Reader
Reader | Sibylline Oracles, Book 4
Sibylline Oracles
Sibylline tradition
Text
Position
Line 0 of 192
Waypoints
| Line Ref | Greek source text | Ancient Greek |
|---|---|
| 0 | Primary Λόγος τέταρτος |
| 1 | Primary Κλῦτε, λεὼς Ἀσίης μεγαλαυχέος Εὐρώπης τε, |
| 2 | Primary ὅσσα μελιφθέγκτοιο διὰ στόματος μεγάροιο |
| 3 | Primary μέλλω ἀφ᾽ ἡμετέρου παναληθέα μαντεύεσθαι· |
| 4 | Primary οὐ ψευδοῦς Φοίβου χρησμηγόρος, ὅντε μάταιοι |
| 5 | Primary ἄνθρωποι θεὸν εἶπον, ἐπεψεύσαντο δὲ μάντιν· |
| 6 | Primary ἀλλὰ θεοῦ μεγάλοιο, τὸν οὐ χέρες ἔπλασαν ἀνδρῶν |
| 7 | Primary εἰδώλοις ἀλάλοισι λιθοξέστοισιν ὅμοιον. |
| 8 | Primary οὐδὲ γὰρ οἶκον ἔχει ναῷ λίθον ἑλκυσθέντα, |
| 9 | Primary κωφότατον νωδόν τε, βροτῶν πολυαλγέα λώβην· |
| 10 | Primary ἀλλ᾽ ὃν ἰδεῖν οὐκ ἔστιν ἀπὸ χθονὸς οὐδὲ μετρῆσαι |
| 11 | Primary ὄμμασιν ἐν θνητοῖς, οὐ πλασθέντα χερὶ θνητῇ· |
| 12 | Primary ὃς καθορῶν ἅμα πάντας ὑπ᾽ οὐδενὸς αὐτὸς ὁρᾶται· |
| 13 | Primary οὗ νύξ τε δνοφερή τε καὶ ἡμέρη ἠέλιός τε |
| 14 | Primary ἄστρα σεληναίη τε καὶ ἰχθυόεσσα θάλασσα |
| 15 | Primary καὶ γῆ καὶ ποταμοί τε καὶ ἀενάων στόμα πηγῶν |
| 16 | Primary κτίσματα πρὸς ζωήν, ὄμβροι θ᾽ ἅμα καρπὸν ἀρούρης |
| 17 | Primary τίκτοντες καὶ δένδρα καὶ ἄμπελον ἠδέ τ᾽ ἐλαίην. |
| 18 | Primary οὗτός μοι μάστιγα διὰ φρενὸς ἤλασεν εἴσω, |
| 19 | Primary ἀνθρώποις ὅσα νῦν τε καὶ ὁππόσα ἔσσεται αὖτις |
| 20 | Primary ἐκ πρώτης γενεῆς ἄχρις ἐς δεκάτην ἀφικέσθαι |
| 21 | Primary ἀτρεκέως καταλέξαι· ἅπαντα γὰρ αὐτὸς ἐλέγξει |
| 22 | Primary ἐξανύων. σὺ δὲ πάντα, λεώς, ἐπάκουε Σιβύλλης |
| 23 | Primary ἐξ ὁσίου στόματος φωνὴν προχέοντος ἀληθῆ. |
| 24 | Primary ὄλβιοι ἀνθρώπων κεῖνοι κατὰ γαῖαν ἔσονται, |
| 25 | Primary ὅσσοι δὴ στέρξουσι μέγαν θεὸν εὐλογέοντες |
| 26 | Primary πρὶν πιέειν φαγέειν τε πεποιθότες εὐσεβίῃσιν· |
| 27 | Primary οἳ νηοὺς μὲν ἅπαντας ἀπαρνήσονται ἰδόντες |
| 28 | Primary καὶ βωμούς, εἰκαῖα λίθων ἀφιδρύματα κωφῶν, |
| 29 | Primary αἵμασιν ἐμψύχων μεμιασμένα καὶ θυσίῃσιν |
| 30 | Primary τετραπόδων· λεύσουσι δ᾽ ἑνὸς θεοῦ εἰς μέγα κῦδος |
