Reader
Reader | Odyssey, Book 19
Odyssey
Homer
Text
Position
Line 1 of 604
Waypoints
| Line Ref | A. T. Murray | Ancient Greek |
|---|---|
| 1 | Primary αὐτὰρ ὁ ἐν μεγάρῳ ὑπελείπετο δῖος Ὀδυσσεύς, |
| 2 | Primary μνηστήρεσσι φόνον σὺν Ἀθήνῃ μερμηρίζων· |
| 3 | Primary αἶψα δὲ Τηλέμαχον ἔπεα πτερόεντα προσηύδα· |
| 4 | Primary Τηλέμαχε, χρὴ τεύχεʼ ἀρήϊα κατθέμεν εἴσω |
| 5 | Primary πάντα μάλʼ· αὐτὰρ μνηστῆρας μαλακοῖς ἐπέεσσι |
| 6 | Primary παρφάσθαι, ὅτε κέν σε μεταλλῶσιν ποθέοντες· |
| 7 | Primary ἐκ καπνοῦ κατέθηκʼ, ἐπεὶ οὐκέτι τοῖσιν ἐῴκει |
| 8 | Primary οἷά ποτε Τροίηνδε κιὼν κατέλειπεν Ὀδυσσεύς, |
| 9 | Primary ἀλλὰ κατῄκισται, ὅσσον πυρὸς ἵκετʼ ἀϋτμή. |
| 10 | Primary πρὸς δʼ ἔτι καὶ τόδε μεῖζον ἐνὶ φρεσὶν ἔβαλε δαίμων |
| 11 | Primary μή πως οἰνωθέντες, ἔριν στήσαντες ἐν ὑμῖν, |
| 12 | Primary ἀλλήλους τρώσητε καταισχύνητέ τε δαῖτα |
| 13 | Primary καὶ μνηστύν· αὐτὸς γὰρ ἐφέλκεται ἄνδρα σίδηρος. |
| 14 | Primary ὣς φάτο, Τηλέμαχος δὲ φίλῳ ἐπεπείθετο πατρί, |
| 15 | Primary ἐκ δὲ καλεσσάμενος προσέφη τροφὸν Εὐρύκλειαν· |
| 16 | Primary μαῖʼ, ἄγε δή μοι ἔρυξον ἐνὶ μεγάροισι γυναῖκας, |
| 17 | Primary ὄφρα κεν ἐς θάλαμον καταθείομαι ἔντεα πατρὸς |
| 18 | Primary καλά, τά μοι κατὰ οἶκον ἀκηδέα καπνὸς ἀμέρδει |
| 19 | Primary πατρὸς ἀποιχομένοιο· ἐγὼ δʼ ἔτι νήπιος ἦα. |
| 20 | Primary νῦν δʼ ἐθέλω καταθέσθαι, ἵνʼ οὐ πυρὸς ἵξετʼ ἀϋτμή. |
| 21 | Primary τὸν δʼ αὖτε προσέειπε φίλη τροφὸς Εὐρύκλεια· |
| 22 | Primary αἲ γὰρ δή ποτε, τέκνον, ἐπιφροσύνας ἀνέλοιο |
| 23 | Primary οἴκου κήδεσθαι καὶ κτήματα πάντα φυλάσσειν. |
| 24 | Primary ἀλλʼ ἄγε, τίς τοι ἔπειτα μετοιχομένη φάος οἴσει; |
| 25 | Primary δμῳὰς δʼ οὐκ εἴας προβλωσκέμεν, αἵ κεν ἔφαινον. |
| 26 | Primary τὴν δʼ αὖ Τηλέμαχος πεπνυμένος ἀντίον ηὔδα· |
| 27 | Primary ξεῖνος ὅδʼ· οὐ γὰρ ἀεργὸν ἀνέξομαι ὅς κεν ἐμῆς γε |
| 28 | Primary χοίνικος ἅπτηται, καὶ τηλόθεν εἰληλουθώς. |
| 29 | Primary ὣς ἄρʼ ἐφώνησεν, τῇ δʼ ἄπτερος ἔπλετο μῦθος. |
| 30 | Primary κλήϊσεν δὲ θύρας μεγάρων εὖ ναιεταόντων. |
| 31 | Primary τὼ δʼ ἄρʼ ἀναΐξαντʼ Ὀδυσεὺς καὶ φαίδιμος υἱὸς |
| 32 | Primary ἐσφόρεον κόρυθάς τε καὶ ἀσπίδας ὀμφαλοέσσας |
| 33 | Primary ἔγχεά τʼ ὀξυόεντα· πάροιθε δὲ Παλλὰς Ἀθήνη, |
| 34 | Primary χρύσεον λύχνον ἔχουσα, φάος περικαλλὲς ἐποίει. |
| 35 | Primary δὴ τότε Τηλέμαχος προσεφώνεεν ὃν πατέρʼ αἶψα· |
| 36 | Primary ὦ πάτερ, ἦ μέγα θαῦμα τόδʼ ὀφθαλμοῖσιν ὁρῶμαι. |
| 37 | Primary ἔμπης μοι τοῖχοι μεγάρων καλαί τε μεσόδμαι, |
| 38 | Primary εἰλάτιναί τε δοκοί, καὶ κίονες ὑψόσʼ ἔχοντες |
| 39 | Primary φαίνοντʼ ὀφθαλμοῖς ὡς εἰ πυρὸς αἰθομένοιο. |
| 40 | Primary ἦ μάλα τις θεὸς ἔνδον, οἳ οὐρανὸν εὐρὺν ἔχουσι. |
| 41 | Primary τὸν δʼ ἀπαμειβόμενος προσέφη πολύμητις Ὀδυσσεύς· |
| 42 | Primary σίγα καὶ κατὰ σὸν νόον ἴσχανε μηδʼ ἐρέεινε· |
| 43 | Primary αὕτη τοι δίκη ἐστὶ θεῶν, οἳ Ὄλυμπον ἔχουσιν. |
| 44 | Primary ἀλλὰ σὺ μὲν κατάλεξαι, ἐγὼ δʼ ὑπολείψομαι αὐτοῦ, |
| 45 | Primary ὄφρα κʼ ἔτι δμῳὰς καὶ μητέρα σὴν ἐρεθίζω· |
| 46 | Primary ἡ δέ μʼ ὀδυρομένη εἰρήσεται ἀμφὶς ἕκαστα. |
| 47 | Primary ὣς φάτο, Τηλέμαχος δὲ διὲκ μεγάροιο βεβήκει |
| 48 | Primary κείων ἐς θάλαμον, δαΐδων ὕπο λαμπομενάων, |
| 49 | Primary ἔνθα πάρος κοιμᾶθʼ, ὅτε μιν γλυκὺς ὕπνος ἱκάνοι· |
| 50 | Primary ἔνθʼ ἄρα καὶ τότʼ ἔλεκτο καὶ Ἠῶ δῖαν ἔμιμνεν. |
| 51 | Primary αὐτὰρ ὁ ἐν μεγάρῳ ὑπελείπετο δῖος Ὀδυσσεύς, |
| 52 | Primary μνηστήρεσσι φόνον σὺν Ἀθήνῃ μερμηρίζων. |
| 53 | Primary ἡ δʼ ἴεν ἐκ θαλάμοιο περίφρων Πηνελόπεια, |
| 54 | Primary Ἀρτέμιδι ἰκέλη ἠὲ χρυσέῃ Ἀφροδίτῃ. |
| 55 | Primary τῇ παρὰ μὲν κλισίην πυρὶ κάτθεσαν, ἔνθʼ ἄρʼ ἐφῖζε, |
| 56 | Primary δινωτὴν ἐλέφαντι καὶ ἀργύρῳ· ἥν ποτε τέκτων |
| 57 | Primary ποίησʼ Ἰκμάλιος, καὶ ὑπὸ θρῆνυν ποσὶν ἧκε |
| 58 | Primary προσφυέʼ ἐξ αὐτῆς, ὅθʼ ἐπὶ μέγα βάλλετο κῶας. |
| 59 | Primary ἔνθα καθέζετʼ ἔπειτα περίφρων Πηνελόπεια. |
| 60 | Primary ἦλθον δὲ δμῳαὶ λευκώλενοι ἐκ μεγάροιο. |
| 61 | Primary αἱ δʼ ἀπὸ μὲν σῖτον πολὺν ᾕρεον ἠδὲ τραπέζας |
| 62 | Primary καὶ δέπα, ἔνθεν ἄρʼ ἄνδρες ὑπερμενέοντες ἔπινον· |
| 63 | Primary πῦρ δʼ ἀπὸ λαμπτήρων χαμάδις βάλον, ἄλλα δʼ ἐπʼ αὐτῶν |
| 64 | Primary νήησαν ξύλα πολλά, φόως ἔμεν ἠδὲ θέρεσθαι. |
| 65 | Primary ἡ δʼ Ὀδυσῆʼ ἐνένιπε Μελανθὼ δεύτερον αὖτις· |
| 66 | Primary ξεῖνʼ, ἔτι καὶ νῦν ἐνθάδʼ ἀνιήσεις διὰ νύκτα |
| 67 | Primary δινεύων κατὰ οἶκον, ὀπιπεύσεις δὲ γυναῖκας; |
| 68 | Primary ἀλλʼ ἔξελθε θύραζε, τάλαν, καὶ δαιτὸς ὄνησο· |
| 69 | Primary ἢ τάχα καὶ δαλῷ βεβλημένος εἶσθα θύραζε. |
| 70 | Primary τὴν δʼ ἄρʼ ὑπόδρα ἰδὼν προσέφη πολύμητις Ὀδυσσεύς· |
| 71 | Primary δαιμονίη, τί μοι ὧδʼ ἐπέχεις κεκοτηότι θυμῷ; |
| 72 | Primary ἦ ὅτι δὴ ῥυπόω, κακὰ δὲ χροῒ εἵματα εἷμαι, |
| 73 | Primary πτωχεύω δʼ ἀνὰ δῆμον; ἀναγκαίη γὰρ ἐπείγει. |
| 74 | Primary τοιοῦτοι πτωχοὶ καὶ ἀλήμονες ἄνδρες ἔασι |
