Reader
Reader | Iliad, Book 3
Iliad
Homer
Text
Position
Line 1 of 461
Waypoints
| Line Ref | Monro and Allen | Ancient Greek |
|---|---|
| 1 | Primary αὐτὰρ ἐπεὶ κόσμηθεν ἅμʼ ἡγεμόνεσσιν ἕκαστοι, |
| 2 | Primary Τρῶες μὲν κλαγγῇ τʼ ἐνοπῇ τʼ ἴσαν ὄρνιθες ὣς |
| 3 | Primary ἠΰτε περ κλαγγὴ γεράνων πέλει οὐρανόθι πρό· |
| 4 | Primary αἵ τʼ ἐπεὶ οὖν χειμῶνα φύγον καὶ ἀθέσφατον ὄμβρον |
| 5 | Primary κλαγγῇ ταί γε πέτονται ἐπʼ ὠκεανοῖο ῥοάων |
| 6 | Primary ἀνδράσι Πυγμαίοισι φόνον καὶ κῆρα φέρουσαι· |
| 7 | Primary ἠέριαι δʼ ἄρα ταί γε κακὴν ἔριδα προφέρονται. |
| 8 | Primary οἳ δʼ ἄρʼ ἴσαν σιγῇ μένεα πνείοντες Ἀχαιοὶ |
| 9 | Primary ἐν θυμῷ μεμαῶτες ἀλεξέμεν ἀλλήλοισιν. |
| 10 | Primary εὖτʼ ὄρεος κορυφῇσι Νότος κατέχευεν ὀμίχλην |
| 11 | Primary ποιμέσιν οὔ τι φίλην, κλέπτῃ δέ τε νυκτὸς ἀμείνω, |
| 12 | Primary τόσσόν τίς τʼ ἐπιλεύσσει ὅσον τʼ ἐπὶ λᾶαν ἵησιν· |
| 13 | Primary ὣς ἄρα τῶν ὑπὸ ποσσὶ κονίσαλος ὄρνυτʼ ἀελλὴς |
| 14 | Primary ἐρχομένων· μάλα δʼ ὦκα διέπρησσον πεδίοιο. |
| 15 | Primary οἳ δʼ ὅτε δὴ σχεδὸν ἦσαν ἐπʼ ἀλλήλοισιν ἰόντες, |
| 16 | Primary Τρωσὶν μὲν προμάχιζεν Ἀλέξανδρος θεοειδὴς |
| 17 | Primary παρδαλέην ὤμοισιν ἔχων καὶ καμπύλα τόξα |
| 18 | Primary καὶ ξίφος· αὐτὰρ δοῦρε δύω κεκορυθμένα χαλκῷ |
| 19 | Primary πάλλων Ἀργείων προκαλίζετο πάντας ἀρίστους |
| 20 | Primary ἀντίβιον μαχέσασθαι ἐν αἰνῇ δηϊοτῆτι. |
| 21 | Primary τὸν δʼ ὡς οὖν ἐνόησεν ἀρηΐφιλος Μενέλαος |
| 22 | Primary ἐρχόμενον προπάροιθεν ὁμίλου μακρὰ βιβάντα, |
| 23 | Primary ὥς τε λέων ἐχάρη μεγάλῳ ἐπὶ σώματι κύρσας |
| 24 | Primary εὑρὼν ἢ ἔλαφον κεραὸν ἢ ἄγριον αἶγα |
| 25 | Primary πεινάων· μάλα γάρ τε κατεσθίει, εἴ περ ἂν αὐτὸν |
| 26 | Primary σεύωνται ταχέες τε κύνες θαλεροί τʼ αἰζηοί· |
| 27 | Primary ὣς ἐχάρη Μενέλαος Ἀλέξανδρον θεοειδέα |
| 28 | Primary ὀφθαλμοῖσιν ἰδών· φάτο γὰρ τίσεσθαι ἀλείτην· |
| 29 | Primary αὐτίκα δʼ ἐξ ὀχέων σὺν τεύχεσιν ἆλτο χαμᾶζε. |
| 30 | Primary τὸν δʼ ὡς οὖν ἐνόησεν Ἀλέξανδρος θεοειδὴς |
| 31 | Primary ἐν προμάχοισι φανέντα, κατεπλήγη φίλον ἦτορ, |
| 32 | Primary ἂψ δʼ ἑτάρων εἰς ἔθνος ἐχάζετο κῆρʼ ἀλεείνων. |
| 33 | Primary ὡς δʼ ὅτε τίς τε δράκοντα ἰδὼν παλίνορσος ἀπέστη |
| 34 | Primary οὔρεος ἐν βήσσῃς, ὑπό τε τρόμος ἔλλαβε γυῖα, |
| 35 | Primary ἂψ δʼ ἀνεχώρησεν, ὦχρός τέ μιν εἷλε παρειάς, |
| 36 | Primary ὣς αὖτις καθʼ ὅμιλον ἔδυ Τρώων ἀγερώχων |
| 37 | Primary δείσας Ἀτρέος υἱὸν Ἀλέξανδρος θεοειδής. |
| 38 | Primary τὸν δʼ Ἕκτωρ νείκεσσεν ἰδὼν αἰσχροῖς ἐπέεσσιν· |
| 39 | Primary Δύσπαρι εἶδος ἄριστε γυναιμανὲς ἠπεροπευτὰ |
| 40 | Primary αἴθʼ ὄφελες ἄγονός τʼ ἔμεναι ἄγαμός τʼ ἀπολέσθαι· |
| 41 | Primary καί κε τὸ βουλοίμην, καί κεν πολὺ κέρδιον ἦεν |
| 42 | Primary ἢ οὕτω λώβην τʼ ἔμεναι καὶ ὑπόψιον ἄλλων. |
| 43 | Primary ἦ που καγχαλόωσι κάρη κομόωντες Ἀχαιοὶ |
| 44 | Primary φάντες ἀριστῆα πρόμον ἔμμεναι, οὕνεκα καλὸν |
| 45 | Primary εἶδος ἔπʼ, ἀλλʼ οὐκ ἔστι βίη φρεσὶν οὐδέ τις ἀλκή. |
| 46 | Primary ἦ τοιόσδε ἐὼν ἐν ποντοπόροισι νέεσσι |
| 47 | Primary πόντον ἐπιπλώσας, ἑτάρους ἐρίηρας ἀγείρας, |
| 48 | Primary μιχθεὶς ἀλλοδαποῖσι γυναῖκʼ εὐειδέʼ ἀνῆγες |
| 49 | Primary ἐξ ἀπίης γαίης νυὸν ἀνδρῶν αἰχμητάων |
| 50 | Primary πατρί τε σῷ μέγα πῆμα πόληΐ τε παντί τε δήμῳ, |
| 51 | Primary δυσμενέσιν μὲν χάρμα, κατηφείην δὲ σοὶ αὐτῷ; |
| 52 | Primary οὐκ ἂν δὴ μείνειας ἀρηΐφιλον Μενέλαον; |
| 53 | Primary γνοίης χʼ οἵου φωτὸς ἔχεις θαλερὴν παράκοιτιν· |
| 54 | Primary οὐκ ἄν τοι χραίσμῃ κίθαρις τά τε δῶρʼ Ἀφροδίτης |
| 55 | Primary ἥ τε κόμη τό τε εἶδος ὅτʼ ἐν κονίῃσι μιγείης. |
| 56 | Primary ἀλλὰ μάλα Τρῶες δειδήμονες· ἦ τέ κεν ἤδη |
| 57 | Primary λάϊνον ἕσσο χιτῶνα κακῶν ἕνεχʼ ὅσσα ἔοργας. |
