Reader
Reader | Odyssey, Book 18
Odyssey
Homer
Text
Position
Line 1 of 428
Waypoints
| Line Ref | A. T. Murray | Ancient Greek |
|---|---|
| 1 | Primary ἦλθε δʼ ἐπὶ πτωχὸς πανδήμιος, ὃς κατὰ ἄστυ |
| 2 | Primary πτωχεύεσκʼ Ἰθάκης, μετὰ δʼ ἔπρεπε γαστέρι μάργῃ |
| 3 | Primary ἀζηχὲς φαγέμεν καὶ πιέμεν· οὐδέ οἱ ἦν ἲς |
| 4 | Primary οὐδὲ βίη, εἶδος δὲ μάλα μέγας ἦν ὁράασθαι. |
| 5 | Primary Ἀρναῖος δʼ ὄνομʼ ἔσκε· τὸ γὰρ θέτο πότνια μήτηρ |
| 6 | Primary ἐκ γενετῆς· Ἶρον δὲ νέοι κίκλησκον ἅπαντες, |
| 7 | Primary οὕνεκʼ ἀπαγγέλλεσκε κιών, ὅτε πού τις ἀνώγοι· |
| 8 | Primary ὅς ῥʼ ἐλθὼν Ὀδυσῆα διώκετο οἷο δόμοιο, |
| 9 | Primary καί μιν νεικείων ἔπεα πτερόεντα προσηύδα· |
| 10 | Primary εἶκε, γέρον, προθύρου, μὴ δὴ τάχα καὶ ποδὸς ἕλκῃ. |
| 11 | Primary οὐκ ἀΐεις ὅτι δή μοι ἐπιλλίζουσιν ἅπαντες, |
| 12 | Primary ἑλκέμεναι δὲ κέλονται; ἐγὼ δʼ αἰσχύνομαι ἔμπης. |
| 13 | Primary ἀλλʼ ἄνα, μὴ τάχα νῶϊν ἔρις καὶ χερσὶ γένηται. |
| 14 | Primary τὸν δʼ ἄρʼ ὑπόδρα ἰδὼν προσέφη πολύμητις Ὀδυσσεύς· |
| 15 | Primary δαιμόνιʼ, οὔτε τί σε ῥέζω κακὸν οὔτʼ ἀγορεύω, |
| 16 | Primary οὔτε τινὰ φθονέω δόμεναι καὶ πόλλʼ ἀνελόντα. |
| 17 | Primary οὐδὸς δʼ ἀμφοτέρους ὅδε χείσεται, οὐδέ τί σε χρὴ |
| 18 | Primary ἀλλοτρίων φθονέειν· δοκέεις δέ μοι εἶναι ἀλήτης |
| 19 | Primary ὥς περ ἐγών, ὄλβον δὲ θεοὶ μέλλουσιν ὀπάζειν. |
| 20 | Primary χερσὶ δὲ μή τι λίην προκαλίζεο, μή με χολώσῃς, |
| 21 | Primary μή σε γέρων περ ἐὼν στῆθος καὶ χείλεα φύρσω |
| 22 | Primary αἵματος· ἡσυχίη δʼ ἂν ἐμοὶ καὶ μᾶλλον ἔτʼ εἴη |
| 23 | Primary αὔριον· οὐ μὲν γάρ τί σʼ ὑποστρέψεσθαι ὀΐω |
| 24 | Primary δεύτερον ἐς μέγαρον Λαερτιάδεω Ὀδυσῆος. |
| 25 | Primary τὸν δὲ χολωσάμενος προσεφώνεεν Ἶρος ἀλήτης· |
| 26 | Primary ὢ πόποι, ὡς ὁ μολοβρὸς ἐπιτροχάδην ἀγορεύει, |
| 27 | Primary γρηῒ καμινοῖ ἶσος· ὃν ἂν κακὰ μητισαίμην |
| 28 | Primary κόπτων ἀμφοτέρῃσι, χαμαὶ δέ κε πάντας ὀδόντας |
| 29 | Primary γναθμῶν ἐξελάσαιμι συὸς ὣς ληϊβοτείρης. |
| 30 | Primary ζῶσαι νῦν, ἵνα πάντες ἐπιγνώωσι καὶ οἵδε |
| 31 | Primary μαρναμένους· πῶς δʼ ἂν σὺ νεωτέρῳ ἀνδρὶ μάχοιο; |
| 32 | Primary ὣς οἱ μὲν προπάροιθε θυράων ὑψηλάων |
| 33 | Primary οὐδοῦ ἔπι ξεστοῦ πανθυμαδὸν ὀκριόωντο. |
| 34 | Primary τοῖϊν δὲ ξυνέηχʼ ἱερὸν μένος Ἀντινόοιο, |
| 35 | Primary ἡδὺ δʼ ἄρʼ ἐκγελάσας μετεφώνει μνηστήρεσσιν· |
| 36 | Primary ὦ φίλοι, οὐ μέν πώ τι πάρος τοιοῦτον ἐτύχθη, |
| 37 | Primary οἵην τερπωλὴν θεὸς ἤγαγεν ἐς τόδε δῶμα. |
| 38 | Primary ὁ ξεῖνός τε καὶ Ἶρος ἐρίζετον ἀλλήλοιϊν |
| 39 | Primary χερσὶ μαχέσσασθαι· ἀλλὰ ξυνελάσσομεν ὦκα. |
| 40 | Primary ὣς ἔφαθʼ, οἱ δʼ ἄρα πάντες ἀνήϊξαν γελόωντες, |
| 41 | Primary ἀμφὶ δʼ ἄρα πτωχοὺς κακοείμονας ἠγερέθοντο. |
| 42 | Primary τοῖσιν δʼ Ἀντίνοος μετέφη, Εὐπείθεος υἱός· |
| 43 | Primary κέκλυτέ μευ, μνηστῆρες ἀγήνορες, ὄφρα τι εἴπω. |
| 44 | Primary γαστέρες αἵδʼ αἰγῶν κέατʼ ἐν πυρί, τὰς ἐπὶ δόρπῳ |
| 45 | Primary κατθέμεθα κνίσης τε καὶ αἵματος ἐμπλήσαντες· |
| 46 | Primary ὁππότερος δέ κε νικήσῃ κρείσσων τε γένηται, |
| 47 | Primary τάων ἥν κʼ ἐθέλῃσιν ἀναστὰς αὐτὸς ἑλέσθω· |
| 48 | Primary αἰεὶ αὖθʼ ἡμῖν μεταδαίσεται, οὐδέ τινʼ ἄλλον |
| 49 | Primary πτωχὸν ἔσω μίσγεσθαι ἐάσομεν αἰτήσοντα. |
| 50 | Primary ὣς ἔφατʼ Ἀντίνοος, τοῖσιν δʼ ἐπιήνδανε μῦθος. |
| 51 | Primary τοῖς δὲ δολοφρονέων μετέφη πολύμητις Ὀδυσσεύς· |
| 52 | Primary ὦ φίλοι, οὔ πως ἔστι νεωτέρῳ ἀνδρὶ μάχεσθαι |
| 53 | Primary ἄνδρα γέροντα, δύῃ ἀρημένον· ἀλλά με γαστὴρ |