| 75 | Primary καὶ γὰρ ἐγώ ποτε οἶκον ἐν ἀνθρώποισιν ἔναιον |
| 76 | Primary ὄλβιος ἀφνειὸν καὶ πολλάκι δόσκον ἀλήτῃ, |
| 77 | Primary τοίῳ ὁποῖος ἔοι καὶ ὅτευ κεχρημένος ἔλθοι· |
| 78 | Primary ἦσαν δὲ δμῶες μάλα μυρίοι, ἄλλα τε πολλὰ |
| 79 | Primary οἷσίν τʼ εὖ ζώουσι καὶ ἀφνειοὶ καλέονται. |
| 80 | Primary ἀλλὰ Ζεὺς ἀλάπαξε Κρονίων· ἤθελε γάρ που· |
| 81 | Primary τῷ νῦν μήποτε καὶ σύ, γύναι, ἀπὸ πᾶσαν ὀλέσσῃς |
| 82 | Primary ἀγλαΐην, τῇ νῦν γε μετὰ δμῳῇσι κέκασσαι· |
| 83 | Primary μή πώς τοι δέσποινα κοτεσσαμένη χαλεπήνῃ, |
| 84 | Primary ἢ Ὀδυσεὺς ἔλθῃ· ἔτι γὰρ καὶ ἐλπίδος αἶσα. |
| 85 | Primary εἰ δʼ ὁ μὲν ὣς ἀπόλωλε καὶ οὐκέτι νόστιμός ἐστιν, |
| 86 | Primary ἀλλʼ ἤδη παῖς τοῖος Ἀπόλλωνός γε ἕκητι, |
| 87 | Primary Τηλέμαχος· τὸν δʼ οὔ τις ἐνὶ μεγάροισι γυναικῶν |
| 88 | Primary λήθει ἀτασθάλλουσʼ, ἐπεὶ οὐκέτι τηλίκος ἐστίν. |
| 89 | Primary ὣς φάτο, τοῦ δʼ ἤκουσε περίφρων Πηνελόπεια, |
| 90 | Primary ἀμφίπολον δʼ ἐνένιπεν ἔπος τʼ ἔφατʼ ἔκ τʼ ὀνόμαζε· |
| 91 | Primary πάντως, θαρσαλέη, κύον ἀδεές, οὔ τί με λήθεις |
| 92 | Primary ἔρδουσα μέγα ἔργον, ὃ σῇ κεφαλῇ ἀναμάξεις· |
| 93 | Primary πάντα γὰρ εὖ ᾔδησθʼ, ἐπεὶ ἐξ ἐμεῦ ἔκλυες αὐτῆς |
| 94 | Primary ὡς τὸν ξεῖνον ἔμελλον ἐνὶ μεγάροισιν ἐμοῖσιν |
| 95 | Primary ἀμφὶ πόσει εἴρεσθαι, ἐπεὶ πυκινῶς ἀκάχημαι. |
| 96 | Primary ἦ ῥα καὶ Εὐρυνόμην ταμίην πρὸς μῦθον ἔειπεν· |
| 97 | Primary Εὐρυνόμη, φέρε δὴ δίφρον καὶ κῶας ἐπʼ αὐτοῦ, |
| 98 | Primary ὄφρα καθεζόμενος εἴπῃ ἔπος ἠδʼ ἐπακούσῃ |
| 99 | Primary ὁ ξεῖνος ἐμέθεν· ἐθέλω δέ μιν ἐξερέεσθαι. |
| 100 | Primary ὣς ἔφαθʼ, ἡ δὲ μάλʼ ὀτραλέως κατέθηκε φέρουσα |
| 101 | Primary δίφρον ἐΰξεστον καὶ ἐπʼ αὐτῷ κῶας ἔβαλλεν· |
| 102 | Primary ἔνθα καθέζετʼ ἔπειτα πολύτλας δῖος Ὀδυσσεύς. |
| 103 | Primary τοῖσι δὲ μύθων ἦρχε περίφρων Πηνελόπεια· |
| 104 | Primary ξεῖνε, τὸ μέν σε πρῶτον ἐγὼν εἰρήσομαι αὐτή· |
| 105 | Primary τίς πόθεν εἶς ἀνδρῶν; πόθι τοι πόλις ἠδὲ τοκῆες; |
| 106 | Primary τὴν δʼ ἀπαμειβόμενος προσέφη πολύμητις Ὀδυσσεύς· |
| 107 | Primary ὦ γύναι, οὐκ ἄν τίς σε βροτῶν ἐπʼ ἀπείρονα γαῖαν |
| 108 | Primary νεικέοι· ἦ γάρ σευ κλέος οὐρανὸν εὐρὺν ἱκάνει, |
| 109 | Primary ὥς τέ τευ ἢ βασιλῆος ἀμύμονος, ὅς τε θεουδὴς |
| 110 | Primary ἀνδράσιν ἐν πολλοῖσι καὶ ἰφθίμοισιν ἀνάσσων |
| 111 | Primary εὐδικίας ἀνέχῃσι, φέρῃσι δὲ γαῖα μέλαινα |
| 112 | Primary πυροὺς καὶ κριθάς, βρίθῃσι δὲ δένδρεα καρπῷ, |
| 113 | Primary τίκτῃ δʼ ἔμπεδα μῆλα, θάλασσα δὲ παρέχῃ ἰχθῦς |
| 114 | Primary ἐξ εὐηγεσίης, ἀρετῶσι δὲ λαοὶ ὑπʼ αὐτοῦ. |
| 115 | Primary τῷ ἐμὲ νῦν τὰ μὲν ἄλλα μετάλλα σῷ ἐνὶ οἴκῳ, |
| 116 | Primary μηδʼ ἐμὸν ἐξερέεινε γένος καὶ πατρίδα γαῖαν, |
| 117 | Primary μή μοι μᾶλλον θυμὸν ἐνιπλήσῃς ὀδυνάων |
| 118 | Primary μνησαμένῳ μάλα δʼ εἰμὶ πολύστονος· οὐδέ τί με χρὴ |
| 119 | Primary οἴκῳ ἐν ἀλλοτρίῳ γοόωντά τε μυρόμενόν τε |
| 120 | Primary ἧσθαι, ἐπεὶ κάκιον πενθήμεναι ἄκριτον αἰεί· |
| 121 | Primary μή τίς μοι δμῳῶν νεμεσήσεται, ἠὲ σύ γʼ αὐτή, |
| 122 | Primary φῇ δὲ δακρυπλώειν βεβαρηότα με φρένας οἴνῳ. |
| 123 | Primary τὸν δʼ ἠμείβετʼ ἔπειτα περίφρων Πηνελόπεια· |
| 124 | Primary ξεῖνʼ, ἦ τοι μὲν ἐμὴν ἀρετὴν εἶδός τε δέμας τε |
| 125 | Primary ὤλεσαν ἀθάνατοι, ὅτε Ἴλιον εἰσανέβαινον |
| 126 | Primary Ἀργεῖοι, μετὰ τοῖσι δʼ ἐμὸς πόσις ᾖεν Ὀδυσσεύς |
| 127 | Primary εἰ κεῖνός γʼ ἐλθὼν τὸν ἐμὸν βίον ἀμφιπολεύοι, |
| 128 | Primary μεῖζον κε κλέος εἴη ἐμὸν καὶ κάλλιον οὕτως. |
| 129 | Primary νῦν δʼ ἄχομαι· τόσα γάρ μοι ἐπέσσευεν κακὰ δαίμων. |
| 130 | Primary ὅσσοι γὰρ νήσοισιν ἐπικρατέουσιν ἄριστοι, |
| 131 | Primary Δουλιχίῳ τε Σάμῃ τε καὶ ὑλήεντι Ζακύνθῳ, |
| 132 | Primary οἵ τʼ αὐτὴν Ἰθάκην εὐδείελον ἀμφινέμονται, |
| 133 | Primary οἵ μʼ ἀεκαζομένην μνῶνται, τρύχουσι δὲ οἶκον. |
| 134 | Primary τῷ οὔτε ξείνων ἐμπάξομαι οὔθʼ ἱκετάων |
| 135 | Primary οὔτε τι κηρύκων, οἳ δημιοεργοὶ ἔασιν· |
| 136 | Primary ἀλλʼ Ὀδυσῆ ποθέουσα φίλον κατατήκομαι ἦτορ. |
| 137 | Primary οἱ δὲ γάμον σπεύδουσιν· ἐγὼ δὲ δόλους τολυπεύω. |
| 138 | Primary φᾶρος μέν μοι πρῶτον ἐνέπνευσε φρεσὶ δαίμων, |
| 139 | Primary στησαμένῃ μέγαν ἱστόν, ἐνὶ μεγάροισιν ὑφαίνειν, |
| 140 | Primary λεπτὸν καὶ περίμετρον· ἄφαρ δʼ αὐτοῖς μετέειπον· |
| 141 | Primary κοῦροι, ἐμοὶ μνηστῆρες, ἐπεὶ θάνε δῖος Ὀδυσσεύς, |
| 142 | Primary μίμνετʼ ἐπειγόμενοι τὸν ἐμὸν γάμον, εἰς ὅ κε φᾶρος |
| 143 | Primary ἐκτελέσω—μή μοι μεταμώνια νήματʼ ὄληται— |
| 144 | Primary Λαέρτῃ ἥρωϊ ταφήϊον, εἰς ὅτε κέν μιν |
| 145 | Primary μοῖρʼ ὀλοὴ καθέλῃσι τανηλεγέος θανάτοιο· |
| 146 | Primary μή τίς μοι κατὰ δῆμον Ἀχαιϊάδων νεμεσήσῃ, |
| 147 | Primary αἴ κεν ἄτερ σπείρου κεῖται πολλὰ κτεατίσσας. |
| 148 | Primary ὣς ἐφάμην, τοῖσιν δʼ ἐπεπείθετο θυμὸς ἀγήνωρ. |
| 149 | Primary ἔνθα καὶ ἠματίη μὲν ὑφαίνεσκον μέγαν ἱστόν, |
| 150 | Primary νύκτας δʼ ἀλλύεσκον, ἐπεὶ δαΐδας παραθείμην. |