| 58 | Primary τὸν δʼ αὖτε προσέειπεν Ἀλέξανδρος θεοειδής· |
| 59 | Primary Ἕκτορ ἐπεί με κατʼ αἶσαν ἐνείκεσας οὐδʼ ὑπὲρ αἶσαν· |
| 60 | Primary αἰεί τοι κραδίη πέλεκυς ὥς ἐστιν ἀτειρὴς |
| 61 | Primary ὅς τʼ εἶσιν διὰ δουρὸς ὑπʼ ἀνέρος ὅς ῥά τε τέχνῃ |
| 62 | Primary νήϊον ἐκτάμνῃσιν, ὀφέλλει δʼ ἀνδρὸς ἐρωήν· |
| 63 | Primary ὣς σοὶ ἐνὶ στήθεσσιν ἀτάρβητος νόος ἐστί· |
| 64 | Primary μή μοι δῶρʼ ἐρατὰ πρόφερε χρυσέης Ἀφροδίτης· |
| 65 | Primary οὔ τοι ἀπόβλητʼ ἐστὶ θεῶν ἐρικυδέα δῶρα |
| 66 | Primary ὅσσά κεν αὐτοὶ δῶσιν, ἑκὼν δʼ οὐκ ἄν τις ἕλοιτο· |
| 67 | Primary νῦν αὖτʼ εἴ μʼ ἐθέλεις πολεμίζειν ἠδὲ μάχεσθαι, |
| 68 | Primary ἄλλους μὲν κάθισον Τρῶας καὶ πάντας Ἀχαιούς, |
| 69 | Primary αὐτὰρ ἔμʼ ἐν μέσσῳ καὶ ἀρηΐφιλον Μενέλαον |
| 70 | Primary συμβάλετʼ ἀμφʼ Ἑλένῃ καὶ κτήμασι πᾶσι μάχεσθαι· |
| 71 | Primary ὁππότερος δέ κε νικήσῃ κρείσσων τε γένηται, |
| 72 | Primary κτήμαθʼ ἑλὼν εὖ πάντα γυναῖκά τε οἴκαδʼ ἀγέσθω· |
| 73 | Primary οἳ δʼ ἄλλοι φιλότητα καὶ ὅρκια πιστὰ ταμόντες |
| 74 | Primary ναίοιτε Τροίην ἐριβώλακα, τοὶ δὲ νεέσθων |
| 75 | Primary Ἄργος ἐς ἱππόβοτον καὶ Ἀχαιΐδα καλλιγύναικα. |
| 76 | Primary ὣς ἔφαθʼ, Ἕκτωρ δʼ αὖτʼ ἐχάρη μέγα μῦθον ἀκούσας, |
| 77 | Primary καί ῥʼ ἐς μέσσον ἰὼν Τρώων ἀνέεργε φάλαγγας |
| 78 | Primary μέσσου δουρὸς ἑλών· τοὶ δʼ ἱδρύνθησαν ἅπαντες. |
| 79 | Primary τῷ δʼ ἐπετοξάζοντο κάρη κομόωντες Ἀχαιοὶ |
| 80 | Primary ἰοῖσίν τε τιτυσκόμενοι λάεσσί τʼ ἔβαλλον· |
| 81 | Primary αὐτὰρ ὃ μακρὸν ἄϋσεν ἄναξ ἀνδρῶν Ἀγαμέμνων· |
| 82 | Primary ἴσχεσθʼ Ἀργεῖοι, μὴ βάλλετε κοῦροι Ἀχαιῶν· |
| 83 | Primary στεῦται γάρ τι ἔπος ἐρέειν κορυθαίολος Ἕκτωρ. |
| 84 | Primary ὣς ἔφαθʼ, οἳ δʼ ἔσχοντο μάχης ἄνεῴ τʼ ἐγένοντο |
| 85 | Primary ἐσσυμένως· Ἕκτωρ δὲ μετʼ ἀμφοτέροισιν ἔειπε· |
| 86 | Primary κέκλυτέ μευ Τρῶες καὶ ἐϋκνήμιδες Ἀχαιοὶ |
| 87 | Primary μῦθον Ἀλεξάνδροιο, τοῦ εἵνεκα νεῖκος ὄρωρεν. |
| 88 | Primary ἄλλους μὲν κέλεται Τρῶας καὶ πάντας Ἀχαιοὺς |
| 89 | Primary τεύχεα κάλʼ ἀποθέσθαι ἐπὶ χθονὶ πουλυβοτείρῃ, |
| 90 | Primary αὐτὸν δʼ ἐν μέσσῳ καὶ ἀρηΐφιλον Μενέλαον |
| 91 | Primary οἴους ἀμφʼ Ἑλένῃ καὶ κτήμασι πᾶσι μάχεσθαι. |
| 92 | Primary ὁππότερος δέ κε νικήσῃ κρείσσων τε γένηται |
| 93 | Primary κτήμαθʼ ἑλὼν εὖ πάντα γυναῖκά τε οἴκαδʼ ἀγέσθω· |
| 94 | Primary οἳ δʼ ἄλλοι φιλότητα καὶ ὅρκια πιστὰ τάμωμεν. |
| 95 | Primary ὣς ἔφαθʼ, οἳ δʼ ἄρα πάντες ἀκὴν ἐγένοντο σιωπῇ· |
| 96 | Primary τοῖσι δὲ καὶ μετέειπε βοὴν ἀγαθὸς Μενέλαος· |
| 97 | Primary κέκλυτε νῦν καὶ ἐμεῖο· μάλιστα γὰρ ἄλγος ἱκάνει |
| 98 | Primary θυμὸν ἐμόν, φρονέω δὲ διακρινθήμεναι ἤδη |
| 99 | Primary Ἀργείους καὶ Τρῶας, ἐπεὶ κακὰ πολλὰ πέπασθε |
| 100 | Primary εἵνεκʼ ἐμῆς ἔριδος καὶ Ἀλεξάνδρου ἕνεκʼ ἀρχῆς· |
| 101 | Primary ἡμέων δʼ ὁπποτέρῳ θάνατος καὶ μοῖρα τέτυκται |
| 102 | Primary τεθναίη· ἄλλοι δὲ διακρινθεῖτε τάχιστα. |
| 103 | Primary οἴσετε ἄρνʼ, ἕτερον λευκόν, ἑτέρην δὲ μέλαιναν, |
| 104 | Primary Γῇ τε καὶ Ἠελίῳ· Διὶ δʼ ἡμεῖς οἴσομεν ἄλλον· |
| 105 | Primary ἄξετε δὲ Πριάμοιο βίην, ὄφρʼ ὅρκια τάμνῃ |
| 106 | Primary αὐτός, ἐπεί οἱ παῖδες ὑπερφίαλοι καὶ ἄπιστοι, |
| 107 | Primary μή τις ὑπερβασίῃ Διὸς ὅρκια δηλήσηται. |
| 108 | Primary αἰεὶ δʼ ὁπλοτέρων ἀνδρῶν φρένες ἠερέθονται· |
| 109 | Primary οἷς δʼ ὁ γέρων μετέῃσιν ἅμα πρόσσω καὶ ὀπίσσω |
| 110 | Primary λεύσσει, ὅπως ὄχʼ ἄριστα μετʼ ἀμφοτέροισι γένηται. |
| 111 | Primary ὣς ἔφαθʼ, οἳ δʼ ἐχάρησαν Ἀχαιοί τε Τρῶές τε |
| 112 | Primary ἐλπόμενοι παύσασθαι ὀϊζυροῦ πολέμοιο. |
| 113 | Primary καί ῥʼ ἵππους μὲν ἔρυξαν ἐπὶ στίχας, ἐκ δʼ ἔβαν αὐτοί, |
| 114 | Primary τεύχεά τʼ ἐξεδύοντο· τὰ μὲν κατέθεντʼ ἐπὶ γαίῃ |
