος δʼ ἰέναι πρὶν καὶ Διὸς αἰγιόχοιο |
| 349 | Primary γνώμεναι εἴ τε ψεῦδος ὑπόσχεσις εἴ τε καὶ οὐκί. |
| 350 | Primary φημὶ γὰρ οὖν κατανεῦσαι ὑπερμενέα Κρονίωνα |
| 351 | Primary ἤματι τῷ ὅτε νηυσὶν ἐν ὠκυπόροισιν ἔβαινον |
| 352 | Primary Ἀργεῖοι Τρώεσσι φόνον καὶ κῆρα φέροντες |
| 353 | Primary ἀστράπτων ἐπιδέξιʼ ἐναίσιμα σήματα φαίνων. |
| 354 | Primary τὼ μή τις πρὶν ἐπειγέσθω οἶκον δὲ νέεσθαι |
| 355 | Primary πρίν τινα πὰρ Τρώων ἀλόχῳ κατακοιμηθῆναι, |
| 356 | Primary τίσασθαι δʼ Ἑλένης ὁρμήματά τε στοναχάς τε. |
| 357 | Primary εἰ δέ τις ἐκπάγλως ἐθέλει οἶκον δὲ νέεσθαι |
| 358 | Primary ἁπτέσθω ἧς νηὸς ἐϋσσέλμοιο μελαίνης, |
| 359 | Primary ὄφρα πρόσθʼ ἄλλων θάνατον καὶ πότμον ἐπίσπῃ. |
| 360 | Primary ἀλλὰ ἄναξ αὐτός τʼ εὖ μήδεο πείθεό τʼ ἄλλῳ· |
| 361 | Primary οὔ τοι ἀπόβλητον ἔπος ἔσσεται ὅττί κεν εἴπω· |
| 362 | Primary κρῖνʼ ἄνδρας κατὰ φῦλα κατὰ φρήτρας Ἀγάμεμνον, |
| 363 | Primary ὡς φρήτρη φρήτρηφιν ἀρήγῃ, φῦλα δὲ φύλοις. |
| 364 | Primary εἰ δέ κεν ὣς ἕρξῃς καί τοι πείθωνται Ἀχαιοί, |
| 365 | Primary γνώσῃ ἔπειθʼ ὅς θʼ ἡγεμόνων κακὸς ὅς τέ νυ λαῶν |
| 366 | Primary ἠδʼ ὅς κʼ ἐσθλὸς ἔῃσι· κατὰ σφέας γὰρ μαχέονται. |
| 367 | Primary γνώσεαι δʼ εἰ καὶ θεσπεσίῃ πόλιν οὐκ ἀλαπάξεις, |
| 368 | Primary ἦ ἀνδρῶν κακότητι καὶ ἀφραδίῃ πολέμοιο. |
| 369 | Primary τὸν δʼ ἀπαμειβόμενος προσέφη κρείων Ἀγαμέμνων· |
| 370 | Primary ἦ μὰν αὖτʼ ἀγορῇ νικᾷς γέρον υἷας Ἀχαιῶν. |
| 371 | Primary αἲ γὰρ Ζεῦ τε πάτερ καὶ Ἀθηναίη καὶ Ἄπολλον |
| 372 | Primary τοιοῦτοι δέκα μοι συμφράδμονες εἶεν Ἀχαιῶν· |
| 373 | Primary τώ κε τάχʼ ἠμύσειε πόλις Πριάμοιο ἄνακτος |
| 374 | Primary χερσὶν ὑφʼ ἡμετέρῃσιν ἁλοῦσά τε περθομένη τε. |
| 375 | Primary ἀλλά μοι αἰγίοχος Κρονίδης Ζεὺς ἄλγεʼ ἔδωκεν, |
| 376 | Primary ὅς με μετʼ ἀπρήκτους ἔριδας καὶ νείκεα βάλλει. |
| 377 | Primary καὶ γὰρ ἐγὼν Ἀχιλεύς τε μαχεσσάμεθʼ εἵνεκα κούρης |
| 378 | Primary ἀντιβίοις ἐπέεσσιν, ἐγὼ δʼ ἦρχον χαλεπαίνων· |
| 379 | Primary εἰ δέ ποτʼ ἔς γε μίαν βουλεύσομεν, οὐκέτʼ ἔπειτα |
| 380 | Primary Τρωσὶν ἀνάβλησις κακοῦ ἔσσεται οὐδʼ ἠβαιόν. |
| 381 | Primary νῦν δʼ ἔρχεσθʼ ἐπὶ δεῖπνον ἵνα ξυνάγωμεν Ἄρηα. |
| 382 | Primary εὖ μέν τις δόρυ θηξάσθω, εὖ δʼ ἀσπίδα θέσθω, |
| 383 | Primary εὖ δέ τις ἵπποισιν δεῖπνον δότω ὠκυπόδεσσιν, |
| 384 | Primary εὖ δέ τις ἅρματος ἀμφὶς ἰδὼν πολέμοιο μεδέσθω, |
| 385 | Primary ὥς κε πανημέριοι στυγερῷ κρινώμεθʼ Ἄρηϊ. |
| 386 | Primary οὐ γὰρ παυσωλή γε μετέσσεται οὐδʼ ἠβαιὸν |
| 387 | Primary εἰ μὴ νὺξ ἐλθοῦσα διακρινέει μένος ἀνδρῶν. |
| 388 | Primary ἱδρώσει μέν τευ τελαμὼν ἀμφὶ στήθεσφιν |
| 389 | Primary ἀσπίδος ἀμφιβρότης, περὶ δʼ ἔγχεϊ χεῖρα καμεῖται· |
| 390 | Primary ἱδρώσει δέ τευ ἵππος ἐΰξοον ἅρμα τιταίνων. |
| 391 | Primary ὃν δέ κʼ ἐγὼν ἀπάνευθε μάχης ἐθέλοντα νοήσω |
| 392 | Primary μιμνάζειν παρὰ νηυσὶ κορωνίσιν, οὔ οἱ ἔπειτα |
| 393 | Primary ἄρκιον ἐσσεῖται φυγέειν κύνας ἠδʼ οἰωνούς. |
| 394 | Primary ὣς ἔφατʼ, Ἀργεῖοι δὲ μέγʼ ἴαχον ὡς ὅτε κῦμα |
| 395 | Primary ἀκτῇ ἐφʼ ὑψηλῇ, ὅτε κινήσῃ Νότος ἐλθών, |
| 396 | Primary προβλῆτι σκοπέλῳ· τὸν δʼ οὔ ποτε κύματα λείπει |
| 397 | Primary παντοίων ἀνέμων, ὅτʼ ἂν ἔνθʼ ἢ ἔνθα γένωνται. |
| 398 | Primary ἀνστάντες δʼ ὀρέοντο κεδασθέντες κατὰ νῆας, |
| 399 | Primary κάπνισσάν τε κατὰ κλισίας, καὶ δεῖπνον ἕλοντο. |
| 400 | Primary ἄλλος δʼ ἄλλῳ ἔρεζε θεῶν αἰειγενετάων |
| 401 | Primary εὐχόμενος θάνατόν τε φυγεῖν καὶ μῶλον Ἄρηος. |
| 402 | Primary αὐτὰρ ὃ βοῦν ἱέρευσε ἄναξ ἀνδρῶν Ἀγαμέμνων |
| 403 | Primary πίονα πενταέτηρον ὑπερμενέϊ Κρονίωνι, |
| 404 | Primary κίκλησκεν δὲ γέροντας ἀριστῆας Παναχαιῶν, |
| 405 | Primary Νέστορα μὲν πρώτιστα καὶ Ἰδομενῆα ἄνακτα, |
| 406 | Primary αὐτὰρ ἔπειτʼ Αἴαντε δύω καὶ Τυδέος υἱόν, |
| 407 | Primary ἕκτον δʼ αὖτʼ Ὀδυσῆα Διὶ μῆτιν ἀτάλαντον. |
| 408 | Primary αὐτόματος δέ οἱ ἦλθε βοὴν ἀγαθὸς Μενέλαος· |
| 409 | Primary ᾔδεε γὰρ κατὰ θυμὸν ἀδελφεὸν ὡς ἐπονεῖτο. |
| 410 | Primary βοῦν δὲ περιστήσαντο καὶ οὐλοχύτας ἀνέλοντο· |
| 411 | Primary τοῖσιν δʼ εὐχόμενος μετέφη κρείων Ἀγαμέμνων· |
| 412 | Primary Ζεῦ κύδιστε μέγιστε κελαινεφὲς αἰθέρι ναίων |
| 413 | Primary μὴ πρὶν ἐπʼ ἠέλιον δῦναι καὶ ἐπὶ κνέφας ἐλθεῖν |