| 151 | Primary ὣς τρίετες μὲν ἔληθον ἐγὼ καὶ ἔπειθον Ἀχαιούς· |
| 152 | Primary ἀλλʼ ὅτε τέτρατον ἦλθεν ἔτος καὶ ἐπήλυθον ὧραι, |
| 153 | Primary μηνῶν φθινόντων, περὶ δʼ ἤματα πόλλʼ ἐτελέσθη, |
| 154 | Primary καὶ τότε δή με διὰ δμῳάς, κύνας οὐκ ἀλεγούσας, |
| 155 | Primary εἷλον ἐπελθόντες καὶ ὁμόκλησαν ἐπέεσσιν. |
| 156 | Primary ὣς τὸ μὲν ἐξετέλεσσα, καὶ οὐκ ἐθέλουσʼ, ὑπʼ ἀνάγκης· |
| 157 | Primary νῦν δʼ οὔτʼ ἐκφυγέειν δύναμαι γάμον οὔτε τινʼ ἄλλην |
| 158 | Primary μῆτιν ἔθʼ εὑρίσκω· μάλα δʼ ὀτρύνουσι τοκῆες |
| 159 | Primary γήμασθʼ, ἀσχαλάᾳ δὲ πάϊς βίοτον κατεδόντων, |
| 160 | Primary γιγνώσκων· ἤδη γὰρ ἀνὴρ οἶός τε μάλιστα |
| 161 | Primary οἴκου κήδεσθαι, τῷ τε Ζεὺς κῦδος ὀπάζει. |
| 162 | Primary ἀλλὰ καὶ ὥς μοι εἰπὲ τεὸν γένος, ὁππόθεν ἐσσί. |
| 163 | Primary οὐ γὰρ ἀπὸ δρυός ἐσσι παλαιφάτου οὐδʼ ἀπὸ πέτρης. |
| 164 | Primary τὴν δʼ ἀπαμειβόμενος προσέφη πολύμητις Ὀδυσσεύς· |
| 165 | Primary ὦ γύναι αἰδοίη Λαερτιάδεω Ὀδυσῆος, |
| 166 | Primary οὐκέτʼ ἀπολλήξεις τὸν ἐμὸν γόνον ἐξερέουσα; |
| 167 | Primary ἀλλʼ ἔκ τοι ἐρέω· ἦ μέν μʼ ἀχέεσσί γε δώσεις |
| 168 | Primary πλείοσιν ἢ ἔχομαι· ἡ γὰρ δίκη, ὁππότε πάτρης |
| 169 | Primary ἧς ἀπέῃσιν ἀνὴρ τόσσον χρόνον ὅσσον ἐγὼ νῦν, |
| 170 | Primary πολλὰ βροτῶν ἐπὶ ἄστεʼ ἀλώμενος, ἄλγεα πάσχων· |
| 171 | Primary ἀλλὰ καὶ ὣς ἐρέω ὅ μʼ ἀνείρεαι ἠδὲ μεταλλᾷς. |
| 172 | Primary Κρήτη τις γαῖʼ ἔστι, μέσῳ ἐνὶ οἴνοπι πόντῳ, |
| 173 | Primary καλὴ καὶ πίειρα, περίρρυτος· ἐν δʼ ἄνθρωποι |
| 174 | Primary πολλοί, ἀπειρέσιοι, καὶ ἐννήκοντα πόληες. |
| 175 | Primary ἄλλη δʼ ἄλλων γλῶσσα μεμιγμένη· ἐν μὲν Ἀχαιοί, |
| 176 | Primary ἐν δʼ Ἐτεόκρητες μεγαλήτορες, ἐν δὲ Κύδωνες, |
| 177 | Primary Δωριέες τε τριχάϊκες δῖοί τε Πελασγοί. |
| 178 | Primary τῇσι δʼ ἐνὶ Κνωσός, μεγάλη πόλις, ἔνθα τε Μίνως |
| 179 | Primary ἐννέωρος βασίλευε Διὸς μεγάλου ὀαριστής, |
| 180 | Primary πατρὸς ἐμοῖο πατήρ, μεγαθύμου Δευκαλίωνος |
| 181 | Primary Δευκαλίων δʼ ἐμὲ τίκτε καὶ Ἰδομενῆα ἄνακτα· |
| 182 | Primary ἀλλʼ ὁ μὲν ἐν νήεσσι κορωνίσιν Ἴλιον ἴσω |
| 183 | Primary ᾤχεθʼ ἅμʼ Ἀτρείδῃσιν, ἐμοὶ δʼ ὄνομα κλυτὸν Αἴθων, |
| 184 | Primary ὁπλότερος γενεῇ· ὁ δʼ ἄρα πρότερος καὶ ἀρείων. |
| 185 | Primary ἔνθʼ Ὀδυσῆα ἐγὼν ἰδόμην καὶ ξείνια δῶκα. |
| 186 | Primary καὶ γὰρ τὸν Κρήτηνδε κατήγαγεν ἲς ἀνέμοιο, |
| 187 | Primary ἱέμενον Τροίηνδε παραπλάγξασα Μαλειῶν· |
| 188 | Primary στῆσε δʼ ἐν Ἀμνισῷ, ὅθι τε σπέος Εἰλειθυίης, |
| 189 | Primary ἐν λιμέσιν χαλεποῖσι, μόγις δʼ ὑπάλυξεν ἀέλλας. |
| 190 | Primary αὐτίκα δʼ Ἰδομενῆα μετάλλα ἄστυδʼ ἀνελθών· |
| 191 | Primary ξεῖνον γάρ οἱ ἔφασκε φίλον τʼ ἔμεν αἰδοῖόν τε. |
| 192 | Primary τῷ δʼ ἤδη δεκάτη ἢ ἑνδεκάτη πέλεν ἠὼς |
| 193 | Primary οἰχομένῳ σὺν νηυσὶ κορωνίσιν Ἴλιον εἴσω. |
| 194 | Primary τὸν μὲν ἐγὼ πρὸς δώματʼ ἄγων ἐῢ ἐξείνισσα, |
| 195 | Primary ἐνδυκέως φιλέων, πολλῶν κατὰ οἶκον ἐόντων· |
| 196 | Primary καί οἱ τοῖς ἄλλοις ἑτάροις, οἳ ἅμʼ αὐτῷ ἕποντο, |
| 197 | Primary δημόθεν ἄλφιτα δῶκα καὶ αἴθοπα οἶνον ἀγείρας |
| 198 | Primary καὶ βοῦς ἱρεύσασθαι, ἵνα πλησαίατο θυμόν. |
| 199 | Primary ἔνθα δυώδεκα μὲν μένον ἤματα δῖοι Ἀχαιοί· |
| 200 | Primary εἴλει γὰρ Βορέης ἄνεμος μέγας οὐδʼ ἐπὶ γαίῃ |
| 201 | Primary εἴα ἵστασθαι, χαλεπὸς δέ τις ὤρορε δαίμων. |
| 202 | Primary τῇ τρισκαιδεκάτῃ δʼ ἄνεμος πέσε, τοὶ δʼ ἀνάγοντο. |
| 203 | Primary ἴσκε ψεύδεα πολλὰ λέγων ἐτύμοισιν ὁμοῖα· |
| 204 | Primary τῆς δʼ ἄρʼ ἀκουούσης ῥέε δάκρυα, τήκετο δὲ χρώς· |
| 205 | Primary ὡς δὲ χιὼν κατατήκετʼ ἐν ἀκροπόλοισιν ὄρεσσιν, |
| 206 | Primary ἥν τʼ Εὖρος κατέτηξεν, ἐπὴν Ζέφυρος καταχεύῃ· |
| 207 | Primary τηκομένης δʼ ἄρα τῆς ποταμοὶ πλήθουσι ῥέοντες· |
| 208 | Primary ὣς τῆς τήκετο καλὰ παρήϊα δάκρυ χεούσης, |
| 209 | Primary κλαιούσης ἑὸν ἄνδρα παρήμενον. αὐτὰρ Ὀδυσσεὺς |
| 210 | Primary θυμῷ μὲν γοόωσαν ἑὴν ἐλέαιρε γυναῖκα, |
| 211 | Primary ὀφθαλμοὶ δʼ ὡς εἰ κέρα ἕστασαν ἠὲ σίδηρος |
| 212 | Primary ἀτρέμας ἐν βλεφάροισι· δόλῳ δʼ ὅ γε δάκρυα κεῦθεν. |
| 213 | Primary ἡ δʼ ἐπεὶ οὖν τάρφθη πολυδακρύτοιο γόοιο, |
| 214 | Primary ἐξαῦτίς μιν ἔπεσσιν ἀμειβομένη προσέειπε· |
| 215 | Primary νῦν μὲν δή σευ, ξεῖνέ γʼ, ὀΐω πειρήσεσθαι, |
| 216 | Primary εἰ ἐτεὸν δὴ κεῖθι σὺν ἀντιθέοις ἑτάροισι |
| 217 | Primary ξείνισας ἐν μεγάροισιν ἐμὸν πόσιν, ὡς ἀγορεύεις. |
| 218 | Primary εἰπέ μοι ὁπποῖʼ ἄσσα περὶ χροῒ εἵματα ἕστο, |
| 219 | Primary αὐτός θʼ οἷος ἔην, καὶ ἑταίρους, οἵ οἱ ἕποντο. |
| 220 | Primary τὴν δʼ ἀπαμειβόμενος προσέφη πολύμητις Ὀδυσσεύς· |
| 221 | Primary ὦ γύναι, ἀργαλέον τόσσον χρόνον ἀμφὶς ἐόντα |
| 222 | Primary εἰπέμεν· ἤδη γάρ οἱ ἐεικοστὸν ἔτος ἐστὶν |
| 223 | Primary ἐξ οὗ κεῖθεν ἔβη καὶ ἐμῆς ἀπελήλυθε πάτρης· |
| 224 | Primary αὐτάρ τοι ἐρέω ὥς μοι ἰνδάλλεται ἦτορ. |
| 225 | Primary χλαῖναν πορφυρέην οὔλην ἔχε δῖος Ὀδυσσεύς, |
| 226 | Primary διπλῆν· αὐτάρ οἱ περόνη χρυσοῖο τέτυκτο |