| 115 | Primary πλησίον ἀλλήλων, ὀλίγη δʼ ἦν ἀμφὶς ἄρουρα· |
| 116 | Primary Ἕκτωρ δὲ προτὶ ἄστυ δύω κήρυκας ἔπεμπε |
| 117 | Primary καρπαλίμως ἄρνάς τε φέρειν Πρίαμόν τε καλέσσαι· |
| 118 | Primary αὐτὰρ ὃ Ταλθύβιον προΐει κρείων Ἀγαμέμνων |
| 119 | Primary νῆας ἔπι γλαφυρὰς ἰέναι, ἠδʼ ἄρνʼ ἐκέλευεν |
| 120 | Primary οἰσέμεναι· ὃ δʼ ἄρʼ οὐκ ἀπίθησʼ Ἀγαμέμνονι δίῳ. |
| 121 | Primary Ἶρις δʼ αὖθʼ Ἑλένῃ λευκωλένῳ ἄγγελος ἦλθεν |
| 122 | Primary εἰδομένη γαλόῳ Ἀντηνορίδαο δάμαρτι, |
| 123 | Primary τὴν Ἀντηνορίδης εἶχε κρείων Ἑλικάων |
| 124 | Primary Λαοδίκην Πριάμοιο θυγατρῶν εἶδος ἀρίστην. |
| 125 | Primary τὴν δʼ εὗρʼ ἐν μεγάρῳ· ἣ δὲ μέγαν ἱστὸν ὕφαινε |
| 126 | Primary δίπλακα πορφυρέην, πολέας δʼ ἐνέπασσεν ἀέθλους |
| 127 | Primary Τρώων θʼ ἱπποδάμων καὶ Ἀχαιῶν χαλκοχιτώνων, |
| 128 | Primary οὕς ἑθεν εἵνεκʼ ἔπασχον ὑπʼ Ἄρηος παλαμάων· |
| 129 | Primary ἀγχοῦ δʼ ἱσταμένη προσέφη πόδας ὠκέα Ἶρις· |
| 130 | Primary δεῦρʼ ἴθι νύμφα φίλη, ἵνα θέσκελα ἔργα ἴδηαι |
| 131 | Primary Τρώων θʼ ἱπποδάμων καὶ Ἀχαιῶν χαλκοχιτώνων, |
| 132 | Primary οἳ πρὶν ἐπʼ ἀλλήλοισι φέρον πολύδακρυν Ἄρηα |
| 133 | Primary ἐν πεδίῳ ὀλοοῖο λιλαιόμενοι πολέμοιο· |
| 134 | Primary οἳ δὴ νῦν ἕαται σιγῇ, πόλεμος δὲ πέπαυται, |
| 135 | Primary ἀσπίσι κεκλιμένοι, παρὰ δʼ ἔγχεα μακρὰ πέπηγεν. |
| 136 | Primary αὐτὰρ Ἀλέξανδρος καὶ ἀρηΐφιλος Μενέλαος |
| 137 | Primary μακρῇς ἐγχείῃσι μαχήσονται περὶ σεῖο· |
| 138 | Primary τῷ δέ κε νικήσαντι φίλη κεκλήσῃ ἄκοιτις. |
| 139 | Primary ὣς εἰποῦσα θεὰ γλυκὺν ἵμερον ἔμβαλε θυμῷ |
| 140 | Primary ἀνδρός τε προτέρου καὶ ἄστεος ἠδὲ τοκήων· |
| 141 | Primary αὐτίκα δʼ ἀργεννῇσι καλυψαμένη ὀθόνῃσιν |
| 142 | Primary ὁρμᾶτʼ ἐκ θαλάμοιο τέρεν κατὰ δάκρυ χέουσα |
| 143 | Primary οὐκ οἴη, ἅμα τῇ γε καὶ ἀμφίπολοι δύʼ ἕποντο, |
| 144 | Primary Αἴθρη Πιτθῆος θυγάτηρ, Κλυμένη τε βοῶπις· |
| 145 | Primary αἶψα δʼ ἔπειθʼ ἵκανον ὅθι Σκαιαὶ πύλαι ἦσαν. |
| 146 | Primary οἳ δʼ ἀμφὶ Πρίαμον καὶ Πάνθοον ἠδὲ Θυμοίτην |
| 147 | Primary Λάμπόν τε Κλυτίον θʼ Ἱκετάονά τʼ ὄζον Ἄρηος |
| 148 | Primary Οὐκαλέγων τε καὶ Ἀντήνωρ πεπνυμένω ἄμφω |
| 149 | Primary ἥατο δημογέροντες ἐπὶ Σκαιῇσι πύλῃσι, |
| 150 | Primary γήραϊ δὴ πολέμοιο πεπαυμένοι, ἀλλʼ ἀγορηταὶ |
| 151 | Primary ἐσθλοί, τεττίγεσσιν ἐοικότες οἵ τε καθʼ ὕλην |
| 152 | Primary δενδρέῳ ἐφεζόμενοι ὄπα λειριόεσσαν ἱεῖσι· |
| 153 | Primary τοῖοι ἄρα Τρώων ἡγήτορες ἧντʼ ἐπὶ πύργῳ. |
| 154 | Primary οἳ δʼ ὡς οὖν εἴδονθʼ Ἑλένην ἐπὶ πύργον ἰοῦσαν, |
| 155 | Primary ἦκα πρὸς ἀλλήλους ἔπεα πτερόεντʼ ἀγόρευον· |
| 156 | Primary οὐ νέμεσις Τρῶας καὶ ἐϋκνήμιδας Ἀχαιοὺς |
| 157 | Primary τοιῇδʼ ἀμφὶ γυναικὶ πολὺν χρόνον ἄλγεα πάσχειν· |
| 158 | Primary αἰνῶς ἀθανάτῃσι θεῇς εἰς ὦπα ἔοικεν· |
| 159 | Primary ἀλλὰ καὶ ὧς τοίη περ ἐοῦσʼ ἐν νηυσὶ νεέσθω, |
| 160 | Primary μηδʼ ἡμῖν τεκέεσσί τʼ ὀπίσσω πῆμα λίποιτο. |
| 161 | Primary ὣς ἄρʼ ἔφαν, Πρίαμος δʼ Ἑλένην ἐκαλέσσατο φωνῇ· |
| 162 | Primary δεῦρο πάροιθʼ ἐλθοῦσα φίλον τέκος ἵζευ ἐμεῖο, |
| 163 | Primary ὄφρα ἴδῃ πρότερόν τε πόσιν πηούς τε φίλους τε· |
| 164 | Primary οὔ τί μοι αἰτίη ἐσσί, θεοί νύ μοι αἴτιοί εἰσιν |
| 165 | Primary οἵ μοι ἐφώρμησαν πόλεμον πολύδακρυν Ἀχαιῶν· |
| 166 | Primary ὥς μοι καὶ τόνδʼ ἄνδρα πελώριον ἐξονομήνῃς |
| 167 | Primary ὅς τις ὅδʼ ἐστὶν Ἀχαιὸς ἀνὴρ ἠΰς τε μέγας τε. |
| 168 | Primary ἤτοι μὲν κεφαλῇ καὶ μείζονες ἄλλοι ἔασι, |
| 169 | Primary καλὸν δʼ οὕτω ἐγὼν οὔ πω ἴδον ὀφθαλμοῖσιν, |
| 170 | Primary οὐδʼ οὕτω γεραρόν· βασιλῆϊ γὰρ ἀνδρὶ ἔοικε. |
| 171 | Primary τὸν δʼ Ἑλένη μύθοισιν ἀμείβετο δῖα γυναικῶν· |
| 172 | Primary αἰδοῖός τέ μοί ἐσσι φίλε ἑκυρὲ δεινός τε· |