| 54 | Primary ὀτρύνει κακοεργός, ἵνα πληγῇσι δαμείω. |
| 55 | Primary ἀλλʼ ἄγε νῦν μοι πάντες ὀμόσσατε καρτερὸν ὅρκον, |
| 56 | Primary μή τις ἐπʼ Ἴρῳ ἦρα φέρων ἐμὲ χειρὶ βαρείῃ |
| 57 | Primary πλήξῃ ἀτασθάλλων, τούτῳ δέ με ἶφι δαμάσσῃ. |
| 58 | Primary ὣς ἔφαθʼ, οἱ δʼ ἄρα πάντες ἀπώμνυον ὡς ἐκέλευεν. |
| 59 | Primary αὐτὰρ ἐπεί ῥʼ ὄμοσάν τε τελεύτησάν τε τὸν ὅρκον, |
| 60 | Primary τοῖς δʼ αὖτις μετέειφʼ ἱερὴ ἲς Τηλεμάχοιο· |
| 61 | Primary ξεῖνʼ, εἴ σʼ ὀτρύνει κραδίη καὶ θυμὸς ἀγήνωρ |
| 62 | Primary τοῦτον ἀλέξασθαι, τῶν δʼ ἄλλων μή τινʼ Ἀχαιῶν |
| 63 | Primary δείδιθʼ, ἐπεὶ πλεόνεσσι μαχήσεται ὅς κέ σε θείνῃ· |
| 64 | Primary ξεινοδόκος μὲν ἐγών, ἐπὶ δʼ αἰνεῖτον βασιλῆες, |
| 65 | Primary Ἀντίνοός τε καὶ Εὐρύμαχος, πεπνυμένω ἄμφω. |
| 66 | Primary ὣς ἔφαθʼ, οἱ δʼ ἄρα πάντες ἐπῄνεον· αὐτὰρ Ὀδυσσεὺς |
| 67 | Primary ζώσατο μὲν ῥάκεσιν περὶ μήδεα, φαῖνε δὲ μηροὺς |
| 68 | Primary καλούς τε μεγάλους τε, φάνεν δέ οἱ εὐρέες ὦμοι |
| 69 | Primary στήθεά τε στιβαροί τε βραχίονες· αὐτὰρ Ἀθήνη |
| 70 | Primary ἄγχι παρισταμένη μέλεʼ ἤλδανε ποιμένι λαῶν. |
| 71 | Primary μνηστῆρες δʼ ἄρα πάντες ὑπερφιάλως ἀγάσαντο· |
| 72 | Primary ὧδε δέ τις εἴπεσκεν ἰδὼν ἐς πλησίον ἄλλον· |
| 73 | Primary ἦ τάχα Ἶρος Ἄϊρος ἐπίσπαστον κακὸν ἕξει, |
| 74 | Primary οἵην ἐκ ῥακέων ὁ γέρων ἐπιγουνίδα φαίνει. |
| 75 | Primary ὣς ἄρʼ ἔφαν, Ἴρῳ δὲ κακῶς ὠρίνετο θυμός. |
| 76 | Primary ἀλλὰ καὶ ὣς δρηστῆρες ἄγον ζώσαντες ἀνάγκῃ |
| 77 | Primary δειδιότα· σάρκες δὲ περιτρομέοντο μέλεσσιν. |
| 78 | Primary Ἀντίνοος δʼ ἐνένιπεν ἔπος τʼ ἔφατʼ ἔκ τʼ ὀνόμαζεν· |
| 79 | Primary νῦν μὲν μήτʼ εἴης, βουγάϊε, μήτε γένοιο, |
| 80 | Primary εἰ δὴ τοῦτόν γε τρομέεις καὶ δείδιας αἰνῶς, |
| 81 | Primary ἄνδρα γέροντα, δύῃ ἀρημένον, ἥ μιν ἱκάνει. |
| 82 | Primary ἀλλʼ ἔκ τοι ἐρέω, τὸ δὲ καὶ τετελεσμένον ἔσται· |
| 83 | Primary αἴ κέν σʼ οὗτος νικήσῃ κρείσσων τε γένηται, |
| 84 | Primary πέμψω σʼ ἤπειρόνδε, βαλὼν ἐν νηὶ μελαίνῃ, |
| 85 | Primary εἰς Ἔχετον βασιλῆα, βροτῶν δηλήμονα πάντων, |
| 86 | Primary ὅς κʼ ἀπὸ ῥῖνα τάμῃσι καὶ οὔατα νηλέϊ χαλκῷ, |
| 87 | Primary μήδεά τʼ ἐξερύσας δώῃ κυσὶν ὠμὰ δάσασθαι. |
| 88 | Primary ὣς φάτο, τῷ δʼ ἔτι μᾶλλον ὑπὸ τρόμος ἔλλαβε γυῖα. |
| 89 | Primary ἐς μέσσον δʼ ἄναγον· τὼ δʼ ἄμφω χεῖρας ἀνέσχον. |
| 90 | Primary δὴ τότε μερμήριξε πολύτλας δῖος Ὀδυσσεὺς |
| 91 | Primary ἢ ἐλάσειʼ ὥς μιν ψυχὴ λίποι αὖθι πεσόντα, |
| 92 | Primary ἦέ μιν ἦκʼ ἐλάσειε τανύσσειέν τʼ ἐπὶ γαίῃ. |
| 93 | Primary ὧδε δέ οἱ φρονέοντι δοάσσατο κέρδιον εἶναι, |
| 94 | Primary ἦκʼ ἐλάσαι, ἵνα μή μιν ἐπιφρασσαίατʼ Ἀχαιοί. |
| 95 | Primary δὴ τότʼ ἀνασχομένω ὁ μὲν ἤλασε δεξιὸν ὦμον |
| 96 | Primary Ἶρος, ὁ δʼ αὐχένʼ ἔλασσεν ὑπʼ οὔατος, ὀστέα δʼ εἴσω |
| 97 | Primary ἔθλασεν· αὐτίκα δʼ ἦλθε κατὰ στόμα φοίνιον αἷμα, |
| 98 | Primary κὰδ δʼ ἔπεσʼ ἐν κονίῃσι μακών, σὺν δʼ ἤλασʼ ὀδόντας |
| 99 | Primary λακτίζων ποσὶ γαῖαν· ἀτὰρ μνηστῆρες ἀγαυοὶ |
| 100 | Primary χεῖρας ἀνασχόμενοι γέλῳ ἔκθανον. αὐτὰρ Ὀδυσσεὺς |
| 101 | Primary ἕλκε διὲκ προθύροιο λαβὼν ποδός, ὄφρʼ ἵκετʼ αὐλήν, |
| 102 | Primary αἰθούσης τε θύρας· καί μιν ποτὶ ἑρκίον αὐλῆς |
| 103 | Primary εἷσεν ἀνακλίνας· σκῆπτρον δέ οἱ ἔμβαλε χειρί, |
| 104 | Primary καί μιν φωνήσας ἔπεα πτερόεντα προσηύδα· |
| 105 | Primary ἐνταυθοῖ νῦν ἧσο σύας τε κύνας τʼ ἀπερύκων, |
| 106 | Primary μηδὲ σύ γε ξείνων καὶ πτωχῶν κοίρανος εἶναι |
| 107 | Primary λυγρὸς ἐών, μή πού τι κακὸν καὶ μεῖζον ἐπαύρῃ. |