| 414 | Primary πρίν με κατὰ πρηνὲς βαλέειν Πριάμοιο μέλαθρον |
| 415 | Primary αἰθαλόεν, πρῆσαι δὲ πυρὸς δηΐοιο θύρετρα, |
| 416 | Primary Ἑκτόρεον δὲ χιτῶνα περὶ στήθεσσι δαΐξαι |
| 417 | Primary χαλκῷ ῥωγαλέον· πολέες δʼ ἀμφʼ αὐτὸν ἑταῖροι |
| 418 | Primary πρηνέες ἐν κονίῃσιν ὀδὰξ λαζοίατο γαῖαν. |
| 419 | Primary ὣς ἔφατʼ, οὐδʼ ἄρα πώ οἱ ἐπεκραίαινε Κρονίων, |
| 420 | Primary ἀλλʼ ὅ γε δέκτο μὲν ἱρά, πόνον δʼ ἀμέγαρτον ὄφελλεν. |
| 421 | Primary αὐτὰρ ἐπεί ῥʼ εὔξαντο καὶ οὐλοχύτας προβάλοντο, |
| 422 | Primary αὐέρυσαν μὲν πρῶτα καὶ ἔσφαξαν καὶ ἔδειραν, |
| 423 | Primary μηρούς τʼ ἐξέταμον κατά τε κνίσῃ ἐκάλυψαν |
| 424 | Primary δίπτυχα ποιήσαντες, ἐπʼ αὐτῶν δʼ ὠμοθέτησαν. |
| 425 | Primary καὶ τὰ μὲν ἂρ σχίζῃσιν ἀφύλλοισιν κατέκαιον, |
| 426 | Primary σπλάγχνα δʼ ἄρʼ ἀμπείραντες ὑπείρεχον Ἡφαίστοιο. |
| 427 | Primary αὐτὰρ ἐπεὶ κατὰ μῆρε κάη καὶ σπλάγχνα πάσαντο, |
| 428 | Primary μίστυλλόν τʼ ἄρα τἆλλα καὶ ἀμφʼ ὀβελοῖσιν ἔπειραν, |
| 429 | Primary ὤπτησάν τε περιφραδέως, ἐρύσαντό τε πάντα. |
| 430 | Primary αὐτὰρ ἐπεὶ παύσαντο πόνου τετύκοντό τε δαῖτα |
| 431 | Primary δαίνυντʼ, οὐδέ τι θυμὸς ἐδεύετο δαιτὸς ἐΐσης. |
| 432 | Primary αὐτὰρ ἐπεὶ πόσιος καὶ ἐδητύος ἐξ ἔρον ἕντο, |
| 433 | Primary τοῖς ἄρα μύθων ἦρχε Γερήνιος ἱππότα Νέστωρ· |
| 434 | Primary Ἀτρεΐδη κύδιστε ἄναξ ἀνδρῶν Ἀγάμεμνον, |
| 435 | Primary μηκέτι νῦν δήθʼ αὖθι λεγώμεθα, μηδʼ ἔτι δηρὸν |
| 436 | Primary ἀμβαλλώμεθα ἔργον ὃ δὴ θεὸς ἐγγυαλίζει. |
| 437 | Primary ἀλλʼ ἄγε κήρυκες μὲν Ἀχαιῶν χαλκοχιτώνων |
| 438 | Primary λαὸν κηρύσσοντες ἀγειρόντων κατὰ νῆας, |
| 439 | Primary ἡμεῖς δʼ ἀθρόοι ὧδε κατὰ στρατὸν εὐρὺν Ἀχαιῶν |
| 440 | Primary ἴομεν ὄφρα κε θᾶσσον ἐγείρομεν ὀξὺν Ἄρηα. |
| 441 | Primary ὣς ἔφατʼ, οὐδʼ ἀπίθησεν ἄναξ ἀνδρῶν Ἀγαμέμνων. |
| 442 | Primary αὐτίκα κηρύκεσσι λιγυφθόγγοισι κέλευσε |
| 443 | Primary κηρύσσειν πόλεμον δὲ κάρη κομόωντας Ἀχαιούς· |
| 444 | Primary οἳ μὲν ἐκήρυσσον, τοὶ δʼ ἠγείροντο μάλʼ ὦκα. |
| 445 | Primary οἳ δʼ ἀμφʼ Ἀτρεΐωνα διοτρεφέες βασιλῆες |
| 446 | Primary θῦνον κρίνοντες, μετὰ δὲ γλαυκῶπις Ἀθήνη |
| 447 | Primary αἰγίδʼ ἔχουσʼ ἐρίτιμον ἀγήρων ἀθανάτην τε, |
| 448 | Primary τῆς ἑκατὸν θύσανοι παγχρύσεοι ἠερέθονται, |
| 449 | Primary πάντες ἐϋπλεκέες, ἑκατόμβοιος δὲ ἕκαστος· |
| 450 | Primary σὺν τῇ παιφάσσουσα διέσσυτο λαὸν Ἀχαιῶν |
| 451 | Primary ὀτρύνουσʼ ἰέναι· ἐν δὲ σθένος ὦρσεν ἑκάστῳ |
| 452 | Primary καρδίῃ ἄλληκτον πολεμίζειν ἠδὲ μάχεσθαι. |
| 453 | Primary τοῖσι δʼ ἄφαρ πόλεμος γλυκίων γένετʼ ἠὲ νέεσθαι |
| 454 | Primary ἐν νηυσὶ γλαφυρῇσι φίλην ἐς πατρίδα γαῖαν. |
| 455 | Primary ἠΰτε πῦρ ἀΐδηλον ἐπιφλέγει ἄσπετον ὕλην |
| 456 | Primary οὔρεος ἐν κορυφῇς, ἕκαθεν δέ τε φαίνεται αὐγή, |
| 457 | Primary ὣς τῶν ἐρχομένων ἀπὸ χαλκοῦ θεσπεσίοιο |
| 458 | Primary αἴγλη παμφανόωσα διʼ αἰθέρος οὐρανὸν ἷκε. |
| 459 | Primary τῶν δʼ ὥς τʼ ὀρνίθων πετεηνῶν ἔθνεα πολλὰ |
| 460 | Primary χηνῶν ἢ γεράνων ἢ κύκνων δουλιχοδείρων |
| 461 | Primary Ἀσίω ἐν λειμῶνι Καϋστρίου ἀμφὶ ῥέεθρα |
| 462 | Primary ἔνθα καὶ ἔνθα ποτῶνται ἀγαλλόμενα πτερύγεσσι |
| 463 | Primary κλαγγηδὸν προκαθιζόντων, σμαραγεῖ δέ τε λειμών, |
| 464 | Primary ὣς τῶν ἔθνεα πολλὰ νεῶν ἄπο καὶ κλισιάων |
| 465 | Primary ἐς πεδίον προχέοντο Σκαμάνδριον· αὐτὰρ ὑπὸ χθὼν |
| 466 | Primary σμερδαλέον κονάβιζε ποδῶν αὐτῶν τε καὶ ἵππων. |
| 467 | Primary ἔσταν δʼ ἐν λειμῶνι Σκαμανδρίῳ ἀνθεμόεντι |
| 468 | Primary μυρίοι, ὅσσά τε φύλλα καὶ ἄνθεα γίγνεται ὥρῃ. |
| 469 | Primary ἠΰτε μυιάων ἁδινάων ἔθνεα πολλὰ |
| 470 | Primary αἵ τε κατὰ σταθμὸν ποιμνήϊον ἠλάσκουσιν |
| 471 | Primary ὥρῃ ἐν εἰαρινῇ ὅτε τε γλάγος ἄγγεα δεύει, |
| 472 | Primary τόσσοι ἐπὶ Τρώεσσι κάρη κομόωντες Ἀχαιοὶ |
| 473 | Primary ἐν πεδίῳ ἵσταντο διαρραῖσαι μεμαῶτες. |
| 474 | Primary τοὺς δʼ ὥς τʼ αἰπόλια πλατέʼ αἰγῶν αἰπόλοι ἄνδρες |
| 475 | Primary ῥεῖα διακρίνωσιν ἐπεί κε νομῷ μιγέωσιν, |
| 476 | Primary ὣς τοὺς ἡγεμόνες διεκόσμεον ἔνθα καὶ ἔνθα |
| 477 | Primary ὑσμίνην δʼ ἰέναι, μετὰ δὲ κρείων Ἀγαμέμνων |
| 478 | Primary ὄμματα καὶ κεφαλὴν ἴκελος Διὶ τερπικεραύνῳ, |