| 227 | Primary αὐλοῖσιν διδύμοισι· πάροιθε δὲ δαίδαλον ἦεν· |
| 228 | Primary ἐν προτέροισι πόδεσσι κύων ἔχε ποικίλον ἐλλόν, |
| 229 | Primary ἀσπαίροντα λάων· τὸ δὲ θαυμάζεσκον ἅπαντες, |
| 230 | Primary ὡς οἱ χρύσεοι ἐόντες ὁ μὲν λάε νεβρὸν ἀπάγχων, |
| 231 | Primary αὐτὰρ ὁ ἐκφυγέειν μεμαὼς ἤσπαιρε πόδεσσι. |
| 232 | Primary τὸν δὲ χιτῶνʼ ἐνόησα περὶ χροῒ σιγαλόεντα, |
| 233 | Primary οἷόν τε κρομύοιο λοπὸν κάτα ἰσχαλέοιο· |
| 234 | Primary τὼς μὲν ἔην μαλακός, λαμπρὸς δʼ ἦν ἠέλιος ὥς· |
| 235 | Primary ἦ μὲν πολλαί γʼ αὐτὸν ἐθηήσαντο γυναῖκες. |
| 236 | Primary ἄλλο δέ τοι ἐρέω, σὺ δʼ ἐνὶ φρεσὶ βάλλεο σῇσιν· |
| 237 | Primary οὐκ οἶδʼ ἢ τάδε ἕστο περὶ χροῒ οἴκοθʼ Ὀδυσσεύς, |
| 238 | Primary ἦ τις ἑταίρων δῶκε θοῆς ἐπὶ νηὸς ἰόντι, |
| 239 | Primary ἤ τίς που καὶ ξεῖνος, ἐπεὶ πολλοῖσιν Ὀδυσσεὺς |
| 240 | Primary ἔσκε φίλος· παῦροι γὰρ Ἀχαιῶν ἦσαν ὁμοῖοι. |
| 241 | Primary καί οἱ ἐγὼ χάλκειον ἄορ καὶ δίπλακα δῶκα |
| 242 | Primary καλὴν πορφυρέην καὶ τερμιόεντα χιτῶνα, |
| 243 | Primary αἰδοίως δʼ ἀπέπεμπον ἐϋσσέλμου ἐπὶ νηός. |
| 244 | Primary καὶ μέν οἱ κῆρυξ ὀλίγον προγενέστερος αὐτοῦ |
| 245 | Primary εἵπετο· καὶ τόν τοι μυθήσομαι, οἷος ἔην περ. |
| 246 | Primary γυρὸς ἐν ὤμοισιν, μελανόχροος, οὐλοκάρηνος, |
| 247 | Primary Εὐρυβάτης δʼ ὄνομʼ ἔσκε· τίεν δέ μιν ἔξοχον ἄλλων |
| 248 | Primary ὧν ἑτάρων Ὀδυσεύς, ὅτι οἱ φρεσὶν ἄρτια ᾔδη. |
| 249 | Primary ὣς φάτο, τῇ δʼ ἔτι μᾶλλον ὑφʼ ἵμερον ὦρσε γόοιο, |
| 250 | Primary σήματʼ ἀναγνούσῃ τά οἱ ἔμπεδα πέφραδʼ Ὀδυσσεύς. |
| 251 | Primary ἡ δʼ ἐπεὶ οὖν τάρφθη πολυδακρύτοιο γόοιο. |
| 252 | Primary καὶ τότε μιν μύθοισιν ἀμειβομένη προσέειπε· |
| 253 | Primary νῦν μὲν δή μοι, ξεῖνε, πάρος περ ἐὼν ἐλεεινός, |
| 254 | Primary ἐν μεγάροισιν ἐμοῖσι φίλος τʼ ἔσῃ αἰδοῖός τε· |
| 255 | Primary αὐτὴ γὰρ τάδε εἵματʼ ἐγὼ πόρον, οἷʼ ἀγορεύεις, |
| 256 | Primary πτύξασʼ ἐκ θαλάμου, περόνην τʼ ἐπέθηκα φαεινὴν |
| 257 | Primary κείνῳ ἄγαλμʼ ἔμεναι· τὸν δʼ οὐχ ὑποδέξομαι αὖτις |
| 258 | Primary οἴκαδε νοστήσαντα φίλην ἐς πατρίδα γαῖαν. |
| 259 | Primary τῷ ῥα κακῇ αἴσῃ κοίλης ἐπὶ νηὸς Ὀδυσσεὺς |
| 260 | Primary ᾤχετʼ ἐποψόμενος Κακοΐλιον οὐκ ὀνομαστήν. |
| 261 | Primary τὴν δʼ ἀπαμειβόμενος προσέφη πολύμητις Ὀδυσσεύς· |
| 262 | Primary ὦ γύναι αἰδοίη Λαερτιάδεω Ὀδυσῆος, |
| 263 | Primary μηκέτι νῦν χρόα καλὸν ἐναίρεο, μηδέ τι θυμὸν |
| 264 | Primary τῆκε, πόσιν γοόωσα. νεμεσσῶμαί γε μὲν οὐδέν· |
| 265 | Primary καὶ γάρ τίς τʼ ἀλλοῖον ὀδύρεται ἄνδρʼ ὀλέσασα |
| 266 | Primary κουρίδιον, τῷ τέκνα τέκῃ φιλότητι μιγεῖσα, |
| 267 | Primary ἢ Ὀδυσῆʼ, ὅν φασι θεοῖς ἐναλίγκιον εἶναι. |
| 268 | Primary ἀλλὰ γόου μὲν παῦσαι, ἐμεῖο δὲ σύνθεο μῦθον· |
| 269 | Primary νημερτέως γάρ τοι μυθήσομαι οὐδʼ ἐπικεύσω |
| 270 | Primary ὡς ἤδη Ὀδυσῆος ἐγὼ περὶ νόστου ἄκουσα |
| 271 | Primary ἀγχοῦ, Θεσπρωτῶν ἀνδρῶν ἐν πίονι δήμῳ, |
| 272 | Primary ζωοῦ· αὐτὰρ ἄγει κειμήλια πολλὰ καὶ ἐσθλὰ |
| 273 | Primary αἰτίζων ἀνὰ δῆμον. ἀτὰρ ἐρίηρας ἑταίρους |
| 274 | Primary ὤλεσε καὶ νῆα γλαφυρὴν ἐνὶ οἴνοπι πόντῳ, |
| 275 | Primary Θρινακίης ἄπο νήσου ἰών· ὀδύσαντο γὰρ αὐτῷ |
| 276 | Primary Ζεύς τε καὶ Ἠέλιος· τοῦ γὰρ βόας ἔκταν ἑταῖροι. |
| 277 | Primary οἱ μὲν πάντες ὄλοντο πολυκλύστῳ ἐνὶ πόντῳ· |
| 278 | Primary τὸν δʼ ἄρʼ ἐπὶ τρόπιος νεὸς ἔκβαλε κῦμʼ ἐπὶ χέρσου, |
| 279 | Primary Φαιήκων ἐς γαῖαν, οἳ ἀγχίθεοι γεγάασιν, |
| 280 | Primary οἳ δή μιν περὶ κῆρι θεὸν ὣς τιμήσαντο |
| 281 | Primary καί οἱ πολλὰ δόσαν πέμπειν τέ μιν ἤθελον αὐτοὶ |
| 282 | Primary οἴκαδʼ ἀπήμαντον. καί κεν πάλαι ἐνθάδʼ Ὀδυσσεὺς |
| 283 | Primary ἤην· ἀλλʼ ἄρα οἱ τό γε κέρδιον εἴσατο θυμῷ, |
| 284 | Primary χρήματʼ ἀγυρτάζειν πολλὴν ἐπὶ γαῖαν ἰόντι· |
| 285 | Primary ὣς περὶ κέρδεα πολλὰ καταθνητῶν ἀνθρώπων |
| 286 | Primary οἶδʼ Ὀδυσεύς, οὐδʼ ἄν τις ἐρίσσειε βροτὸς ἄλλος. |
| 287 | Primary ὥς μοι Θεσπρωτῶν βασιλεὺς μυθήσατο Φείδων· |
| 288 | Primary ὤμνυε δὲ πρὸς ἔμʼ αὐτόν, ἀποσπένδων ἐνὶ οἴκῳ, |
| 289 | Primary νῆα κατειρύσθαι καὶ ἐπαρτέας ἔμμεν ἑταίρους, |
| 290 | Primary οἳ δή μιν πέμψουσι φίλην ἐς πατρίδα γαῖαν. |
| 291 | Primary ἀλλʼ ἐμὲ πρὶν ἀπέπεμψε· τύχησε γὰρ ἐρχομένη νηῦς |
| 292 | Primary ἀνδρῶν Θεσπρωτῶν ἐς Δουλίχιον πολύπυρον. |
| 293 | Primary καί μοι κτήματʼ ἔδειξεν, ὅσα ξυναγείρατʼ Ὀδυσσεύς· |
| 294 | Primary καί νύ κεν ἐς δεκάτην γενεὴν ἕτερόν γʼ ἔτι βόσκοι, |
| 295 | Primary ὅσσα οἱ ἐν μεγάροις κειμήλια κεῖτο ἄνακτος. |
| 296 | Primary τὸν δʼ ἐς Δωδώνην φάτο βήμεναι, ὄφρα θεοῖο |
| 297 | Primary ἐκ δρυὸς ὑψικόμοιο Διὸς βουλὴν ἐπακούσαι, |
| 298 | Primary ὅππως νοστήσειε φίλην ἐς πατρίδα γαῖαν |
| 299 | Primary ἤδη δὴν ἀπεών, ἤ ἀμφαδὸν ἦε κρυφηδόν. |
| 300 | Primary ὣς ὁ μὲν οὕτως ἐστὶ σόος καὶ ἐλεύσεται ἤδη |
| 301 | Primary ἄγχι μάλʼ, οὐδʼ ἔτι τῆλε φίλων καὶ πατρίδος αἴης |
| 302 | Primary δηρὸν ἀπεσσεῖται· ἔμπης δέ τοι ὅρκια δώσω. |