| 31 | Primary οὔτε φόνον ῥέξαντες ἀτάσθαλον οὔτε κλοπαῖον |
| 32 | Primary κέρδος ἀπεμπολέοντες, ἃ δὴ ῥίγιστα τέτυκται, |
| 33 | Primary οὐδ᾽ ἄρ᾽ ἐπ᾽ ἀλλοτρίῃ κοίτῃ πόθον αἰσχρὸν ἔχοντες |
| 34 | Primary [οὐδὲ ἐπ᾽ ἄρσενος ὕβριν ἀπεχθέα τε στυγερήν τε]. |
| 35 | Primary ὧν τρόπον εὐσεβίην τε καὶ ἤθεα ἀνέρες ἄλλοι |
| 36 | Primary οὔποτε μιμήσονται ἀναιδείην ποθέοντες· |
| 37 | Primary ἀλλ᾽ αὐτοὺς χλεύῃ τε γέλωτί τε μυχθίζοντες |
| 38 | Primary νήπιοι ἀφροσύνῃσιν ἐπιψεύσονται ἐκείνοις, |
| 39 | Primary ὅσσ᾽ αὐτοὶ ῥέξουσιν ἀτάσθαλα καὶ κακὰ ἔργα. |
| 40 | Primary δύσπιστον γὰρ ἅπαν μερόπων γένος. ἀλλ᾽ ὅταν ἤδη |
| 41 | Primary κόσμου καὶ θνητῶν ἔλθῃ κρίσις, ἣν θεὸς αὐτός |
| 42 | Primary ποιήσει κρίνων ἀσεβεῖς θ᾽ ἅμα εὐσεβέας τε· |
| 43 | Primary καὶ τότε δυσσεβέας μὲν ὑπὸ ζόφον ἐν πυρὶ πέμψει |
| 44 | Primary [καὶ τότ᾽ ἐπιγνώσονται, ὅσην ἀσέβειαν ἔρεξαν]· |
| 45 | Primary εὐσεβέες δὲ μενοῦσιν ἐπὶ ζείδωρον ἄρουραν |
| 46 | Primary πνεῦμα θεοῦ δόντος ζωήν θ᾽ ἅμα καὶ χάριν αὐτοῖς. |
| 47 | Primary ἀλλὰ τὰ μὲν δεκάτῃ γενεῇ μάλα πάντα τελεῖται· |
| 48 | Primary νῦν δ᾽ ὅσ᾽ ἀπὸ πρώτης γενεῆς ἔσται, τάδε λέξω. |
| 49 | Primary πρῶτα μὲν Ἀσσύριοι θνητῶν ἄρξουσιν ἁπάντων |
| 50 | Primary ἓξ γενεὰς κόσμοιο διακρατέοντες ἐν ἀρχῇ, |
| 51 | Primary ἐξ οὗ μηνίσαντος ἐπουρανίοιο θεοῖο |
| 52 | Primary αὐτῇσιν πολίεσσι καὶ ἀνθρώποισιν ἅπασιν |
| 53 | Primary γῆν ἐκάλυψε θάλασσα κατακλυσμοῖο ῥαγέντος. |
| 54 | Primary οὓς Μῆδοι καθελόντες ἐπαυχήσουσι θρόνοισιν, |
| 55 | Primary οἷς γενεαὶ δύο μοῦναι ἐφ᾽ ὧν τάδε ἔσσεται ἔργα· |
| 56 | Primary νὺξ ἔσται σκοτόεσσα μέσῃ ἐνὶ ἤματος ὥρῃ· |
| 57 | Primary ἄστρα δ᾽ ἀπ᾽ οὐρανόθεν λείψει καὶ κύκλα σελήνης· |
| 58 | Primary γῆ δὲ κλόνῳ σεισμοῖο τινασσομένη μεγάλοιο |
| 59 | Primary πολλὰς πρηνίξει πόλιας καὶ ἔργ᾽ ἀνθρώπων· |
| 60 | Primary ἐκ δὲ βυθοῦ τότε νῆσοι ὑπερκύψουσι θαλάσσης. |
| 61 | Primary ἀλλ᾽ ὅταν Εὐφρήτης μέγας αἵματι πλημμύρηται, |
| 62 | Primary καὶ τότε δὴ Μήδοις Πέρσαισί τε φύλοπις αἰνή |
| 63 | Primary στήσεται ἐν πολέμῳ· Περσῶν δ᾽ ὑπὸ δούρασι Μῆδοι |