| 108 | Primary ἦ ῥα καὶ ἀμφʼ ὤμοισιν ἀεικέα βάλλετο πήρην, |
| 109 | Primary πυκνὰ ῥωγαλέην· ἐν δὲ στρόφος ἦεν ἀορτήρ. |
| 110 | Primary ἂψ δʼ ὅ γʼ ἐπʼ οὐδὸν ἰὼν κατʼ ἄρʼ ἕζετο· τοὶ δʼ ἴσαν εἴσω |
| 111 | Primary ἡδὺ γελώοντες καὶ δεικανόωντʼ ἐπέεσσι· |
| 112 | Primary Ζεύς τοι δοίη, ξεῖνε, καὶ ἀθάνατοι θεοὶ ἄλλοι, |
| 113 | Primary ὅττι μάλιστʼ ἐθέλεις καί τοι φίλον ἔπλετο θυμῷ, |
| 114 | Primary ὃς τοῦτον τὸν ἄναλτον ἀλητεύειν ἀπέπαυσας |
| 115 | Primary ἐν δήμῳ· τάχα γάρ μιν ἀνάξομεν ἤπειρόνδε |
| 116 | Primary εἰς Ἔχετον βασιλῆα, βροτῶν δηλήμονα πάντων. |
| 117 | Primary ὣς ἄρʼ ἔφαν, χαῖρεν δὲ κλεηδόνι δῖος Ὀδυσσεύς. |
| 118 | Primary Ἀντίνοος δʼ ἄρα οἱ μεγάλην παρὰ γαστέρα θῆκεν, |
| 119 | Primary ἐμπλείην κνίσης τε καὶ αἵματος· Ἀμφίνομος δὲ |
| 120 | Primary ἄρτους ἐκ κανέοιο δύω παρέθηκεν ἀείρας |
| 121 | Primary καὶ δέπαϊ χρυσέῳ δειδίσκετο, φώνησέν τε· |
| 122 | Primary χαῖρε, πάτερ ὦ ξεῖνε, γένοιτό τοι ἔς περ ὀπίσσω |
| 123 | Primary ὄλβος· ἀτὰρ μὲν νῦν γε κακοῖς ἔχεαι πολέεσσι. |
| 124 | Primary τὸν δʼ ἀπαμειβόμενος προσέφη πολύμητις Ὀδυσσεύς· |
| 125 | Primary Ἀμφίνομʼ, ἦ μάλα μοι δοκέεις πεπνυμένος εἶναι· |
| 126 | Primary τοίου γὰρ καὶ πατρός, ἐπεὶ κλέος ἐσθλὸν ἄκουον, |
| 127 | Primary Νῖσον Δουλιχιῆα ἐΰν τʼ ἔμεν ἀφνειόν τε· |
| 128 | Primary τοῦ σʼ ἔκ φασι γενέσθαι, ἐπητῇ δʼ ἀνδρὶ ἔοικας. |
| 129 | Primary τοὔνεκά τοι ἐρέω, σὺ δὲ σύνθεο καί μευ ἄκουσον· |
| 130 | Primary οὐδὲν ἀκιδνότερον γαῖα τρέφει ἀνθρώποιο, |
| 131 | Primary πάντων ὅσσα τε γαῖαν ἔπι πνείει τε καὶ ἕρπει. |
| 132 | Primary οὐ μὲν γάρ ποτέ φησι κακὸν πείσεσθαι ὀπίσσω, |
| 133 | Primary ὄφρʼ ἀρετὴν παρέχωσι θεοὶ καὶ γούνατʼ ὀρώρῃ· |
| 134 | Primary ἀλλʼ ὅτε δὴ καὶ λυγρὰ θεοὶ μάκαρες τελέσωσι, |
| 135 | Primary καὶ τὰ φέρει ἀεκαζόμενος τετληότι θυμῷ· |
| 136 | Primary τοῖος γὰρ νόος ἐστὶν ἐπιχθονίων ἀνθρώπων |
| 137 | Primary οἷον ἐπʼ ἦμαρ ἄγησι πατὴρ ἀνδρῶν τε θεῶν τε. |
| 138 | Primary καὶ γὰρ ἐγώ ποτʼ ἔμελλον ἐν ἀνδράσιν ὄλβιος εἶναι, |
| 139 | Primary πολλὰ δʼ ἀτάσθαλʼ ἔρεξα βίῃ καὶ κάρτεϊ εἴκων, |
| 140 | Primary πατρί τʼ ἐμῷ πίσυνος καὶ ἐμοῖσι κασιγνήτοισι. |
| 141 | Primary τῷ μή τίς ποτε πάμπαν ἀνὴρ ἀθεμίστιος εἴη, |
| 142 | Primary ἀλλʼ ὅ γε σιγῇ δῶρα θεῶν ἔχοι, ὅττι διδοῖεν. |
| 143 | Primary οἷʼ ὁρόω μνηστῆρας ἀτάσθαλα μηχανόωντας, |
| 144 | Primary κτήματα κείροντας καὶ ἀτιμάζοντας ἄκοιτιν |
| 145 | Primary ἀνδρός, ὃν οὐκέτι φημὶ φίλων καὶ πατρίδος αἴης |
| 146 | Primary δηρὸν ἀπέσσεσθαι· μάλα δὲ σχεδόν. ἀλλά σε δαίμων |
| 147 | Primary οἴκαδʼ ὑπεξαγάγοι, μηδʼ ἀντιάσειας ἐκείνῳ, |
| 148 | Primary ὁππότε νοστήσειε φίλην ἐς πατρίδα γαῖαν· |
| 149 | Primary οὐ γὰρ ἀναιμωτί γε διακρινέεσθαι ὀΐω |
| 150 | Primary μνηστῆρας καὶ κεῖνον, ἐπεί κε μέλαθρον ὑπέλθῃ. |
| 151 | Primary ὣς φάτο, καὶ σπείσας ἔπιεν μελιηδέα οἶνον, |
| 152 | Primary ἂψ δʼ ἐν χερσὶν ἔθηκε δέπας κοσμήτορι λαῶν. |
| 153 | Primary αὐτὰρ ὁ βῆ διὰ δῶμα φίλον τετιημένος ἦτορ, |
| 154 | Primary νευστάζων κεφαλῇ· δὴ γὰρ κακὸν ὄσσετο θυμός. |
| 155 | Primary ἀλλʼ οὐδʼ ὣς φύγε κῆρα· πέδησε δὲ καὶ τὸν Ἀθήνη |
| 156 | Primary Τηλεμάχου ὑπὸ χερσὶ καὶ ἔγχεϊ ἶφι δαμῆναι. |
| 157 | Primary ἂψ δʼ αὖτις κατʼ ἄρʼ ἕζετʼ ἐπὶ θρόνου ἔνθεν ἀνέστη. |
| 158 | Primary τῇ δʼ ἄρʼ ἐπὶ φρεσὶ θῆκε θεὰ γλαυκῶπις Ἀθήνη, |
| 159 | Primary κούρῃ Ἰκαρίοιο, περίφρονι Πηνελοπείῃ, |
| 160 | Primary μνηστήρεσσι φανῆναι, ὅπως πετάσειε μάλιστα |
