Reader
Reader | Iliad, Book 9
Iliad
Homer
Text
Position
Line 1 of 713
Waypoints
| Line Ref | Monro and Allen | Ancient Greek |
|---|---|
| 1 | Primary ὣς οἱ μὲν Τρῶες φυλακὰς ἔχον· αὐτὰρ Ἀχαιοὺς |
| 2 | Primary θεσπεσίη ἔχε φύζα φόβου κρυόεντος ἑταίρη, |
| 3 | Primary πένθεϊ δʼ ἀτλήτῳ βεβολήατο πάντες ἄριστοι. |
| 4 | Primary ὡς δʼ ἄνεμοι δύο πόντον ὀρίνετον ἰχθυόεντα |
| 5 | Primary Βορέης καὶ Ζέφυρος, τώ τε Θρῄκηθεν ἄητον |
| 6 | Primary ἐλθόντʼ ἐξαπίνης· ἄμυδις δέ τε κῦμα κελαινὸν |
| 7 | Primary κορθύεται, πολλὸν δὲ παρὲξ ἅλα φῦκος ἔχευεν· |
| 8 | Primary ὣς ἐδαΐζετο θυμὸς ἐνὶ στήθεσσιν Ἀχαιῶν. |
| 9 | Primary Ἀτρεΐδης δʼ ἄχεϊ μεγάλῳ βεβολημένος ἦτορ |
| 10 | Primary φοίτα κηρύκεσσι λιγυφθόγγοισι κελεύων |
| 11 | Primary κλήδην εἰς ἀγορὴν κικλήσκειν ἄνδρα ἕκαστον, |
| 12 | Primary μὴ δὲ βοᾶν· αὐτὸς δὲ μετὰ πρώτοισι πονεῖτο. |
| 13 | Primary ἷζον δʼ εἰν ἀγορῇ τετιηότες· ἂν δʼ Ἀγαμέμνων |
| 14 | Primary ἵστατο δάκρυ χέων ὥς τε κρήνη μελάνυδρος |
| 15 | Primary ἥ τε κατʼ αἰγίλιπος πέτρης δνοφερὸν χέει ὕδωρ· |
| 16 | Primary ὣς ὃ βαρὺ στενάχων ἔπεʼ Ἀργείοισι μετηύδα· |
| 17 | Primary ὦ φίλοι Ἀργείων ἡγήτορες ἠδὲ μέδοντες |
| 18 | Primary Ζεύς με μέγα Κρονίδης ἄτῃ ἐνέδησε βαρείῃ |
| 19 | Primary σχέτλιος, ὃς τότε μέν μοι ὑπέσχετο καὶ κατένευσεν |
| 20 | Primary Ἴλιον ἐκπέρσαντʼ εὐτείχεον ἀπονέεσθαι, |
| 21 | Primary νῦν δὲ κακὴν ἀπάτην βουλεύσατο, καί με κελεύει |
| 22 | Primary δυσκλέα Ἄργος ἱκέσθαι, ἐπεὶ πολὺν ὤλεσα λαόν. |
| 23 | Primary οὕτω που Διὶ μέλλει ὑπερμενέϊ φίλον εἶναι, |
| 24 | Primary ὃς δὴ πολλάων πολίων κατέλυσε κάρηνα |
| 25 | Primary ἠδʼ ἔτι καὶ λύσει· τοῦ γὰρ κράτος ἐστὶ μέγιστον. |
| 26 | Primary ἀλλʼ ἄγεθʼ ὡς ἂν ἐγὼ εἴπω πειθώμεθα πάντες· |
| 27 | Primary φεύγωμεν σὺν νηυσὶ φίλην ἐς πατρίδα γαῖαν· |
| 28 | Primary οὐ γὰρ ἔτι Τροίην αἱρήσομεν εὐρυάγυιαν. |
| 29 | Primary ὣς ἔφαθʼ, οἳ δʼ ἄρα πάντες ἀκὴν ἐγένοντο σιωπῇ. |
| 30 | Primary δὴν δʼ ἄνεῳ ἦσαν τετιηότες υἷες Ἀχαιῶν· |
| 31 | Primary ὀψὲ δὲ δὴ μετέειπε βοὴν ἀγαθὸς Διομήδης· |
| 32 | Primary Ἀτρεΐδη σοὶ πρῶτα μαχήσομαι ἀφραδέοντι, |
| 33 | Primary ἣ θέμις ἐστὶν ἄναξ ἀγορῇ· σὺ δὲ μή τι χολωθῇς. |
| 34 | Primary ἀλκὴν μέν μοι πρῶτον ὀνείδισας ἐν Δαναοῖσι |
| 35 | Primary φὰς ἔμεν ἀπτόλεμον καὶ ἀνάλκιδα· ταῦτα δὲ πάντα |
| 36 | Primary ἴσασʼ Ἀργείων ἠμὲν νέοι ἠδὲ γέροντες. |
| 37 | Primary σοὶ δὲ διάνδιχα δῶκε Κρόνου πάϊς ἀγκυλομήτεω· |
| 38 | Primary σκήπτρῳ μέν τοι δῶκε τετιμῆσθαι περὶ πάντων, |
| 39 | Primary ἀλκὴν δʼ οὔ τοι δῶκεν, ὅ τε κράτος ἐστὶ μέγιστον. |
| 40 | Primary δαιμόνιʼ οὕτω που μάλα ἔλπεαι υἷας Ἀχαιῶν |
| 41 | Primary ἀπτολέμους τʼ ἔμεναι καὶ ἀνάλκιδας ὡς ἀγορεύεις; |
| 42 | Primary εἰ δέ τοι αὐτῷ θυμὸς ἐπέσσυται ὥς τε νέεσθαι |
| 43 | Primary ἔρχεο· πάρ τοι ὁδός, νῆες δέ τοι ἄγχι θαλάσσης |
| 44 | Primary ἑστᾶσʼ, αἵ τοι ἕποντο Μυκήνηθεν μάλα πολλαί. |
| 45 | Primary ἀλλʼ ἄλλοι μενέουσι κάρη κομόωντες Ἀχαιοὶ |
| 46 | Primary εἰς ὅ κέ περ Τροίην διαπέρσομεν. εἰ δὲ καὶ αὐτοὶ |
| 47 | Primary φευγόντων σὺν νηυσὶ φίλην ἐς πατρίδα γαῖαν· |
| 48 | Primary νῶϊ δʼ ἐγὼ Σθένελός τε μαχησόμεθʼ εἰς ὅ κε τέκμωρ |
| 49 | Primary Ἰλίου εὕρωμεν· σὺν γὰρ θεῷ εἰλήλουθμεν. |
| 50 | Primary ὣς ἔφαθʼ, οἳ δʼ ἄρα πάντες ἐπίαχον υἷες Ἀχαιῶν |
| 51 | Primary μῦθον ἀγασσάμενοι Διομήδεος ἱπποδάμοιο. |
| 52 | Primary τοῖσι δʼ ἀνιστάμενος μετεφώνεεν ἱππότα Νέστωρ· |
| 53 | Primary Τυδεΐδη περὶ μὲν πολέμῳ ἔνι καρτερός ἐσσι, |
| 54 | Primary καὶ βουλῇ μετὰ πάντας ὁμήλικας ἔπλευ ἄριστος. |
| 55 | Primary οὔ τίς τοι τὸν μῦθον ὀνόσσεται ὅσσοι Ἀχαιοί, |
| 56 | Primary οὐδὲ πάλιν ἐρέει· ἀτὰρ οὐ τέλος ἵκεο μύθων. |
| 57 | Primary ἦ μὲν καὶ νέος ἐσσί, ἐμὸς δέ κε καὶ πάϊς εἴης |
| 58 | Primary ὁπλότατος γενεῆφιν· ἀτὰρ πεπνυμένα βάζεις |
| 59 | Primary Ἀργείων βασιλῆας, ἐπεὶ κατὰ μοῖραν ἔειπες. |
| 60 | Primary ἀλλʼ ἄγʼ ἐγών, ὃς σεῖο γεραίτερος εὔχομαι εἶναι, |
| 61 | Primary ἐξείπω καὶ πάντα διίξομαι· οὐδέ κέ τίς μοι |
| 62 | Primary μῦθον ἀτιμήσειʼ, οὐδὲ κρείων Ἀγαμέμνων. |
| 63 | Primary ἀφρήτωρ ἀθέμιστος ἀνέστιός ἐστιν ἐκεῖνος |
| 64 | Primary ὃς πολέμου ἔραται ἐπιδημίου ὀκρυόεντος. |
| 65 | Primary ἀλλʼ ἤτοι νῦν μὲν πειθώμεθα νυκτὶ μελαίνῃ |
| 66 | Primary δόρπά τʼ ἐφοπλισόμεσθα· φυλακτῆρες δὲ ἕκαστοι |
| 67 | Primary λεξάσθων παρὰ τάφρον ὀρυκτὴν τείχεος ἐκτός. |
| 68 | Primary κούροισιν μὲν ταῦτʼ ἐπιτέλλομαι· αὐτὰρ ἔπειτα |
| 69 | Primary Ἀτρεΐδη σὺ μὲν ἄρχε· σὺ γὰρ βασιλεύτατός ἐσσι. |
| 70 | Primary δαίνυ δαῖτα γέρουσιν· ἔοικέ τοι, οὔ τοι ἀεικές. |
| 71 | Primary πλεῖαί τοι οἴνου κλισίαι, τὸν νῆες Ἀχαιῶν |
| 72 | Primary ἠμάτιαι Θρῄκηθεν ἐπʼ εὐρέα πόντον ἄγουσι· |
| 73 | Primary πᾶσά τοί ἐσθʼ ὑποδεξίη, πολέεσσι δʼ ἀνάσσεις. |
| 74 | Primary πολλῶν δʼ ἀγρομένων τῷ πείσεαι ὅς κεν ἀρίστην |
| 75 | Primary βουλὴν βουλεύσῃ· μάλα δὲ χρεὼ πάντας Ἀχαιοὺς |
| 76 | Primary ἐσθλῆς καὶ πυκινῆς, ὅτι δήϊοι ἐγγύθι νηῶν |
| 77 | Primary καίουσιν πυρὰ πολλά· τίς ἂν τάδε γηθήσειε; |
| 78 | Primary νὺξ δʼ ἧδʼ ἠὲ διαρραίσει στρατὸν ἠὲ σαώσει. |
| 79 | Primary ὣς ἔφαθʼ, οἳ δʼ ἄρα τοῦ μάλα μὲν κλύον ἠδὲ πίθοντο. |
| 80 | Primary ἐκ δὲ φυλακτῆρες σὺν τεύχεσιν ἐσσεύοντο |
| 81 | Primary ἀμφί τε Νεστορίδην Θρασυμήδεα ποιμένα λαῶν, |
| 82 | Primary ἠδʼ ἀμφʼ Ἀσκάλαφον καὶ Ἰάλμενον υἷας Ἄρηος |
| 83 | Primary ἀμφί τε Μηριόνην Ἀφαρῆά τε Δηΐπυρόν τε, |
| 84 | Primary ἠδʼ ἀμφὶ Κρείοντος υἱὸν Λυκομήδεα δῖον. |
| 85 | Primary ἕπτʼ ἔσαν ἡγεμόνες φυλάκων, ἑκατὸν δὲ ἑκάστῳ |
| 86 | Primary κοῦροι ἅμα στεῖχον δολίχʼ ἔγχεα χερσὶν ἔχοντες· |
| 87 | Primary κὰδ δὲ μέσον τάφρου καὶ τείχεος ἷζον ἰόντες· |
| 88 | Primary ἔνθα δὲ πῦρ κήαντο, τίθεντο δὲ δόρπα ἕκαστος. |
