Reader
Reader | Odyssey, Book 16
Odyssey
Homer
Text
Position
Line 1 of 481
Waypoints
| Line Ref | A. T. Murray | Ancient Greek |
|---|---|
| 1 | Primary τὼ δʼ αὖτʼ ἐν κλισίῃ Ὀδυσεὺς καὶ δῖος ὑφορβὸς |
| 2 | Primary ἐντύνοντο ἄριστον ἅμʼ ἠοῖ, κηαμένω πῦρ, |
| 3 | Primary ἔκπεμψάν τε νομῆας ἅμʼ ἀγρομένοισι σύεσσι· |
| 4 | Primary Τηλέμαχον δὲ περίσσαινον κύνες ὑλακόμωροι, |
| 5 | Primary οὐδʼ ὕλαον προσιόντα. νόησε δὲ δῖος Ὀδυσσεὺς |
| 6 | Primary σαίνοντάς τε κύνας, περί τε κτύπος ἦλθε ποδοῖϊν. |
| 7 | Primary αἶψα δʼ ἄρʼ Εὔμαιον ἔπεα πτερόεντα προσηύδα· |
| 8 | Primary Εὔμαιʼ, ἦ μάλα τίς τοι ἐλεύσεται ἐνθάδʼ ἑταῖρος |
| 9 | Primary ἢ καὶ γνώριμος ἄλλος, ἐπεὶ κύνες οὐχ ὑλάουσιν, |
| 10 | Primary ἀλλὰ περισσαίνουσι· ποδῶν δʼ ὑπὸ δοῦπον ἀκούω. |
| 11 | Primary οὔ πω πᾶν εἴρητο ἔπος, ὅτε οἱ φίλος υἱὸς |
| 12 | Primary ἔστη ἐνὶ προθύροισι. ταφὼν δʼ ἀνόρουσε συβώτης, |
| 13 | Primary ἐκ δʼ ἄρα οἱ χειρῶν πέσον ἄγγεα, τοῖς ἐπονεῖτο, |
| 14 | Primary κιρνὰς αἴθοπα οἶνον. ὁ δʼ ἀντίος ἦλθεν ἄνακτος, |
| 15 | Primary κύσσε δέ μιν κεφαλήν τε καὶ ἄμφω φάεα καλὰ |
| 16 | Primary χεῖράς τʼ ἀμφοτέρας· θαλερὸν δέ οἱ ἔκπεσε δάκρυ. |
| 17 | Primary ὡς δὲ πατὴρ ὃν παῖδα φίλα φρονέων ἀγαπάζῃ |
| 18 | Primary ἐλθόντʼ ἐξ ἀπίης γαίης δεκάτῳ ἐνιαυτῷ, |
| 19 | Primary μοῦνον τηλύγετον, τῷ ἔπʼ ἄλγεα πολλὰ μογήσῃ, |
| 20 | Primary ὣς τότε Τηλέμαχον θεοειδέα δῖος ὑφορβὸς |
| 21 | Primary πάντα κύσεν περιφύς, ὡς ἐκ θανάτοιο φυγόντα· |
| 22 | Primary καί ῥʼ ὀλοφυρόμενος ἔπεα πτερόεντα προσηύδα· |
| 23 | Primary ἦλθες, Τηλέμαχε, γλυκερὸν φάος. οὔ σʼ ἔτʼ ἐγώ γε |
| 24 | Primary ὄψεσθαι ἐφάμην, ἐπεὶ ᾤχεο νηῒ Πύλονδε. |
| 25 | Primary ἀλλʼ ἄγε νῦν εἴσελθε, φίλον τέκος, ὄφρα σε θυμῷ |
| 26 | Primary τέρψομαι εἰσορόων νέον ἄλλοθεν ἔνδον ἐόντα. |
| 27 | Primary οὐ μὲν γάρ τι θάμʼ ἀγρὸν ἐπέρχεαι οὐδὲ νομῆας, |
| 28 | Primary ἀλλʼ ἐπιδημεύεις· ὣς γάρ νύ τοι εὔαδε θυμῷ, |
| 29 | Primary ἀνδρῶν μνηστήρων ἐσορᾶν ἀΐδηλον ὅμιλον. |
| 30 | Primary τὸν δʼ αὖ Τηλέμαχος πεπνυμένος ἀντίον ηὔδα· |
| 31 | Primary ἔσσεται οὕτως, ἄττα· σέθεν δʼ ἕνεκʼ ἐνθάδʼ ἱκάνω, |
| 32 | Primary ὄφρα σέ τʼ ὀφθαλμοῖσιν ἴδω καὶ μῦθον ἀκούσω, |
| 33 | Primary ἤ μοι ἔτʼ ἐν μεγάροις μήτηρ μένει, ἦέ τις ἤδη |
| 34 | Primary ἀνδρῶν ἄλλος ἔγημεν, Ὀδυσσῆος δέ που εὐνὴ |
| 35 | Primary χήτει ἐνευναίων κάκʼ ἀράχνια κεῖται ἔχουσα. |
| 36 | Primary τὸν δʼ αὖτε προσέειπε συβώτης, ὄρχαμος ἀνδρῶν· |
| 37 | Primary καὶ λίην κείνη γε μένει τετληότι θυμῷ |
| 38 | Primary σοῖσιν ἐνὶ μεγάροισιν· ὀϊζυραὶ δέ οἱ αἰεὶ |
| 39 | Primary φθίνουσιν νύκτες τε καὶ ἤματα δάκρυ χεούσῃ. |
| 40 | Primary ὣς ἄρα φωνήσας οἱ ἐδέξατο χάλκεον ἔγχος· |
| 41 | Primary αὐτὰρ ὅ γʼ εἴσω ἴεν καὶ ὑπέρβη λάϊνον οὐδόν. |
| 42 | Primary τῷ δʼ ἕδρης ἐπιόντι πατὴρ ὑπόειξεν Ὀδυσσεύς· |
| 43 | Primary Τηλέμαχος δʼ ἑτέρωθεν ἐρήτυε φώνησέν τε· |
| 44 | Primary ἧσʼ, ὦ ξεῖνʼ· ἡμεῖς δὲ καὶ ἄλλοθι δήομεν ἕδρην |
| 45 | Primary σταθμῷ ἐν ἡμετέρῳ· πάρα δʼ ἀνὴρ ὃς καταθήσει. |
| 46 | Primary ὣς φάθʼ, ὁ δʼ αὖτις ἰὼν κατʼ ἄρʼ ἕζετο· τῷ δὲ συβώτης. |
| 47 | Primary χεῦεν ὕπο χλωρὰς ῥῶπας καὶ κῶας ὕπερθεν· |
| 48 | Primary ἔνθα καθέζετʼ ἔπειτα Ὀδυσσῆος φίλος υἱός. |
| 49 | Primary τοῖσιν δʼ αὖ κρειῶν πίνακας παρέθηκε συβώτης |
| 50 | Primary ὀπταλέων, ἅ ῥα τῇ προτέρῃ ὑπέλειπον ἔδοντες, |
| 51 | Primary σῖτον δʼ ἐσσυμένως παρενήνεεν ἐν κανέοισιν, |
| 52 | Primary ἐν δʼ ἄρα κισσυβίῳ κίρνη μελιηδέα οἶνον· |
| 53 | Primary αὐτὸς δʼ ἀντίον ἷζεν Ὀδυσσῆος θείοιο. |
| 54 | Primary οἱ δʼ ἐπʼ ὀνείαθʼ ἑτοῖμα προκείμενα χεῖρας ἴαλλον. |
| 55 | Primary αὐτὰρ ἐπεὶ πόσιος καὶ ἐδητύος ἐξ ἔρον ἕντο, |
| 56 | Primary δὴ τότε Τηλέμαχος προσεφώνεε δῖον ὑφορβόν· |
| 57 | Primary ἄττα, πόθεν τοι ξεῖνος ὅδʼ ἵκετο; πῶς δέ ἑ ναῦται |
| 58 | Primary ἤγαγον εἰς Ἰθάκην; τίνες ἔμμεναι εὐχετόωντο; |
| 59 | Primary οὐ μὲν γάρ τί ἑ πεζὸν ὀΐομαι ἐνθάδʼ ἱκέσθαι. |
