Reader
Reader | Iliad, Book 8
Iliad
Homer
Text
Position
Line 1 of 565
Waypoints
| Line Ref | Monro and Allen | Ancient Greek |
|---|---|
| 1 | Primary Ἠὼς μὲν κροκόπεπλος ἐκίδνατο πᾶσαν ἐπʼ αἶαν, |
| 2 | Primary Ζεὺς δὲ θεῶν ἀγορὴν ποιήσατο τερπικέραυνος |
| 3 | Primary ἀκροτάτῃ κορυφῇ πολυδειράδος Οὐλύμποιο· |
| 4 | Primary αὐτὸς δέ σφʼ ἀγόρευε, θεοὶ δʼ ὑπὸ πάντες ἄκουον· |
| 5 | Primary κέκλυτέ μευ πάντές τε θεοὶ πᾶσαί τε θέαιναι, |
| 6 | Primary ὄφρʼ εἴπω τά με θυμὸς ἐνὶ στήθεσσι κελεύει. |
| 7 | Primary μήτέ τις οὖν θήλεια θεὸς τό γε μήτέ τις ἄρσην |
| 8 | Primary πειράτω διακέρσαι ἐμὸν ἔπος, ἀλλʼ ἅμα πάντες |
| 9 | Primary αἰνεῖτʼ, ὄφρα τάχιστα τελευτήσω τάδε ἔργα. |
| 10 | Primary ὃν δʼ ἂν ἐγὼν ἀπάνευθε θεῶν ἐθέλοντα νοήσω |
| 11 | Primary ἐλθόντʼ ἢ Τρώεσσιν ἀρηγέμεν ἢ Δαναοῖσι |
| 12 | Primary πληγεὶς οὐ κατὰ κόσμον ἐλεύσεται Οὔλυμπον δέ· |
| 13 | Primary ἤ μιν ἑλὼν ῥίψω ἐς Τάρταρον ἠερόεντα |
| 14 | Primary τῆλε μάλʼ, ἧχι βάθιστον ὑπὸ χθονός ἐστι βέρεθρον, |
| 15 | Primary ἔνθα σιδήρειαί τε πύλαι καὶ χάλκεος οὐδός, |
| 16 | Primary τόσσον ἔνερθʼ Ἀΐδεω ὅσον οὐρανός ἐστʼ ἀπὸ γαίης· |
| 17 | Primary γνώσετʼ ἔπειθʼ ὅσον εἰμὶ θεῶν κάρτιστος ἁπάντων. |
| 18 | Primary εἰ δʼ ἄγε πειρήσασθε θεοὶ ἵνα εἴδετε πάντες· |
| 19 | Primary σειρὴν χρυσείην ἐξ οὐρανόθεν κρεμάσαντες |
| 20 | Primary πάντές τʼ ἐξάπτεσθε θεοὶ πᾶσαί τε θέαιναι· |
| 21 | Primary ἀλλʼ οὐκ ἂν ἐρύσαιτʼ ἐξ οὐρανόθεν πεδίον δὲ |
| 22 | Primary Ζῆνʼ ὕπατον μήστωρʼ, οὐδʼ εἰ μάλα πολλὰ κάμοιτε. |
| 23 | Primary ἀλλʼ ὅτε δὴ καὶ ἐγὼ πρόφρων ἐθέλοιμι ἐρύσσαι, |
| 24 | Primary αὐτῇ κεν γαίῃ ἐρύσαιμʼ αὐτῇ τε θαλάσσῃ· |
| 25 | Primary σειρὴν μέν κεν ἔπειτα περὶ ῥίον Οὐλύμποιο |
| 26 | Primary δησαίμην, τὰ δέ κʼ αὖτε μετήορα πάντα γένοιτο. |
| 27 | Primary τόσσον ἐγὼ περί τʼ εἰμὶ θεῶν περί τʼ εἴμʼ ἀνθρώπων. |
| 28 | Primary ὣς ἔφαθʼ, οἱ δʼ ἄρα πάντες ἀκὴν ἐγένοντο σιωπῇ |
| 29 | Primary μῦθον ἀγασσάμενοι· μάλα γὰρ κρατερῶς ἀγόρευσεν. |
| 30 | Primary ὀψὲ δὲ δὴ μετέειπε θεὰ γλαυκῶπις Ἀθήνη· |
| 31 | Primary ὦ πάτερ ἡμέτερε Κρονίδη ὕπατε κρειόντων |
| 32 | Primary εὖ νυ καὶ ἡμεῖς ἴδμεν ὅ τοι σθένος οὐκ ἐπιεικτόν· |
| 33 | Primary ἀλλʼ ἔμπης Δαναῶν ὀλοφυρόμεθʼ αἰχμητάων, |
| 34 | Primary οἵ κεν δὴ κακὸν οἶτον ἀναπλήσαντες ὄλωνται. |
| 35 | Primary ἀλλʼ ἤτοι πολέμου μὲν ἀφεξόμεθʼ ὡς σὺ κελεύεις· |
| 36 | Primary βουλὴν δʼ Ἀργείοις ὑποθησόμεθʼ ἥ τις ὀνήσει, |
| 37 | Primary ὡς μὴ πάντες ὄλωνται ὀδυσσαμένοιο τεοῖο. |
| 38 | Primary τὴν δʼ ἐπιμειδήσας προσέφη νεφεληγερέτα Ζεύς· |
| 39 | Primary θάρσει Τριτογένεια φίλον τέκος· οὔ νύ τι θυμῷ |
| 40 | Primary πρόφρονι μυθέομαι, ἐθέλω δέ τοι ἤπιος εἶναι. |
| 41 | Primary ὣς εἰπὼν ὑπʼ ὄχεσφι τιτύσκετο χαλκόποδʼ ἵππω |
| 42 | Primary ὠκυπέτα χρυσέῃσιν ἐθείρῃσιν κομόωντε, |
| 43 | Primary χρυσὸν δʼ αὐτὸς ἔδυνε περὶ χροΐ, γέντο δʼ ἱμάσθλην |
| 44 | Primary χρυσείην εὔτυκτον, ἑοῦ δʼ ἐπεβήσετο δίφρου, |
| 45 | Primary μάστιξεν δʼ ἐλάαν· τὼ δʼ οὐκ ἀέκοντε πετέσθην |
| 46 | Primary μεσσηγὺς γαίης τε καὶ οὐρανοῦ ἀστερόεντος. |
| 47 | Primary Ἴδην δʼ ἵκανεν πολυπίδακα μητέρα θηρῶν |
| 48 | Primary Γάργαρον, ἔνθά τέ οἱ τέμενος βωμός τε θυήεις. |
| 49 | Primary ἔνθʼ ἵππους ἔστησε πατὴρ ἀνδρῶν τε θεῶν τε |
| 50 | Primary λύσας ἐξ ὀχέων, κατὰ δʼ ἠέρα πουλὺν ἔχευεν. |
| 51 | Primary αὐτὸς δʼ ἐν κορυφῇσι καθέζετο κύδεϊ γαίων |
| 52 | Primary εἰσορόων Τρώων τε πόλιν καὶ νῆας Ἀχαιῶν. |
| 53 | Primary οἳ δʼ ἄρα δεῖπνον ἕλοντο κάρη κομόωντες Ἀχαιοὶ |
| 54 | Primary ῥίμφα κατὰ κλισίας, ἀπὸ δʼ αὐτοῦ θωρήσσοντο. |
| 55 | Primary Τρῶες δʼ αὖθʼ ἑτέρωθεν ἀνὰ πτόλιν ὁπλίζοντο |
| 56 | Primary παυρότεροι· μέμασαν δὲ καὶ ὧς ὑσμῖνι μάχεσθαι |
| 57 | Primary χρειοῖ ἀναγκαίῃ, πρό τε παίδων καὶ πρὸ γυναικῶν. |
| 58 | Primary πᾶσαι δʼ ὠΐγνυντο πύλαι, ἐκ δʼ ἔσσυτο λαός, |
| 59 | Primary πεζοί θʼ ἱππῆές τε· πολὺς δʼ ὀρυμαγδὸς ὀρώρει. |
| 60 | Primary οἳ δʼ ὅτε δή ῥʼ ἐς χῶρον ἕνα ξυνιόντες ἵκοντο |
| 61 | Primary σύν ῥʼ ἔβαλον ῥινούς, σὺν δʼ ἔγχεα καὶ μένεʼ ἀνδρῶν |
| 62 | Primary χαλκεοθωρήκων· ἀτὰρ ἀσπίδες ὀμφαλόεσσαι |
| 63 | Primary ἔπληντʼ ἀλλήλῃσι, πολὺς δʼ ὀρυμαγδὸς ὀρώρει. |
| 64 | Primary ἔνθα δʼ ἅμʼ οἰμωγή τε καὶ εὐχωλὴ πέλεν ἀνδρῶν |
| 65 | Primary ὀλλύντων τε καὶ ὀλλυμένων, ῥέε δʼ αἵματι γαῖα. |
| 66 | Primary ὄφρα μὲν ἠὼς ἦν καὶ ἀέξετο ἱερὸν ἦμαρ, |
| 67 | Primary τόφρα μάλʼ ἀμφοτέρων βέλεʼ ἥπτετο, πῖπτε δὲ λαός. |
| 68 | Primary ἦμος δʼ Ἠέλιος μέσον οὐρανὸν ἀμφιβεβήκει, |
| 69 | Primary καὶ τότε δὴ χρύσεια πατὴρ ἐτίταινε τάλαντα· |