| 89 | Primary Ἀτρεΐδης δὲ γέροντας ἀολλέας ἦγεν Ἀχαιῶν |
| 90 | Primary ἐς κλισίην, παρὰ δέ σφι τίθει μενοεικέα δαῖτα. |
| 91 | Primary οἳ δʼ ἐπʼ ὀνείαθʼ ἑτοῖμα προκείμενα χεῖρας ἴαλλον. |
| 92 | Primary αὐτὰρ ἐπεὶ πόσιος καὶ ἐδητύος ἐξ ἔρον ἕντο, |
| 93 | Primary τοῖς ὁ γέρων πάμπρωτος ὑφαίνειν ἤρχετο μῆτιν |
| 94 | Primary Νέστωρ, οὗ καὶ πρόσθεν ἀρίστη φαίνετο βουλή· |
| 95 | Primary ὅ σφιν ἐϋφρονέων ἀγορήσατο καὶ μετέειπεν· |
| 96 | Primary Ἀτρεΐδη κύδιστε ἄναξ ἀνδρῶν Ἀγάμεμνον |
| 97 | Primary ἐν σοὶ μὲν λήξω, σέο δʼ ἄρξομαι, οὕνεκα πολλῶν |
| 98 | Primary λαῶν ἐσσι ἄναξ καί τοι Ζεὺς ἐγγυάλιξε |
| 99 | Primary σκῆπτρόν τʼ ἠδὲ θέμιστας, ἵνά σφισι βουλεύῃσθα. |
| 100 | Primary τώ σε χρὴ περὶ μὲν φάσθαι ἔπος ἠδʼ ἐπακοῦσαι, |
| 101 | Primary κρηῆναι δὲ καὶ ἄλλῳ, ὅτʼ ἄν τινα θυμὸς ἀνώγῃ |
| 102 | Primary εἰπεῖν εἰς ἀγαθόν· σέο δʼ ἕξεται ὅττί κεν ἄρχῃ. |
| 103 | Primary αὐτὰρ ἐγὼν ἐρέω ὥς μοι δοκεῖ εἶναι ἄριστα. |
| 104 | Primary οὐ γάρ τις νόον ἄλλος ἀμείνονα τοῦδε νοήσει |
| 105 | Primary οἷον ἐγὼ νοέω ἠμὲν πάλαι ἠδʼ ἔτι καὶ νῦν |
| 106 | Primary ἐξ ἔτι τοῦ ὅτε διογενὲς Βρισηΐδα κούρην |
| 107 | Primary χωομένου Ἀχιλῆος ἔβης κλισίηθεν ἀπούρας |
| 108 | Primary οὔ τι καθʼ ἡμέτερόν γε νόον· μάλα γάρ τοι ἔγωγε |
| 109 | Primary πόλλʼ ἀπεμυθεόμην· σὺ δὲ σῷ μεγαλήτορι θυμῷ |
| 110 | Primary εἴξας ἄνδρα φέριστον, ὃν ἀθάνατοί περ ἔτισαν, |
| 111 | Primary ἠτίμησας, ἑλὼν γὰρ ἔχεις γέρας· ἀλλʼ ἔτι καὶ νῦν |
| 112 | Primary φραζώμεσθʼ ὥς κέν μιν ἀρεσσάμενοι πεπίθωμεν |
| 113 | Primary δώροισίν τʼ ἀγανοῖσιν ἔπεσσί τε μειλιχίοισι. |
| 114 | Primary τὸν δʼ αὖτε προσέειπεν ἄναξ ἀνδρῶν Ἀγαμέμνων· |
| 115 | Primary ὦ γέρον οὔ τι ψεῦδος ἐμὰς ἄτας κατέλεξας· |
| 116 | Primary ἀασάμην, οὐδʼ αὐτὸς ἀναίνομαι. ἀντί νυ πολλῶν |
| 117 | Primary λαῶν ἐστὶν ἀνὴρ ὅν τε Ζεὺς κῆρι φιλήσῃ, |
| 118 | Primary ὡς νῦν τοῦτον ἔτισε, δάμασσε δὲ λαὸν Ἀχαιῶν. |
| 119 | Primary ἀλλʼ ἐπεὶ ἀασάμην φρεσὶ λευγαλέῃσι πιθήσας, |
| 120 | Primary ἂψ ἐθέλω ἀρέσαι δόμεναί τʼ ἀπερείσιʼ ἄποινα. |
| 121 | Primary ὑμῖν δʼ ἐν πάντεσσι περικλυτὰ δῶρʼ ὀνομήνω |
| 122 | Primary ἕπτʼ ἀπύρους τρίποδας, δέκα δὲ χρυσοῖο τάλαντα, |
| 123 | Primary αἴθωνας δὲ λέβητας ἐείκοσι, δώδεκα δʼ ἵππους |
| 124 | Primary πηγοὺς ἀθλοφόρους, οἳ ἀέθλια ποσσὶν ἄροντο. |
| 125 | Primary οὔ κεν ἀλήϊος εἴη ἀνὴρ ᾧ τόσσα γένοιτο, |
| 126 | Primary οὐδέ κεν ἀκτήμων ἐριτίμοιο χρυσοῖο, |
| 127 | Primary ὅσσά μοι ἠνείκαντο ἀέθλια μώνυχες ἵπποι. |
| 128 | Primary δώσω δʼ ἑπτὰ γυναῖκας ἀμύμονα ἔργα ἰδυίας |
| 129 | Primary Λεσβίδας, ἃς ὅτε Λέσβον ἐϋκτιμένην ἕλεν αὐτὸς |
| 130 | Primary ἐξελόμην, αἳ κάλλει ἐνίκων φῦλα γυναικῶν. |
| 131 | Primary τὰς μέν οἱ δώσω, μετὰ δʼ ἔσσεται ἣν τότʼ ἀπηύρων |
| 132 | Primary κούρη Βρισῆος· ἐπὶ δὲ μέγαν ὅρκον ὀμοῦμαι |
| 133 | Primary μή ποτε τῆς εὐνῆς ἐπιβήμεναι ἠδὲ μιγῆναι, |
| 134 | Primary ἣ θέμις ἀνθρώπων πέλει ἀνδρῶν ἠδὲ γυναικῶν. |
| 135 | Primary ταῦτα μὲν αὐτίκα πάντα παρέσσεται· εἰ δέ κεν αὖτε |
| 136 | Primary ἄστυ μέγα Πριάμοιο θεοὶ δώωσʼ ἀλαπάξαι, |
| 137 | Primary νῆα ἅλις χρυσοῦ καὶ χαλκοῦ νηησάσθω |
| 138 | Primary εἰσελθών, ὅτε κεν δατεώμεθα ληΐδʼ Ἀχαιοί, |
| 139 | Primary Τρωϊάδας δὲ γυναῖκας ἐείκοσιν αὐτὸς ἑλέσθω, |
| 140 | Primary αἴ κε μετʼ Ἀργείην Ἑλένην κάλλισται ἔωσιν. |
| 141 | Primary εἰ δέ κεν Ἄργος ἱκοίμεθʼ Ἀχαιϊκὸν οὖθαρ ἀρούρης |
| 142 | Primary γαμβρός κέν μοι ἔοι· τίσω δέ μιν ἶσον Ὀρέστῃ, |
| 143 | Primary ὅς μοι τηλύγετος τρέφεται θαλίῃ ἔνι πολλῇ. |
| 144 | Primary τρεῖς δέ μοί εἰσι θύγατρες ἐνὶ μεγάρῳ εὐπήκτῳ |
| 145 | Primary Χρυσόθεμις καὶ Λαοδίκη καὶ Ἰφιάνασσα, |
| 146 | Primary τάων ἥν κʼ ἐθέλῃσι φίλην ἀνάεδνον ἀγέσθω |
| 147 | Primary πρὸς οἶκον Πηλῆος· ἐγὼ δʼ ἐπὶ μείλια δώσω |
| 148 | Primary πολλὰ μάλʼ, ὅσσʼ οὔ πώ τις ἑῇ ἐπέδωκε θυγατρί· |
| 149 | Primary ἑπτὰ δέ οἱ δώσω εὖ ναιόμενα πτολίεθρα |
| 150 | Primary Καρδαμύλην Ἐνόπην τε καὶ Ἱρὴν ποιήεσσαν |
| 151 | Primary Φηράς τε ζαθέας ἠδʼ Ἄνθειαν βαθύλειμον |
| 152 | Primary καλήν τʼ Αἴπειαν καὶ Πήδασον ἀμπελόεσσαν. |
| 153 | Primary πᾶσαι δʼ ἐγγὺς ἁλός, νέαται Πύλου ἠμαθόεντος· |
| 154 | Primary ἐν δʼ ἄνδρες ναίουσι πολύρρηνες πολυβοῦται, |
| 155 | Primary οἵ κέ ἑ δωτίνῃσι θεὸν ὣς τιμήσουσι |
| 156 | Primary καί οἱ ὑπὸ σκήπτρῳ λιπαρὰς τελέουσι θέμιστας. |
| 157 | Primary ταῦτά κέ οἱ τελέσαιμι μεταλήξαντι χόλοιο. |
| 158 | Primary δμηθήτω· Ἀΐδης τοι ἀμείλιχος ἠδʼ ἀδάμαστος, |
| 159 | Primary τοὔνεκα καί τε βροτοῖσι θεῶν ἔχθιστος ἁπάντων· |
| 160 | Primary καί μοι ὑποστήτω ὅσσον βασιλεύτερός εἰμι |
| 161 | Primary ἠδʼ ὅσσον γενεῇ προγενέστερος εὔχομαι εἶναι. |
| 162 | Primary τὸν δʼ ἠμείβετʼ ἔπειτα Γερήνιος ἱππότα Νέστωρ· |
| 163 | Primary Ἀτρεΐδη κύδιστε ἄναξ ἀνδρῶν Ἀγάμεμνον |
| 164 | Primary δῶρα μὲν οὐκέτʼ ὀνοστὰ διδοῖς Ἀχιλῆϊ ἄνακτι· |
| 165 | Primary ἀλλʼ ἄγετε κλητοὺς ὀτρύνομεν, οἵ κε τάχιστα |
| 166 | Primary ἔλθωσʼ ἐς κλισίην Πηληϊάδεω Ἀχιλῆος. |
| 167 | Primary εἰ δʼ ἄγε τοὺς ἂν ἐγὼ ἐπιόψομαι οἳ δὲ πιθέσθων. |
| 168 | Primary Φοῖνιξ μὲν πρώτιστα Διῒ φίλος ἡγησάσθω, |
| 169 | Primary αὐτὰρ ἔπειτʼ Αἴας τε μέγας καὶ δῖος Ὀδυσσεύς· |
| 170 | Primary κηρύκων δʼ Ὀδίος τε καὶ Εὐρυβάτης ἅμʼ ἑπέσθων. |
| 171 | Primary φέρτε δὲ χερσὶν ὕδωρ, εὐφημῆσαί τε κέλεσθε, |
| 172 | Primary ὄφρα Διὶ Κρονίδῃ ἀρησόμεθʼ, αἴ κʼ ἐλεήσῃ. |
| 173 | Primary ὣς φάτο, τοῖσι δὲ πᾶσιν ἑαδότα μῦθον ἔειπεν. |
| 174 | Primary αὐτίκα κήρυκες μὲν ὕδωρ ἐπὶ χεῖρας ἔχευαν, |
| 175 | Primary κοῦροι δὲ κρητῆρας ἐπεστέψαντο ποτοῖο, |
| 176 | Primary νώμησαν δʼ ἄρα πᾶσιν ἐπαρξάμενοι δεπάεσσιν. |
| 177 | Primary αὐτὰρ ἐπεὶ σπεῖσάν τʼ ἔπιόν θʼ ὅσον ἤθελε θυμός, |
| 178 | Primary ὁρμῶντʼ ἐκ κλισίης Ἀγαμέμνονος Ἀτρεΐδαο. |