| 303 | Primary ἴστω νῦν Ζεὺς πρῶτα, θεῶν ὕπατος καὶ ἄριστος, |
| 304 | Primary ἱστίη τʼ Ὀδυσῆος ἀμύμονος, ἣν ἀφικάνω· |
| 305 | Primary ἦ μέν τοι τάδε πάντα τελείεται ὡς ἀγορεύω. |
| 306 | Primary τοῦδʼ αὐτοῦ λυκάβαντος ἐλεύσεται ἐνθάδʼ Ὀδυσσεύς, |
| 307 | Primary τοῦ μὲν φθίνοντος μηνός, τοῦ δʼ ἱσταμένοιο. |
| 308 | Primary τὸν δʼ αὖτε προσέειπε περίφρων Πηνελόπεια· |
| 309 | Primary αἲ γὰρ τοῦτο, ξεῖνε, ἔπος τετελεσμένον εἴη· |
| 310 | Primary τῷ κε τάχα γνοίης φιλότητά τε πολλά τε δῶρα |
| 311 | Primary ἐξ ἐμεῦ, ὡς ἄν τίς σε συναντόμενος μακαρίζοι. |
| 312 | Primary ἀλλά μοι ὧδʼ ἀνὰ θυμὸν ὀΐεται, ὡς ἔσεταί περ· |
| 313 | Primary οὔτʼ Ὀδυσεὺς ἔτι οἶκον ἐλεύσεται, οὔτε σὺ πομπῆς |
| 314 | Primary τεύξῃ, ἐπεὶ οὐ τοῖοι σημάντορές εἰσʼ ἐνὶ οἴκῳ |
| 315 | Primary οἷος Ὀδυσσεὺς ἔσκε μετʼ ἀνδράσιν, εἴ ποτʼ ἔην γε, |
| 316 | Primary ξείνους αἰδοίους ἀποπεμπέμεν ἠδὲ δέχεσθαι. |
| 317 | Primary ἀλλά μιν, ἀμφίπολοι, ἀπονίψατε, κάτθετε δʼ εὐνήν, |
| 318 | Primary δέμνια καὶ χλαίνας καὶ ῥήγεα σιγαλόεντα, |
| 319 | Primary ὥς κʼ εὖ θαλπιόων χρυσόθρονον Ἠῶ ἵκηται. |
| 320 | Primary ἠῶθεν δὲ μάλʼ ἦρι λοέσσαι τε χρῖσαί τε, |
| 321 | Primary ὥς κʼ ἔνδον παρὰ Τηλεμάχῳ δείπνοιο μέδηται |
| 322 | Primary ἥμενος ἐν μεγάρῳ· τῷ δʼ ἄλγιον ὅς κεν ἐκείνων |
| 323 | Primary τοῦτον ἀνιάζῃ θυμοφθόρος· οὐδέ τι ἔργον |
| 324 | Primary ἐνθάδʼ ἔτι πρήξει, μάλα περ κεχολωμένος αἰνῶς. |
| 325 | Primary πῶς γὰρ ἐμεῦ σύ, ξεῖνε, δαήσεαι εἴ τι γυναικῶν |
| 326 | Primary ἀλλάων περίειμι νόον καὶ ἐπίφρονα μῆτιν, |
| 327 | Primary εἴ κεν ἀϋσταλέος, κακὰ εἱμένος ἐν μεγάροισιν |
| 328 | Primary δαινύῃ; ἄνθρωποι δὲ μινυνθάδιοι τελέθουσιν. |
| 329 | Primary ὃς μὲν ἀπηνὴς αὐτὸς ἔῃ καὶ ἀπηνέα εἰδῇ, |
| 330 | Primary τῷ δὲ καταρῶνται πάντες βροτοὶ ἄλγεʼ ὀπίσσω |
| 331 | Primary ζωῷ, ἀτὰρ τεθνεῶτί γʼ ἐφεψιόωνται ἅπαντες· |
| 332 | Primary ὃς δʼ ἂν ἀμύμων αὐτὸς ἔῃ καὶ ἀμύμονα εἰδῇ, |
| 333 | Primary τοῦ μέν τε κλέος εὐρὺ δὶα ξεῖνοι φορέουσι |
| 334 | Primary πάντας ἐπʼ ἀνθρώπους, πολλοί τέ μιν ἐσθλὸν ἔειπον. |
| 335 | Primary τὴν δʼ ἀπαμειβόμενος προσέφη πολύμητις Ὀδυσσεύς· |
| 336 | Primary ὦ γύναι αἰδοίη Λαερτιάδεω Ὀδυσῆος, |
| 337 | Primary ἦ τοι ἐμοὶ χλαῖναι καὶ ῥήγεα σιγαλόεντα |
| 338 | Primary ἤχθεθʼ, ὅτε πρῶτον Κρήτης ὄρεα νιφόεντα |
| 339 | Primary νοσφισάμην ἐπὶ νηὸς ἰὼν δολιχηρέτμοιο, |
| 340 | Primary κείω δʼ ὡς τὸ πάρος περ ἀΰπνους νύκτας ἴαυον· |
| 341 | Primary πολλὰς γὰρ δὴ νύκτας ἀεικελίῳ ἐνὶ κοίτῃ |
| 342 | Primary ἄεσα καί τʼ ἀνέμεινα ἐΰθρονον Ἠῶ δῖαν. |
| 343 | Primary οὐδέ τί μοι ποδάνιπτρα ποδῶν ἐπιήρανα θυμῷ |
| 344 | Primary γίγνεται· οὐδὲ γυνὴ ποδὸς ἅψεται ἡμετέροιο |
| 345 | Primary τάων αἵ τοι δῶμα κάτα δρήστειραι ἔασιν, |
| 346 | Primary εἰ μή τις γρηῦς ἔστι παλαιή, κεδνὰ ἰδυῖα, |
| 347 | Primary ἥ τις δὴ τέτληκε τόσα φρεσὶν ὅσσα τʼ ἐγώ περ· |
| 348 | Primary τῇ δʼ οὐκ ἂν φθονέοιμι ποδῶν ἅψασθαι ἐμεῖο. |
| 349 | Primary τὸν δʼ αὖτε προσέειπε περίφρων Πηνελόπεια· |
| 350 | Primary ξεῖνε φίλʼ· οὐ γάρ πώ τις ἀνὴρ πεπνυμένος ὧδε |
| 351 | Primary ξείνων τηλεδαπῶν φιλίων ἐμὸν ἵκετο δῶμα, |
| 352 | Primary ὡς σὺ μάλʼ εὐφραδέως πεπνυμένα πάντʼ ἀγορεύεις· |
| 353 | Primary ἔστι δέ μοι γρηῢς πυκινὰ φρεσὶ μήδεʼ ἔχουσα |
| 354 | Primary ἣ κεῖνον δύστηνον ἐῢ τρέφεν ἠδʼ ἀτίταλλε, |
| 355 | Primary δεξαμένη χείρεσσʼ, ὅτε μιν πρῶτον τέκε μήτηρ, |
| 356 | Primary ἥ σε πόδας νίψει, ὀλιγηπελέουσά περ ἔμπης. |
| 357 | Primary ἀλλʼ ἄγε νῦν ἀνστᾶσα, περίφρων Εὐρύκλεια, |
| 358 | Primary νίψον σοῖο ἄνακτος ὁμήλικα· καί που Ὀδυσσεὺς |
| 359 | Primary ἤδη τοιόσδʼ ἐστὶ πόδας τοιόσδε τε χεῖρας· |
| 360 | Primary αἶψα γὰρ ἐν κακότητι βροτοὶ καταγηράσκουσιν. |
| 361 | Primary ὣς ἄρʼ ἔφη, γρηῢς δὲ κατέσχετο χερσὶ πρόσωπα, |
| 362 | Primary δάκρυα δʼ ἔκβαλε θερμά, ἔπος δʼ ὀλοφυδνὸν ἔειπεν· |
| 363 | Primary ὤ μοι ἐγὼ σέο, τέκνον, ἀμήχανος· ἦ σε περὶ Ζεὺς |
| 364 | Primary ἀνθρώπων ἤχθηρε θεουδέα θυμὸν ἔχοντα. |
| 365 | Primary οὐ γάρ πώ τις τόσσα βροτῶν Διὶ τερπικεραύνῳ |
| 366 | Primary πίονα μηρίʼ ἔκηʼ οὐδʼ ἐξαίτους ἑκατόμβας, |
| 367 | Primary ὅσσα σὺ τῷ ἐδίδους, ἀρώμενος ἧος ἵκοιο |
| 368 | Primary γῆράς τε λιπαρὸν θρέψαιό τε φαίδιμον υἱόν· |
| 369 | Primary νῦν δέ τοι οἴῳ πάμπαν ἀφείλετο νόστιμον ἦμαρ. |
| 370 | Primary οὕτω που καὶ κείνῳ ἐφεψιόωντο γυναῖκες |
| 371 | Primary ξείνων τηλεδαπῶν, ὅτε τευ κλυτὰ δώμαθʼ ἵκοιτο, |
| 372 | Primary ὡς σέθεν αἱ κύνες αἵδε καθεψιόωνται ἅπασαι, |
| 373 | Primary τάων νῦν λώβην τε καὶ αἴσχεα πόλλʼ ἀλεείνων |
| 374 | Primary οὐκ ἐάας νίζειν· ἐμὲ δʼ οὐκ ἀέκουσαν ἄνωγε |
| 375 | Primary κούρη Ἰκαρίοιο, περίφρων Πηνελόπεια. |
| 376 | Primary τῷ σε πόδας νίψω ἅμα τʼ αὐτῆς Πηνελοπείης |
| 377 | Primary καὶ σέθεν εἵνεκʼ, ἐπεί μοι ὀρώρεται ἔνδοθι θυμὸς |
| 378 | Primary κήδεσιν. ἀλλʼ ἄγε νῦν ξυνίει ἔπος, ὅττι κεν εἴπω· |
| 379 | Primary πολλοὶ δὴ ξεῖνοι ταλαπείριοι ἐνθάδʼ ἵκοντο, |