| 60 | Primary τὸν δʼ ἀπαμειβόμενος προσέφης, Εὔμαιε συβῶτα· |
| 61 | Primary τοιγὰρ ἐγώ τοι, τέκνον, ἀληθέα πάντʼ ἀγορεύσω. |
| 62 | Primary ἐκ μὲν Κρητάων γένος εὔχεται εὐρειάων, |
| 63 | Primary φησὶ δὲ πολλὰ βροτῶν ἐπὶ ἄστεα δινηθῆναι |
| 64 | Primary πλαζόμενος· ὣς γάρ οἱ ἐπέκλωσεν τά γε δαίμων. |
| 65 | Primary νῦν αὖ Θεσπρωτῶν ἀνδρῶν ἐκ νηὸς ἀποδρὰς |
| 66 | Primary ἤλυθʼ ἐμὸν πρὸς σταθμόν, ἐγὼ δέ τοι ἐγγυαλίξω· |
| 67 | Primary ἔρξον ὅπως ἐθέλεις· ἱκέτης δέ τοι εὔχεται εἶναι. |
| 68 | Primary τὸν δʼ αὖ Τηλέμαχος πεπνυμένος ἀντίον ηὔδα· |
| 69 | Primary Εὔμαιʼ, ἦ μάλα τοῦτο ἔπος θυμαλγὲς ἔειπες· |
| 70 | Primary πῶς γὰρ δὴ τὸν ξεῖνον ἐγὼν ὑποδέξομαι οἴκῳ; |
| 71 | Primary αὐτὸς μὲν νέος εἰμὶ καὶ οὔ πω χερσὶ πέποιθα |
| 72 | Primary ἄνδρʼ ἀπαμύνασθαι, ὅτε τις πρότερος χαλεπήνῃ· |
| 73 | Primary μητρὶ δʼ ἐμῇ δίχα θυμὸς ἐνὶ φρεσὶ μερμηρίζει, |
| 74 | Primary ἢ αὐτοῦ παρʼ ἐμοί τε μένῃ καὶ δῶμα κομίζῃ, |
| 75 | Primary εὐνήν τʼ αἰδομένη πόσιος δήμοιό τε φῆμιν, |
| 76 | Primary ἦ ἤδη ἅμʼ ἕπηται Ἀχαιῶν ὅς τις ἄριστος |
| 77 | Primary μνᾶται ἐνὶ μεγάροισιν ἀνὴρ καὶ πλεῖστα πόρῃσιν. |
| 78 | Primary ἀλλʼ ἦ τοὶ τὸν ξεῖνον, ἐπεὶ τεὸν ἵκετο δῶμα, |
| 79 | Primary ἕσσω μιν χλαῖνάν τε χιτῶνά τε, εἵματα καλά, |
| 80 | Primary δώσω δὲ ξίφος ἄμφηκες καὶ ποσσὶ πέδιλα, |
| 81 | Primary πέμψω δʼ ὅππη μιν κραδίη θυμός τε κελεύει. |
| 82 | Primary εἰ δʼ ἐθέλεις, σὺ κόμισσον ἐνὶ σταθμοῖσιν ἐρύξας· |
| 83 | Primary εἵματα δʼ ἐνθάδʼ ἐγὼ πέμψω καὶ σῖτον ἅπαντα |
| 84 | Primary ἔδμεναι, ὡς ἂν μή σε κατατρύχῃ καὶ ἑταίρους. |
| 85 | Primary κεῖσε δʼ ἂν οὔ μιν ἐγώ γε μετὰ μνηστῆρας ἐῷμι |
| 86 | Primary ἔρχεσθαι· λίην γὰρ ἀτάσθαλον ὕβριν ἔχουσι· |
| 87 | Primary μή μιν κερτομέωσιν, ἐμοὶ δʼ ἄχος ἔσσεται αἰνόν. |
| 88 | Primary πρῆξαι δʼ ἀργαλέον τι μετὰ πλεόνεσσιν ἐόντα |
| 89 | Primary ἄνδρα καὶ ἴφθιμον, ἐπεὶ ἦ πολὺ φέρτεροί εἰσι. |
| 90 | Primary τὸν δʼ αὖτε προσέειπε πολύτλας δῖος Ὀδυσσεύς· |
| 91 | Primary ὦ φίλʼ, ἐπεί θήν μοι καὶ ἀμείψασθαι θέμις ἐστίν, |
| 92 | Primary ἦ μάλα μευ καταδάπτετʼ ἀκούοντος φίλον ἦτορ, |
| 93 | Primary οἷά φατε μνηστῆρας ἀτάσθαλα μηχανάασθαι |
| 94 | Primary ἐν μεγάροις, ἀέκητι σέθεν τοιούτου ἐόντος. |
| 95 | Primary εἰπέ μοι ἠὲ ἑκὼν ὑποδάμνασαι, ἦ σέ γε λαοὶ |
| 96 | Primary ἐχθαίρουσʼ ἀνὰ δῆμον, ἐπισπόμενοι θεοῦ ὀμφῇ, |
| 97 | Primary ἦ τι κασιγνήτοις ἐπιμέμφεαι, οἷσί περ ἀνὴρ |
| 98 | Primary μαρναμένοισι πέποιθε, καὶ εἰ μέγα νεῖκος ὄρηται. |
| 99 | Primary αἲ γάρ ἐγὼν οὕτω νέος εἴην τῷδʼ ἐπὶ θυμῷ, |
| 100 | Primary ἢ παῖς ἐξ Ὀδυσῆος ἀμύμονος ἠὲ καὶ αὐτός· |
| 102 | Primary αὐτίκʼ ἔπειτʼ ἀπʼ ἐμεῖο κάρη τάμοι ἀλλότριος φώς, |
| 103 | Primary εἰ μὴ ἐγὼ κείνοισι κακὸν πάντεσσι γενοίμην, |
| 104 | Primary ἐλθὼν ἐς μέγαρον Λαερτιάδεω Ὀδυσῆος. |
| 105 | Primary εἰ δʼ αὖ με πληθυῖ δαμασαίατο μοῦνον ἐόντα, |
| 106 | Primary βουλοίμην κʼ ἐν ἐμοῖσι κατακτάμενος μεγάροισι |
| 107 | Primary τεθνάμεν ἢ τάδε γʼ αἰὲν ἀεικέα ἔργʼ ὁράασθαι, |
| 108 | Primary ξείνους τε στυφελιζομένους δμῳάς τε γυναῖκας |
| 109 | Primary ῥυστάζοντας ἀεικελίως κατὰ δώματα καλά, |
| 110 | Primary καὶ οἶνον διαφυσσόμενον, καὶ σῖτον ἔδοντας |
| 111 | Primary μὰψ αὔτως, ἀτέλεστον, ἀνηνύστῳ ἐπὶ ἔργῳ. |
| 112 | Primary τὸν δʼ αὖ Τηλέμαχος πεπνυμένος ἀντίον ηὔδα· |
| 113 | Primary τοιγὰρ ἐγώ τοι, ξεῖνε, μάλʼ ἀτρεκέως ἀγορεύσω. |
| 114 | Primary οὔτε τί μοι πᾶς δῆμος ἀπεχθόμενος χαλεπαίνει, |
| 115 | Primary οὔτε κασιγνήτοις ἐπιμέμφομαι, οἷσί περ ἀνὴρ |
| 116 | Primary μαρναμένοισι πέποιθε, καὶ εἰ μέγα νεῖκος ὄρηται. |
| 117 | Primary ὧδε γὰρ ἡμετέρην γενεὴν μούνωσε Κρονίων· |
| 118 | Primary μοῦνον Λαέρτην Ἀρκείσιος υἱὸν ἔτικτε, |
| 119 | Primary μοῦνον δʼ αὖτʼ Ὀδυσῆα πατὴρ τέκεν· αὐτὰρ Ὀδυσσεὺς |
| 120 | Primary μοῦνον ἔμʼ ἐν μεγάροισι τεκὼν λίπεν οὐδʼ ἀπόνητο. |
| 121 | Primary τῷ νῦν δυσμενέες μάλα μυρίοι εἴσʼ ἐνὶ οἴκῳ. |
