Reader
Reader | Metamorphoses, Book 5
Metamorphoses
Ovid
Text
Position
Line 1 of 678
Waypoints
| Line Ref | Hugo Magnus | Latin |
|---|---|
| 1 | Primary Dumque ea Cephenum medio Danaeius heros |
| 2 | Primary agmine commemorat, fremida regalia turba |
| 3 | Primary atria complentur: nec coniugialia festa |
| 4 | Primary qui canat est clamor, sed qui fera nuntiet arma. |
| 5 | Primary Inque repentinos convivia versa tumultus |
| 6 | Primary adsimilare freto possis, quod saeva quietum |
| 7 | Primary ventorum rabies motis exasperat undis. |
| 8 | Primary Primus in his Phineus, belli temerarius auctor, |
| 9 | Primary fraxineam quatiens aeratae cuspidis hastam, |
| 10 | Primary “en” ait, “en adsum praereptae coniugis ultor, |
| 11 | Primary nec mihi te pennae, nec falsum versus in aurum |
| 12 | Primary Iuppiter eripiet.” Conanti mittere Cepheus |
| 13 | Primary “quid facis?” exclamat, “quae te, germane, furentem |
| 14 | Primary mens agit in facinus? meritisne haec gratia tantis |
| 15 | Primary redditur? hac vitam servatae dote rependis? |
| 16 | Primary Quam tibi non Perseus, verum si quaeris, ademit, |
| 17 | Primary sed grave Nereidum numen, sed corniger Ammon, |
| 18 | Primary sed quae visceribus veniebat belua ponti |
| 19 | Primary exsaturanda meis. Illo tibi tempore rapta est, |
| 20 | Primary quo peritura fuit: nisi si crudelis id ipsum |
| 21 | Primary exigis, ut pereat, luctuque levabere nostro. |
| 22 | Primary Scilicet haud satis est, quod te spectante revincta est |
| 23 | Primary et nullam quod opem patruus sponsusve tulisti: |
| 24 | Primary insuper, a quoquam quod sit servata, dolebis |
| 25 | Primary praemiaque eripies? Quae si tibi magna videntur, |
| 26 | Primary ex illis scopulis, ubi erant adfixa, petisses. |
| 27 | Primary Nunc sine, qui petiit, per quem haec non orba senectus, |
| 28 | Primary ferre quod et meritis et voce est pactus, eumque |
| 29 | Primary non tibi, sed certae praelatum intellege morti!” |
| 30 | Primary Ille nihil contra: sed et hunc et Persea vultu |
| 31 | Primary alterno spectans petat hunc ignorat, an illum, |
| 32 | Primary cunctatusque brevi contortam viribus hastam, |
| 33 | Primary quantas ira dabat, nequiquam in Persea misit. |
| 34 | Primary Ut stetit illa toro, stratis tunc denique Perseus |
| 35 | Primary exsiluit; teloque ferox inimica remisso |
| 36 | Primary pectora rupisset, nisi post altaria Phineus |
| 37 | Primary isset: et (indignum!) scelerato profuit ara. |
| 38 | Primary Fronte tamen Rhoeti non inrita cuspis adhaesit. |
| 39 | Primary Qui postquam cecidit ferrumque ex osse revulsum est, |
| 40 | Primary calcitrat et positas adspergit sanguine mensas. |
| 41 | Primary Tum vero indomitas ardescit vulgus in iras, |
| 42 | Primary telaque coniciunt, et sunt, qui Cephea dicunt |
| 43 | Primary cum genero debere mori. Sed limine tecti |
| 44 | Primary exierat Cepheus, testatus iusque fidemque |
| 45 | Primary hospitiique deos, ea se prohibente moveri. |
| 46 | Primary Bellica Pallas adest et protegit aegide fratrem |
| 47 | Primary datque animos. Erat Indus Athis, quem flumine Gange |
| 48 | Primary edita Limnaee vitreis peperisse sub undis |
| 49 | Primary creditur, egregius forma, quam divite cultu |
| 50 | Primary augebat, bis adhuc octonis integer annis, |
| 51 | Primary indutus chlamydem Tyriam, quam limbus obibat |
| 52 | Primary aureus; ornabant aurata monilia collum |
| 53 | Primary et madidos murra curvum crinale capillos. |
| 54 | Primary Ille quidem iaculo quamvis distantia misso |
| 55 | Primary figere doctus erat, sed tendere doctior arcus. |
| 56 | Primary Tunc quoque lenta manu flectentem cornua Perseus |
| 57 | Primary stipite, qui media positus fumabat in ara, |
| 58 | Primary perculit et fractis confudit in ossibus ora. |
| 59 | Primary Hunc ubi laudatos iactantem in sanguine vultus |
| 60 | Primary Assyrius vidit Lycabas, iunctissimus illi |
| 61 | Primary et comes et veri non dissimulator amoris, |
| 62 | Primary postquam exhalantem sub acerbo vulnere vitam |
| 63 | Primary deploravit Athin, quos ille tetenderat arcus |
| 64 | Primary arripit et “mecum tibi sint certamina” dixit: |
| 65 | Primary “nec longum pueri fato laetabere, quo plus |
| 66 | Primary invidiae, quam laudis habes.” Haec omnia nondum |
| 67 | Primary dixerat, emicuit nervo penetrabile telum |
| 68 | Primary vitatumque tamen sinuosa veste pependit. |
| 69 | Primary Vertit in hunc harpen spectatam caede Medusae |
| 70 | Primary Acrisioniades adigitque in pectus: at ille |
| 71 | Primary iam moriens, oculis sub nocte natantibus atra |
| 72 | Primary circumspexit Athin seque acclinavit ad illum |
| 73 | Primary et tulit ad manes iunctae solacia mortis. |
| 74 | Primary Ecce Syenites, genitus Metione, Phorbas |
| 75 | Primary et Libys Amphimedon, avidi committere pugnam, |
| 76 | Primary sanguine, quo late tellus madefacta tepebat, |
| 77 | Primary conciderant lapsi: surgentibus obstitit ensis, |
| 78 | Primary alterius costis, iugulo Phorbantis adactus. |
| 79 | Primary At non Actoriden Erytum, cui lata bipennis |
| 80 | Primary telum erat, hamato Perseus petit ense, sed altis |
| 81 | Primary exstantem signis multaeque in pondere massae |
| 82 | Primary ingentem manibus tollit cratera duabus |
| 83 | Primary infligitque viro; rutilum vomit ille cruorem |
| 84 | Primary et resupinus humum moribundo vertice pulsat. |