| 64 | Primary πίπτοντες φεύξονται ὑπὲρ μέγα Τίγριδος ὕδωρ. |
| 65 | Primary Περσῶν δὲ κράτος ἔσται ὅλου κόσμοιο μέγιστον, |
| 66 | Primary οἷς γενεὴ μία κεῖται ἀνακτορίης πολυόλβου. |
| 67 | Primary ἔσται δ᾽, ὅσσα κεν ἄνδρες ἀπεύξωνται, κακὰ ἔργα, |
| 68 | Primary φυλόπιδές τε φόνοι τε διχοστασίαι τε φυγαί τε |
| 69 | Primary πύργων τε πρηνισμοὶ ἀναστασίαι τε πολήων, |
| 70 | Primary Ἑλλὰς ὅταν μεγάλαυχος ἐπὶ πλατὺν Ἑλλήσποντον |
| 71 | Primary πλεύσει Φρυξὶ βαρεῖαν ἰδ᾽ Ἀσίδι κῆρα φέρουσα. |
| 72 | Primary αὐτὰρ ἐς Αἴγυπτον πολυαύλακα πυροφόρον τε |
| 73 | Primary λιμὸς ἀκαρπίη τε περιπλομένων ἐνιαυτῶν |
| 74 | Primary εἴκοσι φοιτήσει, σταχυητρόφος ἡνίκα Νεῖλος |
| 75 | Primary ἄλλοθί που ὑπὸ γαῖαν ἀποκρύψει μέλαν ὕδωρ. |
| 76 | Primary ἥξει δ᾽ ἐξ Ἀσίης βασιλεὺς μέγα ἔγχος ἀείρας |
| 77 | Primary νηυσὶν ἀμετρήτοισιν, τὰ μὲν βυθοῦ ὑγρὰ κέλευθα |
| 78 | Primary πεζεύσει, πλεύσει δὲ ταμὼν ὄρος ὑψικάρηνον· |
| 79 | Primary ὃν φυγάδ᾽ ἐκ πολέμου δειλὴ ὑποδέξεται Ἀσίς. |
| 80 | Primary Σικελίην δὲ τάλαιναν ἐπιφλέξει μάλα πᾶσαν |
| 81 | Primary χεῦμα πυρὸς μεγάλοιο ἐρευγομένης φλογὸς Αἴτνης· |
| 82 | Primary ἠδὲ Κρότων πέσεται μεγάλη πόλις εἰς βαθὺ χεῦμα. |
| 83 | Primary ἔσται δ᾽ Ἑλλάδι νεῖκος· ἐν ἀλλήλοις δὲ μανέντες |
| 84 | Primary πολλὰς πρηνίξουσι πόλεις, πολλοὺς δ᾽ ὀλέσουσιν |
| 85 | Primary μαρνάμενοι· τὸ δὲ νεῖκος ἰσόρροπον ἀλλήλοισιν. |
| 86 | Primary ἀλλ᾽ ὅταν ἐς δεκάτην γενεὴν μερόπων γένος ἔλθῃ, |
| 87 | Primary καὶ τότε Πέρσῃσιν ζυγὰ δούλια καὶ φόβος ἔσται. |
| 88 | Primary αὐτὰρ ἐπεὶ σκήπτροισι Μακηδόνες αὐχήσουσιν, |
| 89 | Primary ἔσται καὶ Θήβῃσι κακὴ μετόπισθεν ἅλωσις, |
| 90 | Primary Κᾶρες δ᾽ οἰκήσουσι Τύρον, Τύριοι δ᾽ ἀπολοῦνται. |
| 91 | Primary καὶ Σάμον ἄμμος ἅπασαν ὑπ᾽ ἠιόνεσσι καλύψει, |
| 92 | Primary Δῆλος δ᾽ οὐκέτι δῆλος, ἄδηλα δὲ πάντα τὰ Δήλου. |
| 93 | Primary καὶ Βαβυλὼν μεγάλη μὲν ἰδεῖν, μικρὴ δὲ μάχεσθαι |
| 94 | Primary στήσεται ἀχρήστοισιν ἐπ᾽ ἐλπίσι τειχισθεῖσα. |
| 95 | Primary Βάκτρα κατοικήσουσι Μακηδόνες· οἳ δ᾽ ὑπὸ Βάκτρων |