| 122 | Primary ὅσσοι γὰρ νήσοισιν ἐπικρατέουσιν ἄριστοι, |
| 123 | Primary Δουλιχίῳ τε Σάμῃ τε καὶ ὑλήεντι Ζακύνθῳ, |
| 124 | Primary ἠδʼ ὅσσοι κραναὴν Ἰθάκην κάτα κοιρανέουσι, |
| 125 | Primary τόσσοι μητέρʼ ἐμὴν μνῶνται, τρύχουσι δὲ οἶκον. |
| 126 | Primary ἡ δʼ οὔτʼ ἀρνεῖται στυγερὸν γάμον οὔτε τελευτὴν |
| 127 | Primary ποιῆσαι δύναται· τοὶ δὲ φθινύθουσιν ἔδοντες |
| 128 | Primary οἶκον ἐμόν· τάχα δή με διαρραίσουσι καὶ αὐτόν. |
| 129 | Primary ἀλλʼ ἦ τοι μὲν ταῦτα θεῶν ἐν γούνασι κεῖται· |
| 130 | Primary ἄττα, σὺ δʼ ἔρχεο θᾶσσον, ἐχέφρονι Πηνελοπείῃ |
| 131 | Primary εἴφʼ ὅτι οἱ σῶς εἰμὶ καὶ ἐκ Πύλου εἰλήλουθα. |
| 132 | Primary αὐτὰρ ἐγὼν αὐτοῦ μενέω, σὺ δὲ δεῦρο νέεσθαι, |
| 133 | Primary οἴῃ ἀπαγγείλας· τῶν δʼ ἄλλων μή τις Ἀχαιῶν |
| 134 | Primary πευθέσθω· πολλοὶ γὰρ ἐμοὶ κακὰ μηχανόωνται. |
| 135 | Primary τὸν δʼ ἀπαμειβόμενος προσέφης, Εὔμαιε συβῶτα· |
| 136 | Primary γιγνώσκω, φρονέω· τά γε δὴ νοέοντι κελεύεις. |
| 137 | Primary ἀλλʼ ἄγε μοι τόδε εἰπὲ καὶ ἀτρεκέως κατάλεξον, |
| 138 | Primary ἦ καὶ Λαέρτῃ αὐτὴν ὁδὸν ἄγγελος ἔλθω |
| 139 | Primary δυσμόρῳ, ὃς τῆος μὲν Ὀδυσσῆος μέγʼ ἀχεύων |
| 140 | Primary ἔργα τʼ ἐποπτεύεσκε μετὰ δμώων τʼ ἐνὶ οἴκῳ |
| 141 | Primary πῖνε καὶ ἦσθʼ, ὅτε θυμὸς ἐνὶ στήθεσσιν ἀνώγοι· |
| 142 | Primary αὐτὰρ νῦν, ἐξ οὗ σύ γε ᾤχεο νηῒ Πύλονδε, |
| 143 | Primary οὔ πω μίν φασιν φαγέμεν καὶ πιέμεν αὔτως, |
| 144 | Primary οὐδʼ ἐπὶ ἔργα ἰδεῖν, ἀλλὰ στοναχῇ τε γόῳ τε |
| 145 | Primary ἧσται ὀδυρόμενος, φθινύθει δʼ ἀμφʼ ὀστεόφι χρώς. |
| 146 | Primary τὸν δʼ αὖ Τηλέμαχος πεπνυμένος ἀντίον ηὔδα· |
| 147 | Primary ἄλγιον, ἀλλʼ ἔμπης μιν ἐάσομεν, ἀχνύμενοί περ· |
| 148 | Primary εἰ γὰρ πως εἴη αὐτάγρετα πάντα βροτοῖσι, |
| 149 | Primary πρῶτόν κεν τοῦ πατρὸς ἑλοίμεθα νόστιμον ἦμαρ. |
| 150 | Primary ἀλλὰ σύ γʼ ἀγγείλας ὀπίσω κίε, μηδὲ κατʼ ἀγροὺς |
| 151 | Primary πλάζεσθαι μετʼ ἐκεῖνον· ἀτὰρ πρὸς μητέρα εἰπεῖν |
| 152 | Primary ἀμφίπολον ταμίην ὀτρυνέμεν ὅττι τάχιστα |
| 153 | Primary κρύβδην· κείνη γὰρ κεν ἀπαγγείλειε γέροντι. |
| 154 | Primary ἦ ῥα καὶ ὦρσε συφορβόν· ὁ δʼ εἵλετο χερσὶ πέδιλα, |
| 155 | Primary δησάμενος δʼ ὑπὸ ποσσὶ πόλινδʼ ἴεν. οὐδʼ ἄρʼ Ἀθήνην |
| 156 | Primary λῆθεν ἀπὸ σταθμοῖο κιὼν Εὔμαιος ὑφορβός, |
| 157 | Primary ἀλλʼ ἥ γε σχεδὸν ἦλθε· δέμας δʼ ἤϊκτο γυναικὶ |
| 158 | Primary καλῇ τε μεγάλῃ τε καὶ ἀγλαὰ ἔργα ἰδυίῃ. |
| 159 | Primary στῆ δὲ κατʼ ἀντίθυρον κλισίης Ὀδυσῆϊ φανεῖσα· |
| 160 | Primary οὐδʼ ἄρα Τηλέμαχος ἴδεν ἀντίον οὐδʼ ἐνόησεν, |
| 161 | Primary οὐ γὰρ πω πάντεσσι θεοὶ φαίνονται ἐναργεῖς, |
| 162 | Primary ἀλλʼ Ὀδυσεύς τε κύνες τε ἴδον, καί ῥʼ οὐχ ὑλάοντο |
| 163 | Primary κνυζηθμῷ δʼ ἑτέρωσε διὰ σταθμοῖο φόβηθεν. |
| 164 | Primary ἡ δʼ ἄρʼ ἐπʼ ὀφρύσι νεῦσε· νόησε δὲ δῖος Ὀδυσσεύς, |
| 165 | Primary ἐκ δʼ ἦλθεν μεγάροιο παρὲκ μέγα τειχίον αὐλῆς, |
| 166 | Primary στῆ δὲ πάροιθʼ αὐτῆς· τὸν δὲ προσέειπεν Ἀθήνη· |
| 167 | Primary διογενὲς Λαερτιάδη, πολυμήχανʼ Ὀδυσσεῦ. |
| 168 | Primary ἤδη νῦν σῷ παιδὶ ἔπος φάο μηδʼ ἐπίκευθε, |
| 169 | Primary ὡς ἄν μνηστῆρσιν θάνατον καὶ κῆρʼ ἀραρόντε |
| 170 | Primary ἔρχησθον προτὶ ἄστυ περικλυτόν· οὐδʼ ἐγὼ αὐτὴ |
| 171 | Primary δηρὸν ἀπὸ σφῶϊν ἔσομαι μεμαυῖα μάχεσθαι. |
| 172 | Primary ἦ καὶ χρυσείῃ ῥάβδῳ ἐπεμάσσατʼ Ἀθήνη. |
| 173 | Primary φᾶρος μέν οἱ πρῶτον ἐϋπλυνὲς ἠδὲ χιτῶνα |
| 174 | Primary θῆκʼ ἀμφὶ στήθεσσι, δέμας δʼ ὤφελλε καὶ ἥβην. |
| 175 | Primary ἂψ δὲ μελαγχροιὴς γένετο, γναθμοὶ δὲ τάνυσθεν, |
| 176 | Primary κυάνεαι δʼ ἐγένοντο γενειάδες ἀμφὶ γένειον. |
| 177 | Primary ἡ μὲν ἄρʼ ὣς ἔρξασα πάλιν κίεν· αὐτὰρ Ὀδυσσεὺς |
| 178 | Primary ἤϊεν ἐς κλισίην· θάμβησε δέ μιν φίλος υἱός, |
| 179 | Primary ταρβήσας δʼ ἑτέρωσε βάλʼ ὄμματα, μὴ θεὸς εἴη, |
| 180 | Primary καί μιν φωνήσας ἔπεα πτερόεντα προσηύδα· |
| 181 | Primary ἀλλοῖός μοι, ξεῖνε, φάνης νέον ἠὲ πάροιθεν, |