| 70 | Primary ἐν δʼ ἐτίθει δύο κῆρε τανηλεγέος θανάτοιο |
| 71 | Primary Τρώων θʼ ἱπποδάμων καὶ Ἀχαιῶν χαλκοχιτώνων, |
| 72 | Primary ἕλκε δὲ μέσσα λαβών· ῥέπε δʼ αἴσιμον ἦμαρ Ἀχαιῶν. |
| 73 | Primary αἳ μὲν Ἀχαιῶν κῆρες ἐπὶ χθονὶ πουλυβοτείρῃ |
| 74 | Primary ἑζέσθην, Τρώων δὲ πρὸς οὐρανὸν εὐρὺν ἄερθεν· |
| 75 | Primary αὐτὸς δʼ ἐξ Ἴδης μεγάλʼ ἔκτυπε, δαιόμενον δὲ |
| 76 | Primary ἧκε σέλας μετὰ λαὸν Ἀχαιῶν· οἳ δὲ ἰδόντες |
| 77 | Primary θάμβησαν, καὶ πάντας ὑπὸ χλωρὸν δέος εἷλεν. |
| 78 | Primary ἔνθʼ οὔτʼ Ἰδομενεὺς τλῆ μίμνειν οὔτʼ Ἀγαμέμνων, |
| 79 | Primary οὔτε δύʼ Αἴαντες μενέτην θεράποντες Ἄρηος· |
| 80 | Primary Νέστωρ οἶος ἔμιμνε Γερήνιος οὖρος Ἀχαιῶν |
| 81 | Primary οὔ τι ἑκών, ἀλλʼ ἵππος ἐτείρετο, τὸν βάλεν ἰῷ |
| 82 | Primary δῖος Ἀλέξανδρος Ἑλένης πόσις ἠϋκόμοιο |
| 83 | Primary ἄκρην κὰκ κορυφήν, ὅθι τε πρῶται τρίχες ἵππων |
| 84 | Primary κρανίῳ ἐμπεφύασι, μάλιστα δὲ καίριόν ἐστιν. |
| 85 | Primary ἀλγήσας δʼ ἀνέπαλτο, βέλος δʼ εἰς ἐγκέφαλον δῦ, |
| 86 | Primary σὺν δʼ ἵππους ἐτάραξε κυλινδόμενος περὶ χαλκῷ. |
| 87 | Primary ὄφρʼ ὁ γέρων ἵπποιο παρηορίας ἀπέταμνε |
| 88 | Primary φασγάνῳ ἀΐσσων, τόφρʼ Ἕκτορος ὠκέες ἵπποι |
| 89 | Primary ἦλθον ἀνʼ ἰωχμὸν θρασὺν ἡνίοχον φορέοντες |
| 90 | Primary Ἕκτορα· καί νύ κεν ἔνθʼ ὁ γέρων ἀπὸ θυμὸν ὄλεσσεν |
| 91 | Primary εἰ μὴ ἄρʼ ὀξὺ νόησε βοὴν ἀγαθὸς Διομήδης· |
| 92 | Primary σμερδαλέον δʼ ἐβόησεν ἐποτρύνων Ὀδυσῆα· |
| 93 | Primary διογενὲς Λαερτιάδη πολυμήχανʼ Ὀδυσσεῦ |
| 94 | Primary πῇ φεύγεις μετὰ νῶτα βαλὼν κακὸς ὣς ἐν ὁμίλῳ; |
| 95 | Primary μή τίς τοι φεύγοντι μεταφρένῳ ἐν δόρυ πήξῃ· |
| 96 | Primary ἀλλὰ μένʼ ὄφρα γέροντος ἀπώσομεν ἄγριον ἄνδρα. |
| 97 | Primary ὣς ἔφατʼ, οὐδʼ ἐσάκουσε πολύτλας δῖος Ὀδυσσεύς, |
| 98 | Primary ἀλλὰ παρήϊξεν κοίλας ἐπὶ νῆας Ἀχαιῶν. |
| 99 | Primary Τυδεΐδης δʼ αὐτός περ ἐὼν προμάχοισιν ἐμίχθη, |
| 100 | Primary στῆ δὲ πρόσθʼ ἵππων Νηληϊάδαο γέροντος, |
| 101 | Primary καί μιν φωνήσας ἔπεα πτερόεντα προσηύδα· |
| 102 | Primary ὦ γέρον ἦ μάλα δή σε νέοι τείρουσι μαχηταί, |
| 103 | Primary σὴ δὲ βίη λέλυται, χαλεπὸν δέ σε γῆρας ὀπάζει, |
| 104 | Primary ἠπεδανὸς δέ νύ τοι θεράπων, βραδέες δέ τοι ἵπποι. |
| 105 | Primary ἀλλʼ ἄγʼ ἐμῶν ὀχέων ἐπιβήσεο, ὄφρα ἴδηαι |
| 106 | Primary οἷοι Τρώϊοι ἵπποι ἐπιστάμενοι πεδίοιο |
| 107 | Primary κραιπνὰ μάλʼ ἔνθα καὶ ἔνθα διωκέμεν ἠδὲ φέβεσθαι, |
| 108 | Primary οὕς ποτʼ ἀπʼ Αἰνείαν ἑλόμην μήστωρε φόβοιο. |
| 109 | Primary τούτω μὲν θεράποντε κομείτων, τώδε δὲ νῶϊ |
| 110 | Primary Τρωσὶν ἐφʼ ἱπποδάμοις ἰθύνομεν, ὄφρα καὶ Ἕκτωρ |
| 111 | Primary εἴσεται εἰ καὶ ἐμὸν δόρυ μαίνεται ἐν παλάμῃσιν. |
| 112 | Primary ὣς ἔφατʼ, οὐδʼ ἀπίθησε Γερήνιος ἱππότα Νέστωρ. |
| 113 | Primary Νεστορέας μὲν ἔπειθʼ ἵππους θεράποντε κομείτην |
| 114 | Primary ἴφθιμοι Σθένελός τε καὶ Εὐρυμέδων ἀγαπήνωρ. |
| 115 | Primary τὼ δʼ εἰς ἀμφοτέρω Διομήδεος ἅρματα βήτην· |
| 116 | Primary Νέστωρ δʼ ἐν χείρεσσι λάβʼ ἡνία σιγαλόεντα, |
| 117 | Primary μάστιξεν δʼ ἵππους· τάχα δʼ Ἕκτορος ἄγχι γένοντο. |
| 118 | Primary τοῦ δʼ ἰθὺς μεμαῶτος ἀκόντισε Τυδέος υἱός· |
| 119 | Primary καὶ τοῦ μέν ῥʼ ἀφάμαρτεν, ὃ δʼ ἡνίοχον θεράποντα |
| 120 | Primary υἱὸν ὑπερθύμου Θηβαίου Ἠνιοπῆα |
| 121 | Primary ἵππων ἡνίʼ ἔχοντα βάλε στῆθος παρὰ μαζόν. |
| 122 | Primary ἤριπε δʼ ἐξ ὀχέων, ὑπερώησαν δέ οἱ ἵπποι |
| 123 | Primary ὠκύποδες· τοῦ δʼ αὖθι λύθη ψυχή τε μένος τε. |
| 124 | Primary Ἕκτορα δʼ αἰνὸν ἄχος πύκασε φρένας ἡνιόχοιο· |
| 125 | Primary τὸν μὲν ἔπειτʼ εἴασε καὶ ἀχνύμενός περ ἑταίρου |
| 126 | Primary κεῖσθαι, ὃ δʼ ἡνίοχον μέθεπε θρασύν· οὐδʼ ἄρʼ ἔτι δὴν |
| 127 | Primary ἵππω δευέσθην σημάντορος· αἶψα γὰρ εὗρεν |
| 128 | Primary Ἰφιτίδην Ἀρχεπτόλεμον θρασύν, ὅν ῥα τόθʼ ἵππων |
| 129 | Primary ὠκυπόδων ἐπέβησε, δίδου δέ οἱ ἡνία χερσίν. |
| 130 | Primary ἔνθά κε λοιγὸς ἔην καὶ ἀμήχανα ἔργα γένοντο, |
| 131 | Primary καί νύ κε σήκασθεν κατὰ Ἴλιον ἠΰτε ἄρνες, |
| 132 | Primary εἰ μὴ ἄρʼ ὀξὺ νόησε πατὴρ ἀνδρῶν τε θεῶν τε· |
| 133 | Primary βροντήσας δʼ ἄρα δεινὸν ἀφῆκʼ ἀργῆτα κεραυνόν, |
| 134 | Primary κὰδ δὲ πρόσθʼ ἵππων Διομήδεος ἧκε χαμᾶζε· |
| 135 | Primary δεινὴ δὲ φλὸξ ὦρτο θεείου καιομένοιο, |
| 136 | Primary τὼ δʼ ἵππω δείσαντε καταπτήτην ὑπʼ ὄχεσφι· |
| 137 | Primary Νέστορα δʼ ἐκ χειρῶν φύγον ἡνία σιγαλόεντα, |
| 138 | Primary δεῖσε δʼ ὅ γʼ ἐν θυμῷ, Διομήδεα δὲ προσέειπε· |
| 139 | Primary Τυδεΐδη ἄγε δʼ αὖτε φόβον δʼ ἔχε μώνυχας ἵππους. |
| 140 | Primary ἦ οὐ γιγνώσκεις ὅ τοι ἐκ Διὸς οὐχ ἕπετʼ ἀλκή; |