| 380 | Primary ἀλλʼ οὔ πώ τινά φημι ἐοικότα ὧδε ἰδέσθαι |
| 381 | Primary ὡς σὺ δέμας φωνήν τε πόδας τʼ Ὀδυσῆϊ ἔοικας. |
| 382 | Primary τὴν δʼ ἀπαμειβόμενος προσέφη πολύμητις Ὀδυσσεύς· |
| 383 | Primary ὦ γρηῦ, οὕτω φασὶν ὅσοι ἴδον ὀφθαλμοῖσιν |
| 384 | Primary ἡμέας ἀμφοτέρους, μάλα εἰκέλω ἀλλήλοιϊν |
| 385 | Primary ἔμμεναι, ὡς σύ περ αὐτὴ ἐπιφρονέουσʼ ἀγορεύεις. |
| 386 | Primary ὣς ἄρʼ ἔφη, γρηῢς δὲ λέβηθʼ ἕλε παμφανόωντα |
| 387 | Primary τοῦ πόδας ἐξαπένιζεν, ὕδωρ δʼ ἐνεχεύατο πουλὺ |
| 388 | Primary ψυχρόν, ἔπειτα δὲ θερμὸν ἐπήφυσεν. αὐτὰρ Ὀδυσσεὺς |
| 389 | Primary ἷζεν ἐπʼ ἐσχαρόφιν, ποτὶ δὲ σκότον ἐτράπετʼ αἶψα· |
| 390 | Primary αὐτίκα γὰρ κατὰ θυμὸν ὀΐσατο, μή ἑ λαβοῦσα |
| 391 | Primary οὐλὴν ἀμφράσσαιτο καὶ ἀμφαδὰ ἔργα γένοιτο. |
| 392 | Primary νίζε δʼ ἄρʼ ἆσσον ἰοῦσα ἄναχθʼ ἑόν· αὐτίκα δʼ ἔγνω |
| 393 | Primary οὐλήν, τήν ποτέ μιν σῦς ἤλασε λευκῷ ὀδόντι |
| 394 | Primary Παρνησόνδʼ ἐλθόντα μετʼ Αὐτόλυκόν τε καὶ υἷας, |
| 395 | Primary μητρὸς ἑῆς πάτερʼ ἐσθλόν, ὃς ἀνθρώπους ἐκέκαστο |
| 396 | Primary κλεπτοσύνῃ θʼ ὅρκῳ τε· θεὸς δέ οἱ αὐτὸς ἔδωκεν |
| 397 | Primary Ἑρμείας· τῷ γὰρ κεχαρισμένα μηρία καῖεν |
| 398 | Primary ἀρνῶν ἠδʼ ἐρίφων· ὁ δέ οἱ πρόφρων ἅμʼ ὀπήδει. |
| 399 | Primary Αὐτόλυκος δʼ ἐλθὼν Ἰθάκης ἐς πίονα δῆμον |
| 400 | Primary παῖδα νέον γεγαῶτα κιχήσατο θυγατέρος ἧς· |
| 401 | Primary τόν ῥά οἱ Εὐρύκλεια φίλοις ἐπὶ γούνασι θῆκε |
| 402 | Primary παυομένῳ δόρποιο, ἔπος τʼ ἔφατʼ ἔκ τʼ ὀνόμαζεν· |
| 403 | Primary Αὐτόλυκʼ, αὐτὸς νῦν ὄνομʼ εὕρεο ὅττι κε θῆαι |
| 404 | Primary παιδὸς παιδὶ φίλῳ· πολυάρητος δέ τοί ἐστιν. |
| 405 | Primary τὴν δʼ αὖτʼ Αὐτόλυκος ἀπαμείβετο φώνησέν τε· |
| 406 | Primary γαμβρὸς ἐμὸς θυγάτηρ τε, τίθεσθʼ ὄνομʼ ὅττι κεν εἴπω· |
| 407 | Primary πολλοῖσιν γὰρ ἐγώ γε ὀδυσσάμενος τόδʼ ἱκάνω, |
| 408 | Primary ἀνδράσιν ἠδὲ γυναιξὶν ἀνὰ χθόνα πουλυβότειραν· |
| 409 | Primary τῷ δʼ Ὀδυσεὺς ὄνομʼ ἔστω ἐπώνυμον· αὐτὰρ ἐγώ γε, |
| 410 | Primary ὁππότʼ ἂν ἡβήσας μητρώϊον ἐς μέγα δῶμα |
| 411 | Primary ἔλθῃ Παρνησόνδʼ, ὅθι πού μοι κτήματʼ ἔασι, |
| 412 | Primary τῶν οἱ ἐγὼ δώσω καί μιν χαίροντʼ ἀποπέμψω. |
| 413 | Primary τῶν ἕνεκʼ ἦλθʼ Ὀδυσεύς, ἵνα οἱ πόροι ἀγλαὰ δῶρα. |
| 414 | Primary τὸν μὲν ἄρʼ Αὐτόλυκός τε καὶ υἱέες Αὐτολύκοιο |
| 415 | Primary χερσίν τʼ ἠσπάζοντο ἔπεσσί τε μειλιχίοισι· |
| 416 | Primary μήτηρ δʼ Ἀμφιθέη μητρὸς περιφῦσʼ Ὀδυσῆϊ |
| 417 | Primary κύσσʼ ἄρα μιν κεφαλήν τε καὶ ἄμφω φάεα καλά. |
| 418 | Primary Αὐτόλυκος δʼ υἱοῖσιν ἐκέκλετο κυδαλίμοισι |
| 419 | Primary δεῖπνον ἐφοπλίσσαι· τοὶ δʼ ὀτρύνοντος ἄκουσαν, |
| 420 | Primary αὐτίκα δʼ εἰσάγαγον βοῦν ἄρσενα πενταέτηρον· |
| 421 | Primary τὸν δέρον ἀμφί θʼ ἕπον, καί μιν διέχευαν ἅπαντα, |
| 422 | Primary μίστυλλόν τʼ ἄρʼ ἐπισταμένως πεῖράν τʼ ὀβελοῖσιν, |
| 423 | Primary ὤπτησάν τε περιφραδέως, δάσσαντό τε μοίρας. |
| 424 | Primary ὣς τότε μὲν πρόπαν ἦμαρ ἐς ἠέλιον καταδύντα |
| 425 | Primary δαίνυντʼ, οὐδέ τι θυμὸς ἐδεύετο δαιτὸς ἐΐσης· |
| 426 | Primary ἦμος δʼ ἠέλιος κατέδυ καὶ ἐπὶ κνέφας ἦλθεν, |
| 427 | Primary δὴ τότε κοιμήσαντο καὶ ὕπνου δῶρον ἕλοντο. |
| 428 | Primary ἦμος δʼ ἠριγένεια φάνη ῥοδοδάκτυλος Ἠώς, |
| 429 | Primary βάν ῥʼ ἴμεν ἐς θήρην, ἠμὲν κύνες ἠδὲ καὶ αὐτοὶ |
| 430 | Primary υἱέες Αὐτολύκου· μετὰ τοῖσι δὲ δῖος Ὀδυσσεὺς |
| 431 | Primary ἤϊεν· αἰπὺ δʼ ὄρος προσέβαν καταειμένον ὕλῃ |
| 432 | Primary Παρνησοῦ, τάχα δʼ ἵκανον πτύχας ἠνεμοέσσας. |
| 433 | Primary Ἠέλιος μὲν ἔπειτα νέον προσέβαλλεν ἀρούρας |
| 434 | Primary ἐξ ἀκαλαρρείταο βαθυρρόου Ὠκεανοῖο, |
| 435 | Primary οἱ δʼ ἐς βῆσσαν ἵκανον ἐπακτῆρες· πρὸ δʼ ἄρʼ αὐτῶν |
| 436 | Primary ἴχνιʼ ἐρευνῶντες κύνες ἤϊσαν, αὐτὰρ ὄπισθεν |
| 437 | Primary υἱέες Αὐτολύκου· μετὰ τοῖσι δὲ δῖος Ὀδυσσεὺς |
| 438 | Primary ἤϊεν ἄγχι κυνῶν, κραδάων δολιχόσκιον ἔγχος. |
| 439 | Primary ἔνθα δʼ ἄρʼ ἐν λόχμῃ πυκινῇ κατέκειτο μέγας σῦς· |
| 440 | Primary τὴν μὲν ἄρʼ οὔτʼ ἀνέμων διάει μένος ὑγρὸν ἀέντων, |
| 441 | Primary οὔτε μιν Ἠέλιος φαέθων ἀκτῖσιν ἔβαλλεν, |
| 442 | Primary οὔτʼ ὄμβρος περάασκε διαμπερές· ὣς ἄρα πυκνὴ |
| 443 | Primary ἦεν, ἀτὰρ φύλλων ἐνέην χύσις ἤλιθα πολλή. |
| 444 | Primary τὸν δʼ ἀνδρῶν τε κυνῶν τε περὶ κτύπος ἦλθε ποδοῖϊν, |
| 445 | Primary ὡς ἐπάγοντες ἐπῇσαν· ὁ δʼ ἀντίος ἐκ ξυλόχοιο |
| 446 | Primary φρίξας εὖ λοφιήν, πῦρ δʼ ὀφθαλμοῖσι δεδορκώς, |
| 447 | Primary στῆ ῥʼ αὐτῶν σχεδόθεν· ὁ δʼ ἄρα πρώτιστος Ὀδυσσεὺς |
| 448 | Primary ἔσσυτʼ ἀνασχόμενος δολιχὸν δόρυ χειρὶ παχείῃ, |
| 449 | Primary οὐτάμεναι μεμαώς· ὁ δέ μιν φθάμενος ἔλασεν σῦς |
| 450 | Primary γουνὸς ὕπερ, πολλὸν δὲ διήφυσε σαρκὸς ὀδόντι |
| 451 | Primary λικριφὶς ἀΐξας, οὐδʼ ὀστέον ἵκετο φωτός. |
| 452 | Primary τὸν δʼ Ὀδυσεὺς οὔτησε τυχὼν κατὰ δεξιὸν ὦμον, |
| 453 | Primary ἀντικρὺ δὲ διῆλθε φαεινοῦ δουρὸς ἀκωκή· |
| 454 | Primary κὰδ δʼ ἔπεσʼ ἐν κονίῃσι μακών, ἀπὸ δʼ ἔπτατο θυμός. |