| 179 | Primary τοῖσι δὲ πόλλʼ ἐπέτελλε Γερήνιος ἱππότα Νέστωρ |
| 180 | Primary δενδίλλων ἐς ἕκαστον, Ὀδυσσῆϊ δὲ μάλιστα, |
| 181 | Primary πειρᾶν ὡς πεπίθοιεν ἀμύμονα Πηλεΐωνα. |
| 182 | Primary τὼ δὲ βάτην παρὰ θῖνα πολυφλοίσβοιο θαλάσσης |
| 183 | Primary πολλὰ μάλʼ εὐχομένω γαιηόχῳ ἐννοσιγαίῳ |
| 184 | Primary ῥηϊδίως πεπιθεῖν μεγάλας φρένας Αἰακίδαο. |
| 185 | Primary Μυρμιδόνων δʼ ἐπί τε κλισίας καὶ νῆας ἱκέσθην, |
| 186 | Primary τὸν δʼ εὗρον φρένα τερπόμενον φόρμιγγι λιγείῃ |
| 187 | Primary καλῇ δαιδαλέῃ, ἐπὶ δʼ ἀργύρεον ζυγὸν ἦεν, |
| 188 | Primary τὴν ἄρετʼ ἐξ ἐνάρων πόλιν Ἠετίωνος ὀλέσσας· |
| 189 | Primary τῇ ὅ γε θυμὸν ἔτερπεν, ἄειδε δʼ ἄρα κλέα ἀνδρῶν. |
| 190 | Primary Πάτροκλος δέ οἱ οἶος ἐναντίος ἧστο σιωπῇ, |
| 191 | Primary δέγμενος Αἰακίδην ὁπότε λήξειεν ἀείδων, |
| 192 | Primary τὼ δὲ βάτην προτέρω, ἡγεῖτο δὲ δῖος Ὀδυσσεύς, |
| 193 | Primary στὰν δὲ πρόσθʼ αὐτοῖο· ταφὼν δʼ ἀνόρουσεν Ἀχιλλεὺς |
| 194 | Primary αὐτῇ σὺν φόρμιγγι λιπὼν ἕδος ἔνθα θάασσεν. |
| 195 | Primary ὣς δʼ αὔτως Πάτροκλος, ἐπεὶ ἴδε φῶτας, ἀνέστη. |
| 196 | Primary τὼ καὶ δεικνύμενος προσέφη πόδας ὠκὺς Ἀχιλλεύς· |
| 197 | Primary χαίρετον· ἦ φίλοι ἄνδρες ἱκάνετον ἦ τι μάλα χρεώ, |
| 198 | Primary οἵ μοι σκυζομένῳ περ Ἀχαιῶν φίλτατοί ἐστον. |
| 199 | Primary ὣς ἄρα φωνήσας προτέρω ἄγε δῖος Ἀχιλλεύς, |
| 200 | Primary εἷσεν δʼ ἐν κλισμοῖσι τάπησί τε πορφυρέοισιν. |
| 201 | Primary αἶψα δὲ Πάτροκλον προσεφώνεεν ἐγγὺς ἐόντα· |
| 202 | Primary μείζονα δὴ κρητῆρα Μενοιτίου υἱὲ καθίστα, |
| 203 | Primary ζωρότερον δὲ κέραιε, δέπας δʼ ἔντυνον ἑκάστῳ· |
| 204 | Primary οἳ γὰρ φίλτατοι ἄνδρες ἐμῷ ὑπέασι μελάθρῳ. |
| 205 | Primary ὣς φάτο, Πάτροκλος δὲ φίλῳ ἐπεπείθεθʼ ἑταίρῳ. |
| 206 | Primary αὐτὰρ ὅ γε κρεῖον μέγα κάββαλεν ἐν πυρὸς αὐγῇ, |
| 207 | Primary ἐν δʼ ἄρα νῶτον ἔθηκʼ ὄϊος καὶ πίονος αἰγός, |
| 208 | Primary ἐν δὲ συὸς σιάλοιο ῥάχιν τεθαλυῖαν ἀλοιφῇ. |
| 209 | Primary τῷ δʼ ἔχεν Αὐτομέδων, τάμνεν δʼ ἄρα δῖος Ἀχιλλεύς. |
| 210 | Primary καὶ τὰ μὲν εὖ μίστυλλε καὶ ἀμφʼ ὀβελοῖσιν ἔπειρε, |
| 211 | Primary πῦρ δὲ Μενοιτιάδης δαῖεν μέγα ἰσόθεος φώς. |
| 212 | Primary αὐτὰρ ἐπεὶ κατὰ πῦρ ἐκάη καὶ φλὸξ ἐμαράνθη, |
| 213 | Primary ἀνθρακιὴν στορέσας ὀβελοὺς ἐφύπερθε τάνυσσε, |
| 214 | Primary πάσσε δʼ ἁλὸς θείοιο κρατευτάων ἐπαείρας. |
| 215 | Primary αὐτὰρ ἐπεί ῥʼ ὤπτησε καὶ εἰν ἐλεοῖσιν ἔχευε, |
| 216 | Primary Πάτροκλος μὲν σῖτον ἑλὼν ἐπένειμε τραπέζῃ |
| 217 | Primary καλοῖς ἐν κανέοισιν, ἀτὰρ κρέα νεῖμεν Ἀχιλλεύς. |
| 218 | Primary αὐτὸς δʼ ἀντίον ἷζεν Ὀδυσσῆος θείοιο |
| 219 | Primary τοίχου τοῦ ἑτέροιο, θεοῖσι δὲ θῦσαι ἀνώγει |
| 220 | Primary Πάτροκλον ὃν ἑταῖρον· ὃ δʼ ἐν πυρὶ βάλλε θυηλάς. |
| 221 | Primary οἳ δʼ ἐπʼ ὀνείαθʼ ἑτοῖμα προκείμενα χεῖρας ἴαλλον. |
| 222 | Primary αὐτὰρ ἐπεὶ πόσιος καὶ ἐδητύος ἐξ ἔρον ἕντο, |
| 223 | Primary νεῦσʼ Αἴας Φοίνικι· νόησε δὲ δῖος Ὀδυσσεύς, |
| 224 | Primary πλησάμενος δʼ οἴνοιο δέπας δείδεκτʼ Ἀχιλῆα· |
| 225 | Primary χαῖρʼ Ἀχιλεῦ· δαιτὸς μὲν ἐΐσης οὐκ ἐπιδευεῖς |
| 226 | Primary ἠμὲν ἐνὶ κλισίῃ Ἀγαμέμνονος Ἀτρεΐδαο |
| 227 | Primary ἠδὲ καὶ ἐνθάδε νῦν, πάρα γὰρ μενοεικέα πολλὰ |
| 228 | Primary δαίνυσθʼ· ἀλλʼ οὐ δαιτὸς ἐπηράτου ἔργα μέμηλεν, |
| 229 | Primary ἀλλὰ λίην μέγα πῆμα διοτρεφὲς εἰσορόωντες |
| 230 | Primary δείδιμεν· ἐν δοιῇ δὲ σαωσέμεν ἢ ἀπολέσθαι |
| 231 | Primary νῆας ἐϋσσέλμους, εἰ μὴ σύ γε δύσεαι ἀλκήν. |
| 232 | Primary ἐγγὺς γὰρ νηῶν καὶ τείχεος αὖλιν ἔθεντο |
| 233 | Primary Τρῶες ὑπέρθυμοι τηλεκλειτοί τʼ ἐπίκουροι |
| 234 | Primary κηάμενοι πυρὰ πολλὰ κατὰ στρατόν, οὐδʼ ἔτι φασὶ |
| 235 | Primary σχήσεσθʼ, ἀλλʼ ἐν νηυσὶ μελαίνῃσιν πεσέεσθαι. |
| 236 | Primary Ζεὺς δέ σφι Κρονίδης ἐνδέξια σήματα φαίνων |
| 237 | Primary ἀστράπτει· Ἕκτωρ δὲ μέγα σθένεϊ βλεμεαίνων |
| 238 | Primary μαίνεται ἐκπάγλως πίσυνος Διί, οὐδέ τι τίει |
| 239 | Primary ἀνέρας οὐδὲ θεούς· κρατερὴ δέ ἑ λύσσα δέδυκεν. |
| 240 | Primary ἀρᾶται δὲ τάχιστα φανήμεναι Ἠῶ δῖαν· |
| 241 | Primary στεῦται γὰρ νηῶν ἀποκόψειν ἄκρα κόρυμβα |
| 242 | Primary αὐτάς τʼ ἐμπρήσειν μαλεροῦ πυρός, αὐτὰρ Ἀχαιοὺς |
| 243 | Primary δῃώσειν παρὰ τῇσιν ὀρινομένους ὑπὸ καπνοῦ. |
| 244 | Primary ταῦτʼ αἰνῶς δείδοικα κατὰ φρένα, μή οἱ ἀπειλὰς |
| 245 | Primary ἐκτελέσωσι θεοί, ἡμῖν δὲ δὴ αἴσιμον εἴη |
| 246 | Primary φθίσθαι ἐνὶ Τροίῃ ἑκὰς Ἄργεος ἱπποβότοιο. |
| 247 | Primary ἀλλʼ ἄνα εἰ μέμονάς γε καὶ ὀψέ περ υἷας Ἀχαιῶν |
| 248 | Primary τειρομένους ἐρύεσθαι ὑπὸ Τρώων ὀρυμαγδοῦ. |
| 249 | Primary αὐτῷ τοι μετόπισθʼ ἄχος ἔσσεται, οὐδέ τι μῆχος |
| 250 | Primary ῥεχθέντος κακοῦ ἔστʼ ἄκος εὑρεῖν· ἀλλὰ πολὺ πρὶν |
| 251 | Primary φράζευ ὅπως Δαναοῖσιν ἀλεξήσεις κακὸν ἦμαρ. |
| 252 | Primary ὦ πέπον ἦ μὲν σοί γε πατὴρ ἐπετέλλετο Πηλεὺς |
| 253 | Primary ἤματι τῷ ὅτε σʼ ἐκ Φθίης Ἀγαμέμνονι πέμπε· |
| 254 | Primary τέκνον ἐμὸν κάρτος μὲν Ἀθηναίη τε καὶ Ἥρη |
| 255 | Primary δώσουσʼ αἴ κʼ ἐθέλωσι, σὺ δὲ μεγαλήτορα θυμὸν |
| 256 | Primary ἴσχειν ἐν στήθεσσι· φιλοφροσύνη γὰρ ἀμείνων· |
| 257 | Primary ληγέμεναι δʼ ἔριδος κακομηχάνου, ὄφρά σε μᾶλλον |
| 258 | Primary τίωσʼ Ἀργείων ἠμὲν νέοι ἠδὲ γέροντες. |
| 259 | Primary ὣς ἐπέτελλʼ ὃ γέρων, σὺ δὲ λήθεαι· ἀλλʼ ἔτι καὶ νῦν |
| 260 | Primary παύεʼ, ἔα δὲ χόλον θυμαλγέα· σοὶ δʼ Ἀγαμέμνων |
| 261 | Primary ἄξια δῶρα δίδωσι μεταλήξαντι χόλοιο. |
| 262 | Primary εἰ δὲ σὺ μέν μευ ἄκουσον, ἐγὼ δέ κέ τοι καταλέξω |
| 263 | Primary ὅσσά τοι ἐν κλισίῃσιν ὑπέσχετο δῶρʼ Ἀγαμέμνων· |
| 264 | Primary ἕπτʼ ἀπύρους τρίποδας, δέκα δὲ χρυσοῖο τάλαντα, |
| 265 | Primary αἴθωνας δὲ λέβητας ἐείκοσι, δώδεκα δʼ ἵππους |
| 266 | Primary πηγοὺς ἀθλοφόρους, οἳ ἀέθλια ποσσὶν ἄροντο. |