| 182 | Primary ἄλλα δὲ εἵματʼ ἔχεις, καί τοι χρὼς οὐκέθʼ ὁμοῖος. |
| 183 | Primary ἦ μάλα τις θεός ἐσσι, τοὶ οὐρανὸν εὐρὺν ἔχουσιν· |
| 184 | Primary ἀλλʼ ἵληθʼ, ἵνα τοι κεχαρισμένα δώομεν ἱρὰ |
| 185 | Primary ἠδὲ χρύσεα δῶρα, τετυγμένα· φείδεο δʼ ἡμέων |
| 186 | Primary τὸν δʼ ἠμείβετʼ ἔπειτα πολύτλας δῖος Ὀδυσσεύς· |
| 187 | Primary οὔ τίς τοι θεός εἰμι· τί μʼ ἀθανάτοισιν ἐΐσκεις; |
| 188 | Primary ἀλλὰ πατὴρ τεός εἰμι, τοῦ εἵνεκα σὺ στεναχίζων |
| 189 | Primary πάσχεις ἄλγεα πολλά, βίας ὑποδέγμενος ἀνδρῶν. |
| 190 | Primary ὣς ἄρα φωνήσας υἱὸν κύσε, κὰδ δὲ παρειῶν |
| 191 | Primary δάκρυον ἧκε χαμᾶζε· πάρος δʼ ἔχε νωλεμὲς αἰεί. |
| 192 | Primary Τηλέμαχος δʼ, οὐ γάρ πω ἐπείθετο ὃν πατέρʼ εἶναι, |
| 193 | Primary ἐξαῦτίς μιν ἔπεσσιν ἀμειβόμενος προσέειπεν· |
| 194 | Primary οὐ σύ γʼ Ὀδυσσεύς ἐσσι, πατὴρ ἐμός, ἀλλά με δαίμων |
| 195 | Primary θέλγει, ὄφρʼ ἔτι μᾶλλον ὀδυρόμενος στεναχίζω. |
| 196 | Primary οὐ γάρ πως ἂν θνητὸς ἀνὴρ τάδε μηχανόῳτο |
| 197 | Primary ᾧ αὐτοῦ γε νόῳ, ὅτε μὴ θεὸς αὐτὸς ἐπελθὼν |
| 198 | Primary ῥηϊδίως ἐθέλων θείη νέον ἠὲ γέροντα. |
| 199 | Primary ἦ γάρ τοι νέον ἦσθα γέρων καὶ ἀεικέα ἕσσο· |
| 200 | Primary νῦν δὲ θεοῖσιν ἔοικας, οἳ οὐρανὸν εὐρὺν ἔχουσι. |
| 201 | Primary τὸν δʼ ἀπαμειβόμενος προσέφη πολύμητις Ὀδυσσεύς· |
| 202 | Primary Τηλέμαχʼ, οὔ σε ἔοικε φίλον πατέρ ἔνδον ἐόντα |
| 203 | Primary οὔτε τι θαυμάζειν περιώσιον οὔτʼ ἀγάασθαι· |
| 204 | Primary οὐ μὲν γάρ τοι ἔτʼ ἄλλος ἐλεύσεται ἐνθάδʼ Ὀδυσσεύς, |
| 205 | Primary ἀλλʼ ὅδʼ ἐγὼ τοιόσδε, παθὼν κακά, πολλὰ δʼ ἀληθείς, |
| 206 | Primary ἤλυθον εἰκοστῷ ἔτεϊ ἐς πατρίδα γαῖαν. |
| 207 | Primary αὐτάρ τοι τόδε ἔργον Ἀθηναίης ἀγελείης, |
| 208 | Primary ἥ τέ με τοῖον ἔθηκεν, ὅπως ἐθέλει, δύναται γὰρ, |
| 209 | Primary ἄλλοτε μὲν πτωχῷ ἐναλίγκιον, ἄλλοτε δʼ αὖτε |
| 210 | Primary ἀνδρὶ νέῳ καὶ καλὰ περὶ χροῒ εἵματʼ ἔχοντι. |
| 211 | Primary ῥηΐδιον δὲ θεοῖσι, τοὶ οὐρανὸν εὐρὺν ἔχουσιν, |
| 212 | Primary ἠμὲν κυδῆναι θνητὸν βροτὸν ἠδὲ κακῶσαι. |
| 213 | Primary ὣς ἄρα φωνήσας κατʼ ἄρʼ ἕζετο, Τηλέμαχος δὲ |
| 214 | Primary ἀμφιχυθεὶς πατέρʼ ἐσθλὸν ὀδύρετο, δάκρυα λείβων, |
| 215 | Primary ἀμφοτέροισι δὲ τοῖσιν ὑφʼ ἵμερος ὦρτο γόοιο· |
| 216 | Primary κλαῖον δὲ λιγέως, ἀδινώτερον ἤ τʼ οἰωνοί, |
| 217 | Primary φῆναι ἢ αἰγυπιοὶ γαμψώνυχες, οἷσί τε τέκνα |
| 218 | Primary ἀγρόται ἐξείλοντο πάρος πετεηνὰ γενέσθαι· |
| 219 | Primary ὣς ἄρα τοί γʼ ἐλεεινὸν ὑπʼ ὀφρύσι δάκρυον εἶβον. |
| 220 | Primary καί νύ κʼ ὀδυρομένοισιν ἔδυ φάος ἠελίοιο, |
| 221 | Primary εἰ μὴ Τηλέμαχος προσεφώνεεν ὃν πατέρʼ αἶψα· |
| 222 | Primary ποίῃ γὰρ νῦν δεῦρο, πάτερ φίλε, νηΐ σε ναῦται |
| 223 | Primary ἤγαγον εἰς Ἰθάκην; τίνες ἔμμεναι εὐχετόωντο; |
| 224 | Primary οὐ μὲν γάρ τί σε πεζὸν ὀΐομαι ἐνθάδʼ ἱκέσθαι. |
| 225 | Primary τὸν δʼ αὖτε προσέειπε πολύτλας δῖος Ὀδυσσεύς· |
| 226 | Primary τοιγὰρ ἐγώ τοι, τέκνον, ἀληθείην καταλέξω. |
| 227 | Primary Φαίηκές μʼ ἄγαγον ναυσίκλυτοι, οἵ τε καὶ ἄλλους |
| 228 | Primary ἀνθρώπους πέμπουσιν, ὅτις σφέας εἰσαφίκηται· |
| 229 | Primary καί μʼ εὕδοντʼ ἐν νηῒ θοῇ ἐπὶ πόντον ἄγοντες |
| 230 | Primary κάτθεσαν εἰς Ἰθάκην, ἔπορον δέ μοι ἀγλαὰ δῶρα, |
| 231 | Primary χαλκόν τε χρυσόν τε ἅλις ἐσθῆτά θʼ ὑφαντήν. |
| 232 | Primary καὶ τὰ μὲν ἐν σπήεσσι θεῶν ἰότητι κέονται· |
| 233 | Primary νῦν αὖ δεῦρʼ ἱκόμην ὑποθημοσύνῃσιν Ἀθήνης, |
| 234 | Primary ὄφρα κε δυσμενέεσσι φόνου πέρι βουλεύσωμεν. |
| 235 | Primary ἀλλʼ ἄγε μοι μνηστῆρας ἀριθμήσας κατάλεξον, |
| 236 | Primary ὄφρʼ εἰδέω ὅσσοι τε καὶ οἵ τινες ἀνέρες εἰσί· |
| 237 | Primary καί κεν ἐμὸν κατὰ θυμὸν ἀμύμονα μερμηρίξας |
| 238 | Primary φράσσομαι, ἤ κεν νῶϊ δυνησόμεθʼ ἀντιφέρεσθαι |
| 239 | Primary μούνω ἄνευθʼ ἄλλων, ἦ καὶ διζησόμεθʼ ἄλλους. |
| 240 | Primary τὸν δʼ αὖ Τηλέμαχος πεπνυμένος ἀντίον ηὔδα· |