| 479 | Primary Ἄρεϊ δὲ ζώνην, στέρνον δὲ Ποσειδάωνι. |
| 480 | Primary ἠΰτε βοῦς ἀγέληφι μέγʼ ἔξοχος ἔπλετο πάντων |
| 481 | Primary ταῦρος· ὃ γάρ τε βόεσσι μεταπρέπει ἀγρομένῃσι· |
| 482 | Primary τοῖον ἄρʼ Ἀτρεΐδην θῆκε Ζεὺς ἤματι κείνῳ |
| 483 | Primary ἐκπρεπέʼ ἐν πολλοῖσι καὶ ἔξοχον ἡρώεσσιν. |
| 484 | Primary ἔσπετε νῦν μοι Μοῦσαι Ὀλύμπια δώματʼ ἔχουσαι· |
| 485 | Primary ὑμεῖς γὰρ θεαί ἐστε πάρεστέ τε ἴστέ τε πάντα, |
| 486 | Primary ἡμεῖς δὲ κλέος οἶον ἀκούομεν οὐδέ τι ἴδμεν· |
| 487 | Primary οἵ τινες ἡγεμόνες Δαναῶν καὶ κοίρανοι ἦσαν· |
| 488 | Primary πληθὺν δʼ οὐκ ἂν ἐγὼ μυθήσομαι οὐδʼ ὀνομήνω, |
| 489 | Primary οὐδʼ εἴ μοι δέκα μὲν γλῶσσαι, δέκα δὲ στόματʼ εἶεν, |
| 490 | Primary φωνὴ δʼ ἄρρηκτος, χάλκεον δέ μοι ἦτορ ἐνείη, |
| 491 | Primary εἰ μὴ Ὀλυμπιάδες Μοῦσαι Διὸς αἰγιόχοιο |
| 492 | Primary θυγατέρες μνησαίαθʼ ὅσοι ὑπὸ Ἴλιον ἦλθον· |
| 493 | Primary ἀρχοὺς αὖ νηῶν ἐρέω νῆάς τε προπάσας. |
| 494 | Primary Βοιωτῶν μὲν Πηνέλεως καὶ Λήϊτος ἦρχον |
| 495 | Primary Ἀρκεσίλαός τε Προθοήνωρ τε Κλονίος τε, |
| 496 | Primary οἵ θʼ Ὑρίην ἐνέμοντο καὶ Αὐλίδα πετρήεσσαν |
| 497 | Primary Σχοῖνόν τε Σκῶλόν τε πολύκνημόν τʼ Ἐτεωνόν, |
| 498 | Primary Θέσπειαν Γραῖάν τε καὶ εὐρύχορον Μυκαλησσόν, |
| 499 | Primary οἵ τʼ ἀμφʼ Ἅρμʼ ἐνέμοντο καὶ Εἰλέσιον καὶ Ἐρυθράς, |
| 500 | Primary οἵ τʼ Ἐλεῶνʼ εἶχον ἠδʼ Ὕλην καὶ Πετεῶνα, |
| 501 | Primary Ὠκαλέην Μεδεῶνά τʼ ἐϋκτίμενον πτολίεθρον, |
| 502 | Primary Κώπας Εὔτρησίν τε πολυτρήρωνά τε Θίσβην, |
| 503 | Primary οἵ τε Κορώνειαν καὶ ποιήενθʼ Ἁλίαρτον, |
| 504 | Primary οἵ τε Πλάταιαν ἔχον ἠδʼ οἳ Γλισᾶντʼ ἐνέμοντο, |
| 505 | Primary οἵ θʼ Ὑποθήβας εἶχον ἐϋκτίμενον πτολίεθρον, |
| 506 | Primary Ὀγχηστόν θʼ ἱερὸν Ποσιδήϊον ἀγλαὸν ἄλσος, |
| 507 | Primary οἵ τε πολυστάφυλον Ἄρνην ἔχον, οἵ τε Μίδειαν |
| 508 | Primary Νῖσάν τε ζαθέην Ἀνθηδόνα τʼ ἐσχατόωσαν· |
| 509 | Primary τῶν μὲν πεντήκοντα νέες κίον, ἐν δὲ ἑκάστῃ |
| 510 | Primary κοῦροι Βοιωτῶν ἑκατὸν καὶ εἴκοσι βαῖνον. |
| 511 | Primary οἳ δʼ Ἀσπληδόνα ναῖον ἰδʼ Ὀρχομενὸν Μινύειον, |
| 512 | Primary τῶν ἦρχʼ Ἀσκάλαφος καὶ Ἰάλμενος υἷες Ἄρηος |
| 513 | Primary οὓς τέκεν Ἀστυόχη δόμῳ Ἄκτορος Ἀζεΐδαο, |
| 514 | Primary παρθένος αἰδοίη ὑπερώϊον εἰσαναβᾶσα |
| 515 | Primary Ἄρηϊ κρατερῷ· ὃ δέ οἱ παρελέξατο λάθρῃ· |
| 516 | Primary τοῖς δὲ τριήκοντα γλαφυραὶ νέες ἐστιχόωντο. |
| 517 | Primary αὐτὰρ Φωκήων Σχεδίος καὶ Ἐπίστροφος ἦρχον |
| 518 | Primary υἷες Ἰφίτου μεγαθύμου Ναυβολίδαο, |
| 519 | Primary οἳ Κυπάρισσον ἔχον Πυθῶνά τε πετρήεσσαν |
| 520 | Primary Κρῖσάν τε ζαθέην καὶ Δαυλίδα καὶ Πανοπῆα, |
| 521 | Primary οἵ τʼ Ἀνεμώρειαν καὶ Ὑάμπολιν ἀμφενέμοντο, |
| 522 | Primary οἵ τʼ ἄρα πὰρ ποταμὸν Κηφισὸν δῖον ἔναιον, |
| 523 | Primary οἵ τε Λίλαιαν ἔχον πηγῇς ἔπι Κηφισοῖο· |
| 524 | Primary τοῖς δʼ ἅμα τεσσαράκοντα μέλαιναι νῆες ἕποντο. |
| 525 | Primary οἳ μὲν Φωκήων στίχας ἵστασαν ἀμφιέποντες, |
| 526 | Primary Βοιωτῶν δʼ ἔμπλην ἐπʼ ἀριστερὰ θωρήσσοντο. |
| 527 | Primary Λοκρῶν δʼ ἡγεμόνευεν Ὀϊλῆος ταχὺς Αἴας |
| 528 | Primary μείων, οὔ τι τόσος γε ὅσος Τελαμώνιος Αἴας |
| 529 | Primary ἀλλὰ πολὺ μείων· ὀλίγος μὲν ἔην λινοθώρηξ, |
| 530 | Primary ἐγχείῃ δʼ ἐκέκαστο Πανέλληνας καὶ Ἀχαιούς· |
| 531 | Primary οἳ Κῦνόν τʼ ἐνέμοντʼ Ὀπόεντά τε Καλλίαρόν τε |
| 532 | Primary Βῆσσάν τε Σκάρφην τε καὶ Αὐγειὰς ἐρατεινὰς |
| 533 | Primary Τάρφην τε Θρόνιον τε Βοαγρίου ἀμφὶ ῥέεθρα· |
| 534 | Primary τῷ δʼ ἅμα τεσσαράκοντα μέλαιναι νῆες ἕποντο |
| 535 | Primary Λοκρῶν, οἳ ναίουσι πέρην ἱερῆς Εὐβοίης. |
| 536 | Primary οἳ δʼ Εὔβοιαν ἔχον μένεα πνείοντες Ἄβαντες |
| 537 | Primary Χαλκίδα τʼ Εἰρέτριάν τε πολυστάφυλόν θʼ Ἱστίαιαν |
| 538 | Primary Κήρινθόν τʼ ἔφαλον Δίου τʼ αἰπὺ πτολίεθρον, |
| 539 | Primary οἵ τε Κάρυστον ἔχον ἠδʼ οἳ Στύρα ναιετάασκον, |
| 540 | Primary τῶν αὖθʼ ἡγεμόνευʼ Ἐλεφήνωρ ὄζος Ἄρηος |
| 541 | Primary Χαλκωδοντιάδης μεγαθύμων ἀρχὸς Ἀβάντων. |
| 542 | Primary τῷ δʼ ἅμʼ Ἄβαντες ἕποντο θοοὶ ὄπιθεν κομόωντες |
| 543 | Primary αἰχμηταὶ μεμαῶτες ὀρεκτῇσιν μελίῃσι |
| 544 | Primary θώρηκας ῥήξειν δηΐων ἀμφὶ στήθεσσι· |
| 545 | Primary τῷ δʼ ἅμα τεσσαράκοντα μέλαιναι νῆες ἕποντο. |