| 267 | Primary οὔ κεν ἀλήϊος εἴη ἀνὴρ ᾧ τόσσα γένοιτο |
| 268 | Primary οὐδέ κεν ἀκτήμων ἐριτίμοιο χρυσοῖο, |
| 269 | Primary ὅσσʼ Ἀγαμέμνονος ἵπποι ἀέθλια ποσσὶν ἄροντο. |
| 270 | Primary δώσει δʼ ἑπτὰ γυναῖκας ἀμύμονα ἔργα ἰδυίας |
| 271 | Primary Λεσβίδας, ἃς ὅτε Λέσβον ἐϋκτιμένην ἕλες αὐτὸς |
| 272 | Primary ἐξέλεθʼ, αἳ τότε κάλλει ἐνίκων φῦλα γυναικῶν. |
| 273 | Primary τὰς μέν τοι δώσει, μετὰ δʼ ἔσσεται ἣν τότʼ ἀπηύρα |
| 274 | Primary κούρη Βρισῆος· ἐπὶ δὲ μέγαν ὅρκον ὀμεῖται |
| 275 | Primary μή ποτε τῆς εὐνῆς ἐπιβήμεναι ἠδὲ μιγῆναι |
| 276 | Primary ἣ θέμις ἐστὶν ἄναξ ἤτʼ ἀνδρῶν ἤτε γυναικῶν. |
| 277 | Primary ταῦτα μὲν αὐτίκα πάντα παρέσσεται· εἰ δέ κεν αὖτε |
| 278 | Primary ἄστυ μέγα Πριάμοιο θεοὶ δώωσʼ ἀλαπάξαι, |
| 279 | Primary νῆα ἅλις χρυσοῦ καὶ χαλκοῦ νηήσασθαι |
| 280 | Primary εἰσελθών, ὅτε κεν δατεώμεθα ληΐδʼ Ἀχαιοί, |
| 281 | Primary Τρωϊάδας δὲ γυναῖκας ἐείκοσιν αὐτὸς ἑλέσθαι, |
| 282 | Primary αἵ κε μετʼ Ἀργείην Ἑλένην κάλλισται ἔωσιν. |
| 283 | Primary εἰ δέ κεν Ἄργος ἱκοίμεθʼ Ἀχαιϊκὸν οὖθαρ ἀρούρης |
| 284 | Primary γαμβρός κέν οἱ ἔοις· τίσει δέ σε ἶσον Ὀρέστῃ, |
| 285 | Primary ὅς οἱ τηλύγετος τρέφεται θαλίῃ ἔνι πολλῇ. |
| 286 | Primary τρεῖς δέ οἵ εἰσι θύγατρες ἐνὶ μεγάρῳ εὐπήκτῳ |
| 287 | Primary Χρυσόθεμις καὶ Λαοδίκη καὶ Ἰφιάνασσα, |
| 288 | Primary τάων ἥν κʼ ἐθέλῃσθα φίλην ἀνάεδνον ἄγεσθαι |
| 289 | Primary πρὸς οἶκον Πηλῆος· ὃ δʼ αὖτʼ ἐπὶ μείλια δώσει |
| 290 | Primary πολλὰ μάλʼ, ὅσσʼ οὔ πώ τις ἑῇ ἐπέδωκε θυγατρί· |
| 291 | Primary ἑπτὰ δέ τοι δώσει εὖ ναιόμενα πτολίεθρα |
| 292 | Primary Καρδαμύλην Ἐνόπην τε καὶ Ἱρὴν ποιήεσσαν |
| 293 | Primary Φηράς τε ζαθέας ἠδʼ Ἄνθειαν βαθύλειμον |
| 294 | Primary καλήν τʼ Αἴπειαν καὶ Πήδασον ἀμπελόεσσαν. |
| 295 | Primary πᾶσαι δʼ ἐγγὺς ἁλός, νέαται Πύλου ἠμαθόεντος· |
| 296 | Primary ἐν δʼ ἄνδρες ναίουσι πολύρρηνες πολυβοῦται, |
| 297 | Primary οἵ κέ σε δωτίνῃσι θεὸν ὣς τιμήσουσι |
| 298 | Primary καί τοι ὑπὸ σκήπτρῳ λιπαρὰς τελέουσι θέμιστας. |
| 299 | Primary ταῦτά κέ τοι τελέσειε μεταλήξαντι χόλοιο. |
| 300 | Primary εἰ δέ τοι Ἀτρεΐδης μὲν ἀπήχθετο κηρόθι μᾶλλον |
| 301 | Primary αὐτὸς καὶ τοῦ δῶρα, σὺ δʼ ἄλλους περ Παναχαιοὺς |
| 302 | Primary τειρομένους ἐλέαιρε κατὰ στρατόν, οἵ σε θεὸν ὣς |
| 303 | Primary τίσουσʼ· ἦ γάρ κέ σφι μάλα μέγα κῦδος ἄροιο· |
| 304 | Primary νῦν γάρ χʼ Ἕκτορʼ ἕλοις, ἐπεὶ ἂν μάλα τοι σχεδὸν ἔλθοι |
| 305 | Primary λύσσαν ἔχων ὀλοήν, ἐπεὶ οὔ τινά φησιν ὁμοῖον |
| 306 | Primary οἷ ἔμεναι Δαναῶν οὓς ἐνθάδε νῆες ἔνεικαν. |
| 307 | Primary τὸν δʼ ἀπαμειβόμενος προσέφη πόδας ὠκὺς Ἀχιλλεύς· |
| 308 | Primary διογενὲς Λαερτιάδη πολυμήχανʼ Ὀδυσσεῦ |
| 309 | Primary χρὴ μὲν δὴ τὸν μῦθον ἀπηλεγέως ἀποειπεῖν, |
| 310 | Primary ᾗ περ δὴ φρονέω τε καὶ ὡς τετελεσμένον ἔσται, |
| 311 | Primary ὡς μή μοι τρύζητε παρήμενοι ἄλλοθεν ἄλλος. |
| 312 | Primary ἐχθρὸς γάρ μοι κεῖνος ὁμῶς Ἀΐδαο πύλῃσιν |
| 313 | Primary ὅς χʼ ἕτερον μὲν κεύθῃ ἐνὶ φρεσίν, ἄλλο δὲ εἴπῃ. |
| 314 | Primary αὐτὰρ ἐγὼν ἐρέω ὥς μοι δοκεῖ εἶναι ἄριστα· |
| 315 | Primary οὔτʼ ἔμεγʼ Ἀτρεΐδην Ἀγαμέμνονα πεισέμεν οἴω |
| 316 | Primary οὔτʼ ἄλλους Δαναούς, ἐπεὶ οὐκ ἄρα τις χάρις ἦεν |
| 317 | Primary μάρνασθαι δηΐοισιν ἐπʼ ἀνδράσι νωλεμὲς αἰεί. |
| 318 | Primary ἴση μοῖρα μένοντι καὶ εἰ μάλα τις πολεμίζοι· |
| 319 | Primary ἐν δὲ ἰῇ τιμῇ ἠμὲν κακὸς ἠδὲ καὶ ἐσθλός· |
| 320 | Primary κάτθανʼ ὁμῶς ὅ τʼ ἀεργὸς ἀνὴρ ὅ τε πολλὰ ἐοργώς. |
| 321 | Primary οὐδέ τί μοι περίκειται, ἐπεὶ πάθον ἄλγεα θυμῷ |
| 322 | Primary αἰεὶ ἐμὴν ψυχὴν παραβαλλόμενος πολεμίζειν. |
| 323 | Primary ὡς δʼ ὄρνις ἀπτῆσι νεοσσοῖσι προφέρῃσι |
| 324 | Primary μάστακʼ ἐπεί κε λάβῃσι, κακῶς δʼ ἄρα οἱ πέλει αὐτῇ, |
| 325 | Primary ὣς καὶ ἐγὼ πολλὰς μὲν ἀΰπνους νύκτας ἴαυον, |
| 326 | Primary ἤματα δʼ αἱματόεντα διέπρησσον πολεμίζων |
| 327 | Primary ἀνδράσι μαρνάμενος ὀάρων ἕνεκα σφετεράων. |
| 328 | Primary δώδεκα δὴ σὺν νηυσὶ πόλεις ἀλάπαξʼ ἀνθρώπων, |
| 329 | Primary πεζὸς δʼ ἕνδεκά φημι κατὰ Τροίην ἐρίβωλον· |
| 330 | Primary τάων ἐκ πασέων κειμήλια πολλὰ καὶ ἐσθλὰ |
| 331 | Primary ἐξελόμην, καὶ πάντα φέρων Ἀγαμέμνονι δόσκον |
| 332 | Primary Ἀτρεΐδῃ· ὃ δʼ ὄπισθε μένων παρὰ νηυσὶ θοῇσι |
| 333 | Primary δεξάμενος διὰ παῦρα δασάσκετο, πολλὰ δʼ ἔχεσκεν. |
| 334 | Primary ἄλλα δʼ ἀριστήεσσι δίδου γέρα καὶ βασιλεῦσι· |
| 335 | Primary τοῖσι μὲν ἔμπεδα κεῖται, ἐμεῦ δʼ ἀπὸ μούνου Ἀχαιῶν |
| 336 | Primary εἵλετʼ, ἔχει δʼ ἄλοχον θυμαρέα· τῇ παριαύων |
| 337 | Primary τερπέσθω. τί δὲ δεῖ πολεμιζέμεναι Τρώεσσιν |
| 338 | Primary Ἀργείους; τί δὲ λαὸν ἀνήγαγεν ἐνθάδʼ ἀγείρας |
| 339 | Primary Ἀτρεΐδης; ἦ οὐχ Ἑλένης ἕνεκʼ ἠϋκόμοιο; |
| 340 | Primary ἦ μοῦνοι φιλέουσʼ ἀλόχους μερόπων ἀνθρώπων |
| 341 | Primary Ἀτρεΐδαι; ἐπεὶ ὅς τις ἀνὴρ ἀγαθὸς καὶ ἐχέφρων |
| 342 | Primary τὴν αὐτοῦ φιλέει καὶ κήδεται, ὡς καὶ ἐγὼ τὴν |
| 343 | Primary ἐκ θυμοῦ φίλεον δουρικτητήν περ ἐοῦσαν. |
| 344 | Primary νῦν δʼ ἐπεὶ ἐκ χειρῶν γέρας εἵλετο καί μʼ ἀπάτησε |
| 345 | Primary μή μευ πειράτω εὖ εἰδότος· οὐδέ με πείσει. |
| 346 | Primary ἀλλʼ Ὀδυσεῦ σὺν σοί τε καὶ ἄλλοισιν βασιλεῦσι |
| 347 | Primary φραζέσθω νήεσσιν ἀλεξέμεναι δήϊον πῦρ. |
| 348 | Primary ἦ μὲν δὴ μάλα πολλὰ πονήσατο νόσφιν ἐμεῖο, |
| 349 | Primary καὶ δὴ τεῖχος ἔδειμε, καὶ ἤλασε τάφρον ἐπʼ αὐτῷ |
| 350 | Primary εὐρεῖαν μεγάλην, ἐν δὲ σκόλοπας κατέπηξεν· |
| 351 | Primary ἀλλʼ οὐδʼ ὧς δύναται σθένος Ἕκτορος ἀνδροφόνοιο |
| 352 | Primary ἴσχειν· ὄφρα δʼ ἐγὼ μετʼ Ἀχαιοῖσιν πολέμιζον |
| 353 | Primary οὐκ ἐθέλεσκε μάχην ἀπὸ τείχεος ὀρνύμεν Ἕκτωρ, |
| 354 | Primary ἀλλʼ ὅσον ἐς Σκαιάς τε πύλας καὶ φηγὸν ἵκανεν· |
| 355 | Primary ἔνθά ποτʼ οἶον ἔμιμνε, μόγις δέ μευ ἔκφυγεν ὁρμήν. |