| 161 | Primary θυμὸν μνηστήρων ἰδὲ τιμήεσσα γένοιτο |
| 162 | Primary μᾶλλον πρὸς πόσιός τε καὶ υἱέος ἢ πάρος ἦεν. |
| 163 | Primary ἀχρεῖον δʼ ἐγέλασσεν ἔπος τʼ ἔφατʼ ἔκ τʼ ὀνόμαζεν· |
| 164 | Primary Εὐρυνόμη, θυμός μοι ἐέλδεται, οὔ τι πάρος γε, |
| 165 | Primary μνηστήρεσσι φανῆναι, ἀπεχθομένοισί περ ἔμπης· |
| 166 | Primary παιδὶ δέ κεν εἴποιμι ἔπος, τό κε κέρδιον εἴη, |
| 167 | Primary μὴ πάντα μνηστῆρσιν ὑπερφιάλοισιν ὁμιλεῖν, |
| 168 | Primary οἵ τʼ εὖ μὲν βάζουσι, κακῶς δʼ ὄπιθεν φρονέουσι. |
| 169 | Primary τὴν δʼ αὖτʼ Εὐρυνόμη ταμίη πρὸς μῦθον ἔειπεν· |
| 170 | Primary ναὶ δὴ ταῦτά γε πάντα, τέκος, κατὰ μοῖραν ἔειπες. |
| 171 | Primary ἀλλʼ ἴθι καὶ σῷ παιδὶ ἔπος φάο μηδʼ ἐπίκευθε, |
| 172 | Primary χρῶτʼ ἀπονιψαμένη καὶ ἐπιχρίσασα παρειάς· |
| 173 | Primary μηδʼ οὕτω δακρύοισι πεφυρμένη ἀμφὶ πρόσωπα |
| 174 | Primary ἔρχευ, ἐπεὶ κάκιον πενθήμεναι ἄκριτον αἰεί. |
| 175 | Primary ἤδη μὲν γάρ τοι παῖς τηλίκος, ὃν σὺ μάλιστα |
| 176 | Primary ἠρῶ ἀθανάτοισι γενειήσαντα ἰδέσθαι. |
| 177 | Primary τὴν δʼ αὖτε προσέειπε περίφρων Πηνελόπεια· |
| 178 | Primary Εὐρυνόμη, μὴ ταῦτα παραύδα, κηδομένη περ, |
| 179 | Primary χρῶτʼ ἀπονίπτεσθαι καὶ ἐπιχρίεσθαι ἀλοιφῇ· |
| 180 | Primary ἀγλαΐην γὰρ ἐμοί γε θεοί, τοὶ Ὄλυμπον ἔχουσιν, |
| 181 | Primary ὤλεσαν, ἐξ οὗ κεῖνος ἔβη κοίλῃς ἐνὶ νηυσίν. |
| 182 | Primary ἀλλά μοι Αὐτονόην τε καὶ Ἱπποδάμειαν ἄνωχθι |
| 183 | Primary ἐλθέμεν, ὄφρα κέ μοι παρστήετον ἐν μεγάροισιν· |
| 184 | Primary οἴη δʼ οὐκ εἴσειμι μετʼ ἀνέρας· αἰδέομαι γάρ. |
| 185 | Primary ὣς ἄρʼ ἔφη, γρηῢς δὲ διὲκ μεγάροιο βεβήκει |
| 186 | Primary ἀγγελέουσα γυναιξὶ καὶ ὀτρυνέουσα νέεσθαι. |
| 187 | Primary ἔνθʼ αὖτʼ ἄλλʼ ἐνόησε θεὰ γλαυκῶπις Ἀθήνη· |
| 188 | Primary κούρῃ Ἰκαρίοιο κατὰ γλυκὺν ὕπνον ἔχευεν, |
| 189 | Primary εὗδε δʼ ἀνακλινθεῖσα, λύθεν δέ οἱ ἅψεα πάντα |
| 190 | Primary αὐτοῦ ἐνὶ κλιντῆρι· τέως δʼ ἄρα δῖα θεάων |
| 191 | Primary ἄμβροτα δῶρα δίδου, ἵνα μιν θησαίατʼ Ἀχαιοί. |
| 192 | Primary κάλλεϊ μέν οἱ πρῶτα προσώπατα καλὰ κάθηρεν |
| 193 | Primary ἀμβροσίῳ, οἵῳ περ ἐϋστέφανος Κυθέρεια |
| 194 | Primary χρίεται, εὖτʼ ἂν ἴῃ Χαρίτων χορὸν ἱμερόεντα· |
| 195 | Primary καί μιν μακροτέρην καὶ πάσσονα θῆκεν ἰδέσθαι, |
| 196 | Primary λευκοτέρην δʼ ἄρα μιν θῆκε πριστοῦ ἐλέφαντος. |
| 197 | Primary ἡ μὲν ἄρʼ ὣς ἔρξασʼ ἀπεβήσετο δῖα θεάων, |
| 198 | Primary ἦλθον δʼ ἀμφίπολοι λευκώλενοι ἐκ μεγάροιο |
| 199 | Primary φθόγγῳ ἐπερχόμεναι· τὴν δὲ γλυκὺς ὕπνος ἀνῆκε, |
| 200 | Primary καί ῥʼ ἀπομόρξατο χερσὶ παρειὰς φώνησέν τε· |
| 201 | Primary ἦ με μάλʼ αἰνοπαθῆ μαλακὸν περὶ κῶμʼ ἐκάλυψεν. |
| 202 | Primary αἴθε μοι ὣς μαλακὸν θάνατον πόροι Ἄρτεμις ἁγνὴ |
| 203 | Primary αὐτίκα νῦν, ἵνα μηκέτʼ ὀδυρομένη κατὰ θυμὸν |
| 204 | Primary αἰῶνα φθινύθω, πόσιος ποθέουσα φίλοιο |
| 205 | Primary παντοίην ἀρετήν, ἐπεὶ ἔξοχος ἦεν Ἀχαιῶν. |
| 206 | Primary ὣς φαμένη κατέβαινʼ ὑπερώϊα σιγαλόεντα, |
| 207 | Primary οὐκ οἴη· ἅμα τῇ γε καὶ ἀμφίπολοι δύʼ ἕποντο. |
| 208 | Primary ἡ δʼ ὅτε δὴ μνηστῆρας ἀφίκετο δῖα γυναικῶν, |
| 209 | Primary στῆ ῥα παρὰ σταθμὸν τέγεος πύκα ποιητοῖο, |
| 210 | Primary ἄντα παρειάων σχομένη λιπαρὰ κρήδεμνα· |
| 211 | Primary ἀμφίπολος δʼ ἄρα οἱ κεδνὴ ἑκάτερθε παρέστη. |
| 212 | Primary τῶν δʼ αὐτοῦ λύτο γούνατʼ, ἔρῳ δʼ ἄρα θυμὸν ἔθελχθεν, |
| 213 | Primary πάντες δʼ ἠρήσαντο παραὶ λεχέεσσι κλιθῆναι. |
| 214 | Primary ἡ δʼ αὖ Τηλέμαχον προσεφώνεεν, ὃν φίλον υἱόν· |