| 141 | Primary νῦν μὲν γὰρ τούτῳ Κρονίδης Ζεὺς κῦδος ὀπάζει |
| 142 | Primary σήμερον· ὕστερον αὖτε καὶ ἡμῖν, αἴ κʼ ἐθέλῃσι, |
| 143 | Primary δώσει· ἀνὴρ δέ κεν οὔ τι Διὸς νόον εἰρύσσαιτο |
| 144 | Primary οὐδὲ μάλʼ ἴφθιμος, ἐπεὶ ἦ πολὺ φέρτερός ἐστι. |
| 145 | Primary τὸν δʼ ἠμείβετʼ ἔπειτα βοὴν ἀγαθὸς Διομήδης· |
| 146 | Primary ναὶ δὴ ταῦτά γε πάντα γέρον κατὰ μοῖραν ἔειπες· |
| 147 | Primary ἀλλὰ τόδʼ αἰνὸν ἄχος κραδίην καὶ θυμὸν ἱκάνει· |
| 148 | Primary Ἕκτωρ γάρ ποτε φήσει ἐνὶ Τρώεσσʼ ἀγορεύων· |
| 149 | Primary Τυδεΐδης ὑπʼ ἐμεῖο φοβεύμενος ἵκετο νῆας. |
| 150 | Primary ὥς ποτʼ ἀπειλήσει· τότε μοι χάνοι εὐρεῖα χθών. |
| 151 | Primary τὸν δʼ ἠμείβετʼ ἔπειτα Γερήνιος ἱππότα Νέστωρ· |
| 152 | Primary ὤ μοι Τυδέος υἱὲ δαΐφρονος, οἷον ἔειπες. |
| 153 | Primary εἴ περ γάρ σʼ Ἕκτωρ γε κακὸν καὶ ἀνάλκιδα φήσει, |
| 154 | Primary ἀλλʼ οὐ πείσονται Τρῶες καὶ Δαρδανίωνες |
| 155 | Primary καὶ Τρώων ἄλοχοι μεγαθύμων ἀσπιστάων, |
| 156 | Primary τάων ἐν κονίῃσι βάλες θαλεροὺς παρακοίτας. |
| 157 | Primary ὣς ἄρα φωνήσας φύγαδε τράπε μώνυχας ἵππους |
| 158 | Primary αὖτις ἀνʼ ἰωχμόν· ἐπὶ δὲ Τρῶές τε καὶ Ἕκτωρ |
| 159 | Primary ἠχῇ θεσπεσίῃ βέλεα στονόεντα χέοντο. |
| 160 | Primary τῷ δʼ ἐπὶ μακρὸν ἄϋσε μέγας κορυθαίολος Ἕκτωρ· |
| 161 | Primary Τυδεΐδη περὶ μέν σε τίον Δαναοὶ ταχύπωλοι |
| 162 | Primary ἕδρῃ τε κρέασίν τε ἰδὲ πλείοις δεπάεσσι· |
| 163 | Primary νῦν δέ σʼ ἀτιμήσουσι· γυναικὸς ἄρʼ ἀντὶ τέτυξο. |
| 164 | Primary ἔρρε κακὴ γλήνη, ἐπεὶ οὐκ εἴξαντος ἐμεῖο |
| 165 | Primary πύργων ἡμετέρων ἐπιβήσεαι, οὐδὲ γυναῖκας |
| 166 | Primary ἄξεις ἐν νήεσσι· πάρος τοι δαίμονα δώσω. |
| 167 | Primary ὣς φάτο, Τυδεΐδης δὲ διάνδιχα μερμήριξεν |
| 168 | Primary ἵππους τε στρέψαι καὶ ἐναντίβιον μαχέσασθαι. |
| 169 | Primary τρὶς μὲν μερμήριξε κατὰ φρένα καὶ κατὰ θυμόν, |
| 170 | Primary τρὶς δʼ ἄρʼ ἀπʼ Ἰδαίων ὀρέων κτύπε μητίετα Ζεὺς |
| 171 | Primary σῆμα τιθεὶς Τρώεσσι μάχης ἑτεραλκέα νίκην. |
| 172 | Primary Ἕκτωρ δὲ Τρώεσσιν ἐκέκλετο μακρὸν ἀΰσας· |
| 173 | Primary Τρῶες καὶ Λύκιοι καὶ Δάρδανοι ἀγχιμαχηταὶ |
| 174 | Primary ἀνέρες ἔστε φίλοι, μνήσασθε δὲ θούριδος ἀλκῆς. |
| 175 | Primary γιγνώσκω δʼ ὅτι μοι πρόφρων κατένευσε Κρονίων |
| 176 | Primary νίκην καὶ μέγα κῦδος, ἀτὰρ Δαναοῖσί γε πῆμα· |
| 177 | Primary νήπιοι οἳ ἄρα δὴ τάδε τείχεα μηχανόωντο |
| 178 | Primary ἀβλήχρʼ οὐδενόσωρα· τὰ δʼ οὐ μένος ἁμὸν ἐρύξει· |
| 179 | Primary ἵπποι δὲ ῥέα τάφρον ὑπερθορέονται ὀρυκτήν. |
| 180 | Primary ἀλλʼ ὅτε κεν δὴ νηυσὶν ἔπι γλαφυρῇσι γένωμαι, |
| 181 | Primary μνημοσύνη τις ἔπειτα πυρὸς δηΐοιο γενέσθω, |
| 182 | Primary ὡς πυρὶ νῆας ἐνιπρήσω, κτείνω δὲ καὶ αὐτοὺς |
| 183 | Primary Ἀργείους παρὰ νηυσὶν ἀτυζομένους ὑπὸ καπνοῦ. |
| 184 | Primary ὣς εἰπὼν ἵπποισιν ἐκέκλετο φώνησέν τε· |
| 185 | Primary Ξάνθέ τε καὶ σὺ Πόδαργε καὶ Αἴθων Λάμπέ τε δῖε |
| 186 | Primary νῦν μοι τὴν κομιδὴν ἀποτίνετον, ἣν μάλα πολλὴν |
| 187 | Primary Ἀνδρομάχη θυγάτηρ μεγαλήτορος Ἠετίωνος |
| 188 | Primary ὑμῖν πὰρ προτέροισι μελίφρονα πυρὸν ἔθηκεν |
| 189 | Primary οἶνόν τʼ ἐγκεράσασα πιεῖν, ὅτε θυμὸς ἀνώγοι, |
| 190 | Primary ἢ ἐμοί, ὅς πέρ οἱ θαλερὸς πόσις εὔχομαι εἶναι. |
| 191 | Primary ἀλλʼ ἐφομαρτεῖτον καὶ σπεύδετον ὄφρα λάβωμεν |
| 192 | Primary ἀσπίδα Νεστορέην, τῆς νῦν κλέος οὐρανὸν ἵκει |
| 193 | Primary πᾶσαν χρυσείην ἔμεναι, κανόνας τε καὶ αὐτήν, |
| 194 | Primary αὐτὰρ ἀπʼ ὤμοιιν Διομήδεος ἱπποδάμοιο |
| 195 | Primary δαιδάλεον θώρηκα, τὸν Ἥφαιστος κάμε τεύχων. |
| 196 | Primary εἰ τούτω κε λάβοιμεν, ἐελποίμην κεν Ἀχαιοὺς |
| 197 | Primary αὐτονυχὶ νηῶν ἐπιβησέμεν ὠκειάων. |
| 198 | Primary ὣς ἔφατʼ εὐχόμενος, νεμέσησε δὲ πότνια Ἥρη, |
| 199 | Primary σείσατο δʼ εἰνὶ θρόνῳ, ἐλέλιξε δὲ μακρὸν Ὄλυμπον, |
| 200 | Primary καί ῥα Ποσειδάωνα μέγαν θεὸν ἀντίον ηὔδα· |
| 201 | Primary ὢ πόποι ἐννοσίγαιʼ εὐρυσθενές, οὐδέ νυ σοί περ |
| 202 | Primary ὀλλυμένων Δαναῶν ὀλοφύρεται ἐν φρεσὶ θυμός. |
| 203 | Primary οἳ δέ τοι εἰς Ἑλίκην τε καὶ Αἰγὰς δῶρʼ ἀνάγουσι |
| 204 | Primary πολλά τε καὶ χαρίεντα· σὺ δέ σφισι βούλεο νίκην. |
| 205 | Primary εἴ περ γάρ κʼ ἐθέλοιμεν, ὅσοι Δαναοῖσιν ἀρωγοί, |
| 206 | Primary Τρῶας ἀπώσασθαι καὶ ἐρυκέμεν εὐρύοπα Ζῆν, |
| 207 | Primary αὐτοῦ κʼ ἔνθʼ ἀκάχοιτο καθήμενος οἶος ἐν Ἴδῃ. |
| 208 | Primary τὴν δὲ μέγʼ ὀχθήσας προσέφη κρείων ἐνοσίχθων· |
| 209 | Primary Ἥρη ἀπτοεπὲς ποῖον τὸν μῦθον ἔειπες. |
| 210 | Primary οὐκ ἂν ἔγωγʼ ἐθέλοιμι Διὶ Κρονίωνι μάχεσθαι |