| 96 | Primary καὶ Σούσων φεύξονται ἐς Ἑλλάδα γαῖαν ἅπαντες. |
| 97 | Primary ἔσσεται ἐσσομένοις, ὅτε Πύραμος ἀργυροδίνης |
| 98 | Primary ἠιόνα προχέων ἱερὴν ἐς νῆσον ἵκηται. |
| 99 | Primary καὶ σύ, Βάρις, πέσεαι καὶ Κύζικος, ἡνίκα γαίης |
| 100 | Primary βρασσομένης σεισμοῖσιν ὀλισθαίνουσι πόληες. |
| 101 | Primary ἥξει καὶ Ῥοδίοις κακὸν ὕστατον, ἀλλὰ μέγιστον. |
| 102 | Primary οὐδὲ Μακηδονίης ἔσται κράτος· ἀλλ᾽ ἀπὸ δυσμῶν |
| 103 | Primary Ἰταλὸς ἀνθήσει πόλεμος μέγας, ᾧ ὕπο κόσμος |
| 104 | Primary λατρεύσει δούλειον ἔχων ζυγὸν Ἰταλίδῃσιν. |
| 105 | Primary καὶ σύ, τάλαινα Κόρινθε, τεήν ποτ᾽ ἐπόψει ἅλωσιν. |
| 106 | Primary Καρχηδών, καὶ σεῖο χαμαὶ γόνυ πύργος ἐρείσει. |
| 107 | Primary τλῆμον Λαοδίκεια, σὲ δὲ στρώσει ποτὲ σεισμός |
| 108 | Primary πρηνίξας, στήσῃ δὲ πάλιν πόλις ἱδρυνθεῖσα. |
| 109 | Primary ὦ Λυκίης Μύρα καλά, σὲ δ᾽ οὔποτε βρασσομένη χθών |
| 110 | Primary στηρίξει· πρηνὴς δὲ κάτω πίπτουσ᾽ ἐπὶ γαίης |
| 111 | Primary εἰς ἑτέρην εὔξῃ προφυγεῖν χθόνα, οἷα μέτοικος, |
| 112 | Primary ἡνίκα δὴ Πατάρων *ὅμαδόν ποτε δυσσεβίῃσιν |
| 113 | Primary βρονταῖς καὶ σεισμοῖσιν ἁλὸς πετάσει μέλαν ὕδωρ*. |
| 114 | Primary Ἀρμενίη, καὶ σοὶ δὲ μένει δούλειος ἀνάγκη· |
| 115 | Primary ἥξει καὶ Σολύμοισι κακὴ πολέμοιο θύελλα |
| 116 | Primary Ἰταλόθεν, νηὸν δὲ θεοῦ μέγαν ἐξαλαπάξει, |
| 117 | Primary ἡνίκ᾽ ἂν ἀφροσύνῃσι πεποιθότες εὐσεβίην μέν |
| 118 | Primary ῥίψωσιν στυγεροὺς δὲ φόνους τελέωσι πρὸ νηοῦ· |
| 119 | Primary καὶ τότ᾽ ἀπ᾽ Ἰταλίης βασιλεὺς μέγας οἷά τε δράστης |
| 120 | Primary φεύξετ᾽ ἄφαντος ἄπυστος ὑπὲρ πόρον Εὐφρήταο, |
| 121 | Primary ὁππότε δὴ μητρῷον ἄγος στυγεροῖο φόνοιο |
| 122 | Primary τλήσεται ἄλλα τε πολλά, κακῇ σὺν χειρὶ πιθήσας. |
| 123 | Primary πολλοὶ δ᾽ ἀμφὶ θρόνῳ Ῥώμης πέδον αἱμάξουσιν |
| 124 | Primary κείνου ἀποδρήσαντος ὑπὲρ Παρθηίδα γαῖαν. |
| 125 | Primary εἰς Συρίην δ᾽ ἥξει Ῥώμης πρόμος, ὃς πυρὶ νηόν |
| 126 | Primary συμφλέξας Σολύμων, πολλοὺς δ᾽ ἅμα ἀνδροφονήσας |
| 127 | Primary Ἰουδαίων ὀλέσει μεγάλην χθόνα εὐρυάγυιαν. |
| 128 | Primary καὶ τότε δὴ Σαλαμῖνα Πάφον δ᾽ ἅμα σεισμὸς ὀλέσσει, |