| 241 | Primary ὦ πάτερ, ἦ τοι σεῖο μέγα κλέος αἰὲν ἄκουον, |
| 242 | Primary χεῖράς τʼ αἰχμητὴν ἔμεναι καὶ ἐπίφρονα βουλήν· |
| 243 | Primary ἀλλὰ λίην μέγα εἶπες· ἄγη μʼ ἔχει· οὐδέ κεν εἴη |
| 244 | Primary ἄνδρε δύω πολλοῖσι καὶ ἰφθίμοισι μάχεσθαι. |
| 245 | Primary μνηστήρων δʼ οὔτʼ ἂρ δεκὰς ἀτρεκὲς οὔτε δύʼ οἶαι, |
| 246 | Primary ἀλλὰ πολὺ πλέονες· τάχα δʼ εἴσεαι ἐνθάδʼ ἀριθμόν. |
| 247 | Primary ἐκ μὲν Δουλιχίοιο δύω καὶ πεντήκοντα |
| 248 | Primary κοῦροι κεκριμένοι, ἓξ δὲ δρηστῆρες ἕπονται· |
| 249 | Primary ἐκ δὲ Σάμης πίσυρές τε καὶ εἴκοσι φῶτες ἔασιν, |
| 250 | Primary ἐκ δὲ Ζακύνθου ἔασιν ἐείκοσι κοῦροι Ἀχαιῶν, |
| 251 | Primary ἐκ δʼ αὐτῆς Ἰθάκης δυοκαίδεκα πάντες ἄριστοι, |
| 252 | Primary καί σφιν ἅμʼ ἐστὶ Μέδων κῆρυξ καὶ θεῖος ἀοιδὸς |
| 253 | Primary καὶ δοιὼ θεράποντε, δαήμονε δαιτροσυνάων. |
| 254 | Primary τῶν εἴ κεν πάντων ἀντήσομεν ἔνδον ἐόντων, |
| 255 | Primary μὴ πολύπικρα καὶ αἰνὰ βίας ἀποτίσεαι ἐλθών. |
| 256 | Primary ἀλλὰ σύ γʼ, εἰ δύνασαί τινʼ ἀμύντορα μερμηρίξαι, |
| 257 | Primary φράζευ, ὅ κέν τις νῶϊν ἀμύνοι πρόφρονι θυμῷ. |
| 258 | Primary τὸν δʼ αὖτε προσέειπε πολύτλας δῖος Ὀδυσσεύς· |
| 259 | Primary τοιγὰρ ἐγὼν ἐρέω, σὺ δὲ σύνθεο καί μευ ἄκουσον· |
| 260 | Primary καὶ φράσαι ἤ κεν νῶϊν Ἀθήνη σὺν Διὶ πατρὶ |
| 261 | Primary ἀρκέσει, ἦέ τινʼ ἄλλον ἀμύντορα μερμηρίξω. |
| 262 | Primary τὸν δʼ αὖ Τηλέμαχος πεπνυμένος ἀντίον ηὔδα· |
| 263 | Primary ἐσθλώ τοι τούτω γʼ ἐπαμύντορε, τοὺς ἀγορεύεις, |
| 264 | Primary ὕψι περ ἐν νεφέεσσι καθημένω· ὥ τε καὶ ἄλλοις |
| 265 | Primary ἀνδράσι τε κρατέουσι καὶ ἀθανάτοισι θεοῖσι. |
| 266 | Primary τὸν δʼ αὖτε προσέειπε πολύτλας δῖος Ὀδυσσεύς· |
| 267 | Primary οὐ μέν τοι κείνω γε πολὺν χρόνον ἀμφὶς ἔσεσθον |
| 268 | Primary φυλόπιδος κρατερῆς, ὁπότε μνηστῆρσι καὶ ἡμῖν |
| 269 | Primary ἐν μεγάροισιν ἐμοῖσι μένος κρίνηται Ἄρηος. |
| 270 | Primary ἀλλὰ σὺ μὲν νῦν ἔρχευ ἅμʼ ἠοῖ φαινομένηφιν |
| 271 | Primary οἴκαδε, καὶ μνηστῆρσιν ὑπερφιάλοισιν ὁμίλει· |
| 272 | Primary αὐτὰρ ἐμὲ προτὶ ἄστυ συβώτης ὕστερον ἄξει, |
| 273 | Primary πτωχῷ λευγαλέῳ ἐναλίγκιον ἠδὲ γέροντι. |
| 274 | Primary εἰ δέ μʼ ἀτιμήσουσι δόμον κάτα, σὸν δὲ φίλον κῆρ |
| 275 | Primary τετλάτω ἐν στήθεσσι κακῶς πάσχοντος ἐμεῖο, |
| 276 | Primary ἤν περ καὶ διὰ δῶμα ποδῶν ἕλκωσι θύραζε |
| 277 | Primary ἢ βέλεσι βάλλωσι· σὺ δʼ εἰσορόων ἀνέχεσθαι. |
| 278 | Primary ἀλλʼ ἦ τοι παύεσθαι ἀνωγέμεν ἀφροσυνάων, |
| 279 | Primary μειλιχίοις ἐπέεσσι παραυδῶν· οἱ δέ τοι οὔ τι |
| 280 | Primary πείσονται· δὴ γάρ σφι παρίσταται αἴσιμον ἦμαρ. |
| 281 | Primary ἄλλο δέ τοι ἐρέω, σὺ δʼ ἐνὶ φρεσὶ βάλλεο σῇσιν· |
| 282 | Primary ὁππότε κεν πολύβουλος ἐνὶ φρεσὶ θῇσιν Ἀθήνη, |
| 283 | Primary νεύσω μέν τοι ἐγὼ κεφαλῇ, σὺ δʼ ἔπειτα νοήσας |
| 284 | Primary ὅσσα τοι ἐν μεγάροισιν Ἀρήϊα τεύχεα κεῖται |
| 285 | Primary ἐς μυχὸν ὑψηλοῦ θαλάμου καταθεῖναι ἀείρας |
| 286 | Primary πάντα μάλʼ· αὐτὰρ μνηστῆρας μαλακοῖς ἐπέεσσι |
| 287 | Primary παρφάσθαι, ὅτε κέν σε μεταλλῶσιν ποθέοντες· |
| 288 | Primary ἐκ καπνοῦ κατέθηκʼ, ἐπεὶ οὐκέτι τοῖσιν ἐῴκει |
| 289 | Primary οἷά ποτε Τροίηνδε κιὼν κατέλειπεν Ὀδυσσεύς, |
| 290 | Primary ἀλλὰ κατῄκισται, ὅσσον πυρὸς ἵκετʼ ἀϋτμή. |
| 291 | Primary πρὸς δʼ ἔτι καὶ τόδε μεῖζον ἐνὶ φρεσὶ θῆκε Κρονίων, |
| 292 | Primary μή πως οἰνωθέντες, ἔριν στήσαντες ἐν ὑμῖν, |
| 293 | Primary ἀλλήλους τρώσητε καταισχύνητέ τε δαῖτα |
| 294 | Primary καὶ μνηστύν· αὐτὸς γὰρ ἐφέλκεται ἄνδρα σίδηρος. |
| 295 | Primary νῶϊν δʼ οἴοισιν δύο φάσγανα καὶ δύο δοῦρε |
| 296 | Primary καλλιπέειν καὶ δοιὰ βοάγρια χερσὶν ἑλέσθαι, |
| 297 | Primary ὡς ἂν ἐπιθύσαντες ἑλοίμεθα· τοὺς δέ κʼ ἔπειτα |
| 298 | Primary Παλλὰς Ἀθηναίη θέλξει καὶ μητίετα Ζεύς. |
| 299 | Primary ἄλλο δέ τοι ἐρέω, σὺ δʼ ἐνὶ φρεσὶ βάλλεο σῇσιν· |
| 300 | Primary εἰ ἐτεόν γʼ ἐμός ἐσσι καὶ αἵματος ἡμετέροιο, |