| 211 | Primary ἡμέας τοὺς ἄλλους, ἐπεὶ ἦ πολὺ φέρτερός ἐστιν. |
| 212 | Primary ὣς οἳ μὲν τοιαῦτα πρὸς ἀλλήλους ἀγόρευον· |
| 213 | Primary τῶν δʼ ὅσον ἐκ νηῶν ἀπὸ πύργου τάφρος ἔεργε |
| 214 | Primary πλῆθεν ὁμῶς ἵππων τε καὶ ἀνδρῶν ἀσπιστάων |
| 215 | Primary εἰλομένων· εἴλει δὲ θοῷ ἀτάλαντος Ἄρηϊ |
| 216 | Primary Ἕκτωρ Πριαμίδης, ὅτε οἱ Ζεὺς κῦδος ἔδωκε. |
| 217 | Primary καί νύ κʼ ἐνέπρησεν πυρὶ κηλέῳ νῆας ἐΐσας, |
| 218 | Primary εἰ μὴ ἐπὶ φρεσὶ θῆκʼ Ἀγαμέμνονι πότνια Ἥρη |
| 219 | Primary αὐτῷ ποιπνύσαντι θοῶς ὀτρῦναι Ἀχαιούς. |
| 220 | Primary βῆ δʼ ἰέναι παρά τε κλισίας καὶ νῆας Ἀχαιῶν |
| 221 | Primary πορφύρεον μέγα φᾶρος ἔχων ἐν χειρὶ παχείῃ, |
| 222 | Primary στῆ δʼ ἐπʼ Ὀδυσσῆος μεγακήτεϊ νηῒ μελαίνῃ, |
| 223 | Primary ἥ ῥʼ ἐν μεσσάτῳ ἔσκε γεγωνέμεν ἀμφοτέρωσε, |
| 224 | Primary ἠμὲν ἐπʼ Αἴαντος κλισίας Τελαμωνιάδαο |
| 225 | Primary ἠδʼ ἐπʼ Ἀχιλλῆος, τοί ῥʼ ἔσχατα νῆας ἐΐσας |
| 226 | Primary εἴρυσαν, ἠνορέῃ πίσυνοι καὶ κάρτεϊ χειρῶν· |
| 227 | Primary ἤϋσεν δὲ διαπρύσιον Δαναοῖσι γεγωνώς· |
| 228 | Primary αἰδὼς Ἀργεῖοι, κάκʼ ἐλέγχεα, εἶδος ἀγητοί· |
| 229 | Primary πῇ ἔβαν εὐχωλαί, ὅτε δὴ φάμεν εἶναι ἄριστοι, |
| 230 | Primary ἃς ὁπότʼ ἐν Λήμνῳ κενεαυχέες ἠγοράασθε, |
| 231 | Primary ἔσθοντες κρέα πολλὰ βοῶν ὀρθοκραιράων |
| 232 | Primary πίνοντες κρητῆρας ἐπιστεφέας οἴνοιο, |
| 233 | Primary Τρώων ἄνθʼ ἑκατόν τε διηκοσίων τε ἕκαστος |
| 234 | Primary στήσεσθʼ ἐν πολέμῳ· νῦν δʼ οὐδʼ ἑνὸς ἄξιοί εἰμεν |
| 235 | Primary Ἕκτορος, ὃς τάχα νῆας ἐνιπρήσει πυρὶ κηλέῳ. |
| 236 | Primary Ζεῦ πάτερ, ἦ ῥά τινʼ ἤδη ὑπερμενέων βασιλήων |
| 237 | Primary τῇδʼ ἄτῃ ἄασας καί μιν μέγα κῦδος ἀπηύρας; |
| 238 | Primary οὐ μὲν δή ποτέ φημι τεὸν περικαλλέα βωμὸν |
| 239 | Primary νηῒ πολυκλήϊδι παρελθέμεν ἐνθάδε ἔρρων, |
| 240 | Primary ἀλλʼ ἐπὶ πᾶσι βοῶν δημὸν καὶ μηρίʼ ἔκηα |
| 241 | Primary ἱέμενος Τροίην εὐτείχεον ἐξαλαπάξαι. |
| 242 | Primary ἀλλὰ Ζεῦ τόδε πέρ μοι ἐπικρήηνον ἐέλδωρ· |
| 243 | Primary αὐτοὺς δή περ ἔασον ὑπεκφυγέειν καὶ ἀλύξαι, |
| 244 | Primary μηδʼ οὕτω Τρώεσσιν ἔα δάμνασθαι Ἀχαιούς. |
| 245 | Primary ὣς φάτο, τὸν δὲ πατὴρ ὀλοφύρατο δάκρυ χέοντα, |
| 246 | Primary νεῦσε δέ οἱ λαὸν σόον ἔμμεναι οὐδʼ ἀπολέσθαι. |
| 247 | Primary αὐτίκα δʼ αἰετὸν ἧκε τελειότατον πετεηνῶν, |
| 248 | Primary νεβρὸν ἔχοντʼ ὀνύχεσσι τέκος ἐλάφοιο ταχείης· |
| 249 | Primary πὰρ δὲ Διὸς βωμῷ περικαλλέϊ κάββαλε νεβρόν, |
| 250 | Primary ἔνθα πανομφαίῳ Ζηνὶ ῥέζεσκον Ἀχαιοί. |
| 251 | Primary οἳ δʼ ὡς οὖν εἴδονθʼ ὅ τʼ ἄρʼ ἐκ Διὸς ἤλυθεν ὄρνις, |
| 252 | Primary μᾶλλον ἐπὶ Τρώεσσι θόρον, μνήσαντο δὲ χάρμης. |
| 253 | Primary ἔνθʼ οὔ τις πρότερος Δαναῶν πολλῶν περ ἐόντων |
| 254 | Primary εὔξατο Τυδεΐδαο πάρος σχέμεν ὠκέας ἵππους |
| 255 | Primary τάφρου τʼ ἐξελάσαι καὶ ἐναντίβιον μαχέσασθαι, |
| 256 | Primary ἀλλὰ πολὺ πρῶτος Τρώων ἕλεν ἄνδρα κορυστὴν |
| 257 | Primary Φραδμονίδην Ἀγέλαον· ὃ μὲν φύγαδʼ ἔτραπεν ἵππους· |
| 258 | Primary τῷ δὲ μεταστρεφθέντι μεταφρένῳ ἐν δόρυ πῆξεν |
| 259 | Primary ὤμων μεσσηγύς, διὰ δὲ στήθεσφιν ἔλασσεν· |
| 260 | Primary ἤριπε δʼ ἐξ ὀχέων, ἀράβησε δὲ τεύχεʼ ἐπʼ αὐτῷ. |
| 261 | Primary τὸν δὲ μετʼ Ἀτρεΐδαι Ἀγαμέμνων καὶ Μενέλαος, |
| 262 | Primary τοῖσι δʼ ἐπʼ Αἴαντες θοῦριν ἐπιειμένοι ἀλκήν, |
| 263 | Primary τοῖσι δʼ ἐπʼ Ἰδομενεὺς καὶ ὀπάων Ἰδομενῆος |
| 264 | Primary Μηριόνης ἀτάλαντος Ἐνυαλίῳ ἀνδρειφόντῃ, |
| 265 | Primary τοῖσι δʼ ἐπʼ Εὐρύπυλος Εὐαίμονος ἀγλαὸς υἱός· |
| 266 | Primary Τεῦκρος δʼ εἴνατος ἦλθε παλίντονα τόξα τιταίνων, |
| 267 | Primary στῆ δʼ ἄρʼ ὑπʼ Αἴαντος σάκεϊ Τελαμωνιάδαο. |
| 268 | Primary ἔνθʼ Αἴας μὲν ὑπεξέφερεν σάκος· αὐτὰρ ὅ γʼ ἥρως |
| 269 | Primary παπτήνας, ἐπεὶ ἄρ τινʼ ὀϊστεύσας ἐν ὁμίλῳ |
| 270 | Primary βεβλήκοι, ὃ μὲν αὖθι πεσὼν ἀπὸ θυμὸν ὄλεσσεν, |
| 271 | Primary αὐτὰρ ὃ αὖτις ἰὼν πάϊς ὣς ὑπὸ μητέρα δύσκεν |
| 272 | Primary εἰς Αἴανθʼ· ὃ δέ μιν σάκεϊ κρύπτασκε φαεινῷ. |
| 273 | Primary ἔνθα τίνα πρῶτον Τρώων ἕλε Τεῦκρος ἀμύμων; |
| 274 | Primary Ὀρσίλοχον μὲν πρῶτα καὶ Ὄρμενον ἠδʼ Ὀφελέστην |
| 275 | Primary Δαίτορά τε Χρομίον τε καὶ ἀντίθεον Λυκοφόντην |
| 276 | Primary καὶ Πολυαιμονίδην Ἀμοπάονα καὶ Μελάνιππον, |
| 277 | Primary πάντας ἐπασσυτέρους πέλασε χθονὶ πουλυβοτείρῃ. |
| 278 | Primary τὸν δὲ ἰδὼν γήθησεν ἄναξ ἀνδρῶν Ἀγαμέμνων |
| 279 | Primary τόξου ἄπο κρατεροῦ Τρώων ὀλέκοντα φάλαγγας· |
| 280 | Primary στῆ δὲ παρʼ αὐτὸν ἰὼν καί μιν πρὸς μῦθον ἔειπε· |
| 281 | Primary Τεῦκρε φίλη κεφαλή, Τελαμώνιε κοίρανε λαῶν |