| 546 | Primary οἳ δʼ ἄρʼ Ἀθήνας εἶχον ἐϋκτίμενον πτολίεθρον |
| 547 | Primary δῆμον Ἐρεχθῆος μεγαλήτορος, ὅν ποτʼ Ἀθήνη |
| 548 | Primary θρέψε Διὸς θυγάτηρ, τέκε δὲ ζείδωρος ἄρουρα, |
| 549 | Primary κὰδ δʼ ἐν Ἀθήνῃς εἷσεν ἑῷ ἐν πίονι νηῷ· |
| 550 | Primary ἔνθα δέ μιν ταύροισι καὶ ἀρνειοῖς ἱλάονται |
| 551 | Primary κοῦροι Ἀθηναίων περιτελλομένων ἐνιαυτῶν· |
| 552 | Primary τῶν αὖθʼ ἡγεμόνευʼ υἱὸς Πετεῶο Μενεσθεύς. |
| 553 | Primary τῷ δʼ οὔ πώ τις ὁμοῖος ἐπιχθόνιος γένετʼ ἀνὴρ |
| 554 | Primary κοσμῆσαι ἵππους τε καὶ ἀνέρας ἀσπιδιώτας· |
| 555 | Primary Νέστωρ οἶος ἔριζεν· ὃ γὰρ προγενέστερος ἦεν· |
| 556 | Primary τῷ δʼ ἅμα πεντήκοντα μέλαιναι νῆες ἕποντο. |
| 557 | Primary Αἴας δʼ ἐκ Σαλαμῖνος ἄγεν δυοκαίδεκα νῆας, |
| 558 | Primary στῆσε δʼ ἄγων ἵνʼ Ἀθηναίων ἵσταντο φάλαγγες. |
| 559 | Primary οἳ δʼ Ἄργός τʼ εἶχον Τίρυνθά τε τειχιόεσσαν |
| 560 | Primary Ἑρμιόνην Ἀσίνην τε, βαθὺν κατὰ κόλπον ἐχούσας, |
| 561 | Primary Τροιζῆνʼ Ἠϊόνας τε καὶ ἀμπελόεντʼ Ἐπίδαυρον, |
| 562 | Primary οἵ τʼ ἔχον Αἴγιναν Μάσητά τε κοῦροι Ἀχαιῶν, |
| 563 | Primary τῶν αὖθʼ ἡγεμόνευε βοὴν ἀγαθὸς Διομήδης |
| 564 | Primary καὶ Σθένελος, Καπανῆος ἀγακλειτοῦ φίλος υἱός· |
| 565 | Primary τοῖσι δʼ ἅμʼ Εὐρύαλος τρίτατος κίεν ἰσόθεος φὼς |
| 566 | Primary Μηκιστέος υἱὸς Ταλαϊονίδαο ἄνακτος· |
| 567 | Primary συμπάντων δʼ ἡγεῖτο βοὴν ἀγαθὸς Διομήδης· |
| 568 | Primary τοῖσι δʼ ἅμʼ ὀγδώκοντα μέλαιναι νῆες ἕποντο. |
| 569 | Primary οἳ δὲ Μυκήνας εἶχον ἐϋκτίμενον πτολίεθρον |
| 570 | Primary ἀφνειόν τε Κόρινθον ἐϋκτιμένας τε Κλεωνάς, |
| 571 | Primary Ὀρνειάς τʼ ἐνέμοντο Ἀραιθυρέην τʼ ἐρατεινὴν |
| 572 | Primary καὶ Σικυῶνʼ, ὅθʼ ἄρʼ Ἄδρηστος πρῶτʼ ἐμβασίλευεν, |
| 573 | Primary οἵ θʼ Ὑπερησίην τε καὶ αἰπεινὴν Γονόεσσαν |
| 574 | Primary Πελλήνην τʼ εἶχον ἠδʼ Αἴγιον ἀμφενέμοντο |
| 575 | Primary Αἰγιαλόν τʼ ἀνὰ πάντα καὶ ἀμφʼ Ἑλίκην εὐρεῖαν, |
| 576 | Primary τῶν ἑκατὸν νηῶν ἦρχε κρείων Ἀγαμέμνων |
| 577 | Primary Ἀτρεΐδης· ἅμα τῷ γε πολὺ πλεῖστοι καὶ ἄριστοι |
| 578 | Primary λαοὶ ἕποντʼ· ἐν δʼ αὐτὸς ἐδύσετο νώροπα χαλκὸν |
| 579 | Primary κυδιόων, πᾶσιν δὲ μετέπρεπεν ἡρώεσσιν |
| 580 | Primary οὕνεκʼ ἄριστος ἔην πολὺ δὲ πλείστους ἄγε λαούς. |
| 581 | Primary οἳ δʼ εἶχον κοίλην Λακεδαίμονα κητώεσσαν, |
| 582 | Primary Φᾶρίν τε Σπάρτην τε πολυτρήρωνά τε Μέσσην, |
| 583 | Primary Βρυσειάς τʼ ἐνέμοντο καὶ Αὐγειὰς ἐρατεινάς, |
| 584 | Primary οἵ τʼ ἄρʼ Ἀμύκλας εἶχον Ἕλος τʼ ἔφαλον πτολίεθρον, |
| 585 | Primary οἵ τε Λάαν εἶχον ἠδʼ Οἴτυλον ἀμφενέμοντο, |
| 586 | Primary τῶν οἱ ἀδελφεὸς ἦρχε βοὴν ἀγαθὸς Μενέλαος |
| 587 | Primary ἑξήκοντα νεῶν· ἀπάτερθε δὲ θωρήσσοντο· |
| 588 | Primary ἐν δʼ αὐτὸς κίεν ᾗσι προθυμίῃσι πεποιθὼς |
| 589 | Primary ὀτρύνων πόλεμον δέ· μάλιστα δὲ ἵετο θυμῷ |
| 590 | Primary τίσασθαι Ἑλένης ὁρμήματά τε στοναχάς τε. |
| 591 | Primary οἳ δὲ Πύλον τʼ ἐνέμοντο καὶ Ἀρήνην ἐρατεινὴν |
| 592 | Primary καὶ Θρύον Ἀλφειοῖο πόρον καὶ ἐΰκτιτον Αἰπὺ |
| 593 | Primary καὶ Κυπαρισσήεντα καὶ Ἀμφιγένειαν ἔναιον |
| 594 | Primary καὶ Πτελεὸν καὶ Ἕλος καὶ Δώριον, ἔνθά τε Μοῦσαι |
| 595 | Primary ἀντόμεναι Θάμυριν τὸν Θρήϊκα παῦσαν ἀοιδῆς |
| 596 | Primary Οἰχαλίηθεν ἰόντα παρʼ Εὐρύτου Οἰχαλιῆος· |
| 597 | Primary στεῦτο γὰρ εὐχόμενος νικησέμεν εἴ περ ἂν αὐταὶ |
| 598 | Primary Μοῦσαι ἀείδοιεν κοῦραι Διὸς αἰγιόχοιο· |
| 599 | Primary αἳ δὲ χολωσάμεναι πηρὸν θέσαν, αὐτὰρ ἀοιδὴν |
| 600 | Primary θεσπεσίην ἀφέλοντο καὶ ἐκλέλαθον κιθαριστύν· |
| 601 | Primary τῶν αὖθʼ ἡγεμόνευε Γερήνιος ἱππότα Νέστωρ· |
| 602 | Primary τῷ δʼ ἐνενήκοντα γλαφυραὶ νέες ἐστιχόωντο. |
| 603 | Primary οἳ δʼ ἔχον Ἀρκαδίην ὑπὸ Κυλλήνης ὄρος αἰπὺ |
| 604 | Primary Αἰπύτιον παρὰ τύμβον ἵνʼ ἀνέρες ἀγχιμαχηταί, |
| 605 | Primary οἳ Φενεόν τʼ ἐνέμοντο καὶ Ὀρχομενὸν πολύμηλον |
| 606 | Primary Ῥίπην τε Στρατίην τε καὶ ἠνεμόεσσαν Ἐνίσπην |
| 607 | Primary καὶ Τεγέην εἶχον καὶ Μαντινέην ἐρατεινὴν |
| 608 | Primary Στύμφηλόν τʼ εἶχον καὶ Παρρασίην ἐνέμοντο, |
| 609 | Primary τῶν ἦρχʼ Ἀγκαίοιο πάϊς κρείων Ἀγαπήνωρ |
| 610 | Primary ἑξήκοντα νεῶν· πολέες δʼ ἐν νηῒ ἑκάστῃ |
| 611 | Primary Ἀρκάδες ἄνδρες ἔβαινον ἐπιστάμενοι πολεμίζειν. |