| 215 | Primary Τηλέμαχʼ, οὐκέτι τοι φρένες ἔμπεδοι οὐδὲ νόημα· |
| 216 | Primary παῖς ἔτʼ ἐὼν καὶ μᾶλλον ἐνὶ φρεσὶ κέρδεʼ ἐνώμας· |
| 217 | Primary νῦν δʼ, ὅτε δὴ μέγας ἐσσὶ καὶ ἥβης μέτρον ἱκάνεις, |
| 218 | Primary καί κέν τις φαίη γόνον ἔμμεναι ὀλβίου ἀνδρός, |
| 219 | Primary ἐς μέγεθος καὶ κάλλος ὁρώμενος, ἀλλότριος φώς, |
| 220 | Primary οὐκέτι τοι φρένες εἰσὶν ἐναίσιμοι οὐδὲ νόημα. |
| 221 | Primary οἷον δὴ τόδε ἔργον ἐνὶ μεγάροισιν ἐτύχθη, |
| 222 | Primary ὃς τὸν ξεῖνον ἔασας ἀεικισθήμεναι οὕτως. |
| 223 | Primary πῶς νῦν, εἴ τι ξεῖνος ἐν ἡμετέροισι δόμοισιν |
| 224 | Primary ἥμενος ὧδε πάθοι ῥυστακτύος ἐξ ἀλεγεινῆς; |
| 225 | Primary σοί κʼ αἶσχος λώβη τε μετʼ ἀνθρώποισι πέλοιτο. |
| 226 | Primary τὴν δʼ αὖ Τηλέμαχος πεπνυμένος ἀντίον ηὔδα· |
| 227 | Primary μῆτερ ἐμή, τὸ μὲν οὔ σε νεμεσσῶμαι κεχολῶσθαι· |
| 228 | Primary αὐτὰρ ἐγὼ θυμῷ νοέω καὶ οἶδα ἕκαστα, |
| 229 | Primary ἐσθλά τε καὶ τὰ χέρεια· πάρος δʼ ἔτι νήπιος ἦα. |
| 230 | Primary ἀλλά τοι οὐ δύναμαι πεπνυμένα πάντα νοῆσαι· |
| 231 | Primary ἐκ γάρ με πλήσσουσι παρήμενοι ἄλλοθεν ἄλλος |
| 232 | Primary οἵδε κακὰ φρονέοντες, ἐμοὶ δʼ οὐκ εἰσὶν ἀρωγοί. |
| 233 | Primary οὐ μέν τοι ξείνου γε καὶ Ἴρου μῶλος ἐτύχθη |
| 234 | Primary μνηστήρων ἰότητι, βίῃ δʼ ὅ γε φέρτερος ἦεν. |
| 235 | Primary αἲ γάρ, Ζεῦ τε πάτερ καὶ Ἀθηναίη καὶ Ἄπολλον, |
| 236 | Primary οὕτω νῦν μνηστῆρες ἐν ἡμετέροισι δόμοισι |
| 237 | Primary νεύοιεν κεφαλὰς δεδμημένοι, οἱ μὲν ἐν αὐλῇ, |
| 238 | Primary οἱ δʼ ἔντοσθε δόμοιο, λελῦτο δὲ γυῖα ἑκάστου, |
| 239 | Primary ὡς νῦν Ἶρος κεῖνος ἐπʼ αὐλείῃσι θύρῃσιν |
| 240 | Primary ἧσται νευστάζων κεφαλῇ, μεθύοντι ἐοικώς, |
| 241 | Primary οὐδʼ ὀρθὸς στῆναι δύναται ποσὶν οὐδὲ νέεσθαι |
| 242 | Primary οἴκαδʼ, ὅπη οἱ νόστος, ἐπεὶ φίλα γυῖα λέλυνται. |
| 243 | Primary ὣς οἱ μὲν τοιαῦτα πρὸς ἀλλήλους ἀγόρευον· |
| 244 | Primary Εὐρύμαχος δʼ ἐπέεσσι προσηύδα Πηνελόπειαν· |
| 245 | Primary κούρη Ἰκαρίοιο, περίφρον Πηνελόπεια, |
| 246 | Primary εἰ πάντες σε ἴδοιεν ἀνʼ Ἴασον Ἄργος Ἀχαιοί, |
| 247 | Primary πλέονές κε μνηστῆρες ἐν ὑμετέροισι δόμοισιν |
| 248 | Primary ἠῶθεν δαινύατʼ, ἐπεὶ περίεσσι γυναικῶν |
| 249 | Primary εἶδός τε μέγεθός τε ἰδὲ φρένας ἔνδον ἐΐσας. |
| 250 | Primary τὸν δʼ ἠμείβετʼ ἔπειτα περίφρων Πηνελόπεια· |
| 251 | Primary Εὐρύμαχʼ, ἦ τοι ἐμὴν ἀρετὴν εἶδός τε δέμας τε |
| 252 | Primary ὤλεσαν ἀθάνατοι, ὅτε Ἴλιον εἰσανέβαινον |
| 253 | Primary Ἀργεῖοι, μετὰ τοῖσι δʼ ἐμὸς πόσις ᾖεν Ὀδυσσεύς. |
| 254 | Primary εἰ κεῖνός γʼ ἐλθὼν τὸν ἐμὸν βίον ἀμφιπολεύοι, |
| 255 | Primary μεῖζόν κε κλέος εἴη ἐμὸν καὶ κάλλιον οὕτως. |
| 256 | Primary νῦν δʼ ἄχομαι· τόσα γάρ μοι ἐπέσσευεν κακὰ δαίμων. |
| 257 | Primary ἦ μὲν δὴ ὅτε τʼ ᾖε λιπὼν κάτα πατρίδα γαῖαν, |
| 258 | Primary δεξιτερὴν ἐπὶ καρπῷ ἑλὼν ἐμὲ χεῖρα προσηύδα· |
| 259 | Primary ὦ γύναι, οὐ γὰρ ὀΐω ἐϋκνήμιδας Ἀχαιοὺς |
| 260 | Primary ἐκ Τροίης εὖ πάντας ἀπήμονας ἀπονέεσθαι· |
| 261 | Primary καὶ γὰρ Τρῶάς φασι μαχητὰς ἔμμεναι ἄνδρας, |
| 262 | Primary ἠμὲν ἀκοντιστὰς ἠδὲ ῥυτῆρας ὀϊστῶν |
| 263 | Primary ἵππων τʼ ὠκυπόδων ἐπιβήτορας, οἵ κε τάχιστα |
| 264 | Primary ἔκριναν μέγα νεῖκος ὁμοιΐου πολέμοιο. |
| 265 | Primary τῷ οὐκ οἶδʼ ἤ κέν μʼ ἀνέσει θεός, ἦ κεν ἁλώω |
| 266 | Primary αὐτοῦ ἐνὶ Τροίῃ· σοὶ δʼ ἐνθάδε πάντα μελόντων. |
| 267 | Primary μεμνῆσθαι πατρὸς καὶ μητέρος ἐν μεγάροισιν |
| 268 | Primary ὡς νῦν, ἢ ἔτι μᾶλλον ἐμεῦ ἀπονόσφιν ἐόντος· |