| 85 | Primary Inde Semiramio Polydegmona sanguine cretum |
| 86 | Primary Caucasiumque Abarin Sperchionidenque Lycetum |
| 87 | Primary intonsumque comas Helicen Phlegyanque Clytumque |
| 88 | Primary sternit et exstructos morientum calcat acervos. |
| 89 | Primary Nec Phineus ausus concurrere comminus hosti, |
| 90 | Primary intorquet iaculum: quod detulit error in Idan, |
| 91 | Primary expertem frustra belli et neutra arma secutum. |
| 92 | Primary Ille tuens oculis inmitem Phinea torvis |
| 93 | Primary “quandoquidem in partes” ait “abstrahor, accipe, Phineu, |
| 94 | Primary quem fecisti hostem pensaque hoc vulnere vulnus”; |
| 95 | Primary iamque remissurus tractum de vulnere telum |
| 96 | Primary sanguine defectos cecidit conlapsus in artus. |
| 97 | Primary Hic quoque Cephenum post regem primus Hodites |
| 98 | Primary ense iacet Clymeni; Prothoenora percutit Hypseus, |
| 99 | Primary Hypsea Lyncides. Fuit et grandaevus in illis |
| 100 | Primary Emathion, aequi cultor timidusque deorum; |
| 101 | Primary qui, quoniam prohibent anni bellare, loquendo |
| 102 | Primary pugnat et incessit scelerataque devovet arma. |
| 103 | Primary Huic Chromis amplexo tremulis altaria palmis |
| 104 | Primary decutit ense caput; quod protinus incidit arae |
| 105 | Primary atque ibi semianimi verba exsecrantia lingua |
| 106 | Primary edidit, et medios animam exspiravit in ignes. |
| 107 | Primary Hinc gemini fratres Broteasque et caestibus Ammon |
| 108 | Primary invicti, vinci si possent caestibus enses, |
| 109 | Primary Phinea cecidere manu, Cererisque sacerdos |
| 110 | Primary Ampycus, albenti velatus tempora vitta. |
| 111 | Primary Tu quoque, Lampetide, non hos adhibendus ad usus, |
| 112 | Primary sed qui, pacis opus, citharam cum voce moveres, |
| 113 | Primary iussus eras celebrare dapes festumque canendo. |
| 114 | Primary Quem procul adstantem plectrumque imbelle tenentem |
| 115 | Primary Pettalus inridens “Stygiis cane cetera” dixit |
| 116 | Primary “manibus” et laevo mucronem tempore fixit. |
| 117 | Primary Concidit et digitis morientibus ille retemptat |
| 118 | Primary fila lyrae, casuque fuit miserabile carmen. |
| 119 | Primary Nec sinit hunc impune ferox cecidisse Lycormas |
| 120 | Primary raptaque de dextro robusta repagula posti |
| 121 | Primary ossibus inlisit mediae cervicis: at ille |
| 122 | Primary procubuit terrae mactati more iuvenci. |
| 123 | Primary Demere temptabat laevi quoque robora postis |
| 124 | Primary Cinyphius Pelates: temptanti dextera fixa est |
| 125 | Primary cuspide Marmaridae Corythi lignoque cohaesit. |
| 126 | Primary Haerenti latus hausit Abas: nec corruit ille, |
| 127 | Primary sed retinente manum moriens e poste pependit. |
| 128 | Primary Sternitur et Menaleus, Perseia castra secutus, |
| 129 | Primary et Nasamoniaci Dorylas ditissimus agri, |
| 130 | Primary dives agri Dorylas, quo non possederat alter |
| 131 | Primary latius aut totidem tollebat turis acervos. |
| 132 | Primary Huius in obliquo missum stetit inguine ferrum: |
| 133 | Primary letifer ille locus. Quem postquam vulneris auctor |
| 134 | Primary singultantem animam et versantem lumina vidit |
| 135 | Primary Bactrius Halcyoneus “hoc, quod premis” inquit, “habeto |
| 136 | Primary de tot agris terrae” corpusque exsangue reliquit. |
| 137 | Primary Torquet in hunc hastam calido de vulnere raptam |
| 138 | Primary ultor Abantiades; media quae nare recepta |
| 139 | Primary cervice exacta est in partesque eminet ambas. |
| 140 | Primary Dumque manum Fortuna iuvat, Clytiumque Claninque, |
| 141 | Primary matre satos una, diverso vulnere fudit: |
| 142 | Primary nam Clytii per utrumque gravis librata lacerto |
| 143 | Primary fraxinus acta femur, iaculum Clanis ore momordit. |
| 144 | Primary Occidit et Celadon Mendesius, occidit Astreus, |
| 145 | Primary matre Palaestina, dubio genitore creatus, |
| 146 | Primary Aethionque sagax quondam ventura videre |
| 147 | Primary (tunc ave deceptus falsa), regisque Thoactes |
| 148 | Primary armiger et caeso genitore infamis Agyrtes. |
| 149 | Primary Plus tamen exhausto superest: namque omnibus unum |
| 150 | Primary opprimere est animus, coniurata undique pugnant |
| 151 | Primary agmina pro causa meritum impugnante fidemque: |
| 152 | Primary hac pro parte socer frustra pius et nova coniunx |
| 153 | Primary cum genetrice favent ululatuque atria complent. |
| 154 | Primary Sed sonus armorum superat gemitusque cadentum, |
| 155 | Primary pollutosque semel multo Bellona penates |
| 156 | Primary sanguine perfundit renovataque proelia miscet. |
| 157 | Primary Circueunt unum Phineus et mille secuti |
| 158 | Primary Phinea: tela volant hiberna grandine plura |
| 159 | Primary praeter utrumque latus praeterque et lumen et aures. |
| 160 | Primary Applicat hic umeros ad magnae saxa columnae, |
| 161 | Primary tutaque terga gerens adversaque in agmina versus |
| 162 | Primary sustinet instantes. Instabat parte sinistra |
| 163 | Primary Chaonius Molpeus, dextra Nabataeus Echemmon. |
| 164 | Primary Tigris ut auditis diversa valle duorum |
| 165 | Primary exstimulata fame mugitibus armentorum |
| 166 | Primary nescit, utro potius ruat, et ruere ardet utroque, |
| 167 | Primary sic dubius Perseus, dextra laevane feratur, |
| 168 | Primary Molpea traiecti submovit vulnere cruris, |