| 282 | Primary βάλλʼ οὕτως, αἴ κέν τι φόως Δαναοῖσι γένηαι |
| 283 | Primary πατρί τε σῷ Τελαμῶνι, ὅ σʼ ἔτρεφε τυτθὸν ἐόντα, |
| 284 | Primary καί σε νόθον περ ἐόντα κομίσσατο ᾧ ἐνὶ οἴκῳ· |
| 285 | Primary τὸν καὶ τηλόθʼ ἐόντα ἐϋκλείης ἐπίβησον. |
| 286 | Primary σοὶ δʼ ἐγὼ ἐξερέω ὡς καὶ τετελεσμένον ἔσται· |
| 287 | Primary αἴ κέν μοι δώῃ Ζεύς τʼ αἰγίοχος καὶ Ἀθήνη |
| 288 | Primary Ἰλίου ἐξαλαπάξαι ἐϋκτίμενον πτολίεθρον, |
| 289 | Primary πρώτῳ τοι μετʼ ἐμὲ πρεσβήϊον ἐν χερὶ θήσω, |
| 290 | Primary ἢ τρίποδʼ ἠὲ δύω ἵππους αὐτοῖσιν ὄχεσφιν |
| 291 | Primary ἠὲ γυναῖχʼ, ἥ κέν τοι ὁμὸν λέχος εἰσαναβαίνοι. |
| 292 | Primary τὸν δʼ ἀπαμειβόμενος προσεφώνεε Τεῦκρος ἀμύμων· |
| 293 | Primary Ἀτρεΐδη κύδιστε τί με σπεύδοντα καὶ αὐτὸν |
| 294 | Primary ὀτρύνεις; οὐ μέν τοι ὅση δύναμίς γε πάρεστι |
| 295 | Primary παύομαι, ἀλλʼ ἐξ οὗ προτὶ Ἴλιον ὠσάμεθʼ αὐτοὺς |
| 296 | Primary ἐκ τοῦ δὴ τόξοισι δεδεγμένος ἄνδρας ἐναίρω. |
| 297 | Primary ὀκτὼ δὴ προέηκα τανυγλώχινας ὀϊστούς, |
| 298 | Primary πάντες δʼ ἐν χροῒ πῆχθεν ἀρηϊθόων αἰζηῶν· |
| 299 | Primary τοῦτον δʼ οὐ δύναμαι βαλέειν κύνα λυσσητῆρα. |
| 300 | Primary ἦ ῥα καὶ ἄλλον ὀϊστὸν ἀπὸ νευρῆφιν ἴαλλεν |
| 301 | Primary Ἕκτορος ἀντικρύ, βαλέειν δέ ἑ ἵετο θυμός· |
| 302 | Primary καὶ τοῦ μέν ῥʼ ἀφάμαρθʼ, ὃ δʼ ἀμύμονα Γοργυθίωνα |
| 303 | Primary υἱὸν ἐῢν Πριάμοιο κατὰ στῆθος βάλεν ἰῷ, |
| 304 | Primary τόν ῥʼ ἐξ Αἰσύμηθεν ὀπυιομένη τέκε μήτηρ |
| 305 | Primary καλὴ Καστιάνειρα δέμας ἐϊκυῖα θεῇσι. |
| 306 | Primary μήκων δʼ ὡς ἑτέρωσε κάρη βάλεν, ἥ τʼ ἐνὶ κήπῳ |
| 307 | Primary καρπῷ βριθομένη νοτίῃσί τε εἰαρινῇσιν, |
| 308 | Primary ὣς ἑτέρωσʼ ἤμυσε κάρη πήληκι βαρυνθέν. |
| 309 | Primary Τεῦκρος δʼ ἄλλον ὀϊστὸν ἀπὸ νευρῆφιν ἴαλλεν |
| 310 | Primary Ἕκτορος ἀντικρύ, βαλέειν δέ ἑ ἵετο θυμός. |
| 311 | Primary ἀλλʼ ὅ γε καὶ τόθʼ ἅμαρτε· παρέσφηλεν γὰρ Ἀπόλλων· |
| 312 | Primary ἀλλʼ Ἀρχεπτόλεμον θρασὺν Ἕκτορος ἡνιοχῆα |
| 313 | Primary ἱέμενον πόλεμον δὲ βάλε στῆθος παρὰ μαζόν· |
| 314 | Primary ἤριπε δʼ ἐξ ὀχέων, ὑπερώησαν δέ οἱ ἵπποι |
| 315 | Primary ὠκύποδες· τοῦ δʼ αὖθι λύθη ψυχή τε μένος τε. |
| 316 | Primary Ἕκτορα δʼ αἰνὸν ἄχος πύκασε φρένας ἡνιόχοιο· |
| 317 | Primary τὸν μὲν ἔπειτʼ εἴασε καὶ ἀχνύμενός περ ἑταίρου, |
| 318 | Primary Κεβριόνην δʼ ἐκέλευσεν ἀδελφεὸν ἐγγὺς ἐόντα |
| 319 | Primary ἵππων ἡνίʼ ἑλεῖν· ὃ δʼ ἄρʼ οὐκ ἀπίθησεν ἀκούσας. |
| 320 | Primary αὐτὸς δʼ ἐκ δίφροιο χαμαὶ θόρε παμφανόωντος |
| 321 | Primary σμερδαλέα ἰάχων· ὃ δὲ χερμάδιον λάβε χειρί, |
| 322 | Primary βῆ δʼ ἰθὺς Τεύκρου, βαλέειν δέ ἑ θυμὸς ἀνώγει. |
| 323 | Primary ἤτοι ὃ μὲν φαρέτρης ἐξείλετο πικρὸν ὀϊστόν, |
| 324 | Primary θῆκε δʼ ἐπὶ νευρῇ· τὸν δʼ αὖ κορυθαίολος Ἕκτωρ |
| 325 | Primary αὐερύοντα παρʼ ὦμον, ὅθι κληῒς ἀποέργει |
| 326 | Primary αὐχένα τε στῆθός τε, μάλιστα δὲ καίριόν ἐστι, |
| 327 | Primary τῇ ῥʼ ἐπὶ οἷ μεμαῶτα βάλεν λίθῳ ὀκριόεντι, |
| 328 | Primary ῥῆξε δέ οἱ νευρήν· νάρκησε δὲ χεὶρ ἐπὶ καρπῷ, |
| 329 | Primary στῆ δὲ γνὺξ ἐριπών, τόξον δέ οἱ ἔκπεσε χειρός. |
| 330 | Primary Αἴας δʼ οὐκ ἀμέλησε κασιγνήτοιο πεσόντος, |
| 331 | Primary ἀλλὰ θέων περίβη καί οἱ σάκος ἀμφεκάλυψε. |
| 332 | Primary τὸν μὲν ἔπειθʼ ὑποδύντε δύω ἐρίηρες ἑταῖροι |
| 333 | Primary Μηκιστεὺς Ἐχίοιο πάϊς καὶ δῖος Ἀλάστωρ |
| 334 | Primary νῆας ἔπι γλαφυρὰς φερέτην βαρέα στενάχοντα. |
| 335 | Primary ἂψ δʼ αὖτις Τρώεσσιν Ὀλύμπιος ἐν μένος ὦρσεν· |
| 336 | Primary οἳ δʼ ἰθὺς τάφροιο βαθείης ὦσαν Ἀχαιούς· |
| 337 | Primary Ἕκτωρ δʼ ἐν πρώτοισι κίε σθένεϊ βλεμεαίνων. |
| 338 | Primary ὡς δʼ ὅτε τίς τε κύων συὸς ἀγρίου ἠὲ λέοντος |
| 339 | Primary ἅπτηται κατόπισθε ποσὶν ταχέεσσι διώκων |
| 340 | Primary ἰσχία τε γλουτούς τε, ἑλισσόμενόν τε δοκεύει, |
| 341 | Primary ὣς Ἕκτωρ ὤπαζε κάρη κομόωντας Ἀχαιούς, |
| 342 | Primary αἰὲν ἀποκτείνων τὸν ὀπίστατον· οἳ δὲ φέβοντο. |
| 343 | Primary αὐτὰρ ἐπεὶ διά τε σκόλοπας καὶ τάφρον ἔβησαν |
| 344 | Primary φεύγοντες, πολλοὶ δὲ δάμεν Τρώων ὑπὸ χερσίν, |
| 345 | Primary οἳ μὲν δὴ παρὰ νηυσὶν ἐρητύοντο μένοντες, |
| 346 | Primary ἀλλήλοισί τε κεκλόμενοι καὶ πᾶσι θεοῖσι |
| 347 | Primary χεῖρας ἀνίσχοντες μεγάλʼ εὐχετόωντο ἕκαστος· |
| 348 | Primary Ἕκτωρ δʼ ἀμφιπεριστρώφα καλλίτριχας ἵππους |
| 349 | Primary Γοργοῦς ὄμματʼ ἔχων ἠδὲ βροτολοιγοῦ Ἄρηος. |
| 350 | Primary τοὺς δὲ ἰδοῦσʼ ἐλέησε θεὰ λευκώλενος Ἥρη, |
| 351 | Primary αἶψα δʼ Ἀθηναίην ἔπεα πτερόεντα προσηύδα· |
| 352 | Primary ὢ πόποι αἰγιόχοιο Διὸς τέκος οὐκέτι νῶϊ |