| 173 | Primary ὡς ὄφελεν θάνατός μοι ἁδεῖν κακὸς ὁππότε δεῦρο |
| 174 | Primary υἱέϊ σῷ ἑπόμην θάλαμον γνωτούς τε λιποῦσα |
| 175 | Primary παῖδά τε τηλυγέτην καὶ ὁμηλικίην ἐρατεινήν. |
| 176 | Primary ἀλλὰ τά γʼ οὐκ ἐγένοντο· τὸ καὶ κλαίουσα τέτηκα. |
| 177 | Primary τοῦτο δέ τοι ἐρέω ὅ μʼ ἀνείρεαι ἠδὲ μεταλλᾷς· |
| 178 | Primary οὗτός γʼ Ἀτρεΐδης εὐρὺ κρείων Ἀγαμέμνων, |
| 179 | Primary ἀμφότερον βασιλεύς τʼ ἀγαθὸς κρατερός τʼ αἰχμητής· |
| 180 | Primary δαὴρ αὖτʼ ἐμὸς ἔσκε κυνώπιδος, εἴ ποτʼ ἔην γε. |
| 181 | Primary ὣς φάτο, τὸν δʼ ὁ γέρων ἠγάσσατο φώνησέν τε· |
| 182 | Primary ὦ μάκαρ Ἀτρεΐδη μοιρηγενὲς ὀλβιόδαιμον, |
| 183 | Primary ἦ ῥά νύ τοι πολλοὶ δεδμήατο κοῦροι Ἀχαιῶν. |
| 184 | Primary ἤδη καὶ Φρυγίην εἰσήλυθον ἀμπελόεσσαν, |
| 185 | Primary ἔνθα ἴδον πλείστους Φρύγας ἀνέρας αἰολοπώλους |
| 186 | Primary λαοὺς Ὀτρῆος καὶ Μυγδόνος ἀντιθέοιο, |
| 187 | Primary οἵ ῥα τότʼ ἐστρατόωντο παρʼ ὄχθας Σαγγαρίοιο· |
| 188 | Primary καὶ γὰρ ἐγὼν ἐπίκουρος ἐὼν μετὰ τοῖσιν ἐλέχθην |
| 189 | Primary ἤματι τῷ ὅτε τʼ ἦλθον Ἀμαζόνες ἀντιάνειραι· |
| 190 | Primary ἀλλʼ οὐδʼ οἳ τόσοι ἦσαν ὅσοι ἑλίκωπες Ἀχαιοί. |
| 191 | Primary δεύτερον αὖτʼ Ὀδυσῆα ἰδὼν ἐρέεινʼ ὁ γεραιός· |
| 192 | Primary εἴπʼ ἄγε μοι καὶ τόνδε φίλον τέκος ὅς τις ὅδʼ ἐστί· |
| 193 | Primary μείων μὲν κεφαλῇ Ἀγαμέμνονος Ἀτρεΐδαο, |
| 194 | Primary εὐρύτερος δʼ ὤμοισιν ἰδὲ στέρνοισιν ἰδέσθαι. |
| 195 | Primary τεύχεα μέν οἱ κεῖται ἐπὶ χθονὶ πουλυβοτείρῃ, |
| 196 | Primary αὐτὸς δὲ κτίλος ὣς ἐπιπωλεῖται στίχας ἀνδρῶν· |
| 197 | Primary ἀρνειῷ μιν ἔγωγε ἐΐσκω πηγεσιμάλλῳ, |
| 198 | Primary ὅς τʼ οἰῶν μέγα πῶϋ διέρχεται ἀργεννάων. |
| 199 | Primary τὸν δʼ ἠμείβετʼ ἔπειθʼ Ἑλένη Διὸς ἐκγεγαυῖα· |
| 200 | Primary οὗτος δʼ αὖ Λαερτιάδης πολύμητις Ὀδυσσεύς, |
| 201 | Primary ὃς τράφη ἐν δήμῳ Ἰθάκης κραναῆς περ ἐούσης |
| 202 | Primary εἰδὼς παντοίους τε δόλους καὶ μήδεα πυκνά. |
| 203 | Primary τὴν δʼ αὖτʼ Ἀντήνωρ πεπνυμένος ἀντίον ηὔδα· |
| 204 | Primary ὦ γύναι ἦ μάλα τοῦτο ἔπος νημερτὲς ἔειπες· |
| 205 | Primary ἤδη γὰρ καὶ δεῦρό ποτʼ ἤλυθε δῖος Ὀδυσσεὺς |
| 206 | Primary σεῦ ἕνεκʼ ἀγγελίης σὺν ἀρηϊφίλῳ Μενελάῳ· |
| 207 | Primary τοὺς δʼ ἐγὼ ἐξείνισσα καὶ ἐν μεγάροισι φίλησα, |
| 208 | Primary ἀμφοτέρων δὲ φυὴν ἐδάην καὶ μήδεα πυκνά. |
| 209 | Primary ἀλλʼ ὅτε δὴ Τρώεσσιν ἐν ἀγρομένοισιν ἔμιχθεν |
| 210 | Primary στάντων μὲν Μενέλαος ὑπείρεχεν εὐρέας ὤμους, |
| 211 | Primary ἄμφω δʼ ἑζομένω γεραρώτερος ἦεν Ὀδυσσεύς· |
| 212 | Primary ἀλλʼ ὅτε δὴ μύθους καὶ μήδεα πᾶσιν ὕφαινον |
| 213 | Primary ἤτοι μὲν Μενέλαος ἐπιτροχάδην ἀγόρευε, |
| 214 | Primary παῦρα μὲν ἀλλὰ μάλα λιγέως, ἐπεὶ οὐ πολύμυθος |
| 215 | Primary οὐδʼ ἀφαμαρτοεπής· ἦ καὶ γένει ὕστερος ἦεν. |
| 216 | Primary ἀλλʼ ὅτε δὴ πολύμητις ἀναΐξειεν Ὀδυσσεὺς |
| 217 | Primary στάσκεν, ὑπαὶ δὲ ἴδεσκε κατὰ χθονὸς ὄμματα πήξας, |
| 218 | Primary σκῆπτρον δʼ οὔτʼ ὀπίσω οὔτε προπρηνὲς ἐνώμα, |
| 219 | Primary ἀλλʼ ἀστεμφὲς ἔχεσκεν ἀΐδρεϊ φωτὶ ἐοικώς· |
| 220 | Primary φαίης κε ζάκοτόν τέ τινʼ ἔμμεναι ἄφρονά τʼ αὔτως. |
| 221 | Primary ἀλλʼ ὅτε δὴ ὄπα τε μεγάλην ἐκ στήθεος εἵη |
| 222 | Primary καὶ ἔπεα νιφάδεσσιν ἐοικότα χειμερίῃσιν, |
| 223 | Primary οὐκ ἂν ἔπειτʼ Ὀδυσῆΐ γʼ ἐρίσσειε βροτὸς ἄλλος· |
| 224 | Primary οὐ τότε γʼ ὧδʼ Ὀδυσῆος ἀγασσάμεθʼ εἶδος ἰδόντες. |
| 225 | Primary τὸ τρίτον αὖτʼ Αἴαντα ἰδὼν ἐρέεινʼ ὃ γεραιός· |
| 226 | Primary τίς τὰρ ὅδʼ ἄλλος Ἀχαιὸς ἀνὴρ ἠΰς τε μέγας τε |
| 227 | Primary ἔξοχος Ἀργείων κεφαλήν τε καὶ εὐρέας ὤμους; |
| 228 | Primary τὸν δʼ Ἑλένη τανύπεπλος ἀμείβετο δῖα γυναικῶν· |
| 229 | Primary οὗτος δʼ Αἴας ἐστὶ πελώριος ἕρκος Ἀχαιῶν· |
| 230 | Primary Ἰδομενεὺς δʼ ἑτέρωθεν ἐνὶ Κρήτεσσι θεὸς ὣς |