| 169 | Primary contentusque fuga est: neque enim dat tempus Echemmon, |
| 170 | Primary sed furit et, cupiens saltu dare vulnera collo, |
| 171 | Primary non circumspectis exactum viribus ensem |
| 172 | Primary fregit, et extrema percussae parte columnae |
| 173 | Primary lammina dissiluit dominique in gutture fixa est. |
| 174 | Primary Non tamen ad letum causas satis illa valentes |
| 175 | Primary plaga dedit: trepidum Perseus et inermia frustra |
| 176 | Primary bracchia tendentem Cyllenide confodit harpe. |
| 177 | Primary Verum ubi virtutem turbae succumbere vidit, |
| 178 | Primary “auxilium” Perseus “quoniam sic cogitis ipsi” |
| 179 | Primary dixit “ab hoste petam. Vultus avertite vestros, |
| 180 | Primary siquis amicus adest!” et Gorgonis extulit ora. |
| 181 | Primary “Quaere alium, tua quem moveant miracula” dixit |
| 182 | Primary Thescelus; utque manu iaculum fatale parabat |
| 183 | Primary mittere, in hoc haesit signum de marmore gestu. |
| 184 | Primary Proximus huic Ampyx animi plenissima magni |
| 185 | Primary pectora Lyncidae gladio petit; inque petendo |
| 186 | Primary dextera deriguit nec citra mota nec ultra est. |
| 187 | Primary At Nileus, qui se genitum septemplice Nilo |
| 188 | Primary ementitus erat, clipeo quoque flumina septem |
| 189 | Primary argento partim, partim caelaverat auro, |
| 190 | Primary “adspice” ait, “Perseu, nostrae primordia gentis: |
| 191 | Primary magna feres tacitas solacia mortis ad umbras, |
| 192 | Primary a tanto cecidisse viro”: pars ultima vocis |
| 193 | Primary in medio suppressa sono est, adapertaque velle |
| 194 | Primary ora loqui credas, nec sunt ea pervia verbis. |
| 195 | Primary Increpat hos “vitio” que “animi, non viribus” inquit |
| 196 | Primary “Gorgoneis torpetis” Eryx: “incurrite mecum |
| 197 | Primary et prosternite humi iuvenem magica arma moventem!” |
| 198 | Primary Incursurus erat: tenuit vestigia tellus, |
| 199 | Primary inmotusque silex armataque mansit imago. |
| 200 | Primary Hi tamen ex merito poenas subiere; sed unus |
| 201 | Primary miles erat Persei, pro quo dum pugnat, Aconteus, |
| 202 | Primary Gorgone conspecta saxo concrevit oborto. |
| 203 | Primary Quem ratus Astyages etiamnum vivere, longo |
| 204 | Primary ense ferit: sonuit tinnitibus ensis acutis. |
| 205 | Primary Dum stupet Astyages, naturam traxit eandem, |
| 206 | Primary marmoreoque manet vultus mirantis in ore. |
| 207 | Primary Nomina longa mora est media de plebe virorum |
| 208 | Primary dicere: bis centum restabant corpora pugnae, |
| 209 | Primary Gorgone bis centum riguerunt corpora visa. |
| 210 | Primary Paenitet iniusti tunc denique Phinea belli. |
| 211 | Primary Sed quid agat? simulacra videt diversa figuris |
| 212 | Primary agnoscitque suos et nomine quemque vocatum |
| 213 | Primary poscit opem, credensque parum sibi proxima tangit |
| 214 | Primary corpora: marmor erant. Avertitur, atque ita supplex |
| 215 | Primary confessasque manus obliquaque bracchia tendens, |
| 216 | Primary “vincis” ait, “Perseu. Remove tua monstra tuaeque |
| 217 | Primary saxificos vultus, quaecumque ea, tolle Medusae, |
| 218 | Primary tolle, precor. Non nos odium regnique cupido |
| 219 | Primary compulit ad bellum: pro coniuge movimus arma. |
| 220 | Primary Causa fuit meritis melior tua, tempore nostra. |
| 221 | Primary Non cessisse piget. Nihil, o fortissime, praeter |
| 222 | Primary hanc animam concede mihi: tua cetera sunto.” |
| 223 | Primary Talia dicenti neque eum, quem voce rogabat |
| 224 | Primary respicere audenti “quod” ait, “timidissime Phineu, |
| 225 | Primary et possum tribuisse et magnum est munus inerti, |
| 226 | Primary (pone metum) tribuam: nullo violabere ferro. |
| 227 | Primary Quin etiam mansura dabo monimenta per aevum, |
| 228 | Primary inque domo soceri semper spectabere nostri, |
| 229 | Primary ut mea se sponsi soletur imagine coniunx?” |
| 230 | Primary Dixit et in partem Phorcynida transtulit illam, |
| 231 | Primary ad quam se trepido Phineus obverterat ore. |
| 232 | Primary Tunc quoque conanti sua vertere lumina cervix |
| 233 | Primary deriguit, saxoque oculorum induruit umor. |
| 234 | Primary Sed tamen os timidum vultusque in marmore supplex |
| 235 | Primary submissaeque manus faciesque obnoxia mansit. |
| 236 | Primary Victor Abantiades patrios cum coniuge muros |
| 237 | Primary intrat et inmeriti vindex ultorque parentis |
| 238 | Primary adgreditur Proetum: nam fratre per arma fugato |
| 239 | Primary Acrisioneas Proetus possederat arces. |
| 240 | Primary Sed nec ope armorum, nec, quam male ceperat, arce |
| 241 | Primary torva colubriferi superavit lumina monstri. |
| 242 | Primary Te tamen, o parvae rector, Polydecta, Seriphi, |
| 243 | Primary nec iuvenis virtus per tot spectata labores |
| 244 | Primary nec mala mollierant, sed inexorabile durus |
| 245 | Primary exerces odium, nec iniqua finis in ira est. |
| 246 | Primary Detrectas etiam laudem fictamque Medusae |
| 247 | Primary arguis esse necem. “Dabimus tibi pignera veri. |
| 248 | Primary Parcite luminibus!” Perseus ait oraque regis |
| 249 | Primary ore Medusaeo silicem sine sanguine fecit. |
| 250 | Primary Hactenus aurigenae comitem Tritonia fratri |
| 251 | Primary se dedit: inde cava circumdata nube Seriphon |
| 252 | Primary deserit, a dextra Cythno Gyaroque relictis, |
| 253 | Primary quaque super pontum via visa brevissima, Thebas |