| 353 | Primary ὀλλυμένων Δαναῶν κεκαδησόμεθʼ ὑστάτιόν περ; |
| 354 | Primary οἵ κεν δὴ κακὸν οἶτον ἀναπλήσαντες ὄλωνται |
| 355 | Primary ἀνδρὸς ἑνὸς ῥιπῇ, ὃ δὲ μαίνεται οὐκέτʼ ἀνεκτῶς |
| 356 | Primary Ἕκτωρ Πριαμίδης, καὶ δὴ κακὰ πολλὰ ἔοργε. |
| 357 | Primary τὴν δʼ αὖτε προσέειπε θεὰ γλαυκῶπις Ἀθήνη· |
| 358 | Primary καὶ λίην οὗτός γε μένος θυμόν τʼ ὀλέσειε |
| 359 | Primary χερσὶν ὑπʼ Ἀργείων φθίμενος ἐν πατρίδι γαίῃ· |
| 360 | Primary ἀλλὰ πατὴρ οὑμὸς φρεσὶ μαίνεται οὐκ ἀγαθῇσι |
| 361 | Primary σχέτλιος, αἰὲν ἀλιτρός, ἐμῶν μενέων ἀπερωεύς· |
| 362 | Primary οὐδέ τι τῶν μέμνηται, ὅ οἱ μάλα πολλάκις υἱὸν |
| 363 | Primary τειρόμενον σώεσκον ὑπʼ Εὐρυσθῆος ἀέθλων. |
| 364 | Primary ἤτοι ὃ μὲν κλαίεσκε πρὸς οὐρανόν, αὐτὰρ ἐμὲ Ζεὺς |
| 365 | Primary τῷ ἐπαλεξήσουσαν ἀπʼ οὐρανόθεν προΐαλλεν. |
| 366 | Primary εἰ γὰρ ἐγὼ τάδε ᾔδεʼ ἐνὶ φρεσὶ πευκαλίμῃσιν |
| 367 | Primary εὖτέ μιν εἰς Ἀΐδαο πυλάρταο προὔπεμψεν |
| 368 | Primary ἐξ Ἐρέβευς ἄξοντα κύνα στυγεροῦ Ἀΐδαο, |
| 369 | Primary οὐκ ἂν ὑπεξέφυγε Στυγὸς ὕδατος αἰπὰ ῥέεθρα. |
| 370 | Primary νῦν δʼ ἐμὲ μὲν στυγέει, Θέτιδος δʼ ἐξήνυσε βουλάς, |
| 371 | Primary ἥ οἱ γούνατʼ ἔκυσσε καὶ ἔλλαβε χειρὶ γενείου, |
| 372 | Primary λισσομένη τιμῆσαι Ἀχιλλῆα πτολίπορθον. |
| 373 | Primary ἔσται μὰν ὅτʼ ἂν αὖτε φίλην γλαυκώπιδα εἴπῃ. |
| 374 | Primary ἀλλὰ σὺ μὲν νῦν νῶϊν ἐπέντυε μώνυχας ἵππους, |
| 375 | Primary ὄφρʼ ἂν ἐγὼ καταδῦσα Διὸς δόμον αἰγιόχοιο |
| 376 | Primary τεύχεσιν ἐς πόλεμον θωρήξομαι, ὄφρα ἴδωμαι |
| 377 | Primary ἢ νῶϊ Πριάμοιο πάϊς κορυθαίολος Ἕκτωρ |
| 378 | Primary γηθήσει προφανέντε ἀνὰ πτολέμοιο γεφύρας, |
| 379 | Primary ἦ τις καὶ Τρώων κορέει κύνας ἠδʼ οἰωνοὺς |
| 380 | Primary δημῷ καὶ σάρκεσσι, πεσὼν ἐπὶ νηυσὶν Ἀχαιῶν. |
| 381 | Primary ὣς ἔφατʼ, οὐδʼ ἀπίθησε θεὰ λευκώλενος Ἥρη. |
| 382 | Primary ἣ μὲν ἐποιχομένη χρυσάμπυκας ἔντυεν ἵππους |
| 383 | Primary Ἥρη πρέσβα θεὰ θυγάτηρ μεγάλοιο Κρόνοιο· |
| 384 | Primary αὐτὰρ Ἀθηναίη κούρη Διὸς αἰγιόχοιο |
| 385 | Primary πέπλον μὲν κατέχευεν ἑανὸν πατρὸς ἐπʼ οὔδει |
| 386 | Primary ποικίλον, ὅν ῥʼ αὐτὴ ποιήσατο καὶ κάμε χερσίν, |
| 387 | Primary ἣ δὲ χιτῶνʼ ἐνδῦσα Διὸς νεφεληγερέταο |
| 388 | Primary τεύχεσιν ἐς πόλεμον θωρήσσετο δακρυόεντα. |
| 389 | Primary ἐς δʼ ὄχεα φλόγεα ποσὶ βήσετο, λάζετο δʼ ἔγχος |
| 390 | Primary βριθὺ μέγα στιβαρόν, τῷ δάμνησι στίχας ἀνδρῶν |
| 391 | Primary ἡρώων, τοῖσίν τε κοτέσσεται ὀβριμοπάτρη. |
| 392 | Primary Ἥρη δὲ μάστιγι θοῶς ἐπεμαίετʼ ἄρʼ ἵππους· |
| 393 | Primary αὐτόμαται δὲ πύλαι μύκον οὐρανοῦ ἃς ἔχον Ὧραι, |
| 394 | Primary τῇς ἐπιτέτραπται μέγας οὐρανὸς Οὔλυμπός τε |
| 395 | Primary ἠμὲν ἀνακλῖναι πυκινὸν νέφος ἠδʼ ἐπιθεῖναι. |
| 396 | Primary τῇ ῥα διʼ αὐτάων κεντρηνεκέας ἔχον ἵππους. |
| 397 | Primary Ζεὺς δὲ πατὴρ Ἴδηθεν ἐπεὶ ἴδε χώσατʼ ἄρʼ αἰνῶς, |
| 398 | Primary Ἶριν δʼ ὄτρυνε χρυσόπτερον ἀγγελέουσαν· |
| 399 | Primary βάσκʼ ἴθι Ἶρι ταχεῖα, πάλιν τρέπε μηδʼ ἔα ἄντην |
| 400 | Primary ἔρχεσθʼ· οὐ γὰρ καλὰ συνοισόμεθα πτόλεμον δέ. |
| 401 | Primary ὧδε γὰρ ἐξερέω, τὸ δὲ καὶ τετελεσμένον ἔσται· |
| 402 | Primary γυιώσω μέν σφωϊν ὑφʼ ἅρμασιν ὠκέας ἵππους, |
| 403 | Primary αὐτὰς δʼ ἐκ δίφρου βαλέω κατά θʼ ἅρματα ἄξω· |
| 404 | Primary οὐδέ κεν ἐς δεκάτους περιτελλομένους ἐνιαυτοὺς |
| 405 | Primary ἕλκεʼ ἀπαλθήσεσθον, ἅ κεν μάρπτῃσι κεραυνός· |
| 406 | Primary ὄφρα ἰδῇ γλαυκῶπις ὅτʼ ἂν ᾧ πατρὶ μάχηται. |
| 407 | Primary Ἥρῃ δʼ οὔ τι τόσον νεμεσίζομαι οὐδὲ χολοῦμαι· |
| 408 | Primary αἰεὶ γάρ μοι ἔωθεν ἐνικλᾶν ὅττί κεν εἴπω. |
| 409 | Primary ὣς ἔφατʼ, ὦρτο δὲ Ἶρις ἀελλόπος ἀγγελέουσα, |
| 410 | Primary βῆ δʼ ἐξ Ἰδαίων ὀρέων ἐς μακρὸν Ὄλυμπον. |
| 411 | Primary πρώτῃσιν δὲ πύλῃσι πολυπτύχου Οὐλύμποιο |
| 412 | Primary ἀντομένη κατέρυκε, Διὸς δέ σφʼ ἔννεπε μῦθον· |
| 413 | Primary πῇ μέματον; τί σφῶϊν ἐνὶ φρεσὶ μαίνεται ἦτορ; |
| 414 | Primary οὐκ ἐάᾳ Κρονίδης ἐπαμυνέμεν Ἀργείοισιν. |
| 415 | Primary ὧδε γὰρ ἠπείλησε Κρόνου πάϊς, ᾗ τελέει περ, |
| 416 | Primary γυιώσειν μὲν σφῶϊν ὑφʼ ἅρμασιν ὠκέας ἵππους, |
| 417 | Primary αὐτὰς δʼ ἐκ δίφρου βαλέειν κατά θʼ ἅρματα ἄξειν· |
| 418 | Primary οὐδέ κεν ἐς δεκάτους περιτελλομένους ἐνιαυτοὺς |
| 419 | Primary ἕλκεʼ ἀπαλθήσεσθον, ἅ κεν μάρπτῃσι κεραυνός· |
| 420 | Primary ὄφρα ἰδῇς γλαυκῶπι ὅτʼ ἂν σῷ πατρὶ μάχηαι. |
| 421 | Primary Ἥρῃ δʼ οὔ τι τόσον νεμεσίζεται οὐδὲ χολοῦται· |
| 422 | Primary αἰεὶ γάρ οἱ ἔωθεν ἐνικλᾶν ὅττι κεν εἴπῃ· |
| 423 | Primary ἀλλὰ σύ γʼ αἰνοτάτη κύον ἀδεὲς εἰ ἐτεόν γε |