| 612 | Primary αὐτὸς γάρ σφιν δῶκεν ἄναξ ἀνδρῶν Ἀγαμέμνων |
| 613 | Primary νῆας ἐϋσσέλμους περάαν ἐπὶ οἴνοπα πόντον |
| 614 | Primary Ἀτρεΐδης, ἐπεὶ οὔ σφι θαλάσσια ἔργα μεμήλει. |
| 615 | Primary οἳ δʼ ἄρα Βουπράσιόν τε καὶ Ἤλιδα δῖαν ἔναιον |
| 616 | Primary ὅσσον ἐφʼ Ὑρμίνη καὶ Μύρσινος ἐσχατόωσα |
| 617 | Primary πέτρη τʼ Ὠλενίη καὶ Ἀλήσιον ἐντὸς ἐέργει, |
| 618 | Primary τῶν αὖ τέσσαρες ἀρχοὶ ἔσαν, δέκα δʼ ἀνδρὶ ἑκάστῳ |
| 619 | Primary νῆες ἕποντο θοαί, πολέες δʼ ἔμβαινον Ἐπειοί. |
| 620 | Primary τῶν μὲν ἄρʼ Ἀμφίμαχος καὶ Θάλπιος ἡγησάσθην |
| 621 | Primary υἷες ὃ μὲν Κτεάτου, ὃ δʼ ἄρʼ Εὐρύτου, Ἀκτορίωνε· |
| 622 | Primary τῶν δʼ Ἀμαρυγκεΐδης ἦρχε κρατερὸς Διώρης· |
| 623 | Primary τῶν δὲ τετάρτων ἦρχε Πολύξεινος θεοειδὴς |
| 624 | Primary υἱὸς Ἀγασθένεος Αὐγηϊάδαο ἄνακτος. |
| 625 | Primary οἳ δʼ ἐκ Δουλιχίοιο Ἐχινάων θʼ ἱεράων |
| 626 | Primary νήσων, αἳ ναίουσι πέρην ἁλὸς Ἤλιδος ἄντα, |
| 627 | Primary τῶν αὖθʼ ἡγεμόνευε Μέγης ἀτάλαντος Ἄρηϊ |
| 628 | Primary Φυλεΐδης, ὃν τίκτε Διῒ φίλος ἱππότα Φυλεύς, |
| 629 | Primary ὅς ποτε Δουλίχιον δʼ ἀπενάσσατο πατρὶ χολωθείς· |
| 630 | Primary τῷ δʼ ἅμα τεσσαράκοντα μέλαιναι νῆες ἕποντο. |
| 631 | Primary αὐτὰρ Ὀδυσσεὺς ἦγε Κεφαλλῆνας μεγαθύμους, |
| 632 | Primary οἵ ῥʼ Ἰθάκην εἶχον καὶ Νήριτον εἰνοσίφυλλον |
| 633 | Primary καὶ Κροκύλειʼ ἐνέμοντο καὶ Αἰγίλιπα τρηχεῖαν, |
| 634 | Primary οἵ τε Ζάκυνθον ἔχον ἠδʼ οἳ Σάμον ἀμφενέμοντο, |
| 635 | Primary οἵ τʼ ἤπειρον ἔχον ἠδʼ ἀντιπέραιʼ ἐνέμοντο· |
| 636 | Primary τῶν μὲν Ὀδυσσεὺς ἦρχε Διὶ μῆτιν ἀτάλαντος· |
| 637 | Primary τῷ δʼ ἅμα νῆες ἕποντο δυώδεκα μιλτοπάρῃοι. |
| 638 | Primary Αἰτωλῶν δʼ ἡγεῖτο Θόας Ἀνδραίμονος υἱός, |
| 639 | Primary οἳ Πλευρῶνʼ ἐνέμοντο καὶ Ὤλενον ἠδὲ Πυλήνην |
| 640 | Primary Χαλκίδα τʼ ἀγχίαλον Καλυδῶνά τε πετρήεσσαν· |
| 641 | Primary οὐ γὰρ ἔτʼ Οἰνῆος μεγαλήτορος υἱέες ἦσαν, |
| 642 | Primary οὐδʼ ἄρʼ ἔτʼ αὐτὸς ἔην, θάνε δὲ ξανθὸς Μελέαγρος· |
| 643 | Primary τῷ δʼ ἐπὶ πάντʼ ἐτέταλτο ἀνασσέμεν Αἰτωλοῖσι· |
| 644 | Primary τῷ δʼ ἅμα τεσσαράκοντα μέλαιναι νῆες ἕποντο. |
| 645 | Primary Κρητῶν δʼ Ἰδομενεὺς δουρὶ κλυτὸς ἡγεμόνευεν, |
| 646 | Primary οἳ Κνωσόν τʼ εἶχον Γόρτυνά τε τειχιόεσσαν, |
| 647 | Primary Λύκτον Μίλητόν τε καὶ ἀργινόεντα Λύκαστον |
| 648 | Primary Φαιστόν τε Ῥύτιόν τε, πόλεις εὖ ναιετοώσας, |
| 649 | Primary ἄλλοι θʼ οἳ Κρήτην ἑκατόμπολιν ἀμφενέμοντο. |
| 650 | Primary τῶν μὲν ἄρʼ Ἰδομενεὺς δουρὶ κλυτὸς ἡγεμόνευε |
| 651 | Primary Μηριόνης τʼ ἀτάλαντος Ἐνυαλίῳ ἀνδρειφόντῃ· |
| 652 | Primary τοῖσι δʼ ἅμʼ ὀγδώκοντα μέλαιναι νῆες ἕποντο. |
| 653 | Primary Τληπόλεμος δʼ Ἡρακλεΐδης ἠΰς τε μέγας τε |
| 654 | Primary ἐκ Ῥόδου ἐννέα νῆας ἄγεν Ῥοδίων ἀγερώχων, |
| 655 | Primary οἳ Ῥόδον ἀμφενέμοντο διὰ τρίχα κοσμηθέντες |
| 656 | Primary Λίνδον Ἰηλυσόν τε καὶ ἀργινόεντα Κάμειρον. |
| 657 | Primary τῶν μὲν Τληπόλεμος δουρὶ κλυτὸς ἡγεμόνευεν, |
| 658 | Primary ὃν τέκεν Ἀστυόχεια βίῃ Ἡρακληείῃ, |
| 659 | Primary τὴν ἄγετʼ ἐξ Ἐφύρης ποταμοῦ ἄπο Σελλήεντος |
| 660 | Primary πέρσας ἄστεα πολλὰ διοτρεφέων αἰζηῶν. |
| 661 | Primary Τληπόλεμος δʼ ἐπεὶ οὖν τράφʼ ἐνὶ μεγάρῳ εὐπήκτῳ, |
| 662 | Primary αὐτίκα πατρὸς ἑοῖο φίλον μήτρωα κατέκτα |
| 663 | Primary ἤδη γηράσκοντα Λικύμνιον ὄζον Ἄρηος· |
| 664 | Primary αἶψα δὲ νῆας ἔπηξε, πολὺν δʼ ὅ γε λαὸν ἀγείρας |
| 665 | Primary βῆ φεύγων ἐπὶ πόντον· ἀπείλησαν γάρ οἱ ἄλλοι |
| 666 | Primary υἱέες υἱωνοί τε βίης Ἡρακληείης. |
| 667 | Primary αὐτὰρ ὅ γʼ ἐς Ῥόδον ἷξεν ἀλώμενος ἄλγεα πάσχων· |
| 668 | Primary τριχθὰ δὲ ᾤκηθεν καταφυλαδόν, ἠδὲ φίληθεν |
| 669 | Primary ἐκ Διός, ὅς τε θεοῖσι καὶ ἀνθρώποισιν ἀνάσσει, |
| 670 | Primary καί σφιν θεσπέσιον πλοῦτον κατέχευε Κρονίων. |
| 671 | Primary Νιρεὺς αὖ Σύμηθεν ἄγε τρεῖς νῆας ἐΐσας |
| 672 | Primary Νιρεὺς Ἀγλαΐης υἱὸς Χαρόποιό τʼ ἄνακτος |
| 673 | Primary Νιρεύς, ὃς κάλλιστος ἀνὴρ ὑπὸ Ἴλιον ἦλθε |
| 674 | Primary τῶν ἄλλων Δαναῶν μετʼ ἀμύμονα Πηλεΐωνα· |
| 675 | Primary ἀλλʼ ἀλαπαδνὸς ἔην, παῦρος δέ οἱ εἵπετο λαός. |
| 676 | Primary οἳ δʼ ἄρα Νίσυρόν τʼ εἶχον Κράπαθόν τε Κάσον τε |
| 677 | Primary καὶ Κῶν Εὐρυπύλοιο πόλιν νήσους τε Καλύδνας, |