| 356 | Primary νῦν δʼ ἐπεὶ οὐκ ἐθέλω πολεμιζέμεν Ἕκτορι δίῳ |
| 357 | Primary αὔριον ἱρὰ Διὶ ῥέξας καὶ πᾶσι θεοῖσι |
| 358 | Primary νηήσας εὖ νῆας, ἐπὴν ἅλα δὲ προερύσσω, |
| 359 | Primary ὄψεαι, αἴ κʼ ἐθέλῃσθα καὶ αἴ κέν τοι τὰ μεμήλῃ, |
| 360 | Primary ἦρι μάλʼ Ἑλλήσποντον ἐπʼ ἰχθυόεντα πλεούσας |
| 361 | Primary νῆας ἐμάς, ἐν δʼ ἄνδρας ἐρεσσέμεναι μεμαῶτας· |
| 362 | Primary εἰ δέ κεν εὐπλοίην δώῃ κλυτὸς ἐννοσίγαιος |
| 363 | Primary ἤματί κε τριτάτῳ Φθίην ἐρίβωλον ἱκοίμην. |
| 364 | Primary ἔστι δέ μοι μάλα πολλά, τὰ κάλλιπον ἐνθάδε ἔρρων· |
| 365 | Primary ἄλλον δʼ ἐνθένδε χρυσὸν καὶ χαλκὸν ἐρυθρὸν |
| 366 | Primary ἠδὲ γυναῖκας ἐϋζώνους πολιόν τε σίδηρον |
| 367 | Primary ἄξομαι, ἅσσʼ ἔλαχόν γε· γέρας δέ μοι, ὅς περ ἔδωκεν, |
| 368 | Primary αὖτις ἐφυβρίζων ἕλετο κρείων Ἀγαμέμνων |
| 369 | Primary Ἀτρεΐδης· τῷ πάντʼ ἀγορευέμεν ὡς ἐπιτέλλω |
| 370 | Primary ἀμφαδόν, ὄφρα καὶ ἄλλοι ἐπισκύζωνται Ἀχαιοὶ |
| 371 | Primary εἴ τινά που Δαναῶν ἔτι ἔλπεται ἐξαπατήσειν |
| 372 | Primary αἰὲν ἀναιδείην ἐπιειμένος· οὐδʼ ἂν ἔμοιγε |
| 373 | Primary τετλαίη κύνεός περ ἐὼν εἰς ὦπα ἰδέσθαι· |
| 374 | Primary οὐδέ τί οἱ βουλὰς συμφράσσομαι, οὐδὲ μὲν ἔργον· |
| 375 | Primary ἐκ γὰρ δή μʼ ἀπάτησε καὶ ἤλιτεν· οὐδʼ ἂν ἔτʼ αὖτις |
| 376 | Primary ἐξαπάφοιτʼ ἐπέεσσιν· ἅλις δέ οἱ· ἀλλὰ ἕκηλος |
| 377 | Primary ἐρρέτω· ἐκ γάρ εὑ φρένας εἵλετο μητίετα Ζεύς. |
| 378 | Primary ἐχθρὰ δέ μοι τοῦ δῶρα, τίω δέ μιν ἐν καρὸς αἴσῃ. |
| 379 | Primary οὐδʼ εἴ μοι δεκάκις τε καὶ εἰκοσάκις τόσα δοίη |
| 380 | Primary ὅσσά τέ οἱ νῦν ἔστι, καὶ εἴ ποθεν ἄλλα γένοιτο, |
| 381 | Primary οὐδʼ ὅσʼ ἐς Ὀρχομενὸν ποτινίσεται, οὐδʼ ὅσα Θήβας |
| 382 | Primary Αἰγυπτίας, ὅθι πλεῖστα δόμοις ἐν κτήματα κεῖται, |
| 383 | Primary αἵ θʼ ἑκατόμπυλοί εἰσι, διηκόσιοι δʼ ἀνʼ ἑκάστας |
| 384 | Primary ἀνέρες ἐξοιχνεῦσι σὺν ἵπποισιν καὶ ὄχεσφιν· |
| 385 | Primary οὐδʼ εἴ μοι τόσα δοίη ὅσα ψάμαθός τε κόνις τε, |
| 386 | Primary οὐδέ κεν ὧς ἔτι θυμὸν ἐμὸν πείσειʼ Ἀγαμέμνων |
| 387 | Primary πρίν γʼ ἀπὸ πᾶσαν ἐμοὶ δόμεναι θυμαλγέα λώβην. |
| 388 | Primary κούρην δʼ οὐ γαμέω Ἀγαμέμνονος Ἀτρεΐδαο, |
| 389 | Primary οὐδʼ εἰ χρυσείῃ Ἀφροδίτῃ κάλλος ἐρίζοι, |
| 390 | Primary ἔργα δʼ Ἀθηναίῃ γλαυκώπιδι ἰσοφαρίζοι· |
| 391 | Primary οὐδέ μιν ὧς γαμέω· ὃ δʼ Ἀχαιῶν ἄλλον ἑλέσθω, |
| 392 | Primary ὅς τις οἷ τʼ ἐπέοικε καὶ ὃς βασιλεύτερός ἐστιν. |
| 393 | Primary ἢν γὰρ δή με σαῶσι θεοὶ καὶ οἴκαδʼ ἵκωμαι, |
| 394 | Primary Πηλεύς θήν μοι ἔπειτα γυναῖκά γε μάσσεται αὐτός. |
| 395 | Primary πολλαὶ Ἀχαιΐδες εἰσὶν ἀνʼ Ἑλλάδα τε Φθίην τε |
| 396 | Primary κοῦραι ἀριστήων, οἵ τε πτολίεθρα ῥύονται, |
| 397 | Primary τάων ἥν κʼ ἐθέλωμι φίλην ποιήσομʼ ἄκοιτιν. |
| 398 | Primary ἔνθα δέ μοι μάλα πολλὸν ἐπέσσυτο θυμὸς ἀγήνωρ |
| 399 | Primary γήμαντα μνηστὴν ἄλοχον ἐϊκυῖαν ἄκοιτιν |
| 400 | Primary κτήμασι τέρπεσθαι τὰ γέρων ἐκτήσατο Πηλεύς· |
| 401 | Primary οὐ γὰρ ἐμοὶ ψυχῆς ἀντάξιον οὐδʼ ὅσα φασὶν |
| 402 | Primary Ἴλιον ἐκτῆσθαι εὖ ναιόμενον πτολίεθρον |
| 403 | Primary τὸ πρὶν ἐπʼ εἰρήνης, πρὶν ἐλθεῖν υἷας Ἀχαιῶν, |
| 404 | Primary οὐδʼ ὅσα λάϊνος οὐδὸς ἀφήτορος ἐντὸς ἐέργει |
| 405 | Primary Φοίβου Ἀπόλλωνος Πυθοῖ ἔνι πετρηέσσῃ. |
| 406 | Primary ληϊστοὶ μὲν γάρ τε βόες καὶ ἴφια μῆλα, |
| 407 | Primary κτητοὶ δὲ τρίποδές τε καὶ ἵππων ξανθὰ κάρηνα, |
| 408 | Primary ἀνδρὸς δὲ ψυχὴ πάλιν ἐλθεῖν οὔτε λεϊστὴ |
| 409 | Primary οὔθʼ ἑλετή, ἐπεὶ ἄρ κεν ἀμείψεται ἕρκος ὀδόντων. |
| 410 | Primary μήτηρ γάρ τέ μέ φησι θεὰ Θέτις ἀργυρόπεζα |
| 411 | Primary διχθαδίας κῆρας φερέμεν θανάτοιο τέλος δέ. |
| 412 | Primary εἰ μέν κʼ αὖθι μένων Τρώων πόλιν ἀμφιμάχωμαι, |
| 413 | Primary ὤλετο μέν μοι νόστος, ἀτὰρ κλέος ἄφθιτον ἔσται· |
| 414 | Primary εἰ δέ κεν οἴκαδʼ ἵκωμι φίλην ἐς πατρίδα γαῖαν, |
| 415 | Primary ὤλετό μοι κλέος ἐσθλόν, ἐπὶ δηρὸν δέ μοι αἰὼν |
| 416 | Primary ἔσσεται, οὐδέ κέ μʼ ὦκα τέλος θανάτοιο κιχείη. |
| 417 | Primary καὶ δʼ ἂν τοῖς ἄλλοισιν ἐγὼ παραμυθησαίμην |
| 418 | Primary οἴκαδʼ ἀποπλείειν, ἐπεὶ οὐκέτι δήετε τέκμωρ |
| 419 | Primary Ἰλίου αἰπεινῆς· μάλα γάρ ἑθεν εὐρύοπα Ζεὺς |
| 420 | Primary χεῖρα ἑὴν ὑπερέσχε, τεθαρσήκασι δὲ λαοί. |
| 421 | Primary ἀλλʼ ὑμεῖς μὲν ἰόντες ἀριστήεσσιν Ἀχαιῶν |
| 422 | Primary ἀγγελίην ἀπόφασθε· τὸ γὰρ γέρας ἐστὶ γερόντων· |
| 423 | Primary ὄφρʼ ἄλλην φράζωνται ἐνὶ φρεσὶ μῆτιν ἀμείνω, |
| 424 | Primary ἥ κέ σφιν νῆάς τε σαῷ καὶ λαὸν Ἀχαιῶν |
| 425 | Primary νηυσὶν ἔπι γλαφυρῇς, ἐπεὶ οὔ σφισιν ἥδέ γʼ ἑτοίμη |
| 426 | Primary ἣν νῦν ἐφράσσαντο ἐμεῦ ἀπομηνίσαντος· |
| 427 | Primary Φοῖνιξ δʼ αὖθι παρʼ ἄμμι μένων κατακοιμηθήτω, |
| 428 | Primary ὄφρά μοι ἐν νήεσσι φίλην ἐς πατρίδʼ ἕπηται |
| 429 | Primary αὔριον ἢν ἐθέλῃσιν· ἀνάγκῃ δʼ οὔ τί μιν ἄξω. |
| 430 | Primary ὣς ἔφαθʼ, οἳ δʼ ἄρα πάντες ἀκὴν ἐγένοντο σιωπῇ |
| 431 | Primary μῦθον ἀγασσάμενοι· μάλα γὰρ κρατερῶς ἀπέειπεν· |
| 432 | Primary ὀψὲ δὲ δὴ μετέειπε γέρων ἱππηλάτα Φοῖνιξ |
| 433 | Primary δάκρυʼ ἀναπρήσας· περὶ γὰρ δίε νηυσὶν Ἀχαιῶν· |
| 434 | Primary εἰ μὲν δὴ νόστόν γε μετὰ φρεσὶ φαίδιμʼ Ἀχιλλεῦ |
| 435 | Primary βάλλεαι, οὐδέ τι πάμπαν ἀμύνειν νηυσὶ θοῇσι |
| 436 | Primary πῦρ ἐθέλεις ἀΐδηλον, ἐπεὶ χόλος ἔμπεσε θυμῷ, |
| 437 | Primary πῶς ἂν ἔπειτʼ ἀπὸ σεῖο φίλον τέκος αὖθι λιποίμην |
| 438 | Primary οἶος; σοὶ δέ μʼ ἔπεμπε γέρων ἱππηλάτα Πηλεὺς |
| 439 | Primary ἤματι τῷ ὅτε σʼ ἐκ Φθίης Ἀγαμέμνονι πέμπε |
| 440 | Primary νήπιον οὔ πω εἰδόθʼ ὁμοιΐου πολέμοιο |
| 441 | Primary οὐδʼ ἀγορέων, ἵνα τʼ ἄνδρες ἀριπρεπέες τελέθουσι. |
| 442 | Primary τοὔνεκά με προέηκε διδασκέμεναι τάδε πάντα, |
| 443 | Primary μύθων τε ῥητῆρʼ ἔμεναι πρηκτῆρά τε ἔργων. |