| 231 | Primary ἕστηκʼ, ἀμφὶ δέ μιν Κρητῶν ἀγοὶ ἠγερέθονται. |
| 232 | Primary πολλάκι μιν ξείνισσεν ἀρηΐφιλος Μενέλαος |
| 233 | Primary οἴκῳ ἐν ἡμετέρῳ ὁπότε Κρήτηθεν ἵκοιτο. |
| 234 | Primary νῦν δʼ ἄλλους μὲν πάντας ὁρῶ ἑλίκωπας Ἀχαιούς, |
| 235 | Primary οὕς κεν ἐῢ γνοίην καί τʼ οὔνομα μυθησαίμην· |
| 236 | Primary δοιὼ δʼ οὐ δύναμαι ἰδέειν κοσμήτορε λαῶν |
| 237 | Primary Κάστορά θʼ ἱππόδαμον καὶ πὺξ ἀγαθὸν Πολυδεύκεα |
| 238 | Primary αὐτοκασιγνήτω, τώ μοι μία γείνατο μήτηρ. |
| 239 | Primary ἢ οὐχ ἑσπέσθην Λακεδαίμονος ἐξ ἐρατεινῆς, |
| 240 | Primary ἢ δεύρω μὲν ἕποντο νέεσσʼ ἔνι ποντοπόροισι, |
| 241 | Primary νῦν αὖτʼ οὐκ ἐθέλουσι μάχην καταδύμεναι ἀνδρῶν |
| 242 | Primary αἴσχεα δειδιότες καὶ ὀνείδεα πόλλʼ ἅ μοί ἐστιν. |
| 243 | Primary ὣς φάτο, τοὺς δʼ ἤδη κάτεχεν φυσίζοος αἶα |
| 244 | Primary ἐν Λακεδαίμονι αὖθι φίλῃ ἐν πατρίδι γαίῃ. |
| 245 | Primary κήρυκες δʼ ἀνὰ ἄστυ θεῶν φέρον ὅρκια πιστὰ |
| 246 | Primary ἄρνε δύω καὶ οἶνον ἐΰφρονα καρπὸν ἀρούρης |
| 247 | Primary ἀσκῷ ἐν αἰγείῳ· φέρε δὲ κρητῆρα φαεινὸν |
| 248 | Primary κῆρυξ Ἰδαῖος ἠδὲ χρύσεια κύπελλα· |
| 249 | Primary ὄτρυνεν δὲ γέροντα παριστάμενος ἐπέεσσιν· |
| 250 | Primary ὄρσεο Λαομεδοντιάδη, καλέουσιν ἄριστοι |
| 251 | Primary Τρώων θʼ ἱπποδάμων καὶ Ἀχαιῶν χαλκοχιτώνων |
| 252 | Primary ἐς πεδίον καταβῆναι ἵνʼ ὅρκια πιστὰ τάμητε· |
| 253 | Primary αὐτὰρ Ἀλέξανδρος καὶ ἀρηΐφιλος Μενέλαος |
| 254 | Primary μακρῇς ἐγχείῃσι μαχήσοντʼ ἀμφὶ γυναικί· |
| 255 | Primary τῷ δέ κε νικήσαντι γυνὴ καὶ κτήμαθʼ ἕποιτο· |
| 256 | Primary οἳ δʼ ἄλλοι φιλότητα καὶ ὅρκια πιστὰ ταμόντες |
| 257 | Primary ναίοιμεν Τροίην ἐριβώλακα, τοὶ δὲ νέονται |
| 258 | Primary Ἄργος ἐς ἱππόβοτον καὶ Ἀχαιΐδα καλλιγύναικα. |
| 259 | Primary ὣς φάτο ῥίγησεν δʼ ὃ γέρων, ἐκέλευσε δʼ ἑταίρους |
| 260 | Primary ἵππους ζευγνύμεναι· τοὶ δʼ ὀτραλέως ἐπίθοντο. |
| 261 | Primary ἂν δʼ ἄρʼ ἔβη Πρίαμος, κατὰ δʼ ἡνία τεῖνεν ὀπίσσω· |
| 262 | Primary πὰρ δέ οἱ Ἀντήνωρ περικαλλέα βήσετο δίφρον· |
| 263 | Primary τὼ δὲ διὰ Σκαιῶν πεδίον δʼ ἔχον ὠκέας ἵππους. |
| 264 | Primary ἀλλʼ ὅτε δή ῥʼ ἵκοντο μετὰ Τρῶας καὶ Ἀχαιούς, |
| 265 | Primary ἐξ ἵππων ἀποβάντες ἐπὶ χθόνα πουλυβότειραν |
| 266 | Primary ἐς μέσσον Τρώων καὶ Ἀχαιῶν ἐστιχόωντο. |
| 267 | Primary ὄρνυτο δʼ αὐτίκʼ ἔπειτα ἄναξ ἀνδρῶν Ἀγαμέμνων, |
| 268 | Primary ἂν δʼ Ὀδυσεὺς πολύμητις· ἀτὰρ κήρυκες ἀγαυοὶ |
| 269 | Primary ὅρκια πιστὰ θεῶν σύναγον, κρητῆρι δὲ οἶνον |
| 270 | Primary μίσγον, ἀτὰρ βασιλεῦσιν ὕδωρ ἐπὶ χεῖρας ἔχευαν. |
| 271 | Primary Ἀτρεΐδης δὲ ἐρυσσάμενος χείρεσσι μάχαιραν, |
| 272 | Primary ἥ οἱ πὰρ ξίφεος μέγα κουλεόν αἰὲν ἄωρτο, |
| 273 | Primary ἀρνῶν ἐκ κεφαλέων τάμνε τρίχας· αὐτὰρ ἔπειτα |
| 274 | Primary κήρυκες Τρώων καὶ Ἀχαιῶν νεῖμαν ἀρίστοις. |
| 275 | Primary τοῖσιν δʼ Ἀτρεΐδης μεγάλʼ εὔχετο χεῖρας ἀνασχών· |
| 276 | Primary Ζεῦ πάτερ Ἴδηθεν μεδέων κύδιστε μέγιστε, |
| 277 | Primary Ἠέλιός θʼ, ὃς πάντʼ ἐφορᾷς καὶ πάντʼ ἐπακούεις, |
| 278 | Primary καὶ ποταμοὶ καὶ γαῖα, καὶ οἳ ὑπένερθε καμόντας |
| 279 | Primary ἀνθρώπους τίνυσθον ὅτις κʼ ἐπίορκον ὀμόσσῃ, |
| 280 | Primary ὑμεῖς μάρτυροι ἔστε, φυλάσσετε δʼ ὅρκια πιστά· |
| 281 | Primary εἰ μέν κεν Μενέλαον Ἀλέξανδρος καταπέφνῃ |
| 282 | Primary αὐτὸς ἔπειθʼ Ἑλένην ἐχέτω καὶ κτήματα πάντα, |
| 283 | Primary ἡμεῖς δʼ ἐν νήεσσι νεώμεθα ποντοπόροισιν· |
| 284 | Primary εἰ δέ κʼ Ἀλέξανδρον κτείνῃ ξανθὸς Μενέλαος, |
| 285 | Primary Τρῶας ἔπειθʼ Ἑλένην καὶ κτήματα πάντʼ ἀποδοῦναι, |
| 286 | Primary τιμὴν δʼ Ἀργείοις ἀποτινέμεν ἥν τινʼ ἔοικεν, |
| 287 | Primary ἥ τε καὶ ἐσσομένοισι μετʼ ἀνθρώποισι πέληται. |
| 288 | Primary εἰ δʼ ἂν ἐμοὶ τιμὴν Πρίαμος Πριάμοιό τε παῖδες |