| 254 | Primary virgineumque Helicona petit. Quo monte potita |
| 255 | Primary constitit et doctas sic est adfata sorores: |
| 256 | Primary “Fama novi fontis nostras pervenit ad aures, |
| 257 | Primary dura Medusaei quem praepetis ungula rupit. |
| 258 | Primary Is mihi causa viae. Volui mirabile factum |
| 259 | Primary cernere: vidi ipsum materno sanguine nasci.” |
| 260 | Primary Excipit Uranie: “Quaecumque est causa videndi |
| 261 | Primary has tibi, diva, domos, animo gratissima nostro es. |
| 262 | Primary Vera tamen fama est, et Pegasus huius origo |
| 263 | Primary fontis”, et ad latices deduxit Pallada sacros. |
| 264 | Primary Quae mirata diu factas pedis ictibus undas, |
| 265 | Primary silvarum lucos circumspicit antiquarum |
| 266 | Primary antraque et innumeris distinctas floribus herbas |
| 267 | Primary felicesque vocat pariter studioque locoque |
| 268 | Primary Mnemonidas. Quam sic adfata est una sororum: |
| 269 | Primary “O, nisi te virtus opera ad maiora tulisset, |
| 270 | Primary in partem ventura chori Tritonia nostri, |
| 271 | Primary vera refers meritoque probas artesque locumque, |
| 272 | Primary et gratam sortem, tutae modo simus, habemus. |
| 273 | Primary Sed (vetitum est adeo sceleri nihil) omnia terrent |
| 274 | Primary virgineas mentes, dirusque ante ora Pyreneus |
| 275 | Primary vertitur, et nondum tota me mente recepi. |
| 276 | Primary Daulida Threicio Phoceaque milite rura |
| 277 | Primary ceperat ille ferox iniustaque regna tenebat. |
| 278 | Primary Templa petebamus Parnasia: vidit euntes, |
| 279 | Primary nostraque fallaci veneratus numina vultu |
| 280 | Primary “Mnemonides” (cognorat enim), “consistite” dixit, |
| 281 | Primary “nec dubitate, precor, tecto grave sidus et imbrem” |
| 282 | Primary (imber erat) “vitare meo: subiere minores |
| 283 | Primary saepe casas superi.” Dictis et tempore motae |
| 284 | Primary adnuimusque viro primasque intravimus aedes. |
| 285 | Primary Desierant imbres, victoque aquilonibus austro |
| 286 | Primary fusca repurgato fugiebant nubila caelo. |
| 287 | Primary Impetus ire fuit: claudit sua tecta Pyreneus |
| 288 | Primary vimque parat. Quam nos sumptis effugimus alis. |
| 289 | Primary Ipse secuturo similis stetit arduus arce |
| 290 | Primary “qua” que “via est vobis, erit et mihi” dixit “eadem”, |
| 291 | Primary seque iacit vecors e summae culmine turris |
| 292 | Primary et cadit in vultus, discussisque ossibus oris |
| 293 | Primary tundit humum moriens scelerato sanguine tinctam.” |
| 294 | Primary Musa loquebatur: pennae sonuere per auras, |
| 295 | Primary voxque salutantum ramis veniebat ab altis. |
| 296 | Primary Suspicit et linguae quaerit tam certa loquentes |
| 297 | Primary unde sonent hominemque putat Iove nata locutum: |
| 298 | Primary Ales erat, numeroque novem, sua fata querentes, |
| 299 | Primary institerant ramis imitantes omnia picae. |
| 300 | Primary Miranti sic orsa deae dea: “Nuper et istae |
| 301 | Primary auxerunt volucrum victae certamine turbam. |
| 302 | Primary Pieros has genuit Pellaeis dives in arvis, |
| 303 | Primary Paeonis Euippe mater fuit. Illa potentem |
| 304 | Primary Lucinam noviens, noviens paritura, vocavit. |
| 305 | Primary Intumuit numero stolidarum turba sororum, |
| 306 | Primary perque tot Haemonias et per tot Achaidas urbes |
| 307 | Primary huc venit et tali committit proelia voce: |
| 308 | Primary “Desinite indoctum vana dulcedine vulgus |
| 309 | Primary fallere: nobiscum, siqua est fiducia vobis, |
| 310 | Primary Thespiades certate deae. Nec voce nec arte |
| 311 | Primary vincemur, totidemque sumus. Vel cedite victae |
| 312 | Primary fonte Medusaeo et Hyantea Aganippe, |
| 313 | Primary vel nos Emathiis ad Paeonas usque nivosos |
| 314 | Primary cedamus campis. Dirimant certamina nymphae.” |
| 315 | Primary Turpe quidem contendere erat, sed cedere visum |
| 316 | Primary turpius. Electae iurant per flumina nymphae |
| 317 | Primary factaque de vivo pressere sedilia saxo. |
| 318 | Primary Tum sine sorte prior quae se certare professa est, |
| 319 | Primary bella canit superum, falsoque in honore Gigantas |
| 320 | Primary ponit et extenuat magnorum facta deorum; |
| 321 | Primary emissumque ima de sede Typhoea terrae |
| 322 | Primary caelitibus fecisse metum cunctosque dedisse |
| 323 | Primary terga fugae, donec fessos Aegyptia tellus |
| 324 | Primary ceperit et septem discretus in ostia Nilus. |
| 325 | Primary Huc quoque terrigenam venisse Typhoea narrat |
| 326 | Primary et se mentitis superos celasse figuris; |
| 327 | Primary “duxque gregis” dixit “fit Iuppiter; unde recurvis |
| 328 | Primary nunc quoque formatus Libys est cum cornibus Ammon. |
| 329 | Primary Delius in corvo, proles Semeleia capro, |
| 330 | Primary fele soror Phoebi, nivea Saturnia vacca, |
| 331 | Primary pisce Venus latuit, Cyllenius ibidis alis.” |
| 332 | Primary Hactenus ad citharam vocalia moverat ora: |
| 333 | Primary poscimur Aonides. Sed forsitan otia non sint, |
| 334 | Primary nec nostris praebere vacet tibi cantibus aures.” |
| 335 | Primary “Ne dubita, vestrumque mihi refer ordine carmen” |
| 336 | Primary Pallas ait nemorisque levi consedit in umbra. |
| 337 | Primary Musa refert: “Dedimus summam certaminis uni. |
| 338 | Primary Surgit et inmissos hedera conlecta capillos |
| 339 | Primary Calliope querulas praetemptat pollice chordas, |