| 455 | Primary τὸν μὲν ἄρʼ Αὐτολύκου παῖδες φίλοι ἀμφεπένοντο, |
| 456 | Primary ὠτειλὴν δʼ Ὀδυσῆος ἀμύμονος ἀντιθέοιο |
| 457 | Primary δῆσαν ἐπισταμένως, ἐπαοιδῇ δʼ αἷμα κελαινὸν |
| 458 | Primary ἔσχεθον, αἶψα δʼ ἵκοντο φίλου πρὸς δώματα πατρός. |
| 459 | Primary τὸν μὲν ἄρʼ Αὐτόλυκός τε καὶ υἱέες Αὐτολύκοιο |
| 460 | Primary εὖ ἰησάμενοι ἠδʼ ἀγλαὰ δῶρα πορόντες |
| 461 | Primary καρπαλίμως χαίροντα φίλην ἐς πατρίδʼ ἔπεμπον |
| 462 | Primary εἰς Ἰθάκην. τῷ μέν ῥα πατὴρ καὶ πότνια μήτηρ |
| 463 | Primary χαῖρον νοστήσαντι καὶ ἐξερέεινον ἕκαστα, |
| 464 | Primary οὐλὴν ὅττι πάθοι· ὁ δʼ ἄρα σφίσιν εὖ κατέλεξεν |
| 465 | Primary ὥς μιν θηρεύοντʼ ἔλασεν σῦς λευκῷ ὀδόντι, |
| 466 | Primary Παρνησόνδʼ ἐλθόντα σὺν υἱάσιν Αὐτολύκοιο. |
| 467 | Primary τὴν γρηῢς χείρεσσι καταπρηνέσσι λαβοῦσα |
| 468 | Primary γνῶ ῥʼ ἐπιμασσαμένη, πόδα δὲ προέηκε φέρεσθαι· |
| 469 | Primary ἐν δὲ λέβητι πέσε κνήμη, κανάχησε δὲ χαλκός, |
| 470 | Primary ἂψ δʼ ἑτέρωσʼ ἐκλίθη· τὸ δʼ ἐπὶ χθονὸς ἐξέχυθʼ ὕδωρ. |
| 471 | Primary τὴν δʼ ἅμα χάρμα καὶ ἄλγος ἕλε φρένα, τὼ δέ οἱ ὄσσε |
| 472 | Primary δακρυόφι πλῆσθεν, θαλερὴ δέ οἱ ἔσχετο φωνή. |
| 473 | Primary ἁψαμένη δὲ γενείου Ὀδυσσῆα προσέειπεν· |
| 474 | Primary ἦ μάλʼ Ὀδυσσεύς ἐσσι, φίλον τέκος· οὐδέ σʼ ἐγώ γε |
| 475 | Primary πρὶν ἔγνων, πρὶν πάντα ἄνακτʼ ἐμὸν ἀμφαφάασθαι. |
| 476 | Primary ἦ καὶ Πηνελόπειαν ἐσέδρακεν ὀφθαλμοῖσι, |
| 477 | Primary πεφραδέειν ἐθέλουσα φίλον πόσιν ἔνδον ἐόντα. |
| 478 | Primary ἡ δʼ οὔτʼ ἀθρῆσαι δύνατʼ ἀντίη οὔτε νοῆσαι· |
| 479 | Primary τῇ γὰρ Ἀθηναίη νόον ἔτραπεν· αὐτὰρ Ὀδυσσεὺς |
| 480 | Primary χεῖρʼ ἐπιμασσάμενος φάρυγος λάβε δεξιτερῆφι, |
| 481 | Primary τῇ δʼ ἑτέρῃ ἕθεν ἆσσον ἐρύσσατο φώνησέν τε. |
| 482 | Primary μαῖα, τίη μʼ ἐθέλεις ὀλέσαι; σὺ δέ μʼ ἔτρεφες αὐτὴ |
| 483 | Primary τῷ σῷ ἐπὶ μαζῷ· νῦν δʼ ἄλγεα πολλὰ μογήσας |
| 484 | Primary ἤλυθον εἰκοστῷ ἔτεϊ ἐς πατρίδα γαῖαν. |
| 485 | Primary ἀλλʼ ἐπεὶ ἐφράσθης καί τοι θεὸς ἔμβαλε θυμῷ, |
| 486 | Primary σίγα, μή τίς τʼ ἄλλος ἐνὶ μεγάροισι πύθηται. |
| 487 | Primary ὧδε γὰρ ἐξερέω, καὶ μὴν τετελεσμένον ἔσται· |
| 488 | Primary εἴ χʼ ὑπʼ ἐμοί γε θεὸς δαμάσῃ μνηστῆρας ἀγαυούς, |
| 489 | Primary οὐδὲ τροφοῦ οὔσης σεῦ ἀφέξομαι, ὁππότʼ ἂν ἄλλας |
| 490 | Primary δμῳὰς ἐν μεγάροισιν ἐμοῖς κτείνωμι γυναῖκας. |
| 491 | Primary τὸν δʼ αὖτε προσέειπε περίφρων Εὐρύκλεια· |
| 492 | Primary τέκνον ἐμόν, ποῖόν σε ἔπος φύγεν ἕρκος ὀδόντων. |
| 493 | Primary οἶσθα μὲν οἷον ἐμὸν μένος ἔμπεδον οὐδʼ ἐπιεικτόν, |
| 494 | Primary ἕξω δʼ ὡς ὅτε τις στερεὴ λίθος ἠὲ σίδηρος. |
| 495 | Primary ἄλλο δέ τοι ἐρέω, σὺ δʼ ἐνὶ φρεσὶ βάλλεο σῇσιν· |
| 496 | Primary εἴ χʼ ὑπό σοι γε θεὸς δαμάσῃ μνηστῆρας ἀγαυούς, |
| 497 | Primary δὴ τότε τοι καταλέξω ἐνὶ μεγάροισι γυναῖκας, |
| 498 | Primary αἵ τέ σʼ ἀτιμάζουσι καὶ αἳ νηλείτιδές εἰσι. |
| 499 | Primary τὴν δʼ ἀπαμειβόμενος προσέφη πολύμητις Ὀδυσσεύς |
| 500 | Primary μαῖα, τίη δὲ σὺ τὰς μυθήσεαι; οὐδέ τί σε χρή. |
| 501 | Primary εὖ νυ καὶ αὐτὸς ἐγὼ φράσομαι καὶ εἴσομʼ ἑκάστην· |
| 502 | Primary ἀλλʼ ἔχε σιγῇ μῦθον, ἐπίτρεψον δὲ θεοῖσιν. |
| 503 | Primary ὣς ἄρʼ ἔφη, γρηῢς δὲ διὲκ μεγάροιο βεβήκει |
| 504 | Primary οἰσομένη ποδάνιπτρα· τὰ γὰρ πρότερʼ ἔκχυτο πάντα. |
| 505 | Primary αὐτὰρ ἐπεὶ νίψεν τε καὶ ἤλειψεν λίπʼ ἐλαίῳ, |
| 506 | Primary αὖτις ἄρʼ ἀσσοτέρω πυρὸς ἕλκετο δίφρον Ὀδυσσεὺς |
| 507 | Primary θερσόμενος, οὐλὴν δὲ κατὰ ῥακέεσσι κάλυψε. |
| 508 | Primary τοῖσι δὲ μύθων ἦρχε περίφρων Πηνελόπεια· |
| 509 | Primary ξεῖνε, τὸ μέν σʼ ἔτι τυτθὸν ἐγὼν εἰρήσομαι αὐτή· |
| 510 | Primary καὶ γὰρ δὴ κοίτοιο τάχʼ ἔσσεται ἡδέος ὥρη, |
| 511 | Primary ὅν τινά γʼ ὕπνος ἕλοι γλυκερός, καὶ κηδόμενόν περ. |
| 512 | Primary αὐτὰρ ἐμοὶ καὶ πένθος ἀμέτρητον πόρε δαίμων· |
| 513 | Primary ἤματα μὲν γὰρ τέρπομʼ ὀδυρομένη, γοόωσα, |
| 514 | Primary ἔς τʼ ἐμὰ ἔργʼ ὁρόωσα καὶ ἀμφιπόλων ἐνὶ οἴκῳ· |
| 515 | Primary αὐτὰρ ἐπὴν νὺξ ἔλθῃ, ἕλῃσί τε κοῖτος ἅπαντας, |
| 516 | Primary κεῖμαι ἐνὶ λέκτρῳ, πυκιναὶ δέ μοι ἀμφʼ ἀδινὸν κῆρ |
| 517 | Primary ὀξεῖαι μελεδῶνες ὀδυρομένην ἐρέθουσιν. |
| 518 | Primary ὡς δʼ ὅτε Πανδαρέου κούρη, χλωρηῒς ἀηδών, |
| 519 | Primary καλὸν ἀείδῃσιν ἔαρος νέον ἱσταμένοιο, |
| 520 | Primary δενδρέων ἐν πετάλοισι καθεζομένη πυκινοῖσιν, |
| 521 | Primary ἥ τε θαμὰ τρωπῶσα χέει πολυηχέα φωνήν, |
| 522 | Primary παῖδʼ ὀλοφυρομένη Ἴτυλον φίλον, ὅν ποτε χαλκῷ |
| 523 | Primary κτεῖνε διʼ ἀφραδίας, κοῦρον Ζήθοιο ἄνακτος, |
| 524 | Primary ὣς καὶ ἐμοὶ δίχα θυμὸς ὀρώρεται ἔνθα καὶ ἔνθα, |
| 525 | Primary ἠὲ μένω παρὰ παιδὶ καὶ ἔμπεδα πάντα φυλάσσω, |
| 526 | Primary κτῆσιν ἐμήν, δμῶάς τε καὶ ὑψερεφὲς μέγα δῶμα, |
| 527 | Primary εὐνήν τʼ αἰδομένη πόσιος δήμοιό τε φῆμιν, |
| 528 | Primary ἦ ἤδη ἅμʼ ἕπωμαι Ἀχαιῶν ὅς τις ἄριστος |
| 529 | Primary μνᾶται ἐνὶ μεγάροισι, πορὼν ἀπερείσια ἕδνα. |