| 289 | Primary τίνειν οὐκ ἐθέλωσιν Ἀλεξάνδροιο πεσόντος, |
| 290 | Primary αὐτὰρ ἐγὼ καὶ ἔπειτα μαχήσομαι εἵνεκα ποινῆς |
| 291 | Primary αὖθι μένων, ἧός κε τέλος πολέμοιο κιχείω. |
| 292 | Primary ἦ, καὶ ἀπὸ στομάχους ἀρνῶν τάμε νηλέϊ χαλκῷ· |
| 293 | Primary καὶ τοὺς μὲν κατέθηκεν ἐπὶ χθονὸς ἀσπαίροντας |
| 294 | Primary θυμοῦ δευομένους· ἀπὸ γὰρ μένος εἵλετο χαλκός. |
| 295 | Primary οἶνον δʼ ἐκ κρητῆρος ἀφυσσόμενοι δεπάεσσιν |
| 296 | Primary ἔκχεον, ἠδʼ εὔχοντο θεοῖς αἰειγενέτῃσιν. |
| 297 | Primary ὧδε δέ τις εἴπεσκεν Ἀχαιῶν τε Τρώων τε· |
| 298 | Primary Ζεῦ κύδιστε μέγιστε καὶ ἀθάνατοι θεοὶ ἄλλοι |
| 299 | Primary ὁππότεροι πρότεροι ὑπὲρ ὅρκια πημήνειαν |
| 300 | Primary ὧδέ σφʼ ἐγκέφαλος χαμάδις ῥέοι ὡς ὅδε οἶνος |
| 301 | Primary αὐτῶν καὶ τεκέων, ἄλοχοι δʼ ἄλλοισι δαμεῖεν. |
| 302 | Primary ὣς ἔφαν, οὐδʼ ἄρα πώ σφιν ἐπεκραίαινε Κρονίων. |
| 303 | Primary τοῖσι δὲ Δαρδανίδης Πρίαμος μετὰ μῦθον ἔειπε· |
| 304 | Primary κέκλυτέ μευ Τρῶες καὶ ἐϋκνήμιδες Ἀχαιοί· |
| 305 | Primary ἤτοι ἐγὼν εἶμι προτὶ Ἴλιον ἠνεμόεσσαν |
| 306 | Primary ἄψ, ἐπεὶ οὔ πω τλήσομʼ ἐν ὀφθαλμοῖσιν ὁρᾶσθαι |
| 307 | Primary μαρνάμενον φίλον υἱὸν ἀρηϊφίλῳ Μενελάῳ· |
| 308 | Primary Ζεὺς μέν που τό γε οἶδε καὶ ἀθάνατοι θεοὶ ἄλλοι |
| 309 | Primary ὁπποτέρῳ θανάτοιο τέλος πεπρωμένον ἐστίν. |
| 310 | Primary ἦ ῥα καὶ ἐς δίφρον ἄρνας θέτο ἰσόθεος φώς, |
| 311 | Primary ἂν δʼ ἄρʼ ἔβαινʼ αὐτός, κατὰ δʼ ἡνία τεῖνεν ὀπίσσω· |
| 312 | Primary πὰρ δέ οἱ Ἀντήνωρ περικαλλέα βήσετο δίφρον. |
| 313 | Primary τὼ μὲν ἄρʼ ἄψορροι προτὶ Ἴλιον ἀπονέοντο· |
| 314 | Primary Ἕκτωρ δὲ Πριάμοιο πάϊς καὶ δῖος Ὀδυσσεὺς |
| 315 | Primary χῶρον μὲν πρῶτον διεμέτρεον, αὐτὰρ ἔπειτα |
| 316 | Primary κλήρους ἐν κυνέῃ χαλκήρεϊ πάλλον ἑλόντες, |
| 317 | Primary ὁππότερος δὴ πρόσθεν ἀφείη χάλκεον ἔγχος. |
| 318 | Primary λαοὶ δʼ ἠρήσαντο, θεοῖσι δὲ χεῖρας ἀνέσχον, |
| 319 | Primary ὧδε δέ τις εἴπεσκεν Ἀχαιῶν τε Τρώων τε· |
| 320 | Primary Ζεῦ πάτερ Ἴδηθεν μεδέων κύδιστε μέγιστε |
| 321 | Primary ὁππότερος τάδε ἔργα μετʼ ἀμφοτέροισιν ἔθηκε, |
| 322 | Primary τὸν δὸς ἀποφθίμενον δῦναι δόμον Ἄϊδος εἴσω, |
| 323 | Primary ἡμῖν δʼ αὖ φιλότητα καὶ ὅρκια πιστὰ γενέσθαι. |
| 324 | Primary ὣς ἄρʼ ἔφαν, πάλλεν δὲ μέγας κορυθαίολος Ἕκτωρ |
| 325 | Primary ἂψ ὁρόων· Πάριος δὲ θοῶς ἐκ κλῆρος ὄρουσεν. |
| 326 | Primary οἳ μὲν ἔπειθʼ ἵζοντο κατὰ στίχας, ἧχι ἑκάστῳ |
| 327 | Primary ἵπποι ἀερσίποδες καὶ ποικίλα τεύχεʼ ἔκειτο· |
| 328 | Primary αὐτὰρ ὅ γʼ ἀμφʼ ὤμοισιν ἐδύσετο τεύχεα καλὰ |
| 329 | Primary δῖος Ἀλέξανδρος Ἑλένης πόσις ἠϋκόμοιο. |
| 330 | Primary κνημῖδας μὲν πρῶτα περὶ κνήμῃσιν ἔθηκε |
| 331 | Primary καλάς, ἀργυρέοισιν ἐπισφυρίοις ἀραρυίας· |
| 332 | Primary δεύτερον αὖ θώρηκα περὶ στήθεσσιν ἔδυνεν |
| 333 | Primary οἷο κασιγνήτοιο Λυκάονος· ἥρμοσε δʼ αὐτῷ. |
| 334 | Primary ἀμφὶ δʼ ἄρʼ ὤμοισιν βάλετο ξίφος ἀργυρόηλον |
| 335 | Primary χάλκεον, αὐτὰρ ἔπειτα σάκος μέγα τε στιβαρόν τε· |
| 336 | Primary κρατὶ δʼ ἐπʼ ἰφθίμῳ κυνέην εὔτυκτον ἔθηκεν |
| 337 | Primary ἵππουριν· δεινὸν δὲ λόφος καθύπερθεν ἔνευεν· |
| 338 | Primary εἵλετο δʼ ἄλκιμον ἔγχος, ὅ οἱ παλάμηφιν ἀρήρει. |
| 339 | Primary ὣς δʼ αὔτως Μενέλαος ἀρήϊος ἔντεʼ ἔδυνεν. |
| 340 | Primary οἳ δʼ ἐπεὶ οὖν ἑκάτερθεν ὁμίλου θωρήχθησαν, |
| 341 | Primary ἐς μέσσον Τρώων καὶ Ἀχαιῶν ἐστιχόωντο |
| 342 | Primary δεινὸν δερκόμενοι· θάμβος δʼ ἔχεν εἰσορόωντας |
| 343 | Primary Τρῶάς θʼ ἱπποδάμους καὶ ἐϋκνήμιδας Ἀχαιούς. |
| 344 | Primary καί ῥʼ ἐγγὺς στήτην διαμετρητῷ ἐνὶ χώρῳ |
| 345 | Primary σείοντʼ ἐγχείας ἀλλήλοισιν κοτέοντε. |
| 346 | Primary πρόσθε δʼ Ἀλέξανδρος προΐει δολιχόσκιον ἔγχος, |