| 678 | Primary τῶν αὖ Φείδιππός τε καὶ Ἄντιφος ἡγησάσθην |
| 679 | Primary Θεσσαλοῦ υἷε δύω Ἡρακλεΐδαο ἄνακτος· |
| 680 | Primary τοῖς δὲ τριήκοντα γλαφυραὶ νέες ἐστιχόωντο. |
| 681 | Primary νῦν αὖ τοὺς ὅσσοι τὸ Πελασγικὸν Ἄργος ἔναιον, |
| 682 | Primary οἵ τʼ Ἄλον οἵ τʼ Ἀλόπην οἵ τε Τρηχῖνα νέμοντο, |
| 683 | Primary οἵ τʼ εἶχον Φθίην ἠδʼ Ἑλλάδα καλλιγύναικα, |
| 684 | Primary Μυρμιδόνες δὲ καλεῦντο καὶ Ἕλληνες καὶ Ἀχαιοί, |
| 685 | Primary τῶν αὖ πεντήκοντα νεῶν ἦν ἀρχὸς Ἀχιλλεύς. |
| 686 | Primary ἀλλʼ οἵ γʼ οὐ πολέμοιο δυσηχέος ἐμνώοντο· |
| 687 | Primary οὐ γὰρ ἔην ὅς τίς σφιν ἐπὶ στίχας ἡγήσαιτο· |
| 688 | Primary κεῖτο γὰρ ἐν νήεσσι ποδάρκης δῖος Ἀχιλλεὺς |
| 689 | Primary κούρης χωόμενος Βρισηΐδος ἠϋκόμοιο, |
| 690 | Primary τὴν ἐκ Λυρνησσοῦ ἐξείλετο πολλὰ μογήσας |
| 691 | Primary Λυρνησσὸν διαπορθήσας καὶ τείχεα Θήβης, |
| 692 | Primary κὰδ δὲ Μύνητʼ ἔβαλεν καὶ Ἐπίστροφον ἐγχεσιμώρους, |
| 693 | Primary υἱέας Εὐηνοῖο Σεληπιάδαο ἄνακτος· |
| 694 | Primary τῆς ὅ γε κεῖτʼ ἀχέων, τάχα δʼ ἀνστήσεσθαι ἔμελλεν. |
| 695 | Primary οἳ δʼ εἶχον Φυλάκην καὶ Πύρασον ἀνθεμόεντα |
| 696 | Primary Δήμητρος τέμενος, Ἴτωνά τε μητέρα μήλων, |
| 697 | Primary ἀγχίαλόν τʼ Ἀντρῶνα ἰδὲ Πτελεὸν λεχεποίην, |
| 698 | Primary τῶν αὖ Πρωτεσίλαος ἀρήϊος ἡγεμόνευε |
| 699 | Primary ζωὸς ἐών· τότε δʼ ἤδη ἔχεν κάτα γαῖα μέλαινα. |
| 700 | Primary τοῦ δὲ καὶ ἀμφιδρυφὴς ἄλοχος Φυλάκῃ ἐλέλειπτο |
| 701 | Primary καὶ δόμος ἡμιτελής· τὸν δʼ ἔκτανε Δάρδανος ἀνὴρ |
| 702 | Primary νηὸς ἀποθρῴσκοντα πολὺ πρώτιστον Ἀχαιῶν. |
| 703 | Primary οὐδὲ μὲν οὐδʼ οἳ ἄναρχοι ἔσαν, πόθεόν γε μὲν ἀρχόν· |
| 704 | Primary ἀλλά σφεας κόσμησε Ποδάρκης ὄζος Ἄρηος |
| 705 | Primary Ἰφίκλου υἱὸς πολυμήλου Φυλακίδαο |
| 706 | Primary αὐτοκασίγνητος μεγαθύμου Πρωτεσιλάου |
| 707 | Primary ὁπλότερος γενεῇ· ὁ δʼ ἅμα πρότερος καὶ ἀρείων |
| 708 | Primary ἥρως Πρωτεσίλαος ἀρήϊος· οὐδέ τι λαοὶ |
| 709 | Primary δεύονθʼ ἡγεμόνος, πόθεόν γε μὲν ἐσθλὸν ἐόντα· |
| 710 | Primary τῷ δʼ ἅμα τεσσαράκοντα μέλαιναι νῆες ἕποντο. |
| 711 | Primary οἳ δὲ Φερὰς ἐνέμοντο παραὶ Βοιβηΐδα λίμνην |
| 712 | Primary Βοίβην καὶ Γλαφύρας καὶ ἐϋκτιμένην Ἰαωλκόν, |
| 713 | Primary τῶν ἦρχʼ Ἀδμήτοιο φίλος πάϊς ἕνδεκα νηῶν |
| 714 | Primary Εὔμηλος, τὸν ὑπʼ Ἀδμήτῳ τέκε δῖα γυναικῶν |
| 715 | Primary Ἄλκηστις Πελίαο θυγατρῶν εἶδος ἀρίστη. |
| 716 | Primary οἳ δʼ ἄρα Μηθώνην καὶ Θαυμακίην ἐνέμοντο |
| 717 | Primary καὶ Μελίβοιαν ἔχον καὶ Ὀλιζῶνα τρηχεῖαν, |
| 718 | Primary τῶν δὲ Φιλοκτήτης ἦρχεν τόξων ἐῢ εἰδὼς |
| 719 | Primary ἑπτὰ νεῶν· ἐρέται δʼ ἐν ἑκάστῃ πεντήκοντα |
| 720 | Primary ἐμβέβασαν τόξων εὖ εἰδότες ἶφι μάχεσθαι. |
| 721 | Primary ἀλλʼ ὃ μὲν ἐν νήσῳ κεῖτο κρατέρʼ ἄλγεα πάσχων |
| 722 | Primary Λήμνῳ ἐν ἠγαθέῃ, ὅθι μιν λίπον υἷες Ἀχαιῶν |
| 723 | Primary ἕλκεϊ μοχθίζοντα κακῷ ὀλοόφρονος ὕδρου· |
| 724 | Primary ἔνθʼ ὅ γε κεῖτʼ ἀχέων· τάχα δὲ μνήσεσθαι ἔμελλον |
| 725 | Primary Ἀργεῖοι παρὰ νηυσὶ Φιλοκτήταο ἄνακτος. |
| 726 | Primary οὐδὲ μὲν οὐδʼ οἳ ἄναρχοι ἔσαν, πόθεόν γε μὲν ἀρχόν· |
| 727 | Primary ἀλλὰ Μέδων κόσμησεν Ὀϊλῆος νόθος υἱός, |
| 728 | Primary τόν ῥʼ ἔτεκεν Ῥήνη ὑπʼ Ὀϊλῆϊ πτολιπόρθῳ. |
| 729 | Primary οἳ δʼ εἶχον Τρίκκην καὶ Ἰθώμην κλωμακόεσσαν, |
| 730 | Primary οἵ τʼ ἔχον Οἰχαλίην πόλιν Εὐρύτου Οἰχαλιῆος, |
| 731 | Primary τῶν αὖθʼ ἡγείσθην Ἀσκληπιοῦ δύο παῖδε |
| 732 | Primary ἰητῆρʼ ἀγαθὼ Ποδαλείριος ἠδὲ Μαχάων· |
| 733 | Primary τοῖς δὲ τριήκοντα γλαφυραὶ νέες ἐστιχόωντο. |
| 734 | Primary οἳ δʼ ἔχον Ὀρμένιον, οἵ τε κρήνην Ὑπέρειαν, |
| 735 | Primary οἵ τʼ ἔχον Ἀστέριον Τιτάνοιό τε λευκὰ κάρηνα, |
| 736 | Primary τῶν ἦρχʼ Εὐρύπυλος Εὐαίμονος ἀγλαὸς υἱός· |
| 737 | Primary τῷ δʼ ἅμα τεσσαράκοντα μέλαιναι νῆες ἕποντο. |
| 738 | Primary οἳ δʼ Ἄργισσαν ἔχον καὶ Γυρτώνην ἐνέμοντο, |
| 739 | Primary Ὄρθην Ἠλώνην τε πόλιν τʼ Ὀλοοσσόνα λευκήν, |
| 740 | Primary τῶν αὖθʼ ἡγεμόνευε μενεπτόλεμος Πολυποίτης |
| 741 | Primary υἱὸς Πειριθόοιο τὸν ἀθάνατος τέκετο Ζεύς· |
| 742 | Primary τόν ῥʼ ὑπὸ Πειριθόῳ τέκετο κλυτὸς Ἱπποδάμεια |
| 743 | Primary ἤματι τῷ ὅτε Φῆρας ἐτίσατο λαχνήεντας, |
| 744 | Primary τοὺς δʼ ἐκ Πηλίου ὦσε καὶ Αἰθίκεσσι πέλασσεν· |