| 444 | Primary ὡς ἂν ἔπειτʼ ἀπὸ σεῖο φίλον τέκος οὐκ ἐθέλοιμι |
| 445 | Primary λείπεσθʼ, οὐδʼ εἴ κέν μοι ὑποσταίη θεὸς αὐτὸς |
| 446 | Primary γῆρας ἀποξύσας θήσειν νέον ἡβώοντα, |
| 447 | Primary οἷον ὅτε πρῶτον λίπον Ἑλλάδα καλλιγύναικα |
| 448 | Primary φεύγων νείκεα πατρὸς Ἀμύντορος Ὀρμενίδαο, |
| 449 | Primary ὅς μοι παλλακίδος περιχώσατο καλλικόμοιο, |
| 450 | Primary τὴν αὐτὸς φιλέεσκεν, ἀτιμάζεσκε δʼ ἄκοιτιν |
| 451 | Primary μητέρʼ ἐμήν· ἣ δʼ αἰὲν ἐμὲ λισσέσκετο γούνων |
| 452 | Primary παλλακίδι προμιγῆναι, ἵνʼ ἐχθήρειε γέροντα. |
| 453 | Primary τῇ πιθόμην καὶ ἔρεξα· πατὴρ δʼ ἐμὸς αὐτίκʼ ὀϊσθεὶς |
| 454 | Primary πολλὰ κατηρᾶτο, στυγερὰς δʼ ἐπεκέκλετʼ Ἐρινῦς, |
| 455 | Primary μή ποτε γούνασιν οἷσιν ἐφέσσεσθαι φίλον υἱὸν |
| 456 | Primary ἐξ ἐμέθεν γεγαῶτα· θεοὶ δʼ ἐτέλειον ἐπαρὰς |
| 457 | Primary Ζεύς τε καταχθόνιος καὶ ἐπαινὴ Περσεφόνεια. |
| 462 | Primary ἔνθʼ ἐμοὶ οὐκέτι πάμπαν ἐρητύετʼ ἐν φρεσὶ θυμὸς |
| 463 | Primary πατρὸς χωομένοιο κατὰ μέγαρα στρωφᾶσθαι. |
| 464 | Primary ἦ μὲν πολλὰ ἔται καὶ ἀνεψιοὶ ἀμφὶς ἐόντες |
| 465 | Primary αὐτοῦ λισσόμενοι κατερήτυον ἐν μεγάροισι, |
| 466 | Primary πολλὰ δὲ ἴφια μῆλα καὶ εἰλίποδας ἕλικας βοῦς |
| 467 | Primary ἔσφαζον, πολλοὶ δὲ σύες θαλέθοντες ἀλοιφῇ |
| 468 | Primary εὑόμενοι τανύοντο διὰ φλογὸς Ἡφαίστοιο, |
| 469 | Primary πολλὸν δʼ ἐκ κεράμων μέθυ πίνετο τοῖο γέροντος. |
| 470 | Primary εἰνάνυχες δέ μοι ἀμφʼ αὐτῷ παρὰ νύκτας ἴαυον· |
| 471 | Primary οἳ μὲν ἀμειβόμενοι φυλακὰς ἔχον, οὐδέ ποτʼ ἔσβη |
| 472 | Primary πῦρ, ἕτερον μὲν ὑπʼ αἰθούσῃ εὐερκέος αὐλῆς, |
| 473 | Primary ἄλλο δʼ ἐνὶ προδόμῳ, πρόσθεν θαλάμοιο θυράων. |
| 474 | Primary ἀλλʼ ὅτε δὴ δεκάτη μοι ἐπήλυθε νὺξ ἐρεβεννή, |
| 475 | Primary καὶ τότʼ ἐγὼ θαλάμοιο θύρας πυκινῶς ἀραρυίας |
| 476 | Primary ῥήξας ἐξῆλθον, καὶ ὑπέρθορον ἑρκίον αὐλῆς |
| 477 | Primary ῥεῖα, λαθὼν φύλακάς τʼ ἄνδρας δμῳάς τε γυναῖκας. |
| 478 | Primary φεῦγον ἔπειτʼ ἀπάνευθε διʼ Ἑλλάδος εὐρυχόροιο, |
| 479 | Primary Φθίην δʼ ἐξικόμην ἐριβώλακα μητέρα μήλων |
| 480 | Primary ἐς Πηλῆα ἄναχθʼ· ὃ δέ με πρόφρων ὑπέδεκτο, |
| 481 | Primary καί μʼ ἐφίλησʼ ὡς εἴ τε πατὴρ ὃν παῖδα φιλήσῃ |
| 482 | Primary μοῦνον τηλύγετον πολλοῖσιν ἐπὶ κτεάτεσσι, |
| 483 | Primary καί μʼ ἀφνειὸν ἔθηκε, πολὺν δέ μοι ὤπασε λαόν· |
| 484 | Primary ναῖον δʼ ἐσχατιὴν Φθίης Δολόπεσσιν ἀνάσσων. |
| 485 | Primary καί σε τοσοῦτον ἔθηκα θεοῖς ἐπιείκελʼ Ἀχιλλεῦ, |
| 486 | Primary ἐκ θυμοῦ φιλέων, ἐπεὶ οὐκ ἐθέλεσκες ἅμʼ ἄλλῳ |
| 487 | Primary οὔτʼ ἐς δαῖτʼ ἰέναι οὔτʼ ἐν μεγάροισι πάσασθαι, |
| 488 | Primary πρίν γʼ ὅτε δή σʼ ἐπʼ ἐμοῖσιν ἐγὼ γούνεσσι καθίσσας |
| 489 | Primary ὄψου τʼ ἄσαιμι προταμὼν καὶ οἶνον ἐπισχών. |
| 490 | Primary πολλάκι μοι κατέδευσας ἐπὶ στήθεσσι χιτῶνα |
| 491 | Primary οἴνου ἀποβλύζων ἐν νηπιέῃ ἀλεγεινῇ. |
| 492 | Primary ὣς ἐπὶ σοὶ μάλα πολλὰ πάθον καὶ πολλὰ μόγησα, |
| 493 | Primary τὰ φρονέων ὅ μοι οὔ τι θεοὶ γόνον ἐξετέλειον |
| 494 | Primary ἐξ ἐμεῦ· ἀλλὰ σὲ παῖδα θεοῖς ἐπιείκελʼ Ἀχιλλεῦ |
| 495 | Primary ποιεύμην, ἵνα μοί ποτʼ ἀεικέα λοιγὸν ἀμύνῃς. |
| 496 | Primary ἀλλʼ Ἀχιλεῦ δάμασον θυμὸν μέγαν· οὐδέ τί σε χρὴ |
| 497 | Primary νηλεὲς ἦτορ ἔχειν· στρεπτοὶ δέ τε καὶ θεοὶ αὐτοί, |
| 498 | Primary τῶν περ καὶ μείζων ἀρετὴ τιμή τε βίη τε. |
| 499 | Primary καὶ μὲν τοὺς θυέεσσι καὶ εὐχωλῇς ἀγανῇσι |
| 500 | Primary λοιβῇ τε κνίσῃ τε παρατρωπῶσʼ ἄνθρωποι |
| 501 | Primary λισσόμενοι, ὅτε κέν τις ὑπερβήῃ καὶ ἁμάρτῃ. |
| 502 | Primary καὶ γάρ τε λιταί εἰσι Διὸς κοῦραι μεγάλοιο |
| 503 | Primary χωλαί τε ῥυσαί τε παραβλῶπές τʼ ὀφθαλμώ, |
| 504 | Primary αἵ ῥά τε καὶ μετόπισθʼ ἄτης ἀλέγουσι κιοῦσαι. |
| 505 | Primary ἣ δʼ ἄτη σθεναρή τε καὶ ἀρτίπος, οὕνεκα πάσας |
| 506 | Primary πολλὸν ὑπεκπροθέει, φθάνει δέ τε πᾶσαν ἐπʼ αἶαν |
| 507 | Primary βλάπτουσʼ ἀνθρώπους· αἳ δʼ ἐξακέονται ὀπίσσω. |
| 508 | Primary ὃς μέν τʼ αἰδέσεται κούρας Διὸς ἆσσον ἰούσας, |
| 509 | Primary τὸν δὲ μέγʼ ὤνησαν καί τʼ ἔκλυον εὐχομένοιο· |
| 510 | Primary ὃς δέ κʼ ἀνήνηται καί τε στερεῶς ἀποείπῃ, |
| 511 | Primary λίσσονται δʼ ἄρα ταί γε Δία Κρονίωνα κιοῦσαι |
| 512 | Primary τῷ ἄτην ἅμʼ ἕπεσθαι, ἵνα βλαφθεὶς ἀποτίσῃ. |
| 513 | Primary ἀλλʼ Ἀχιλεῦ πόρε καὶ σὺ Διὸς κούρῃσιν ἕπεσθαι |
| 514 | Primary τιμήν, ἥ τʼ ἄλλων περ ἐπιγνάμπτει νόον ἐσθλῶν. |
| 515 | Primary εἰ μὲν γὰρ μὴ δῶρα φέροι τὰ δʼ ὄπισθʼ ὀνομάζοι |
| 516 | Primary Ἀτρεΐδης, ἀλλʼ αἰὲν ἐπιζαφελῶς χαλεπαίνοι, |
| 517 | Primary οὐκ ἂν ἔγωγέ σε μῆνιν ἀπορρίψαντα κελοίμην |
| 518 | Primary Ἀργείοισιν ἀμυνέμεναι χατέουσί περ ἔμπης· |
| 519 | Primary νῦν δʼ ἅμα τʼ αὐτίκα πολλὰ διδοῖ τὰ δʼ ὄπισθεν ὑπέστη, |
| 520 | Primary ἄνδρας δὲ λίσσεσθαι ἐπιπροέηκεν ἀρίστους |
| 521 | Primary κρινάμενος κατὰ λαὸν Ἀχαιϊκόν, οἵ τε σοὶ αὐτῷ |
| 522 | Primary φίλτατοι Ἀργείων· τῶν μὴ σύ γε μῦθον ἐλέγξῃς |
| 523 | Primary μηδὲ πόδας· πρὶν δʼ οὔ τι νεμεσσητὸν κεχολῶσθαι. |
| 524 | Primary οὕτω καὶ τῶν πρόσθεν ἐπευθόμεθα κλέα ἀνδρῶν |
| 525 | Primary ἡρώων, ὅτε κέν τινʼ ἐπιζάφελος χόλος ἵκοι· |
| 526 | Primary δωρητοί τε πέλοντο παράρρητοί τʼ ἐπέεσσι. |
| 527 | Primary μέμνημαι τόδε ἔργον ἐγὼ πάλαι οὔ τι νέον γε |
| 528 | Primary ὡς ἦν· ἐν δʼ ὑμῖν ἐρέω πάντεσσι φίλοισι. |
| 529 | Primary Κουρῆτές τʼ ἐμάχοντο καὶ Αἰτωλοὶ μενεχάρμαι |
| 530 | Primary ἀμφὶ πόλιν Καλυδῶνα καὶ ἀλλήλους ἐνάριζον, |
| 531 | Primary Αἰτωλοὶ μὲν ἀμυνόμενοι Καλυδῶνος ἐραννῆς, |
| 532 | Primary Κουρῆτες δὲ διαπραθέειν μεμαῶτες Ἄρηϊ. |
| 533 | Primary καὶ γὰρ τοῖσι κακὸν χρυσόθρονος Ἄρτεμις ὦρσε |
| 534 | Primary χωσαμένη ὅ οἱ οὔ τι θαλύσια γουνῷ ἀλωῆς |
| 535 | Primary Οἰνεὺς ῥέξʼ· ἄλλοι δὲ θεοὶ δαίνυνθʼ ἑκατόμβας, |