| 347 | Primary καὶ βάλεν Ἀτρεΐδαο κατʼ ἀσπίδα πάντοσε ἴσην, |
| 348 | Primary οὐδʼ ἔρρηξεν χαλκός, ἀνεγνάμφθη δέ οἱ αἰχμὴ |
| 349 | Primary ἀσπίδʼ ἐνὶ κρατερῇ· ὃ δὲ δεύτερον ὄρνυτο χαλκῷ |
| 350 | Primary Ἀτρεΐδης Μενέλαος ἐπευξάμενος Διὶ πατρί· |
| 351 | Primary Ζεῦ ἄνα δὸς τίσασθαι ὅ με πρότερος κάκʼ ἔοργε |
| 352 | Primary δῖον Ἀλέξανδρον, καὶ ἐμῇς ὑπὸ χερσὶ δάμασσον, |
| 353 | Primary ὄφρα τις ἐρρίγῃσι καὶ ὀψιγόνων ἀνθρώπων |
| 354 | Primary ξεινοδόκον κακὰ ῥέξαι, ὅ κεν φιλότητα παράσχῃ. |
| 355 | Primary ἦ ῥα καὶ ἀμπεπαλὼν προΐει δολιχόσκιον ἔγχος, |
| 356 | Primary καὶ βάλε Πριαμίδαο κατʼ ἀσπίδα πάντοσε ἴσην· |
| 357 | Primary διὰ μὲν ἀσπίδος ἦλθε φαεινῆς ὄβριμον ἔγχος, |
| 358 | Primary καὶ διὰ θώρηκος πολυδαιδάλου ἠρήρειστο· |
| 359 | Primary ἀντικρὺ δὲ παραὶ λαπάρην διάμησε χιτῶνα |
| 360 | Primary ἔγχος· ὃ δʼ ἐκλίνθη καὶ ἀλεύατο κῆρα μέλαιναν. |
| 361 | Primary Ἀτρεΐδης δὲ ἐρυσσάμενος ξίφος ἀργυρόηλον |
| 362 | Primary πλῆξεν ἀνασχόμενος κόρυθος φάλον· ἀμφὶ δʼ ἄρʼ αὐτῷ |
| 363 | Primary τριχθά τε καὶ τετραχθὰ διατρυφὲν ἔκπεσε χειρός. |
| 364 | Primary Ἀτρεΐδης δʼ ᾤμωξεν ἰδὼν εἰς οὐρανὸν εὐρύν· |
| 365 | Primary Ζεῦ πάτερ οὔ τις σεῖο θεῶν ὀλοώτερος ἄλλος· |
| 366 | Primary ἦ τʼ ἐφάμην τίσασθαι Ἀλέξανδρον κακότητος· |
| 367 | Primary νῦν δέ μοι ἐν χείρεσσιν ἄγη ξίφος, ἐκ δέ μοι ἔγχος |
| 368 | Primary ἠΐχθη παλάμηφιν ἐτώσιον, οὐδʼ ἔβαλόν μιν. |
| 369 | Primary ἦ καὶ ἐπαΐξας κόρυθος λάβεν ἱπποδασείης, |
| 370 | Primary ἕλκε δʼ ἐπιστρέψας μετʼ ἐϋκνήμιδας Ἀχαιούς· |
| 371 | Primary ἄγχε δέ μιν πολύκεστος ἱμὰς ἁπαλὴν ὑπὸ δειρήν, |
| 372 | Primary ὅς οἱ ὑπʼ ἀνθερεῶνος ὀχεὺς τέτατο τρυφαλείης. |
| 373 | Primary καί νύ κεν εἴρυσσέν τε καὶ ἄσπετον ἤρατο κῦδος, |
| 374 | Primary εἰ μὴ ἄρʼ ὀξὺ νόησε Διὸς θυγάτηρ Ἀφροδίτη, |
| 375 | Primary ἥ οἱ ῥῆξεν ἱμάντα βοὸς ἶφι κταμένοιο· |
| 376 | Primary κεινὴ δὲ τρυφάλεια ἅμʼ ἕσπετο χειρὶ παχείῃ. |
| 377 | Primary τὴν μὲν ἔπειθʼ ἥρως μετʼ ἐϋκνήμιδας Ἀχαιοὺς |
| 378 | Primary ῥῖψʼ ἐπιδινήσας, κόμισαν δʼ ἐρίηρες ἑταῖροι· |
| 379 | Primary αὐτὰρ ὃ ἂψ ἐπόρουσε κατακτάμεναι μενεαίνων |
| 380 | Primary ἔγχεϊ χαλκείῳ· τὸν δʼ ἐξήρπαξʼ Ἀφροδίτη |
| 381 | Primary ῥεῖα μάλʼ ὥς τε θεός, ἐκάλυψε δʼ ἄρʼ ἠέρι πολλῇ, |
| 382 | Primary κὰδ δʼ εἷσʼ ἐν θαλάμῳ εὐώδεϊ κηώεντι. |
| 383 | Primary αὐτὴ δʼ αὖ Ἑλένην καλέουσʼ ἴε· τὴν δὲ κίχανε |
| 384 | Primary πύργῳ ἐφʼ ὑψηλῷ, περὶ δὲ Τρῳαὶ ἅλις ἦσαν· |
| 385 | Primary χειρὶ δὲ νεκταρέου ἑανοῦ ἐτίναξε λαβοῦσα, |
| 386 | Primary γρηῒ δέ μιν ἐϊκυῖα παλαιγενέϊ προσέειπεν |
| 387 | Primary εἰροκόμῳ, ἥ οἱ Λακεδαίμονι ναιετοώσῃ |
| 388 | Primary ἤσκειν εἴρια καλά, μάλιστα δέ μιν φιλέεσκε· |
| 389 | Primary τῇ μιν ἐεισαμένη προσεφώνεε δῖʼ Ἀφροδίτη· |
| 390 | Primary δεῦρʼ ἴθʼ· Ἀλέξανδρός σε καλεῖ οἶκον δὲ νέεσθαι. |
| 391 | Primary κεῖνος ὅ γʼ ἐν θαλάμῳ καὶ δινωτοῖσι λέχεσσι |
| 392 | Primary κάλλεΐ τε στίλβων καὶ εἵμασιν· οὐδέ κε φαίης |
| 393 | Primary ἀνδρὶ μαχεσσάμενον τόν γʼ ἐλθεῖν, ἀλλὰ χορὸν δὲ |
| 394 | Primary ἔρχεσθʼ, ἠὲ χοροῖο νέον λήγοντα καθίζειν. |
| 395 | Primary ὣς φάτο, τῇ δʼ ἄρα θυμὸν ἐνὶ στήθεσσιν ὄρινε· |
| 396 | Primary καί ῥʼ ὡς οὖν ἐνόησε θεᾶς περικαλλέα δειρὴν |
| 397 | Primary στήθεά θʼ ἱμερόεντα καὶ ὄμματα μαρμαίροντα, |
| 398 | Primary θάμβησέν τʼ ἄρʼ ἔπειτα ἔπος τʼ ἔφατʼ ἔκ τʼ ὀνόμαζε· |
| 399 | Primary δαιμονίη, τί με ταῦτα λιλαίεαι ἠπεροπεύειν; |
| 400 | Primary ἦ πῄ με προτέρω πολίων εὖ ναιομενάων |
| 401 | Primary ἄξεις, ἢ Φρυγίης ἢ Μῃονίης ἐρατεινῆς, |
| 402 | Primary εἴ τίς τοι καὶ κεῖθι φίλος μερόπων ἀνθρώπων· |
| 403 | Primary οὕνεκα δὴ νῦν δῖον Ἀλέξανδρον Μενέλαος |
| 404 | Primary νικήσας ἐθέλει στυγερὴν ἐμὲ οἴκαδʼ ἄγεσθαι, |