| 269 | Primary αὐτὰρ ἐπὴν δὴ παῖδα γενειήσαντα ἴδηαι, |
| 270 | Primary γήμασθʼ ᾧ κʼ ἐθέλῃσθα, τεὸν κατὰ δῶμα λιποῦσα. |
| 271 | Primary κεῖνος τὼς ἀγόρευε· τὰ δὴ νῦν πάντα τελεῖται. |
| 272 | Primary νὺξ δʼ ἔσται ὅτε δὴ στυγερὸς γάμος ἀντιβολήσει |
| 273 | Primary οὐλομένης ἐμέθεν, τῆς τε Ζεὺς ὄλβον ἀπηύρα. |
| 274 | Primary ἀλλὰ τόδʼ αἰνὸν ἄχος κραδίην καὶ θυμὸν ἱκάνει· |
| 275 | Primary μνηστήρων οὐχ ἥδε δίκη τὸ πάροιθε τέτυκτο· |
| 276 | Primary οἵ τʼ ἀγαθήν τε γυναῖκα καὶ ἀφνειοῖο θύγατρα |
| 277 | Primary μνηστεύειν ἐθέλωσι καὶ ἀλλήλοις ἐρίσωσιν, |
| 278 | Primary αὐτοὶ τοί γʼ ἀπάγουσι βόας καὶ ἴφια μῆλα, |
| 279 | Primary κούρης δαῖτα φίλοισι, καὶ ἀγλαὰ δῶρα διδοῦσιν· |
| 280 | Primary ἀλλʼ οὐκ ἀλλότριον βίοτον νήποινον ἔδουσιν. |
| 281 | Primary ὣς φάτο, γήθησεν δὲ πολύτλας δῖος Ὀδυσσεύς, |
| 282 | Primary οὕνεκα τῶν μὲν δῶρα παρέλκετο, θέλγε δὲ θυμὸν |
| 283 | Primary μειλιχίοις ἐπέεσσι, νόος δέ οἱ ἄλλα μενοίνα. |
| 284 | Primary τὴν δʼ αὖτʼ Ἀντίνοος προσέφη, Εὐπείθεος υἱός, |
| 285 | Primary κούρη Ἰκαρίοιο, περίφρον Πηνελόπεια, |
| 286 | Primary δῶρα μὲν ὅς κʼ ἐθέλῃσιν Ἀχαιῶν ἐνθάδʼ ἐνεῖκαι, |
| 287 | Primary δέξασθʼ. οὐ γὰρ καλὸν ἀνήνασθαι δόσιν ἐστίν· |
| 288 | Primary ἡμεῖς δʼ οὔτʼ ἐπὶ ἔργα πάρος γʼ ἴμεν οὔτε πῃ ἄλλῃ, |
| 289 | Primary πρίν γέ σε τῷ γήμασθαι Ἀχαιῶν ὅς τις ἄριστος. |
| 290 | Primary ὣς ἔφατʼ Ἀντίνοος, τοῖσιν δʼ ἐπιήνδανε μῦθος· |
| 291 | Primary δῶρα δʼ ἄρʼ οἰσέμεναι πρόεσαν κήρυκα ἕκαστος. |
| 292 | Primary Ἀντινόῳ μὲν ἔνεικε μέγαν περικαλλέα πέπλον, |
| 293 | Primary ποικίλον· ἐν δʼ ἀρʼ ἔσαν περόναι δυοκαίδεκα πᾶσαι |
| 294 | Primary χρύσειαι, κληῗσιν ἐϋγνάμπτοις ἀραρυῖαι. |
| 295 | Primary ὅρμον δʼ Εὐρυμάχῳ πολυδαίδαλον αὐτίκʼ ἔνεικε. |
| 296 | Primary χρύσεον, ἠλέκτροισιν ἐερμένον ἠέλιον ὥς. |
| 297 | Primary ἕρματα δʼ Εὐρυδάμαντι δύω θεράποντες ἔνεικαν, |
| 298 | Primary τρίγληνα μορόεντα· χάρις δʼ ἀπελάμπετο πολλή. |
| 299 | Primary ἐκ δʼ ἄρα Πεισάνδροιο Πολυκτορίδαο ἄνακτος |
| 300 | Primary ἴσθμιον ἤνεικεν θεράπων, περικαλλὲς ἄγαλμα. |
| 301 | Primary ἄλλο δʼ ἄρʼ ἄλλος δῶρον Ἀχαιῶν καλὸν ἔνεικεν. |
| 302 | Primary ἡ μὲν ἔπειτʼ ἀνέβαινʼ ὑπερώϊα δῖα γυναικῶν, |
| 303 | Primary τῇ δʼ ἄρʼ ἅμʼ ἀμφίπολοι ἔφερον περικαλλέα δῶρα |
| 304 | Primary οἱ δʼ εἰς ὀρχηστύν τε καὶ ἱμερόεσσαν ἀοιδὴν |
| 305 | Primary τρεψάμενοι τέρποντο, μένον δʼ ἐπὶ ἕσπερον ἐλθεῖν. |
| 306 | Primary τοῖσι δὲ τερπομένοισι μέλας ἐπὶ ἕσπερος ἦλθεν. |
| 307 | Primary αὐτίκα λαμπτῆρας τρεῖς ἵστασαν ἐν μεγάροισιν, |
| 308 | Primary ὄφρα φαείνοιεν· περὶ δὲ ξύλα κάγκανα θῆκαν, |
| 309 | Primary αὖα πάλαι, περίκηλα, νέον κεκεασμένα χαλκῷ, |
| 310 | Primary καὶ δαΐδας μετέμισγον· ἀμοιβηδὶς δʼ ἀνέφαινον |
| 311 | Primary δμῳαὶ Ὀδυσσῆος ταλασίφρονος. αὐτὰρ ὁ τῇσιν |
| 312 | Primary αὐτὸς διογενῆς μετέφη πολύμητις Ὀδυσσεύς· |
| 313 | Primary δμῳαὶ Ὀδυσσῆος, δὴν οἰχομένοιο ἄνακτος, |
| 314 | Primary ἔρχεσθε πρὸς δώμαθʼ, ἵνʼ αἰδοίη βασίλεια· |
| 315 | Primary τῇ δὲ παρʼ ἠλάκατα στροφαλίζετε, τέρπετε δʼ αὐτὴν |
| 316 | Primary ἥμεναι ἐν μεγάρῳ, ἢ εἴρια πείκετε χερσίν· |
| 317 | Primary αὐτὰρ ἐγὼ τούτοισι φάος πάντεσσι παρέξω. |
| 318 | Primary ἤν περ γάρ κʼ ἐθέλωσιν ἐΰθρονον Ἠῶ μίμνειν, |
| 319 | Primary οὔ τί με νικήσουσι· πολυτλήμων δὲ μάλʼ εἰμί. |
| 320 | Primary ὣς ἔφαθʼ, αἱ δʼ ἐγέλασσαν, ἐς ἀλλήλας δὲ ἴδοντο. |
| 321 | Primary τὸν δʼ αἰσχρῶς ἐνένιπε Μελανθὼ καλλιπάρῃος, |
| 322 | Primary τὴν Δολίος μὲν ἔτικτε, κόμισσε δὲ Πηνελόπεια, |