| 129 | Primary Κύπρον ὅταν πολύκλυστον ὑπερκλονέῃ μέλαν ὕδωρ. |
| 130 | Primary ἀλλ᾽ ὁπόταν χθονίης ἀπὸ ῥωγάδος Ἰταλίδος γῆς |
| 131 | Primary πυρσὸς ἀποστραφθεὶς εἰς οὐρανὸν εὐρὺν ἵκηται, |
| 132 | Primary πολλὰς δὲ φλέξῃ πόλιας καὶ ἄνδρας ὀλέσσῃ, |
| 133 | Primary πολλὴ δ᾽ αἰθαλόεσσα τέφρη μέγαν αἰθέρα πλήσῃ, |
| 134 | Primary καὶ ψεκάδες πίπτωσιν ἀπ᾽ οὐρανοῦ οἷά τε μίλτος, |
| 135 | Primary γινώσκειν τότε μῆνιν ἐπουρανίοιο θεοῖο, |
| 136 | Primary εὐσεβέων ὅτι φῦλον ἀναίτιον ἐξολέσουσιν. |
| 137 | Primary ἐς δὲ δύσιν τότε νεῖκος ἐγειρομένου πολέμοιο |
| 138 | Primary ἥξει καὶ Ῥώμης ὁ φυγάς, μέγα ἔγχος ἀείρας, |
| 139 | Primary Εὐφρήτην διαβὰς πολλαῖς ἅμα μυριάδεσσιν. |
| 140 | Primary τλήμων Ἀντιόχεια, σὲ δὲ πτόλιν οὔποτ᾽ ἐροῦσιν, |
| 141 | Primary ἡνίκ᾽ ἂν ἀφροσύνῃσι τεαῖς ὑπὸ δούρασι πίπτῃς. |
| 142 | Primary καὶ Κύρρον τότε λοιμὸς ὀλεῖ καὶ φύλοπις αἰνή. |
| 143 | Primary αἰαῖ, Κύπρε τάλαινα, σὲ δὲ πλατὺ κῦμα θαλάσσης |
| 144 | Primary κρύψει χειμερίῃσιν ἀναρριφθεῖσαν ἀέλλαις. |
| 145 | Primary ἥξει δ᾽ εἰς Ἀσίην πλοῦτος μέγας, ὅν ποτε Ῥώμη |
| 146 | Primary αὐτὴ συλήσασα πολυκτέανον κατὰ δῶμα |
| 147 | Primary θήκατο· καὶ δὶς ἔπειτα τοσαῦτα καὶ ἄλλ᾽ ἀποδώσει |
| 148 | Primary εἰς Ἀσίην, τότε δ᾽ ἔσται ὑπέρκτησις πολέμοιο. |
| 149 | Primary Καρῶν δὲ πτολίεθρα παρ᾽ ὕδασι Μαιάνδροιο |
| 150 | Primary ὅσσα πεπύργωνται περικαλλέα, πικρὸς ὀλέσσει |
| 151 | Primary λιμός, ὅταν Μαίανδρος ἀποκρύψῃ μέλαν ὕδωρ. |
| 152 | Primary ἀλλ᾽ ὅταν εὐσεβίης μὲν ἀπ᾽ ἀνθρώπων ἀπόληται |
| 153 | Primary πίστις καὶ τὸ δίκαιον ἀποκρυφθῇ ἐνὶ κόσμῳ, |
| 154 | Primary --. παλίμβολοι --. ἐπ᾽ οὐχ ὁσίοισι δὲ τόλμαις |
| 155 | Primary ζῶντες ὕβριν ῥέξωσιν, ἀτάσθαλα καὶ κακὰ ἔργα, |
| 156 | Primary εὐσεβέων δ᾽ οὐδεὶς ποιῇ λόγον, ἀλλὰ καὶ αὐτούς |
| 157 | Primary πάντας ὑπ᾽ ἀφροσύνης μέγα νήπιοι ἐξολέσωσιν |
| 158 | Primary ὕβρεσι χαίροντες καὶ ἐφ᾽ αἵμασι χεῖρας ἔχοντες· |
| 159 | Primary καὶ τότε γινώσκειν θεὸν οὐκέτι πρηῢν ἐόντα, |
| 160 | Primary ἀλλὰ χόλῳ βρύχοντα καὶ ἐξολέκοντα γενέθλην |