| 745 | Primary οὐκ οἶος, ἅμα τῷ γε Λεοντεὺς ὄζος Ἄρηος |
| 746 | Primary υἱὸς ὑπερθύμοιο Κορώνου Καινεΐδαο· |
| 747 | Primary τοῖς δʼ ἅμα τεσσαράκοντα μέλαιναι νῆες ἕποντο. |
| 748 | Primary Γουνεὺς δʼ ἐκ Κύφου ἦγε δύω καὶ εἴκοσι νῆας· |
| 749 | Primary τῷ δʼ Ἐνιῆνες ἕποντο μενεπτόλεμοί τε Περαιβοὶ |
| 750 | Primary οἳ περὶ Δωδώνην δυσχείμερον οἰκίʼ ἔθεντο, |
| 751 | Primary οἵ τʼ ἀμφʼ ἱμερτὸν Τιταρησσὸν ἔργα νέμοντο |
| 752 | Primary ὅς ῥʼ ἐς Πηνειὸν προΐει καλλίρροον ὕδωρ, |
| 753 | Primary οὐδʼ ὅ γε Πηνειῷ συμμίσγεται ἀργυροδίνῃ, |
| 754 | Primary ἀλλά τέ μιν καθύπερθεν ἐπιρρέει ἠΰτʼ ἔλαιον· |
| 755 | Primary ὅρκου γὰρ δεινοῦ Στυγὸς ὕδατός ἐστιν ἀπορρώξ. |
| 756 | Primary Μαγνήτων δʼ ἦρχε Πρόθοος Τενθρηδόνος υἱός, |
| 757 | Primary οἳ περὶ Πηνειὸν καὶ Πήλιον εἰνοσίφυλλον |
| 758 | Primary ναίεσκον· τῶν μὲν Πρόθοος θοὸς ἡγεμόνευε, |
| 759 | Primary τῷ δʼ ἅμα τεσσαράκοντα μέλαιναι νῆες ἕποντο. |
| 760 | Primary οὗτοι ἄρʼ ἡγεμόνες Δαναῶν καὶ κοίρανοι ἦσαν· |
| 761 | Primary τίς τὰρ τῶν ὄχʼ ἄριστος ἔην σύ μοι ἔννεπε Μοῦσα |
| 762 | Primary αὐτῶν ἠδʼ ἵππων, οἳ ἅμʼ Ἀτρεΐδῃσιν ἕποντο. |
| 763 | Primary ἵπποι μὲν μέγʼ ἄρισται ἔσαν Φηρητιάδαο, |
| 764 | Primary τὰς Εὔμηλος ἔλαυνε ποδώκεας ὄρνιθας ὣς |
| 765 | Primary ὄτριχας οἰέτεας σταφύλῇ ἐπὶ νῶτον ἐΐσας· |
| 766 | Primary τὰς ἐν Πηρείῃ θρέψʼ ἀργυρότοξος Ἀπόλλων |
| 767 | Primary ἄμφω θηλείας, φόβον Ἄρηος φορεούσας. |
| 768 | Primary ἀνδρῶν αὖ μέγʼ ἄριστος ἔην Τελαμώνιος Αἴας |
| 769 | Primary ὄφρʼ Ἀχιλεὺς μήνιεν· ὃ γὰρ πολὺ φέρτατος ἦεν, |
| 770 | Primary ἵπποι θʼ οἳ φορέεσκον ἀμύμονα Πηλεΐωνα. |
| 771 | Primary ἀλλʼ ὃ μὲν ἐν νήεσσι κορωνίσι ποντοπόροισι |
| 772 | Primary κεῖτʼ ἀπομηνίσας Ἀγαμέμνονι ποιμένι λαῶν |
| 773 | Primary Ἀτρεΐδῃ· λαοὶ δὲ παρὰ ῥηγμῖνι θαλάσσης |
| 774 | Primary δίσκοισιν τέρποντο καὶ αἰγανέῃσιν ἱέντες |
| 775 | Primary τόξοισίν θʼ· ἵπποι δὲ παρʼ ἅρμασιν οἷσιν ἕκαστος |
| 776 | Primary λωτὸν ἐρεπτόμενοι ἐλεόθρεπτόν τε σέλινον |
| 777 | Primary ἕστασαν· ἅρματα δʼ εὖ πεπυκασμένα κεῖτο ἀνάκτων |
| 778 | Primary ἐν κλισίῃς· οἳ δʼ ἀρχὸν ἀρηΐφιλον ποθέοντες |
| 779 | Primary φοίτων ἔνθα καὶ ἔνθα κατὰ στρατὸν οὐδὲ μάχοντο. |
| 780 | Primary οἳ δʼ ἄρʼ ἴσαν ὡς εἴ τε πυρὶ χθὼν πᾶσα νέμοιτο· |
| 781 | Primary γαῖα δʼ ὑπεστενάχιζε Διὶ ὣς τερπικεραύνῳ |
| 782 | Primary χωομένῳ ὅτε τʼ ἀμφὶ Τυφωέϊ γαῖαν ἱμάσσῃ |
| 783 | Primary εἰν Ἀρίμοις, ὅθι φασὶ Τυφωέος ἔμμεναι εὐνάς· |
| 784 | Primary ὣς ἄρα τῶν ὑπὸ ποσσὶ μέγα στεναχίζετο γαῖα |
| 785 | Primary ἐρχομένων· μάλα δʼ ὦκα διέπρησσον πεδίοιο. |
| 786 | Primary Τρωσὶν δʼ ἄγγελος ἦλθε ποδήνεμος ὠκέα Ἶρις |
| 787 | Primary πὰρ Διὸς αἰγιόχοιο σὺν ἀγγελίῃ ἀλεγεινῇ· |
| 788 | Primary οἳ δʼ ἀγορὰς ἀγόρευον ἐπὶ Πριάμοιο θύρῃσι |
| 789 | Primary πάντες ὁμηγερέες ἠμὲν νέοι ἠδὲ γέροντες· |
| 790 | Primary ἀγχοῦ δʼ ἱσταμένη προσέφη πόδας ὠκέα Ἶρις· |
| 791 | Primary εἴσατο δὲ φθογγὴν υἷϊ Πριάμοιο Πολίτῃ, |
| 792 | Primary ὃς Τρώων σκοπὸς ἷζε ποδωκείῃσι πεποιθὼς |
| 793 | Primary τύμβῳ ἐπʼ ἀκροτάτῳ Αἰσυήταο γέροντος, |
| 794 | Primary δέγμενος ὁππότε ναῦφιν ἀφορμηθεῖεν Ἀχαιοί· |
| 795 | Primary τῷ μιν ἐεισαμένη προσέφη πόδας ὠκέα Ἶρις· |
| 796 | Primary ὦ γέρον αἰεί τοι μῦθοι φίλοι ἄκριτοί εἰσιν, |
| 797 | Primary ὥς ποτʼ ἐπʼ εἰρήνης· πόλεμος δʼ ἀλίαστος ὄρωρεν. |
| 798 | Primary ἤδη μὲν μάλα πολλὰ μάχας εἰσήλυθον ἀνδρῶν, |
| 799 | Primary ἀλλʼ οὔ πω τοιόνδε τοσόνδέ τε λαὸν ὄπωπα· |
| 800 | Primary λίην γὰρ φύλλοισιν ἐοικότες ἢ ψαμάθοισιν |
| 801 | Primary ἔρχονται πεδίοιο μαχησόμενοι προτὶ ἄστυ. |
| 802 | Primary Ἕκτορ σοὶ δὲ μάλιστʼ ἐπιτέλλομαι, ὧδε δὲ ῥέξαι· |
| 803 | Primary πολλοὶ γὰρ κατὰ ἄστυ μέγα Πριάμου ἐπίκουροι, |
| 804 | Primary ἄλλη δʼ ἄλλων γλῶσσα πολυσπερέων ἀνθρώπων· |
| 805 | Primary τοῖσιν ἕκαστος ἀνὴρ σημαινέτω οἷσί περ ἄρχει, |
| 806 | Primary τῶν δʼ ἐξηγείσθω κοσμησάμενος πολιήτας. |
| 807 | Primary ὣς ἔφαθʼ, Ἕκτωρ δʼ οὔ τι θεᾶς ἔπος ἠγνοίησεν, |
| 808 | Primary αἶψα δʼ ἔλυσʼ ἀγορήν· ἐπὶ τεύχεα δʼ ἐσσεύοντο· |
| 809 | Primary πᾶσαι δʼ ὠΐγνυντο πύλαι, ἐκ δʼ ἔσσυτο λαὸς |
| 810 | Primary πεζοί θʼ ἱππῆές τε· πολὺς δʼ ὀρυμαγδὸς ὀρώρει. |