| 424 | Primary τολμήσεις Διὸς ἄντα πελώριον ἔγχος ἀεῖραι. |
| 425 | Primary ἣ μὲν ἄρʼ ὣς εἰποῦσʼ ἀπέβη πόδας ὠκέα Ἶρις, |
| 426 | Primary αὐτὰρ Ἀθηναίην Ἥρη πρὸς μῦθον ἔειπεν· |
| 427 | Primary ὢ πόποι αἰγιόχοιο Διὸς τέκος, οὐκέτʼ ἔγωγε |
| 428 | Primary νῶϊ ἐῶ Διὸς ἄντα βροτῶν ἕνεκα πτολεμίζειν· |
| 429 | Primary τῶν ἄλλος μὲν ἀποφθίσθω, ἄλλος δὲ βιώτω, |
| 430 | Primary ὅς κε τύχῃ· κεῖνος δὲ τὰ ἃ φρονέων ἐνὶ θυμῷ |
| 431 | Primary Τρωσί τε καὶ Δαναοῖσι δικαζέτω, ὡς ἐπιεικές. |
| 432 | Primary ὣς ἄρα φωνήσασα πάλιν τρέπε μώνυχας ἵππους· |
| 433 | Primary τῇσιν δʼ Ὧραι μὲν λῦσαν καλλίτριχας ἵππους, |
| 434 | Primary καὶ τοὺς μὲν κατέδησαν ἐπʼ ἀμβροσίῃσι κάπῃσιν, |
| 435 | Primary ἅρματα δʼ ἔκλιναν πρὸς ἐνώπια παμφανόωντα· |
| 436 | Primary αὐταὶ δὲ χρυσέοισιν ἐπὶ κλισμοῖσι κάθιζον |
| 437 | Primary μίγδʼ ἄλλοισι θεοῖσι, φίλον τετιημέναι ἦτορ. |
| 438 | Primary Ζεὺς δὲ πατὴρ Ἴδηθεν ἐΰτροχον ἅρμα καὶ ἵππους |
| 439 | Primary Οὔλυμπον δὲ δίωκε, θεῶν δʼ ἐξίκετο θώκους. |
| 440 | Primary τῷ δὲ καὶ ἵππους μὲν λῦσε κλυτὸς ἐννοσίγαιος, |
| 441 | Primary ἅρματα δʼ ἂμ βωμοῖσι τίθει κατὰ λῖτα πετάσσας· |
| 442 | Primary αὐτὸς δὲ χρύσειον ἐπὶ θρόνον εὐρύοπα Ζεὺς |
| 443 | Primary ἕζετο, τῷ δʼ ὑπὸ ποσσὶ μέγας πελεμίζετʼ Ὄλυμπος. |
| 444 | Primary αἳ δʼ οἶαι Διὸς ἀμφὶς Ἀθηναίη τε καὶ Ἥρη |
| 445 | Primary ἥσθην, οὐδέ τί μιν προσεφώνεον οὐδʼ ἐρέοντο· |
| 446 | Primary αὐτὰρ ὃ ἔγνω ᾗσιν ἐνὶ φρεσὶ φώνησέν τε· |
| 447 | Primary τίφθʼ οὕτω τετίησθον Ἀθηναίη τε καὶ Ἥρη; |
| 448 | Primary οὐ μέν θην κάμετόν γε μάχῃ ἔνι κυδιανείρῃ |
| 449 | Primary ὀλλῦσαι Τρῶας, τοῖσιν κότον αἰνὸν ἔθεσθε. |
| 450 | Primary πάντως, οἷον ἐμόν γε μένος καὶ χεῖρες ἄαπτοι, |
| 451 | Primary οὐκ ἄν με τρέψειαν ὅσοι θεοί εἰσʼ ἐν Ὀλύμπῳ. |
| 452 | Primary σφῶϊν δὲ πρίν περ τρόμος ἔλλαβε φαίδιμα γυῖα |
| 453 | Primary πρὶν πόλεμόν τε ἰδεῖν πολέμοιό τε μέρμερα ἔργα. |
| 454 | Primary ὧδε γὰρ ἐξερέω, τὸ δέ κεν τετελεσμένον ἦεν· |
| 455 | Primary οὐκ ἂν ἐφʼ ὑμετέρων ὀχέων πληγέντε κεραυνῷ |
| 456 | Primary ἂψ ἐς Ὄλυμπον ἵκεσθον, ἵνʼ ἀθανάτων ἕδος ἐστίν. |
| 457 | Primary ὣς ἔφαθʼ, αἳ δʼ ἐπέμυξαν Ἀθηναίη τε καὶ Ἥρη· |
| 458 | Primary πλησίαι αἵ γʼ ἥσθην, κακὰ δὲ Τρώεσσι μεδέσθην. |
| 459 | Primary ἤτοι Ἀθηναίη ἀκέων ἦν οὐδέ τι εἶπε |
| 460 | Primary σκυζομένη Διὶ πατρί, χόλος δέ μιν ἄγριος ᾕρει· |
| 461 | Primary Ἥρῃ δʼ οὐκ ἔχαδε στῆθος χόλον, ἀλλὰ προσηύδα· |
| 462 | Primary αἰνότατε Κρονίδη ποῖον τὸν μῦθον ἔειπες. |
| 463 | Primary εὖ νυ καὶ ἡμεῖς ἴδμεν ὅ τοι σθένος οὐκ ἀλαπαδνόν· |
| 464 | Primary ἀλλʼ ἔμπης Δαναῶν ὀλοφυρόμεθʼ αἰχμητάων, |
| 465 | Primary οἵ κεν δὴ κακὸν οἶτον ἀναπλήσαντες ὄλωνται. |
| 466 | Primary ἀλλʼ ἤτοι πολέμου μὲν ἀφεξόμεθʼ, εἰ σὺ κελεύεις· |
| 467 | Primary βουλὴν δʼ Ἀργείοις ὑποθησόμεθʼ ἥ τις ὀνήσει, |
| 468 | Primary ὡς μὴ πάντες ὄλωνται ὀδυσσαμένοιο τεοῖο. |
| 469 | Primary τὴν δʼ ἀπαμειβόμενος προσέφη νεφεληγερέτα Ζεύς· |
| 470 | Primary ἠοῦς δὴ καὶ μᾶλλον ὑπερμενέα Κρονίωνα |
| 471 | Primary ὄψεαι, αἴ κʼ ἐθέλῃσθα, βοῶπις πότνια Ἥρη |
| 472 | Primary ὀλλύντʼ Ἀργείων πουλὺν στρατὸν αἰχμητάων· |
| 473 | Primary οὐ γὰρ πρὶν πολέμου ἀποπαύσεται ὄβριμος Ἕκτωρ |
| 474 | Primary πρὶν ὄρθαι παρὰ ναῦφι ποδώκεα Πηλεΐωνα, |
| 475 | Primary ἤματι τῷ ὅτʼ ἂν οἳ μὲν ἐπὶ πρύμνῃσι μάχωνται |
| 476 | Primary στείνει ἐν αἰνοτάτῳ περὶ Πατρόκλοιο θανόντος· |
| 477 | Primary ὣς γὰρ θέσφατόν ἐστι· σέθεν δʼ ἐγὼ οὐκ ἀλεγίζω |
| 478 | Primary χωομένης, οὐδʼ εἴ κε τὰ νείατα πείραθʼ ἵκηαι |
| 479 | Primary γαίης καὶ πόντοιο, ἵνʼ Ἰάπετός τε Κρόνος τε |
| 480 | Primary ἥμενοι οὔτʼ αὐγῇς Ὑπερίονος Ἠελίοιο |
| 481 | Primary τέρποντʼ οὔτʼ ἀνέμοισι, βαθὺς δέ τε Τάρταρος ἀμφίς· |
| 482 | Primary οὐδʼ ἢν ἔνθʼ ἀφίκηαι ἀλωμένη, οὔ σευ ἔγωγε |
| 483 | Primary σκυζομένης ἀλέγω, ἐπεὶ οὐ σέο κύντερον ἄλλο. |
| 484 | Primary ὣς φάτο, τὸν δʼ οὔ τι προσέφη λευκώλενος Ἥρη. |
| 485 | Primary ἐν δʼ ἔπεσʼ Ὠκεανῷ λαμπρὸν φάος ἠελίοιο |
| 486 | Primary ἕλκον νύκτα μέλαιναν ἐπὶ ζείδωρον ἄρουραν. |
| 487 | Primary Τρωσὶν μέν ῥʼ ἀέκουσιν ἔδυ φάος, αὐτὰρ Ἀχαιοῖς |
| 488 | Primary ἀσπασίη τρίλλιστος ἐπήλυθε νὺξ ἐρεβεννή. |
| 489 | Primary Τρώων αὖτʼ ἀγορὴν ποιήσατο φαίδιμος Ἕκτωρ |
| 490 | Primary νόσφι νεῶν ἀγαγὼν ποταμῷ ἔπι δινήεντι, |
| 491 | Primary ἐν καθαρῷ ὅθι δὴ νεκύων διεφαίνετο χῶρος. |
| 492 | Primary ἐξ ἵππων δʼ ἀποβάντες ἐπὶ χθόνα μῦθον ἄκουον |
| 493 | Primary τόν ῥʼ Ἕκτωρ ἀγόρευε Διῒ φίλος· ἐν δʼ ἄρα χειρὶ |
| 494 | Primary ἔγχος ἔχʼ ἑνδεκάπηχυ· πάροιθε δὲ λάμπετο δουρὸς |