| 536 | Primary οἴῃ δʼ οὐκ ἔρρεξε Διὸς κούρῃ μεγάλοιο. |
| 537 | Primary ἢ λάθετʼ ἢ οὐκ ἐνόησεν· ἀάσατο δὲ μέγα θυμῷ. |
| 538 | Primary ἣ δὲ χολωσαμένη δῖον γένος ἰοχέαιρα |
| 539 | Primary ὦρσεν ἔπι χλούνην σῦν ἄγριον ἀργιόδοντα, |
| 540 | Primary ὃς κακὰ πόλλʼ ἕρδεσκεν ἔθων Οἰνῆος ἀλωήν· |
| 541 | Primary πολλὰ δʼ ὅ γε προθέλυμνα χαμαὶ βάλε δένδρεα μακρὰ |
| 542 | Primary αὐτῇσιν ῥίζῃσι καὶ αὐτοῖς ἄνθεσι μήλων. |
| 543 | Primary τὸν δʼ υἱὸς Οἰνῆος ἀπέκτεινεν Μελέαγρος |
| 544 | Primary πολλέων ἐκ πολίων θηρήτορας ἄνδρας ἀγείρας |
| 545 | Primary καὶ κύνας· οὐ μὲν γάρ κε δάμη παύροισι βροτοῖσι· |
| 546 | Primary τόσσος ἔην, πολλοὺς δὲ πυρῆς ἐπέβησʼ ἀλεγεινῆς. |
| 547 | Primary ἣ δʼ ἀμφʼ αὐτῷ θῆκε πολὺν κέλαδον καὶ ἀϋτὴν |
| 548 | Primary ἀμφὶ συὸς κεφαλῇ καὶ δέρματι λαχνήεντι, |
| 549 | Primary Κουρήτων τε μεσηγὺ καὶ Αἰτωλῶν μεγαθύμων. |
| 550 | Primary ὄφρα μὲν οὖν Μελέαγρος ἄρηι φίλος πολέμιζε, |
| 551 | Primary τόφρα δὲ Κουρήτεσσι κακῶς ἦν, οὐδὲ δύναντο |
| 552 | Primary τείχεος ἔκτοσθεν μίμνειν πολέες περ ἐόντες· |
| 553 | Primary ἀλλʼ ὅτε δὴ Μελέαγρον ἔδυ χόλος, ὅς τε καὶ ἄλλων |
| 554 | Primary οἰδάνει ἐν στήθεσσι νόον πύκα περ φρονεόντων, |
| 555 | Primary ἤτοι ὃ μητρὶ φίλῃ Ἀλθαίῃ χωόμενος κῆρ |
| 556 | Primary κεῖτο παρὰ μνηστῇ ἀλόχῳ καλῇ Κλεοπάτρῃ |
| 557 | Primary κούρῃ Μαρπήσσης καλλισφύρου Εὐηνίνης |
| 558 | Primary Ἴδεώ θʼ, ὃς κάρτιστος ἐπιχθονίων γένετʼ ἀνδρῶν |
| 559 | Primary τῶν τότε· καί ῥα ἄνακτος ἐναντίον εἵλετο τόξον |
| 560 | Primary Φοίβου Ἀπόλλωνος καλλισφύρου εἵνεκα νύμφης, |
| 561 | Primary τὴν δὲ τότʼ ἐν μεγάροισι πατὴρ καὶ πότνια μήτηρ |
| 562 | Primary Ἀλκυόνην καλέεσκον ἐπώνυμον, οὕνεκʼ ἄρʼ αὐτῆς |
| 563 | Primary μήτηρ ἀλκυόνος πολυπενθέος οἶτον ἔχουσα |
| 564 | Primary κλαῖεν ὅ μιν ἑκάεργος ἀνήρπασε Φοῖβος Ἀπόλλων· |
| 565 | Primary τῇ ὅ γε παρκατέλεκτο χόλον θυμαλγέα πέσσων |
| 566 | Primary ἐξ ἀρέων μητρὸς κεχολωμένος, ἥ ῥα θεοῖσι |
| 567 | Primary πόλλʼ ἀχέουσʼ ἠρᾶτο κασιγνήτοιο φόνοιο, |
| 568 | Primary πολλὰ δὲ καὶ γαῖαν πολυφόρβην χερσὶν ἀλοία |
| 569 | Primary κικλήσκουσʼ Ἀΐδην καὶ ἐπαινὴν Περσεφόνειαν |
| 570 | Primary πρόχνυ καθεζομένη, δεύοντο δὲ δάκρυσι κόλποι, |
| 571 | Primary παιδὶ δόμεν θάνατον· τῆς δʼ ἠεροφοῖτις Ἐρινὺς |
| 572 | Primary ἔκλυεν ἐξ Ἐρέβεσφιν ἀμείλιχον ἦτορ ἔχουσα. |
| 573 | Primary τῶν δὲ τάχʼ ἀμφὶ πύλας ὅμαδος καὶ δοῦπος ὀρώρει |
| 574 | Primary πύργων βαλλομένων· τὸν δὲ λίσσοντο γέροντες |
| 575 | Primary Αἰτωλῶν, πέμπον δὲ θεῶν ἱερῆας ἀρίστους, |
| 576 | Primary ἐξελθεῖν καὶ ἀμῦναι ὑποσχόμενοι μέγα δῶρον· |
| 577 | Primary ὁππόθι πιότατον πεδίον Καλυδῶνος ἐραννῆς, |
| 578 | Primary ἔνθά μιν ἤνωγον τέμενος περικαλλὲς ἑλέσθαι |
| 579 | Primary πεντηκοντόγυον, τὸ μὲν ἥμισυ οἰνοπέδοιο, |
| 580 | Primary ἥμισυ δὲ ψιλὴν ἄροσιν πεδίοιο ταμέσθαι. |
| 581 | Primary πολλὰ δέ μιν λιτάνευε γέρων ἱππηλάτα Οἰνεὺς |
| 582 | Primary οὐδοῦ ἐπεμβεβαὼς ὑψηρεφέος θαλάμοιο |
| 583 | Primary σείων κολλητὰς σανίδας γουνούμενος υἱόν· |
| 584 | Primary πολλὰ δὲ τόν γε κασίγνηται καὶ πότνια μήτηρ |
| 585 | Primary ἐλλίσσονθʼ· ὃ δὲ μᾶλλον ἀναίνετο· πολλὰ δʼ ἑταῖροι, |
| 586 | Primary οἵ οἱ κεδνότατοι καὶ φίλτατοι ἦσαν ἁπάντων· |
| 587 | Primary ἀλλʼ οὐδʼ ὧς τοῦ θυμὸν ἐνὶ στήθεσσιν ἔπειθον, |
| 588 | Primary πρίν γʼ ὅτε δὴ θάλαμος πύκʼ ἐβάλλετο, τοὶ δʼ ἐπὶ πύργων |
| 589 | Primary βαῖνον Κουρῆτες καὶ ἐνέπρηθον μέγα ἄστυ. |
| 590 | Primary καὶ τότε δὴ Μελέαγρον ἐΰζωνος παράκοιτις |
| 591 | Primary λίσσετʼ ὀδυρομένη, καί οἱ κατέλεξεν ἅπαντα |
| 592 | Primary κήδεʼ, ὅσʼ ἀνθρώποισι πέλει τῶν ἄστυ ἁλώῃ· |
| 593 | Primary ἄνδρας μὲν κτείνουσι, πόλιν δέ τε πῦρ ἀμαθύνει, |
| 594 | Primary τέκνα δέ τʼ ἄλλοι ἄγουσι βαθυζώνους τε γυναῖκας. |
| 595 | Primary τοῦ δʼ ὠρίνετο θυμὸς ἀκούοντος κακὰ ἔργα, |
| 596 | Primary βῆ δʼ ἰέναι, χροῒ δʼ ἔντεʼ ἐδύσετο παμφανόωντα. |
| 597 | Primary ὣς ὃ μὲν Αἰτωλοῖσιν ἀπήμυνεν κακὸν ἦμαρ |
| 598 | Primary εἴξας ᾧ θυμῷ· τῷ δʼ οὐκέτι δῶρα τέλεσσαν |
| 599 | Primary πολλά τε καὶ χαρίεντα, κακὸν δʼ ἤμυνε καὶ αὔτως. |
| 600 | Primary ἀλλὰ σὺ μή μοι ταῦτα νόει φρεσί, μὴ δέ σε δαίμων |
| 601 | Primary ἐνταῦθα τρέψειε φίλος· κάκιον δέ κεν εἴη |
| 602 | Primary νηυσὶν καιομένῃσιν ἀμυνέμεν· ἀλλʼ ἐπὶ δώρων |
| 603 | Primary ἔρχεο· ἶσον γάρ σε θεῷ τίσουσιν Ἀχαιοί. |
| 604 | Primary εἰ δέ κʼ ἄτερ δώρων πόλεμον φθισήνορα δύῃς |
| 605 | Primary οὐκέθʼ ὁμῶς τιμῆς ἔσεαι πόλεμόν περ ἀλαλκών. |
| 606 | Primary τὸν δʼ ἀπαμειβόμενος προσέφη πόδας ὠκὺς Ἀχιλλεύς· |
| 607 | Primary Φοῖνιξ ἄττα γεραιὲ διοτρεφὲς οὔ τί με ταύτης |
| 608 | Primary χρεὼ τιμῆς· φρονέω δὲ τετιμῆσθαι Διὸς αἴσῃ, |
| 609 | Primary ἥ μʼ ἕξει παρὰ νηυσὶ κορωνίσιν εἰς ὅ κʼ ἀϋτμὴ |
| 610 | Primary ἐν στήθεσσι μένῃ καί μοι φίλα γούνατʼ ὀρώρῃ. |
| 611 | Primary ἄλλο δέ τοι ἐρέω, σὺ δʼ ἐνὶ φρεσὶ βάλλεο σῇσι· |
| 612 | Primary μή μοι σύγχει θυμὸν ὀδυρόμενος καὶ ἀχεύων |
| 613 | Primary Ἀτρεΐδῃ ἥρωϊ φέρων χάριν· οὐδέ τί σε χρὴ |
| 614 | Primary τὸν φιλέειν, ἵνα μή μοι ἀπέχθηαι φιλέοντι. |
| 615 | Primary καλόν τοι σὺν ἐμοὶ τὸν κήδειν ὅς κʼ ἐμὲ κήδῃ· |
| 616 | Primary ἶσον ἐμοὶ βασίλευε καὶ ἥμισυ μείρεο τιμῆς. |
| 617 | Primary οὗτοι δʼ ἀγγελέουσι, σὺ δʼ αὐτόθι λέξεο μίμνων |
| 618 | Primary εὐνῇ ἔνι μαλακῇ· ἅμα δʼ ἠοῖ φαινομένηφι |
| 619 | Primary φρασσόμεθʼ ἤ κε νεώμεθʼ ἐφʼ ἡμέτερʼ ἦ κε μένωμεν. |
| 620 | Primary ἦ καὶ Πατρόκλῳ ὅ γʼ ἐπʼ ὀφρύσι νεῦσε σιωπῇ |
| 621 | Primary Φοίνικι στορέσαι πυκινὸν λέχος, ὄφρα τάχιστα |
| 622 | Primary ἐκ κλισίης νόστοιο μεδοίατο· τοῖσι δʼ ἄρʼ Αἴας |
| 623 | Primary ἀντίθεος Τελαμωνιάδης μετὰ μῦθον ἔειπε· |
| 624 | Primary διογενὲς Λαερτιάδη πολυμήχανʼ Ὀδυσσεῦ |