| 340 | Primary atque haec percussis subiungit carmina nervis: |
| 341 | Primary “Prima Ceres unco glaebam dimovit aratro, |
| 342 | Primary prima dedit fruges alimentaque mitia terris, |
| 343 | Primary prima dedit leges: Cereris sunt omnia munus. |
| 344 | Primary Illa canenda mihi est. Utinam modo dicere possem |
| 345 | Primary carmina digna dea: certe dea carmine digna est. |
| 346 | Primary Vasta giganteis ingesta est insula membris |
| 347 | Primary Trinacris et magnis subiectum molibus urget |
| 348 | Primary aetherias ausum sperare Typhoea sedes. |
| 349 | Primary Nititur ille quidem pugnatque resurgere saepe, |
| 350 | Primary dextra sed Ausonio manus est subiecta Peloro, |
| 351 | Primary laeva, Pachyne, tibi, Lilybaeo crura premuntur, |
| 352 | Primary degravat Aetna caput: sub qua resupinus harenas |
| 353 | Primary eiectat flammamque ferox vomit ore Typhoeus. |
| 354 | Primary Saepe remoliri luctatur pondera terrae |
| 355 | Primary oppidaque et magnos devolvere corpore montes. |
| 356 | Primary Inde tremit tellus, et rex pavet ipse silentum, |
| 357 | Primary ne pateat latoque solum retegatur hiatu |
| 358 | Primary inmissusque dies trepidantes terreat umbras. |
| 359 | Primary Hanc metuens cladem tenebrosa sede tyrannus |
| 360 | Primary exierat, curruque atrorum vectus equorum |
| 361 | Primary ambibat Siculae cautus fundamina terrae. |
| 362 | Primary Postquam exploratum satis est loca nulla labare, |
| 363 | Primary depositoque metu, videt hunc Erycina vagantem |
| 364 | Primary monte suo residens, natumque amplexa volucrem |
| 365 | Primary “arma manusque meae, mea, nate, potentia”, dixit, |
| 366 | Primary “illa, quibus superas omnes, cape tela, Cupido, |
| 367 | Primary inque dei pectus celeres molire sagittas, |
| 368 | Primary cui triplicis cessit fortuna novissima regni. |
| 369 | Primary Tu superos ipsumque Iovem tu numina ponti |
| 370 | Primary victa domas ipsumque, regit qui numina ponti. |
| 371 | Primary Tartara quid cessant? cur non matrisque tuumque |
| 372 | Primary imperium profers? agitur pars tertia mundi. |
| 373 | Primary Et tamen in caelo, quae iam patientia nostra est, |
| 374 | Primary spernimur, ac mecum vires minuuntur Amoris. |
| 375 | Primary Pallada nonne vides iaculatricemque Dianam |
| 376 | Primary abscessisse mihi? Cereris quoque filia virgo, |
| 377 | Primary si patiemur, erit: nam spes adfectat easdem. |
| 378 | Primary At tu, pro socio, siqua est ea gratia, regno |
| 379 | Primary iunge deam patruo.” Dixit Venus. Ille pharetram |
| 380 | Primary solvit et arbitrio matris de mille sagittis |
| 381 | Primary unam seposuit, sed qua nec acutior ulla |
| 382 | Primary nec minus incerta est nec quae magis audiat arcus, |
| 383 | Primary oppositoque genu curvavit flexile cornum |
| 384 | Primary inque cor hamata percussit harundine Ditem. |
| 385 | Primary Haud procul Hennaeis lacus est a moenibus altae, |
| 386 | Primary nomine Pergus, aquae. Non illo plura Caystros |
| 387 | Primary carmina cycnorum labentibus audit in undis. |
| 388 | Primary Silva coronat aquas cingens latus omne, suisque |
| 389 | Primary frondibus ut velo Phoebeos submovet ictus. |
| 390 | Primary Frigora dant rami, tyrios humus umida flores: |
| 391 | Primary perpetuum ver est. Quo dum Proserpina luco |
| 392 | Primary ludit et aut violas aut candida lilia carpit, |
| 393 | Primary dumque puellari studio calathosque sinumque |
| 394 | Primary implet et aequales certat superare legendo, |
| 395 | Primary paene simul visa est dilectaque raptaque Diti: |
| 396 | Primary usque adeo est properatus amor. Dea territa maesto |
| 397 | Primary et matrem et comites, sed matrem saepius, ore |
| 398 | Primary clamat; et, ut summa vestem laniarat ab ora, |
| 399 | Primary conlecti flores tunicis cecidere remissis. |
| 400 | Primary Tantaque simplicitas puerilibus adfuit annis, |
| 401 | Primary haec quoque virgineum movit iactura dolorem. |
| 402 | Primary Raptor agit currus et nomine quemque vocando |
| 403 | Primary exhortatur equos, quorum per colla iubasque |
| 404 | Primary excutit obscura tinctas ferrugine habenas, |
| 405 | Primary perque lacus altos et olentia sulphure fertur |
| 406 | Primary stagna Palicorum, rupta fervenu terra, |
| 407 | Primary et qua Bacchiadae, bimari gens orta Corintho, |
| 408 | Primary inter inaequales posuerunt moenia portus. |
| 409 | Primary Est medium Cyanes et Pisaeae Arethusae, |
| 410 | Primary quod coit angustis inclusum cornibus aequor. |
| 411 | Primary Hic fuit, a cuius stagnum quoque nomine dictum est, |
| 412 | Primary inter Sicelidas Cyane celeberrima nymphas. |
| 413 | Primary Gurgite quae medio summa tenus exstitit alvo |
| 414 | Primary agnovitque deam. “Nec longius ibitis!” inquit, |
| 415 | Primary “non potes invitae Cereris gener esse: roganda, |
| 416 | Primary non rapienda fuit. Quodsi componere magnis |
| 417 | Primary parva mihi fas est, et me dilexit Anapis: |
| 418 | Primary exorata tamen, nec, ut haec, exterrita nupsi.” |
| 419 | Primary Dixit et in partes diversas bracchia tendens |
| 420 | Primary obstitit. Haud ultra tenuit Saturnius iram, |
| 421 | Primary terribilesque hortatus equos in gurgitis ima |
| 422 | Primary contortum valido sceptrum regale lacerto |
| 423 | Primary condidit. Icta viam tellus in Tartara fecit |
| 424 | Primary et pronos currus medio cratere recepit. |