| 495 | Primary αἰχμὴ χαλκείη, περὶ δὲ χρύσεος θέε πόρκης, |
| 496 | Primary τῷ ὅ γʼ ἐρεισάμενος ἔπεα Τρώεσσι μετηύδα· |
| 497 | Primary κέκλυτέ μευ Τρῶες καὶ Δάρδανοι ἠδʼ ἐπίκουροι· |
| 498 | Primary νῦν ἐφάμην νῆάς τʼ ὀλέσας καὶ πάντας Ἀχαιοὺς |
| 499 | Primary ἂψ ἀπονοστήσειν προτὶ Ἴλιον ἠνεμόεσσαν· |
| 500 | Primary ἀλλὰ πρὶν κνέφας ἦλθε, τὸ νῦν ἐσάωσε μάλιστα |
| 501 | Primary Ἀργείους καὶ νῆας ἐπὶ ῥηγμῖνι θαλάσσης. |
| 502 | Primary ἀλλʼ ἤτοι νῦν μὲν πειθώμεθα νυκτὶ μελαίνῃ |
| 503 | Primary δόρπά τʼ ἐφοπλισόμεσθα· ἀτὰρ καλλίτριχας ἵππους |
| 504 | Primary λύσαθʼ ὑπὲξ ὀχέων, παρὰ δέ σφισι βάλλετʼ ἐδωδήν· |
| 505 | Primary ἐκ πόλιος δʼ ἄξεσθε βόας καὶ ἴφια μῆλα |
| 506 | Primary καρπαλίμως, οἶνον δὲ μελίφρονα οἰνίζεσθε |
| 507 | Primary σῖτόν τʼ ἐκ μεγάρων, ἐπὶ δὲ ξύλα πολλὰ λέγεσθε, |
| 508 | Primary ὥς κεν παννύχιοι μέσφʼ ἠοῦς ἠριγενείης |
| 509 | Primary καίωμεν πυρὰ πολλά, σέλας δʼ εἰς οὐρανὸν ἵκῃ, |
| 510 | Primary μή πως καὶ διὰ νύκτα κάρη κομόωντες Ἀχαιοὶ |
| 511 | Primary φεύγειν ὁρμήσωνται ἐπʼ εὐρέα νῶτα θαλάσσης. |
| 512 | Primary μὴ μὰν ἀσπουδί γε νεῶν ἐπιβαῖεν ἕκηλοι, |
| 513 | Primary ἀλλʼ ὥς τις τούτων γε βέλος καὶ οἴκοθι πέσσῃ |
| 514 | Primary βλήμενος ἢ ἰῷ ἢ ἔγχεϊ ὀξυόεντι |
| 515 | Primary νηὸς ἐπιθρῴσκων, ἵνα τις στυγέῃσι καὶ ἄλλος |
| 516 | Primary Τρωσὶν ἐφʼ ἱπποδάμοισι φέρειν πολύδακρυν Ἄρηα. |
| 517 | Primary κήρυκες δʼ ἀνὰ ἄστυ Διῒ φίλοι ἀγγελλόντων |
| 518 | Primary παῖδας πρωθήβας πολιοκροτάφους τε γέροντας |
| 519 | Primary λέξασθαι περὶ ἄστυ θεοδμήτων ἐπὶ πύργων· |
| 520 | Primary θηλύτεραι δὲ γυναῖκες ἐνὶ μεγάροισιν ἑκάστη |
| 521 | Primary πῦρ μέγα καιόντων· φυλακὴ δέ τις ἔμπεδος ἔστω |
| 522 | Primary μὴ λόχος εἰσέλθῃσι πόλιν λαῶν ἀπεόντων. |
| 523 | Primary ὧδʼ ἔστω Τρῶες μεγαλήτορες ὡς ἀγορεύω· |
| 524 | Primary μῦθος δʼ ὃς μὲν νῦν ὑγιὴς εἰρημένος ἔστω, |
| 525 | Primary τὸν δʼ ἠοῦς Τρώεσσι μεθʼ ἱπποδάμοις ἀγορεύσω. |
| 526 | Primary ἔλπομαι εὐχόμενος Διί τʼ ἄλλοισίν τε θεοῖσιν |
| 527 | Primary ἐξελάαν ἐνθένδε κύνας κηρεσσιφορήτους, |
| 528 | Primary οὓς κῆρες φορέουσι μελαινάων ἐπὶ νηῶν. |
| 529 | Primary ἀλλʼ ἤτοι ἐπὶ νυκτὶ φυλάξομεν ἡμέας αὐτούς, |
| 530 | Primary πρῶϊ δʼ ὑπηοῖοι σὺν τεύχεσι θωρηχθέντες |
| 531 | Primary νηυσὶν ἔπι γλαφυρῇσιν ἐγείρομεν ὀξὺν Ἄρηα. |
| 532 | Primary εἴσομαι εἴ κέ μʼ ὁ Τυδεΐδης κρατερὸς Διομήδης |
| 533 | Primary πὰρ νηῶν πρὸς τεῖχος ἀπώσεται, ἤ κεν ἐγὼ τὸν |
| 534 | Primary χαλκῷ δῃώσας ἔναρα βροτόεντα φέρωμαι. |
| 535 | Primary αὔριον ἣν ἀρετὴν διαείσεται, εἴ κʼ ἐμὸν ἔγχος |
| 536 | Primary μείνῃ ἐπερχόμενον· ἀλλʼ ἐν πρώτοισιν ὀΐω |
| 537 | Primary κείσεται οὐτηθείς, πολέες δʼ ἀμφʼ αὐτὸν ἑταῖροι |
| 538 | Primary ἠελίου ἀνιόντος ἐς αὔριον· εἰ γὰρ ἐγὼν ὣς |
| 539 | Primary εἴην ἀθάνατος καὶ ἀγήρως ἤματα πάντα, |
| 540 | Primary τιοίμην δʼ ὡς τίετʼ Ἀθηναίη καὶ Ἀπόλλων, |
| 541 | Primary ὡς νῦν ἡμέρη ἥδε κακὸν φέρει Ἀργείοισιν. |
| 542 | Primary ὣς Ἕκτωρ ἀγόρευʼ, ἐπὶ δὲ Τρῶες κελάδησαν. |
| 543 | Primary οἳ δʼ ἵππους μὲν λῦσαν ὑπὸ ζυγοῦ ἱδρώοντας, |
| 544 | Primary δῆσαν δʼ ἱμάντεσσι παρʼ ἅρμασιν οἷσιν ἕκαστος· |
| 545 | Primary ἐκ πόλιος δʼ ἄξοντο βόας καὶ ἴφια μῆλα |
| 546 | Primary καρπαλίμως, οἶνον δὲ μελίφρονα οἰνίζοντο, |
| 547 | Primary σῖτόν τʼ ἐκ μεγάρων, ἐπὶ δὲ ξύλα πολλὰ λέγοντο. |
| 548 | Primary ἔρδον δ’ ἀθανάτοισι τεληέσσας ἑκατόμβας |
| 549 | Primary κνίσην δʼ ἐκ πεδίου ἄνεμοι φέρον οὐρανὸν εἴσω. |
| 550 | Primary ἡδεῖαν· τῆς δ’ οὔ τι θεοὶ μάκαρες δατέοντο, |
| 551 | Primary οὐδ’ ἔθελον· μάλα γάρ σφιν ἀπήχθετο Ἴλιος ἱρή, |
| 552 | Primary καὶ Πρίαμος καὶ λαὸς ἐϋμμελίω Πριάμοιο |
| 553 | Primary οἳ δὲ μέγα φρονέοντες ἐπὶ πτολέμοιο γεφύρας |
| 554 | Primary εἴατο παννύχιοι, πυρὰ δέ σφισι καίετο πολλά. |
| 555 | Primary ὡς δʼ ὅτʼ ἐν οὐρανῷ ἄστρα φαεινὴν ἀμφὶ σελήνην |
| 556 | Primary φαίνετʼ ἀριπρεπέα, ὅτε τʼ ἔπλετο νήνεμος αἰθήρ· |
| 557 | Primary ἔκ τʼ ἔφανεν πᾶσαι σκοπιαὶ καὶ πρώονες ἄκροι |
| 558 | Primary καὶ νάπαι· οὐρανόθεν δʼ ἄρʼ ὑπερράγη ἄσπετος αἰθήρ, |
| 559 | Primary πάντα δὲ εἴδεται ἄστρα, γέγηθε δέ τε φρένα ποιμήν· |
| 560 | Primary τόσσα μεσηγὺ νεῶν ἠδὲ Ξάνθοιο ῥοάων |
| 561 | Primary Τρώων καιόντων πυρὰ φαίνετο Ἰλιόθι πρό. |
| 562 | Primary χίλιʼ ἄρʼ ἐν πεδίῳ πυρὰ καίετο, πὰρ δὲ ἑκάστῳ |
| 563 | Primary εἴατο πεντήκοντα σέλᾳ πυρὸς αἰθομένοιο. |
| 564 | Primary ἵπποι δὲ κρῖ λευκὸν ἐρεπτόμενοι καὶ ὀλύρας |
| 565 | Primary ἑσταότες παρʼ ὄχεσφιν ἐΰθρονον Ἠῶ μίμνον. |