| 323 | Primary παῖδα δὲ ὣς ἀτίταλλε, δίδου δʼ ἄρʼ ἀθύρματα θυμῷ· |
| 324 | Primary ἀλλʼ οὐδʼ ὣς ἔχε πένθος ἐνὶ φρεσὶ Πηνελοπείης, |
| 325 | Primary ἀλλʼ ἥ γʼ Εὐρυμάχῳ μισγέσκετο καὶ φιλέεσκεν. |
| 326 | Primary ἥ ῥʼ Ὀδυσῆʼ ἐνένιπεν ὀνειδείοις ἐπέεσσιν· |
| 327 | Primary ξεῖνε τάλαν, σύ γέ τις φρένας ἐκπεπαταγμένος ἐσσί, |
| 328 | Primary οὐδʼ ἐθέλεις εὕδειν χαλκήϊον ἐς δόμον ἐλθών, |
| 329 | Primary ἠέ που ἐς λέσχην, ἀλλʼ ἐνθάδε πόλλʼ ἀγορεύεις, |
| 330 | Primary θαρσαλέως πολλοῖσι μετʼ ἀνδράσιν, οὐδέ τι θυμῷ |
| 331 | Primary ταρβεῖς· ἦ ῥά σε οἶνος ἔχει φρένας, ἤ νύ τοι αἰεὶ |
| 332 | Primary τοιοῦτος νόος ἐστίν· ὃ καὶ μεταμώνια βάζεις. |
| 333 | Primary ἦ ἀλύεις, ὅτι Ἶρον ἐνίκησας τὸν ἀλήτην; |
| 334 | Primary μή τίς τοι τάχα Ἴρου ἀμείνων ἄλλος ἀναστῇ, |
| 335 | Primary ὅς τίς σʼ ἀμφὶ κάρη κεκοπὼς χερσὶ στιβαρῇσι |
| 336 | Primary δώματος ἐκπέμψῃσι, φορύξας αἵματι πολλῷ. |
| 337 | Primary τὴν δʼ ἄρʼ ὑπόδρα ἰδὼν προσέφη πολύμητις Ὀδυσσεύς· |
| 338 | Primary ἦ τάχα Τηλεμάχῳ ἐρέω, κύον, οἷʼ ἀγορεύεις, |
| 339 | Primary κεῖσʼ ἐλθών, ἵνα σʼ αὖθι διὰ μελεϊστὶ τάμῃσιν. |
| 340 | Primary ὣς εἰπὼν ἐπέεσσι διεπτοίησε γυναῖκας. |
| 341 | Primary βὰν δʼ ἴμεναι διὰ δῶμα, λύθεν δʼ ὑπὸ γυῖα ἑκάστης |
| 342 | Primary ταρβοσύνῃ· φὰν γάρ μιν ἀληθέα μυθήσασθαι. |
| 343 | Primary αὐτὰρ ὁ πὰρ λαμπτῆρσι φαείνων αἰθομένοισιν |
| 344 | Primary ἑστήκειν ἐς πάντας ὁρώμενος· ἄλλα δέ οἱ κῆρ |
| 345 | Primary ὥρμαινε φρεσὶν ᾗσιν, ἅ ῥʼ οὐκ ἀτέλεστα γένοντο. |
| 346 | Primary μνηστῆρας δʼ οὐ πάμπαν ἀγήνορας εἴα Ἀθήνη |
| 347 | Primary λώβης ἴσχεσθαι θυμαλγέος, ὄφρʼ ἔτι μᾶλλον |
| 348 | Primary δύη ἄχος κραδίην Λαερτιάδεω Ὀδυσῆος. |
| 349 | Primary τοῖσιν δʼ Εὐρύμαχος, Πολύβου πάϊς, ἦρχʼ ἀγορεύειν, |
| 350 | Primary κερτομέων Ὀδυσῆα· γέλω δʼ ἑτάροισιν ἔτευχε. |
| 351 | Primary κέκλυτέ μευ, μνηστῆρες ἀγακλειτῆς βασιλείης, |
| 352 | Primary ὄφρʼ εἴπω τά με θυμὸς ἐνὶ στήθεσσι κελεύει. |
| 353 | Primary οὐκ ἀθεεὶ ὅδʼ ἀνὴρ Ὀδυσήϊον ἐς δόμον ἵκει· |
| 354 | Primary ἔμπης μοι δοκέει δαίδων σέλας ἔμμεναι αὐτοῦ |
| 355 | Primary κὰκ κεφαλῆς, ἐπεὶ οὔ οἱ ἔνι τρίχες οὐδʼ ἠβαιαί. |
| 356 | Primary ἦ ῥʼ, ἅμα τε προσέειπεν Ὀδυσσῆα πτολίπορθον· |
| 357 | Primary ξεῖνʼ, ἦ ἄρ κʼ ἐθέλοις θητευέμεν, εἴ σʼ ἀνελοίμην, |
| 358 | Primary ἀγροῦ ἐπʼ ἐσχατιῆς—μισθὸς δέ τοι ἄρκιος ἔσται— |
| 359 | Primary αἱμασιάς τε λέγων καὶ δένδρεα μακρὰ φυτεύων; |
| 360 | Primary ἔνθα κʼ ἐγὼ σῖτον μὲν ἐπηετανὸν παρέχοιμι, |
| 361 | Primary εἵματα δʼ ἀμφιέσαιμι ποσίν θʼ ὑποδήματα δοίην. |
| 362 | Primary ἀλλʼ ἐπεὶ οὖν δὴ ἔργα κάκʼ ἔμμαθες, οὐκ ἐθελήσεις |
| 363 | Primary ἔργον ἐποίχεσθαι, ἀλλὰ πτώσσειν κατὰ δῆμον |
| 364 | Primary βούλεαι, ὄφρʼ ἄν ἔχῃς βόσκειν σὴν γαστέρʼ ἄναλτον. |
| 365 | Primary τὸν δʼ ἀπαμειβόμενος προσέφη πολύμητις Ὀδυσσεύς· |
| 366 | Primary Εὐρύμαχʼ, εἰ γὰρ νῶϊν ἔρις ἔργοιο γένοιτο |
| 367 | Primary ὥρῃ ἐν εἰαρινῇ, ὅτε τʼ ἤματα μακρὰ πέλονται, |
| 368 | Primary ἐν ποίῃ, δρέπανον μὲν ἐγὼν εὐκαμπὲς ἔχοιμι, |
| 369 | Primary καὶ δὲ σὺ τοῖον ἔχοις, ἵνα πειρησαίμεθα ἔργου |
| 370 | Primary νήστιες ἄχρι μάλα κνέφαος, ποίη δὲ παρείη. |
| 371 | Primary εἰ δʼ αὖ καὶ βόες εἶεν ἐλαυνέμεν, οἵ περ ἄριστοι, |
| 372 | Primary αἴθωνες, μεγάλοι, ἄμφω κεκορηότε ποίης, |
| 373 | Primary ἥλικες, ἰσοφόροι, τῶν τε σθένος οὐκ ἀλαπαδνόν, |
| 374 | Primary τετράγυον δʼ εἴη, εἴκοι δʼ ὑπὸ βῶλος ἀρότρῳ· |
| 375 | Primary τῷ κέ μʼ ἴδοις, εἰ ὦλκα διηνεκέα προταμοίμην. |