| 301 | Primary μή τις ἔπειτʼ Ὀδυσῆος ἀκουσάτω ἔνδον ἐόντος, |
| 302 | Primary μήτʼ οὖν Λαέρτης ἴστω τό γε μήτε συβώτης |
| 303 | Primary μήτε τις οἰκήων μήτʼ αὐτὴ Πηνελόπεια, |
| 304 | Primary ἀλλʼ οἶοι σύ τʼ ἐγώ τε γυναικῶν γνώομεν ἰθύν· |
| 305 | Primary καί κέ τεο δμώων ἀνδρῶν ἔτι πειρηθεῖμεν, |
| 306 | Primary ἠμὲν ὅπου τις νῶϊ τίει καὶ δείδιε θυμῷ, |
| 307 | Primary ἠδʼ ὅτις οὐκ ἀλέγει, σὲ δʼ ἀτιμᾷ τοῖον ἐόντα. |
| 308 | Primary τὸν δʼ ἀπαμειβόμενος προσεφώνεε φαίδιμος υἱός |
| 309 | Primary ὦ πάτερ, ἦ τοι ἐμὸν θυμὸν καὶ ἔπειτά γʼ, ὀΐω, |
| 310 | Primary γνώσεαι· οὐ μὲν γάρ τι χαλιφροσύναι γέ μʼ ἔχουσιν· |
| 311 | Primary ἀλλʼ οὔ τοι τόδε κέρδος ἐγὼν ἔσσεσθαι ὀΐω |
| 312 | Primary ἡμῖν ἀμφοτέροισι· σὲ δὲ φράζεσθαι ἄνωγα. |
| 313 | Primary δηθὰ γὰρ αὔτως εἴσῃ ἑκάστου πειρητίζων, |
| 314 | Primary ἔργα μετερχόμενος· τοὶ δʼ ἐν μεγάροισιν ἕκηλοι |
| 315 | Primary χρήματα δαρδάπτουσιν ὑπέρβιον οὐδʼ ἔπι φειδώ. |
| 316 | Primary ἀλλʼ ἦ τοί σε γυναῖκας ἐγὼ δεδάασθαι ἄνωγα, |
| 317 | Primary αἵ τέ σʼ ἀτιμάζουσι καὶ αἳ νηλείτιδές εἰσιν· |
| 318 | Primary ἀνδρῶν δʼ οὐκ ἂν ἐγώ γε κατὰ σταθμοὺς ἐθέλοιμι |
| 319 | Primary ἡμέας πειράζειν, ἀλλʼ ὕστερα ταῦτα πένεσθαι, |
| 320 | Primary εἰ ἐτεόν γέ τι οἶσθα Διὸς τέρας αἰγιόχοιο. |
| 321 | Primary ὣς οἱ μὲν τοιαῦτα πρὸς ἀλλήλους ἀγόρευον, |
| 322 | Primary ἡ δʼ ἄρʼ ἔπειτʼ Ἰθάκηνδε κατήγετο νηῦς εὐεργής, |
| 323 | Primary ἣ φέρε Τηλέμαχον Πυλόθεν καὶ πάντας ἑταίρους. |
| 324 | Primary οἱ δʼ ὅτε δὴ λιμένος πολυβενθέος ἐντὸς ἵκοντο, |
| 325 | Primary νῆα μὲν οἵ γε μέλαιναν ἐπʼ ἠπείροιο ἔρυσσαν, |
| 326 | Primary τεύχεα δέ σφʼ ἀπένεικαν ὑπέρθυμοι θεράποντες, |
| 327 | Primary αὐτίκα δʼ ἐς Κλυτίοιο φέρον περικαλλέα δῶρα. |
| 328 | Primary αὐτὰρ κήρυκα πρόεσαν δόμον εἰς Ὀδυσῆος, |
| 329 | Primary ἀγγελίην ἐρέοντα περίφρονι Πηνελοπείῃ, |
| 330 | Primary οὕνεκα Τηλέμαχος μὲν ἐπʼ ἀγροῦ, νῆα δʼ ἀνώγει |
| 331 | Primary ἄστυδʼ ἀποπλείειν, ἵνα μὴ δείσασʼ ἐνὶ θυμῷ |
| 332 | Primary ἰφθίμη βασίλεια τέρεν κατὰ δάκρυον εἴβοι |
| 333 | Primary τὼ δὲ συναντήτην κῆρυξ καὶ δῖος ὑφορβὸς |
| 334 | Primary τῆς αὐτῆς ἕνεκʼ ἀγγελίης, ἐρέοντε γυναικί. |
| 335 | Primary ἀλλʼ ὅτε δή ῥʼ ἵκοντο δόμον θείου βασιλῆος, |
| 336 | Primary κῆρυξ μέν ῥα μέσῃσι μετὰ δμῳῇσιν ἔειπεν· |
| 337 | Primary ἤδη τοι, βασίλεια, φίλος πάϊς εἰλήλουθε. |
| 338 | Primary Πηνελοπείῃ δʼ εἶπε συβώτης ἄγχι παραστὰς |
| 339 | Primary πάνθʼ ὅσα οἱ φίλος υἱὸς ἀνώγει μυθήσασθαι. |
| 340 | Primary αὐτὰρ ἐπεὶ δὴ πᾶσαν ἐφημοσύνην ἀπέειπε, |
| 341 | Primary βῆ ῥʼ ἴμεναι μεθʼ ὕας, λίπε δʼ ἕρκεά τε μέγαρόν τε. |
| 342 | Primary μνηστῆρες δʼ ἀκάχοντο κατήφησάν τʼ ἐνὶ θυμῷ, |
| 343 | Primary ἐκ δʼ ἦλθον μεγάροιο παρὲκ μέγα τειχίον αὐλῆς, |
| 344 | Primary αὐτοῦ δὲ προπάροιθε θυράων ἑδριόωντο. |
| 345 | Primary τοῖσιν δʼ Εὐρύμαχος, Πολύβου πάϊς, ἦρχʼ ἀγορεύειν· |
| 346 | Primary ὦ φίλοι, ἦ μέγα ἔργον ὑπερφιάλως τετέλεσται |
| 347 | Primary Τηλεμάχῳ ὁδὸς ἥδε· φάμεν δέ οἱ οὐ τελέεσθαι. |
| 348 | Primary ἀλλʼ ἄγε νῆα μέλαιναν ἐρύσσομεν ἥ τις ἀρίστη, |
| 349 | Primary ἐς δʼ ἐρέτας ἁλιῆας ἀγείρομεν, οἵ κε τάχιστα |
| 350 | Primary κείνοις ἀγγείλωσι θοῶς οἶκόνδε νέεσθαι. |
| 351 | Primary οὔ πω πᾶν εἴρηθʼ, ὅτʼ ἄρʼ Ἀμφίνομος ἴδε νῆα, |
| 352 | Primary στρεφθεὶς ἐκ χώρης, λιμένος πολυβενθέος ἐντός, |
| 353 | Primary ἱστία τε στέλλοντας ἐρετμά τε χερσὶν ἔχοντας. |
| 354 | Primary ἡδὺ δʼ ἄρʼ ἐκγελάσας μετεφώνεεν οἷς ἑτάροισι· |
| 355 | Primary μή τινʼ ἔτʼ ἀγγελίην ὀτρύνομεν· οἵδε γὰρ ἔνδον. |
| 356 | Primary ἤ τίς σφιν τόδʼ ἔειπε θεῶν, ἢ εἴσιδον αὐτοὶ |
| 357 | Primary νῆα παρερχομένην, τὴν δʼ οὐκ ἐδύναντο κιχῆναι. |
| 358 | Primary ὣς ἔφαθʼ, οἱ δʼ ἀνστάντες ἔβαν ἐπὶ θῖνα θαλάσσης, |
| 359 | Primary αἶψα δὲ νῆα μέλαιναν ἐπʼ ἠπείροιο ἔρυσσαν, |
| 360 | Primary τεύχεα δέ σφʼ ἀπένεικαν ὑπέρθυμοι θεράποντες. |