| 425 | Primary At Cyane, raptamque deam contemptaque fontis |
| 426 | Primary iura sui maerens, inconsolabile vulnus |
| 427 | Primary mente gerit tacita lacrimisque absumitur omnis, |
| 428 | Primary et quarum fuerat magnum modo numen, in illas |
| 429 | Primary ossa pati flexus, ungues posuisse rigorem; |
| 430 | Primary extenuatur aquas. Molliri membra videres, |
| 431 | Primary primaque de tota tenuissima quaeque liquescunt, |
| 432 | Primary caerulei crines digitique et crura pedesque: |
| 433 | Primary nam brevis in gelidas membris exilibus undas |
| 434 | Primary transitus est: post haec umeri tergusque latusque |
| 435 | Primary pectoraque in tenues abeunt evanida rivos. |
| 436 | Primary Denique pro vivo vitiatas sanguine venas |
| 437 | Primary lympha subit, restatque nihil, quod prendere possis. |
| 438 | Primary Interea pavidae nequiquam filia matri |
| 439 | Primary omnibus est terris, omni quaesita profundo. |
| 440 | Primary Illam non udis veniens Aurora capillis |
| 441 | Primary cessantem vidit, non Hesperus. Illa duabus |
| 442 | Primary flammiferas pinus manibus succendit ab Aetna |
| 443 | Primary perque pruinosas tulit inrequieta tenebras. |
| 444 | Primary Rursus ubi alma dies hebetarat sidera, natam |
| 445 | Primary solis ab occasu solis quaerebat ad ortus. |
| 446 | Primary Fessa labore sitim conlegerat oraque nulli |
| 447 | Primary colluerant fontes; cum tectam stramine vidit |
| 448 | Primary forte casam parvasque fores pulsavit: at inde |
| 449 | Primary prodit anus divamque videt, lymphamque roganti |
| 450 | Primary dulce dedit, tosta quod texerat ante polenta. |
| 451 | Primary Dum bibit illa datum, duri puer oris et audax |
| 452 | Primary constitit ante deam risitque avidamque vocavit. |
| 453 | Primary Offensa est neque adhuc epota parte loquentem |
| 454 | Primary cum liquido mixta perfudit diva polenta. |
| 455 | Primary Combibit os maculas, et quae modo bracchia gessit, |
| 456 | Primary crura gerit; cauda est mutatis addita membris; |
| 457 | Primary inque brevem formam, ne sit vis magna nocendi, |
| 458 | Primary contrahitur, parvaque minor mensura lacerta est. |
| 459 | Primary Mirantem flentemque et tangere monstra parantem |
| 460 | Primary fugit anum latebramque petit; aptumque colori |
| 461 | Primary nomen habet, variis stellatus corpora guttis. |
| 462 | Primary Quas dea per terras et quas erraverit undas, |
| 463 | Primary dicere longa mora est: quaerenti defuit orbis. |
| 464 | Primary Sicaniam repetit; dumque omnia lustrat eundo, |
| 465 | Primary venit et ad Cyanen. Ea ni mutata fuisset, |
| 466 | Primary omnia narrasset: sed et os et lingua volenti |
| 467 | Primary dicere non aderant, nec quo loqueretur habebat. |
| 468 | Primary Signa tamen manifesta dedit notamque parenti, |
| 469 | Primary illo forte loco delapsam in gurgite sacro, |
| 470 | Primary Persephones zonam summis ostendit in undis. |
| 471 | Primary Quam simul agnovit, tamquam tunc denique raptam |
| 472 | Primary scisset, inornatos laniavit diva capillos |
| 473 | Primary et repetita suis percussit pectora palmis. |
| 474 | Primary Nescit adhuc, ubi sit: terras tamen increpat omnes |
| 475 | Primary ingratasque vocat nec frugum munere dignas, |
| 476 | Primary Trinacriam ante alias, in qua vestigia damni |
| 477 | Primary repperit. Ergo illic saeva vertentia glaebas |
| 478 | Primary fregit aratra manu, parilique irata colonos |
| 479 | Primary ruricolasque boves leto dedit arvaque iussit |
| 480 | Primary fallere depositum vitiataque semina fecit. |
| 481 | Primary Fertilitas terrae latum vulgata per orbem |
| 482 | Primary falsa iacet: primis segetes moriuntur in herbis, |
| 483 | Primary et modo sol nimius, nimius modo corripit imber |
| 484 | Primary sideraque ventique nocent, avidaeque volucres |
| 485 | Primary semina iacta legunt; lolium tribulique fatigant |
| 486 | Primary triticeas messes et inexpugnabile gramen. |
| 487 | Primary Tum caput Eleis Alpheias extulit undis |
| 488 | Primary rorantesque comas a fronte removit ad aures |
| 489 | Primary atque ait: “O toto quaesitae virginis orbe |
| 490 | Primary et frugum genetrix, inmensos siste labores |
| 491 | Primary neve tibi fidae violenta irascere terrae. |
| 492 | Primary Terra nihil meruit patuitque invita rapinae. |
| 493 | Primary Nec sum pro patria supplex: huc hospita veni; |
| 494 | Primary Pisa mihi patria est et ab Elide ducimus ortus; |
| 495 | Primary Sicaniam peregrina colo, sed gratior omni |
| 496 | Primary haec mihi terra solo est: hos nunc Arethusa penates, |
| 497 | Primary hanc habeo sedem: quam tu, mitissima, serva. |
| 498 | Primary Mota loco cur sim tantique per aequoris undas |
| 499 | Primary advehar Ortygiam, veniet narratibus hora |
| 500 | Primary tempestiva meis, cum tu curaque levata |
| 501 | Primary et vultus melioris eris. Mihi pervia tellus |
| 502 | Primary praebet iter, subterque imas ablata cavernas |
| 503 | Primary hic caput attollo desuetaque sidera cerno. |
| 504 | Primary Ergo dum Stygio sub terris gurgite labor, |
| 505 | Primary visa tua est oculis illic Proserpina nostris: |
| 506 | Primary illa quidem tristis neque adhuc interrita vultu, |
| 507 | Primary sed regina tamen, sed opaci maxima mundi, |
| 508 | Primary sed tamen inferni pollens matrona tyranni.” |
| 509 | Primary Mater ad auditas stupuit ceu saxea voces |