| 376 | Primary εἰ δʼ αὖ καὶ πόλεμόν ποθεν ὁρμήσειε Κρονίων |
| 377 | Primary σήμερον, αὐτὰρ ἐμοὶ σάκος εἴη καὶ δύο δοῦρε |
| 378 | Primary καὶ κυνέη πάγχαλκος, ἐπὶ κροτάφοις ἀραρυῖα, |
| 379 | Primary τῷ κέ μʼ ἴδοις πρώτοισιν ἐνὶ προμάχοισι μιγέντα, |
| 380 | Primary οὐδʼ ἄν μοι τὴν γαστέρʼ ὀνειδίζων ἀγορεύοις. |
| 381 | Primary ἀλλὰ μάλʼ ὑβρίξεις, καί τοι νόος ἐστὶν ἀπηνής· |
| 382 | Primary καί πού τις δοκέεις μέγας ἔμμεναι ἠδὲ κραταιός, |
| 383 | Primary οὕνεκα πὰρ παύροισι καὶ οὐκ ἀγαθοῖσιν ὁμιλεῖς. |
| 384 | Primary εἰ δʼ Ὀδυσεὺς ἔλθοι καὶ ἵκοιτʼ ἐς πατρίδα γαῖαν, |
| 385 | Primary αἶψά κέ τοι τὰ θύρετρα, καὶ εὐρέα περ μάλʼ ἐόντα, |
| 386 | Primary φεύγοντι στείνοιτο διὲκ προθύροιο θύραζε. |
| 387 | Primary ὣς ἔφατʼ, Εὐρύμαχος δʼ ἐχολώσατο κηρόθι μᾶλλον, |
| 388 | Primary καί μιν ὑπόδρα ἰδὼν ἔπεα πτερόεντα προσηύδα· |
| 389 | Primary ἆ δείλʼ, ἦ τάχα τοι τελέω κακόν, οἷʼ ἀγορεύεις |
| 390 | Primary θαρσαλέως πολλοῖσι μετʼ ἀνδράσιν, οὐδέ τι θυμῷ |
| 391 | Primary ταρβεῖς· ἦ ῥά σε οἶνος ἔχει φρένας, ἤ νύ τοι αἰεὶ |
| 392 | Primary τοιοῦτος νόος ἐστίν· ὃ καὶ μεταμώνια βάζεις. |
| 393 | Primary ἦ ἀλύεις, ὅτι Ἶρον ἐνίκησας τὸν ἀλήτην; |
| 394 | Primary ὣς ἄρα φωνήσας σφέλας ἔλλαβεν· αὐτὰρ Ὀδυσσεὺς |
| 395 | Primary Ἀμφινόμου πρὸς γοῦνα καθέζετο Δουλιχιῆος, |
| 396 | Primary Εὐρύμαχον δείσας· ὁ δʼ ἄρʼ οἰνοχόον βάλε χεῖρα |
| 397 | Primary δεξιτερήν· πρόχοος δὲ χαμαὶ βόμβησε πεσοῦσα, |
| 398 | Primary αὐτὰρ ὅ γʼ οἰμώξας πέσεν ὕπτιος ἐν κονίῃσι. |
| 399 | Primary μνηστῆρες δʼ ὁμάδησαν ἀνὰ μέγαρα σκιόεντα, |
| 400 | Primary ὧδε δέ τις εἴπεσκεν ἰδὼν ἐς πλησίον ἄλλον· |
| 401 | Primary αἴθʼ ὤφελλʼ ὁ ξεῖνος ἀλώμενος ἄλλοθʼ ὀλέσθαι |
| 402 | Primary πρὶν ἐλθεῖν· τῷ οὔ τι τόσον κέλαδον μετέθηκε. |
| 403 | Primary νῦν δὲ περὶ πτωχῶν ἐριδαίνομεν, οὐδέ τι δαιτὸς |
| 404 | Primary ἐσθλῆς ἔσσεται ἦδος, ἐπεὶ τὰ χερείονα νικᾷ. |
| 405 | Primary τοῖσι δὲ καὶ μετέειφʼ ἱερὴ ἲς Τηλεμάχοιο |
| 406 | Primary δαιμόνιοι, μαίνεσθε καὶ οὐκέτι κεύθετε θυμῷ |
| 407 | Primary βρωτὺν οὐδὲ ποτῆτα· θεῶν νύ τις ὔμμʼ ὀροθύνει. |
| 408 | Primary ἀλλʼ εὖ δαισάμενοι κατακείετε οἴκαδʼ ἰόντες, |
| 409 | Primary ὁππότε θυμὸς ἄνωγε· διώκω δʼ οὔ τινʼ ἐγώ γε. |
| 410 | Primary ὣς ἔφαθʼ, οἱ δʼ ἄρα πάντες ὀδὰξ ἐν χείλεσι φύντες |
| 411 | Primary Τηλέμαχον θαύμαζον, ὃ θαρσαλέως ἀγόρευε. |
| 412 | Primary τοῖσιν δʼ Ἀμφίνομος ἀγορήσατο καὶ μετέειπε |
| 413 | Primary Νίσου φαίδιμος υἱός, Ἀρητιάδαο ἄνακτος· |
| 414 | Primary ὦ φίλοι, οὐκ ἂν δή τις ἐπὶ ῥηθέντι δικαίῳ |
| 415 | Primary ἀντιβίοις ἐπέεσσι καθαπτόμενος χαλεπαίνοι· |
| 416 | Primary μήτε τι τὸν ξεῖνον στυφελίζετε μήτε τινʼ ἄλλον |
| 417 | Primary δμώων, οἳ κατὰ δώματʼ Ὀδυσσῆος θείοιο. |
| 418 | Primary ἀλλʼ ἄγετʼ, οἰνοχόος μὲν ἐπαρξάσθω δεπάεσσιν, |
| 419 | Primary ὄφρα σπείσαντες κατακείομεν οἴκαδʼ ἰόντες· |
| 420 | Primary τὸν ξεῖνον δὲ ἐῶμεν ἐνὶ μεγάροις Ὀδυσῆος |
| 421 | Primary Τηλεμάχῳ μελέμεν· τοῦ γὰρ φίλον ἵκετο δῶμα. |
| 422 | Primary ὣς φάτο, τοῖσι δὲ πᾶσιν ἑαδότα μῦθον ἔειπε. |
| 423 | Primary τοῖσιν δὲ κρητῆρα κεράσσατο Μούλιος ἥρως, |
| 424 | Primary κῆρυξ Δουλιχιεύς· θεράπων δʼ ἦν Ἀμφινόμοιο· |
| 425 | Primary νώμησεν δʼ ἄρα πᾶσιν ἐπισταδόν· οἱ δὲ θεοῖσι |
| 426 | Primary σπείσαντες μακάρεσσι πίον μελιηδέα οἶνον. |
| 427 | Primary αὐτὰρ ἐπεὶ σπεῖσάν τʼ ἔπιόν θʼ ὅσον ἤθελε θυμός, |
| 428 | Primary βάν ῥʼ ἴμεναι κείοντες ἑὰ πρὸς δώμαθʼ ἕκαστος. |