| 530 | Primary παῖς δʼ ἐμὸς ἧος ἔην ἔτι νήπιος ἠδὲ χαλίφρων, |
| 531 | Primary γήμασθʼ οὔ μʼ εἴα πόσιος κατὰ δῶμα λιποῦσαν· |
| 532 | Primary νῦν δʼ ὅτε δὴ μέγας ἐστὶ καὶ ἥβης μέτρον ἱκάνει, |
| 533 | Primary καὶ δή μʼ ἀρᾶται πάλιν ἐλθέμεν ἐκ μεγάροιο, |
| 534 | Primary κτήσιος ἀσχαλόων, τήν οἱ κατέδουσιν Ἀχαιοί. |
| 535 | Primary ἀλλʼ ἄγε μοι τὸν ὄνειρον ὑπόκριναι καὶ ἄκουσον. |
| 536 | Primary χῆνές μοι κατὰ οἶκον ἐείκοσι πυρὸν ἔδουσιν |
| 537 | Primary ἐξ ὕδατος, καί τέ σφιν ἰαίνομαι εἰσορόωσα· |
| 538 | Primary ἐλθὼν δʼ ἐξ ὄρεος μέγας αἰετὸς ἀγκυλοχείλης |
| 539 | Primary πᾶσι κατʼ αὐχένας ἦξε καὶ ἔκτανεν· οἱ δʼ ἐκέχυντο |
| 540 | Primary ἀθρόοι ἐν μεγάροις, ὁ δʼ ἐς αἰθέρα δῖαν ἀέρθη. |
| 541 | Primary αὐτὰρ ἐγὼ κλαῖον καὶ ἐκώκυον ἔν περ ὀνείρῳ, |
| 542 | Primary ἀμφὶ δʼ ἔμʼ ἠγερέθοντο ἐϋπλοκαμῖδες Ἀχαιαί, |
| 543 | Primary οἴκτρʼ ὀλοφυρομένην ὅ μοι αἰετὸς ἔκτανε χῆνας. |
| 544 | Primary ἂψ δʼ ἐλθὼν κατʼ ἄρʼ ἕζετʼ ἐπὶ προὔχοντι μελάθρῳ, |
| 545 | Primary φωνῇ δὲ βροτέῃ κατερήτυε φώνησέν τε· |
| 546 | Primary θάρσει, Ἰκαρίου κούρη τηλεκλειτοῖο· |
| 547 | Primary οὐκ ὄναρ, ἀλλʼ ὕπαρ ἐσθλόν, ὅ τοι τετελεσμένον ἔσται. |
| 548 | Primary χῆνες μὲν μνηστῆρες, ἐγὼ δέ τοι αἰετὸς ὄρνις |
| 549 | Primary ἦα πάρος, νῦν αὖτε τεὸς πόσις εἰλήλουθα, |
| 550 | Primary ὃς πᾶσι μνηστῆρσιν ἀεικέα πότμον ἐφήσω. |
| 551 | Primary ὣς ἔφατʼ, αὐτὰρ ἐμὲ μελιηδὴς ὕπνος ἀνῆκε· |
| 552 | Primary παπτήνασα δὲ χῆνας ἐνὶ μεγάροισι νόησα |
| 553 | Primary πυρὸν ἐρεπτομένους παρὰ πύελον, ἧχι πάρος περ. |
| 554 | Primary τὴν δʼ ἀπαμειβόμενος προσέφη πολύμητις Ὀδυσσεύς· |
| 555 | Primary ὦ γύναι, οὔ πως ἔστιν ὑποκρίνασθαι ὄνειρον |
| 556 | Primary ἄλλῃ ἀποκλίναντʼ, ἐπεὶ ἦ ῥά τοι αὐτὸς Ὀδυσσεὺς |
| 557 | Primary πέφραδʼ ὅπως τελέει· μνηστῆρσι δὲ φαίνετʼ ὄλεθρος |
| 558 | Primary πᾶσι μάλʼ, οὐδέ κέ τις θάνατον καὶ κῆρας ἀλύξει. |
| 559 | Primary τὸν δʼ αὖτε προσέειπε περίφρων Πηνελόπεια· |
| 560 | Primary ξεῖνʼ, ἦ τοι μὲν ὄνειροι ἀμήχανοι ἀκριτόμυθοι |
| 561 | Primary γίγνοντʼ, οὐδέ τι πάντα τελείεται ἀνθρώποισι. |
| 562 | Primary δοιαὶ γάρ τε πύλαι ἀμενηνῶν εἰσὶν ὀνείρων· |
| 563 | Primary αἱ μὲν γὰρ κεράεσσι τετεύχαται, αἱ δʼ ἐλέφαντι· |
| 564 | Primary τῶν οἳ μέν κʼ ἔλθωσι διὰ πριστοῦ ἐλέφαντος, |
| 565 | Primary οἵ ῥʼ ἐλεφαίρονται, ἔπεʼ ἀκράαντα φέροντες· |
| 566 | Primary οἱ δὲ διὰ ξεστῶν κεράων ἔλθωσι θύραζε, |
| 567 | Primary οἵ ῥʼ ἔτυμα κραίνουσι, βροτῶν ὅτε κέν τις ἴδηται. |
| 568 | Primary ἀλλʼ ἐμοὶ οὐκ ἐντεῦθεν ὀΐομαι αἰνὸν ὄνειρον |
| 569 | Primary ἐλθέμεν· ἦ κʼ ἀσπαστὸν ἐμοὶ καὶ παιδὶ γένοιτο. |
| 570 | Primary ἄλλο δέ τοι ἐρέω, σὺ δʼ ἐνὶ φρεσὶ βάλλεο σῇσιν· |
| 571 | Primary ἥδε δὴ ἠὼς εἶσι δυσώνυμος, ἥ μʼ Ὀδυσῆος |
| 572 | Primary οἴκου ἀποσχήσει· νῦν γὰρ καταθήσω ἄεθλον, |
| 573 | Primary τοὺς πελέκεας, τοὺς κεῖνος ἐνὶ μεγάροισιν ἑοῖσιν |
| 574 | Primary ἵστασχʼ ἑξείης, δρυόχους ὥς, δώδεκα πάντας· |
| 575 | Primary στὰς δʼ ὅ γε πολλὸν ἄνευθε διαρρίπτασκεν ὀϊστόν. |
| 576 | Primary νῦν δὲ μνηστήρεσσιν ἄεθλον τοῦτον ἐφήσω· |
| 577 | Primary ὃς δέ κε ῥηΐτατʼ ἐντανύσῃ βιὸν ἐν παλάμῃσι |
| 578 | Primary καὶ διοϊστεύσῃ πελέκεων δυοκαίδεκα πάντων, |
| 579 | Primary τῷ κεν ἅμʼ ἑσποίμην, νοσφισσαμένη τόδε δῶμα |
| 580 | Primary κουρίδιον, μάλα καλόν, ἐνίπλειον βιότοιο· |
| 581 | Primary τοῦ ποτὲ μεμνήσεσθαι ὀΐομαι ἔν περ ὀνείρῳ. |
| 582 | Primary τὴν δʼ ἀπαμειβόμενος προσέφη πολύμητις Ὀδυσσεύς |
| 583 | Primary ὦ γύναι αἰδοίη Λαερτιάδεω Ὀδυσῆος, |
| 584 | Primary μηκέτι νῦν ἀνάβαλλε δόμοις ἔνι τοῦτον ἄεθλον· |
| 585 | Primary πρὶν γάρ τοι πολύμητις ἐλεύσεται ἐνθάδʼ Ὀδυσσεύς, |
| 586 | Primary πρὶν τούτους τόδε τόξον ἐΰξοον ἀμφαφόωντας |
| 587 | Primary νευρήν τʼ ἐντανύσαι διοϊστεῦσαί τε σιδήρου. |
| 588 | Primary τὸν δʼ αὖτε προσέειπε περίφρων Πηνελόπεια· |
| 589 | Primary εἴ κʼ ἐθέλοις μοι, ξεῖνε, παρήμενος ἐν μεγάροισι |
| 590 | Primary τέρπειν, οὔ κέ μοι ὕπνος ἐπὶ βλεφάροισι χυθείη. |
| 591 | Primary ἀλλʼ οὐ γάρ πως ἔστιν ἀΰπνους ἔμμεναι αἰεὶ |
| 592 | Primary ἀνθρώπους· ἐπὶ γάρ τοι ἑκάστῳ μοῖραν ἔθηκαν |
| 593 | Primary ἀθάνατοι θνητοῖσιν ἐπὶ ζείδωρον ἄρουραν. |
| 594 | Primary ἀλλʼ ἦ τοι μὲν ἐγὼν ὑπερώϊον εἰσαναβᾶσα |
| 595 | Primary λέξομαι εἰς εὐνήν, ἥ μοι στονόεσσα τέτυκται, |
| 596 | Primary αἰεὶ δάκρυσʼ ἐμοῖσι πεφυρμένη, ἐξ οὗ Ὀδυσσεὺς |
| 597 | Primary ᾤχετʼ ἐποψόμενος Κακοΐλιον οὐκ ὀνομαστήν. |
| 598 | Primary ἔνθα κε λεξαίμην· σὺ δὲ λέξεο τῷδʼ ἐνὶ οἴκῳ, |
| 599 | Primary ἢ χαμάδις στορέσας ἤ τοι κατὰ δέμνια θέντων. |
| 600 | Primary ὣς εἰποῦσʼ ἀνέβαινʼ ὑπερώϊα σιγαλόεντα, |
| 601 | Primary οὐκ οἴη, ἅμα τῇ γε καὶ ἀμφίπολοι κίον ἄλλαι. |
| 602 | Primary ἐς δʼ ὑπερῷʼ ἀναβᾶσα σὺν ἀμφιπόλοισι γυναιξὶ |
| 603 | Primary κλαῖεν ἔπειτʼ Ὀδυσῆα, φίλον πόσιν, ὄφρα οἱ ὕπνον |
| 604 | Primary ἡδὺν ἐπὶ βλεφάροισι βάλε γλαυκῶπις Ἀθήνη. |