| 811 | Primary ἔστι δέ τις προπάροιθε πόλιος αἰπεῖα κολώνη |
| 812 | Primary ἐν πεδίῳ ἀπάνευθε περίδρομος ἔνθα καὶ ἔνθα, |
| 813 | Primary τὴν ἤτοι ἄνδρες Βατίειαν κικλήσκουσιν, |
| 814 | Primary ἀθάνατοι δέ τε σῆμα πολυσκάρθμοιο Μυρίνης· |
| 815 | Primary ἔνθα τότε Τρῶές τε διέκριθεν ἠδʼ ἐπίκουροι. |
| 816 | Primary Τρωσὶ μὲν ἡγεμόνευε μέγας κορυθαίολος Ἕκτωρ |
| 817 | Primary Πριαμίδης· ἅμα τῷ γε πολὺ πλεῖστοι καὶ ἄριστοι |
| 818 | Primary λαοὶ θωρήσσοντο μεμαότες ἐγχείῃσι. |
| 819 | Primary Δαρδανίων αὖτʼ ἦρχεν ἐῢς πάϊς Ἀγχίσαο |
| 820 | Primary Αἰνείας, τὸν ὑπʼ Ἀγχίσῃ τέκε δῖʼ Ἀφροδίτη |
| 821 | Primary Ἴδης ἐν κνημοῖσι θεὰ βροτῷ εὐνηθεῖσα, |
| 822 | Primary οὐκ οἶος, ἅμα τῷ γε δύω Ἀντήνορος υἷε |
| 823 | Primary Ἀρχέλοχός τʼ Ἀκάμας τε μάχης εὖ εἰδότε πάσης. |
| 824 | Primary οἳ δὲ Ζέλειαν ἔναιον ὑπαὶ πόδα νείατον Ἴδης |
| 825 | Primary ἀφνειοὶ πίνοντες ὕδωρ μέλαν Αἰσήποιο |
| 826 | Primary Τρῶες, τῶν αὖτʼ ἦρχε Λυκάονος ἀγλαὸς υἱὸς |
| 827 | Primary Πάνδαρος, ᾧ καὶ τόξον Ἀπόλλων αὐτὸς ἔδωκεν. |
| 828 | Primary οἳ δʼ Ἀδρήστειάν τʼ εἶχον καὶ δῆμον Ἀπαισοῦ |
| 829 | Primary καὶ Πιτύειαν ἔχον καὶ Τηρείης ὄρος αἰπύ, |
| 830 | Primary τῶν ἦρχʼ Ἄδρηστός τε καὶ Ἄμφιος λινοθώρηξ |
| 831 | Primary υἷε δύω Μέροπος Περκωσίου, ὃς περὶ πάντων |
| 832 | Primary ᾔδεε μαντοσύνας, οὐδὲ οὓς παῖδας ἔασκε |
| 833 | Primary στείχειν ἐς πόλεμον φθισήνορα· τὼ δέ οἱ οὔ τι |
| 834 | Primary πειθέσθην· κῆρες γὰρ ἄγον μέλανος θανάτοιο. |
| 835 | Primary οἳ δʼ ἄρα Περκώτην καὶ Πράκτιον ἀμφενέμοντο |
| 836 | Primary καὶ Σηστὸν καὶ Ἄβυδον ἔχον καὶ δῖαν Ἀρίσβην, |
| 837 | Primary τῶν αὖθʼ Ὑρτακίδης ἦρχʼ Ἄσιος ὄρχαμος ἀνδρῶν, |
| 838 | Primary Ἄσιος Ὑρτακίδης ὃν Ἀρίσβηθεν φέρον ἵπποι |
| 839 | Primary αἴθωνες μεγάλοι ποταμοῦ ἄπο Σελλήεντος. |
| 840 | Primary Ἱππόθοος δʼ ἄγε φῦλα Πελασγῶν ἐγχεσιμώρων |
| 841 | Primary τῶν οἳ Λάρισαν ἐριβώλακα ναιετάασκον· |
| 842 | Primary τῶν ἦρχʼ Ἱππόθοός τε Πύλαιός τʼ ὄζος Ἄρηος, |
| 843 | Primary υἷε δύω Λήθοιο Πελασγοῦ Τευταμίδαο. |
| 844 | Primary αὐτὰρ Θρήϊκας ἦγʼ Ἀκάμας καὶ Πείροος ἥρως |
| 845 | Primary ὅσσους Ἑλλήσποντος ἀγάρροος ἐντὸς ἐέργει. |
| 846 | Primary Εὔφημος δʼ ἀρχὸς Κικόνων ἦν αἰχμητάων |
| 847 | Primary υἱὸς Τροιζήνοιο διοτρεφέος Κεάδαο. |
| 848 | Primary αὐτὰρ Πυραίχμης ἄγε Παίονας ἀγκυλοτόξους |
| 849 | Primary τηλόθεν ἐξ Ἀμυδῶνος ἀπʼ Ἀξιοῦ εὐρὺ ῥέοντος, |
| 850 | Primary Ἀξιοῦ οὗ κάλλιστον ὕδωρ ἐπικίδναται αἶαν. |
| 851 | Primary Παφλαγόνων δʼ ἡγεῖτο Πυλαιμένεος λάσιον κῆρ |
| 852 | Primary ἐξ Ἐνετῶν, ὅθεν ἡμιόνων γένος ἀγροτεράων, |
| 853 | Primary οἵ ῥα Κύτωρον ἔχον καὶ Σήσαμον ἀμφενέμοντο |
| 854 | Primary ἀμφί τε Παρθένιον ποταμὸν κλυτὰ δώματʼ ἔναιον |
| 855 | Primary Κρῶμνάν τʼ Αἰγιαλόν τε καὶ ὑψηλοὺς Ἐρυθίνους. |
| 856 | Primary αὐτὰρ Ἁλιζώνων Ὀδίος καὶ Ἐπίστροφος ἦρχον |
| 857 | Primary τηλόθεν ἐξ Ἀλύβης, ὅθεν ἀργύρου ἐστὶ γενέθλη. |
| 858 | Primary Μυσῶν δὲ Χρόμις ἦρχε καὶ Ἔννομος οἰωνιστής· |
| 859 | Primary ἀλλʼ οὐκ οἰωνοῖσιν ἐρύσατο κῆρα μέλαιναν, |
| 860 | Primary ἀλλʼ ἐδάμη ὑπὸ χερσὶ ποδώκεος Αἰακίδαο |
| 861 | Primary ἐν ποταμῷ, ὅθι περ Τρῶας κεράϊζε καὶ ἄλλους. |
| 862 | Primary Φόρκυς αὖ Φρύγας ἦγε καὶ Ἀσκάνιος θεοειδὴς |
| 863 | Primary τῆλʼ ἐξ Ἀσκανίης· μέμασαν δʼ ὑσμῖνι μάχεσθαι. |
| 864 | Primary Μῄοσιν αὖ Μέσθλης τε καὶ Ἄντιφος ἡγησάσθην |
| 865 | Primary υἷε Ταλαιμένεος τὼ Γυγαίη τέκε λίμνη, |
| 866 | Primary οἳ καὶ Μῄονας ἦγον ὑπὸ Τμώλῳ γεγαῶτας. |
| 867 | Primary Νάστης αὖ Καρῶν ἡγήσατο βαρβαροφώνων, |
| 868 | Primary οἳ Μίλητον ἔχον Φθιρῶν τʼ ὄρος ἀκριτόφυλλον |
| 869 | Primary Μαιάνδρου τε ῥοὰς Μυκάλης τʼ αἰπεινὰ κάρηνα· |
| 870 | Primary τῶν μὲν ἄρʼ Ἀμφίμαχος καὶ Νάστης ἡγησάσθην, |
| 871 | Primary Νάστης Ἀμφίμαχός τε Νομίονος ἀγλαὰ τέκνα, |
| 872 | Primary ὃς καὶ χρυσὸν ἔχων πόλεμον δʼ ἴεν ἠΰτε κούρη |
| 873 | Primary νήπιος, οὐδέ τί οἱ τό γʼ ἐπήρκεσε λυγρὸν ὄλεθρον, |
| 874 | Primary ἀλλʼ ἐδάμη ὑπὸ χερσὶ ποδώκεος Αἰακίδαο |
| 875 | Primary ἐν ποταμῷ, χρυσὸν δʼ Ἀχιλεὺς ἐκόμισσε δαΐφρων. |
| 876 | Primary Σαρπηδὼν δʼ ἦρχεν Λυκίων καὶ Γλαῦκος ἀμύμων |
| 877 | Primary τηλόθεν ἐκ Λυκίης, Ξάνθου ἄπο δινήεντος. |