| 361 | Primary αὐτοὶ δʼ εἰς ἀγορὴν κίον ἀθρόοι, οὐδέ τινʼ ἄλλον |
| 362 | Primary εἴων οὔτε νέων μεταΐζειν οὔτε γερόντων. |
| 363 | Primary τοῖσιν δʼ Ἀντίνοος μετέφη, Εὐπείθεος υἱός· |
| 364 | Primary ὢ πόποι, ὡς τόνδʼ ἄνδρα θεοὶ κακότητος ἔλυσαν. |
| 365 | Primary ἤματα μὲν σκοποὶ ἷζον ἐπʼ ἄκριας ἠνεμοέσσας |
| 366 | Primary αἰὲν ἐπασσύτεροι· ἅμα δʼ ἠελίῳ καταδύντι |
| 367 | Primary οὔ ποτʼ ἐπʼ ἠπείρου νύκτʼ ἄσαμεν, ἀλλʼ ἐνὶ πόντῳ |
| 368 | Primary νηῒ θοῇ πλείοντες ἐμίμνομεν Ἠῶ δῖαν, |
| 369 | Primary Τηλέμαχον λοχόωντες, ἵνα φθίσωμεν ἑλόντες |
| 370 | Primary αὐτόν· τὸν δʼ ἄρα τῆος ἀπήγαγεν οἴκαδε δαίμων, |
| 371 | Primary ἡμεῖς δʼ ἐνθάδε οἱ φραζώμεθα λυγρὸν ὄλεθρον |
| 372 | Primary Τηλεμάχῳ, μηδʼ ἧμας ὑπεκφύγοι· οὐ γὰρ ὀΐω |
| 373 | Primary τούτου γε ζώοντος ἀνύσσεσθαι τάδε ἔργα. |
| 374 | Primary αὐτὸς μὲν γὰρ ἐπιστήμων βουλῇ τε νόῳ τε, |
| 375 | Primary λαοὶ δʼ οὐκέτι πάμπαν ἐφʼ ἡμῖν ἦρα φέρουσιν. |
| 376 | Primary ἀλλʼ ἄγετε, πρὶν κεῖνον ὁμηγυρίσασθαι Ἀχαιοὺς |
| 377 | Primary εἰς ἀγορήν—οὐ γάρ τι μεθησέμεναί μιν ὀΐω, |
| 378 | Primary ἀλλʼ ἀπομηνίσει, ἐρέει δʼ ἐν πᾶσιν ἀναστὰς |
| 379 | Primary οὕνεκά οἱ φόνον αἰπὺν ἐράπτομεν οὐδʼ ἐκίχημεν· |
| 380 | Primary οἱ δʼ οὐκ αἰνήσουσιν ἀκούοντες κακὰ ἔργα· |
| 381 | Primary μή τι κακὸν ῥέξωσι καὶ ἡμέας ἐξελάσωσι |
| 382 | Primary γαίης ἡμετέρης, ἄλλων δʼ ἀφικώμεθα δῆμον· |
| 383 | Primary ἀλλὰ φθέωμεν ἑλόντες ἐπʼ ἀγροῦ νόσφι πόληος |
| 384 | Primary ἢ ἐν ὁδῷ· βίοτον δʼ αὐτοὶ καὶ κτήματʼ ἔχωμεν, |
| 385 | Primary δασσάμενοι κατὰ μοῖραν ἐφʼ ἡμέας, οἰκία δʼ αὖτε |
| 386 | Primary κείνου μητέρι δοῖμεν ἔχειν ἠδʼ ὅστις ὀπυίοι. |
| 387 | Primary εἰ δʼ ὑμῖν ὅδε μῦθος ἀφανδάνει, ἀλλὰ βόλεσθε |
| 388 | Primary αὐτόν τε ζώειν καὶ ἔχειν πατρώϊα πάντα, |
| 389 | Primary μή οἱ χρήματʼ ἔπειτα ἅλις θυμηδέʼ ἔδωμεν |
| 390 | Primary ἐνθάδʼ ἀγειρόμενοι, ἀλλʼ ἐκ μεγάροιο ἕκαστος |
| 391 | Primary μνάσθω ἐέδνοισιν διζήμενος· ἡ δέ κʼ ἔπειτα |
| 392 | Primary γήμαιθʼ ὅς κε πλεῖστα πόροι καὶ μόρσιμος ἔλθοι. |
| 393 | Primary ὣς ἔφαθʼ, οἱ δʼ ἄρα πάντες ἀκὴν ἐγένοντο σιωπῇ. |
| 394 | Primary τοῖσιν δʼ Ἀμφίνομος ἀγορήσατο καὶ μετέειπε, |
| 395 | Primary Νίσου φαίδιμος υἱός, Ἀρητιάδαο ἄνακτος, |
| 396 | Primary ὅς ῥʼ ἐκ Δουλιχίου πολυπύρου, ποιήεντος, |
| 397 | Primary ἡγεῖτο μνηστῆρσι, μάλιστα δὲ Πηνελοπείῃ |
| 398 | Primary ἥνδανε μύθοισι· φρεσὶ γὰρ κέχρητʼ ἀγαθῇσιν· |
| 399 | Primary ὅ σφιν ἐϋφρονέων ἀγορήσατο καὶ μετέειπεν· |
| 400 | Primary ὦ φίλοι, οὐκ ἂν ἐγώ γε κατακτείνειν ἐθέλοιμι |
| 401 | Primary Τηλέμαχον· δεινὸν δὲ γένος βασιλήϊόν ἐστιν |
| 402 | Primary κτείνειν· ἀλλὰ πρῶτα θεῶν εἰρώμεθα βουλάς. |
| 403 | Primary εἰ μέν κʼ αἰνήσωσι Διὸς μεγάλοιο θέμιστες, |
| 404 | Primary αὐτός τε κτενέω τούς τʼ ἄλλους πάντας ἀνώξω· |
| 405 | Primary εἰ δέ κʼ ἀποτρωπῶσι θεοί, παύσασθαι ἄνωγα. |
| 406 | Primary ὣς ἔφατʼ Ἀμφίνομος, τοῖσιν δʼ ἐπιήνδανε μῦθος. |
| 407 | Primary αὐτίκʼ ἔπειτʼ ἀνστάντες ἔβαν δόμον εἰς Ὀδυσῆος, |
| 408 | Primary ἐλθόντες δὲ καθῖζον ἐπὶ ξεστοῖσι θρόνοισιν. |
| 409 | Primary ἡ δʼ αὖτʼ ἄλλʼ ἐνόησε περίφρων Πηνελόπεια, |
| 410 | Primary μνηστήρεσσι φανῆναι ὑπέρβιον ὕβριν ἔχουσι. |
| 411 | Primary πεύθετο γὰρ οὗ παιδὸς ἐνὶ μεγάροισιν ὄλεθρον· |
| 412 | Primary κῆρυξ γὰρ οἱ ἔειπε Μέδων, ὃς ἐπεύθετο βουλάς. |
| 413 | Primary βῆ δʼ ἰέναι μέγαρόνδε σὺν ἀμφιπόλοισι γυναιξίν. |
| 414 | Primary ἀλλʼ ὅτε δὴ μνηστῆρας ἀφίκετο δῖα γυναικῶν, |
| 415 | Primary στῆ ῥα παρὰ σταθμὸν τέγεος πύκα ποιητοῖο, |
| 416 | Primary ἄντα παρειάων σχομένη λιπαρὰ κρήδεμνα, |
| 417 | Primary Ἀντίνοον δʼ ἐνένιπεν ἔπος τʼ ἔφατʼ ἔκ τʼ ὀνόμαζεν· |
| 418 | Primary Ἀντίνοʼ, ὕβριν ἔχων, κακομήχανε, καὶ δέ σέ φασιν |
| 419 | Primary ἐν δήμῳ Ἰθάκης μεθʼ ὁμήλικας ἔμμεν ἄριστον |
| 420 | Primary βουλῇ καὶ μύθοισι· σὺ δʼ οὐκ ἄρα τοῖος ἔησθα. |
| 421 | Primary μάργε, τίη δὲ σὺ Τηλεμάχῳ θάνατόν τε μόρον τε |