| 405 | Primary τοὔνεκα δὴ νῦν δεῦρο δολοφρονέουσα παρέστης; |
| 406 | Primary ἧσο παρʼ αὐτὸν ἰοῦσα, θεῶν δʼ ἀπόεικε κελεύθου, |
| 407 | Primary μηδʼ ἔτι σοῖσι πόδεσσιν ὑποστρέψειας Ὄλυμπον, |
| 408 | Primary ἀλλʼ αἰεὶ περὶ κεῖνον ὀΐζυε καί ἑ φύλασσε, |
| 409 | Primary εἰς ὅ κέ σʼ ἢ ἄλοχον ποιήσεται ἢ ὅ γε δούλην. |
| 410 | Primary κεῖσε δʼ ἐγὼν οὐκ εἶμι· νεμεσσητὸν δέ κεν εἴη· |
| 411 | Primary κείνου πορσανέουσα λέχος· Τρῳαὶ δέ μʼ ὀπίσσω |
| 412 | Primary πᾶσαι μωμήσονται· ἔχω δʼ ἄχεʼ ἄκριτα θυμῷ. |
| 413 | Primary τὴν δὲ χολωσαμένη προσεφώνεε δῖʼ Ἀφροδίτη· |
| 414 | Primary μή μʼ ἔρεθε σχετλίη, μὴ χωσαμένη σε μεθείω, |
| 415 | Primary τὼς δέ σʼ ἀπεχθήρω ὡς νῦν ἔκπαγλʼ ἐφίλησα, |
| 416 | Primary μέσσῳ δʼ ἀμφοτέρων μητίσομαι ἔχθεα λυγρὰ |
| 417 | Primary Τρώων καὶ Δαναῶν, σὺ δέ κεν κακὸν οἶτον ὄληαι. |
| 418 | Primary ὣς ἔφατʼ, ἔδεισεν δʼ Ἑλένη Διὸς ἐκγεγαυῖα, |
| 419 | Primary βῆ δὲ κατασχομένη ἑανῷ ἀργῆτι φαεινῷ |
| 420 | Primary σιγῇ, πάσας δὲ Τρῳὰς λάθεν· ἦρχε δὲ δαίμων. |
| 421 | Primary αἳ δʼ ὅτʼ Ἀλεξάνδροιο δόμον περικαλλέʼ ἵκοντο, |
| 422 | Primary ἀμφίπολοι μὲν ἔπειτα θοῶς ἐπὶ ἔργα τράποντο, |
| 423 | Primary ἣ δʼ εἰς ὑψόροφον θάλαμον κίε δῖα γυναικῶν. |
| 424 | Primary τῇ δʼ ἄρα δίφρον ἑλοῦσα φιλομειδὴς Ἀφροδίτη |
| 425 | Primary ἀντίʼ Ἀλεξάνδροιο θεὰ κατέθηκε φέρουσα· |
| 426 | Primary ἔνθα κάθιζʼ Ἑλένη κούρη Διὸς αἰγιόχοιο |
| 427 | Primary ὄσσε πάλιν κλίνασα, πόσιν δʼ ἠνίπαπε μύθῳ· |
| 428 | Primary ἤλυθες ἐκ πολέμου· ὡς ὤφελες αὐτόθʼ ὀλέσθαι |
| 429 | Primary ἀνδρὶ δαμεὶς κρατερῷ, ὃς ἐμὸς πρότερος πόσις ἦεν. |
| 430 | Primary ἦ μὲν δὴ πρίν γʼ εὔχεʼ ἀρηϊφίλου Μενελάου |
| 431 | Primary σῇ τε βίῃ καὶ χερσὶ καὶ ἔγχεϊ φέρτερος εἶναι· |
| 432 | Primary ἀλλʼ ἴθι νῦν προκάλεσσαι ἀρηΐφιλον Μενέλαον |
| 433 | Primary ἐξαῦτις μαχέσασθαι ἐναντίον· ἀλλά σʼ ἔγωγε |
| 434 | Primary παύεσθαι κέλομαι, μηδὲ ξανθῷ Μενελάῳ |
| 435 | Primary ἀντίβιον πόλεμον πολεμίζειν ἠδὲ μάχεσθαι |
| 436 | Primary ἀφραδέως, μή πως τάχʼ ὑπʼ αὐτοῦ δουρὶ δαμήῃς. |
| 437 | Primary τὴν δὲ Πάρις μύθοισιν ἀμειβόμενος προσέειπε· |
| 438 | Primary μή με γύναι χαλεποῖσιν ὀνείδεσι θυμὸν ἔνιπτε· |
| 439 | Primary νῦν μὲν γὰρ Μενέλαος ἐνίκησεν σὺν Ἀθήνῃ, |
| 440 | Primary κεῖνον δʼ αὖτις ἐγώ· πάρα γὰρ θεοί εἰσι καὶ ἡμῖν. |
| 441 | Primary ἀλλʼ ἄγε δὴ φιλότητι τραπείομεν εὐνηθέντε· |
| 442 | Primary οὐ γάρ πώ ποτέ μʼ ὧδέ γʼ ἔρως φρένας ἀμφεκάλυψεν, |
| 443 | Primary οὐδʼ ὅτε σε πρῶτον Λακεδαίμονος ἐξ ἐρατεινῆς |
| 444 | Primary ἔπλεον ἁρπάξας ἐν ποντοπόροισι νέεσσι, |
| 445 | Primary νήσῳ δʼ ἐν Κραναῇ ἐμίγην φιλότητι καὶ εὐνῇ, |
| 446 | Primary ὥς σεο νῦν ἔραμαι καί με γλυκὺς ἵμερος αἱρεῖ. |
| 447 | Primary ἦ ῥα, καὶ ἄρχε λέχος δὲ κιών· ἅμα δʼ εἵπετʼ ἄκοιτις. |
| 448 | Primary τὼ μὲν ἄρʼ ἐν τρητοῖσι κατεύνασθεν λεχέεσσιν, |
| 449 | Primary Ἀτρεΐδης δʼ ἀνʼ ὅμιλον ἐφοίτα θηρὶ ἐοικὼς |
| 450 | Primary εἴ που ἐσαθρήσειεν Ἀλέξανδρον θεοειδέα. |
| 451 | Primary ἀλλʼ οὔ τις δύνατο Τρώων κλειτῶν τʼ ἐπικούρων |
| 452 | Primary δεῖξαι Ἀλέξανδρον τότʼ ἀρηϊφίλῳ Μενελάῳ· |
| 453 | Primary οὐ μὲν γὰρ φιλότητί γʼ ἐκεύθανον εἴ τις ἴδοιτο· |
| 454 | Primary ἶσον γάρ σφιν πᾶσιν ἀπήχθετο κηρὶ μελαίνῃ. |
| 455 | Primary τοῖσι δὲ καὶ μετέειπεν ἄναξ ἀνδρῶν Ἀγαμέμνων· |
| 456 | Primary κέκλυτέ μευ Τρῶες καὶ Δάρδανοι ἠδʼ ἐπίκουροι· |
| 457 | Primary νίκη μὲν δὴ φαίνετʼ ἀρηϊφίλου Μενελάου, |
| 458 | Primary ὑμεῖς δʼ Ἀργείην Ἑλένην καὶ κτήμαθʼ ἅμʼ αὐτῇ |
| 459 | Primary ἔκδοτε, καὶ τιμὴν ἀποτινέμεν ἥν τινʼ ἔοικεν, |
| 460 | Primary ἥ τε καὶ ἐσσομένοισι μετʼ ἀνθρώποισι πέληται. |
| 461 | Primary ὣς ἔφατʼ Ἀτρεΐδης, ἐπὶ δʼ ᾔνεον ἄλλοι Ἀχαιοί. |