| 161 | Primary ἀνθρώπων ἅμα πᾶσαν ὑπ᾽ ἐμπρησμοῦ μεγάλοιο. |
| 162 | Primary ἆ μέλεοι, μετάθεσθε, βροτοί, τάδε, μηδὲ πρὸς ὀργήν |
| 163 | Primary παντοίην ἀγάγητε θεὸν μέγαν, ἀλλὰ μεθέντες |
| 164 | Primary φάσγανα καὶ στοναχὰς ἀνδροκτασίας τε καὶ ὕβρεις |
| 165 | Primary ἐν ποταμοῖς λούσασθε ὅλον δέμας ἀενάοισιν, |
| 166 | Primary χεῖράς τ᾽ ἐκτανύσαντες ἐς αἰθέρα τῶν πάρος ἔργων |
| 167 | Primary συγγνώμην αἰτεῖσθε καὶ εὐλογίαις ἀσέβειαν |
| 168 | Primary πικρὰν ἱλάσκεσθε· θεὸς δώσει μετάνοιαν |
| 169 | Primary οὐδ᾽ ὀλέσει· παύσει δὲ χόλον πάλιν, ἤνπερ ἅπαντες |
| 170 | Primary εὐσεβίην περίτιμον ἐνὶ φρεσὶν ἀσκήσητε. |
| 171 | Primary εἰ δ᾽ οὔ μοι πείθοισθε κακόφρονες, ἀλλ᾽ ἀσέβειαν |
| 172 | Primary στέργοντες τάδε πάντα κακαῖς δέξαισθε ἀκουαῖς, |
| 173 | Primary πῦρ ἔσται κατὰ κόσμον ὅλον καὶ σῆμα μέγιστον |
| 174 | Primary ῥομφαίᾳ σάλπιγγι, ἅμ᾽ ἠελίῳ ἀνιόντι· |
| 175 | Primary κόσμος ἅπας μύκημα καὶ ὄμβριμον ἦχον ἀκούσει. |
| 176 | Primary φλέξει δὲ χθόνα πᾶσαν, ἅπαν δ᾽ ὀλέσει γένος ἀνδρῶν |
| 177 | Primary καὶ πάσας πόλιας ποταμούς θ᾽ ἅμα ἠδὲ θάλασσαν· |
| 178 | Primary ἐκκαύσει δέ τε πάντα, κόνις δ᾽ ἔσετ᾽ αἰθαλόεσσα. |
| 179 | Primary ἀλλ᾽ ὅταν ἤδη πάντα τέφρη σποδόεσσα γένηται |
| 180 | Primary καὶ πῦρ κοιμήσῃ θεὸς ἄσπετον, ὥσπερ ἀνῆψεν, |
| 181 | Primary ὀστέα καὶ σποδιὴν αὐτὸς θεὸς ἔμπαλιν ἀνδρῶν |
| 182 | Primary μορφώσει, στήσει δὲ βροτοὺς πάλιν, ὡς πάρος ἦσαν. |
| 183 | Primary καὶ τότε δὴ κρίσις ἔσσετ᾽, ἐφ᾽ ᾗ δικάσει θεὸς αὐτός |
| 184 | Primary κρίνων ἔμπαλι κόσμον· ὅσοι δ᾽ ὑπὸ δυσσεβίῃσιν |
| 185 | Primary ἥμαρτον, τοὺς δ᾽ αὖτε χυτὴ κατὰ γαῖα καλύψει |
| 186 | Primary Τάρταρά τ᾽ εὐρώεντα μυχοὶ στύγιοί τε γεέννης. |
| 187 | Primary ὅσσοι δ᾽ εὐσεβέουσι, πάλιν ζήσοντ᾽ ἐπὶ γαῖαν |
| 188 | Primary ἀθανάτου μεγάλοιο θεοῦ καὶ ἄφθιτον ὄλβον |
| 189 | Primary πνεῦμα θεοῦ δόντος ζωήν θ᾽ ἅμα καὶ χάριν αὐτοῖς |
| 190 | Primary εὐσεβέσιν· πάντες δὲ τότ᾽ εἰσόψονται ἑαυτούς |
| 191 | Primary νήδυμον ἠελίου τερπνὸν φάος εἰσορόωντες. |
| 192 | Primary ὦ μακαριστός, ἐκεῖνον ὃς ἐς χρόνον ἔσσεται ἀνήρ. |