| 422 | Primary ῥάπτεις, οὐδʼ ἱκέτας ἐμπάζεαι, οἷσιν ἄρα Ζεὺς |
| 423 | Primary μάρτυρος; οὐδʼ ὁσίη κακὰ ῥάπτειν ἀλλήλοισιν. |
| 424 | Primary ἦ οὐκ οἶσθʼ ὅτε δεῦρο πατὴρ τεὸς ἵκετο φεύγων, |
| 425 | Primary δῆμον ὑποδείσας; δὴ γὰρ κεχολώατο λίην, |
| 426 | Primary οὕνεκα ληϊστῆρσιν ἐπισπόμενος Ταφίοισιν |
| 427 | Primary ἤκαχε Θεσπρωτούς· οἱ δʼ ἡμῖν ἄρθμιοι ἦσαν· |
| 428 | Primary τόν ῥʼ ἔθελον φθῖσαι καὶ ἀπορραῖσαι φίλον ἦτορ |
| 429 | Primary ἠδὲ κατὰ ζωὴν φαγέειν μενοεικέα πολλήν· |
| 430 | Primary ἀλλʼ Ὀδυσεὺς κατέρυκε καὶ ἔσχεθεν ἱεμένους περ. |
| 431 | Primary τοῦ νῦν οἶκον ἄτιμον ἔδεις, μνάᾳ δὲ γυναῖκα |
| 432 | Primary παῖδά τʼ ἀποκτείνεις, ἐμὲ δὲ μεγάλως ἀκαχίζεις· |
| 433 | Primary ἀλλά σε παύσασθαι κέλομαι καὶ ἀνωγέμεν ἄλλους. |
| 434 | Primary τὴν δʼ αὖτʼ Εὐρύμαχος, Πολύβου πάϊς, ἀντίον ηὔδα· |
| 435 | Primary κούρη Ἰκαρίοιο, περίφρον Πηνελόπεια, |
| 436 | Primary θάρσει· μή τοι ταῦτα μετὰ φρεσὶ σῇσι μελόντων. |
| 437 | Primary οὐκ ἔσθʼ οὗτος ἀνὴρ οὐδʼ ἔσσεται οὐδὲ γένηται, |
| 438 | Primary ὅς κεν Τηλεμάχῳ σῷ υἱέϊ χεῖρας ἐποίσει |
| 439 | Primary ζώοντός γʼ ἐμέθεν καὶ ἐπὶ χθονὶ δερκομένοιο. |
| 440 | Primary ὧδε γὰρ ἐξερέω, καὶ μὴν τετελεσμένον ἔσται· |
| 441 | Primary αἶψά οἱ αἷμα κελαινὸν ἐρωήσει περὶ δουρὶ |
| 442 | Primary ἡμετέρῳ, ἐπεὶ ἦ καὶ ἐμὲ πτολίπορθος Ὀδυσσεὺς |
| 443 | Primary πολλάκι γούνασιν οἷσιν ἐφεσσάμενος κρέας ὀπτὸν |
| 444 | Primary ἐν χείρεσσιν ἔθηκεν, ἐπέσχε τε οἶνον ἐρυθρόν. |
| 445 | Primary τῷ μοι Τηλέμαχος πάντων πολὺ φίλτατός ἐστιν |
| 446 | Primary ἀνδρῶν, οὐδέ τί μιν θάνατον τρομέεσθαι ἄνωγα |
| 447 | Primary ἔκ γε μνηστήρων· θεόθεν δʼ οὐκ ἔστʼ ἀλέασθαι. |
| 448 | Primary ὣς φάτο θαρσύνων, τῷ δʼ ἤρτυεν αὐτὸς ὄλεθρον. |
| 449 | Primary ἡ μὲν ἄρʼ εἰσαναβᾶσʼ ὑπερώϊα σιγαλόεντα |
| 450 | Primary κλαῖεν ἔπειτʼ Ὀδυσῆα, φίλον πόσιν, ὄφρα οἱ ὕπνον |
| 451 | Primary ἡδὺν ἐπὶ βλεφάροισι βάλε γλαυκῶπις Ἀθήνη. |
| 452 | Primary ἑσπέριος δʼ Ὀδυσῆϊ καὶ υἱέϊ δῖος ὑφορβὸς |
| 453 | Primary ἤλυθεν· οἱ δʼ ἄρα δόρπον ἐπισταδὸν ὡπλίζοντο, |
| 454 | Primary σῦν ἱερεύσαντες ἐνιαύσιον. αὐτὰρ Ἀθήνη, |
| 455 | Primary ἄγχι παρισταμένη, Λαερτιάδην Ὀδυσῆα |
| 456 | Primary ῥάβδῳ πεπληγυῖα πάλιν ποίησε γέροντα, |
| 457 | Primary λυγρὰ δὲ εἵματα ἕσσε περὶ χροΐ, μή ἑ συβώτης |
| 458 | Primary γνοίη ἐσάντα ἰδὼν καὶ ἐχέφρονι Πηνελοπείῃ |
| 459 | Primary ἔλθοι ἀπαγγέλλων μηδὲ φρεσὶν εἰρύσσαιτο. |
| 460 | Primary τὸν καὶ Τηλέμαχος πρότερος πρὸς μῦθον ἔειπεν· |
| 461 | Primary ἦλθες, δῖʼ Εὔμαιε. τί δὴ κλέος ἔστʼ ἀνὰ ἄστυ; |
| 462 | Primary ἦ ῥʼ ἤδη μνηστῆρες ἀγήνορες ἔνδον ἔασιν |
| 463 | Primary ἐκ λόχου, ἦ ἔτι μʼ αὖτʼ εἰρύαται οἴκαδʼ ἰόντα; |
| 464 | Primary τὸν δʼ ἀπαμειβόμενος προσέφης, Εὔμαιε συβῶτα· |
| 465 | Primary οὐκ ἔμελέν μοι ταῦτα μεταλλῆσαι καὶ ἐρέσθαι |
| 466 | Primary ἄστυ καταβλώσκοντα· τάχιστά με θυμὸς ἀνώγει |
| 467 | Primary ἀγγελίην εἰπόντα πάλιν δεῦρʼ ἀπονέεσθαι. |
| 468 | Primary ὡμήρησε δέ μοι παρʼ ἑταίρων ἄγγελος ὠκύς, |
| 469 | Primary κῆρυξ, ὃς δὴ πρῶτος ἔπος σῇ μητρὶ ἔειπεν. |
| 470 | Primary ἄλλο δέ τοι τό γε οἶδα· τὸ γὰρ ἴδον ὀφθαλμοῖσιν. |
| 471 | Primary ἤδη ὑπὲρ πόλιος, ὅθι θʼ Ἕρμαιος λόφος ἐστίν, |
| 472 | Primary ἦα κιών, ὅτε νῆα θοὴν ἰδόμην κατιοῦσαν |
| 473 | Primary ἐς λιμένʼ ἡμέτερον· πολλοὶ δʼ ἔσαν ἄνδρες ἐν αὐτῇ, |
| 474 | Primary βεβρίθει δὲ σάκεσσι καὶ ἔγχεσιν ἀμφιγύοισι· |
| 475 | Primary καὶ σφέας ὠΐσθην τοὺς ἔμμεναι, οὐδέ τι οἶδα. |
| 476 | Primary ὣς φάτο, μείδησεν δʼ ἱερὴ ἲς Τηλεμάχοιο |
| 477 | Primary ἐς πατέρʼ ὀφθαλμοῖσιν ἰδών, ἀλέεινε δʼ ὑφορβόν. |
| 478 | Primary οἱ δʼ ἐπεὶ οὖν παύσαντο πόνου τετύκοντό τε δαῖτα, |
| 479 | Primary δαίνυντʼ, οὐδέ τι θυμὸς ἐδεύετο δαιτὸς ἐΐσης. |
| 480 | Primary αὐτὰρ ἐπεὶ πόσιος καὶ ἐδητύος ἐξ ἔρον ἕντο, |
| 481 | Primary κοίτου τε μνήσαντο καὶ ὕπνου δῶρον ἕλοντο. |