| 510 | Primary attonitaeque diu similis fuit. Utque dolore |
| 511 | Primary pulsa gravi gravis est amentia, curribus oras |
| 512 | Primary exit in aetherias. Ibi toto nubila vultu |
| 513 | Primary ante Iovem passis stetit invidiosa capillis |
| 514 | Primary “pro” que “meo veni supplex tibi, Iuppiter” inquit, |
| 515 | Primary “sanguine proque tuo. Si nulla est gratia matris, |
| 516 | Primary nata patrem moveat, neu sit tibi cura, precamur, |
| 517 | Primary vilior illius, quod nostro est edita partu. |
| 518 | Primary En quaesita diu tandem mihi nata reperta est, |
| 519 | Primary si reperire vocas amittere certius, aut si |
| 520 | Primary scire, ubi sit, reperire vocas. Quod rapta, feremus, |
| 521 | Primary dummodo reddat eam: neque enim praedone marito |
| 522 | Primary filia digna tua est, si iam mea filia non est.” |
| 523 | Primary Iuppiter excepit: “Commune est pignus onusque |
| 524 | Primary nata mihi tecum. Sed si modo nomina rebus |
| 525 | Primary addere vera placet, non hoc iniuria factum, |
| 526 | Primary verum amor est; neque erit nobis gener ille pudori, |
| 527 | Primary tu modo, diva, velis. Ut desint cetera, quantum est |
| 528 | Primary esse Iovis fratrem! — Quid quod non cetera desunt |
| 529 | Primary nec cedit nisi sorte mihi? sed tanta cupido |
| 530 | Primary si tibi discidii est, repetet Proserpina caelum, |
| 531 | Primary lege tamen certa, si nullos contigit illic |
| 532 | Primary ore cibos; nam sic Parcarum foedere cautum est.” |
| 533 | Primary Dixerat. At Cereri certum est educere natam. |
| 534 | Primary Non ita fata sinunt, quoniam ieiunia virgo |
| 535 | Primary solverat et, cultis dum simplex errat in hortis, |
| 536 | Primary Poeniceum curva decerpserat arbore pomum |
| 537 | Primary sumptaque pallenti septem de cortice grana |
| 538 | Primary presserat ore suo. Solusque ex omnibus illud |
| 539 | Primary Ascalaphus vidit, quem quondam dicitur Orphne, |
| 540 | Primary inter Avernales haud ignotissima nymphas, |
| 541 | Primary ex Acheronte suo silvis peperisse sub atris: |
| 542 | Primary vidit et indicio reditum crudelis ademit. |
| 543 | Primary Ingemuit regina Erebi testemque profanam |
| 544 | Primary fecit avem, sparsumque caput Phlegethontide lympha |
| 545 | Primary in rostrum et plumas et grandia lumina vertit. |
| 546 | Primary Ille sibi ablatus fulvis amicitur in alis, |
| 547 | Primary inque caput crescit, longosque reflectitur ungues |
| 548 | Primary vixque movet natas per inertia bracchia pennas: |
| 549 | Primary foedaque fit volucris, venturi nuntia luctus, |
| 550 | Primary ignavus bubo, dirum mortalibus omen. |
| 551 | Primary Hic tamen indicio poenam linguaque videri |
| 552 | Primary commeruisse potest: vobis, Acheloides, unde |
| 553 | Primary pluma pedesque avium, cum virginis ora geratis? |
| 554 | Primary an quia, cum legeret vernos Proserpina flores, |
| 555 | Primary in comitum numero, doctae Sirenes, eratis? |
| 556 | Primary Quam postquam toto frustra quaesistis in orbe, |
| 557 | Primary protinus, ut vestram sentirent aequora curam, |
| 558 | Primary posse super fluctus alarum insistere remis |
| 559 | Primary optastis, facilesque deos habuistis et artus |
| 560 | Primary vidistis vestros subitis flavescere pennis. |
| 561 | Primary Ne tamen ille canor mulcendas natus ad aures |
| 562 | Primary tantaque dos oris linguae deperderet usum, |
| 563 | Primary virginei vultus et vox humana remansit. |
| 564 | Primary At medius fratrisque sui maestaeque sororis |
| 565 | Primary Iuppiter ex aequo volventem dividit annum. |
| 566 | Primary Nunc dea, regnorum numen commune duorum, |
| 567 | Primary cum matre est totidem, totidem cum coniuge menses. |
| 568 | Primary Vertitur extemplo facies et mentis et oris: |
| 569 | Primary nam modo quae poterat Diti quoque maesta videri, |
| 570 | Primary laeta deae frons est, ut sol, qui tectus aquosis |
| 571 | Primary nubibus ante fuit, victis e nubibus exit. |
| 572 | Primary Exigit alma Ceres, nata secura recepta, |
| 573 | Primary quae tibi causa fugae, cur sis, Arethusa, sacer fons. |
| 574 | Primary Conticuere undae: quarum dea sustulit alto |
| 575 | Primary fonte caput viridesque manu siccata capillos |
| 576 | Primary fluminis Elei veteres narravit amores. |
| 577 | Primary “Pars ego nympharum quae sunt in Achaide” dixit, |
| 578 | Primary “una fui, nec me studiosius altera saltus |
| 579 | Primary legit nec posuit studiosius altera casses. |
| 580 | Primary Sed quamvis formae numquam mihi fama petita est, |
| 581 | Primary quamvis fortis eram, formosae nomen habebam. |
| 582 | Primary Nec mea me facies nimium laudata iuvabat, |
| 583 | Primary quaque aliae gaudere solent, ego rustica dote |
| 584 | Primary corporis erubui, crimenque placere putavi. |
| 585 | Primary Lassa revertebar (memini) Stymphalide silva: |
| 586 | Primary aestus erat, magnumque labor geminaverat aestum. |
| 587 | Primary Invenio sine vertice aquas, sine murmure euntes, |
| 588 | Primary perspicuas ad humum, per quas numerabilis alte |
| 589 | Primary calculus omnis erat, quas tu vix ire putares. |
| 590 | Primary Cana salicta dabant nutritaque populus unda |
| 591 | Primary sponte sua natas ripis declivibus umbras. |
| 592 | Primary Accessi primumque pedis vestigia tinxi, |
| 593 | Primary poplite deinde tenus: neque eo contenta, recingor |
| 594 | Primary molliaque impono salici velamina curvae |