| 625 | Primary ἴομεν· οὐ γάρ μοι δοκέει μύθοιο τελευτὴ |
| 626 | Primary τῇδέ γʼ ὁδῷ κρανέεσθαι· ἀπαγγεῖλαι δὲ τάχιστα |
| 627 | Primary χρὴ μῦθον Δαναοῖσι καὶ οὐκ ἀγαθόν περ ἐόντα |
| 628 | Primary οἵ που νῦν ἕαται ποτιδέγμενοι. αὐτάρ Ἀχιλλεὺς |
| 629 | Primary ἄγριον ἐν στήθεσσι θέτο μεγαλήτορα θυμὸν |
| 630 | Primary σχέτλιος, οὐδὲ μετατρέπεται φιλότητος ἑταίρων |
| 631 | Primary τῆς ᾗ μιν παρὰ νηυσὶν ἐτίομεν ἔξοχον ἄλλων |
| 632 | Primary νηλής· καὶ μέν τίς τε κασιγνήτοιο φονῆος |
| 633 | Primary ποινὴν ἢ οὗ παιδὸς ἐδέξατο τεθνηῶτος· |
| 634 | Primary καί ῥʼ ὃ μὲν ἐν δήμῳ μένει αὐτοῦ πόλλʼ ἀποτίσας, |
| 635 | Primary τοῦ δέ τʼ ἐρητύεται κραδίη καὶ θυμὸς ἀγήνωρ |
| 636 | Primary ποινὴν δεξαμένῳ· σοὶ δʼ ἄληκτόν τε κακόν τε |
| 637 | Primary θυμὸν ἐνὶ στήθεσσι θεοὶ θέσαν εἵνεκα κούρης |
| 638 | Primary οἴης· νῦν δέ τοι ἑπτὰ παρίσχομεν ἔξοχʼ ἀρίστας, |
| 639 | Primary ἄλλά τε πόλλʼ ἐπὶ τῇσι· σὺ δʼ ἵλαον ἔνθεο θυμόν, |
| 640 | Primary αἴδεσσαι δὲ μέλαθρον· ὑπωρόφιοι δέ τοί εἰμεν |
| 641 | Primary πληθύος ἐκ Δαναῶν, μέμαμεν δέ τοι ἔξοχον ἄλλων |
| 642 | Primary κήδιστοί τʼ ἔμεναι καὶ φίλτατοι ὅσσοι Ἀχαιοί. |
| 643 | Primary τὸν δʼ ἀπαμειβόμενος προσέφη πόδας ὠκὺς Ἀχιλλεύς· |
| 644 | Primary Αἶαν διογενὲς Τελαμώνιε κοίρανε λαῶν |
| 645 | Primary πάντά τί μοι κατὰ θυμὸν ἐείσαο μυθήσασθαι· |
| 646 | Primary ἀλλά μοι οἰδάνεται κραδίη χόλῳ ὁππότε κείνων |
| 647 | Primary μνήσομαι ὥς μʼ ἀσύφηλον ἐν Ἀργείοισιν ἔρεξεν |
| 648 | Primary Ἀτρεΐδης ὡς εἴ τινʼ ἀτίμητον μετανάστην. |
| 649 | Primary ἀλλʼ ὑμεῖς ἔρχεσθε καὶ ἀγγελίην ἀπόφασθε· |
| 650 | Primary οὐ γὰρ πρὶν πολέμοιο μεδήσομαι αἱματόεντος |
| 651 | Primary πρίν γʼ υἱὸν Πριάμοιο δαΐφρονος Ἕκτορα δῖον |
| 652 | Primary Μυρμιδόνων ἐπί τε κλισίας καὶ νῆας ἱκέσθαι |
| 653 | Primary κτείνοντʼ Ἀργείους, κατά τε σμῦξαι πυρὶ νῆας. |
| 654 | Primary ἀμφὶ δέ τοι τῇ ἐμῇ κλισίῃ καὶ νηῒ μελαίνῃ |
| 655 | Primary Ἕκτορα καὶ μεμαῶτα μάχης σχήσεσθαι ὀΐω. |
| 656 | Primary ὣς ἔφαθʼ, οἳ δὲ ἕκαστος ἑλὼν δέπας ἀμφικύπελλον |
| 657 | Primary σπείσαντες παρὰ νῆας ἴσαν πάλιν· ἦρχε δʼ Ὀδυσσεύς. |
| 658 | Primary Πάτροκλος δʼ ἑτάροισιν ἰδὲ δμωῇσι κέλευσε |
| 659 | Primary Φοίνικι στορέσαι πυκινὸν λέχος ὅττι τάχιστα. |
| 660 | Primary αἳ δʼ ἐπιπειθόμεναι στόρεσαν λέχος ὡς ἐκέλευσε |
| 661 | Primary κώεά τε ῥῆγός τε λίνοιό τε λεπτὸν ἄωτον. |
| 662 | Primary ἔνθʼ ὃ γέρων κατέλεκτο καὶ ἠῶ δῖαν ἔμιμνεν. |
| 663 | Primary αὐτὰρ Ἀχιλλεὺς εὗδε μυχῷ κλισίης εὐπήκτου· |
| 664 | Primary τῷ δʼ ἄρα παρκατέλεκτο γυνή, τὴν Λεσβόθεν ἦγε, |
| 665 | Primary Φόρβαντος θυγάτηρ Διομήδη καλλιπάρῃος. |
| 666 | Primary Πάτροκλος δʼ ἑτέρωθεν ἐλέξατο· πὰρ δʼ ἄρα καὶ τῷ |
| 667 | Primary Ἶφις ἐΰζωνος, τήν οἱ πόρε δῖος Ἀχιλλεὺς |
| 668 | Primary Σκῦρον ἑλὼν αἰπεῖαν Ἐνυῆος πτολίεθρον. |
| 669 | Primary οἳ δʼ ὅτε δὴ κλισίῃσιν ἐν Ἀτρεΐδαο γένοντο. |
| 670 | Primary τοὺς μὲν ἄρα χρυσέοισι κυπέλλοις υἷες Ἀχαιῶν |
| 671 | Primary δειδέχατʼ ἄλλοθεν ἄλλος ἀνασταδόν, ἔκ τʼ ἐρέοντο· |
| 672 | Primary πρῶτος δʼ ἐξερέεινεν ἄναξ ἀνδρῶν Ἀγαμέμνων· |
| 673 | Primary εἴπʼ ἄγε μʼ ὦ πολύαινʼ Ὀδυσεῦ μέγα κῦδος Ἀχαιῶν |
| 674 | Primary ἤ ῥʼ ἐθέλει νήεσσιν ἀλεξέμεναι δήϊον πῦρ, |
| 675 | Primary ἦ ἀπέειπε, χόλος δʼ ἔτʼ ἔχει μεγαλήτορα θυμόν; |
| 676 | Primary τὸν δʼ αὖτε προσέειπε πολύτλας δῖος Ὀδυσσεύς· |
| 677 | Primary Ἀτρεΐδη κύδιστε ἄναξ ἀνδρῶν Ἀγάμεμνον |
| 678 | Primary κεῖνός γʼ οὐκ ἐθέλει σβέσσαι χόλον, ἀλλʼ ἔτι μᾶλλον |
| 679 | Primary πιμπλάνεται μένεος, σὲ δʼ ἀναίνεται ἠδὲ σὰ δῶρα. |
| 680 | Primary αὐτόν σε φράζεσθαι ἐν Ἀργείοισιν ἄνωγεν |
| 681 | Primary ὅππως κεν νῆάς τε σαῷς καὶ λαὸν Ἀχαιῶν· |
| 682 | Primary αὐτὸς δʼ ἠπείλησεν ἅμʼ ἠοῖ φαινομένηφι |
| 683 | Primary νῆας ἐϋσσέλμους ἅλαδʼ ἑλκέμεν ἀμφιελίσσας. |
| 684 | Primary καὶ δʼ ἂν τοῖς ἄλλοισιν ἔφη παραμυθήσασθαι |
| 685 | Primary οἴκαδʼ ἀποπλείειν, ἐπεὶ οὐκέτι δήετε τέκμωρ |
| 686 | Primary Ἰλίου αἰπεινῆς· μάλα γάρ ἑθεν εὐρύοπα Ζεὺς |
| 687 | Primary χεῖρα ἑὴν ὑπερέσχε, τεθαρσήκασι δὲ λαοί. |
| 688 | Primary ὣς ἔφατʼ· εἰσὶ καὶ οἵδε τάδʼ εἰπέμεν, οἵ μοι ἕποντο, |
| 689 | Primary Αἴας καὶ κήρυκε δύω πεπνυμένω ἄμφω. |
| 690 | Primary Φοῖνιξ δʼ αὖθʼ ὃ γέρων κατελέξατο, ὡς γὰρ ἀνώγει, |
| 691 | Primary ὄφρά οἱ ἐν νήεσσι φίλην ἐς πατρίδʼ ἕπηται |
| 692 | Primary αὔριον, ἢν ἐθέλῃσιν· ἀνάγκῃ δʼ οὔ τί μιν ἄξει. |
| 693 | Primary ὣς ἔφαθʼ, οἳ δʼ ἄρα πάντες ἀκὴν ἐγένοντο σιωπῇ |
| 694 | Primary μῦθον ἀγασσάμενοι· μάλα γὰρ κρατερῶς ἀγόρευσε. |
| 695 | Primary δὴν δʼ ἄνεῳ ἦσαν τετιηότες υἷες Ἀχαιῶν· |
| 696 | Primary ὀψὲ δὲ δὴ μετέειπε βοὴν ἀγαθὸς Διομήδης· |
| 697 | Primary Ἀτρεΐδη κύδιστε ἄναξ ἀνδρῶν Ἀγάμεμνον |
| 698 | Primary μὴ ὄφελες λίσσεσθαι ἀμύμονα Πηλεΐωνα |
| 699 | Primary μυρία δῶρα διδούς· ὃ δʼ ἀγήνωρ ἐστὶ καὶ ἄλλως· |
| 700 | Primary νῦν αὖ μιν πολὺ μᾶλλον ἀγηνορίῃσιν ἐνῆκας. |
| 701 | Primary ἀλλʼ ἤτοι κεῖνον μὲν ἐάσομεν ἤ κεν ἴῃσιν |
| 702 | Primary ἦ κε μένῃ· τότε δʼ αὖτε μαχήσεται ὁππότε κέν μιν |
| 703 | Primary θυμὸς ἐνὶ στήθεσσιν ἀνώγῃ καὶ θεὸς ὄρσῃ. |
| 704 | Primary ἀλλʼ ἄγεθʼ ὡς ἂν ἐγὼ εἴπω πειθώμεθα πάντες· |
| 705 | Primary νῦν μὲν κοιμήσασθε τεταρπόμενοι φίλον ἦτορ |
| 706 | Primary σίτου καὶ οἴνοιο· τὸ γὰρ μένος ἐστὶ καὶ ἀλκή· |
| 707 | Primary αὐτὰρ ἐπεί κε φανῇ καλὴ ῥοδοδάκτυλος Ἠώς, |
| 708 | Primary καρπαλίμως πρὸ νεῶν ἐχέμεν λαόν τε καὶ ἵππους |
| 709 | Primary ὀτρύνων, καὶ δʼ αὐτὸς ἐνὶ πρώτοισι μάχεσθαι. |
| 710 | Primary ὣς ἔφαθʼ, οἳ δʼ ἄρα πάντες ἐπῄνησαν βασιλῆες |
| 711 | Primary μῦθον ἀγασσάμενοι Διομήδεος ἱπποδάμοιο. |
| 712 | Primary καὶ τότε δὴ σπείσαντες ἔβαν κλισίην δὲ ἕκαστος, |
| 713 | Primary ἔνθα δὲ κοιμήσαντο καὶ ὕπνου δῶρον ἕλοντο. |