| 595 | Primary nudaque mergor aquis. Quas dum ferioque trahoque |
| 596 | Primary mille modis labens excussaque bracchia iacto, |
| 597 | Primary nescio quod medio sensi sub gurgite murmur |
| 598 | Primary territaque insisto propioris margine ripae. |
| 599 | Primary “Quo properas, Arethusa?” suis Alpheus ab undis, |
| 600 | Primary “quo properas?” iterum rauco mihi dixerat ore. |
| 601 | Primary Sicut eram, fugio sine vestibus: altera vestes |
| 602 | Primary ripa meas habuit. Tanto magis instat et ardet, |
| 603 | Primary et quia nuda fui, sum visa paratior illi. |
| 604 | Primary Sic ego currebam, sic me ferus ille premebat, |
| 605 | Primary ut fugere accipitrem penna trepidante columbae, |
| 606 | Primary ut solet accipiter trepidas urgere columbas. |
| 607 | Primary Usque sub Orchomenon Psophidaque Cyllenenque |
| 608 | Primary Maenaliosque sinus gelidumque Erymanthon et Elin |
| 609 | Primary currere sustinui; nec me velocior ille. |
| 610 | Primary Sed tolerare diu cursus ego, viribus impar, |
| 611 | Primary non poteram: longi patiens erat ille laboris. |
| 612 | Primary Per tamen et campos, per opertos arbore montes, |
| 613 | Primary saxa quoque et rupes et qua via nulla, cucurri. |
| 614 | Primary Sol erat a tergo: vidi praecedere longam |
| 615 | Primary ante pedes umbram, nisi si timor illa videbat; |
| 616 | Primary sed certe sonitusque pedum terrebat et ingens |
| 617 | Primary crinales vittas adflabat anhelitus oris. |
| 618 | Primary Fessa labore fugae “fer opem, deprendimur” inquam, |
| 619 | Primary “armigerae, Diana, tuae, cui saepe dedisti |
| 620 | Primary ferre tuos arcus inclusaque tela pharetra.” |
| 621 | Primary Mota dea est spissisque ferens e nubibus unam |
| 622 | Primary me super iniecit. Lustrat caligine tectam |
| 623 | Primary amnis et ignarus circum cava nubila quaerit. |
| 624 | Primary Bisque locum, quo me dea texerat inscius ambit |
| 625 | Primary et bis “io Arethusa io Arethusa!” vocavit. |
| 626 | Primary Quid mihi tunc animi miserae fuit? anne quod agnae est, |
| 627 | Primary siqua lupos audit circum stabula alta frementes, |
| 628 | Primary aut lepori, qui vepre latens hostilia cernit |
| 629 | Primary ora canum nullosque audet dare corpore motus? |
| 630 | Primary Non tamen abscedit: neque enim vestigia cernit |
| 631 | Primary longius ulla pedum: servat nubemque locumque. |
| 632 | Primary Occupat obsessos sudor mihi frigidus artus, |
| 633 | Primary caeruleaeque cadunt toto de corpore guttae, |
| 634 | Primary quaque pedem movi, manat lacus, eque capillis |
| 635 | Primary ros cadit, et citius, quam nunc tibi facta renarro, |
| 636 | Primary in latices mutor. Sed enim cognoscit amatas |
| 637 | Primary amnis aquas, positoque viri, quod sumpserat, ore |
| 638 | Primary vertitur in proprias, ut se mihi misceat, undas. |
| 639 | Primary Delia rupit humum; caecisque ego mersa cavernis |
| 640 | Primary advehor Ortygiam, quae me cognomine divae |
| 641 | Primary grata meae superas eduxit prima sub auras.” |
| 642 | Primary Hac Arethusa tenus. Geminos dea fertilis angues |
| 643 | Primary curribus admovit frenisque coercuit ora |
| 644 | Primary et medium caeli terraeque per aera vecta est |
| 645 | Primary atque levem currum Tritonida misit in urbem |
| 646 | Primary Triptolemo; partimque rudi data semina iussit |
| 647 | Primary spargere humo, partim post tempora longa recultae. |
| 648 | Primary Iam super Europen sublimis et Asida terram |
| 649 | Primary vectus erat iuvenis; Scythicas advertitur oras. |
| 650 | Primary Rex ibi Lyncus erat: regis subit ille penates. |
| 651 | Primary Qua veniat, causamque viae nomenque rogatus |
| 652 | Primary et patriam, “patria est clarae mihi” dixit “Athenae, |
| 653 | Primary Triptolemus nomen. Veni nec puppe per undas, |
| 654 | Primary nec pede per terras: patuit mihi pervius aether. |
| 655 | Primary Dona fero Cereris latos quae sparsa per agros |
| 656 | Primary frugiferas messes alimentaque mitia reddant.” |
| 657 | Primary Barbarus invidit; tantique ut muneris auctor |
| 658 | Primary ipse sit, hospitio recipit somnoque gravatum |
| 659 | Primary adgreditur ferro. Conantem figere pectus |
| 660 | Primary lynca Ceres fecit rursusque per aera iussit |
| 661 | Primary Mopsopium iuvenem sacros agitare iugales.” |
| 662 | Primary Finierat doctos e nobis maxima cantus. |
| 663 | Primary At nymphae vicisse deas Helicona colentes |
| 664 | Primary concordi dixere sono. Convicia victae |
| 665 | Primary cum iacerent, “quoniam” dixit “certamine vobis |
| 666 | Primary supplicium meruisse parum est maledictaque culpae |
| 667 | Primary additis et non est patientia libera nobis, |
| 668 | Primary ibimus in poenas et, qua vocat ira, sequemur.” |
| 669 | Primary Rident Emathides spernuntque minantia verba: |
| 670 | Primary conataeque loqui et magno clamore protervas |
| 671 | Primary intentare manus, pennas exire per ungues |
| 672 | Primary adspexere suos, operiri bracchia plumis; |
| 673 | Primary alteraque alterius rigido concrescere rostro |
| 674 | Primary ora videt volucresque novas accedere silvis. |
| 675 | Primary Dumque volunt plangi, per bracchia mota levatae |
| 676 | Primary aere pendebant, nemorum convicia, picae. |
| 677 | Primary Nunc quoque in alitibus facundia prisca remansit |
| 678 | Primary raucaque garrulitas studiumque inmane loquendi.” |